اِس سال 15 مارچ کو محمد اشفاق سیال نے 47 کنال 12 مرلے سرکاری زمین تین افراد کو الاٹ کر دی حالانکہ وہ ایسا کرنے کے مجاز نہیں تھے۔ یہ زمین پنجاب کے مغربی شہر لیہ کے نواح میں ڈسٹرکٹ جیل کے قریب واقع گاؤں سمرا تھل جنڈی کا حصہ ہے اور اس کی کم از کم موجودہ قیمت 47 کروڑ 76 لاکھ روپے ہے۔&nbsp;

اس الاٹمنٹ کے وقت محمد اشفاق سیال ضلع لیہ میں صوبائی محکمہ مال کے ایڈیشنل ڈپٹی کمشنر کے طور پر کام کر رہے تھے لیکن ضلعی انتظامیہ کے اہل کاروں کا کہنا ہے کہ انہیں یہ زمین کسی کو دینے کا اختیار نہیں تھا۔ اس کی وجہ بیان کرتے ہوئے یہ اہل کار کہتے ہیں کہ پنجاب حکومت کے قواعدوضوابط کے مطابق کسی بھی شہر کے اردگرد پانچ کلومیٹر کے دائرے میں واقع سرکاری زمین کسی کو الاٹ کرنے کے لیے محکمہ مال کے ادارے، پنجاب بورڈ آف ریونیو، کے ممبر کی اجازت لینا ضروری ہوتا ہے جو اس معاملے میں مبینہ طور پر نہیں لی گئی۔&nbsp;

اسی لیے 15 مئی 2022 کو ڈیرہ غازی خان ڈویژن (جس میں لیہ، ڈیرہ غازی خان، راجن پور اور مظفرگڑھ کے اضلاع شامل ہیں) کے کمشنر لیاقت علی چٹھہ نے ایک حکمِ امتناعی جاری کر کے اس الاٹمنٹ پر عمل درآمد روک دیا۔ انہوں نے اس معاملے میں اختیارات کے مبینہ ناجائز استعمال کے بارے میں سماعت بھی شروع کر رکھی ہے جو تاحال جاری ہے۔&nbsp;

تاہم لیہ کے رہنے والے لوگوں کا کہنا ہے کہ یہ الاٹمنٹ اس نوعیت کا پہلا واقعہ نہیں بلکہ ہر سال ہی اس ضلعے میں ایک آدھ ایسا واقعہ ضرور سامنے آتا ہے جس میں مقامی انتظامیہ کے اہل کار اپنے اختیارات کا ناجائز استعمال کر کے سرکاری زمین اپنے منظورِنظر لوگوں کو الاٹ کر دیتے ہیں۔ اس ضمن میں وہ مقامی صحرا تھل میں 1950 کی دہائی سے جاری زمینوں کی ملکیت میں تبدیلی کی مثال دیتے ہوئے کہتے ہیں کہ اس کے نتیجے میں ہزاروں ایکڑ زرعی اراضی حکومت کے ہاتھوں سے نکل کر ایسے افراد کے قبضے میں چلی گئی ہے جو قانون کی رو سے اس کی الاٹمنٹ کے اہل نہیں تھے۔&nbsp;

<h2>مال مفت دلِ بے رحم</h2>

سندھ دوآب پیکٹ ہندوستان کی برطانوی حکومت اور میانوالی، بھکر، خوشاب، جھنگ، لیہ اور مظفرگڑھ کے اضلاع میں پائے جانے والے صحرائے تھل کے زمینداروں کے مابین 1937 میں طے پانے والا ایک معاہدہ تھا۔ اس کا بنیادی مقصد زراعت کو فروغ دینے کے لیے صحرائی زمینوں کو نہری پانی کی فراہمی تھا جس کے بدلے میں زمینداروں کو اپنی اراضی کا کچھ حصہ حکومت کو دینا تھا تاکہ اس پر نہریں بنائی جا سکیں۔

لیکن دوسری جنگ عظیم شروع ہونے سے یہ منصوبہ کھٹائی میں پڑ گیا۔

قیام پاکستان کے بعد حکومت نے اس منصوبے پر دوبارہ کام شروع کیا اور اس مقصد کے لیے 1949 میں تھل ڈویلپمنٹ ایکٹ نامی قانون منظور کر کے تھل ڈویلپمنٹ اتھارٹی (ٹی ڈی اے) کا ادارہ بنایا۔ پنجاب ریونیو بورڈ کے ماتحت کام کرنے والے اس ادارے کے ذمے زمینداروں سے اراضی لینے کا کام لگایا گیا جو اس نے 1950 اور 1954 کے درمیان انجام دیا۔&nbsp;

لیہ میں کام کرنے والے وکیل اور تھل ڈویلپمنٹ ایکٹ سے متعلقہ قانونی امور کے ماہر عبدالحمید بھٹہ کہتے ہیں کہ سرکاری قواعدوضوابط کے مطابق ساڑھے 12 ایکڑ سے زیادہ اراضی کے مالکان سے ان کی ایک چوتھائی زمین لی جانا تھی جبکہ 25 ایکڑ سے زیادہ اراضی کے مالکان کو اپنی نصف زمین تھل ڈویلپمنٹ اتھارٹی کے حوالے کرنا تھی۔ تاہم اس عمل کے دوران بہت سے زمینداروں نے شکایت کی کہ حکومت نے اپنے ہی قواعدوضوابط کی خلاف ورزی کرتے ہوئے ان سے مقررہ حد سے زیادہ زمین لے لی ہے۔

ایک مقامی زمین دار شاہ عالم بودلہ اور ان کے متعدد دیگر ساتھیوں نے اس ضمن میں لاہور ہائی کورٹ سے بھی رجوع کیا جس نے 1973 میں ان کی درخواست پر فیصلہ دیا کہ ان سے مقررہ حد سے زیادہ لی گئی زمین انہیں واپس کی جائے۔ مقامی انتظامیہ کا کہنا ہے کہ اس فیصلے کے نتیجے میں حکومت نے اپنی ملکیت میں موجود ہزاروں ایکڑ اراضی مقامی زمین داروں کو واپس الاٹ کرنا شروع کی۔&nbsp;

تاہم پنجاب اسمبلی کے رکن اور لیہ کے زمیندار اعجاز احمد اچلانہ کہتے ہیں کہ واپسی کے اس عمل کے آغاز سے ہی ایسی شکایات سامنے آنا شروع ہو گئیں کہ محکمہ مال اور تھل ڈویلپمنٹ اتھارٹی کے اہل کار رشوت لے کر کچھ زمین داروں کو ان کے اصل حصے سے کہیں زیادہ زمین الاٹ کر رہے ہیں۔ ان کا دعویٰ ہے کہ اس مقصد کے لیے مقامی &quot;ڈپٹی کمشنر کے دفتر میں موجود ریکارڈ میں ردوبدل کیا گیا اور اصل فائلوں کے ساتھ جعلی دستاویزات لگا کر کئی زمین داروں کو اضافی اراضی واپس کرنے کا راستہ ہموار کیا گیا&quot;۔ مثال کے طور پر &quot;اگر کسی شخص کو 70 کنال اراضی واپس لوٹائی جانا تھی تو اس نے سرکاری عملے سے ملی بھگت کر کے کاغذات پر 70 کنال کے بجائے ایک سو 70 کنال لکھوا لیا&quot;۔ ان کا تو یہاں تک کہنا ہے کہ &quot;کچھ لوگوں نے تو جعل سازی سے 70 کے ساتھ ایک صفر کا اضافہ کر کے سات سو کنال اراضی الاٹ کرا لی&quot;۔

عبدالرزاق نامی ایک مقامی شہری نے پانچ سال قبل اس وقت کے لیہ کے ڈسٹرکٹ کوآرڈینیشن افسر رانا گلزار احمد کے سامنے اس سلسلے میں ایک باقاعدہ شکایت بھی درج کرائی۔ رانا گلزار احمد نے اس شکایت پر کارروائی کرتے ہوئے ایک آٹھ رکنی تحقیقاتی کمیٹی قائم کی جس نے اپنی تحقیقات مکمل کرنے کے بعد انکشاف کیا کہ ڈپٹی کمشنر کے دفتر کے محافظ خانے میں رکھی ہوئی تین سو 77 فائلوں میں جعل سازی کی گئی تھی۔ کمیٹی کا یہ بھی کہنا تھا کہ زمین داروں سے نہروں کی تعمیر کے لیے لی گئی اضافی زمین اس جعل سازی کے ذریعے غیر متعلقہ لوگوں کو الاٹ کر دی گئی تھی۔&nbsp;

ان تحقیقات میں یہ الزام بھی لگایا گیا کہ لیہ کے سابق ڈسٹرکٹ آفیسر ریونیو غلام اکبر کچھی اور چوبارہ میں تعینات رہنے والے ڈپٹی ڈسٹرکٹ آفیسر ریونیو محمد شفیق بخاری اس جعل سازی میں ملوث تھے۔ تاہم قومی احتساب بیورو (نیب) نے ان دونوں کے خلاف تحقیقات کرنے کے بعد انہیں اس الزام سے بری الذمہ قرار دے دیا ہے۔

حالیہ سالوں میں چند دیگر شہریوں نے بھی سرکاری زمین کی الاٹمنٹ میں کی گئی جعل سازی کے بارے میں ڈپٹی کمشنر کو متعدد درخواستیں دی ہیں جن پر کارروائی کرتے ہوئے فروری 2021 سے لے کر دسمبر 2021 تک ضلعی انتظامیہ نے دو مختلف فیصلے دیے ہیں۔ مقامی سرکاری حکام کے مطابق ان فیصلوں کے تحت بالترتیب ڈیڑھ ارب روپے مالیت کی پانچ ہزار پانچ سو کنال اور 10 ارب روپے سے زیادہ مالیت کی آٹھ ہزار دو سو کنال اراضی سرکاری تحویل میں لینے کا حکم جاری کیا گیا ہے۔&nbsp;

اسی طرح ڈپٹی کمشنر لیہ کے دفتر میں متعین ایک سینئر اہل کار مہر عزیز کا کہنا ہے کہ اس وقت ان تمام تین سو 77 فائلوں کا بھی جائزہ لیا جا رہا ہے جن میں ردوبدل کیا گیا تھا تاکہ جعل سازی سے الاٹ کی گئی زمین کو &quot;مرحلہ وار واپس لیا جا سکے&quot;۔

تاہم عدالحمید بھٹہ کا کہنا ہے کہ چھ اضلاع میں پھیلے ہوئے صحرائے تھل میں مجموعی طور پر &quot;کئی لاکھ ایکڑ سرکاری اراضی پر لوگوں نے غیرقانونی قبضہ کر رکھا ہے&quot;۔ اس لیے، ان کے مطابق، پچھلے کچھ سالوں میں ایسے قابضین سے واپس لی جانے والی اراضی جعل سازی کے ذریعے الاٹ کی گئی کل اراضی کا ایک &quot;بہت چھوٹا حصہ ہے&quot;۔

لاہور سنٹرل بزنس ڈسٹرکٹ: متنازعہ زمین کو عدالتی فیصلہ آنے سے پہلے کیسے نیلام کیا جا رہا ہے۔

لیہ میں سرکاری اراضی کی بندر بانٹ: 'انتظامی اہل کار اختیارات کا ناجائز استعمال کر کے منظور نظر افراد کو زمینیں الاٹ کر رہے ہیں'۔

text

پنجاب کے جنوب مغربی شہر لیہ کے مرکز میں واقع ایم-سی ہائی سکول مکانوں اور دکانوں میں گھرا ہوا ہے۔ ان میں سے بیشتر عمارات اسی سکول کے لیے وقف کی گئی زمین پر ناجائز قبضہ کر کے بنائی گئی ہیں۔&nbsp;

یہ تعلیمی ادارہ 1905 میں لیہ کے ایک ہندو تاجر اندر بھان ڈھینگڑا نے ایک پرائمری سکول کے طور پر قائم کیا تھا۔ انہوں نے اپنی ایک سو 46 کنال (سوا 18 ایکڑ) زرعی اور شہری زمین بھی اس کے لیے وقف کی تھی تاکہ اسے تعمیر کرنے اور اس کا انتظام چلانے میں کوئی مالی رکاوٹ پیش نہ آئے۔

لیکن مارچ 2021 میں لیہ کے کچھ شہریوں کی درخواست پر پنجاب کے محکمہ مال کی طرف سے کی گئی تحقیقات میں انکشاف کیا گیا کہ اس وقف کردہ زمین میں سے صرف وہی 28 کنالیں باقی رہ گئی ہیں جن پر سکول کی عمارت کھڑی ہے۔ باقی اراضی پر مقامی لوگوں نے یا تو زبردستی قبضہ کر رکھا ہے یا انہوں نے سرکاری محکموں سے ملی بھگت کر کے ایسے کاغذات بنوا لیے ہیں جن میں اسے ان کی ملکیت دکھایا گیا ہے۔&nbsp;

ان تحقیقات کے نتیجے میں سکول کے ہیڈماسٹر کی درخواست پر لیہ پولیس نے نو افراد کے خلاف زمین پر ناجائز قبضہ کرنے کا پرچہ بھی کاٹا جس کی بنیاد پر بنایا جانے والا مقدمہ ایک مقامی سول عدالت میں زیرِ سماعت ہے۔&nbsp;

اسی طرح کے ایک اور مقدمے میں حکومت کو لیہ ہی میں ہندو تاجروں کی وقف کردہ 43 دکانیں ناجائز قابضین سے چھڑانے میں لگ بھگ 25 سال لگ گئے۔ اس مقدمے کا فیصلہ کرتے ہوئے سپریم کورٹ آف پاکستان نے 2008 میں ایک وفاقی ادارے، متروکہ وقف املاک بورڈ، کو اختیار دیا کہ وہ نہ صرف ان دکانوں پر قابض لوگوں کو نکال باہر کرے بلکہ ان سے پچھلے کئی سالوں کا کرایہ بھی وصول کرے۔

تاہم اس واضح عدالتی فیصلے کے باوجود بورڈ کو اس پر عمل درآمد کرانے میں مزید آٹھ سال لگ گئے کیونکہ، لیہ کے کچھ شہریوں کے مطابق، مقامی حکومتی اہلکار دکانوں پر قابض لوگوں سے رشوت لے کر ان کے خلاف کارروائی کو ٹالتے رہے۔ تاہم دوسری طرف شہر میں ایسے لوگ بھی موجود تھے جو چاہتے تھے کہ حکومت دکانوں پر کیا گیا قبضہ ختم کرانے کے بعد نیلامی کے عمل کے ذریعے ان کا کرایہ متعین کرے تاکہ انہیں بھی یہ دکانیں کرائے پر لینے کا موقع مل سکے۔ اس لیے وہ مسلسل ضلعی انتظامیہ کو کہتے رہے کہ سپریم کورٹ کے فیصلے کو جلدازجلد لاگو کیا جائے۔ ان کے اصرار کے پیش نظر چند ہفتے قبل بالآخر مقامی سرکاری اہلکاروں نے زیرِ قبضہ دکانوں کو سر بمہر کر دیا اور ان کے قابضین سے واجب الادا کرائے کی مد میں تقریباً ایک کروڑ 43 لاکھ روپے بھی وصول کر لیے۔&nbsp;

<h2>دو ملک دو کہانیاں</h2>

ایم-سی ہائی سکول کے بانی اندر بھان ڈھینگڑا کی کوئی اولاد نہیں تھی اس لیے انہوں نے لیہ میں تعلیم کے فروغ کے لیے بھراتری ٹرسٹ کے نام سے ایک فلاحی ادارہ بنا کر اپنی تمام زرعی زمینیں اور شہر میں واقع بہت سی دکانیں اور مکان اس کے لیے وقف کر دیے۔ ان کی دیکھا دیکھی اسی علاقے کے کچھ دیگر بے اولاد ہندوؤں نے بھی اپنی جائیدادیں اسی ٹرسٹ کے نام لگا دیں۔&nbsp;

نتیجتاً 1947 میں بھراتری ٹرسٹ مجموعی طور پر 164 دکانوں، کئی مکانوں اور ساڑھے تین ہزار ایکڑ کے لگ بھگ دیہی اور ایک سو ایکڑ (آٹھ سو کنال) شہری اراضی کا مالک تھا۔ قیامِ پاکستان کے دوران جب لیہ کی ساری ہندو آبادی انڈیا منتقل ہو گئی تو اس کی ملکیتی زمینوں اور عمارتوں کا انتظام متروکہ وقف املاک بورڈ کے سپرد کر دیا گیا۔ اس اقدام کا بظاہر مقصد یہ تھا کہ ان جائیدادوں پر انڈیا سے آنے والے مہاجرین کو آباد کیا جائے۔ لیکن چونکہ 1950 کی دہائی میں پاکستان اور انڈیا کی حکومتوں کے درمیان ہونے والے ایک معاہدے کی رو سے بورڈ کے زیرِ انتظام زمین اور عمارتوں کے حقوقِ ملکیت کسی فرد یا کسی دوسرے ادارے کو منتقل نہیں کیے جاسکتے اس لیے اسے صرف یہ اختیار دیا گیا کہ وہ ان جائیدادوں کو کرائے پر دے سکے۔&nbsp;

اس بندوبست کے تحت بورڈ نے لیہ شہر میں واقع بھراتری ٹرسٹ کی ملکیتی درجنوں دکانیں کرائے پر دے دیں تاکہ ان سے حاصل ہونے والی آمدنی سے ایم-سی ہائی سکول کا انتظام چلایا جا سکے۔ تاہم 1973 میں جب ذوالفقار علی بھٹو کی حکومت نے نجی تعلیمی ادارے سرکاری تحویل میں لیے تو یہ سکول بھی صوبائی محکمہ تعلیم کو منتقل کر دیا گیا اگرچہ اس کی زمین متروکہ وقف املاک بورڈ کے پاس ہی رہی۔

دوسری طرف اس سے پہلے ہی محکمہ مال کے اہلکاروں کی ملی بھگت سے مختلف لوگوں نے بھراتری ٹرسٹ کی زمینوں اور دکانوں پر قبضہ کرنا شروع کر دیا تھا جس کے نتیجے میں، متروکہ وقف اِملاک بورڈ کے لیہ کے ایڈمنسٹریٹر نور اسلم کے مطابق، شہر میں واقع اس کی آٹھ سو کنال تجارتی زمین میں سے ان کے ادارے کے پاس اب صرف ایک سو 64 کنالیں (ساڑھے 20 ایکڑ) باقی رہ گئی ہیں۔ ان کا کہنا ہے کہ اسی طرح 21 مختلف دیہات میں واقع اس کی 27 ہزار نو سو 90 کنال 10 مرلے (تقریباً ساڑھے تین ہزار ایکڑ) زرعی زمین میں سے چار ہزار پانچ سو 44 کنالوں (پانچ سو 68 ایکڑ) پر بھی لوگوں نے ناجائز قبضہ کر رکھا ہے۔

لیہ کے ڈپٹی کمشنر کی تیار کردہ ایک رپورٹ کے مطابق شہر کے وسط میں واقع جناح پارک بھی اسی ٹرسٹ کی زمین پر بنایا گیا ہے جبکہ ٹِبہ مرجانہ نامی بستی میں متعدد مقامی افراد نے جعل سازی کے ذریعے اس کی رہائشی زمین اپنے نام لگوا کر اس پر پکے مکان بنا لیے ہیں۔&nbsp;

یہ رپورٹ 1994 میں لیہ کے ایک شہری خالد منیر پراچہ کی شکایت پر تیار کی گئی تھی جس میں انہوں نے اس وقت کی وزیرِاعظم بے نظیر بھٹو کو ٹرسٹ کی جائیدادوں پر قبضے کے بارے میں آگاہ کیا تھا۔ اس رپورٹ میں یہ بھی کہا گیا کہ متروکہ وقف املاک بورڈ اُس وقت ٹرسٹ کی زرعی زمین کا کرایہ محض ایک ہزار روپے فی ایکڑ سالانہ کے حساب سے وصول کر رہا تھا جس سے اس کو ہر سال صرف چار لاکھ 29 ہزار چار سو پانچ روپے آمدن ہو رہی تھی حالانکہ اُس زمانے میں لیہ میں زرعی زمینوں کا سالانہ کرایہ 35 ہزار روپے فی ایکڑ تھا۔&nbsp;

شہری حقوق کے لیے کام کرنے والی ایک مقامی تنظیم، سول سوسائٹی نیٹ ورک، کے سربراہ میاں سلمان اس صورتِ حال پر افسوس کا اظہار کرتے ہوئے حکومت سے مطالبہ کرتے ہیں کہ بھراتری ٹرسٹ کی جائیدادوں کو کوڑیوں کے بھاؤ کرائے پر دینے اور غیرقانونی طور پر ان کی ملکیت منتقل کرنے کے ذمہ دار لوگوں اور حکومتی اہلکاروں کو قانون کے کٹہرے میں لایا جائے۔

وہ انڈین ریاست ہریانہ کے علاقے پانی پت میں لیہ سے نقل مکانی کرنے والے ہندوؤں کی طرف سے قائم کیے گئے اندر بھان لیہ بھراتری ایجوکیشنل ٹرسٹ کی مثال دیتے ہوئے کہتے ہیں کہ اس کے زیرِ انتظام ایک ہائر سیکنڈری سکول، ایک ہائی سکول اور ایک پوسٹ گریجوایٹ کالج چلایا جا رہا ہے۔ ان کے مطابق &quot;اگر قیام پاکستان کے بعد حکومت بھراتری ٹرسٹ کی جائیدادوں کو درست انداز میں سنبھالتی تو یہاں بھی اندر بھان ڈھینگڑا کے شروع کردہ تعلیمی کام کو بہت آگے بڑھایا جا سکتا تھا&quot;۔

'تیسری نسل بوڑھی ہو گئی، حق نہیں ملا': گلگت ایئرپورٹ کے لیے جگہ دینے والے خاندان 74 سال سے متبادل زمینوں کے منتظر۔

لیہ میں ہندوؤں کی متروکہ املاک: حکومت تعلیم کے لیے وقف کی گئی زمین پرغیر قانونی قبضہ روکنے میں ناکام۔

Located in the Layyah district of southern Punjab, Inayat Shah Forest Range is a vast plain with no trees visible to the naked eye. Many years ago there used to be a dense forest in this fiel

Illegal logging of trees in Layyah.

جنوبی پنجاب کے ضلع لیہ میں واقع عنایت شاہ فاریسٹ رینج نامی جنگل کے ساتھ ایک وسیع و عریض میدان ہے جہاں تاحدِ نگاہ کوئی درخت دکھائی نہیں دیتا۔ کئی سال پہلے اس میدان میں بھی ایک گھنا جنگل ہوا کرتا تھا جو وقت کے ساتھ ختم ہو گیا ہے۔ مقامی لوگوں کا کہنا ہے کہ یہ تبدیلی کسی قدرتی عمل کے نتیجے میں نہیں بلکہ سالہا سال سے ہونے والی درختوں کی غیر قانونی کٹائی کے باعث ظہور پذیر ہوئی ہے۔

اُس میدان کے قریب واقع گاؤں چک 288 ٹی ڈی اے کے رہائشی 80 سالہ رفیق احمد کا کہنا ہے کہ &quot;1970 کی دہائی میں جب وہ جوان تھے تو اپنے مال مویشی چرانے کے لیے اُسی جنگل میں جایا کرتے تھے جو اُس وقت اس قدر وسیع اور گھنا تھا کہ لوگ دن کے وقت بھی وہاں جاتے ہوئے گھبراتے تھے&quot;۔ ان کے مطابق وہ جنگل بہت سے جانوروں اور پرندوں کا مسکن تھا، اس کی بدولت مقامی آبادی کو تیز آندھیوں سے تحفظ ملتا تھا اور علاقے کا موسم بھی خوشگوار رہتا تھا۔ لیکن وہ کہتے ہیں کہ &quot;اُس کے ختم ہو جانے سے اب پورے میدان میں دھول اڑتی ہے اور گرمیوں کی تپتی دھوپ میں انسانوں اور حیوانوں کو دور دور تک سایہ نہیں ملتا&quot;۔&nbsp; &nbsp;

لیہ کے پرانے باسیوں کا کہنا ہے کہ اس جنگل کی کٹائی اس وقت شروع ہوئی جب 1980 کی دہائی میں افغانستان میں ہونے والی جنگ کے نتیجے میں بہت سے افغان پناہ گزین لیہ میں آ کر آباد ہوئے۔ ان کے مطابق ان پناہ گزینوں نے یہاں اینٹوں کے بھٹے اور لکڑی سے کوئلہ بنانے کی بھٹیاں قائم کیں جن کے لیے بڑی مقدار میں لکڑی درکار تھی جس کے حصول کے لیے مقامی جنگلوں سے بڑی تعداد میں درخت کاٹے جانے لگے۔

لیہ کے ڈویژنل فاریسٹ آفیسر اسد شیرازی جنگلات کے سکڑنے کے ایک اور سبب کی نشان دہی کرتے ہوئے کہتے ہیں کہ اس کی ذمہ داری ضلعے میں نئی سرکاری عمارتوں کی تعمیر پر ہے۔ ان کا کہنا ہے کہ حال ہی میں حکومت پنجاب نے چوک اعظم نامی قصبے میں سٹیڈیم ، تھانے، ہسپتال اور دیگر سرکاری عمارتوں کی تعمیر کے لیے جنگل کی زمین حاصل کی تھی۔لیکن، ان کے مطابق، اس کے بدلے میں &quot;جو زمین دی گئی ہے وہ ریتلی ہونے کے باعث جنگل لگانے کے لیے موزوں نہیں ہے&quot;۔

<h2>درختوں کا صفایہ</h2>

لیہ دریائے سندھ کے مشرقی کنارے پر پھیلے صحرائے تھل کا حصہ ہے جسے زیرِکاشت لانے کے لیے 1950 کی دہائی میں تھل ڈویلپمنٹ اتھارٹی نامی سرکاری ادارے نے ایک نہر بنائی جو شمال میں میانوالی کے ضلع سے شروع ہو کر جنوب میں مظفر گڑھ تک جاتی ہے۔ اس نہر کی تعمیر کے بعد محکمہ جنگلات نے تھل ڈویلپمنٹ اتھارٹی&nbsp; سے لیہ میں تقریباً 27 ہزار ایکڑ زمین خرید کر عنایت شاہ، ماچھو اور راجن شاہ کے علاقوں میں تین جنگل لگائے۔ نہر کے ساتھ بسائے گئے کئی دیہات میں بھی آٹھ ہزار ایکڑ رقبے پر درخت لگائے گئے۔ مجموعی طور پر یہ جنگلات چھانگا مانگا کے بعد پاکستان میں انسانوں کےہاتھوں لگائے گئے درختوں کا سب سے بڑا ذخیرہ ہیں۔

عنایت شاہ فاریسٹ رینج کے قریبی گاؤں چک 281 ٹی ڈی اے سے تعلق رکھنے والے بزرگ کسان طفیل محمد کہتے ہیں کہ 1982 میں لیہ کو ضلع کا درجہ دیے جانے کے بعد یہاں محکمہ جنگلات کے دفاتر قائم ہوئے جن میں بڑی تعداد میں سرکاری اہلکاروں کو تعینات کیا گیا۔ اسی طرح ماچھو اور عنایت شاہ کے جنگلات سے درختوں کی چوری روکنے کے لیے ان کے قریبی قصبے چوک اعظم میں پولیس کی چوکی بھی بنائی گئی۔ لیکن ان کے بقول ان سرکاری اقدامات کے باوجود جنگلات محفوظ ہونے کے بجائے مزید خطرات کا شکار ہوگئے اور &quot;ان کی حفاظت کے ذمہ دار سرکاری حکام میں رشوت ستانی اور درختوں کی چوری دونوں بڑھتے چلے گئے&quot;۔

رفیق احمد بھی محکمہ جنگلات کے حکام کو اس صورت حال کا ذمہ دار قرار دیتے ہیں۔ ان کا کہنا ہے کہ &quot;اس محکمے کے اہلکاروں نے لکڑی چوروں کو رشوت کے عوض جنگلات کے درخت کاٹنے کی کھلی چھوٹ دے رکھی ہے&quot;۔

ماحولیاتی آلودگی کی روک تھام کے لیے سرگرم مقامی سماجی کارکن ظہور احمد تھند اس بات کی تصدیق کرتے ہوئے کہتے ہیں کہ &quot;ہمارے ہاں درختوں کی حفاظت اور ان میں اضافے کی ذمہ داری پر مامور اہلکار ہی ان میں کمی کا باعث بن رہے ہیں&quot;۔ ان جیسے سماجی کارکنوں نے محکمہ جنگلات اور ضلعی انتظامیہ کو متعدد بار تحریری درخواستیں دے کر ان کی توجہ اس مسئلے کی جانب مبذول کرانے کی کوشش کی ہے۔ لیکن ان کا کہنا ہے کہ اس کے باوجود درختوں کی غیر قانونی کٹائی کو روکنے کے لیے کوئی ٹھوس قدم نہیں اٹھایا گیا۔

محکمہ جنگلات کے اہل کار خود بھی اس بات سے آگاہ ہیں کہ مقامی جنگلات سے بڑے پیمانے پر لکڑی چوری کی جا رہی ہے۔ اس محکمے کے بلاک آفیسر مہر مختار تسلیم کرتے ہیں کہ لیہ میں میں 13 منظم گروہ جنگلات سے لکڑی چوری کرنے میں سرگرم ہیں جن کے ارکان نے صرف 22-2021 میں چار کروڑ 29 لاکھ روپے سے زیادہ مالیت کی لکڑی چرائی ہے۔

تاہم ان کا دعویٰ ہے کہ ضلعی انتظامیہ اس مسئلے سے نمٹنے کے لیے بہت سے اقدامات اٹھا رہی ہے جن میں لکڑی چوری میں ملوث گروہوں کے خلاف ٹھوس قانونی کارروائی کرنا بھی شامل ہے۔ ان کے مطابق ان میں سے ایک گروہ کے سرغنہ تصدق حسین سمیت تین لوگوں کو دو دو سال قید کی سزا بھی ہو چکی ہے۔ اس کے علاوہ &quot;محکمہ جنگلات نے ٹمبر مارکیٹ ملتان میں نو ایسے تاجروں کے خلاف مقدمے درج کرائے ہیں جو جنگل سے چوری کی جانے والی لکڑی خریدنے میں ملوث ہیں&quot;۔

مہر مختار کا یہ بھی کہنا ہے کہ پچھلے کچھ عرصہ میں مقامی جنگلات سے غیر قانونی طور پر درخت کاٹنے والے لوگوں کے خلاف مجموعی طور پر 25 مقدمات درج کرائے&nbsp; گئے ہیں، لکڑی چوری کے ایک سو 13 واقعات میں ملزموں کو رنگے ہاتھوں پکڑ کر ان سے تقریباً ساڑھے 13 لاکھ روپے بطور جرمانہ وصول کیے گئے ہیں اور لکڑی چوروں کے دس سے زیادہ ٹرک اور گاڑیاں بھی قبضے میں لی گئی ہیں۔

تاہم ان اقدامات کے نتیجے میں مقامی جنگلات سے درختوں کی کٹائی ختم نہیں ہوئی بلکہ مقامی لوگوں کو شکایت ہے کہ اب تو جنگلات کی مٹی بھی غیر قانونی طور پر فروخت کی جا رہی ہے۔ یہ چوری حال ہی میں اس وقت منظرِ عام پر آئی جب لیہ کے ڈپٹی کمشنر شہباز حسین کے چوک اعظم کے دورے کے دوران مقامی پولیس اہل کاروں نے ایک ایسے ٹریکٹر ٹرالی کو پکڑا جس میں جنگل کی زمین سے مٹی کھود کر قصبے میں لائی جا رہی تھی۔

اس کے ڈرائیور نے پولیس کو بتایا کہ محکمہ جنگلات کے اہل کار ایک ٹرالی مٹی بھرنے کے عوض ایک ہزار روپے رشوت لیتے ہیں۔ بعد میں یہ مٹی چوک اعظم اور لیہ جیسی بستیوں میں تعمیر ہونے والی نئی عمارتوں میں بھرتی ڈالنے کے لیے استعمال ہوتی ہے جہاں اس کی قیمت 18 سو روپے سے دو ہزار روپے تک ہوتی ہے۔

<h2>کلین اور گرین پاکستان؟</h2>

لیہ کے مقامی ماہرِ ماحولیات مظاہر خان کے مطابق جنگلات کی لکڑی اوران کی مٹی کی چوری جتنی ہی تشویش ناک بات یہ ہے کہ جس جگہ سے درخت کاٹے جا چکے ہیں وہاں نئی شجر کاری نہیں کی جا رہی۔

ان کا کہنا ہے کہ &quot;لیہ کے محکمہ جنگلات نے وفاقی حکومت کی طرف سے چلائی جانے والی کلین اور گرین پاکستان مہم اور وزیرِ اعظم عمران خان کے بلین ٹری سونامی پروگرام کے تحت محض برائے نام نئے درخت لگائے ہیں&quot;۔ اس ضمن میں وہ ماچھو فاریسٹ رینج میں لگائے جانے والے درختوں کی مثال دیتے ہیں جو نگہداشت نہ ہونے کے باعث سوکھ چکے ہیں۔

تاہم دوسری طرف ڈویژنل فاریسٹ آفیسر اسد شیرازی کا دعویٰ ہے کہ شجرکاری کی مہم کامیابی سے مکمل کی گئی ہے۔ ان کا کہنا ہے کہ دس بلین ٹری سونامی پروگرام کے تحت دو سال میں ماچھو فاریسٹ رینج میں پانچ سو 15 ایکڑ، عنایت شاہ فاریسٹ رینج میں سات سو دو ایکڑ ، راجن شاہ فاریسٹ رینج میں چار سو 98 ایکڑ اور مختلف دیہات کے ارد گرد تین سو 16 ایکڑ پر شجر کاری کی گئی ہے۔

فرید اللہ

لیہ میں سرکاری اراضی کی بندر بانٹ: 'انتظامی اہل کار اختیارات کا ناجائز استعمال کر کے منظور نظر افراد کو زمینیں الاٹ کر رہے ہیں'۔

لیہ میں ہندوؤں کی متروکہ املاک: حکومت تعلیم کے لیے وقف کی گئی زمین پرغیر قانونی قبضہ روکنے میں ناکام۔

لیہ میں جنگلات کی غیر قانونی کٹائی: 'جہاں کبھی گھنے درخت تھے وہاں اب دھول اُڑتی ہے'۔

Lok Sujag