&quot;میں انصاف کے سفر میں سب کچھ ہار چکا ہوں، عدالتوں نے میرا صبر توڑ دیا ہے۔ نو سال میں کیسوں پر 50 سے 60 لاکھ روپے خرچ ہو چکے ہیں۔ اب وسائل ہیں نہ امید، میرے پاس کوئی راستہ نہیں بچا۔ خودکشی کو حرام سمجھتا ہوں لیکن اگر مجھے کوئی اور راستہ چننا پڑا تو میرے بچوں کو انصاف ضرور دلوائیے گا۔&quot;

یہ تھا نیسلے کے سابق ملازم محمد آصف جاوید کا ویڈیو پیغام جو انہوں نے خانیوال سے لاہور ہائیکورٹ پیشی پر روانگی سے پہلے 24 فروری کو &#39;ناانصافی کے نو سال&#39; کے عنوان سے اپنے مزدور ساتھیوں اور میڈیا کے لیے فیس بک &nbsp;پر اپ لوڈ کیا تھا۔

اکتالیس سالہ محمد آصف جاوید نے 25 فروری 2025 کو لاہور ہائیکورٹ کے احاطے میں خود پر پٹرول چھڑک کر آگ لگالی۔ انہیں میو ہسپتال منتقل کیا گیا جہاں وہ دو دن موت و حیات کی کشمکش میں مبتلا رہنے کے بعد دم توڑ گئے۔

وہ خانیوال کے مدینہ ٹاؤن میں کرائے کے مکان میں رہتے تھے۔ انہوں نے ملتان سے گریجوایشن کی، 2007ء میں خانیوال کی تحصیل کبیر والہ میں قائم نیسلے پلانٹ میں بطور پراسیس آپریٹر بھرتی ہوئے اور کچھ ماہ بعد مستقل کر دیے گئے۔

آصف جاوید کو فیکٹری انتظامیہ نے 2015ء میں سرکاری انکوائری کمیٹی میں پیش ہونے پر ملازمت سے برطرف کر دیا۔ لیبر کورٹ کے حکم کے باوجود نیسلے نے ان کی بحالی کے فیصلے پر عمل نہ کیا اور وہ تبھی سے انصاف کے لیے ٹھوکریں کھا رہے تھے۔&nbsp;

<h3>ہیومن ریسورسز کمپنی کے نام پر ٹھیکیدارہ نظام: عارضی بھرتی، من چاہی برطرفیاں اور جھگڑے</h3>

محمد حسین بھٹی 2015ء میں نیسلے فیکٹری کی سی بی اے یونین کے لیڈر اور صدر تھے۔ وہ کہتے ہیں کہ آصف جاوید اگرچہ کبھی سی بی اے یونین کے عہدیدار نہیں رہے تاہم وہ یونین کی سرگرمیوں میں حصہ لیتے تھے اور ڈیلی ویج ملازمین کے حقوق کے لیے ہمیشہ آواز اٹھاتے رہے۔

یونین لیڈر بتاتے ہیں کہ بیشتر فیکٹریوں میں منیجمنٹ کے چند ملازمین مستقل ہوتے ہیں۔ باقی لیبر ہیومن ریسورسز کمپنی کے نام پر ٹھیکیداروں کے ذریعے عارضی (ڈیلی ویجز، روزانہ اجرت) بھرتی کی جاتی ہے تاکہ انہیں قانون کے مطابق حقوق اور مراعات نہ دینی پڑیں۔ اسے عرف عام میں &#39;ٹھیکیدارہ نظام&#39; کہا جاتا ہے۔

ان کے بقول نیسلے فیکٹری میں بھی یہی رواج چلا آ رہا ہے۔ اگست 2014ء میں یہاں کے لیبر ٹھیکیدار محمد رمضان (محمد رمضان اینڈ سنز) فوت ہوئے تو کمپنی نئے کنٹریکٹر رانا محمد سمیع (کمیل ایچ آر سروسز پرائیویٹ لمیٹڈ) کو لے آئی۔&nbsp; 
نئے ٹھیکدار نے چند ماہ بعد ہی پرانے ڈیلی ویجرز کا فیکٹری میں داخلہ بند کر دیا اور ان کی جگہ اپنے پسندیدہ بندے رکھنا شروع کر دیے۔ یونین نے اس معاملے پر فیکڑی انتظامیہ سے اختلاف کیا جس پر بےچینی بڑھی تو مزدوروں نے جلسے جلوس شروع کر دیے۔

محمد حسین بھٹی کے مطابق چھ اپریل 2015ء کی رات فیکٹری میں ان کے گروپ اور نئے ٹھیکیدار کی لیبر کے درمیان لڑائی شروع ہو گئی۔ درجنوں ورکر زخمی ہو ئے، دو تین کی ہڈیاں ٹوٹیں اور پلانٹ پر کام بند ہو گیا۔

&quot;پولیس نے آکر معاملہ سنبھالا اور طے پایا کہ فیکٹری میں پرانی لیبر ہی کام کرے گی لیکن کمپنی نے ان مزدوروں پر دوبارہ گیٹ بند کر دیے۔ اس پر دوبارہ احتجاج شروع ہو گیا، آئے روز ٹھیکدار رانا سمیع اور ہمارے گروپ کے درمیان لڑائیاں ہونے لگیں۔&quot;

<h3>آصف جاوید کا جرم: فیکٹ فائنڈنگ کمیٹی کے سامنے سچ کیوں بولا؟&nbsp;</h3>

اس دوران فیکٹری منیجمنٹ نے احتجاجی مزدوروں کے خلاف فوجداری مقدمات درج کرانا شروع کر دیے۔ مجموعی طور پر 13 ایف آئی آر درج کرائی گئیں جن میں سے چار میں انسداد دہشت گردی ایکٹ کی دفعات بھی شامل تھیں۔

صدر سی بی اے یونین بتاتے ہیں کہ 11 ستمبر 2015ء کو نیسلے فیکٹری کے گیٹ پر ورکروں کے مابین فائرنگ ہوئی جس سے کئی کارکن زخمی ہوگئے۔

اس واقعے کی تحقیقات کے لیے کمشنر ملتان نے ایک فیکٹ فائنڈنگ کمیٹی تشکیل دی جس میں ایڈیشنل ڈسٹرکٹ کلکٹر، ایس پی(انویسٹیگیشن) خانیوال، اسسٹنٹ کمشنرز خانیوال و کبیر والا اور ڈسٹرکٹ لیبر افسر شامل تھے۔

&quot;آصف جاوید فائرنگ کے واقعہ کے عینی شاہد تھے اور یہیں سے ان کی بدقسمتی کا آغاز ہوا۔ ان کا قصور بس یہ تھا کہ وہ سچ کی گواہی کے لیے فیکٹ فائنڈنگ کمیٹی کے اجلاس میں موجود تھے۔ اگلے روز ہی انتظامیہ نے انہیں شوکاز نوٹس جاری کیا اور پھر ملازمت سے برخاست کر دیا۔&quot;

عدالتی ریکارڈ کے مطابق 23 ستمبر 2015ء کو جاری ہونے والے شوکاز نوٹس میں فیکٹری انتظامیہ نے آصف جاوید پر الزام عائد کیا کہ وہ منیجمنٹ کی اجازت کے بغیر غیرقانونی طور پر فیکٹ فائنڈنگ کمیٹی کے سامنے پیش ہوئے اور ٹھیکیدارہ لیبر کی نمائندگی کی۔&nbsp;

آصف جاوید نے شوکاز نوٹس کے جواب میں الزامات کی تردید کی اور بتایا کہ وہ صرف فیکٹ فائنڈنگ کمیٹی کی کارروائی دیکھنے گئے تھے، ان کا مقصد بدامنی پھیلانے والوں کی حمایت کرنا ہرگز نہیں تھا۔

&quot;فیکٹری انتظامیہ نے ان کی وضاحت قبول نہیں کی اور یکطرفہ انکوئری کے بعد 11 جولائی 2016ء کو انہیں فارغ کر دیا۔جبکہ انہی الزامات پر ہمارے ایک اور ساتھی نے معافی مانگ لی تو انہیں ملازمت پر برقرار رکھا گیا۔&quot;

<h3>&#39;وہ مقدمہ تو جیت گیا مگر کمپنی کے نامی گرامی وکیل عدالتوں پر بھاری ثابت ہوئے&#39;</h3>

آصف جاوید نے ایک ہفتے ہی میں اپنی برطرفی کو نیشنل انڈسٹریل ریلیشنز کمیشن (این آئی آر سی/ لیبر کورٹ) ملتان بنچ میں چیلنج کر دیا۔ تقریباً تین سال بعد 25 مئی 2019ء کو وہ کیس جیت گئے، این آئی آر سی نے ان کی برطرفی کو ناانصافی قرار دیتے ہوئے انہیں ایک ماہ میں ملازمت پر بحال کرنے کا حکم دے دیا۔

تاہم نیسلے نے اس فیصلے کے خلاف تین جون کو لاہور میں این آئی آر سی کے فل بنچ میں اپیل دائر کر دی جو 23 نومبر 2020ء کو تین رکنی بنچ نے خارج کر دی۔ کمپنی نے یہ فیصلہ تسلیم کرنے کی بجائے اسے لاہور ہائیکورٹ میں چیلنچ کر دیا۔

آصف جاوید کے والد اسلم ندیم پنجاب ہائی وے ڈیپارٹمنٹ کے ریٹائرڈ کلرک ہیں۔ وہ بتاتے ہیں کہ آصف کی دو بیوائیں اور چھ بچے ہیں۔ ملازمت بحالی اور انصاف کے چکر میں ان کے بیٹے کی تمام جمع پونجی خرچ ہو گئی تھی۔&nbsp;

پہلے آصف کو گاڑی اور پھر اپنا گھر بیچنا پڑا، رقم عدالتوں کچہریوں میں لگ گئی۔ اب وہ کرائے کے مکان میں رہتے تھے جس کا کئی ماہ سے کرایہ بھی نہیں دے پا رہے تھے۔ بچوں کی تعلیم چھوٹ گئی اور نوبت فاقوں تک آ گئی تھی۔

&quot;میں اپنی پنشن سے بچوں کو راشن ہی دلا پاتا تھا۔ ہم نے بہت سمجھایا کہ بس کر دو سرمایہ داروں سے جیتنا بہت مشکل ہے۔ ملٹی نیشنل کمپنیاں مزدوروں کو حق دینے کی بجائے نامی گرامی وکلاء رکھ لیتی ہیں جن سے جج بھی متاثر ہوتے ہیں لیکن وہ نہیں مانا۔&quot;

ان کا کہنا تھا کہ آصف نے اپنی ملازمت کی بحالی کے لیے ناصرف فیکٹری انتظامیہ کو کئی بار درخواستیں دیں بلکہ پاکستان میں نیسلے کے چئیرمین سے بھی اپیل کی جس کا کوئی فائدہ نہیں ہوا۔ ان تمام مشکلات کے دوران بھی وہ مزدور ساتھیوں کے لیے ہر فورم پر آواز اٹھاتے رہے۔&nbsp;

<h3>&#39;لاہور ہائیکورٹ میں پانچ سال تاریخیں ہی ملتی رہیں، اس سلوک نے اسے توڑ دیا&#39;&nbsp;</h3>

&nbsp;والد کے بقول آصف جاوید کو یقین تھا کہ جس دن لاہور ہائیکورٹ میں کیس کی سماعت ہوئی وہ وہاں بھی سرخرو ہوں گے۔ افسوس! ہائیکورٹ میں کیس کو پانچ سال تک لٹکایا جاتا رہا اور صرف تاریخیں ہی ملتی رہیں۔&nbsp;

&quot;کمپنی تاخیری حربے استعمال کر رہی تھی۔ 25 فروری کو بھی ہائیکورٹ میں آصف جاوید کو آٹھ اپریل یعنی 42 روز بعد کی پیشی ملی۔ اس سلوک نے اسے توڑ کر رکھ دیا اور انہوں نے خود پر پٹرول چھڑک کر آگ لگا لی۔&quot;&nbsp;

آصف جاوید کی بیوگان زنیرہ اور اقصیٰ کہتی ہیں کہ انہوں نے مشکل حالات میں گزارہ کیا ہے لیکن انہیں اپنے شوہر کی مزدوروں کے حقوق کے لیے جدوجہد پر فخر ہے۔

خودسوزی کے اس واقعے پر غور کے لیے پیر 10 مارچ کو پنجاب اسمبلی کی قائمہ کمیٹی برائے محنت و انسانی وسائل کا اجلاس ہوا جس میں مرحوم آصف جاوید کی بیوہ زنیرہ، آصف کے والد، نیسلے کے نمائندے اور دیگر شریک تھے۔&nbsp;

چیئرمین کمیٹی امجد علی جاوید نے ہدایت کی کہ نیسلے انتظامیہ مرحوم آصف جاوید کی ملازمت فوری بحال کرے تاکہ ان کے اہلِ خانہ کو مراعات اور پنشن دی جا سکے۔&nbsp;

انہوں نے کمپنی کو اس معاملے کے قانونی تصفیے اور معاوضے کی رقم سے متعلق ایک ہفتے میں جواب دینے کے احکامات دیے۔ ساتھ ہی محکمہ محنت کو بھی ہدایت کی کہ وہ غمزدہ خاندان کو ورکرز ویلفیئر فنڈ، ای او بی آئی اور سوشل سکیورٹی دینے کے امکانات کا جائزہ لے۔

تاہم آصف جاوید کی بیوہ زنیرہ بتاتی ہیں کہ قائمہ کمیٹی کے اجلاس کو اب کئی روز گزر چکے لیکن نیسلے انتظامیہ نے ان سے کوئی رابطہ نہیں کیا۔&nbsp;

&quot;اگر واجبات نہ ملے تو ہم بھی بچوں سمیت آصف جاوید کی راہ اپنانے پر مجبور ہو جائیں گے۔&quot;

مزدور انصاف مانگتا ہے، عدالت تاریخ دے دیتی ہے

انصاف کی راہ میں گھات لگائے راہزن: اپنی جان لینے والے نیسلے ملازم کی کہانی

text

خانیوال سے 10کلومیٹر کے فاصلے پر پیر کبیر کے نام سے موسوم شہر کبیروالا میں سیوریج کے پانی کی نکاسی کا کوئی مناسب انتظام موجود نہیں اور یہ اس علاقے کا سب سے بڑا مسئلہ بن چکا ہے۔

یہاں ککڑ ہٹہ روڈ کو سردار پور روڈ سے ملانے والی ایک کلومیٹر طویل کھچیاں والی گلی میں سال بھر گندا پانی کھڑا رہتا ہے۔ اسی لیے گلی کے دائیں بائیں&nbsp; نصف سے زیادہ مکانوں کی بنیادیں ہل چکی ہیں۔

اگر ملحقہ گلیاں شامل کر لی جائیں تو متاثرہ علاقے میں دو سے ڈھائی ہزار گھر اس مسئلے سے متاثر ہو رہے ہیں جو پانچ سال سے حل طلب ہے۔

مقامی سماجی کارکن عاصم شہباز نے گزشتہ برس ڈپٹی کمشنر خانیوال اور کمشنر ملتان کو تحریری درخواستیں دیں کہ گندے پانی کے باعث ان کے گھر کی بیرونی دیواریں ٹوٹ رہی ہیں اور پورے علاقے میں سیکڑوں لوگوں کا بھاری نقصان ہو رہا ہے اس لیے سیوریج کے نظام کو درست کیا جائے۔ لیکن ان درخواستوں پر کوئی عملی قدم نہیں اٹھایا گیا۔

یہ علاقہ نواں شہر غربی کی حدود میں آتا ہے جہاں درجنوں گلیوں کا یہی حال ہے۔ میونسپل کمیٹی کبیروالا کا عملہ صفائی ایک طرف سے سیوریج لائن کو چالو کرتا ہے تو دوسری جانب سے گٹر ابلنے لگتے ہیں۔

ساڑھے تین لاکھ سے زیادہ آبادی والے شہر کا شاید ہی کوئی علاقہ ایسا ہو جہاں سیوریج کا مسئلہ نہیں ہے۔ شہر کے اکلوتے ڈسپوزل ورکس کی مین سیوریج لائن کے قریبی محلوں میں گندے اور بارش کے پانی کے نکاس کی صورت حال قدرے بہتر ہے۔ لیکن اس سے ہٹ کر شہر کی نصف سے زیادہ آبادی پر مشتمل علاقے اکثر گندے پانی کی زد میں رہتے ہیں۔

1985ء میں بلدیہ کبیروالا کے زیر انتظام بوائز ہائی سکول گراؤنڈ کے عقب میں جوئیاں والا کے نام سے پہلا ڈسپوزل سٹیشن قائم ہوا۔ سرکاری ریکارڈ کے مطابق اس وقت شہر کی آبادی 50 ہزار مشتمل تھی۔ جیسے جیسے شہر چاروں اطراف میں پھیلتا گیا، سیوریج کے مسائل بھی بڑھتے گئے۔

مشرف حکومت میں جب نیا بلدیاتی نظام متعارف کرایا گیا تو مہر ظفر احمد ہراج مرحوم تحصیل ناظم منتخب ہوئے۔ اس وقت حکومت پنجاب نے کبیروالا سمیت جنوبی پنجاب کی 21 تحصیلوں کے لیے سدرن پنجاب بیسک اربن سروسز پراجیکٹ کے نام سے ایک منصوبہ تیار کیا جسے ایشیائی ترقیاتی بینک کا مالی تعاون حاصل تھا۔

اس منصوبے کے تحت&nbsp; 2006ء میں کبیروالا میونسپلٹی نے سات کروڑ روپے کی لاگت سے سیوریج کا میگا پراجیکٹ شروع کیا۔ شہر سے تین کلومیٹر کے فاصلے پر قطعہ بدھو آنہ کے مقام پر 712 کنال رقبہ خرید کر ایک ڈسپوزل سٹیشن، ایک سکرینگ چیمبر، دو کلیکٹنگ ٹینک اور ایک پمپنگ چیمبر تعمیر کیا گیا اور شہر کے مختلف علاقوں میں سیوریج پائپ لائنیں بچھائی گئیں۔

منصوبے کے ابتدائی دنوں میں مقامی سیاسی نمائندے اور میونسپلٹی افسر کہا کرتے تھے کہ اس کی تکمیل کے بعد کبیروالا کے کسی گلی محلے میں گندا پانی نظر نہیں آئے گا اور نکاسی آب کے مسائل ختم ہو جائیں گے۔ لیکن نتائج اس کے بالکل برعکس نکلے۔

جب بھی بارش ہوتی ہے تو کبیروالا کے شرقی اور غربی علاقے تالاب کا منظر پیش کرتے ہیں۔

<h2>&quot;ماہرین&quot; نے الٹی گنگا کیسے بہائی؟</h2>

میونسپل کمیٹی کے ایک سب انجنیئر نے نام ظاہر نہ کرنے کی شرط پر بتایا کہ اس منصوبے کا&nbsp; ڈیزائن ہی غلط تھا۔ سیوریج لائنیں پانی کے قدرتی بہاﺅ کے مخالف سمت میں ڈالی گئیں۔ جو ڈسپوزل سٹیشن شہر کے مغربی حصے میں تعمیر ہونا چاہیے تھا اس کے لیے زمین مشرقی حصے میں خریدی گئی۔

ملک بھر میں پانی کا قدرتی بہاﺅ مشرق سے مغرب کی طرف ہے۔ اسی اصول کے تحت یہاں کا نہری نظام کام کرتا ہے۔ میگا پراجیکٹ کے ماہرین نے نکاسی آب کا رخ&nbsp; مغرب سے مشرق کی طرف کر دیا اور جوئیاں والا ڈسپوزل ورکس بند کر کے پورے شہر کو اس منصوبے کے ساتھ منسلک کر دیا گیا۔

انہوں نے بتایا کہ اس منصوبے کی ناکامی کی ایک اور بڑی وجہ یہ ہے کہ ڈسپوزل سٹیشن پر پانی جمع کرنے کے لیے بنائے گئے تالابوں سے نکاسی کا بندوبست نہیں تھا۔ ان تالابوں کے بھرنے پر اضافی پانی کا نکاس نہیں ہوتا جس سے ڈسپوزل سٹیشن پر بھی گندے پانی کا سیلاب آیا رہتا ہے۔ اس طرح شہر میں بھی پانی کی نکاسی رک جاتی ہے اور سیوریج سے جڑے متعدد مسائل سر اٹھاتے ہیں۔ شہری تنگ آمد بجنگ آمد کے مصداق احتجاجاً کبھی سڑک بلاک کرتے ہیں اور کبھی جلوس نکالتے ہیں۔

ماہ رمضان میں کھچیاں والی گلی کے سیکڑوں مکینوں نے احتجاجاً ملتان روڈ بلاک کر دی تھی۔ اس موقع پر اُس وقت کے اسسٹنٹ کمشنر اور ایڈمنسٹریٹر میونسپل کمیٹی خرم حمید نے مظاہرین سے مذاکرات کیے جس کے بعد گلی کی پائپ لائنیں صاف کر دی گئیں۔ لیکن یہ مسئلے کا عارضی حل تھا۔

کبیر والا کے شہری ترقیاتی کاموں کے معیار سے بھی ناخوش ہیں۔ مقامی رہائشی محمد حسین روفی کا کہنا ہے کہ پچھلے دس پندرہ برس میں نکاسی آب اور گلیوں نالیوں کی پختگی کے منصوبوں پر خرچ ہونے والے&nbsp; کروڑوں روپے بےکار گئے۔ماڈل ٹاؤن، بستی حسین آباد اور وارڈ نمبر 11 کی گلیوں میں نکاسی آب بہتر بنانے کے لیے پبلک ہیلتھ ڈیپارٹمنٹ نے نئی سیوریج لائنیں ڈالی تھیں لیکن ان کا لیول ٹھیک نہیں تھا۔ یہ ایک کروڑ سے زائد مالیت کا منصوبہ تھا جو ناکام ہو گیا۔

کبیروالا میونسپلٹی کے موجودہ ایڈمنسٹریٹر اور اسسٹنٹ کمشنر کبیروالا محسن عالم نے بتایا کہ انتظامیہ دستیاب وسائل کے مطابق نکاسی آب کے مسائل حل کرتی رہتی ہے۔ جو کچھ ماضی میں ہوا اس کی ذمہ داری موجودہ انتظامیہ پر نہیں ڈالی جا سکتی۔

میونسپل کمیٹی کے سب انجینئر الزام عائد کرتے ہیں کہ ایس پی بس پراجیکٹ بنیادی طور پر کرپشن کا شکار ہوا اور اس کو غلط سمت میں ڈیزائن کر کے بھاری کمیشن کھایا گیا۔ اب اس منصوبے کی مدت بھی مکمل ہو گئی ہے اور کبیروالا کو نئے سیوریج سسٹم کی ضرورت ہے۔

میونسپل کمیٹی کبیروالا کے چیف آفیسر رحمان لطیف سیوریج کے مسائل حل کرنے کے لیے تجویز دیتے ہیں کہ اس نظام کو اپ گریڈ کر کے تین حصوں میں تقسیم کر دیا جائے۔

شہر کی نصف آبادی شرقی اور نصف غربی سمت کے علاقوں میں منقسم ہے۔ نواں شہر غربی کے علاقے موضع مان والا، ککڑ ہٹہ روڈ، سردار پور روڈ، بستی حسین آباد، رحیم ٹاﺅن، ماڈل ٹاﺅن، چاہ وریام والا، تکبیر ٹاون، ملتان روڈ، سرکاری ہسپتال، بوائز ڈگری کالج اور سول کورٹس کے ڈسپوزل ورکس الگ سے بنانے کی ضرورت ہے۔ یہاں نئی ٹرنک لائنیں ڈالی جائیں۔ ان کا رخ مولا پور راجباہ روڈ کی طرف کر کے نیا ڈسپوزل ورکس تعمیر کیا جانا چاہیے۔

اسی طرح جھنگ روڈ اور اس کے آس پاس کی آبادیوں کے لیے مخدوم پور روڈ پر نئے ڈسپوزل ورکس تعمیر کرنے کی ضرورت ہے۔

ان کے مطابق چیچہ وطنی چھوٹی سی تحصیل ہے۔ وہاں 18 ڈسپوزل ورکس ہیں جبکہ کبیر والا بڑا شہر ہے جس کے لیے ایک ڈسپوزل ورکس ناکافی ہے۔ انہوں نے بتایا کہ میونسپل کمیٹی کی طرف سے تجاویز مرتب کر کے حکام بالا کو بھجوائی گئی ہیں۔

کبیروالا میں پبلک ہیلتھ ڈیپارٹمنٹ کے سب ڈویژنل آفیسر انجنیئر فیضان علی بخاری&nbsp; بھی سمجھتے ہیں کہ سدرن پنجاب بیسک اربن سروسز پراجیکٹ&nbsp; کے تحت تعمیر ہونے والے&nbsp; سیوریج سسٹم کی مدت مکمل ہو چکی ہے۔ انہوں ںے بتایا ہے کہ پبلک ہیلتھ ڈیپارٹمنٹ کی طرف سے کبیروالا میں نئے سیوریج سسٹم کے لیے تخمینہ حکومتی اداروں کو بھجوایا جا چکا ہے۔

'گندے بدبودار پانی کی وجہ سے ہم لوگ رات کو سو نہیں سکتے': نارووال میں سیوریج سسٹم نہ ہونے سے شہریوں کی زندگی اجیرن

کبیر والا میں 'گنگا الٹی بہنے لگی'، ڈیزائن کی خرابی سے کروڑوں مالیت کا سیوریج نظام ناکام

انتیس اپریل کی صبح ریسکیو 1122 کے ساتھ پولیس کی گاڑیاں آتے دیکھ کر بستی عزیز آباد کے رہائشی گھروں سے باہر نکل آئے۔

گاڑیاں غلام عباس کے گھر رکیں اور وہاں اس کے نو سالہ بھتیجے &#39;غ&#39; کو ریسکیو ٹیم نے فوری طبی امداد فراہم کی۔اس کے بعد بچے کو ڈسٹرکٹ ہیڈ کوارٹر ہسپتال خانیوال منتقل کر دیا گیا۔

&#39;غ&#39; کے ماموں اور اہل محلہ نے پولیس کو بتایا کہ بچہ مدرسے میں حفظِ قرآن کا طالب علم ہے۔ اس کا استاد قاری حذیفہ اور اس کا ساتھی عمران اسے گھر چھوڑنے آئے تھے۔ گھر والوں کے پوچھنے پر قاری نے کہا کہ بچے کی طبیعت خراب ہے، آپ دو ہزار روپے رکھیں اور اس کا علاج کرائیں۔

پولیس نے بچے کا طبی معائنہ کرایا تو ڈاکٹر نے رپورٹ میں لکھا کہ بچے کے ساتھ جنسی زیادتی ہوئی ہے۔

ڈسٹرکٹ پبلک پراسیکیوشن برانچ خانیوال کے مطابق اس زیادتی کیس کا پولیس چالان مکمل ہو کر عدالت میں جمع ہو چکا ہے۔ چالان کے مطابق ملزم سے جرم&nbsp; سرزد ہوا ہے اور متاثرہ بچے کی میڈیکل رپورٹ میں بھی زیادتی کے شواہد موجود ہیں۔

ڈی این اے ٹیسٹ کے ذریعے جنسی زیادتی کے مجرم کی شناخت کے لیے نمونہ لاہور کی لیبارٹری بھیج دیا گیا جس کے نتائج آنے میں دو ماہ لگ سکتے ہیں۔

بچے کے چچا غلام عباس کی مدعیت میں تھانہ سٹی خانیوال نے ایف آئی آر نمبر 399/23 زیر دفعہ 376 درج کر کے ملزم قاری حذیفہ اور عمران کو گرفتار کر لیا ہے۔

ڈسٹرکٹ بار ایسوسی ایشن خانیوال کے سابق جنرل سیکرٹری اور قانون دان چوہدری محمد ہارون نے لوک سجاگ کو بتایا کہ میل ٹو میل سیکس سے متعلق مقدمات میں پہلے دفعہ 377 لگتی تھی لیکن 2021ء میں ترمیمی ایکٹ آ گیا۔ اس کے مطابق اب دفعہ 376 لگائی جاتی ہے جو ناقابل ضمانت اور ناقابل راضی نامہ ہے۔

&quot;دفعہ 376 کا سماعت اختیار سیشن کورٹ کے پاس ہے۔اس کی زیادہ سے زیادہ سزائے موت یا عمر قید ہے اور کم سے کم 10 سال ہے&quot;۔

تحصیل میاں چنوں، تحصیل جہانیہ اور تحصیل کبیروالا سمیت پورے ضلع خانیوال کی سیشن کورٹس میں دفعہ 376 کے تحت درج کل 177 مقدمات زیر سماعت ہیں۔

ان میں سے 22 مقدمات رواں سال عدالتوں میں آئے۔چھ مقدمات جھوٹے ثابت ہونے پر خارج ہو چکے ہیں۔

شہادتیں نہ ملنے کی وجہ سے تین مقدمات داخل دفتر ہو چکے ہیں۔ 21 مقدمات میں ملزمان بری ہو چکے ہیں اور ایک مقدمے میں ملزم کو عمر قید کی سزا ہوئی ہے۔

دفعہ 377 کے تحت کل 154 مقدمات درج ہوئے ان میں سے دو مقدمات رواں سال میں عدالتوں میں آئے ہیں۔

<h2>آخر مساجد اور مدارس میں بچے محفوظ کیوں نہیں؟</h2>

اتحاد بین المسلمین کمیٹی اور امن کمیٹی خانیوال کے ممبر صاحب زادہ میاں محمد اجمل عباس نے واقع کے بعد پریس کانفرنس میں دعویٰ کیا کہ بچے سے زیادتی کی خبر میں صداقت نہیں۔ بقول ان کے اسے کانچ نام کی بواسیری بیماری ہے جس کے باعث خون آتا ہے۔ انہوں نے کہا کہ ایف آئی آر کرانے والا فریق مدرسے کو بلیک میل کر رہا ہے اور قاری حذیفہ سے پیسے بٹورنا چاہتا ہے۔

دارالعلوم عیدگاہ کبیروالا کے مہتمم مولانا مفتی ارشاد کا کہنا ہے کہ جن مدارس میں نگرانی اور تربیت کا فقدان ہو وہاں اس طرح کے واقعات ہو سکتے ہیں۔ تاہم کسی ایک واقعہ کی بنیاد پر تمام مساجد اور مدارس کے بارے میں منفی رائے قائم نہیں کی جا سکتی۔

اہل علاقہ رانا عمران اور رانا نوید نے بتایا کہ قاری حذیفہ پر بچوں سے جنسی زیادتی کے الزامات پہلے بھی لگ چکے ہیں۔

&quot;پہلے صلح صفائی اور معافی تلافی ہو جاتی تھی۔ پہلی دفعہ معاملہ پولیس کے پاس گیا ہے۔&quot;

قاری حذیفہ کے والد سیشن کورٹ خانیوال کی مسجد کے پیش امام ہیں۔ انہی کی نگرانی میں 2014ء میں مذکورہ مدرسہ قائم کیا گیا تھا۔

ضلع خانیوال میں دینی مدارس کی کل تعداد 520 ہے اور وہاں 32 ہزار 400 بچے زیر تعلیم ہیں۔

<h2>غریب، بے سہارا بچے: آسان ہدف</h2>

خانیوال کی نواحی بستی عزیز آباد میں دو کمروں پر مشتمل آٹھ مرلے کا عام سا مکان دو بھائیوں غلام محمد اور غلام عباس کی مشترکہ ملکیت ہے۔ والدہ کی وفات کے بعد متاثرہ بچہ اور اس کے تینوں بھائی اپنے چچا غلام عباس کی کفالت میں آ گئے۔ ان کے والد غلام محمد کی ذہنی حالت درست نہیں ہے۔

متاثرہ بچے نے لوک سجاگ کو بتایا کہ وہ بستی حمایت آباد میں قائم مدرسہ جامع الحبیب میں زیر تعلیم تھا جہاں کل 15 بچے زیر تعلیم ہیں۔اس نے قرآن پاک کے پانچ سپارے حفظ کر رکھے ہیں اور چھٹا سپارہ پڑھ رہا تھا۔

غلام عباس کہتے ہیں: &quot;میرے اپنے بھی چار بچے ہیں۔ میں مزدوری کرتا ہوں اور بیوی گھر میں جانور پالتی ہے۔ میں نے اپنے بھائی کے دو بچوں کو ڈیڑھ سال قبل اس امید پر مدرسے میں داخل کرایا تھا کہ وہ دینی تعلیم حاصل کریں گے۔ &quot;اس واقعے کے بعد میرا پورا خاندان ذہنی اذیت کا شکار ہے۔&quot;

سابق ممبر ضلع کونسل خانیوال اور سماجی رہنما بسم اللہ ارم نے لوک سجاگ سے بات کرتے ہوئے کہا کہ مدارس میں ایسے بچے آسان ہدف ہوتے ہیں جو غریب یا یتیم ہوں یا جن کی خبرگیری کرنے والا کوئی نہ ہو۔ بظاہر یہ اس کے کیس میں یہی ہوا ہے۔

انہوں نے کہا کہ مدرسوں کی مسلسل نگرانی کی ضرورت ہے۔

بچوں کو یہ بات ذہن نشین کرائی جائے کہ کسی بھی غیرشائستہ حرکت یا استاد کے غیر معمولی رویے سے اپنے گھر والوں کو آگاہ کریں۔ اس موضوع پر تعلیمی اداروں میں بھی بات چیت ہونی چاہیے۔

<h2>&#39;اگر ڈی این اے میچ ہو گیا تو ملزمان سزا سے نہیں بچ سکیں گے&#39;</h2>

ڈی پی او خانیوال رانا عمر فاروق نے لوک سجاگ کو بتایا کہ وہ اس واقعہ کو اہمیت دے رہے ہیں۔ پولیس نے وقوعہ کے بعد ایک گھنٹے میں ملزم گرفتار کر لیے تھے۔ طبی معائنے میں جنسی زیادتی ثابت ہوگئی ہے۔ اگر ڈی این اے میچ ہو گیا تو ملزمان سزا سے نہیں بچ سکیں گے۔

انہوں نے بتایا کہ 2019ء میں پنجاب حکومت کے ایک حکم کی روشنی میں تمام چھوٹے مدارس کی رجسٹریشن منسوخ کر دی گئی تھی جس کے بعد اس مدرسے کی تجدید نہیں ہوئی۔

&nbsp;تیرہ فروری 2023ء کو خانیوال کے تھانہ مخدوم پور پہوڑاں میں ایک مقدمہ درج ہوا تھا۔ اس کے مدعی (ر) نے بتایا کہ اس نے اپنی سات سالہ بچی کو قرآن پاک کی تعلیم دلانے کے لیے اپنے گھر پر ایک حافظ کی خدمات حاصل کیں لیکن اس نے بچی کے ساتھ چھیڑ چھاڑ شروع کر دی۔

&quot;بچی نے شکایت کی تو ہم نے اس کمرے میں خفیہ کیمرہ لگوایا۔ حقائق جاننے پر ہم نے مقدمہ درج کروایا۔ ملزم اب جیل میں ہے اور ہمیں امید ہے کہ عدالت اسے سزا سنائے گی&quot;۔

&nbsp;

بچوں سے جنسی زیادتی کے مقدمات: ملزموں کو معاف کرنے کے لیے لواحقین پر کس قِسم کا دباؤ ہوتا ہے۔

مدرسے میں حفظ قرآن کے طالب علم بچے کے ساتھ زیادتی پر خانیوال پولیس کی بروقت کاروائی

&quot;اگر گورنمنٹ بوائز ڈگری کالج سردار پور کی تعمیر بروقت مکمل ہو جاتی تو اب میں چکی پر کام کرنے کے بجائے ایف ایس سی سیکنڈ ایئر کاامتحان دے رہا ہوتا&quot;۔

یہ کہتے ہوئے شیخ خلیل احمد کی آنکھوں میں مایوسی بھی تھی اور اداسی بھی۔ ان کی عمر 23 برس ہے اور وہ پڑھ لکھ کر اپنے حالات بدلنا چاہتے ہیں۔ لیکن ان کے معاشی حالات اتنے اچھے نہیں ہیں کہ وہ شہر جا کر کالج میں داخلہ لیں اس لیے 2021 میں میٹرک کرنے کے بعد انہیں تعلیم چھوڑ کر اپنے والد کے ساتھ ان کی آٹے کی چکی پر بیٹھنا پڑا۔

ایسا صرف خلیل احمد کے ساتھ ہی نہیں ہوا بلکہ خانیوال کی بستی خادم پور کے مزمل حسین کو بھی انہی حالات کا سامنا ہے۔ انہوں نے بھی 2021 میں میٹرک کا امتحان پاس کیا تھا جس کے بعد انہیں امید تھی کہ وہ اپنے علاقے میں بننے والے اس کالج کی بدولت مزید تعلیم جاری رکھ سکیں گے۔ لیکن کالج کا منصوبہ بروقت مکمل نہ ہونے کی وجہ سے ان کی امیدوں پر پانی پھر گیا۔

مزمل حسین نے کچھ فاصلے پر تحصیل کبیروالا میں جا کر ایک پرائیویٹ کالج میں داخلہ تو لے لیا لیکن ان کے والد کالج کے اخراجات برداشت نہ کر سکے اس لیے مزمل کو واپس آنا پڑا اور اب وہ گھر میں رہ کر پرائیویٹ امیدوار کی حیثیت سے انٹرمیڈیٹ کے امتحان کی تیاری کر رہے ہیں۔

خادم پورہ میں جنرل سٹور چلانے والے محمد عاشق ہراج کے بیٹے شعیب نے بھی میٹرک میں اچھے نمبر لیے تھے۔ انہوں نے سوچ رکھا تھا کہ ان کے قصبے میں بوائز ڈگری کالج بن جائے گا تو میٹرک کے بعد وہ اپنے بیٹے کو وہیں داخل کرائیں گے۔ کالج کی تعمیر مکمل ہونے میں تاخیر ہوئی تو انہوں نے بیٹے کو شہر کے کالج میں داخل کرا کے اسے جانے آنے کے لیے ویگن لگوا دی۔ لیکن جب پٹرول مہنگا ہوا تو ان کے لیے یہ اخراجات پورے کرنا مشکل ہو گیا۔

اب شعیب کالج نہیں جاتے بلکہ جنرل سٹور پر اپنے والد کا ہاتھ بٹاتے اور وہیں بیٹھ کر انٹرمیڈیٹ کے امتحان کی تیاری کرتے ہیں۔

<h2>سردارپور کالج کے ساتھ کیا ہوا؟</h2>

سردار پور خانیوال شہر سے 40 کلومیٹر اور تحصیل کبیروالہ سے 25 کلومیٹر کے فاصلے پر واقع ہے۔ پہلے یہ چھوٹا سا قصبہ تھا جو اب شہر کی صورت اختیار کرچکا ہے۔

یہاں پہلا سرکاری پرائمری سکول قیام پاکستان سے پہلے قائم کیا گیا تھا جسے 1970ء کی دہائی میں مڈل کا درجہ دے دیا گیا۔1985ء میں یہ ہائی سکول بنا اور 2009ء میں اسے ہائرسکینڈری سکول کا درجہ مل گیا۔

2013ء کے عام انتخابات میں اس علاقے سے رضا حیات ہراج آزاد حیثیت ایم این اے منتخب ہوئے جنہوں ںے بعد میں مسلم لیگ (ن) میں شمولیت اختیار کر لی اور حکومت سے علاقے میں ڈگری کالج منظور کروا لیا۔

کالج کی تعمیر کے لیے 16اپریل 2017ء کو 13کروڑ 80 لاکھ روپے مالیت کا ٹینڈر جاری ہوا۔ یہ ٹینڈر حاجی زبیر اینڈ کمپنی کو ملا جس نے آبادی سے کچھ دور چار ایکڑ اراضی 85 لاکھ روپے میں خریدی اور ہائر ایجوکیشن کی جانب سے نقشے کی منظوری ملنے کے بعد کالج کی تعمیر شروع کر دی۔

ابھی دس کلاس روم، چارکمپیوٹر لیبارٹریوں، پرنسپل آفس، سٹاف روم، کینٹین اور چار دیواری کی تعمیر ہی مکمل ہوئی تھی کہ حکومت تبدیل ہو گئی اور منصوبے کے لیے فنڈ کی فراہمی بھی رک گئی۔

چونکہ ٹھیکے دار کمپنی منصوبے کے لیے منظور شدہ فنڈ سے زیادہ پیسے خرچ کر چکی تھی اس لیے اس نے ادائیگی کے لیے محکمہ تعمیرات خانیوال کے خلاف ہائیکورٹ میں رٹ دائر کر دی۔

عدالتی حکم پر کمشنر ملتان نے 26 دسمبر 2022ء کو نظر ثانی شدہ منصوبہ منظور کیا جس سے اس کی لاگت بڑھ کر 17 کروڑ روپے تک پہنچ گئی۔

رضا حیات ہراج اور سابق ایم پی اے مہر اکبر حیات ہراج کا کہنا ہے کہ ان کے سیاسی حریف سید گروپ نے اقتدار میں آ کر ترقیاتی منصوبوں کے فنڈز رکوا دیے جس کی وجہ سے کالج بروقت مکمل نہ ہو سکا۔

دوسری جانب سید گروپ کے سربراہ ڈاکٹر سید خاور علی شاہ نے لوک سجاگ کو بتایا کہ کالج کے منصوبے کی تکمیل کے لیے کسی سرکاری ادارے نے ان سے رابطہ نہیں کیا اور نہ ہی عوام کی طرف سے ایسا کوئی مطالبہ سامنے آیا &quot;وگرنہ ہم فنڈز جاری کروا دیتے&quot;۔

<h2>&ldquo;صرف رنگ روغن باقی ہے&rdquo;</h2>

خانیوال کے ڈپٹی ڈائریکٹر کالجز احمر رؤف کا کہنا ہے کہ انہوں ںے گزشتہ ماہ جنوبی پنجاب میں ہائر ایجوکیشن کے ایڈیشنل سیکرٹری عطاءالحق کے ہمراہ اس کالج کے زیر تکمیل منصوبے کا دورہ کیا تھا۔

&quot;کالج میں قریباً 90 فیصدکام مکمل ہو گیا ہے اور صرف تزئین و آرائش اور رنگ روغن باقی ہے۔ عمارت کے فعال ہوتے ہی ہم یہاں کلاسیں شروع کرا دیں گے&quot;۔

انہوں نے بتایا کہ چار فروری 2023ء کو&nbsp; انہوں نے محکمہ تعمیرات خانیوال کو نظر ثانی شدہ منصوبے کی تکنیکی منظوری کے لیے مراسلہ ارسال کیا ہے۔ منظوری ملتے ہی فنڈز بھی جاری ہو جائیں گے۔

محکمہ تعمیرات خانیوال کے ایکسیئن محمد ماجد نے سجاگ کو&nbsp; بتایا کہ تکنیکی منظوری کے لیے ڈرافٹ تیار کیا جا رہا ہے۔

&quot;ڈویژنل آفس ملتان کی جانب سے چند اعتراضات لگا کر ہمیں مراسلہ واپس بھیج دیا گیا تھا۔ اگلے دس روز میں یہ بھی مکمل ہو جائے گا اورفنڈز کے اجراء میں کوئی رکاوٹ نہیں رہے گی&quot;۔

یونین کونسل سردار پور کے سابق وائس چئیرمین حبیب الرحمٰن ڈوگر کہتے ہیں کہ علاقے میں سیکڑوں طلبہ ایسے ہیں جو میٹرک کے بعد یا تو پڑھائی چھوڑ چکے ہیں یا انٹرمیڈیٹ کا پرائیویٹ امتحان دینے کی تیاری کر رہے ہیں کیونکہ ان کے لیے شہر کے کالج میں جا کر تعلیم حاصل کرنا آسان نہیں۔

&quot;کالج کی تعمیر بروقت مکمل نہ ہونے کے باعث جن بچوں کا تعلیمی کیریئر خراب ہو گیا اس کی تلافی تو ممکن نہیں لیکن اب بھی اس منصوبے کو مکمل کر لیا جائے تو باقی نوجوانوں کے مستقبل کو محفوظ بنایا جاسکتا ہے&quot;۔

امین وارثی

امین وارثی کا تعلق خانیوال کے نواحی شہر کبیر والا سے ہے گزشتہ بیس سال سے صحافت کے ساتھ وابستہ ہیں۔

انصاف کی راہ میں گھات لگائے راہزن: اپنی جان لینے والے نیسلے ملازم کی کہانی

کبیر والا میں 'گنگا الٹی بہنے لگی'، ڈیزائن کی خرابی سے کروڑوں مالیت کا سیوریج نظام ناکام

مدرسے میں حفظ قرآن کے طالب علم بچے کے ساتھ زیادتی پر خانیوال پولیس کی بروقت کاروائی

حسرت ان غنچوں پہ ہے جو بن کھلے مرجھا گئے: سردار پور ڈگری کالج میں تاخیر کئی نوجوانوں کا مستقبل تاریک کر گئی