اقلیتوں کے حقوق کے تحفظ کے لیے پہلا اقلیتی مارچ

video

ملیر ایکسپریس وے کی تعمیر کراچی میں خوراک کے بحران کو جنم دے سکتی ہے

کراچی سانس نہیں لے سکتا

لاہوتی میلہ 2023: سندھ کی لوک موسیقی کا قومی اور عالمی سطح پر میلاپ

مردوں کے معاشرے میں اپنی جگہ بناتی: حیدرآباد کی بائیکر خواتین

قمبر شہداد کوٹ میں سیلاب سے بے گھر ہونے والی حاملہ خواتین: 'ہمیں کوئی طبی امداد نہیں مل رہی'۔

ذوالفقار پھل پوٹو پانچ سال پہلے تک اپنی زمین کے ہر ایکڑ سے تقریباً 60 من (دو ہزار چار سو کلوگرام) چاول پیدا کرتے تھے لیکن اب ان کی فی ایکڑ پیداوار 40 من (ایک ہزار چھ سو کلوگرام) رہ گئی ہے۔ انہیں خدشہ ہے کہ آنے والے سالوں میں اس میں اور بھی کمی ہو جائے گی۔

وہ کہتے ہیں کہ انہوں نے اس مسئلے کے حل کے لیے بہت سے طریقے آزمائے ہیں &quot;جن میں مہنگے بیجوں، بہت سی زرعی ادویات اور معیاری کھادوں کا استعمال بھی شامل ہے&quot;۔ لیکن، ان کے مطابق، &quot;ان سے فصل کی پیداوار پر کوئی مثبت اثر نہیں پڑا&quot;۔ 
لہٰذا وہ اس نتیجے پر پہنچے ہیں کہ ان کی فی ایکڑ پیداوار میں کمی کی وجہ بیج کھاد وغیرہ کا معیار نہیں بلکہ موسم میں آنے والی تبدیلیاں ہیں۔ ان تبدیلیوں کے باعث انہیں نہ تو &quot;چاول کی فصل کے لیے درکار پانی وقت پر مل رہا ہے اور نہ ہی انہیں اس کی کاشت اور برداشت کے دنوں میں موزوں درجہ حرارت دستیاب ہوتا ہے&quot;۔

شمالی سندھ کے شہر جیکب آباد سے تقریباً 20 کلومیٹر جنوب میں چانگ گوٹھ نامی گاؤ ں میں واقع ان کی 55 ایکڑ زرعی اراضی دریائے سندھ سے نکلنے والی نہروں سے سیراب ہوتی ہیں۔ وہ کہتے ہیں کہ ماضی قریب میں وہ عام طور پر جون کے آغاز میں چاول کی بوائی کرتے تھے لیکن پچھلے کچھ سالوں سے اُن دنوں دریائے سندھ میں پانی کی شدید قلت ہو جاتی ہے اور نہری پانی چانگ گوٹھ تک پہنچ ہی نہیں پاتا۔ چنانچہ، ان کے مطابق، &quot;مجھے فصل کی کاشت میں اس وقت تک تاخیر کرنا پڑتی ہے جب تک نہروں میں پانی کی مقدار بہتر نہ ہو جائے&quot;۔

حکومتی ادارے بھی ان کی بات کی تائید کرتے ہیں۔ ان کے مطابق پچھلے چند سالوں میں عام طور پر اور اِس سال خاص طور پر سندھ میں موسمِ گرما کے آغاز میں دریائی پانی کی قلت 50 فیصد سے بھی زیادہ رہی ہے۔ مثال کے طور پر 12 جون 2022 کو انڈس ریور سسٹم اتھارٹی کی جانب سے جاری کیے گئے ایک اعلامیے میں کہا گیا کہ صوبے کے تین بیراجوں، گُدو، سکھر اور کوٹڑی، پر مئی اور جون کے مہینوں میں مجموعی طور پر دریائے سندھ کا بہاؤ صوبے کی دریائی پانی کی مجموعی ضرورتوں سے 61 فی صد کم رہا۔

آبی ماہرین کے مطابق دریا کے بہاؤ میں کمی کا ایک اہم سبب شمالی پاکستان میں سردیوں کے موسم میں ہونے والی بارش اور برفباری میں آنے والی کمی ہے کیونکہ اُس علاقے سے دریا میں شامل ہونے والے سینکڑوں ندی نالے شروع ہوتے ہیں۔ مئی 2022 میں وفاقی محکمہ موسمیات کے جاری کردہ اعدادوشمار اس کمی کی نشان دہی کرتے ہوئے کہتے ہیں کہ رواں سال جنوری اور اپریل کے درمیان پاکستان میں ہونے والے بارشیں معمول سے 21.6 فیصد کم رہیں۔

اسی طرح سندھ حکومت کی تحفظِ ماحول کی مجوزہ پالیسی کا مسودہ (جسے ابھی سرکاری طور پر منظور نہیں کیا گیا) بھی توثیق کرتا ہے کہ دریائی پانی کی قلت کا سبب موسمیاتی تبدیلیاں ہی ہیں۔ اس کے مصنفین کا کہنا ہے کہ اس قلت سے صوبہ سندھ کے بہت سے علاقوں کی زرعی زمین بنجر ہوتی جا رہی ہے۔ ان کے مطابق مستقبل قریب میں یہ رجحان مزید بڑھ جائے گا کیونکہ آبادی میں اضافے کے پیشِ نظر 2022 اور 2030 کے درمیان صوبے میں زرعی آب پاشی کے لیے پانی کی مجموعی طلب ایک سو نو ملین ایکڑ فٹ سے بڑھ ایک سو 24 ملین ایکڑ فٹ ہو جائے گی جبکہ اس عرصے میں دریائے سندھ میں اس سے کہیں کم پانی موجود ہو گا۔ وہ کہتے ہیں کہ اس سے صوبے کے کئی علاقوں میں &quot;فی ایکڑ پیداوار میں 6 فیصد سے 18 فی صد کمی آ سکتی ہے&quot;۔

<h2>بدلتے موسم، بدلتی زرعی معیشت</h2>

ذوالفقار پھل پوٹو کا گاؤں لاڑکانہ ڈویژن کا حصہ ہے جہاں سندھ میں سب سے زیادہ چاول کاشت کیے جاتے ہیں۔ 2020 میں شائع ہونے والے ایک تحقیقی مضمون کا کہنا ہے کہ اِس ڈویژن میں 1994 اور 2017 کے درمیان چاول کی بوائی کے دنوں کے اوسط درجہ حرارت میں 3.9 ڈگری سینٹی گریڈ کا اضافہ ہو ا۔ یہ مضمون وِپن کمار اوڈ، محمد عرفان، وکی کمار، محمد سلمان محسن اور چند دیگر تحقیق کاروں نے لکھا ہے جو اس کی اشاعت کے وقت پاکستان، چین اور ملائیشیا کے تعلیمی اور تحقیقی اداروں سے وابستہ تھے اور اسے ایم ڈی پی آئی نامی ایک غیرسرکاری اشاعتی ادارے نے چھاپا ہے۔ اس میں یہ بھی کہا گیا ہے کہ انہی سالوں میں چاول کی کٹائی کے دنوں میں اوسط درجہ حرارت 2.4 ڈگری سینٹی گریڈ کم ہو گیا۔

ان دونوں تبدیلیوں کے نتیجے میں فصل کی بوائی اور کٹائی میں 15 سے 30 دن کی تاخیر دیکھی گئی ہے۔ چنانچہ، مضمون نگاروں کے مطابق، لاڑکانہ ڈویژن میں اکتوبر 2017 کے پہلے ہفتے تک چاول کے زیرکاشت کل مقامی اراضی کے 46.8 فیصد حصے سے فصل اٹھائی نہیں جا سکی تھی حالانکہ 1994 میں اکتوبر کے پہلے ہفتے میں اس فصل کے زیرِ کاشت رقبے کے صرف 34.6 فیصد حصے کو کاٹنا ابھی باقی تھا۔

تحفظِ ماحول کی مجوزہ صوبائی پالیسی خبردار کرتی ہے کہ یہ موسمی تبدیلی چاول سمیت تمام فصلوں کی پیداوار پر واضح طور پر منفی اثرات چھوڑے گی۔ صوبائی محکمہ زراعت کے توسیع کے شعبے میں کام کرنے والے لاڑکانہ کےسرکل افسر ریاض بورڑو اس انتباہ کی تائید کرتے ہوئے کہتے ہیں کہ &quot;پانی کی قلت، بڑھتے ہوئے درجہ حرارت اور بارشوں کے معمول میں غیرمتوقع تبدیلیوں سے لاڑکانہ میں چاول، گندم اور گنے کی فصلوں کو خاص طور پر نقصان پہنچ رہا ہے&quot;۔

تاہم ان مسائل میں سے بارش کے وقت اور مقدار میں آنے والی تبدیلی خاص طور پر اہم ہے کیونکہ تحفظِ ماحول کی پالیسی کے مسودے میں کہا گیا ہے کہ آنے والے سالوں میں صوبہ سندھ میں یا تو بارشیں معمول سے بہت کم ہو جائیں گی یا ان میں بہت زیادہ اضافہ ہو جائے گا (جیسا کہ حالیہ ہفتوں میں دیکھنے میں بھی آیا ہے)۔ اس دو انتہاؤں کے نتیجے میں &quot;سیلاب، خشک سالی اور غذائی عدم تحفظ جیسے خطرات میں اضافہ ہو سکتا ہے&quot;۔

کراچی کے انسٹی ٹیوٹ آف بزنس ایڈمنسٹریشن (آئی بی اے) کے شعبہ معاشیات میں پڑھانے والے ڈاکٹر ہیمن داس لوہانو اور سندھ ایگریکلچر یونیورسٹی ٹنڈوجام کے وائس چانسلر پروفیسر فتح محمد مری کا بھی کہنا ہے کہ &quot;سندھ میں ہونے والے موسمیاتی تغیرات اور درجہ حرارت میں ہونے والی تبدیلیوں کا اثر فصلوں کی پیداوار اور کسانوں کی آمدن دونوں پر پڑے گا&quot;۔

انہوں نے مل کر ایک مضمون لکھا ہے جو 2020 میں مہران یونیورسٹی آف انجینئرنگ اینڈ ٹیکنالوجی، جام شورو، کے تحقیقی جریدے میں شائع ہوا ہے۔ اس میں اُن کا کہنا ہے کہ ان تبدیلیوں کے نتیجے میں &quot;سندھ کے زرعی شعبے اور اس پر منحصر دوسرے معاشی شعبوں کے بارے میں ایک غیریقینی صورتِ حال پیدا ہونے کا امکان ہے&quot; جس کی وجہ سے صوبے میں &quot;آمدنی، روزگار اور غربت سب پر اثر پڑے گا&quot;۔

موسمیاتی تبدیلیوں کی شدت اور روس-یوکرین جنگ کی حدت: 'پاکستان کو گندم کی درآمد پر پہلے سے زیادہ خرچہ کرنا پڑے گا'۔

دور تک چھائے تھے بادل اور کہیں سایہ نہ تھا: 'سندھ میں ہونے والے موسمیاتی تغیرات کا اثر فصلوں کی پیداوار اور کسانوں کی آمدن دونوں پر پڑے گا'۔

text

عبدالفتاح نامی 60 سالہ ملاح متعدد دہائیوں سے کوہِ کھیر تھر کے مشرقی دامن میں واقع حمل جھیل میں ماہی گیری کرتے آ رہے ہیں۔ ان کا کہنا ہے کہ کچھ عرصہ پہلے تک وہ روزانہ تین سے چار من مچھلی پکڑ لیا کرتے تھے جس سے انہیں معقول آمدنی ہو جاتی تھی۔ لیکن، ان کے مطابق، اب &quot;جھیل سکڑ رہی ہے اور اس کا پانی آلودہ ہونے سے اس میں مچھلیوں کی افزائش کم ہو گئی ہے&quot; جس کے باعث ان کے لیے &quot;ایک وقت کی روٹی کمانا بھی مشکل ہو گیا ہے&quot;۔

مقامی طور پر حمل ندی کے نام سے جانی جانے والی یہ جھیل سندھ کے مغربی ضلع قمبر شہداد کوٹ میں واقع ہے۔ یہ 25 کلومیٹر لمبی اور 10 کلومیٹر چوڑی ہے اور صوبے میں پائے جانے والے میٹھے پانی کے بڑے ذخائر میں سے ایک ہے۔ اس میں كوهِ کھیر تھر سے آنے والے ندی نالوں کا پانی جمع ہوتا ہے۔ برسات کے موسم میں یہ پانی قدرتی راستوں سے بہتا ہوا منچھر جھیل تک چلا جاتا ہے جو تقریباً ایک سو 25 کلومیڑ جنوب میں ضلع دادو میں واقع ہے۔&nbsp;

عبدالفتاح حمل جھیل کے کنارے واقع تین سو گھروں پر مشتمل مچھیروں کی ایک پس ماندہ بستی میں رہتے ہیں۔ وہ کہتے ہیں کہ جھیل میں مچھلیوں کی قلت کی وجہ سے مقامی مچھیروں کی آمدن اس قدر کم ہو گئی ہے کہ ان کے پاس کسی اور جگہ منتقل ہونے کے سوا کوئی راستہ نہیں رہا۔&nbsp;

حسن ملاح نامی 52 سالہ مقامی ماہی گیر بھی کہتے ہیں کہ جھیل کا پانی تیزی سے آلودہ اور زہریلا ہوتا جا رہا ہے جسے دیکھ کر لگتا ہے کہ مستقبل قریب میں اس میں مچھلیاں بالکل ختم ہو جائیں گی۔ ان کا خاندان اور اس جیسے 20 دیگر گھرانے ایک سال پہلے منچھر جھیل سے نقل مکانی کر کے یہاں آئے تھے کیونکہ آبی آلودگی کے باعث وہاں مچھلیاں ناپید ہوتی جا رہی تھیں۔ انہیں امید تھی کہ حمل جھیل میں انہیں وافر مقدار میں روزگار کے مواقع ملیں گے لیکن یہاں آ کر بھی انہیں مایوسی کا سامنا کرنا پڑ رہا ہے۔

جھیل کے نواحی قصبے فرید آباد کے رہائشی اور سماجی کارکن پریل احمد اس امر کی تصدیق کرتے ہیں کہ مچھلیوں کی قلت کے باعث کئی ماہی گیر گھرانے اپنا روائتی کام کاج چھوڑ کر &quot;کھیتی باڑی کرنے لگے ہیں&quot;۔

تاہم جھیل کی آلودگی صرف مچھلیوں کی بقا کے لیے ہی خطرناک نہیں بلکہ اس سے انسانی زندگی کو بھی کئی خطرات لاحق ہیں۔ فریدآباد کے مقامی سرکاری ہسپتال میں کام کرنے والے اہل کار عبداللطیف بروہی کہتے ہیں کہ اس کا پانی انسانی استعمال کے قابل نہیں رہا۔ لیکن وہ کہتے ہیں کہ اس کے اردگرد موجود آبادیوں میں پانی کی فراہمی کا کوئی متبادل انتظام موجود نہیں ہے اس لیے وہاں کے لوگ یہی آلودہ پانی پینے پر مجبور ہیں جس سے ان میں &quot;جگر اور پیٹ کی بیماریاں عام ہوتی جا رہی ہیں&quot;۔&nbsp;

<h2>جھیل مغموم، پیڑ زرد سے ہیں</h2>

حمل جھیل کبھی بہت خوب صورت ہوا کرتی تھی۔ اس کے کنارے ہریالی اور گھنے درختوں کی بہتات تھی اور اس کا پانی قسم قسم کے آبی جانوروں اور خوبصورت پرندوں کی آماجگاہ تھا۔ اسی لیے دور دراز کے لوگ یہاں سیر کے لیے آیا کرتے تھے۔

لیکن اب اس کا پانی گندہ ہو چکا ہے، اس کے اردگرد لگے ہوئے زیادہ تر درخت کاٹے جا چکے ہیں اور اس میں بسیرا کرنے والے پرندوں کے غیرقانونی شکار سے ان کی تعداد نہ ہونے کے برابر رہ گئی ہے۔&nbsp;

ماہرین کے مطابق جھیل کی بڑھتی ہوئی آلودگی کا سب سے بڑا سبب یہ ہے کہ اس کے قریب واقع قصبوں اور دیہات کا گندا پانی اس میں پھینکا جا رہا ہے۔ مہران یونیورسٹی آف انجینئرنگ اینڈ ٹیکنالوجی کے پروفیسر اور ماحولیاتی محقق اصغر علی مہیسر نے &#39;حمل جھیل پر ہیرالدین، میرو خان اور شہدادکوٹ نالوں کے اثرات&#39; نامی اپنی تحقیق میں انکشاف کیا ہے کہ ان تینوں گندے نالوں کا پانی جھیل میں خارج ہو رہا ہے جو اسے ایک بہت بڑے جوہڑ میں تبدیل کر رہا ہے۔

انٹرنیشنل یونین فار کنزرویشن آف نیچر (آئی یو سی این) نامی بین الاقوامی غیرسرکاری تنظیم کے ساتھ کام کرنے والے ماہر ماحولیات نوید علی سومرو اُن سے متفق ہیں۔ ان کا کہنا ہے کہ شہداد کوٹ اور قمبر کے قصبوں اور ان کے گردونواح میں واقع دیہات کا گندہ پانی دریائے سندھ کے دائیں کنارے پر بنائے گئے رائٹ بینک آؤٹ فال ڈرین (آر بی ڈی او) نامی نالے میں جانا چاہیے لیکن ایسا نہیں ہو رہا۔ بلکہ، اس کے برعکس، ان آبادیوں سے نکلنے والے &quot;گندے پانی کی ایک بڑی مقدار چھوٹے بڑے نالوں کے ذریعے حمل جھیل میں پہنچ رہی ہے&quot;۔

مقامی لوگوں کا یہ بھی کہنا ہے کہ جھیل کے ماحول کی تباہی میں بڑے بڑے زمین داروں (جنہیں مقامی طور پر وڈیرے کہا جاتا ہے) کا بھی ہاتھ ہے۔ وہ الزام لگاتے ہیں کہ یہ وڈیرے نہ صرف جھیل کے کنارے واقع زمینوں پر قبضے کرنے اور اس کے اردگر موجود درخت کاٹنے میں ملوث ہیں بلکہ انہوں نے اس کے پانی پر بھی اجارہ داری قائم کر رکھی ہے۔

مچھیروں کی ایک مقامی بستی میں رہنے والے محمد ملاح کا کہنا ہے کہ &quot;ان وڈیروں نے جھیل کے مختلف حصے آپس میں بانٹ رکھے ہیں&quot;۔ اگرچہ اس تقسیم کی کوئی قانونی حیثیت نہیں لیکن وہ کہتے ہیں کہ &quot;ہر وڈیرے نے بزور طاقت اپنے زیرِ اثر علاقے میں پانی پر قبضہ جما لیا ہے&quot; جس سے &quot;ماہی گیری کے مواقع محدود ہو کر رہ گئے ہیں&quot;۔&nbsp;

ایک مقامی سماجی کارکن نجیب چانڈیو جھیل کے گرد درختوں کے ذخیروں سے بڑی مقدار میں لکڑی کی غیرقانونی کٹائی کو بھی اس کے ماحول کی تباہی کا ذمہ دار قرار دیتے ہیں۔ ان کے مطابق اس کٹائی سے جھیل کے ارد گرد ہریالی کم ہو تی جا رہی ہے اور نتیجتاً یہ &quot;ایک ویرانے میں تبدیل ہو رہی ہے&quot;۔

سندھ کے محکمہ جنگلی حیات کے کنزرویٹر جاوید احمد مہر سمجھتے ہیں کہ ان تمام مسائل کی جڑ یہ ہے کہ حمل جھیل ایک ایسے علاقے میں واقع ہے جو &quot;ماضی کی صوبائی حکومتوں کے لیے سیاسی اعتبار سے زیادہ اہمیت نہیں رکھتا تھا اس لیے اس کے ماحول کا تحفظ ان کی ترجیح نہیں تھا&quot;۔ تاہم ان کا دعویٰ ہے کہ &quot;موجودہ حکومت اس سلسلے میں سنجیدگی سے منصوبہ بندی کر رہی ہے اور متعدد ایسے اقدامات اٹھا رہی ہے جن سے اس کی بحالی میں مدد ملے گی&quot;۔

ان کے مطابق ان اقدامات میں جھیل میں بسیرا کرنے والے &quot;پرندوں کے شکار پر پابندی بھی شامل ہے&quot;۔

تاہم نوید علی کے نزدیک یہ مسائل اس وقت تک حل نہیں ہوں گے جب تک گندے نالوں کا پانی جھیل میں داخل ہوتا رہے گا۔ ان کے خیال میں ان نالوں کا رخ موڑ کر انہیں فوری طور پر رائٹ بینک آؤٹ فال ڈرین میں چھوڑا جانا اشد ضروری ہے کیونکہ صرف یہی ایسا طریقہ ہے جس سے &quot;جھیل میں پائی جانے والی آلودگی آہستہ آہستہ ختم ہو جائے گی&quot;۔

رگ رگ میں میری پھیل گیا ہے یہ کیسا زہر: انسانی آبادیوں کے آلودہ پانی کی آمد سے حمل جھیل کی آبی حیات تباہی کا شکار۔

پچھلے چار سال میں اسد پالاری کے تین بچے فوت ہو چکے ہیں۔ ان کی عمریں سات، پانچ اور چار سال تھیں-

اسد پالاری محنت مزدوری کرتے ہیں۔ ان کی عمر 37 سال کے لگ بھگ ہے اور وہ سندھ کے دوسرے بڑے شہر حیدر آباد کے مضافات میں سپر ہائی وے نامی شاہراہ پر واقع کچی بستی بڈھو پالاری گوٹھ میں رہتے ہیں۔ وہ کہتے ہیں کہ ان کے بچے آلودہ پانی کے استعمال سے لگنے والی بیماریوں کا شکار ہوئے۔&nbsp;

اسی بستی کے رہنے 30 سالہ غفار پالاری کی چار سالہ بیٹی اِس سال جنوری میں اسہال میں مبتلا رہنے کے بعد فوت ہو گئی۔ ڈاکٹروں کا کہنا ہے کہ اس کی بیماری کا سبب بھی آلودہ پانی کا استعمال تھا۔ گوٹھ محمد بخش شورو اور لالو پالاری گوٹھ جیسے کئی قریبی دیہات کے بچوں میں بھی اسہال، ہیضہ، ہیپاٹائٹس اور ٹائیفائیڈ جیسی بیماریاں عام ہیں جن کے بارے میں مقامی ماہرینِ طب کا کہنا ہے کہ یہ سب آلودہ پانی پینے سے لاحق ہوتی ہیں۔

حیدرآباد کے سرکاری شفا خانے، سول ہسپتال، میں کام کرنے والے ڈاکٹر ہیم راج کہتے ہیں کہ ان بیماریوں سے ہونے والی اموات اس قدر عام ہیں کہ مقامی صحافی اب اسے کوئی خبر ہی نہیں سمجھتے۔ ان کا یہ بھی کہنا ہے کہ وہ روزانہ ہیپاٹائٹس کے 15 سے 20 مریضوں کا معائنہ کرتے ہیں &quot;جن میں بڑی تعداد بچوں کی ہوتی ہے&quot;۔&nbsp;

لالو پالاری گوٹھ کے رہائشی اور مزدروں کے حقوق کے لیے کام کرنے والی ایک تنظیم، تعمیراتی مزدور ستھ، کے مقامی رہنما عبدالشکور ان حالات کی ذمہ داری حکومت پر ڈالتے ہیں۔ وہ کہتے ہیں کہ مقامی لوگوں کو جو پانی فراہم کیا جاتا ہے وہ اتنا گندہ ہے کہ &quot;شاید نہانے کے لیے بھی موزوں نہیں ہے&quot;۔

ان کا یہ بھی کہنا ہے کہ ان کی بستی اور اس کے قریبی دیہات میں رہنے والے لوگوں کی اکثریت محنت مزدوری کرتی ہے۔ انہیں نہ تو صاف پانی تک رسائی ہے اور نہ ہی ان کے پاس علاج معالجے کے لیے کوئی مالی وسائل ہیں۔ اس لیے ان کا کہنا ہے کہ ان میں سے &quot;قابلِ علاج بیماریوں کا شکار لوگ بھی جانبر نہیں ہو پاتے&quot;۔

گزشتہ چند مہینوں میں ہونے والی بچوں کی کم از کم چھ اموات کا ذکر کرتے ہوئے وہ کہتے ہیں کہ وہ سب ایسے ہی قابلِ علاج امراض میں مبتلا تھے۔&nbsp;

<h2>زہرآلود نہری نظام</h2>

اقوام متحدہ میں بچوں کی بہبود پر کام کرنے والے ادارے یونیسف کے ایک تازہ ترین جائزے میں بتایا گیا ہے کہ پاکستان میں ہر سال پانچ برس سے کم عمر کے 53 ہزار بچے اسہال میں مبتلا ہو کر انتقال کر جاتے ہیں۔ اس جائزے میں یہ بھی کہا گیا ہے کہ انہیں یہ بیماری آلودہ پانی پینے سے لگتی ہے۔

پاکستان میڈیکل ایسوسی ایشن کی گزشتہ سال تیار کردہ ایک رپورٹ بھی اس بات کی تصدیق کرتی ہے۔ اس کے مطابق پاکستان میں ہونے والی 30 فیصد بیماریوں اور 40 فیصد اموات کا سبب آلودہ پانی ہے۔ اس میں یہ انکشاف بھی کیا گیا ہے کہ ہر پانچواں پاکستانی اسہال میں مبتلا ہے جو کہ بچوں میں موت کا سبب بننے والی سب سے بڑی بیماری ہے۔

حیدرآباد میں ایسی بیماریوں اور اموات کی شرح اور بھی بلند ہونے کا خدشہ ہے کیونکہ یہاں استعمال کیے جانے والے پانی کا معیار ملک کے کئی دیگر حصوں کی نسبت بہت ناقص ہے۔

یہاں کی 17 لاکھ سے زیادہ آبادی کو 30 ہزار کلومیٹر طویل پائپ لائنوں کے ذریعے پانی فراہم کیا جاتا ہے جسے صاف کرنے کے لیے حکومت نے پانچ بڑے اور تقریباً 50 چھوٹے فلٹریشن پلانٹ لگائے ہوئے ہیں۔ لیکن مقامی باشندوں کا کہنا ہے کہ ان میں سے متعدد پلانٹ خراب پڑے ہیں۔ان کا یہ بھی کہنا ہے کہ حیدرآباد-جام شورو روڈ پر واقع سب سے بڑا سرکاری فلٹریشن پلانٹ چل تو رہا ہے لیکن اس سے نکلنے والا پانی پوری طرح صاف نہیں ہوتا۔&nbsp;

سپر ہائی وے کے ساتھ ساتھ واقع دیہات کے مکین یہی نیم صاف پانی پینے پر مجبور ہیں۔&nbsp;

پاکستان میں دریائی پانی کی تقسیم کے ذمہ دار ادارے، انڈس ریور سسٹم اتھارٹی (اِرسا)، کے سابق رکن مظہر علی شاہ &nbsp;کہتے ہیں کہ حیدرآباد میں پانی کے مضرِ صحت ہونے کی بنیادی وجہ دریائے سندھ کی آلودگی ہے۔ ان کا کہنا ہے کہ اس دریا کا پانی گلگت-بلتستان، خیبر پختونخوا اور پنجاب سے ہوتا ہوا جب گڈو بیراج کے مقام پر صوبہ سندھ میں پہنچتا ہے تو وہ اس قدر آلودہ ہو چکا ہوتا ہے کہ، عالمی ادارہ صحت کے قائم کردہ معیار کے مطابق، وہ انسانی استعمال کے قابل نہیں رہتا۔

حیدرآباد کے قریب واقع کوٹری بیراج پر پہنچنے سے پہلے اس دریا کا پانی اور بھی آلودہ ہو جاتا ہے کیونکہ، &nbsp;مظہر علی شاہ کے مطابق، اس وقت تک اس میں صوبہ سندھ کے شہروں، فیکٹریوں اور بجلی گھروں سے نکلنے والا گندا پانی بھی بھاری مقدار میں شامل ہو چکا ہوتا ہے۔&nbsp;

دریائے سندھ کی طرح کوٹری بیراج سے نکلنے والی اور حیدرآباد کے شمال میں بہنے والی نہر پھلیلی کینال بھی شہر کے پانی کی آلودگی میں ایک اہم کردار ادا کرتی ہے۔ سات سو کلومیٹر سے زیادہ طویل اس نہر کا پانی ناصرف زرعی مقاصد کے لیے استعمال کیا جاتا ہے بلکہ اسے شہری آبادی کو پینے کے لیے بھی مہیا کیا جاتا ہے۔ اس پانی کے معیار پر تحقیق کرنے والے ڈاکٹر اسماعیل کنبھر کہتے ہیں کہ حیدرآباد کے سینکڑوں کارخانوں کا آلودہ فضلہ اس نہر میں ڈالا جا رہا ہے جس میں بیٹریاں بنانے والی فیکٹریوں سے نکلنے والا زہریلا مواد بھی شامل ہے۔ ان کے مطابق ہسپتالوں سے نکلنے والا کچرا بھی اسی نہر میں پھینکا جا رہا ہے۔

نتیجتاً، ان کے مطابق، &quot;اچھی طرح صاف کیے بغیر یہ پانی ناصرف پینے کے قابل نہیں ہوتا بلکہ اس کا زرعی مقاصد کے لیے استعمال بھی انسانی صحت کے لیے بہت سے بالواسطہ خطرات پیدا کرتا ہے&quot;۔

حکومت سندھ کے قائم کردہ واٹر کمیشن نے دریائی اور نہری پانی کی اس شدید آلودگی کو تسلیم کیا ہے۔ کمیشن کی ایک حالیہ رپورٹ کے مطابق اس کی بنیادی وجہ یہ ہے کہ چار سو 14 مقامات پر شہروں اور کارخانوں کا استعمال شدہ گندا پانی دریائے سندھ اور اس سے نکلنے والی نہروں میں ڈالا جارہا ہے۔&nbsp;

<h2>صاف پانی کہاں سے آئے گا؟</h2>

گوٹھ محمد بخش شورو کے رہائشی اٹھارہ سالہ محمد حسن روزانہ دو کلومیٹر کا فاصلہ طے کر کے ایک قریبی گاؤں میں جاتے ہیں جہاں وہ ہاتھ سے چلائے جانے والے ایک پمپ سے پینے کا پانی بھر کر اپنے گھر لاتے ہیں۔ حیدر آباد کے دیہی علاقوں کے رہنے والے بہت سے لوگ انہی کی طرح اپنے گردونواح میں واقع ٹیوب ویلوں اور ہاتھ سے چلنے والے پمپوں کا پانی استعمال کرتے ہیں۔

لیکن اسماعیل کنبھر خبردار کرتے ہیں کہ زمین سے نکالا جانے والا یہ پانی بھی انسانی صحت کے لیے مضر ہے کیونکہ &nbsp;نہری اور دریائی پانی کی آلودگی زیرزمین پانی میں بھی شامل ہو چکی ہے۔ آبی وسائل پر تحقیق کرنے والے سرکاری ادارے، پاکستان کونسل آف ریسرچ ان واٹر ریسورسز، کی 2021 میں جاری ہونے والی ایک رپورٹ ان کے اس خدشے کی تصدیق کرتی ہے۔ اس کے مطابق حیدرآباد اور اس کے مضافات میں 80 فیصد زیر زمین پانی آلودہ ہے۔

اس لیے اسماعیل کنبھر کے نزدیک اس مسئلے کا واحد حل معیاری اور طویل مدت تک کارآمد رہنے والے پانی صاف کرنے کے پلانٹوں کی تنصیب کرنا ہے۔ &nbsp;

تاہم سندھ کے صوبائی محکمہ پبلک ہیلتھ انجینئرنگ کے سیکرٹری سعید اعوان کا دعویٰ ہے کہ یہ کام پہلے ہی کیا جا رہا ہے۔ وہ کہتے ہیں کہ حیدرآباد میں فراہم کیے جانے والے پانی کو صاف کرنے اور انسانی استعمال کے قابل بنانے کے لیے نئے واٹر فلٹریشن اور واٹر ٹریٹمنٹ پلانٹ &nbsp;لگائے جا رہے ہیں۔ ان کا یہ بھی کہنا ہے کہ نہروں میں ڈالے جانے والے گندے پانی کو صاف کرنے کے لیے 99 نئے پلانٹ نصب کیے جا چکے ہیں جبکہ اس سال مزید ایک سو 38 پلانٹ بھی نصب کر دیے جائیں گے۔

لیکن سپر ہائی وے کے ساتھ واقع بستیوں کے رہنے والے ابھی تک پانی کے ناقص معیار کے شاکی ہیں۔ وہ کہتے ہیں کہ ان نئی تنصیبات کے باوجود وہ وہی گندہ پانی پینے پر مجبور ہیں جو وہ پچھلے سالوں سے استعمال کرتے چلے آئے ہیں۔

رحمت تونیو

رحمت تونیو نے سندھ مدرستہ الاسلام کراچی یونیورسٹی سے میڈیا اسٹڈیز میں ایم فل کیا ہے اور سندھ کے سیاسی سماجی اور ماحولیاتی معاملات پر رپورٹنگ کرتے ہیں۔