آج سے پانچ سال پہلے چاغی میں بسو کاریز کا پرائمری سکول بند ہوا تو اس میں 25 بچے زیر تعلیم تھے جو پڑھائی چھوڑ چکے ہیں کیونکہ ان کے والدین انہیں شہر کے سکول میں تعلیم دلانے کی استطاعت نہیں رکھتے۔

بسو کاریز بلوچستان کے ضلع چاغی کے صدر مقام دالبندین سے 40 کلومیٹر دور ہے۔ یہاں کے ایک سماجی کارکن اور سیاسی رہنما امین اللہ نوتیزئی بتاتے ہیں کہ یہ سکول اس لیے بند ہوا کہ اس میں پڑھانے کے لیے استاد ہی نہیں تھے۔ اہل علاقہ نے سکول میں اساتذہ کی تعیناتی کے لیے ہر فورم پر آواز اٹھائی اور حکام کی منت سماجت کرتے رہے جس کے بعد سکول میں صرف ایک استاد کی تعیناتی عمل میں آئی لیکن وہ بھی بغیر تنخواہ طویل رخصت پر چلا گیا۔

بسو کاریز کے اس سکول کی طرح چاغی بھر میں بہت سے تعلیمی ادارے غیر فعال ہیں۔

دالبندین کے علاقے ظہور کالونی کے کونسلر اجمل نوتیزئی بتاتے ہیں کہ ان کے حلقے میں لڑکوں کا پرائمری سکول پچھلے چار سال سے بند ہے کیونکہ وہاں پڑھانے والے واحد استاد کی ریٹائرمنٹ کے بعد تدریسی عملہ دستیاب نہیں تھا۔ وقت کے ساتھ سکول ٹوٹ پھوٹ کا شکار ہو گیا اور اس کے دروازے کھڑکیاں چوری کر لیے گئے۔ اب یہ جگہ منشیات کے عادی لوگوں کا ٹھکانہ بن چکی ہے۔

بلوچستان کے سکول ایجوکیشن ڈیپارٹمنٹ کے مطابق ضلع کے 315 میں سے 87 سکول غیر فعال ہیں جن میں لڑکوں کے 68 پرائمری سکول جبکہ اور لڑکیوں کا ایک مڈل اور 18 پرائمری سکول شامل ہیں۔

ڈسٹرکٹ ایجوکیشن آفیسر امداد حسین ملغانی ضلع کے 28 فیصد سکول بند ہونے کی تصدیق کرتے ہیں۔ اس کی وجہ وہ یہ بتاتے ہیں کہ ان سکولوں میں پڑھانے والے اساتذہ ریٹائر ہو گئے ہیں۔ ان کا کہنا ہے کہ ضلع میں 431 اساتذہ کی اسامیاں خالی ہیں جبکہ لڑکوں کے 101 اور لڑکیوں کے 42 سکول ایسے ہیں جہاں صرف ایک استاد تعینات ہے۔

&nbsp;ان کا یہ بھی کہنا ہے کہ چاغی میں سرکاری اساتذہ کی تعداد 750 ہے جو 227 فعال سکولوں میں 20 ہزار 493 بچوں اور بچیوں کو پڑھاتے ہیں جبکہ ضلع بھر میں سائنس کے مضامین کا ایک بھی سبجیکٹ سپیشلسٹ نہیں ہے۔

ملغانی کے مطابق ان کے محکمے نے کئی بار متعلقہ حکام کو اساتذہ کی تعیناتی کے لیے لکھا ہے لیکن کوئی شنوائی نہیں ہوئی۔ ہر سال تقریباً دس اساتذہ ریٹائر ہو جاتے ہیں اور بیشتر دیہی سکولوں میں ایک ہی استاد تعینات ہوتا ہے اس لیے خدشہ ہے کہ نئی بھرتیاں نہ ہوئیں تو مزید سکول بند ہو جائیں گے۔

چاغی میں سرکاری سکولوں کی نگرانی کرنے والے ادارے (آر ٹی ایس ایم) کے ضلعی مانیٹرنگ کوآرڈینیٹر نعمت اللہ ہفتے میں دو مرتبہ سکولوں کا دورہ کرتے ہیں۔ ان کا کہنا ہے کہ 2016ء میں 50 سکول بند تھے جس کے بعد اساتذہ کی ریٹائرمنٹ&nbsp; کے نتیجے میں یہ خلا بڑھتا گیا اور اب ضلع میں 80 سے زیادہ سکول بند ہیں۔ اس کے علاوہ جن سکولوں میں ایک ہی استاد تعینات ہے وہ بھی وقفوں وقفوں سے بند پائے جاتے ہیں۔

نعمت اللہ کے مطابق نگرانی کے کام میں انہیں کافی دباؤ کا سامنا کرنا پڑتا ہے۔ انہیں کہا جاتا ہے کہ وہ سکولوں میں اساتذہ کی غیر موجودگی کے بارے میں رپورٹ نہ دیں۔ آر ٹی ایس ایم کے ایک سابق افسر نے نام ظاہر نہ کرنے کی شرط پر بتایا کہ انہوں نے دباؤ اور مسلسل پریشانی کی وجہ سے نوکری چھوڑ دی تھی۔

گورنمنٹ ٹیچرز ایسوسی ایشن چاغی کے ضلعی صدر نذیر ایجباڑی اسی سے متعلق ایک اور مسئلے کی جانب توجہ دلاتے ہوئے کہتے ہیں کہ اکثر اساتذہ دور دراز علاقوں میں قائم سکولوں میں اس لیے نہیں جاتے کیونکہ بہت سی جگہوں پر پکی سڑکیں نہیں ہیں یا ٹرانسپورٹ کے مسائل ہیں۔ کئی علاقوں میں اساتذہ کو دن رات سکولوں میں ہی رہنا پڑتا ہے۔

ان کا کہنا ہے کہ خواتین اساتذہ کے مسائل مرد اساتذہ سے کئی گنا زیادہ ہیں۔ جن سکولوں میں ایک ہی استاد تعینات ہو وہ اس کی غیرحاضری یا بیماری کی صورت میں بند ہو جاتا ہے۔

مغلانی کہتے ہیں کہ بند سکول کھلوانا ان کے اختیار میں نہیں ہے۔ انہوں نے بتایا کہ کچھ سکول اس لیے بھی بند ہو جاتے ہیں کہ بعض اساتذہ اپنی ریٹائرمنٹ سے کچھ عرصہ پہلے اپنا تبادلہ دور دراز کسی ایسے سکول میں کروا لیتے ہیں جہاں تعینات استاد وہاں نہیں رہنا چاہتا۔ بعض اساتذہ تعلق اور دوستی میں ایسا کرتے ہیں جبکہ ایسے بھی ہیں جو رشوت لے کر اپنا تبادلہ کراتے ہیں۔ چنانچہ جب وہ ریٹائر ہوتے ہیں تو وہ سکول بند ہو جاتا ہے۔

اس کے ساتھ مغلانی یہ دعویٰ بھی کرتے ہیں کہ اب ایسے تبادلوں پر پابندی لگا دی گئی ہے۔ 
2017 کی مردم شماری کے مطابق 44 ہزار 700مربع کلومیٹر سے زیادہ علاقے پر پھیلے ضلع چاغی کی کل آبادی 22 لاکھ سے زیادہ ہے جس میں پانچ سال سے اوپر کی عمر کے صرف ایک لاکھ 88 ہزار افراد خواندہ ہیں جبکہ ایک لاکھ 20 ہزار نے کبھی سکول نہیں دیکھا۔

نذیر ایجباڑی کہتے ہیں کہ اب سکولوں میں طلبہ کی تعداد بڑھنے لگی ہے لیکن بہت سے ہائی سکولوں میں سو سے ڈیڑھ سو طلبہ پر مشتمل جماعت کے لیے ایک ہی استاد میسر ہے اور بعض سکول ایسے ہیں جہاں ایک ہی استاد اپنی جماعت کے طلبہ کو تمام مضامین پڑھاتا ہے۔

&nbsp;انہوں ںے بتایا کہ رواں سال کے بجٹ میں تعلیم کے لیے 83 ارب روپے رکھے گئے تھے لیکن چاغی میں یہ بجٹ خرچ ہوتا دکھائی نہیں دیتا جہاں محکمہ تعلیم کے پاس اپنا دفتر تک نہیں ہے اور بیشتر ہائی سکول سائنس روم اور کمپیوٹر لیبارٹری سے محروم ہیں۔

چاغی کے ڈسٹرکٹ ایجوکیشن آفیسر نے بتایا کہ ڈپٹی کمشنر چاغی نے اس ضلع میں سینڈک پراجیکٹ میں کام کرنے والی چینی کمپنی کو خط لکھ کر درخواست کی ہے کہ وہ اپنے خرچ پر چند سکولوں میں اساتذہ کو بھرتی کرے جبکہ صوبائی حکومت بھی اسی طرح کی تجویز پر غور کر رہی ہے۔ ان کاکہنا تھا کہ ان تجاویز پر عملدرآمد کے بعد اساتذہ کی کمی کا مسئلہ کسی حد تک کم ہو جائے گا۔

محکمہ تعلیم یا اساتذہ: چاغی میں بند پڑے سکولوں کا ذمہ دار کون ہے؟

text

فقیر محمد ڈھائی سال سے اپنے سسرال سے نہیں ملے۔ وہ کہتے ہیں کہ فروری 2020 سے پہلے وہ ہر تین چار مہینے بعد اپنے بیوی بچوں کے ہمراہ اُن سے ملنے چلے جاتے تھے لیکن اب ان کے لیے ایسا کرنا ممکن نہیں رہا۔&nbsp;

وہ بلوچستان کے مغربی ضلع چاغی کے صدر مقام دالبندین میں رہتے ہیں لیکن ان کی شادی 15 سال پہلے ایران کے صوبہ سیستان-بلوچستان کے شہر زاہدان میں اپنے قریبی رشتہ داروں میں ہوئی تھی۔ اِن رشتہ داروں کے خوشی اور غم کے مواقع میں شرکت کے لیے وہ ایک خصوصی سرکاری اجازت نامہ استعمال کرتے تھے جو اَب منسوخ کر دیا گیا ہے۔&nbsp;

پاک-ایران سرحد پر واقع تفتان نامی قصبے کے رہنے والے خدا بخش مینگل بھی اسی طرح کا اجازت نامہ استعمال کر کے وقتاً فوقتاً اپنے رشتہ داروں سے ملنے ایران جایا کرتے تھے۔ ان کا کہنا ہے کہ یہ اجازت نامہ ان کے ضلع چاغی میں رہنے والے &quot;غریب خاندانوں کے لئے بہت بڑی نعمت تھا کیونکہ اس کے تحت وہ پاسپورٹ اور ویزے کے حصول جیسے مشکل اور مہنگے مراحل سے گزرے بغیر سرحد پار رہنے والے اپنے رشتہ داروں سے مل سکتے تھے&quot;۔ ان کے بقول، اس اجازت نامے کی تنسیخ سے &quot;خونی رشتوں کے درمیان دیواریں کھڑی ہو گئی ہیں&quot;۔

فقیر محمد اس مسئلے کی وضاحت کرتے ہوئے کہتے ہیں کہ &quot;ایران کا ویزا حاصل کرنے کے لیے کوئٹہ میں اس کے قونصل خانے میں جانا پڑتا ہے۔ اس عمل میں کم از کم 10 روز لگتے ہیں اور اس پر کم از کم 20 ہزار روپے خرچہ آتا ہے&quot;۔ لیکن ان کا کہنا ہے کہ چاغی کے لوگوں کے پاس &quot;اتنے مالی وسائل نہیں ہیں کہ وہ ایسے تمام خرچے برداشت کر کے اپنے خاندان کے پاسپورٹ بنوائیں اور پھر ان پر ویزے لگوائیں&quot;۔&nbsp;

چنانچہ، ان کے بقول، خصوصی اجازت ناموں کی عدم موجودگی میں &quot;کچھ لوگ اپنی جان پر کھیل کر غیر قانونی طریقے سے دشوار گزار اور خطرناک راستوں کے ذریعے ایران میں داخل ہونے کی کوشش کرتے ہیں&quot;۔&nbsp;

<h2>سرحدیں روک نہ پائیں گی کبھی رشتوں کو&nbsp;</h2>

پاکستان اور ایران کے درمیان باہمی سرحدی حدود طے پانے کے بعد دونوں ملکوں نے 1958 میں ان کے آرپار آنے جانے کے لیے ایک معاہدہ کیا۔ اس معاہدے کے نتیجے میں چاغی، واشُک، گوادر، پنجگور اور کیچ جیسے سرحدی اضلاع کے ایسے لوگوں کو خصوصی سفری اجازت نامے جاری کیے گئے جن کے خاندان سرحدوں کی نشان دہی کی وجہ سے منقسم ہو گئے تھے۔

ان اجازت ناموں کو استعمال کر کے وہ پاسپورٹ اور ویزے کے بغیر جب چاہتے ایران چلے جاتے بشرطیکہ ان کے پاس سرحد پار سے آیا ہوا کسی تقریب کا دعوت نامہ یا کسی مرگ یا بیماری کی اطلاع کا دستاویزی ثبوت موجود ہوتا۔ پاکستانی سرحدی حکام کے مطابق ہر سال دس ہزار سے بارہ ہزار لوگ اس طریقے سے پاکستان سے ایران اور ایران سے پاکستان آتے جاتے تھے۔

ان خصوصی اجازت ناموں پر سفر کرنے والے لوگ تفتان میں پاک ایران سرحد پر بنائے گئے ایک مخصوص راستے سے گزرتے تھے جسے راہداری گیٹ کہا جاتا ہے۔ اس پر متعین پاکستانی لیویز فورس کے اہل کار الٰہی بخش نوتیزئی کا کہنا ہے کہ کورونا وبا کی وجہ سے بین الاقوامی سفر پر عائد کی جانے والی پابندیوں کے پیشِ نظر اس گیٹ کو 20 فروری 2020 کو بند کر دیا گیا اور اس میں سے گزرنے کے تمام خصوصی اجازت نامے منسوخ کر دیے گئے۔ &nbsp; &nbsp;&nbsp;

اب اگرچہ دونوں ملکوں کے درمیان موجود دیگر سفری انتظامات بحال ہو چکے ہیں لیکن ایرانی حکام چاغی اور واشُک کے اضلاع میں رہنے والے منقسم خاندانوں کو خصوصی اجازت ناموں پر ایران میں داخل ہونے کی اجازت نہیں دے رہے (حالانکہ گوادر، کیچ اور پنجگور کے رہنے والے لوگ یہ اجازت نامے استعمال کر کے ماضی کی طرح سرحد کے آرپار آ جا رہے ہیں)۔ دونوں ملکوں کے درمیان سرحدی تعاون اور دیگر متعلقہ معاملات کو چلانے اور بہتر بنانے کے لئے بنائے گئے کمیشن میں شامل ایک پاکستانی اہل کار اپنا نام ظاہر نہ کرنے کی شرط پر کہتے ہیں کہ اس کی ایک بڑی وجہ جیش العدل نامی ایک شدت پسند تنظیم کی طرف سے کی جانے والی کارروائیاں ہیں جو نہیں چاہتی کہ سیستان-بلوچستان جیسے سُنّی علاقے ایران کی شیعہ حکومت کے نظم و نسق کے تابع رہیں۔ &nbsp; &nbsp;

ان کا کہنا ہے کہ &quot;پچھلے کچھ سالوں میں اس تنظیم نے نہ صرف ایرانی سرحدی چوکیوں پر متعدد حملے کئے ہیں بلکہ 2018 کے اواخر میں اس کے ارکان نے چاغی سے متصل لولکدان نامی ایرانی سرحدی چوکی سے 12 ایرانی سرحدی محافظوں کو اغوا بھی کر لیا تھا&quot;۔ اس واقعے کے بعد ایران کے وزیرِ داخلہ نے واضح طور پر کہا تھا کہ ان محافظوں کے اغوا کار پاکستان سے آئے تھے۔ انہوں نے یہ دھمکی بھی دی تھی کہ اگر پاکستانی حکام نے ان کی سرگرمیوں کو نہ روکا تو ایرانی سکیورٹی اہل کار خود پاکستانی حدود میں داخل ہو کر ان کے خلاف کارروائی کر سکتے ہیں۔

تاہم اس امکان کو ختم کرنے کے لیے پاکستانی سکیورٹی اداروں نے چاغی سے نو مغوی محافظوں کو بازیاب کرا کے ایرانی حکام کے حوالے کر دیا۔ باقی کے تین اہلکاروں کی رہائی کے حوالے سے مقامی لوگوں میں یہ تاثر عام ہے کہ ایسا مبینہ طور پر ایک ایسے خفیہ معاہدے کے نتیجے میں ممکن ہوا جس کے تحت ایرانی حکام نے بھی کچھ سُنّی شدت پسندوں کو اپنی حراست سے رہا کیا تھا۔ تاہم آزادانہ اور سرکاری ذرائع سے اس تاثر کی تصدیق ممکن نہیں ہو سکی۔&nbsp;

چاغی میں موجود متعدد سرکاری اور غیر سرکاری ذرائع کا کہنا ہے کہ اس طرح کے واقعات کی بنا پر ایران چاہتا ہے کہ پاکستان فوری طور پر جیش العدل کے کارکنوں کو اپنے علاقوں سے نکالے۔ چنانچہ، ان ذرائع کے مطابق، وہ اس وقت تک چاغی اور واشُک کے لوگوں کے لیے راہداری گیٹ کھولنے کے لیے تیار نہیں جب تک پاکستان اسے اس حوالے سے کوئی ٹھوس یقین دہانی نہ کرا دے۔

اگرچہ تفتان میں متعین اسسٹنٹ کمشنر ظہور بلوچ ایسے کسی ایرانی مطالبے سے واقف نہیں لیکن ان کا کہنا ہے کہ راہداری گیٹ کھلوانے کے لیے چاغی کی ضلعی انتظامیہ نے ایرانی سرحدی حکام کے ساتھ گزشتہ چند مہینوں میں کئی مرتبہ بات چیت کی ہے۔ وہ کہتے ہیں کہ اس بات چیت کے دوران انہیں دوسری جانب سے ہمیشہ یہی جواب ملتا ہے کہ وہ &quot;تہران میں اپنے اعلیٰ حکام سے بات کر کے ہی اس پر کوئی فیصلہ کر سکیں گے&quot;۔

چاغی کے ڈپٹی کمشنر انعام الحق بھی یہی کہتے ہیں۔ ان کے مطابق خصوصی اجازت ناموں کے ذریعے سفر کرنے پر عائد پابندی کا &quot;خاتمہ اس وقت تک ممکن دکھائی نہیں دیتا جب تک تہران سے اس کے بارے میں کوئی نیا حکم نہیں آ جاتا&quot;۔

آگ صحرا میں لگی اور دھواں گھر سے اٹھا: سکیورٹی مسائل کے باعث پاک-افغان سرحدی تجارت سے وابستہ ڈرائیوروں کی زندگی اجیرن۔

پاکستان اور ایران میں منقسم بلوچ خاندان: خصوصی سفری اجازت ناموں کے خاتمے کے بعد چاغی کے لوگ 'اپنی جان پر کھیل کر سرحد پار کر رہے ہیں'۔

بلوچستان کے مغربی ضلع چاغی میں افغانستان اور ایران کی سرحد کو جانے والے طویل اور دشوار گزار راستوں پر کوئی انسانی آبادی دکھائی دے نہ دے، نیلے رنگ کے سامان بردار منی ٹرک ضرور نظر آتے ہیں۔ ایرانی کمپنی &#39;زامیاد&#39; کے تیار کردہ ان منی ٹرکوں کو مقامی بلوچی زبان میں &#39;زمباد&#39; کہا جاتا ہے۔&nbsp;

ہر روز تقریباً تین ہزار زمباد یوریا کھاد، آٹا اور سبزیاں لے کر افغانستان جاتے ہیں اور وہاں سے گاڑیوں کے پرزے اور ٹائر، کپڑے، خشک میوے، اون، سپاری اور دیگر اشیا لے کر پاکستان آتے ہیں۔ افغانستان سے لائی جانے والی ان اشیا پر پاکستانی حکومت فی الحال کوئی درآمدی ٹیکس وصول نہیں کرتی کیونکہ چاغی میں کوئی سرکاری سرحدی گزرگاہ موجود نہیں جہاں کسٹم کی چیک پوسٹ بنائی جا سکے۔&nbsp;

ایران سے پاکستان کو پٹرول، ڈیزل اور مٹی کے تیل کی غیر رسمی ترسیل بھی انہی منی ٹرکوں کے ذریعے ہوتی ہے جس کے لیے روزانہ اوسطاً دو ہزار زمباد گاڑیاں ان دونوں ملکوں کی سرحد کے آرپار سفر کرتی ہیں۔&nbsp;

ضلع چاغی کی سوا دو لاکھ آبادی کے ایک بڑے حصے کا روزگار افغانستان اور ایران کے ساتھ ہونے والی اس تجارت سے وابستہ ہے۔ اس سے منسلک لوگوں میں ان منی ٹرکوں کے مالک، ڈرائیور، کلینر، سامان اتارنے اور چڑھانے والے مزدور، مکینک اور تجارتی راستے پر قائم چھوٹے چھوٹے ہوٹلوں کے مالک اور ملازمین سبھی شامل ہیں۔ ایک مقامی اندازے کے مطابق ضلع چاغی کے رہنے والے تقریباً چھ ہزار ڈرائیور، تاجر اور مزدور صرف پاک-افغان سرحد کے ذریعے ہونے والی غیر رسمی تجارت سے براہِ راست وابستہ ہیں۔

تاہم حالیہ مہینوں میں پاکستان نے اپنی مغربی سرحد کے ایک بڑے حصے پر خاردار باڑ لگا دی ہے جس سے یہ تجارت خاصی محدود ہو گئی ہے۔ نتیجتاً اس سے وابستہ لوگوں کو کئی معاشی مشکلات کا سامنا ہے۔

ان مشکلات کے حل کے لیے منی ٹرکوں کے مالکان اور ڈرائیوروں نے &#39;زمباد کمیٹی&#39; کے نام سے ایک غیر رجسٹرڈ انجمن بنائی ہوئی ہے۔ اس کا بنیادی مقصد افغانستان اور ایران کے ساتھ غیر رسمی سرحدی تجارت کو آسان بنانے اور اس میں پیش آنے والی رکاوٹوں کو دور کرنے کے لیے سرکاری حکام سے بات چیت کرنا ہے۔ اس کے صدر نصیر سمالانی کا کہنا ہے کہ &quot;یہ تجارت چوری چھپے نہیں ہوتی بلکہ حکومتی اہل کار اس سے پوری طرح آگاہ ہیں&quot;۔&nbsp;

ضلع چاغی کی تحصیل تفتان کے اسسٹنٹ کمشنر ظہور احمد بلوچ کہتے ہیں کہ حکومت مقامی معیشت کے لیے اس تجارت کی اہمیت کو بخوبی سمجھتی ہے۔ اس لیے، ان کے مطابق، اس پر پابندی نہیں لگائی جا رہی بلکہ اسے کسی قاعدے قانون کے تحت لایا جا رہا ہے۔ ان کا کہنا ہے کہ اس حوالے سے وضع کردہ حکومتی قواعد کا بنیادی مقصد یہ ہے کہ &quot;اس تجارت کی آڑ میں کی جانے والی غیرقانونی سرگرمیوں کو روکا جا سکے&quot; جن میں افغانستان کو یوریا کھاد کی منتقلی خاص طور پر شامل ہے (کیونکہ اس سے دہشت گردی کی کارروائیوں میں استعمال ہونے والا دھماکہ خیز مواد تیار کیا جا سکتا ہے)۔

ان قواعد میں زمباد ٹرکوں کی رجسٹریشن بھی شامل ہے۔ چونکہ یہ منی ٹرک ایران سے کسی کاغذی کارروائی اور ٹیکس کی ادائیگی کے بغیر لائے جاتے ہیں اس لیے بلوچستان کی صوبائی حکومت انہیں نہ تو رجسٹرڈ کرتی ہے اور نہ ہی انہیں پاکستانی نمبر پلیٹ جاری کرتی ہے۔ ظہور احمد بلوچ کا کہنا ہے کہ ضلع چاغی میں اس وقت 10 ہزار کے قریب ایسے منی ٹرک موجود ہیں۔ لیکن، ان کے مطابق، اب ان کی رجسٹریشن شروع ہو چکی ہے اور &quot;اب تک تقریباً پانچ ہزار کو رجسٹرڈ کر لیا گیا ہے&quot;۔

ان کا یہ بھی کہنا ہے کہ رجسٹریشن کا عمل مکمل ہونے کے بعد ان منی ٹرکوں کو سرکاری ٹوکن جاری کر دیے جائیں گے تاکہ ان کی سرحد کے آر پار آمدورفت میں کوئی سرکاری اہل کار مزاحم نہ ہو۔

تاہم زیادہ تر زمباد مالکان اور ڈرائیور اس ٹوکن سسٹم کےحق میں نہیں۔ ان کا کہنا ہے کہ &quot;اس سے کاروبار کے مواقع محدود ہو جائیں گے اور سیاسی اثرورسوخ رکھنے والے لوگ اس نظام سے ناجائز فائدہ اٹھائیں گے&quot; کیونکہ وہ سرکاری حکام سے مل ملا کر اپنے ملکیتی منی ٹرکوں اور حامیوں کے لیے دوسروں سے زیادہ ٹوکن جاری کرا لیں گے۔

<h2>ایک آگ کا صحرا ہے</h2>

ایک زمباد ٹرک کو ضلع چاغی کے قصبے نوکُنڈی سے افغانستان کی سرحد تک پہنچنے میں عموماً &nbsp;پانچ گھنٹے لگتے ہیں۔ چونکہ یہ سفر طے کرنے کے لیے کوئی پکی سڑک موجود نہیں اس لیے یہ گاڑیاں انسانی آبادیوں سے دور کچے راستوں پر گھنٹوں کھلے میدانوں اور صحراؤں میں پُرخطر سفر کرتے ہیں جہاں ہمیشہ راہزنی اور بھٹک جانے کا خطرہ موجود ہوتا ہے۔ اسی طرح اگر دوران سفر کوئی زمباد خراب ہو جائے تو بعض اوقات اس کے ڈرائیور کو مدد کے لیے کئی کئی دن انتظار کرنا پڑتا ہے کیونکہ ان ویرانوں میں بیشتر جگہوں پر موبائل فون کے سگنل بھی دستیاب نہیں ہوتے۔&nbsp;

نصیر سمالانی کہتے ہیں کہ پچھلے کچھ عرصے سے حکومت ان منی ٹرکوں کی آمدورفت پر پہلے کی نسبت کہیں زیادہ سختی کر رہی ہے جس کے نتیجے میں متعدد ایسے واقعات پیش آئے ہیں جن میں نہ صرف ان پر لدا ہوا سامان ضبط کر لیا گیا بلکہ ان کے ڈرائیوروں اور کلینروں کو بھی گرفتار کیا گیا۔ان کے مطابق اپریل اور مئی 2022 میں ایسی کئی کارروائیاں کی گئی ہیں۔

چاغی میں متعین سکیورٹی حکام کا کہنا ہے کہ ان کارروائیوں کا بنیادی سبب پاک-افغان سرحد پر پائی جانے والی کشیدگی ہے۔ وہ کہتے ہیں کہ طالبان کی زیر قیادت افغان حکومت کے کچھ حلقے اس سرحد پر پاکستان کی طرف سے باڑ لگانے کی کوششوں سے خوش نہیں ہے اس لیے 7 اپریل 2022 کو افغان علاقے سے ایک پاکستانی فوجی ہیلی کاپٹر پر فائرنگ بھی کی گئی تھی۔ ان کے مطابق &quot;اس کشیدگی کی وجہ سے زمباد ٹرک والوں کو خبردار کیا گیا ہے کہ وہ سرحد کی جانب مت جائیں۔ لہٰذا جو لوگ اس انتباہ کو نظرانداز کرتے ہیں ان کے گاڑیاں سرکاری تحویل میں لے لی جاتی ہیں&quot;۔&nbsp;

ایسا ہی ایک واقعہ 14 اپریل 2022 کو &nbsp;پیش آیا۔&nbsp;

حبیب اللہ نامی زمباد ڈرائیور کے مطابق اس دن سکیورٹی اہلکاروں نے تقریباً دو سو ٹرکوں کو روکا جن میں سے &quot;بیشتر کو تو وہ اپنے ساتھ لے گئے لیکن باقیوں کی بیٹریاں اتار کر انہوں نے ان کے ریڈی ایٹروں میں ریت بھر دی تاکہ کوئی انہیں واپس نہ لے جا سکے&quot;۔ ان کا یہ بھی کہنا ہے کہ انہیں اور ان کے ساتھی ڈرائیوروں کو &quot;چھ گھنٹے پیدل چلنے کے بعد ایک گاڑی ملی جس پر سوار ہو کر وہ نوکنڈی پہنچنے میں کامیاب ہوئے&quot;۔

چاغی کے صدر مقام دالبندین کے رہنے والے 30 سالہ زمان بلوچ بھی ان ڈرائیوروں میں شامل تھے۔ ان کا دعویٰ ہے کہ &quot;اہلکاروں نے ان کا کھانا اور پانی بھی چھین لیا اور انہیں حکم دیا کہ وہ پیدل اپنے گھروں کو واپس جائیں حالانکہ اس وقت کئی ڈرائیور روزے کی حالت میں تھے&quot;۔

سوشل میڈیا پر اس واقعے سے متعلق پوسٹ کی گئی ویڈیوز میں ڈرائیوروں کو صحرا میں پیدل سفر کرتے دیکھا جا سکتا ہے۔ ایک ویڈیو میں تین افراد ریت پر پڑے بھی دکھائی دیتے ہیں۔ ان کی حالت دیکھ کر لگتا ہے شاید وہ پیاس اور بھوک کی شدت سے بے ہوش یا ہلاک ہو گئے ہوں۔

تاہم اُس وقت کے چاغی کے ڈپٹی کمشنر منصور بلوچ (جن کا ان واقعات کے بعد تبادلہ کر دیا گیا تھا) کسی بھی ہلاکت کی تردید کرتے ہیں۔ ان کا کہنا ہے کہ سکیورٹی اہل کاروں نے نہ تو ڈرائیوروں سے پانی اور کھانا چھینا اور نہ ہی انہیں پیدل نوکنڈی جانے پر مجبور کیا۔ اس کے برعکس ان کا دعویٰ ہے کہ ٹرکوں کی ضبطی کے بعد سکیورٹی حکام نے خود ہیلی کاپٹروں کے ذریعے ڈرائیوروں کو پانی پہنچایا۔&nbsp;

تفتان کے اسسٹنٹ کمشنر ظہور احمد بلوچ بھی اسی طرح کا دعویٰ کرتے ہیں۔ وہ کہتے ہیں کہ صوبائی لیویز فورس نے صحرا میں کھوئے ہوئے 50 سے زیادہ ڈرائیوروں کو ڈھونڈ کر ان کی جان بچائی اور انہیں نوکنڈی اور تفتان تک پہنچایا۔ ان کا بھی یہی کہنا ہے کہ &quot;انہیں نہ تو کسی ڈرائیور کے مرنے کی خبر ملی ہے اور نہ ہی صحرا میں کسی کی لاش پائی گئی ہے&quot;۔

<h2>لہو کا سراغ</h2>

چاغی میں افغانستان کی سرحد کے قریب واقع علاقے لشکر آب نامی جگہ سے تعلق رکھنے والے 22 سالہ حمید اللہ چھ سال سے اپنے زمباد ٹرک میں تجارتی سامان لانے اور لے جانے کا کام کر رہے تھے۔ وہ 14 اپریل 2022 کو ایک معاون کے ساتھ افغان سرحد پر سامان پہنچا کر اپنے گھر واپس جا رہے تھے کہ ڈھک نامی صحرائی علاقے میں سکیورٹی اہلکاروں نے انہیں روک کر ان کا ٹرک قبضے میں لینے کی کوشش کی۔ جب انہوں نے مبینہ طور پر فرار ہونے کی کوشش کی تو اہلکاروں نے انہیں گولی مار کر ہلاک کر دیا۔&nbsp;

اس واقعے پر احتجاج کرتے ہوئے سرحدی تجارت سے وابستہ ڈرائیوروں اور چاغی کے دیگر شہریوں نے نوکنڈی میں حمید اللہ کی لاش آر سی ڈی شاہراہ پر رکھ کر مظاہرہ کیا اور سڑک کو تمام ٹریفک کے لیے بند کر دیا۔ انہوں نے ایک سکیورٹی ادارے کے مقامی دفتر پر پتھراؤ بھی کیا جس کے جواب میں سکیورٹی اہلکاروں نے ان پر فائرنگ کر کے کم از کم سات افراد کو زخمی کر دیا۔

اس سے اگلے روز مظاہرین نے نوکنڈی اور دالبندین کے مختلف مقامات پر آر سی ڈی شاہراہ دوبارہ ٹریفک کے لیے بند کر دی۔ ان کے احتجاج کے نتیجے میں ضلعی انتظامیہ نے ان سے رابطہ کر کے انہیں یقین دلایا کہ حمید اللہ کے ورثا کو انصاف فراہم کیا جائے گا اور مقامی لوگوں کو سرحدی تجارت سے نہیں روکا جائے گا۔ اس یقین دہانی کے بعد مظاہرین نے اپنا احتجاج ختم کر دیا۔&nbsp;

لیکن ان وعدوں پر کوئی عمل درآمد نہ ہونے کے بعد 18 اپریل کو مظاہرین دوبارہ اپنے مطالبات لے کر تحصیل چاغی میں فرنٹیئر کور کے کیمپ کے سامنے پہنچ گئے۔ وہاں انہوں نے سکیورٹی اہلکاروں پر پتھراؤ بھی کیا جن کی جوابی فائرنگ سے نو مظاہرین زخمی ہو گئے۔

فوج اور فرنٹیئر کور سے تعلق رکھنے والے حکام اس صورتِ حال کی ذمہ داری &quot;شرپسند عناصر&quot; پر ڈالتے ہیں۔ ان کا کہنا ہے حمیداللہ کی موت کو بنیاد بناکر ان عناصر نے نوکنڈی اور چاغی میں سکیورٹی فورسز کے دفاتر پر دھاوا بولا اور قانون ہاتھ میں لینے اور سکیورٹی پر مامور افراد سے اسلحہ چھیننے کی کوشش کی جس کے ردعمل کے طور پر وہاں موجود اہلکاروں نے ان پر فائرنگ کی۔

تاہم اس فائرنگ سے مظاہرین کے زخمی ہونے پر بلوچستان کے کئی حصوں میں غم و غصے کی لہر دوڑ گئی اور نیشنل پارٹی اور بلوچستان نیشنل پارٹی سمیت مختلف سیاسی اور سماجی تنظیموں نے فوری طور پر متعدد مقامات پر اس کے خلاف مظاہرے کیے۔ اس احتجاج کی گونج پارلیمنٹ میں بھی سنائی دی جہاں اختر مینگل کی قیادت میں بلوچستان نیشنل پارٹی کے ارکان نے قومی اسمبلی کی کارروائی کا بائیکاٹ کیا اور فائرنگ کی تحقیق کے لیے ایک کمیشن کی تشکیل کا مطالبہ بھی کیا۔

اس سیاسی ردِعمل کے نتیجے میں بلوچستان کے چیف سیکرٹری، انسپکٹر جنرل پولیس، سیکرٹری داخلہ اور اعلیٰ فوجی افسروں نے فوراً چاغی پہنچ کر امن عامہ کی صورتحال کا جائزہ لیا اور حمید اللہ کے گھر جاکر ان کے خاندان سے تعزیت کا اظہار بھی کیا۔

حمید اللہ کے بھائی محمد ابراہیم کے مطابق اس موقع پر چیف سیکرٹری مطہر نیاز رانا (جن کا اب تبادلہ ہوچکا ہے) نے ان کے والد کو پانچ لاکھ روپے کا چیک دیا۔ انہوں نے متاثرہ خاندان کے ایک فرد کو سرکاری ملازمت دینے اور حمیداللہ کے ٹرک کو مکمل قانونی رجسٹریشن فراہم کرنے کا وعدہ بھی کیا۔

ان وعدوں کو متعدد ہفتے گزر چکے ہیں لیکن محمد ابراہیم کہتے ہیں کہ نہ تو ان کے خاندان میں سے کسی کو اب تک نوکری ملی ہے اور نہ ہی ٹرک کی قانونی رجسٹریشن ہو سکی ہے۔&nbsp;

تاہم چاغی کے ڈپٹی کمشنر انعام الحق ان کی شکایات کا جواب دیتے ہوئے کہتے ہیں کہ حکومت کو کچھ ضروری کاغذات درکار ہیں جو موصول ہوتے ہی ان وعدوں کی تکمیل کر دی جائے گی۔ ان کے مطابق &quot;حمیداللہ کے اہلخانہ کو عدالت سے جانشینی کا سرٹیفکیٹ حاصل کرنے کی ہدایت کی گئی ہے۔ جونہی انہیں یہ سرٹیفکیٹ ملے گا حکومت بلوچستان اپنے وعدے کے مطابق انہیں 15 لاکھ روپے بطور زرِ تلافی منتقل کر دے گی&quot;۔&nbsp;

علی رضا رند

محکمہ تعلیم یا اساتذہ: چاغی میں بند پڑے سکولوں کا ذمہ دار کون ہے؟

پاکستان اور ایران میں منقسم بلوچ خاندان: خصوصی سفری اجازت ناموں کے خاتمے کے بعد چاغی کے لوگ 'اپنی جان پر کھیل کر سرحد پار کر رہے ہیں'۔

آگ صحرا میں لگی اور دھواں گھر سے اٹھا: سکیورٹی مسائل کے باعث پاک-افغان سرحدی تجارت سے وابستہ ڈرائیوروں کی زندگی اجیرن۔