اگست کے آغاز میں تعلیمی اداروں سے فارغ التحصیل ہونے کے بعد بلوچستان کے نوجوانوں کی بڑی تعداد وفاقی اور صوبائی پبلک سروس کمیشن کے امتحان کی تیاری کرنے لگتی ہے۔ اس مقصد کے لیے یہ نوجوان ملک کے بڑے شہروں جیسا کہ لاہور، کراچی اور صوبائی دارالحکومت کوئٹہ کا رخ بھی کرتے ہیں جہاں وہ خصوصی کلاسیں لینے کے ساتھ لائبریریوں میں مطالعہ کرتے ہیں۔ تاہم اس مرتبہ ان امیدواروں پر ایک مشکل آن پڑی ہے۔

سی ایس ایس کاخصوصی امتحان (سپیشل سی ایس ایس کمپیٹیٹو اگزامینیشن) رواں برس 12 اکتوبر سے شروع ہو رہا ہے۔ دوسری جانب بلوچستان پبلک سروس کمیشن نے امتحانات کی تاریخ 26 اگست مقرر کر دی ہے۔ یہ پی سی ایس امتحانات اسسٹنٹ کمشنر، سیکشن آفیسر اور سروس اینڈ جنرل ایڈمنسٹریشن گریڈ 17 کی نشستوں کے لیے ہونے ہیں۔

امیدواروں کی بڑی تعداد مطالبہ کر رہی ہے کہ بلوچستان پبلک سروس کمیشن اپنے امتحانات خصوصی سی ایس ایس امتحان کے بعد لے۔ ان امیدواروں نے کوئٹہ پریس کلب اور بلوچستان اسمبلی کے سامنے اپنا احتجاج ریکارڈ کرایا ہے۔ وہ سوشل میڈیا پر بھی اپنے مطالبے کے حق میں مہم چلا رہے ہیں۔

نادرعلی نامی امیدوار کہتے ہیں کہ اصولی طور پر پہلے وہ امتحانات منعقد ہونے چاہئیں جن کی ڈیٹ شیٹ پہلے آ چکی ہے۔ سپیشل سی ایس ایس کی ڈیٹ شیٹ پی سی ایس کی ڈیٹ شیٹ سے 15 دن پہلے آئی ہے۔ اس صورت میں پہلے سپیشل سی ایس ایس کا امتحان منعقد ہونا چاہیے جس کے لیے یہامیدوار کافی مدت سے محنت کر رہے ہیں۔

ان کا کہنا ہے کہ سپیشل سی ایس ایس کی ڈیٹ شیٹ آنے پر تمام امیدواروں کی توجہ اس امتحان کی طرف ہو گئی ہے اور اس کے بعد اچانک پی سی ایس کے امتحانات کا اعلان کر دیا گیا۔ اگر امیدوار پی سی ایس کے امتحان میں شرکت کریں گے تو سی ایس ایس سپیشل کے امتحان کی تیاری متاثر ہو گی۔

احتجاج میں شریک ایک امیدوار نے اپنا نام ظاہر نہ کرنے کی شرط پر بتایا کہ&nbsp; سپیشل سی ایس ایس کا امتحان 40 سال بعد منعقد ہو رہا ہے لیکن سوچے سمجھے انداز میں پہلے پی سی ایس کے امتحانات لے کر بلوچستان کے امیدواروں کے لیے مشکلات پیدا کی جارہی ہیں۔

مقابلے کا خصوصی امتحان سی ایس ایس کے امتحانات میں خالی رہ جانے والی اسامیوں پُر کرنے کے لیے لیا جاتا ہے۔ موجودہ امتحانات میں پنجاب اور آزاد کشمیر سے اقلیتیں، خیبر پختونخوا سے خواتین اور اقلیتیں جبکہ سندھ، بلوچستان اور سابق قبائلی اضلاع سے عام امیدوار حصہ لیں گے۔ یہ امتحان رواں برس فروری میں ہونا تھا لیکن مزید اسامیاں شامل کرکے اسے آگے کی تاریخ رکھ دی گئی۔

بلوچستان پبلک سروس کمیشن موسم کی مناسبت سے اکثر امتحانات گرمیوں میں لیتا ہے تاہم ماضی میں یہ امتحان جنوری اور دسمبر میں بھی ہو چکے ہیں۔

نیشنل پارٹی کے رہنما و سینیٹر طاہر بزنجو نے سماجی رابطے کی ویب سائٹ ٹویٹر پر تشویش کا اظہار کرتے ہوئے لکھا&nbsp; ہے کہ بلوچستان پبلک سروس کمیشن کی جانب سے سی ایس ایس سپیشل کے امتحانات سے ایک مہینہ قبل پی سی ایس کے امتحان کا اعلان غیر منصفانہ ہے اور امیدوار اتنی قلیل مدت میں دو امتحانات کی تیاری ایک ساتھ نہیں کر سکتے۔&quot;

انہوں نے طلبا کے مطالبے کی حمایت کرتے ہوئے کہا ہے&nbsp; کہ وہ ذاتی طور پر چیئرمین سینیٹ و متعلقہ اداروں سے اس مسئلے پر بات کریں گے۔

بلوچستان نیشنل پارٹی کے رہنما اور ایم پی اے ثنا اللہ بلوچ نے بلوچستان اسمبلی میں اس معاملے پر بات کرتے ہوئے کہا کہ سی ایس ایس اور پی سی ایس کے نوجوان احتجاج کر رہے ہیں کہ امتحان کی تیاری کے موقع پر ان کے سر پر تلوار لٹکا دی گئی ہے۔

اس مسئلے پر سپیکر بلوچستان اسمبلی جان محمد جمالی نے رولنگ دیتے ہوئے بلوچستان پبلک سروس کمیشن کو ہدایت کی ہے کہ اس قلیل مدت میں امیدواروں کو تیاری کرنے میں مشکلات کا سامنا کرنا پڑے گا لہٰذا پی سی ایس کے امتحانات کو نومبر میں منعقد کروایا جائے۔

نادر علی کا کہنا ہے کہ سپیکر کی رولنگ کے باوجود بھی کہا جا رہا ہے کہ پی سی ایس کے امتحانات اعلان شدہ تاریخ ہی پر ہوں گے۔ اگر سپیکر کی رولنگ پر مسئلہ حل نہیں ہوا تو عدالت سے رجوع کرنا ہی آخری راستہ ہے۔

اس نمائندے نے بلوچستان پبلک سروس کمیشن کا موقف جاننے کے لیے ادارے کے سیکرٹری سے رابطہ کیا جہاں ان کے پرسنل اسسٹنٹ نے بتایا کہ پی سی ایس کے امتحانات مقررہ تاریخ ہی پر ہوں گے جن کے انعقاد کی تیاری جاری ہے اس کی وجہ یہ ہےکہ سردی کا موسم آنے والا ہے جس میں امتحان لینا مشکل ہو گا اور اس سلسلے میں پہلے ہی تاخیر ہو چکی ہے۔

تربت کے نوجوانوں کا اعلیٰ تعلیم کا خواب سراب ثابت ہو رہا ہے

کام وہ آن پڑا ہے جو بنائے نہ بنے: بلوچستان میں پبلک سروس کمیشن کا امتحان دینے والے امیدواروں کی مایوس کن پریشانی

text

کوئٹہ میں لاپتہ افراد کی بازیابی کے لیے لگائے جانے والے احتجاجی کیمپ کو پانچ ہزار دن مکمل ہو گئے ہیں۔ کوئٹہ پریس کلب کے سامنے یہ کیمپ اکتوبر 2009 میں قائم کیا گیا تھا۔ اس کیمپ کی صورت میں ہونے والے احتجاج کے نتیجے میں لاپتہ افراد کی بازیابی ہوئی یا نہیں البتہ اس عرصہ میں مزید بہت سے لوگوں کے لاپتہ ہونے کی شکایات ضرور سامنے آئی ہیں۔

یہ کیمپ وائس فار بلوچ مسنگ پرسنز نامی تنظیم نے قائم کیا تھا جس کے سرکردہ رہنما ماما قدیر بلوچ نے لوک سجاگ کو بتایا کہ طویل اور صبر آزما جدوجہد، تکالیف اور دھمکیوں کے باوجود انہوں ںے مستقل مزاجی کے ساتھ یہ دن گزارے ہیں۔ 
&#39;&#39;لاپتہ افراد کے مسئلے پر حکومت نے بہت سے کمیشن، کمیٹیاں اور جے آئی ٹیز بنائیں لیکن ان سے کوئی فائدہ نہیں ہوا اور لوگوں کی گمشدگیاں بدستور جاری ہیں۔&#39;&#39;

ضلع آواران کی تحصیل مشکئے سے تعلق رکھنے والے علی حیدر بلوچ بتاتے ہیں کہ ان کے والد رمضان بلوچ پیشے کے لحاظ سے دھوبی ہیں جنہیں 25 جولائی 2010 کو مشکئے سے گوادر جاتے ہوئے اتھل زیرو پوائنٹ سے اغوا کر لیا گیا تھا۔

علی حیدر ماما قدیر، لاپتہ ڈاکٹر دین محمد بلوچ کی بیٹی سمی بلوچ، لاپتہ ذاکر مجید کی بہن فرزانہ مجید و دیگر کے ساتھ کوئٹہ سے کراچی اور پھر کراچی سے اسلام آباد تک احتجاجی لانگ مارچ میں بھی شامل تھے۔

&quot;جب ہم اسلام آباد پہنچے تو حکام کی جانب سے ہمیں کہا گیا کہ آپ واپس جائیں اور اس وقت تک آپ کے رشتہ دار گھروں کو پہنچ جائیں گے۔ اس وقت میری عمر 10 برس تھی اور اب میں 18 سال کا ہو چکا ہوں لیکن میرے والد ابھی تک گھر نہیں پہنچے۔&#39;&#39;

2005ء میں سپریم کورٹ نے لاپتہ افراد کے مسئلے پر سو موٹو نوٹس لیا۔ 2010ء تک اس حوالے سے متعدد شواہد سامنے آنے کے بعد 2011 میں عدالت نے وفاقی حکومت کو حکم دیا کہ وہ ان شواہد کی روشنی میں لاپتہ افراد کی بازیابی کے لیے کارروائی کرے۔ حکومت نے اس معاملے پر کمیشن بنانے کا فیصلہ کیا جس نے جلد از جلد شواہد جمع کر کے تحقیقات کے بعد اپنی رپورٹ پیش کرنا تھی۔

وائس آف بلوچ مسنگ پرسنز کے چیئرمین نصراللہ بلوچ سمجھتے ہیں کہ اس کمیشن نے اپنی ذمہ داریاں پوری نہیں کیں۔

&#39;&#39;اس کمیشن کی وجہ سے سپریم کورٹ اور ہائی کورٹ میں لاپتہ افراد کی بازیابی کے لیے دائر مقدمات مفلوج ہو گئے کیونکہ ان تمام کیسوں کو کمیشن کے سپرد کر دیا گیا تھا۔ اب عدالتیں اس مسئلے پر کارروائی نہیں کرتیں جبکہ انسانی حقوق کی تنظیمیں اس کمیشن پر عدم اعتماد کا اظہار کر چکی ہیں۔&#39;&#39;

اِس نمائندے نے جسٹس ریٹائرڈ جاوید اقبال کی سربراہی میں بنائے گئے اس کمیشن کے ارکان سے رابطہ کرنے اور ان کا موقف جاننے کی متعدد کوششیں کیں لیکن ان کی جانب سے کوئی جواب نہیں دیا گیا۔

نصر اللہ بلوچ نے بتایا کہ صوبائی سطح پر وزیر داخلہ کی سربراہی میں 2012 سے ایک ٹاسک فورس بھی اس مسئلے پر کام کر رہی ہے لیکن اس کا خاطرخواہ نتیجہ نہیں نکلا۔

نصراللہ مبینہ طور پر لاپتہ علی اصغر بنگلزئی کے بھتیجے ہیں جو پہلی مرتبہ جون 2000ء میں لاپتہ ہوئے اور 14 روز بعد گھر واپس آ گئے تھے۔ ان کے خاندان نے انہیں جبراً اغوا کیے جانے کا الزام عائد کرتے ہوئے مقدمہ بھی دائر کیا تھا جو گمشدہ افراد کی بازیابی کے لیے پہلا مقدمہ سمجھا جاتا ہے۔ اکتوبر 2001ء کو انہیں محمد اقبال نامی شخص کے ساتھ سریاب روڈ ڈگری کالج کے سامنے دوبارہ اغوا کر لیا گیا۔ اقبال چوبیس روز بعد واپس آ گئے جبکہ علی اصغر تاحال لاپتہ ہیں۔

&nbsp;نصراللہ بلوچ کا کہنا ہے کہ لاپتہ افراد کی گمشدگی کے حوالے سے ایف آئی آر کا اندراج وائس فار بلوچ مسنگ پرسنز کی کوششوں سے ہی ممکن ہوا۔ اس تنظیم نے 2010 میں سپریم کورٹ سے استدعا کی تھی کہ جس تھانے کی حدود میں کوئی شخص لاپتہ ہو تو وہاں کا ایس ایچ او لواحقین کی منشا کے مطابق مقدمہ درجے کرنے کا پابند ہو۔

پاکستان ڈیموکریٹک موومنٹ (پی ڈی ایم) کی موجودہ حکومت نے بھی لاپتہ افراد کے مسئلے پر گزشتہ سال مئی میں ایک کمیٹی قائم کی تھی۔ اس کے ارکان نے 8 ستمبر 2022کو کوئٹہ میں لاپتہ افراد کے لواحقین کے ساتھ مذاکرات کئے اور یقین دہانی کرائی تھی کہ &quot;کمیٹی ان لوگوں کی تجاویز کو سامنے رکھتے ہوئے لاپتہ افراد کے مسئلے کا حل تجویز کرے گی۔&quot; لیکن تاحال اس کی کوئی رپورٹ منظر عام پر نہیں آئی۔ کمیٹی کے سربراہ اعظم نذیر تارڑ اب مستعفی ہو چکے ہیں اور ان کی جگہ نئے سربراہ کی تقرری بھی نہیں ہو سکی۔

اس کے علاوہ لاپتہ افراد کی بازیابی اور ان لوگوں کے لواحقین کے مسائل کو حل کرنے کے لیے بلوچستان ہائی کورٹ نے بھی ایک کمیشن بنانے کا حکم دیا تھا لیکن اس پر ابھی تک کوئی ٹھوس پیش رفت نہیں ہوئی۔

اس کمیشن کے سربراہ اور صوبائی سیکرٹری داخلہ میر ضیا لانگو نے لوک سجاگ کو بتایا کہ کمیشن کی ایک میٹنگ ہو چکی ہے اور ایڈیشنل چیف سیکرٹری سے بریفنگ بھی لے لی گئی ہے۔ معاملات کو آگے بڑھانے کے لیے کمیشن کا اجلاس جلد بلایا جائے گا۔

ضیا لانگو کے مطابق اس کمیشن کی پاس دو ٹرمز اینڈ کنڈیشنز (ٹی او آرز) ہیں جن میں &quot;لاپتہ افراد کے لواحقین کو قانونی چارہ جوئی میں سہولیات فراہم کرنا اور&nbsp; ریاست مخالف سرگرمیوں میں ملوث لوگوں کے معاملے کو دیکھنا&#39;&#39; شامل ہیں۔ تاہم کمیشن کو لاپتہ افراد کی تلاش کا اختیار نہیں دیا گیا۔

ریاست کے ناقدین اور حکومت کے مخالفین کی جبری گمشدگیاں: کِس کھوج میں ہے تیغِ سِتم گر لگی ہوئی۔

کوئٹہ، لاپتہ افراد کی بازیابی کے احتجاجی کیمپ کے پانچ ہزار دن مکمل: 'لیکن لوگوں کی گمشدگیاں بدستور جاری ہیں'

بلوچستان کے مختلف شہروں اور دیہات میں پچھلی ایک دہائی میں قریباً ڈیڑھ سو نجی لائبریریاں قائم کی جا چکی ہیں۔ اپنی مدد آپ کے تحت ان لائبریریوں کا قیام لوگوں کی عطیہ کردہ کتابوں کے ذریعے عمل میں آیا ہے۔ ان لائبریریوں کو مقامی نوجوان، اساتذہ، طلبہ اور خاص طور پر ادب سے دلچسپی رکھنے والے لوگ چلاتے ہیں۔

طویل عرصہ سے بدامنی کا شکار رہنے والے ضلع خضدار میں ایسی 11 نجی لائبریریاں موجودہ ہیں۔ تحصیل وڈھ میں قائم سٹوڈنٹس لائبریری کے رکن وحید انجم بتاتے ہیں کہ اس لائبریری میں بلوچی، براہوی، انگریزی اور اردو زبان میں مختلف موضوعات پر تقریباً چار ہزار کتابیں موجود ہیں۔

&#39;&#39;پہلے اس علاقے میں پڑھنے لکھنے کا زیادہ رجحان نہیں تھا لیکن لائبریری کے قیام کے بعد بہت سے لوگ خصوصاً نوجوان کتب بینی کی جانب راغب ہوئے ہیں۔ بیشتر قارئین ادب اور سیاسی و سماجی سائنس کی کتابیں پڑھنے کو ترجیح دیتے ہیں۔ اس وقت دو سو سے زیادہ لوگ باقاعدگی سے لائبریری میں آتے ہیں جبکہ دوسرے علاقوں سے بہت سے قارئین بھی اس لائبریری سے کتابیں منگواتے ہیں۔ یہاں آنے والوں میں لسبیلہ یونیورسٹی، وڈھ گورنمنٹ کالج اور مقامی سکولوں کے طلبہ کی اکثریت ہے۔&#39;&#39;

خضدار میں ہی قائم کرخ پبلک لائبریری کا قیام ضلعی انتظامیہ کے تعاون سے عمل میں آیا ہے۔ اس لائبریری کے قیام کی مہم میں شامل طالب علم نعیم بلوچ بتاتے ہیں کہ پہلے ضلعی انتظامیہ نے انہیں کچھ کتابیں فراہم کیں جس کے بعد انہوں نے اپنے ساتھیوں کے ہمراہ کتابیں جمع کرنے کی مہم چلائی جس میں بہت سے لوگوں نے اپنی کتب عطیہ کیں۔

تاہم نعیم کا کہنا ہے کہ اس علاقے علاقے میں تعلیم کا رحجان نہ ہونے اور خواندگی کی کمی کے باعث لائبریری لوگوں کی توجہ حاصل نہیں کر سکی۔ چونکہ لائبریری میں تاحال بجلی، پانی اور بیت الخلا کی سہولت بھی نہیں ہے اس لیے یہاں زیادہ لوگ نہیں آتے۔ انہوں نے لائبریری میں یہ سہولتیں مہیا کرنے کے لیے ضلعی انتظامیہ سے درخواست کی تو جواب ملا کہ وہ خود چندہ جمع کر کے لائبریری کو فعال کرنے کا اہتمام کریں۔

انہوں نے کہا کہ لائبریری تو کسی نہ کسی طور کھڑی ہو گئی لیکن اسے پوری طرح فعال کرنے میں کامیابی نہیں مل سکی۔ انہیں یقین ہے کہ اگر انتظامیہ انہیں تھوڑی سی مدد فراہم کرے تو اس لائبریری کے ذریعے علاقے میں شرح خواندگی کو بڑھایا جا سکتا ہے۔

خضدار کے علاقے گریشہ میں دامنِ شاشان پبلک لائبریری 2018 میں قائم کی گئی تھی جس میں اس وقت تین ہزار کتابیں موجود ہیں۔ اس لائبریری کو قواعد و ضوبط کے مطابق چلایا جاتا ہے اور اس کے ڈھائی سو رکن ہی کتابیں حاصل کرنے کے اہل ہیں جس کے لیے سو روپے فیس رکھی گئی ہے۔لائبریری کے سیکرٹری جنرل نصیر کا کہنا ہے کہ جہاں لائبریری موجود ہو گی وہاں پڑھنے والے بھی آئیں گے اور انہیں دیکھ کر دیگر لوگ بھی مطالعے کی جانب راغب ہوں گے۔ وہ کہتے ہیں کہ یہ لائبریری اس مقصد میں کامیاب رہی ہے۔

اسی ضلعے کے علاقے نال میں صلاح الدین بزنجو اور ان کے ساتھی طلبہ نے اپنی مدد آپ کے تحت مقامی بوائز ہائی سکول میں لائبریری بنا رکھی ہے۔ انہوں نے یہ لائبریری کورونا وبا کے دوران قائم کی تھی جس کے لیے ان طلبہ نے خود ہی میز کرسیوں کا بندوبست کیا، وائی فائی لگای اور یہیں آن لائن کلاسیں لینے لگے۔

صلاح الدین کا کہنا ہے کہ جب تک آن لائن کلاسیں جاری رہیں اس وقت تک تو طلبہ کی بڑی تعداد لائبریری میں آتی رہی لیکن بعد میں لائبریری آنے اور یہاں مطالعہ کرنے کا رحجان بہت کم ہو گیا ہے۔

بلوچستان یونیورسٹی کوئٹہ میں قائم بک پوائنٹ کے مالک عیسیٰ رِند نے دشت، گریشہ اور قلات سمیت بہت سے علاقوں کی لائبریریوں کو کتابیں عطیہ کرنے کے علاوہ بلوچستان سٹڈی سنٹر کو بھی 50 ہزار روپے مالیت کی کتابیں دی ہیں۔

ان کا کہنا ہے کہ بلوچستان کے نوجوانوں میں حصول تعلیم اور مطالعے کا رحجان بڑھ رہا ہے اور یہی وجہ ہے کہ شہروں کے علاوہ چھوٹے قصبوں اور دیہات میں بھی لائبریریاں موجود ہیں۔ وہ صوبے کے مختلف شہروں میں ہونے والے کتاب میلوں کو بھی بڑی تعداد میں لائبریریوں کے قیام کا سبب بتاتے ہیں۔

بلوچستان کے لائبریریز ڈیپارٹمنٹ کے مطابق صوبہ بھر میں 78 سرکاری لائبریریاں قائم ہیں جن میں سے صرف 24 فعال ہیں۔ صوبائی بجٹ میں لائبریریوں، آرکائیوز اور عجائب گھروں کے لیے 18 کروڑ 70 لاکھ روپے مختص کیے گئے تھے۔ نجی لائبریریوں کے جائزے سے یہ سامنے آیا ہے کہ انہیں چلانے والے لوگوں کی اس مقصد سے لگن کے باوجود بہت سی جگہوں پر یہ لائبریریاں محض بنیادی سہولتوں کی کمی کے باعث فعال کردار ادا نہیں کر پا رہیں۔

&nbsp;

کتابیں جمنیزیم میں ڈھیر اور عمارت پر تالا: کیا تربت پبلک لائبریری پر قبضہ ہو چکا ہے؟

خضدار کی نجی لائبریریاں: 'انتظامیہ تھوڑی سی مدد فراہم کرے تو شرح خواندگی کو بڑھایا جا سکتا ہے'

ہر سال کی طرح اس بار بھی 8 مارچ کو ملک بھر میں عالمی یوم خواتین منایا گیا۔ اس موقع پر ملک کے متعدد شہروں میں خواتین نے &#39;عورت مارچ&#39; کیے لیکن کراچی میں بلوچ خواتین نے یہ دن ذرا ہٹ کر منایا اور آرٹس کونسل سے کراچی پریس کلب تک &#39;&#39;بلوچ عورت مارچ&#39;&#39; کے نام سے ریلی نکالی جس کا مقصد بلوچ خواتین پر جبر کے خلاف احتجاج کرنا تھا۔

ریلی میں خواتین، مردوں اور بچوں کی بڑی تعداد نے شرکت کی۔ ریلی کے اختتام پر سیاسی و سماجی کارکنوں نے بلوچ خواتین کے مسائل پر گفتگو کی اور لاپتہ افراد کی بازیابی کا مطالبہ کیا۔

اس موقع پر وائس فار بلوچ مسنگ پرسنز کی سیکرٹری جنرل سمی دین محمد بلوچ&nbsp; کا کہنا تھا کہ بلوچ خواتین صرف اپنے ارد گرد مردوں کے ہاتھوں ہی استحصال کا نشانہ نہیں بنتیں بلکہ انہیں ملک کے دیگر حصوں کی خواتین کے مقابلے میں دہرے مسائل کا سامنا ہے۔

ان کا کہنا تھا کہ بلوچ عورت مارچ مردوں کے خلاف نہیں بلکہ اس نظام کے خلاف ہے جو ظلم و تشدد کو فروغ دیتا ہے۔ بلوچ لڑکیوں کو تعلیم حاصل کرنے اور نوکریوں کی اجازت نہیں ہے۔ ان کی کم عمری میں شادی کر دی جاتی ہے۔ بنیادی طبی سہولیات نہ ہونے کی وجہ سے بہت سی خواتین دوران زچگی انتقال کر جاتی ہیں اور غیرت کے نام پر قتل کے واقعات بھی بڑھتے جا رہے ہیں۔

اس حوالے سے ڈاکٹر ماہ رنگ بلوچ نے لوک سجاگ سے بات کرتے ہوئے کہا کہ بلوچستان میں شرح خواندگی دیگر صوبوں کے مقابلے میں بہت کم ہے اور یہاں سرداری نظام اور مذہبی شدت پسندی بھی موجود ہے۔ ان مسائل کے باعث خواتین کو تعلیم حاصل کرنے میں مشکلات کا سامنا کرنا پڑتا ہے اور انھیں مردوں کی طرح اپنے کیریئر کا فیصلہ کرنے کا اختیار نہیں ہے۔

سیاسی وابستگیوں کی وجہ سے بلوچستان میں ہمیشہ خواتین کو اجتماعی سزا کے زریعے سافٹ ٹارگٹ کے طور پر نشانہ بنایا گیا ہے۔ انہیں جبراً لاپتہ بھی کیا جاتا ہے اور وہ جسمانی تشدد کا نشانہ بھی بنتی ہیں۔

بلوچ دانشور اور مورخ ڈاکٹر شاہ محمد مری نے بلوچ عورت مارچ کے حوالے سے سجاگ سے بات کرتے ہوئے کہا کہ &#39;پوری دنیا میں خواتین تعلیم و صحت کی سہولیات کے فقدان، فسطائیت، بنیاد پرستی، ماحولیاتی تبدیلی اور سماجی حقوق کی پامالی، جاگیرداری، نسل پرستی اور دہشت گردی کے خلاف آواز اٹھا رہی ہیں اور بلوچ خواتین ان سے الگ نہیں ہیں۔

انہوں نے کہا کہ بلوچ خواتین کے کچھ مسائل دوسری خواتین سے الگ ہیں کہ ان کے عزیز و رشتہ دار لاپتہ ہیں، انہیں غیرضروری تلاشی، چیک پوسٹوں پر جانچ پڑتال اور چھاپوں کا سامنا رہتا ہے۔ یہ خواتین صوبائی حق خود ارادیت، ساحل اور وسائل کے تحفظ اورجاگیرداری اور سرداری نظام کے خلاف بولتی ہیں۔ لاپتہ افراد کے مسلئے پر آج سب سے بڑا کردار بلوچ خواتین کا ہے۔ کوہ سلیمان کی عورتیں مکران کی عورتوں سے ہم آواز ہیں اور انہوں نے بلوچ قبائلی ڈھانچے کا خاتمہ کر دیا ہے۔

بلوچستان نیشنل پارٹی کی مرکزی سیکریٹری برائے خواتین اور رکن صوبائی اسمبلی شکیلہ نوید دہوار نے سجاگ سے بات کرتے ہوئے&nbsp; کہ خواتین کو تعلیم سے دور رکھنا، وراثتی حق نہ دینا اور سماجی جہالت بلوچ قوم کی میراث نہیں بلکہ ریاست کی تشکیل کردہ پالیسیوں کے ثمرات ہیں۔

ماہ رنگ بلوچ نے کہا کہ بلوچستان میں عدالتوں نے خواتین کی حقوق کے حوالے سے آج تک کوئی ایسا فیصلہ نہیں دیا جسے دیکھتے ہوئے یہ کہا جا سکے ،کہ عدالتیں گھریلو تشدد، صحت اور کام کی جگہ پر استحصال کے خلاف خواتین کو تحفظ دینے میں سنجیدہ ہیں۔ بلوچستان میں خواتین کی تعلیم کے خلاف مذہبی شدت پسندوں کی سرگرمیوں پر بھی عدالت نے کوئی توجہ نہیں دی۔

'بلوچ عورت مارچ': عالمی یوم خواتین پر بلوچ عورتوں کی پکار

&quot;کراچی مائی کلاچی کا آباد کیا ہوا شہر ہے، جن کی مادری زبان بلوچی تھی، یوں کراچی کی مادری زبان بلوچی ہے۔&quot;

میزبان نے ان جملوں کے ساتھ کراچی لٹریچر فیسٹیول کے تیسرے روز بلوچی زبان و ادب پر سیشن کا آغاز کیا تو ہال سامعین سے کھچا کھچ بھرا ہوا تھا۔

&quot;بلوچی زبان و ادب کے فروغ میں کراچی کا کردار&quot; کے موضوع پر اس سیشن کو سننے کے لیے بلوچ طلبا سمیت ہر طبقہ فکر سے تعلق رکھنے والے لوگوں کی بڑی تعداد موجود تھی۔

کراچی لٹریچر فیسٹیول کا انعقاد 14 سال پہلے 2010ء میں ہوا تھا۔ ابتدائی برسوں میں اس فیسٹیول میں اُردو ادب حاوی رہا جس پر گفتگو انگریزی میں ہوتی تھی۔

گزشتہ چند سال سے دیگر ملکی زبانوں کے ادب کو بھی گفتگو کا حصہ بنایا جا رہا ہے، جن میں بلوچی بھی شامل ہے۔

گزشتہ سال بلوچی زبان و ادب پر &quot;رنگ کھینچے تھے داغ کھائے تھے: بلوچی ادب کا سفر&quot; کے عنوان سے ایک سیشن رکھا گیا تھا جس میں بلوچی زبان کے نامور شاعر منیر مومن، افضل مراد اور زاہدہ رئیسی مدعو تھے۔ اس نشست کی میزبانی انسانی حقوق کے کارکن و شاعر وحید نور نے کی تھی۔

رواں سال اس سیشن میں بلوچستان یونیورسٹی میں بلوچی ڈپارٹمنٹ کے چیئرمین رحیم مہر، بلوچی زبان کے استاد، شاعر و ادیب&nbsp; اے آر داد اور ہانی بلوچ بطور مقرر مدعو تھے۔ اس بار بھی سیشن کی میزبانی وحید نور کر رہے تھے۔

اس موقع پر شرکا کا کہنا تھا کہ بلوچی میں تحریر کا آغاز 50ء کی دہائی کے آس پاس کراچی میں ہوا اور اس کی ترقی و ترویج بھی یہیں سے ہوئی۔ &quot;اومان&quot; کے نام سے پہلا بلوچی رسالہ بھی کراچی سے ہی شائع ہوتا تھا۔ پہلی مرتبہ محمد حسین کلاتکی نے بلوچی زبان میں ڈرامے لکھے۔ سید ہاشمی نے بلوچی زبان بولنے والوں سے درخواست کی کہ وہ بلوچی میں لکھیں۔ بلوچستان کے ادباء گل خان نصیر، آزاد جمال دینی و دیگر کا ٹھکانہ کراچی ہی تھا اور ان کی ادبی پرداخت بھی کراچی میں ہی ہوئی۔ بلوچی میں جتنا بھی اشاعتی کام ہوا ہے، وہ زیادہ تر کراچی سے ہی ہوا ہے۔

بلوچی زبان و ادب کے سب سے بڑے ذخیرے پر مبنی&#39; سید ہاشمی ریفرنس لائبریری&#39; ملیر میں قائم ہے، جہاں ملک بھر سے لوگ آ کر حوالہ جاتی لٹریچر تلاش کرتے ہیں۔ 
ڈاکٹر رحیم مہر نے دوران سیشن اور بعدازاں لوک سجاگ سے گفتگو میں بتایا کہ بلوچوں کی اولین سیاسی اور علمی تحریک کا آغاز کراچی سے ہوا تھا۔ 1910ء میں کراچی میں مولانا محمد عثمان بلوچ کی سربراہی میں مدرسہ احرارالاسلام کی بنیاد رکھی گئی۔

اس مدرسے کے قیام کا بنیادی مقصد مذہبی تعلیم دینا تھا۔اس کے لیے بلوچی میں جو لٹریچر چھاپا گیا اس میں مذہبی تعلیمات کے ساتھ سیاسی موضوعات پر بھی توجہ دی گئی۔

میر غلام محمد نورالدین نے 1925ء میں بلوچ لیگ کے نام سے ایک سیاسی و سماجی پلیٹ فارم کی بنیاد رکھی۔اس تنظیم نے 1930ء میں &quot;نظام&quot; کے نام سے ایک کتابی سلسلہ شروع کیا، جس نے بلوچ سیاست کے ساتھ ساتھ بلوچ صحافت کی بھی بنیاد رکھی۔

یوں بلوچستان کے مسائل کو اجاگر کرنے کا بنیادی کام کراچی سے شروع ہوا۔ دوسری طرف جب کراچی میں صحافت، سیاست و سماجی کاموں کا آغاز ہوا تو اس میں زیادہ تر لوگوں کا تعلق ادب سے تھا جس میں یوسف عزیز مگسی، محمد حسین عنقا اور ان کے رفقا شامل تھے جنہوں نے بعدازاں 1940 میں بلوچ لٹریری کمیٹی بنائی۔

اسی بات کو آگے بڑھاتے ہوئے پروفیسر اے آر داد نے بتایا کہ تقسیم ہند کے بعد ایک بہت بڑا کردار مولوی خیر محمد ندوی کا ہے، جنھیں بابائے بلوچی کہا جاتا ہے۔ انھوں نے دی بلوچ ایجوکیشنل سوسائٹی کے نام 1948ء میں ایک ادارہ قائم کیا جس کا مقصد بلوچوں میں علم و آگاہی کا ماحول پروان چڑھانا تھا۔

1948ء میں جب ریڈیو پاکستان کی بنیاد رکھی گئی تو اس وقت مختلف زبانوں میں نشریات شروع ہوئیں مگر ان میں بلوچی شامل نہیں تھی۔ مولانا خیر محمد ندوی نے ایک وفد کے ساتھ ریڈیو کے ڈائریکٹر سے ملاقات کی اور بلوچی زبان میں نشریات کی درخواست کی۔ اس پر ریڈیو پاکستان کے ڈائریکٹر نے ان سے کہا کہ کیا بلوچی میں تحریر کی صورت میں کوئی ایسا مواد موجود ہے جس پر ہم ریڈیو میں پروگرام کر سکیں؟ جواب میں مولوی خیر محمد ندوی نے بلوچی میں &quot;اومان&quot; کے نام سے ایک رسالہ نکالا، جو 1951ء سے 1967ء تک جاری رہا۔

ہانی بلوچ بلوچی زبان میں خواتین کی صحت اور خصوصاً زچگی کے مسائل پر کتاب لکھنے والی پہلی مصنفہ ہیں۔ ان&nbsp; کا کہنا تھا کہ 1920ء سے 1970ء کا دور بلوچی لٹریچر کی ترقی کا دور ہے جب کراچی بلوچ ادب و سیاست کا مرکز کہلاتا تھا۔ اسی لیے لیاری کو بلوچی ادب کی ماں کا درجہ دیا گیا۔

انہوں نے کہا کہ اس دور میں بلوچ خواتین نے بھی بلوچی موسیقی اور لٹریچر میں اہم کردار ادا کیا۔ ریڈیو پاکستان آنے کے فوری بعد ہی بلوچ خواتین نے تحریریں لکھنا شروع کر دی تھیں۔

&quot;1951ء میں جب عبداللہ بلوچ نے ریڈیو پاکستان کے لیے ڈراما لکھنا شروع کیا تو ان کی اہلیہ شیرین بلوچ نے بھی ان کے ساتھ مل کر اہم کردار ادا کیا۔ انھوں نے ڈرامے میں کام کرنے کے بعد دو رسالے بھی نکالے۔ اسی طرح ڈاکٹر داؤد، ڈیلی بیگ اور ولی محمد نے اپنی خواتین کے ساتھ مل کر بلوچی زبان کی ترقی و ترویج کے لیے کام کیا&quot;۔

ایک سوال کے جواب میں ہانی بلوچ نے کہا کہ بلوچی ادب میں خواتین کے فعال کردار کے لیے بلوچ مردوں کا تعاون ضروری ہے۔

&quot;بانل دشتیاری نے بلوچی زبان کی ترقی کے لیے کافی خدمات سر انجام دیں۔ وہ ایک گھریلو خاتون ہونے کے ساتھ بہت اچھی لکھاری اور ڈراما نویس بھی تھیں جنہیں ان کے شوہر اسرار عارفی کا تعاون حاصل تھا۔ آج ادب اور سیاست میں بلوچ خواتین جو کردار ادا کر رہی ہیں، وہ بھی بلوچ مردوں کی مثبت سوچ اور تعاون کی وجہ سے ہی ممکن ہوا ہے&quot;۔

تربت میں عطا شاد لٹریری فیسٹیول عام ادبی میلوں سے کیسے مختلف تھا

'کراچی شہر کی مادری زبان بلوچی ہے'، کراچی لٹریچر فیسٹیول میں بلوچی ادب کے رنگ

&#39;میں ایک مزدور کی بیٹی ہوں، یونیورسٹی میں پڑھتی ہوں اور ہاسٹل میں رہتی ہوں۔ صبح کلاسیں لے کر شام کے وقت کپڑوں کی کشیدہ کاری کرتی ہوں، آدھے پیسے اپنے بھائی کو بھیج دیتی ہوں جو کوئٹہ میں پڑھتا ہے اور باقی سے اپنا گزارہ کرتی ہوں۔ لیکن یونیورسٹی نے فیسوں میں جتنا اضافہ کر دیا ہے، اب میرے لیے اپنی تعلیم کو مزید جاری رکھنا ممکن نہیں۔ میں یونیورسٹی چھوڑنے کا فیصلہ کر چکی ہوں&#39;۔

یہ کہانی یونیورسٹی آف تربت کی ایک طالبہ کے حوالے سے ایک بلوچ صحافی نے حال ہی میں سوشل میڈیا پر شیئر کی لیکن یہ محض ایک طالب علم کی کہانی نہیں بلکہ اس یونیورسٹی میں پڑھنے والے اکثر طالب علموں کی روداد ایسی ہی ہے۔

یونیورسٹی کی ایک اور طالبہ نے لوک سجاگ کو بتایا کہ ان کے والد پٹرول کی دکان پر کام کرتے ہیں۔ &quot;ان کے لیے تو ٹرانسپورٹ اور سمسٹر کی فیس ادا کرنا کٹھن تھا لیکن اب (فیس میں اضافے کے بعد) وہ میری تعلیم کا بوجھ بالکل نہیں اٹھا سکیں گے&quot;۔

تربت یونیورسٹی 2012ء میں قائم ہوئی تھی۔ اس سے پہلے یہاں بلوچستان یونیورسٹی کا ایک سب کیمپس تھا۔ یونیورسٹی کے قیام نے اعلیٰ تعلیم کے حصول کے جو مواقع فراہم کیے، انہیں علاقے کے نوجوانوں نے ہاتھوں ہاتھ لیا۔ یونیورسٹی کی ویب سائٹ کے مطابق اس وقت یہاں چودہ شعبہ جات میں تین ہزار طالب علم زیرتعلیم ہیں۔

یونیورسٹی نے بہت کم وقت میں گوادر اور پنجگور میں اپنے سب کیمپس قائم کر لئے جو جلد ہی الگ یونیورسٹیوں کی شکل اختیار کر گئے۔ گوادر کیمپس 2019 میں یونیورسٹی آف گوادر بن گیا اور پنجگور کیمپس کو 2022ء میں یونیورسٹی آف مکران کا درجہ دے دیا گیا۔ یوں تربت یونیورسٹی مکران میں یونیورسٹیوں کی ماں قرار پائی۔ ہائر ایجوکیشن کمیشن کی طرف سے بھی یونیورسٹی آف تربت کو تعریفی سند سے نوازا گیا ہے۔

لیکن شاید اب یونیورسٹی کے اچھے دن بیت چکے ہیں۔

یونیورسٹی نے گذشتہ دنوں ایک نوٹیفیکیشن کے ذریعے سمسٹر کی فیس کے علاوہ ٹرانسپورٹ اور ہاسٹل کے چارجز میں بھی اضافہ کردیا۔ صرف سمسٹر فیس میں اوسط اضافہ پچاس فیصد کے لگ بھگ ہے۔ مثلاً کامرس اور اکنامکس کے طلبہ پہلے ایک سمسٹر کی فیس 13 ہزار ایک سو روپے ادا کر رہے تھے جسے بڑھا کر 20 ہزار آٹھ سو کردیا گیا ہے۔ اسی طرح کیمسٹری، باٹنی اور بائیوکیمسٹری کی فیس 16 ہزار ایک سو سے بڑھا کر 22 ہزار آٹھ سو کر دی گئی ہے۔

تربت یونیورسٹی میں زیرِتعلیم طلبا و طالبات کی ایک بڑی تعداد گردونواح کے دیہی علاقوں سے آتی ہے اور ان کی اکثریت کا تعلق غریب گھرانوں سے ہے۔ تمپ، دشت، ہوشاپ سمیت دیگر علاقوں کے طلبا پہلے ہی مالی مشکلات کا شکار ہیں۔

تربت پاکستان کے ان غریب ترین اضلاع میں شامل ہے جس کی آبادی کا 70 فیصد تک حصہ کثیرالجہت غربت (ملٹی ڈائیمینشنل پاورٹی) کا شکار ہے۔ زراعت محدود ہے اور صنعت ناپید۔ اعلیٰ تعلیم کا حصول ہی نوجوانوں کو بہتر مستقبل کی امید دیتا ہے۔

یونیورسٹی کی ایک طالبہ نے لوک سجاگ سے بات کرتے ہوئے کہا &quot;کسی (طالب علم) کے والد زمباد چلاتے ہیں (زمباد گاڑی جو ایرانی پٹرول اور ڈیزل کی ترسیل کے لیے ذریعہ روزگار ہے) تو کسی کی والدہ یا بہنیں کپڑوں کی کشیدہ کاری کرکے فیسوں کا بندوست کرتی ہیں۔ اب ان ذرائع سے تعلیمی عمل کو جاری رکھنا ناممکن ہو گیا ہے۔ یونیورسٹی نے ان طلبا کی مشکلات کو بڑھا دیا ہے&quot;۔

<h2>احتجاج کرنا منع ہے</h2>

یونیورسٹی کے طلبا نے فیسوں میں اضافے کے خلاف پہلے پریس کانفرنس کی، پھر احتجاجی ریلی نکالی اور مظاہرہ کیا۔ اس کے باوجود شنوائی نہ ہونے پر طلبا یونیورسٹی کے مین گیٹ پر احتجاجی دھرنا دے کر بیٹھے رہے۔

اس احتجاجی دھرنے میں تین طلبا تنظیمیں شریک تھیں جن میں بلوچ سٹوڈنٹس آرگنائزیشن، بلوچ سٹوڈنٹس ایکشن کمیٹی اور بلوچ سٹوڈنٹس آرگنائزیشن (پجار) شامل ہیں۔ اس کے علاوہ والدین اور تربت کی سول سوسائٹی کے اراکین اور کئی سیاسی پارٹیوں کے رہنماؤں نے بھی اس احتجاج میں شریک ہو کر طلبہ سے اظہارِ یکجہتی کیا۔

سٹوڈنٹس الائنس تربت کے رہنماؤں نے یونیورسٹی کے وائس چانسلر و پرو وائس چانسلر کے ساتھ ہونے والے مذاکرات کے بارے میں بتایا کہ انھوں نے ہمیں احتجاج ختم کرنے کا کہا لیکن ہم نے مطالبہ کیا کہ فیسوں اور دیگر چارجز میں اضافے کے نوٹیفکیشن کو واپس لیا جائے لیکن انتظامیہ کی جانب سے کہا گیا کہ یہ سینڈیکیٹ کمیٹی کے فیصلے ہیں اور وہ یہ نوٹیفکیشن واپس نہیں لے سکتے لیکن پھر دو دن بعد انہوں نے نوٹیفکیشن واپس لینے کی حامی بھرلی۔

طلبا رہنماؤں نے انتظامیہ پر واضح کیا کہ آپ فیسوں میں اضافے کا نوٹیفکیشن واپس لینے کا بیان جاری کریں، ہم اپنے دھرنے کے اختتام کا اعلان کرتے ہیں۔ ساتھ ہی انہوں نے دھرنا ختم کرنے کا بیان لکھ کر انتظامیہ کو بھیج بھی دیا لیکن یونیورسٹی انتظامیہ معاہدے سے مکر گئی جس پر طلبا تنظیموں نے احتجاج جاری رکھتے ہوئے اسے مزید وسعت دینے کا اعلان کیا۔

اس پر یونیورسٹی انتظامیہ کو بالآخر گھٹنے ٹیکنا پڑے اور یونیورسٹی نے مارچ تک اضافی فیسوں کی وصولی کا نوٹیفکیشن معطل کر دیا۔ طلبا نے بھی اس وقت تک اپنے احتجاجی دھرنے کو مؤخر کرنے کا اعلان کر دیا۔

اس سے قبل نومبر 2022 میں طلبا نے یونیورسٹی میں سیاسی سرگرمیوں پر پابندی کے خلاف احتجاج کیا تو طلبا کو یونیورسٹی کی جانب سے نوٹس جاری کر دئیے گئے اور انہیں والدین سمیت حاضر ہو کر وضاحت پیش کرنے کو کہا گیا۔

طلبا الائنس میں شامل ایک طالب علم نے بتایا کہ &quot;ہم نے یونیورسٹی میں کرپشن و دیگر مسائل پر احتجاج کیا تو یونیورسٹی انتظامیہ نے والدین کی میٹنگ بلائی تاکہ طلبا کو دباؤ میں لایا جائے اور وہ یونیورسٹی میں اپنے جائز حقوق کے لیے احتجاج تک نہ کر سکیں&quot;۔

<h2>&#39;فیس کم ہے اور اضافہ معمولی ہے&#39;</h2>

لوک سجاگ نے وائس چانسلر، پرو وائس چانسلر سمیت رجسٹرار سے رابطہ کرنے کی بارہا کوشش کی لیکن کسی نے بھی سوال نامے کا جواب نہیں دیا نہ ہی فون کالز کا جواب دیا گیا۔

بعد میں یونیورسٹی کے پرو وائس چانسلر پروفیسر ڈاکٹر منصور احمد بلوچ نے یونیورسٹی کے تعلقاتِ عامہ کی جانب سے فیسوں کے معاملے میں ایک بیان جاری کیا، جس کی کاپی ہمیں بھی بھیجی گئی۔

یونیورسٹی پرو وائس چانسلر پروفیسر منصور احمد بلوچ، رجسٹرار گنگزاز بلوچ، ڈائریکٹر سٹوڈنٹس افئیرز اور فنانس، شعبہ جات کے سربراہوں سمیت سینئر فیکلٹی اراکین نے آل پارٹیز کیچ، سول سوسائٹی تربت اور مقامی صحافیوں سے ملاقات کی۔

پرو وائس چانسلر نے وفد کو اکیڈمک کونسل کی جانب سے نئی منظور شدہ فیسوں کے معاملے میں بریف کرتے ہوئے بتایا کہ تربت یونیورسٹی بلوچستان کی دیگر یونیورسٹیوں کے مقابلے میں کم فیس وصول کر رہی ہے۔ نیز پچھلے تین سال میں ہائیر ایجوکیشن کمیشن نے تربت یونیورسٹی کی سالانہ گرانٹ میں کوئی اضافہ نہیں کیا اور صوبائی حکومت کی جانب سے گرانٹ-ان-ایڈ میں کمی کر دی گئی ہے۔

مالی دشواریوں کے باوجود تربت یونیورسٹی نے فیسوں میں معمولی اضافہ کیا ہے۔ کم وسائل کے باوجود تربت یونیورسٹی تعلیمی حوالے سے بہترین سہولیات فراہم کر رہی ہے جس میں لیبارٹری، ہاسٹل میں 24 گھنٹے بجلی سمیت دیگر سہولیات کی فراہمی شامل ہے۔ کفایت شعاری پلان، فیسوں کو دو برابر اقساط میں ادا کرنے کی سہولت سمیت مختلف سکالرشپس کا حوالہ دیتے ہوئے کہا گیا ہے کہ یونیورسٹی کے 80 فیصد طلبا ان سکالرشپس سے مستفید ہو رہے ہیں، اس لیے یہ اضافہ معمولی ہے۔