ملک میں توانائی کی بڑھتی ہوئی مانگ کے پیشِ نظر یکم نومبر2008 ء کو مالاکنڈ تھری ہائیڈرو پاور کمپلیکس کی پیداواری صلاحیت 20 میگا واٹ سے بڑھا کر 81 میگاواٹ کر کے اسے درگئی گرِڈ سٹیشن کی 132 کلو واٹ ٹرانسمِشن لائن کے ذریعے نیشنل گرِڈ سے منسلک کر دیا گیا۔ مگر 14 سال بعد آج یہ منصوبہ طے شدہ اہداف سے سالانہ 153 میگاواٹ کم بجلی پیدا کر رہا ہے جس کے باعث اسے ہر سال نہ صرف 40 کروڑ روپے کا نقصان ہوتا ہے بلکہ بھاری جرمانہ بھی دینا پڑتا ہے۔

بجلی پیدا کرنے کا یہ پلانٹ پشاور سے 87 کلومیٹر شمال کی جانب ضلع مالاکنڈ کے شہر درگئی میں واقع ہے۔ خیبر پختونخوا انرجی ڈیویلپمنٹ کمپنی نے اس منصوبے سے حاصل ہونے والی بجلی نیشنل ٹرانسمِشن اینڈ ڈسپیچ کمپنی کو 25 سال کے لئے فروخت کر دی۔ نیشنل الیکٹرک پاور ریگولیٹری اتھارٹی کے طے کردہ نرخ کے مطابق پہلے 10 سال تک اس کے ایک یونٹ کی قیمت 4.55 روپے مقرر کی گئی۔ اس کے بعد اگلے 15 سال تک اس کی قیمت 2.64 روپے فی یونٹ طے ہوئی۔ اس طرح 25 سال کے لئے مجموعی طور پر فی یونٹ اوسط قیمت 3.91 روپے بنتی ہے۔

پانچ ارب 70 کروڑ روپے کی لاگت سے مکمل ہونے والے اس مںصوبے سے مالی سال 09-2008 اور 22-2021 کے درمیانی عرصہ میں ساڑھے 31 ارب روپے آمدنی ہوئی۔ اس طرح 14 سال میں اس منصوبے نے سالانہ اوسطاً دو ارب 25 کروڑ روپے کمائے۔

اس کی پیداواری صلاحیت میں ہونے والی توسیع کے بعد بجلی کی خرید و فروخت سے متعلق وفاقی ادارے سنٹرل پاور پرچیزنگ ایجنسی نے 2019ء میں اس منصوبے کا ڈیمانسٹریٹِڈ کمپلیکس انرجی ٹیسٹ (ڈی سی ای ٹی) کیا جس سے معلوم ہوا کہ یہ منصوبہ 81 میگا واٹ کے بجائے 74.88 میگاواٹ بجلی پیدا کر رہا ہے۔ چنانچہ اسے آٹھ کروڑ 60 لاکھ روپے جرمانہ کر دیا گیا۔

سنٹرل پاور پرچیزنگ ایجنسی نے 21 دسمبر 2021 کو بجلی کی پیداوار میں لیکوڈیٹیڈ ڈیمیجز کی مد میں خیبر پختونخوا انرجی ڈیویلپمنٹ کمپنی سے 12 کروڑ 39 لاکھ روپے اور دوسری مرتبہ 29 نومبر 2022 کو 20 کروڑ 91 لاکھ روپے کی کٹوتی کی۔ اگر 2019 سے نومبر 2022 تک کا جائزہ لیا جائے تو پختونخوا انرجی ڈیویلپمنٹ کمپنی کومجموعی طور پر تقریباً 40 کروڑ روپے سے زیادہ جرمانہ دینا پڑا۔

سنہ 2019ء میں عائد کئے جانے والے جرمانے کے بارے میں خیبر پختونخوا انرجی ڈیویلپمنٹ کمپنی کے چیف انجنیئر محمد امین خلیل نے وضاحت کرتے ہوئے کہا کہ &#39;&#39;بجلی کی کم پیداوار پر پختونخوا انرجی ڈیویلپمنٹ کمپنی کو قصور وار ٹھہرانا مناسب نہیں یہ جرمانہ آپریشن اور مینٹینینس کمپنی (الفجر انٹرنیشنل نورینکو&mdash;جے وی) کو ہونا چاہیے تھا۔&#39;&#39;

یہ بات بھی قابل ذکر ہے کہ امین خلیل واپڈا کے ایک ریٹائرڈ افسر ہیں جن کی خیبر پختونخوا انرجی ڈیویلپمنٹ کمپنی میں دوبارہ تقرری کو بھی خلافِ قانون قرار دیا جاتا ہے۔ ان کی تعیناتی 7 فروری 2018ء کو ہوئی جب انہیں چار لاکھ 75 ہزار روپے ماہانہ تنخواہ پر خیبر پختونخوا انرجی ڈیویلپمنٹ کمپنی میں آپریشن اینڈ مینجمنٹ ایڈوائزر مقرر کیا گیا۔

مئی 2021ء میں انہیں چیف انجینئر کا اضافی چارج بھی دے دیا گیا جبکہ قواعد کے مطابق باہر سے کسی کو اس عہدے پر مقرر کرنے کی کوئی گنجائش نہیں اور اس عہدے پر اس سے نچلے درجے کے افسر کو ہی ترقی دی جانی چاہیے۔ 
فزیبلٹی رپورٹ کے مطابق اس منصوبے سے بجلی کی پیداوار کے علاوہ 25 ہزار ایکڑ زرعی اراضی کو بھی سیراب کیا جانا تھا جو 14 سال بعد بھی ممکن نہیں ہو سکا۔ خیبر پختونخوا انرجی ڈیویلپمنٹ کمپنی کی ویب سائٹ پر دی گئی معلومات کے مطابق اس مقصد کے لئے صوبائی محکمہ آبپاشی نے &#39;بائے زئی&#39; نامی منصوبہ شروع کر رکھا ہے لیکن اس منصوبے کی تکمیل کی مدت کا کوئی تذکرہ نہیں ملتا۔

<h2>مسئلہ کہاں ہے؟</h2>

امین خلیل ڈیم کی صفائی نہ ہونے کو اس منصوبے سے بجلی کی پیداوار میں کمی کا بنیادی سبب بتاتے ہیں۔ ان کا کہنا ہے کہ &#39;&#39;ڈیم کے ڈیزائن میں خودکار صفائی کا نظام موجود نہیں ہے۔ یہی وجہ ہے کہ اس کی عام طریقے سے صفائی کرنا پڑتی ہے جس کے لئے پورے سسٹم کو 36 گھنٹے کے لئے بند رکھنا پڑتا ہے۔ ڈیم کی صفائی کے لئے ٹریش ریک کلیننگ مشین درکار ہے جو ابھی تک خریدی نہیں گئی۔&#39;&#39;

سرکاری ریکارڈ کے مطابق اس مشین کی خریداری کے لئے پہلی بار یکم دسمبر 2020ء کو ٹینڈر دیا گیا۔ جس کو بعد میں نامعلوم وجوہات کی وجہ سے منسوخ کر دیا گیا۔ دوسری بار 11 جنوری 2021ء کو ٹینڈر ہوا جس میں صرف ایک بِڈر (بولی دینے والے) نے شرکت کی جس کی وجہ سے اسے بھی منسوخ کرنا پڑا۔ تیسری مرتبہ 24 مئی 2021ء کو ٹینڈر ہوا لیکن اس بار بھی صرف ہی ایک بِڈر، الفجر انٹرنیشنل نے شرکت کی جس کے وجہ سے یہ ٹینڈر بھی منسوخ ہو گیا۔

چوتھا ٹینڈر 21 جنوری 2022ء کو جاری ہوا جس میں دو کمپنیوں نے حصہ لیا۔ کیم ٹیک انجینئرنگ سروسز پرائیوٹ لمیٹڈ۔جے وی نے 95 کروڑ اور الفجر انٹرنیشنل نے ایک ارب 29 کروڑ روپے کی بولی لگائی۔ تاہم بولی میں کم از کم دو بِڈرز کی شرط پوری ہونے کے باوجود یہ معاملہ آگے نہ بڑھ سکا۔

خیبر پختونخوا انرجی ڈیویلپمنٹ کمپنی نے بظاہر قواعد و ضوابط کے صریح خلاف ورزی کرتے ہوئے پہلے فنانشل اور بعد میں ٹیکنیکل (تکنیکی درجہ بندی) بِڈ کو کھولا اور اس طرح کیم ٹیک انجینئرنگ کی کم بولی کو مسترد کر دیا گیا۔ یوں یہ معاملہ ایک بار پھر لٹک گیا۔

کم بولی دینے والی کمپنی 27 جولائی 2022ء کو اپنا کیس خیبر پختونخوا پبلک پروکیورمنٹ ریگولیٹری اتھارٹی کے پاس لے گئی جس نے اس کے حق میں فیصلہ دے دیا۔ اس نے 31 اگست 2022ء کو جاری ہونے والے اپنے تفصیلی فیصلہ میں لکھا کہ مشین کی خریداری کے لئے وضع کردہ سٹینڈرڈ بِڈنگ ڈاکومنٹ خیبر پختونخوا پبلک پروکیورمنٹ ریگولیٹری اتھارٹی کے قواعد و ضوابط سے مطابقت نہیں رکھتا۔ اس فیصلے میں کیم ٹیک انجینئرنگ کو مشین کی خریداری کا اہل قرار دیتے ہوئے خیبر پختونخوا انرجی ڈیویلپمنٹ کمپنی کو ہدایت کی کہ وہ وضع کردہ قواعد و ضوابط کے تحت یہ خریداری ممکن بنائے۔ تاہم ابھی تک یہ مشین خریدی نہیں جا سکی۔

خیبر پختونخوا انرجی ڈیویلپمنٹ کمپنی کے ایک اہلکار نے اپنا نام ظاہر نہ کرنے کی درخواست کرتے ہوئے بتایا کہ ٹریش ریک کلینگ مشین کی تنصیب سے بجلی کی پیداوار بڑھائی جا سکتی ہے جس کے بعد پلانٹ جرمانوں سے بھی بچ جائے گا &rsquo;&rsquo;لیکن اس منصوبے کے کرتا دھرتا لوگ نامعلوم وجوہات کی بنا پر یہ مسئلہ حل کرنے میں سنجیدہ نظر نہیں آتے۔&#39;&#39;

چراغ تلے اندھیرا: آزاد جموں و کشمیر کے باسی اپنے دریاؤں سے بنی بجلی کے ثمرات سے محروم۔

درگئی پاور پلانٹ ہر سال جرمانہ کیوں ادا کر رہا ہے؟

text

پشاور کے مضافاتی علاقہ ہزار خوانی سے تعلق رکھنے والے 26 سالہ افضال احمد کے گاؤں میں کرکٹ کا کھیل بہت شوق سے کھیلا جاتا ہے۔ یہی وجہ ہے کہ انہیں بھی بچپن سے اس کھیل سے کافی شغف ہے۔

اپنے اس شوق کی تکمیل کے لئے وہ کھیلنے کے لئے کافی عرصہ سے پشاور جِم خانہ جاتے ہیں جہاں وہ ایک کلب کی طرف سے کھیلتے ہیں۔ لیکن ان کے لئے اب یہ کھیل مہنگا ہوتا چلا جا رہا ہے کیونکہ &quot;کرکٹ کے میچ کی فیس ہزاروں میں ہوتی ہے جس کے لئے کھلاڑیوں کو اپنی جیب سے پیسے دینے پڑتے ہیں۔&quot;

پاکستان تحریک انصاف کے چیئرمین عمران خان نے 2018 میں خیبر پختونخوا میں ایک ہزار کھیلوں کے گراؤنڈز تعمیر کرنے کا اعلان کیا تو افضال اور اس کے گاؤں کے تمام کھلاڑی بہت خوش تھے کہ اب انہیں اپنے گاؤں میں ہی کھیلنے کی سہولت میسر ہو گی۔ دو یونین کونسلوں پر مشتمل ان کے گاؤں میں تین سال قبل کرکٹ کی 16 ٹیمیں تھیں۔

لیکن زمینی حقائق ان کی توقعات کے برعکس ہیں۔

صوبے میں پاکستان تحریک انصاف کا حالیہ دورانیہ ختم ہونے کو ہے لیکن ابھی تک ان کے گاؤں میں کوئی گراؤنڈ تعمیر نہیں ہوا۔ نوجوانوں کے شوق کو دیکھتے ہوئے گذشتہ سال ان کے گاؤں میں کچھ لوگوں نے اپنی ذاتی اراضی پر کرکٹ کی دو گراؤنڈز تعمیر کئے۔ ان گراؤنڈز میں بیس اوورز کے ایک میچ کے لئے کھلاڑیوں کو چار سے چھ ہزار روپے فیس ادا کرنی پڑتی ہے جو بسا اوقات ان کے بس سے باہر ہوتی ہے۔ یہی وجہ ہے کہ اب ان کے گاؤں میں صرف چار ٹیمیں باقی رہ گئی ہیں۔

صوبہ خیبر پختونخوا میں ایک ہزار کھیلوں کے میدانوں کے اعلان کو عملی جامہ پہنانے کے لئے صوبائی حکومت نے پانچ ارب 50 کروڑ روپے کا تخمینہ لگایا۔ مالی سال 2018-19 سے شروع ہونے والے اس چار سالہ منصوبہ &mdash; تھاؤزنڈ پلینگ فیسلیٹیز &mdash; کو جون 2023 تک مکمل ہونا تھا جسے عملی جامہ پہنانے کے لئے پراجیکٹ مینجمنٹ یونٹ بھی قائم کیا گیا جس کے لئے 16 کروڑ روپے کا فنڈ منظور کیا گیا۔ اس منصوبہ کے تحت ضم شدہ قبائلی اضلاع کے علاوہ تمام صوبہ میں ایک ہزار کھیلوں کے میدان تعمیر کئے جانے تھے۔ ہر گراؤنڈ پر 50 لاکھ روپے اخراجات کی منظوری دی گئی۔

اوائل میں اس منصوبہ کی نگرانی کا فریضہ اس وقت کے ڈائریکٹر جنرل سپورٹس اسفندیار خٹک کے سپرد کیا گیا لیکن جنوری 2020 میں وفاقی وزارتِ تعلیم کے ایک ماتحت ادارہ &#39;نیشنل بک فاؤنڈیشن&#39; سے ڈیپیوٹیشن پر لائے گئے گریڈ 18کے ایک افسر، مراد علی مہمند، کو اس کا پراجیکٹ ڈائریکٹر بنا دیا گیا۔ صوبائی حکومت نے دو سال بعد ہی ان کی خدمات وفاقی وزراتِ تعلیم کو واپس کر دیں اگرچہ ان کی ڈیپیوٹیشن کے دورانیہ میں ایک سال باقی تھا۔ ان کے جانے کے بعد ایک مرتبہ پھر اُس وقت کے ڈائریکٹر جنرل سپورٹس خالد خان کو اس منصوبہ کے پراجیکٹ ڈائریکٹر کا اضافی چارج دے دیا گیا۔

دستاویزات کے مطابق پہلے مرحلہ میں دو سو 21 گراؤنڈز کے لئے ایک ارب تین کروڑ 60 لاکھ روپے منظور کئے گئے۔ لیکن اب تک صرف ایک سو 33 گراؤنڈز کی تعمیر مکمل کی جا سکی ہے جن میں 20 ایسے بھی ہیں جہاں پہلے سے موجود گراؤنڈز کی صرف مرمت کی گئی ہے۔ نیز 17 کھیلوں کے میدان چار ضم شدہ اضلاع &mdash; شمالی وزیرستان، جنوبی وزیرستان، خیبر اور اورکزئی &mdash; میں بنائے گئے ہیں جو کہ اس پراجیکٹ کا حصہ ہی نہیں تھے۔&nbsp; ہر ایک گراؤنڈ پر 50 لاکھ روپے تک خرچ کرنے کی منظوری دی گئی تھی لیکن پراجیکٹ منیجمنٹ یونٹ نے ایک سو 16 ایسے گراؤنڈز تعمیر کئے ہیں جن پر متعین کردہ رقم سے زیادہ خرچ ہوئی ہے۔

<h2>جس کا کام، اُسی کو ساجھے</h2>

اس اہم منصوبہ کو پایہ تکمیل تک پہنچانے کے لئے حیران کن طور پر ایسے منظورِ نظر افراد کو ڈیپوٹیشن پر لایا گیا جن کا اس شعبہ سے دور دور تک کا کوئی واسطہ نہیں تھا۔ مثال کے طور پر پراجیکٹ ڈائریکٹر جیسی اہم ذمہ داری کے لئے نیشنل بک فاونڈیشن سے جبکہ ڈپٹی ڈائریکٹر کی اسامی کے لئے محکمہ تعلیم کے ایک افسر کو ڈیپوٹیشن پر لایا گیا۔

حکومت نے صوبے کے سات ڈویژنوں کے لئے&nbsp;انجینئروں کی سات اسامیوں کی منظوری دی جنہیں اپنے اپنے ڈویژن میں اس منصوبہ کی مانیٹرنگ کرنا تھی۔ اب تک ان میں سے کسی اسامی پر تعیناتی نہیں ہوئی لیکن ان کے لئے منظور کی گئی سات میں سے پانچ گاڑیاں خریدی جا چکی ہیں۔

ان سات انجینئروں کے لئے 35 لاکھ روپے مالیت کی سنگل کیبن گاڑیوں کی منظوری دی گئی لیکن، دستاویزات کے مطابق، 54 لاکھ مالیت کی پانچ گاڑیوں پر دو کروڑ ستر لاکھ روپے خرچ کئے گئے۔ اس طرح ہر گاڑی پر مختص شدہ رقم سے 65 فیصد زائد ادائیگی کی گئی۔ اس منصوبہ کے سابق پراجیکٹ ڈائریکٹر مراد علی کا کہنا ہے کہ گاڑیاں مہنگی ہو گئی تھیں جس کی وجہ سے انہیں مختص کردہ اخراجات سے تجاوز کرنا پڑا &quot;اور یہ سب کچھ میں نے اپنے قانونی اختیار کو بروئے کار لاتے ہوئے کیا۔&quot;

لیکن ان کے دعوے کے برعکس قانونی طور پراجیکٹ ڈائریکٹر اپنی صوابدید پر صرف 15 فیصد اضافہ کا مجاز ہے جبکہ اس سے زیادہ اضافہ کے لئے پریکٹیکل کاپی ون (پی سی ون) میں نظرِ ثانی کرنا پڑتی ہے جس کے لئے پراونشل ڈویلپمنٹ ورکنگ پارٹی کی منظوری درکار ہوتی ہے۔

اس چار سالہ منصوبہ کے لئے گاڑیوں کے تیل کی مد میں 40 لاکھ روپے رکھے گئے تھے جبکہ انجینئرز نہ ہونے کے باوجود جون 2021 تک 59 لاکھ روپے خرچ کئے جا چکے ہیں۔ ٹریولنگ اینڈ ڈے الاؤنس کی مد میں 25 لاکھ روپے رکھے گئے تھے جس میں سے اسی عرصہ کے دوران 23 لاکھ روپے خرچ ہو چکے ہیں۔

ذرائع کے مطابق اس منصوبہ میں زائد فنڈز کے استعمال کو اور ایک ہزار کھیلوں کے میدانوں کے ہدف کو مکمل نہ کر سکنے کی خفت مٹانے کے لئے پریکٹیکل کاپی ون پر نظرِ ثانی کا کام شروع کر دیا گیا ہے جس کے لئے اسے جلد ہی پراونشل ڈویلپمنٹ ورکنگ پارٹی کے سامنے رکھا جائے گا۔ منصوبہ کے نام &#39;تھاؤزنڈ پلینگ فیسلیٹز&#39; (یعنی ہزاروں کھیلوں کے میدان) کو تبدیل کر کے &#39;ویریس پلینگ فیسلیٹز&#39; (یعنی متعدد کھیلوں کے میدان) رکھا جا رہا ہے۔

صوبائی محمکہ کھیل کے سیکرٹری کپیٹن (ریٹائرڈ) مشتاق احمد تسلیم کرتے ہیں کہ اس منصوبہ میں کچھ کام پریکٹیکل کاپی ون کے خلاف ہوئے ہیں &quot;جنہیں نظرثانی شدہ پی سی ون میں ٹھیک کیا جا رہا ہے جس کی منظوری کے بعد اس منصوبہ کے لئے نئی گائیڈ لائنز جاری کی جائیں گی جس پر سختی سے عمل درآمد ہوگا۔&quot;

خیبر پختونخوا میں سیلاب زدہ علاقوں کی بحالی کے لئے 180 ارب روپے درکار، حکومت کو نصف سے زیادہ رقم کی کمی کا سامنا

خیبر پختونخوا میں کھیلوں کے 1,000 گراؤنڈ تیار کرنے کا منصوبہ ابتدائی مرحلے میں ہی ناکام ہو گیا

اکتوبر 1998 میں پاکستان کے خلاف کھیلے جانے والے ایک ٹیسٹ میچ کی پہلی اننگز کے دوسرے روز آسٹریلیا کی کرکٹ ٹیم کے کپتان مارک ٹیلر تین سو سے زیادہ رنز بنا چکے تھے۔ ان کے مداحوں کو امید تھی کہ اب وہ تین سو 76 رنز بنا کر ویسٹ انڈیز کے برائن لارا کا ایک اننگز میں سب سے بڑے انفرادی سکور کا ریکارڈ توڑ دیں گے۔ لیکن انہوں نے تین سو 34 رنز پر ہی اپنی اننگز ختم کر دی کیونکہ ان کے ہم وطن سر ڈان بریڈ مین نے 1930 میں ایک اننگز میں اتنے ہی رنز بنائے تھے اور مارک ٹیلر احتراماً ان سے آگے نہیں بڑھنا چاہتے تھے۔&nbsp;

جن لوگوں نے ٹیلی وژن پر یا گراؤنڈ میں انہیں یہ اننگز کھیلتے دیکھا ہے انہیں یاد ہے کہ انہوں نے یہ کارنامہ پشاور کے ارباب نیاز سٹیڈیم میں انجام دیا تھا جسے اس وقت ایک بین الاقوامی کرکٹ سنٹر کی حیثیت حاصل تھی۔ 1984 میں تعمیر کیے گئے اس سٹیڈیم میں آسٹریلیا کے خلاف کھیلے جانے والے اُس ٹیسٹ کے علاوہ پانچ مزید ٹیسٹ اور 17 ایک روزہ میچ بھی منعقد کیے گئے ہیں۔&nbsp;

تاہم 2006 میں پاکستان اور انڈیا کے درمیان کھیلا گیا ایک روزہ میچ یہاں ہونے والا آخری بین الاقوامی مقابلہ ثابت ہوا کیونکہ اُسی سال ملک میں دہشت گردی کی ایک ایسی لہر اٹھی جس کے باعث غیرملکی ٹیمیں پاکستان آنے سے ہچکچانے لگیں۔ حتیٰ کہ مارچ 2009 کے اوائل میں مسلح دہشت گردوں نے لاہور میں سری لنکا کی کرکٹ ٹیم پر حملہ کر کے اس کے متعدد کھلاڑیوں کو زخمی کر دیا جس کے نتیجے میں اگلے کئی سال کسی غیر ملکی ٹیم نے پاکستان کا دورہ تک نہ کیا۔

اگرچہ پچھلے چند سالوں سے کئی ملکوں کے کھلاڑی اور ٹیمیں دوبارہ یہاں آنے لگے ہیں لیکن پشاور کو ابھی تک کسی بین الاقوامی میچ کی میزبانی کا موقع نہیں ملا۔ اس کی ایک وجہ اس کا پاک-افغان سرحد کے قریب ہونا ہے جس کے باعث یہاں دہشت گردی کا خطرہ ملک کے دوسرے حصوں سے زیادہ ہوتا ہے۔ تاہم اس کی دوسری اہم وجہ ارباب نیاز سٹیڈیم میں بین الاقوامی معیار کی سہولتوں کی عدم موجودگی بھی رہی ہے۔&nbsp;

اس مسئلے کو حل کرنے کے لیے خیبرپختونخوا کی صوبائی حکومت نے اس سٹیڈیم کو نئے سرے سے تعمیر کرنے کا منصوبہ بنایا جس کے لیے 20 ستمبر 2017 کو ایک ارب 37 کروڑ 78 لاکھ روپے کی منظوری دی گئی۔ 4 اپریل 2018 کو اس منصوبے پر کام کے آغاز کا سرکاری حکم نامہ (ورک آرڈر) بھی جاری کر دیا گیا جس کے مطابق اسے جولائی 2020 میں مکمل ہونا تھا۔

لیکن دو سال کا اضافی عرصہ گزرنے کے باوجود اس کا تعمیراتی کام ابھی تک نامکمل پڑا ہوا ہے۔&nbsp;

<h2>تاخیر کا سبب: غفلت یا کوڈ؟</h2>

سٹیڈیم کی تعمیرِنو کا ٹھیکہ دو کمپنیوں، جی ایچ سی انٹرنیشنل (جسے پہلے غلام حبیب اینڈ کمپنی کہا جاتا تھا اور جس کا صدر دفتر پشاور میں ہے) اور ایم جی ایچ انجینئرنگ اینڈ کنٹرول کو دیا گیا (جس کا مرکزی دفتر لاہور میں ہے)۔ سرکاری دستاویزات کے مطابق ان میں سے پہلی کمپنی کے ذمے تعمیراتی کام لگائے گئے جن کی کل مالیت ایک ارب 18 کروڑ 44 لاکھ روپے طے کی گئی اور انہیں مکمل کرنے کا عرصہ تین سال چار ماہ رکھا گیا۔&nbsp;

حکومت کے ساتھ کیے گئے معاہدے کے مطابق اس کمپنی نے یہ کام 17 اکتوبر 2018 کو شروع کرنا تھے اور 16 جنوری 2021 کو تکمیل تک پہنچانا تھے۔ لیکن وہ انہیں وقت پر مکمل نہ کر سکی۔ نتیجتاً حکومت نے پہلے اسے دس ماہ کی اضافی مہلت دی اور پھر اس میں سات ماہ کا مزید اضافہ کر دیا۔ اس کے باوجود سٹیڈیم کی تعمیرات ابھی تک نامکمل ہیں۔&nbsp;

ایم جی ایچ کنٹرول اینڈ انجینئرنگ کمپنی کو ملنے والے کام کا تعلق بجلی کی پیداوار، ترسیل اور استعمال سے متعلق آلات اور مواصلاتی نظام کی تنصیب سے تھا۔ اس کام کی مالیت 53 کروڑ پانچ لاکھ روپے تھی اور اسے 31 جولائی 2021 کو شروع ہو کر 30 جون 2022 کو ختم ہونا تھا۔ لیکن سرکاری دستاویزات کے مطابق اس کا بہت بڑا حصہ ابھی تک نامکمل پڑا ہے۔

صوبائی محکمہ کھیل کے ڈائریکٹر جنرل خالد خان اور جی ایچ سی انٹرنیشنل کے پراجیکٹ منیجر نجیب الرحمان کا کہنا ہے کہ اس تاخیر کا سبب کسی کی غفلت یا نااہلی نہیں بلکہ &nbsp;کووڈ۔19 وبا ہے۔ ان کے مطابق سٹیڈیم کی تعمیر مکمل کرنے کے لیے درکار بہت سا سامان دوسرے ملکوں سے منگوایا جانا تھا لیکن اس کی درآمد اور وصولی بروقت نہیں ہو سکی کیونکہ &quot;دنیا بھر میں بہت سی صنعتیں اس وبا کی وجہ سے طویل عرصہ بند رہی ہیں&quot;۔&nbsp;

اس تاخیر کی وجہ سے 31 مارچ 2021 کو صوبائی محکمہ ترقیات اور منصوبہ بندی کو سٹیڈیم کی تعمیر کی مجموعی لاگت میں 41 فیصد اضافہ کر کے اسے ایک ارب 94 کروڑ 61 لاکھ پچاس ہزار روپے کرنا پڑا۔

<h2>خامیاں اور نقائص</h2>

مارچ 2022 میں خیبرپختونخوا کے ایڈیشنل چیف سیکرٹری سید شہاب علی شاہ نے محکمہ ترقیات اور منصوبہ بندی کے مانیٹرنگ یونٹ کو حکم دیا کہ وہ سٹیڈیم کی تعمیر کی جانچ پڑتال کر کے اس کے بارے میں انہیں ایک تفصیلی رپورٹ پیش کرے۔ اگرچہ مانیٹرنگ یونٹ نے ایک مہینے کے اندر اندر یہ رپورٹ انہیں جمع کرا دی تھی لیکن اسے ابھی تک منظرِعام پر نہیں لایا گیا۔

سرکاری ذرائع کے مطابق اسے خفیہ رکھنے کی وجہ یہ ہے کہ اس میں سٹیڈیم کی تعمیرِنو کے حوالے سے متعدد انکشافات کیے گئے ہیں۔ ان میں سب سے اہم انکشاف یہ ہے کہ اس منصوبے پر کام کرنے کے لیے جن کمپنیوں اور جس کنسلٹنٹ، ایسوسی ایٹس اِن ڈویلپمنٹ پرائیویٹ لمیٹڈ، &nbsp;کا انتخاب کیا گیا وہ اس کے لیے درکار معیار پر پورے ہی نہیں اترتے۔

رپورٹ کا کہنا ہے کہ ایسوسی ایٹس اِن ڈویلپمنٹ پرائیویٹ لمیٹڈ نے سٹیڈیم کا ڈیزائن بناتے وقت ایسے کئی عوامل کا خیال نہیں رکھا جو بین الاقوامی قواعدوضوابط کے تحت اس کا لازمی حصہ ہونے چاہئیں۔ اس کی ایک مثال یہ ہے کہ سٹیڈیم میں بنائے جانے والے ہاسٹل کے ابتدائی ڈیزائن میں ہنگامی حالت میں باہر نکالنے کے لیے کوئی راستہ ہی نہیں رکھا گیا تھا۔ لیکن جب اس کی تعمیر کے دوران یہ بات سامنے آئی تو نہ صرف اس کے ڈیزائن میں تبدیلیاں کرنا پڑیں بلکہ اس کی تعمیر کے لیے درکار رقم میں بھی اضافہ ہو گیا۔&nbsp;

رپورٹ نے سٹیڈیم کے اندر بنائے گئے پویلین کے ڈیزائن میں بھی متعدد مسائل کی نشان دہی کی ہے۔ اس کا کہنا ہے کہ اس میں نصب کی جانے والی کھڑکیاں اور دروازے غیر معیاری ہیں جنہیں تبدیل کرنے کی حکومتی ہدایات پر کوئی عمل درآمد نہیں کیا گیا جبکہ اس کی گراؤنڈ کے رخ بنی ہوئی شیشے کی دیوار کے سامنے ایسے ستون بنا دیے گئے ہیں جن کی وجہ سے اس کے اندر سے پورا گراؤنڈ نظر ہی نہیں آتا۔ اسی طرح، رپورٹ کے مطابق، سٹیڈیم میں بنائے جانے والے سوئمنگ پول میں اتنی تکنیکی خرابیاں ہیں کہ وہ سوئمنگ پول کے بجائے ایک چھ فٹ گہرا تالاب لگتا ہے۔

سٹیڈیم میں نصب کرنے کے لیے درکار ٹیلی ویژن، ایل ای ڈی سکرینیں، جنریٹر، کمیونیکیشن سسٹم، الارم اور فلڈ لائٹیں وغیرہ خریدتے وقت بھی محض ایک ہی کمپنی کی دی گئی معلومات پر انحصار کیا گیا ہے۔ رپورٹ کے مصنفین کا کہنا ہے کہ یہ اقدام ان سرکاری قواعدوضوابط کی خلاف ورزی ہے جن کے مطابق کسی حکومتی منصوبے کے لیے مطلوبہ سامان کی خریداری کرتے وقت کم از کم تین کمپنیوں سے اس کے معیار اور قیمت کے بارے میں معلومات لینا ضروری ہے۔&nbsp;

ان کا یہ بھی کہنا ہے کہ اس طرح کی واضح غلطیوں کے باوجود ٹھیکیدار کمپنیوں اور کنسلٹنٹ کو حکومت کی طرف سے کبھی نہیں پوچھا گیا کہ ان کے کام کا معیار اور اس کی رفتار غیر تسلی بخش کیوں ہے بلکہ، اس کے برعکس، کنسلٹنٹ کا معاوضہ ایک کروڑ 54 لاکھ 65 روپے سے بڑھا کر پانچ کروڑ 28 لاکھ 49 ہزار روپے کر دیا گیا۔&nbsp;

اس طرح کے انکشافات کی بنا پر ان مصنفین نے سفارش کی ہے کہ ایسوسی ایٹس اِن ڈویلپمنٹ پرائیویٹ لمیٹڈ کو ادا کیا جانے والا معاوضہ اس سے واپس لیا جائے اور کام کی تکمیل میں تاخیر کے ذمہ دار تمام لوگوں کے خلاف قانونی کارروائی کی جائے۔

تیمور خان

تیمور خان کا تعلق پشاور سے ہے وہ گزشتہ 9 سال سے صحافت سے وابستہ ہیں وہ گورننس، صحت اور سیاست پر رپورٹنگ کرتے ہیں۔

درگئی پاور پلانٹ ہر سال جرمانہ کیوں ادا کر رہا ہے؟

خیبر پختونخوا میں کھیلوں کے 1,000 گراؤنڈ تیار کرنے کا منصوبہ ابتدائی مرحلے میں ہی ناکام ہو گیا

خفیہ سرکاری رپورٹ کے اہم انکشافات: ارباب نیاز کرکٹ سٹیڈیم کی تعمیر میں نقائص اور تاخیر کے 'ذمہ دار لوگوں کے خلاف قانونی کارروائی کی جائے'۔

Lok Sujag