رؤف احمد شوگر کے مریض ہیں۔ وہ حضوری باغ روڈ پر رہتے ہیں اور اب اپنی زندگی کی سانسیں گن رہے ہیں۔

انہیں تین سال قبل زہریلے کیڑے نے پاؤں پر کاٹا تھا۔ زہر کو پھیلنے سے روکنے کے لیے ان کا آپریشن کیا گیا اور باقاعدگی سے انسولین لگانے کامشورہ دیا گیا جس کے بعد ان کاپاؤں ٹھیک ہوگیا اور وہ چلنے پھرنے لگے۔

گزشتہ چار ماہ سے شوگرکی زیادتی کے باعث ان کے پاؤں کا زخم ہرا ہوگیا ہے اور اس نے ان کی ٹانگ کو بھی لپیٹ میں لے لیا ہے۔

رؤف احمد چلنے پھرنے کے قابل نہیں رہے۔ حتیٰ کہ وہ خودکروٹ بھی نہیں بدل سکتے۔

ڈاکٹروں نے بتایا کہ ان کا زخم اب گینگرین&nbsp; کی صورت اختیار کرچکا ہے یعنی مردہ ہو کر سڑنے لگا ہے۔ یہ صورت حال صرف ان مریضوں کو درپیش ہوتی ہے جو بروقت انسولین نہیں لگواتے۔

رؤف احمد انسولین کیوں استعمال نہیں کرتے؟

رؤف احمد گزشتہ پانچ سال سے باقاعدگی کے ساتھ انسولین استعمال کررہے تھے لیکن نومبر 2022ء میں انہیں سرکاری ہسپتال سے انسولین ملنا بند ہوگئی۔ &nbsp;

اڑسٹھ سالہ رؤف احمد محکمہ صحت سے ریٹائر ہوئے&nbsp; اور کرائے کے مکان میں رہتے ہیں۔

وہ پانچ سال سے ذیابیطس کے مریض ہیں اور اس بیماری سے نجات کے لیے ڈاکٹروں کی ہدایت پر انسولین کاباقاعدگی سے استعمال کرتے رہے ہیں۔

رؤف احمد کے صاحبزادے بابر ایک پرائیویٹ کمپنی میں کام کرتے تھے۔کورونا وبا کے دوران ڈاؤن سائزنگ ہوئی توان کی نوکری بھی ختم ہوگئی۔

طبیعت خراب ہونے کے باعث ان کے والد کو چار ماہ سے پنشن نہیں ملی کیونکہ وہ خود بینک نہیں جاسکتے اور بینک عملہ کہتا ہے کہ وہ ذاتی طور پر پیش ہوں گے تو پنشن ملے گی۔ &#39;&#39;ہم کرائے کے مکان میں رہتے ہیں۔ محکمہ صحت میں والد صاحب کے کچھ دوست موجود ہیں لیکن اس کے باوجود ہم سرکاری ہسپتال میں انسولین حاصل نہیں کرسکے&quot;۔

بابر بتاتے ہیں کہ بازار میں یہ انجکشن پہلے 700روپے میں مل جاتا تھا مگر اب اس کی قیمت ایک ہزار 150 روپے ہوگئی ہے۔ان کے والد کو مہینے میں تین انجکشنوں کی ضرورت ہوتی ہے۔

نسیم بی بی کی عمر 55 سال ہے۔وہ ملتان کے گنجان آباد علاقے ذکریا ٹاؤن میں اپنے بیمار خاوند اور چار بچوں کے ہمراہ کرایے کے مکان میں رہتی ہیں اور لوگوں کے گھروں میں کام کاج کرکے بیمار شوہر سمیت اپنی فیملی کا پیٹ پالتی ہیں۔ ان کی سب سے بڑی صاحبزادی میٹرک میں پڑھتی ہے جبکہ باقی تین چھوٹے بچے بھی زیر تعلیم ہیں۔

نسیم بی بی کے شوہر نذیراحمد کی سبزی کی دکان تھی جب انہیں ذیابیطیس ہوا تو وہ کام کاج کرنے کے قابل نہیں رہے اور اس مرض کے باعث وہ پانچ سال سے بے کار ہیں۔

نسیم بی بی نے بتایا کہ وہ خودبھی سات سال سے اسی مرض میں مبتلا ہیں۔جب وہ صحت مند تھیں تو انہیں سرکاری ہسپتالوں سے شوگر کنٹرول کرنے کے لیے انسولین بھی مل جاتی تھی لیکن اب گزشتہ چار ماہ سے کسی سرکاری ہسپتال میں انسولین دستیاب نہیں۔

میں کبھی نشتر ہسپتال،کبھی شہباز شریف ہسپتال اور کبھی سول ہسپتال کے چکر لگاتی ہوں لیکن ہر جگہ&#39;انسولین دستیاب نہیں&#39; کا بورڈ لگا ہوا ہے&quot;۔

نشتر روڈ پر واقع اسلام فارمیسی کے مالک عبدالمنان نے بتایاکہ پچھلے چار ماہ میں انسولین کی قیمتوں میں ہوشربا اضافہ ہوا ہے اور اس کے باوجود انسولین دستیاب نہیں۔ &quot;ہمارے پاس روزانہ بہت سے مریض آتے ہیں اور انسولین نہ ملنے پر مایوس لوٹ جاتے ہیں۔&#39;&#39; عام طور پر ہیومولن، انسوگیٹ اور مسٹرڈ کمپنیوں کی انسولین استعمال ہوتی ہیں جو اب مارکیٹ میں نہیں مل رہیں۔

پاک یورو جرنل آف میڈیکل اینڈ لائف سائنس کی 2020ء کی رپورٹ کے مطابق ملتان اور مظفر گڑھ میں ایک ہزار 150 افراد کا طبی معائنہ کیا گیا تو ان میں سے 45 فیصد لوگ ذیابیطس کے مریض تھے۔ اس سٹڈی میں 45 سے 60 سال کی عمر کی عورتوں اور مردوں کو شامل کیا گیا تھا۔

<h2>ملتان میں انسولین غائب</h2>

ضلع ملتان کے تمام سرکاری ہسپتالوں میں پچھلے چار ماہ سے انسولین موجود نہیں ہے۔ ان میں نشترہسپتال، شہباز شریف ہسپتال، شجاع آباد اور جلالپور پیر والہ کے تحصیل ہیڈکوارٹرز ہسپتال شامل ہیں۔

ڈسٹرکٹ ہیڈکوارٹرز ہسپتال کا نام شہباز شریف ہسپتال ہے۔

یہاں سے حاصل کیے گئے اعدادوشمار کے مطابق یہاں روزانہ 130سے 150 مریض انسولین لینے آتے تھے۔ نشتر ہسپتال روزانہ آنے والے مریضوں کی تعداد ڈیڑھ سے دو ہزار کے درمیان تھی۔ اب 15یہی مریض انسولین لینے کی غرض سے ملتان کی تحصیل شجاع آباد/ جلال پور کے تحصیل ہیڈ کوارٹرز اور گردونواح کے رورل ہیلتھ سنٹرز کا بھی روزانہ چکر کاٹتے ہیں لیکن انہیں انسولین نہیں ملتی۔

ڈسٹرکٹ ہیلتھ آفیسر ملتان ڈاکٹر فاروق احمد مانتے ہیں کہ ملتان کے کسی سرکاری ہسپتال میں انسولین دستیاب نہیں ہے۔

ڈاکٹر فاروق کہتے ہیں کہ پنجاب میں تمام سرکاری ہسپتالوں کو انسولین کی فراہمی &quot;نووا&quot; نامی دوا ساز کمپنی کرتی ہے جس کی ڈیلنگ ڈائریکٹر جنرل صحت پنجاب کرتے ہیں۔ کھپت اتنی زیادہ ہے کہ یہ کمپنی تنہا طلب پوری نہیں کر پا رہی۔

انہوں نے بتایا کہ اگر کوئی دوسری کمپنی انسولین امپورٹ کرنے کی کوشش کرتی ہے تو مذکورہ کمپنی اس کے خلاف کیس کر دیتی ہے جس کی وجہ سے غریب عوام کو مشکلات کا سامنا ہے۔

ڈاکٹر فاروق کا کہنا ہے کہ کہ ڈائریکٹر ہیلتھ پنجاب کو صورتحال سے آگاہ کردیا گیا ہے اور ملتان سمیت پنجاب بھر میں سرکاری ہسپتالوں کے لئے انسولین کی فراہمی کی کوششیں جاری ہیں۔

لیکن محکمہ پنجاب پرائمری ہیلتھ کے ایڈیشنل ڈائریکٹر میڈیکل سٹوریج اینڈ کنٹرول ( ڈی اینڈ سی) ڈاکٹر عاصم، ڈسٹرکٹ ہیلتھ آفیسر کی بات سے بالکل متفق نہیں۔

&nbsp;ڈاکٹر عاصم پنجاب بھر کے ہسپتالوں کو انسولین سمیت ادویہ بھیجنے کے معاملات کے انچارج ہیں۔

ان کا دعویٰ ہے کہ &quot;مجھے ملتان سے محکمہ صحت اور ہسپتالوں کی انتظامیہ کی جانب سے انسولین کی کوئی ڈیمانڈ موصول نہیں ہوئی&quot;۔

انہوں نے لوک سجاگ کو بتایا کہ ملتان میں نشتر ہسپتال کے سوا تمام (نان ٹیچنگ) ہسپتالوں کو ان کا محکمہ انسولین فراہم کرتا ہے۔ تاہم اگر سپیشلائزڈ ہیلتھ کے تحت کوئی ادادرہ جیسے نشتر ہسپتال بھی ان سے رابطہ کرے تو وہ انکار نہیں کرتے۔ 
&quot;پچھلے جون میں ان کے محکمے نے انسولین کی آٹھ لاکھ وائلز ( ٹیکے) خریدی تھیں جس میں سے آٹھ ہزار وائلز اب بھی سٹاک میں موجود ہیں&quot;۔

ڈاکٹر عاصم نے بتایا کہ ملتان میں انسولین کی کمی کے بارے میں ان کے پاس ڈی ایچ او، ایم ایس سمیت کسی عہدے دار نے رابطہ نہیں کیا۔

&quot; سرکاری ہسپتالوں کی ڈیمانڈ آئے تو ہم کسی بھی وقت انسولین بھیجنے کو تیار ہیں&quot;۔

انہوں نے بتایا کہ نیا سٹاک اگلے دو تین روز میں مل جائے گا۔

<h2>انسولین نہ ملے تو مریض کیا کریں؟</h2>

نشتر میڈیکل یونیورسٹی کے سینئر ڈاکٹر عمران کہتے ہیں کہ شوگر ہر انسان کے جسم میں موجود ہوتی ہے۔ نارمل شوگر فاسٹنگ (نہار منہ) کے ساتھ 110 اور کھانا کھانے کے دو گھنٹے بعد تک اس کی سطح 160 ہونی چاہیے۔ اگر یہ اس سے تجاوز کرتی ہے تو یہ خطرے کی علامت ہے۔

شوگر کی زیادتی سے آنکھوں کا موتیا، فالج، ہارٹ اٹیک، جلد کی بیماری اور گردوں کے موذی امراض ہو سکتے ہیں اور یہ صورت حال جان لیوا بھی ثابت ہوسکتی ہیں۔ انہوں نے کہا کہ جن مریضوں کو معالج کی جانب سے انسولین تجویز کی گئی ہے وہ اسے باقاعدہ استعمال کریں، ماہانہ بنیادوں پر پیشاب اور خون کا ٹیسٹ ضرور کرائیں اور ساتھ ہی بلڈ پریشر 130/80 سے تجاوز نہ ہونے دیں۔

ڈاکٹر عمران رفیق کہتے ہیں کہ انسولین کی عدم موجودگی میں مریض کوچاہیے کہ وہ اپنی خوراک میں سبزیوں اور ترشاوہ پھلوں کااستعمال زیادہ کرے۔ مرغن اور فاسٹ فوڈ کے استعمال سے دریغ کرے اور چلنے پھرنے کو اپنی زندگی کا لازمی حصہ بنائے۔ اسی صورت میں اس موذی مرض کو دور رکھا جا سکتا ہے۔

نشتر ہسپتال جانے والے مریضوں پر ٹریفک کی نشتر زنی اور ایمبولینس میں تڑپتے مریض

پنجاب میں انسولین موجود ہونے کے باوجود ملتان کے سرکاری ہسپتالوں میں نایاب

text

گذشتہ سال نومبر میں ملتان کے علاقے زکریا ٹاؤن کی رہنے والی 33 سالہ بانو کی طبعیت اچانک خراب ہو گئی۔ اہلخانہ نے انہیں بروقت طبی امداد پہنچانے کے لیے ریسکیو 1122 کی ایمبولینس منگوائی اور نشتر ہسپتال کی جانب روانہ ہو گئے۔ ہسپتال کو جانے والی سڑک پر ٹریفک بری طرح جام تھی۔ ایمبولینس کے عملے نے سائرن بجا کر راستہ لینے کی بہت کوشش کی لیکن گاڑیوں کے اژدہام اور شور شرابے میں سائرن کی آواز دب کر رہ گئی۔

ایمبولینس کافی دیر ٹریفک میں پھنسی رہی اور جب راستہ کھلا تو اس وقت بانو کی موت واقع ہو چکی تھی۔

ملتان میں کسی مریض کی ٹریفک جام میں ہلاکت کا یہ کوئی واحد واقعہ نہیں۔ ریسکیو 1122 کے ریکارڈ کے مطابق صرف نومبر 2022ء میں ہی چھ افراد ایسے ہی حالات میں انتقال کر گئے تھے۔ ان میں بانو کے علاوہ لطف آباد بوسن روڈ کے رہائشی 20 سالہ محمد ذیشان، رشید آباد چوک کے 65 سالہ عزیز، ذکریا ٹاؤن گلی نمبر 42 کے 58 سالہ رئیس احمد، شریف پورہ کی 90 سالہ حیات بی بی اور پل واصل کے رہائشی 52 سالہ محمد اختر شامل ہیں۔

ان میں چار مریضوں کو دل کا دورہ پڑا تھا جنہیں بروقت طبی امداد میسر آتی تو ان کی جان بچائی جاسکتی تھی۔ ملتان میں ریسکیو 1122 کے ڈسٹرکٹ ایمرجنسی آفیسر ڈاکٹر کلیم اللہ کا کہنا ہے کہ نشتر ہسپتال روڈ پر غیر قانونی پارکنگ کی وجہ سے جہاں شہریوں کو مشکلات کا سامنا ہے، وہیں ریسکیو عملے کو بھی شدید دشواری ہوتی ہے۔

وہ کہتے ہیں کہ &quot;ریسکیو&nbsp; کے عملے نے ہر مریض کو فوری طور پر نشتر ہسپتال ہی لے جانا ہوتا ہے اور جیسے ہی ہم فلائی اوور اترتے ہیں تو اس کے بعد ہمارے لیے ایک ایک لمحہ دشوار ہو جاتا ہے۔ اس کا آپ خود اندازہ لگا سکتے ہیں کہ مریضوں پر کیا گزرتی ہوگی &quot;۔

18 دسمبر 2022 کی دوپہر 50 سالہ محمد ذوالقرنین کی والدہ کے پیٹ میں شدید درد اٹھا۔

ذوالقرنین نشتر ہسپتال ملتان سے تقریباً ایک کلومیٹر کے فاصلے پر رہائش پذیر ہیں۔ والدہ کو ہسپتال لے جانے کے لیے انہوں نے اپنی گاڑی نکالی اور جسٹس حمید کالونی کی مرکزی سڑک کا انتخاب کیا تاکہ جلد از جلد ہسپتال پہنچ سکیں۔ جیسے ہی وہ نشتر ہسپتال چوک (پرانا جمیل موٹر چوک) پہنچے تو نشتر روڈ پر ٹریفک جام میں پھنس گئے۔

ذوالقرنین نے وقت ضائع کیے بغیر گاڑی کو فوری طور پر واپس موڑ لیا کیونکہ وہ جانتے تھے کہ اب ٹریفک کا اسی طرح ہجوم رہے گا اور راستہ صاف ہونے تک انہیں گھنٹوں انتظار کرنا پڑے گا۔

انہوں نے متبادل راستہ اختیار کرتے ہوئے ایم ڈی اے چوک کی جانب سفر شروع کردیا۔یہ راستہ طویل تو تھا لیکن والدہ کی حالت کے پیش نظر یہی راستہ ان کے لئے مناسب تھا۔ 
ڈسٹرکٹ جیل روڈ سے ہوتے ہوئے وہ نشتر ایمرجنسی پہنچ گئے۔ ہسپتال میں ڈیوٹی پر موجود ڈاکٹروں نے انہیں بتایا کہ ان کی والدہ کے پتے میں پتھری ہے۔ اگر وہ بروقت ہسپتال نہ پہنچتے تو پتہ کسی بھی وقت پھٹ سکتا تھا جس سے مریضہ کی جان بھی جاسکتی تھی۔

پرانا بہاولپور روڈ ( قسور گردیزی روڈ) سے جیسے ہی نشتر ہسپتال روڈ کی طرف جائیں تو اچانک منظر بدل جاتا ہے۔ سڑک کے دونوں جانب گاڑیوں، رکشوں، چنگچی اور موٹر سائیکلوں کا رش نظر آتا ہے۔ گاڑیوں کے ہارن اور ایمبولینس گاڑیوں کے سائرن سے کان پڑی آواز سنائی نہیں دیتی۔

سکول، کالج کے اوقات میں تو یہاں سے گزرنا بھی محال ہے۔بعض لوگوں نے متبادل مگر طویل راستے اختیار کر لیے ہیں مگر جو آبادیاں سڑک کنارے آباد ہیں ان کے رہائشیوں کو&nbsp; آنے جانے کے لیے یہی راستہ اختیار کرنا پڑتا ہے۔

کبھی یہ ایک رویہ تنگ سڑک ہوا کرتی تھی مگر 2010ء میں جب شہر میں درجنوں انڈر پاس اور اوور ہیڈ برج بنائے گئے تو اس سڑک کے درمیان میں بھی ڈیوائیڈر لگا کر اسے دورویہ بنا دیا گیا جس سے ٹریفک جام کا مسئلہ شدت اختیار کر گیا۔ نشتر چوک سے نصف کلو میٹر کے فاصلے پر&nbsp; ایمرجنسی سے پہلے ایک پل ہے جہاں سے شہر کے مشرقی علاقوں سے آنے والی ٹریفک اترتی ہے۔

نشتر ہسپتال کا شمار ملک کے بڑے ہسپتالوں میں ہوتا ہے۔ اس ہسپتال میں 1800 بستروں کی گنجائش ہے جب کہ مختلف امراض کے 32 وارڈ&nbsp; ہیں۔ ایمرجنسی وارڈ، برن یونٹ اور ڈینٹل سیکشن ان کے علاوہ ہیں۔ ہسپتال میں نہ صرف ملتان بلکہ جنوبی پنجاب کے دور دراز علاقوں، بلوچستان اور اندرون سندھ سے تعلق رکھنے والے شہریوں کی بڑی تعداد بھی اپنے مریضوں کا علاج کرانے آتی ہے۔

ہسپتال کے آؤٹ ڈور میں روانہ ساڑھے تین ہزار اور ایمرجنسی وارڈ میں اوسطاً 1600 مریض آتے ہیں۔ نشتر ہسپتال سے ملحق میڈیکل یونیورسٹی میں ڈیڑھ ہزار طلباطالبات زیر تعلیم ہیں۔ 
نشتر چوک سے ڈسٹرکٹ جیل چوک تک تقریبا دو کلو میٹر کے درمیان سڑک کے دونوں اطراف 300کے قریب میڈیکل اور سرجیکل سٹور قائم ہیں۔اسی روڈ پر 120 چھوٹی بڑی پرائیویٹ ٹیسٹ لیبارٹریاں، تقریباً دو درجن بڑے پلازے اور مختلف امراض کے 30 پرائیویٹ ہسپتال واقع ہیں۔ان میں سے 20 سے زیادہ ہسپتالوں کی پارکنگ نہیں ہے جبکہ باقی ہسپتالوں میں برائے نام پارکنگ دکھائی دیتی ہے۔

خواجہ عارف ملتان کی تحصیل شجاع آباد کے رہائشی ہیں اور ملازمت کے سلسلے میں ملتان آتے ہیں۔کمر کے مہروں میں تکلیف کے باعث پہلے انہوں نے شجاع آباد کے ہسپتال سے علاج کروایا بعد ازاں شجاع آباد کے ڈاکٹروں نے انہیں نشتر ہسپتال سے علاج کروانے کے لیے ریفر کردیا۔

گزشتہ دنوں ان کے صاحب زادے عدیل عارف والد کو پرائیویٹ گاڑی میں لے کر شجاع آباد سے پرانا بہاولپور روڈ سے ہوتے ہوئے نشتر ہسپتال چوک پر پہنچے تو انہیں بھی بد ترین ٹریفک جام کا سامنا کرنا پڑا۔

ان کا کہنا ہے کہ &quot;ایک تو ٹریفک پھنسی ہوئی تھی، دوسرے ون وے روڈ ہونے کے باوجود&nbsp; گاڑی کے سامنے مخالف سمت سے کوئی رکشہ یا موٹر سائیکل آجاتا تھا۔اسی تنگ سڑک پر پلازوں کے باہر گاڑیاں کھڑی تھیں اور لوگ گاڑیاں موڑ کر سڑک پر لانے کی کوشش میں تھے۔ رہی سہی کسر وہاں بعض مقامات پر موجود ٹھیلے والوں نے پوری کر دی تھی جو اپنے کاروبار میں مگن تھے&quot;۔

خواجہ عارف نے بتایا کہ ان کے لیے اس روز نشتر پہنچنا اور پھر اسی سڑک سے گھر واپس جانا کسی امتحان سے کم نہ تھا۔

نشتر ہسپتال وارڈ 26 بی کے سینئر رجسٹرار ڈاکٹر ارشد مجاہد کا کہنا ہے کہ نشتر روڈ پر بیشتر غیر قانونی پارکنگ سٹینڈ پرائیویٹ ہسپتالوں نے بنائے ہوئے ہیں لیکن ان کے خلاف کوئی کارروائی نہیں ہوتی۔ وہ کہتے ہیں کہ &quot;شکایات پر انتظامی افسر ایک دو ماہ کے بعد دکھاوے کی کارروائی کرتے ہیں اور جرمانے کیے جاتے ہیں مگر جونہی وہ واپس جاتے ہیں تو صورتحال پہلے جیسی ہو جاتی ہے۔&#39;&#39;

سڑکوں پر تجاوزات اور ٹریفک کی راہ میں آنے والی رکاوٹوں کو دور کرنے کی ذمہ داری میونسپل کارپوریشن کی ہے۔ کارپوریشن یہ کارروائی انتظامیہ اور&nbsp; ٹریفک پولیس کے ساتھ مل انجام دیتی ہے۔ ادارے کے ترجمان کریم نواز خان کا دعویٰ ہے کہ غیر قانونی پارکنگ سٹینڈز کے خلاف کارروائیاں کی گئی ہیں اور مقدمات بھی درج کروائے گئے ہیں تاہم شہر میں اس وقت تجاوزات کی بھرمار ہے۔&quot;ہم اس لیے بروقت کارروائی نہیں کرپاتے کیونکہ ہمارے پاس عملے کی شدید کمی ہے&quot;۔

اسسٹنٹ کمشنر سٹی خواجہ عمیر کا کہنا ہے کہ ضلعی انتظامیہ نے شہر بھر میں اور خاص طور پر سرکاری و غیر سرکاری ہسپتالوں کے باہر غیر قانونی پارکنگ سٹینڈز کے خلاف بلا تفریق کارروائیاں کرکے مقدمات درج کروائے اور نشتر روڈ کو کئی مرتبہ صاف بھی کروایا گیا لیکن ساری کوششیں بے سودثابت ہوتی ہیں۔

&quot;تجاوزات اور پارکنگ مافیا اپنے سرپرستوں کی وجہ سے بہت طاقتور ہے&quot;۔

ڈی ایس پی ٹریفک سٹی عطیہ ناہید جعفری بتاتی ہیں کہ پرائیویٹ ہسپتالوں کے ڈاکٹروں اور میڈیکل سٹور مالکان نے انہیں یقین دہانی کروائی ہے کہ وہ نشتر روڈ کو تجاوزات سے پاک رکھنے اور غیر قانونی پارکنگ کو صاف کرنے میں سٹی ٹریفک پولیس سے تعاون کریں گے۔ 
لیکن یہ تعاون کہیں نظر نہیں آتا۔ 
ذوالقرنین کی والدہ اب روبہ صحت ہیں تاہم انہیں اب بھی فالو اپ کے لیے نشتر جانا پڑتا ہے۔ ذوالقرنین کہتے ہیں کہ جس دن وہ ہسپتال جاتے ہیں اس روز ٹریفک جام کے باعث ان کا پورا دن خراب ہوجاتا ہے۔

عدنان قریشی

عدنان قریشی کا تعلق ملتان سے ہے۔ گذشتہ 20 سال سے مختلف اخبارات اور ٹی وی چینلز میں انویسٹی گیشن رپورٹنگ کرتے ہیں۔

پنجاب میں انسولین موجود ہونے کے باوجود ملتان کے سرکاری ہسپتالوں میں نایاب

نشتر ہسپتال جانے والے مریضوں پر ٹریفک کی نشتر زنی اور ایمبولینس میں تڑپتے مریض

Lok Sujag