پشاور سمیت خیبرپختونخوا کے کئی اضلاع میں تاریخی مقامات کو خطرات لاحق ہیں کیونکہ تاریخی ورثے کے تحفظ کے قانون پر عملدرآمد نہ ہونے اور صوبے کے 22 اضلاع میں محکمہ آثار قدیمہ کا سٹاف موجود نہ ہونے کی وجہ سے آئے روز تاریخی مقامات مسمار کرنے، نوادرات کوغیر قانونی طور پرسمگل کرنے سمیت دیگر واقعات رونما ہونا معمول بن گیا ہے۔

صوبے میں تاریخی مقامات، نوادرات، مجسمے اور دیگر تاریخی ورثے کتنے محفوظ ہیں، اس بات کا انداز محکمہ آثار قدیمہ کی دستاویزات سے لگایا جاسکتا ہے۔

محکمہ آثار قدیمہ سے لی گئی دستاویزات کے مطابق خیبرپختونخوا میں گزشتہ پانچ سالوں کے دوران یعنی 2019ء سے 2023ء&nbsp; کے دوران 113 تاریخی عمارتوں، سرنگوں، سٹوپاز، آثار قدیمہ، پل ،قبرستانوں، مزارات سمیت دیگر نوادرات کو نقصان پہنچایا گیا ہے۔

یہ نقصان پشاور، ضلع خیبر، ڈی آئی خان، سوات، نوشہرہ، چارسدہ، مردان سمیت ان اضلاع میں پہنچایا گیا ہے، جہاں پر تاریخی مقامات موجود ہے۔

ان الزامات کے تحت 100 سے زائد ملزمان کے خلاف مختلف تھانوں میں درخواستیں جمع کی گئیں، جن میں سے 38 ملزمان کے خلاف محکمہ آرکیالوجی نے اینٹیکوٹی ایکٹ کی خلاف ورزی پر ایف آئی آرز تو درج کرلی لیکن کسی پر بھی نہ تو جرمانہ عائد ہوسکا ہے اور نہ ہی کسی کو جیل بھیجا گیا ہے۔

تاریخی عمارتوں کو کمرشل پلازوں اور رہائشی عمارتوں میں تبدیل کرنے، پلوں، نوادرات اور آثار قدیمہ کو نقصان پہنچانے میں پشاور سرفہرست ہے جہاں اب تک 12 مقدمات درج کیے گئے ہیں اور ایک درجن سے زائد درخواستیں تھانوں میں جمع کی گئی ہیں۔

ان میں زیادہ تر مقدمات تاریخی عمارات کو مسمار کرنے پر بنائے گئے ہیں۔

مردان اور صوابی کا نمبر دوسرا ہے، جہاں اب تک چھ چھ افراد کے خلاف مقدمات درج ہوا ہے۔

بدھ مت کا آثار کے حوالے سے شہرت رکھنے والے ضلع سوات میں اب تک صرف تین افراد کے خلاف قانونی کارروائی کے لیے ایف آئی آر درج کی گئی ہے۔ مانسہرہ، چارسدہ ،ہری پور میں دو دو، ایبٹ آباد اور خیبر میں ایک ایک ایف آئی آر درج کی گئی ہے، لیکن کسی کو سزا اور جرمانہ کا نہیں کیا گیا ہے۔

<h2>اینٹیکوٹی ایکٹ کیا ہے؟</h2>

خیبرپختونخوا حکومت نے 2016ء میں تاریخی عمارتوں،نوادارات کو تحفظ دینے کے لیے اینٹیکوٹی ایکٹ پاس کیاتھا۔ قانون کے مطابق جہاں کہیں بھی تاریخی یا ثقافتی مقام یا اشیاء جو 100 سال یا اس سے زیادہ پرانی ہوں، انہیں قومی ورثہ قرار دیا جائے گا اور اسے نقصان پہنچانے والوں کے خلاف کارروائی کی جائے گی۔

اس ایکٹ کے مطابق کوئی بھی دروازہ، پتھر، لکڑی کا 100 سال پرانا کوئی بھی کام آثار قدیمہ میں شمار ہو گا۔

اس ایکٹ کے نفاذ کے لیے پانچ اراکین پر مشتمل ایڈوائزری کمیٹی تشکیل دی جانا تھی جو تاحال قائم نہیں کی جاسکی۔ قانون کے مطابق ڈائریکٹر محکمہ آثار قدیمہ کی سربراہی میں ایک ہیرٹیج بورڈ بھی تشکیل دیا جانا تھا جس کا مقصد تاریخی عمارات، نوادرات و دیگر اشیاء کا تحفظ یقینی بنانا تھا۔ اس بورڈ میں آثار قدیمہ کے ماہر، انجینئرز، تاریخ دان، فنکار اور دیگر اہم افراد شامل ہونا تھے۔ تاہم ابھی تک بورڈ بھی تشکیل نہیں دیا گیا ہے۔

اینٹیکوٹی ایکٹ کے باب نمبر تین، سیکشن 18 کے مطابق کسی بھی تاریخی مقام کو نقصان پہنچانا ،اس میں تبدیلی یا مسماری جرم تصور ہو گا جس کے ارتکاب ثابت ہونے پر پانچ سال قید اور 20 لاکھ روپے کا جرمانہ عائد ہوگا، یا ان میں سے کوئی ایک لگایا جائے گا۔

سوات میوزیم کے انچارج نواز الدین کے مطابق جب بھی کسی تاریخی ورثہ کو کھودا جائے، آثار قدیمہ کو نقصان پہنچایا جائے یا نوادارات سمگل کرتے ہوئے کوئی پکڑا جائے تو اس کے خلاف اینٹیکوٹی ایکٹ کے تحت کارروائی کی جاتی ہے لیکن یہ کارروائی برائے نام ہے کیونکہ اب تک نہ توکسی کو جرمانہ کیا گیا اور نہ ہی جیل بھیجا گیا ہے۔

&quot;محکمہ وقتی طور پر اس مقام کو سیل کرتا ہے اور بعد میں اسے پلازے یا مرضی کے مکان میں تبدیل کیا جاتا ہے۔&quot;

وہ بتاتے ہیں کہ صرف پشاور کی بات کی جائے تو یہاں کئی ایسے واقعات رونما ہوئےجہاں تاریخی عمارت گرا کرکمرشل پلازے بنائے گئے لیکن تاحال ان کے خلاف کوئی عملی کارروائی عمل میں نہیں لائی جاسکی ہے۔

اینٹیکوٹی ایکٹ پر عمل دارآمد سے متعلق محکمہ آثار قدیمہ کے ریسرچ آفیسر بخت محمد نے بتایا کہ جہاں بھی قانون کی خلاف ورزی ہوتی ہے، وہاں محکمہ آثار قدیمہ کا عملہ کارروائی کرتا ہے۔

بخت محمد کے مطابق خیبرپختونخوا کے 12 اضلاع میں آثار قدیمہ کے دفاتر، میوزیم اور متعلقہ ادارے قائم ہیں، اس لیے ان اضلاع میں اینٹیکوٹی ایکٹ کی خلاف ورزی بہت کم دیکھنے کو ملتی ہے اور ان اضلاع میں کوئی بھی اینٹیکوٹی ایکٹ&nbsp; کی خلاف وزری باآسانی نہیں کر سکتا۔

&quot;2022ء میں اینٹیکوٹی ایکٹ میں مزید ترامیم کر کے نوادرات کے سمگلنگ، آثار قدیمہ کو نقصان پہنچانے والوں کے گرد گھیرا مزید تنگ کر دیا گیا ہے لیکن کچھ اضلاع ایسے ہیں جہاں محکمے کے دفاتر موجود نہیں اور وہاں اہلکار بھی تعینات نہیں ہیں۔ اس لیے وہاں اینٹیکوٹی ایکٹ کی خلاف ورزی کرنے والوں کو پکڑنے میں مشکلات کا سامنا ہے۔&quot;

&nbsp;بخت محمد کے مطابق خیبرپختونخوا میں رجسٹرڈ سائٹس کی تعداد آٹھ ہزار 600 سے زائد ہے جبکہ غیر رجسٹرڈ سائٹس کی تعداد 20 ہزار سے بھی زیادہ ہے. ان کے مطابق 86 سائٹس کو پروٹیکٹڈ سائٹس قرار دے کر اس کو محفوظ بنایا گیا ہے۔

<h2>ماہرین کی نظر میں پشاور کی اہمیت</h2>

ماہرین آثار قدیمہ اور تاریخ دان و مصنف ڈاکٹر اباسین یوسفزئی کے مطابق، 17 ویں صدی میں تعمیر ہونے والے قلعہ بالاحصار، مسجد مہابت خان، وکٹوریائی طرز تعمیر پر بنے والا عجائب گھر، ہندوستان کے اداکار دلیپ کمار (یوسف خان مرحوم) کا گھر، راج کپور حویلی اور درجنوں دوسری عمارتیں، پل، مقبرے اور مساجد موجود ہونے کی وجہ سے پشاور کافی اہمیت کے حامل ہے۔

ہر سال ہزاروں سیاح یہاں کا رخ کرتے ہیں اور اس تاریخی شہر کی یادیں کیمرے کی آنکھ میں محفوظ کر کے جاتے ہیں۔

ماہر آثار قدیمہ اور پروفیسر شعبہ ارکیالوجی جامعہ پشاور ڈاکٹر ذاکر اللہ جان&nbsp; کے مطابق اگر پشاور کے تاریخی عمارتوں کو اسی طرح پلازوں میں تبدیل کیا جاتا رہا تو اس کی تاریخ مٹ جائے گی۔

ان کے مطابق، پشاور میں اب تک 20 سے زائد عمارتوں کو مسمار کرکے پلازوں میں تبدیل کردیا گیا ہے لیکن محکمہ کے پاس اس کا ریکارڈ ہی موجود نہیں ہے۔یہاں کئی تاریخی عمارتیں بحالی کی منتظر ہیں جس پر کام کرنے کی ضرورت ہے۔

&quot;پشاور کے دلازاک روڑ پر واقع شاہ قطب الدین کا مزار یا شیخ ڈھیرئ ، امام الدین کا مقبرہ اور مسجد، یا سید کا باغ یہ عمارتیں فنڈز نہ ہونے کے باعث انتہائی مخدوش حالت میں ہیں اور یہ کسی بھی وقت منہدم ہو سکتی ہیں۔ ان تاریخی عمارتوں کی بحالی کے لیے کسی دور میں بھی کسی حکومت نے کوئی کام نہیں کیا ہے۔&quot;

<h2>مسجد مہابت خان اور گھور کھٹری کی مخدوش صورتحال کا ذمہ دار کون؟</h2>

مغلیہ دور کی تاریخی مسجد مہابت خان کو اپنی اصلی حالت میں دوبارہ بحال کرنے کے لیے 2017ء میں شروع کیا گیا، یہ منصوبہ سست روی کا شکار ہے اب تک مسجد کے اطراف سے تجاوزات ختم کیے جا سکے ہیں اور نہ ہی منصوبے کو بروقت مکمل کرنے کے لیے اقدامات کیے گئے ہیں یہی وجہ ہے کہ جون 2024ء میں مکمل ہونا والا بحالی کا منصوبہ اب 2026ء میں مکمل ہو گا یعنی یہ منصوبہ مزید دو سال کی تاخیر سے مکمل ہو گا۔

ڈائریکٹر محکمہ آثار قدیمہ عبدالصمد&nbsp; نے مسجد مہابت خان کی بحالی سے متعلق بتایا کہ چیف سیکرٹری خیبر پختونخوا، کمنشر پشاور ڈویژن، ڈی سی پشاور اور متعلقہ ادارے مسجد کی بحالی کے حوالے سے کام کی نگرانی کر رہے ہیں اور مسجد مہابت خان کے گرد تجاوزات کے خاتمے کیلیےکوششیں کی جارہی ہیں کیونکہ جب تک تجاوزات کا خاتمہ نہیں ہوتا اس منصوبے پر کام مکمل کرانا ممکن نہیں ہے۔

پشاور کے تاریخی علاقے گور کٹھری کو اصلی حالت میں لانے کے لیے کروڑوں روپے تو خرچ کر دیے گئے، لیکن یہاں جگہ جگہ پڑے گندگی کے ڈھیر اور ٹوٹ پھوٹ بحالی کے عکاس ہرگز نہیں ہیں۔

<h2>سابق قبائلی اضلاع تک محکمہ آثار قدیمہ کی رسائی نہیں؟</h2>

قبائلی اضلاع کے خیبر پختونخوا میں اںضمام کے پانچ سال گزر گئے ہیں مگر یہاں محکمہ آثار قدیمہ کے دفاتر قائم ہوئے اور نہ ہی یہاں صوبے کے دوسرے اضلاع کی طرح انسپکٹر اور دوسرے سٹاف کی تعیناتی ہو سکی ہے۔ جس کے باعث ان علاقوں میں نہ تو اینٹیکوٹی ایکٹ کے خلاف وزری روکنے کا کوئی بندوبست ہے نہ ہی وہاں تاریخی مقامات کو نقصان پہنچے یا نوادرات کی سمگل کا محکمے کو کوئی علم ہوتا ہے۔

<h2>&nbsp;18ویں ترمیم اور آثار قدیمہ</h2>

ماہر آثار قدیمہ اور پروفیسر شعبہ آرکیالوجی جامعہ پشاور ڈاکٹر ذاکر اللہ جان&nbsp; کے مطابق، 18ویں ترمیم کے بعد تاریخی مقامات کے تحفظ اور دیکھ بھال کی ذمہ داری صوبائی حکومت کی ہے۔

بخت محمد کہتے ہیں کہ خیبرپختوںخوا میں چھ ہزار آثار قدیمہ کے مقامات موجود ہیں۔ تجربہ کار ٹیموں کی مدد سے تین ہزار سائٹس کی نشاندہی کر کے اسے ریکارڈ پر لایا گیا اور انہیں محفوظ بنانے پر کام بھی شروع کیا گیا جبکہ باقی سائٹس کا سروے شروع کرنے کے لیے اقدامات کیے جا رہے ہیں۔

<h2>آثار قدیمہ کا تحفظ، سب کی یکساں ذمہ داری</h2>

نواز الدین گزشتہ کئی سال سے سوات عجائب گھر میں بطور انچارج کام کر رہے ہیں اور آثار قدیمہ کےامور پر مہارت رکھتے ہیں۔ ان سے تاریخی مقامات کو نقصان پہنچانے کے واقعات اور محکمے کی کارکردگی کے حوالے سے پوچھا گیا تو انہوں نے بتایا کہ 2016ء میں خیبرپختونخوا&nbsp; نے قانون بنایا اور اس پر عملی طور پر کام شروع کیا لیکن آثار قدیمہ کا تحفظ صرف ہماری نہیں بلکہ سب کی ذمہ داری ہے۔

&quot;یہ ہمارا مشترکہ ورثہ اور تاریخ ہے، اس لیے اس کا تحفظ یقینی بنانے کے لیے سب کو اپنا کردار ادا کرنا چاہے، تعلیمی اداروں میں اس بات پر زور دینا چاہیے کیونکہ ذمہ دار قومیں اپنی تاریخ کو محفوظ رکھتی ہیں۔&quot;

وسے تہ تھر نہ تہ بر: محکمہ سیاحت کی توجہ کے طالب تھر پارکر کے آٹھ تاریخی مقامات

خیبر پختونخوا میں تاریخی ورثے کے تحفظ کا قانون کتنا مؤثر ہے؟

text

خیبرپختونخوا میں قائم اینٹوں کے نصف سے زیادہ بھٹے غیر قانونی طور پر چل رہے ہیں۔ ایسے بیشتر بھٹے پشاور، نوشہرہ ، ڈی آئی خان، ٹانک اور لکی مروت کے اضلاع میں قائم ہیں۔ یہ بھٹے صوبائی حکومت کے کسی ادارے کے ساتھ رجسٹرڈ نہیں ہیں اور ان سے پیدا ہونے آلودگی سے لوگ جلد، سینے، گلے اور معدے کے امراض میں مبتلا ہو رہے ہیں۔

محکمۂ ماحولیات کے ایک اہلکار کے مطابق خیبرپختونخوا میں ایسے تقریباً&nbsp; 1200 غیر رجسڑڈ بھٹے ہیں تاہم ان کا کوئی باقاعدہ ریکارڈ محکمہ انڈسٹریز، سوشل ویلفئیر، محکمۂ ماحولیات یا کسی بھی دوسرے ادارے کے پاس موجود ہیں۔

ان میں سب سے زیادہ تقریباً&nbsp; 450 بھٹے نوشہرہ اور پشاور میں ہیں، بنوں، ڈی آئی خان اور لکی مروت میں ان کی تعداد تقریباً&nbsp; 250 تک ہے، اسی طرح کوہاٹ، صوابی، چارسدہ اور صوبے کے دوسرے مضافاتی علاقوں میں بھی ایسے بھٹے دیکھے جا سکتے ہیں۔

ان بھٹوں سے خارج ہونے والے کاربن ڈائی آکسائیڈ، کاربن مونو آکسائیڈ، سلفر ڈائی آکسائیڈ، نائٹروجن ڈائی آکسائیڈ اور دیگر مادے آلودگی کا باعث ہیں۔ ان مادوں کے اخراج کو کنٹرول کرنے کے لیے یکم جون 2019 میں زگ زیگ ٹیکنالوجی متعارف کرانے کا منصوبہ شروع کیا گیا، لیکن پانچ سال گزرنے کے بعد بھی یہ منصوبہ اپنے مقررہ اہداف حاصل نہیں کر سکا۔

اس دو سالہ منصوبے کے تحت خیبر پختونخوا کی اینٹ کی بھٹیوں میں زگ زیگ ٹیکنالوجی لگا کر آلودگی کنٹرول کرنے اور ان غیر رجسٹرڈ بھٹیوں کو رجسٹرڈ کرانے کیلئے 2019 میں 11 ملین روپے کی لاگت سے زگ زیگ ٹیکنالوجی متعارف کرائی گئی۔

اس منصوبے کی اہمیت کو دیکھتے ہوئے حکومت نے اسے پانچ سال تک توسیع دی اور اس کی لاگت بڑھا کر 52 ملین روپے کر دی۔ ابتدائی طور پر دو سالہ منصوبے کے دوران صوبے کے 10 اضلاع کی ایک ایک بھٹہ خشت فیکٹری کو زگ زیگ ٹیکنالوجی پر منتقل کرانا تھا تاہم پانچ سال گزر جانے اور منصوبے کیلئے مختص 53 ملین روپے میں سے 13 ملین روپے خرچ ہونے کے بعد بھی مقررہ اینٹ کی بھٹیوں کو زگ زیگ ٹیکنالوجی پر منتقل کرنے کا ہدف حاصل نہیں ہوسکا ہے۔

اس منصوبے کے پہلے مرحلے میں دس اضلاع کی اینٹ کی بھٹیوں کو زگ زیگ پر منتقل کیا جانا تھا، ان اضلاع میں نوشہرہ، مردان، صوابی، ہری پور، بنوں، لکی مروت، ڈی آئی خان، ٹانک، ملاکنڈ اور مردان شامل تھے لیکن لاکھوں روپے خرچ ہونے کے بعد بھی اب تک صرف ایک بھٹہ خشت کو ہی اس ٹیکنالوجی پر منتقل کیا جاسکا ہے۔

محکمہ ماحولیات کے ذرائع کے مطابق، منصوبے کے مقاصد حاصل نہ ہونے سے جہاں لاکھوں روپے ضائع ہوگئے تو وہیں آلودگی کنٹرول کرنا بھی خواب بن گیا ہے۔ جس مقصد کیلئے زگ زیگ ٹیکنالوجی کو متعارف کرایا گیا تھا اس کے وہ مقاصد سالوں بعد بھی حاصل نہیں ہوسکے ہیں، یہی وجہ ہے کہ اینٹ کی بھٹیوں سے خارچ ہونے والی آلودگی کو کنٹرول کرنے کا اب حکومت کے پاس کوئی مناسب بندوبست موجود نہیں ہے۔

صحت کے ماہرین کے مطابق اینٹ کی بھٹوں سے خارچ ہونے والی آلودگی دوسرے لوگوں سے زیادہ مقامی لوگوں کیلئے خطرناک ہے کیونکہ ان کا جلد، سانس، معدے، گلے یا پھیپڑوں کی بیماری میں متاثر ہونے کے امکانات کافی زیادہ ہوتے ہیں۔

پشاور کے مضافاتی علاقے متنی، بازید خیل، پھندو اور نوشہرہ کے علاقے پبّی، تارو جبہ، چراٹ اور دیگر علاقوں کے مقامی رہائشی ان بھٹیوں سے خارچ ہونے والی آلودگی کے باعث مختلف امراض کا شکار ہیں۔

خیبرپختونخوا کے محکمۂ ماحولیات کے مطابق صوبے کی بھٹہ خشت فیکٹریوں کو جدید ٹیکنالوجی پر منتقل کرنے والے دو سالوں کے منصوبے کو مزید تین سال (کل پانچ سال) تک توسیع تو دی گئی، لیکن متعلقہ محکمے کی عدم دلچسپی کہیے یا درکار سٹاف کی کمی، یہ منصوبہ مقررہ اہداف فنڈز خرچ کرانے کے باوجود بھی حاصل نہیں کرسکا۔ ان کا خیال ہے کہ زگ زیگ ٹیکنالوجی اب تک نافذ العمل نہ ہونے میں جہاں محکمہ کی عدم دلچسپی شامل ہے تو وہی اینٹ بھٹیوں کے مالکان کا عدم تعاون بھی شامل ہے، اگر حکومت اور محکمہ اس ٹیکنالوجی کی اہمیت کو مدنظر رکھتے ہوئے سخت کارروائی کریں تو اس ٹیکنالوجی کو متعارف کروانا کوئی مشکل کام نہیں ہے۔

محکمۂ ماحولیات کی دستاویزات کے مطابق زگ زیگ ٹیکنالوجی متعارف کروانے سے ان فیکٹریوں میں کوئلے کے بطور ایندھن استعمال میں 40 فیصد کمی ہو گی، جس سے گرین ہاؤس گیسوں کا اخراج بھی تقریباً 50 فیصد تک کم ہو جائے گا۔ اس سے اینٹ مالکان کے نہ صرف خام مال کے اخراجات کم ہوں گے بلکہ ان کی پیدوار بھی بڑھ جائے گی، کیونکہ زگ زیگ ٹیکنالوجی کی مدد سے 90 فیصد محفوظ طریقے سے اینٹ نکالنا ممکن ہے جو روایتی طریقہ کار سے 20 سے 30 فیصد بہتر ہے۔

غیر رجسٹرڈ اینٹ کی بھٹیوں سے متعلق زگ زیگ ٹیکنالوجی کے پراجیکٹ منیجر انجنئیر فیضان نے بتایا کہ سٹاف کی کمی کے ساتھ بھٹیوں کے مالکان کی جانب سے نئی ٹیکنالوجی نصب کرنے میں تعاون نہ ملنے کے باعث اس منصوبے کو کامیابی سے نہیں چلایا جاسکا ہے اور یہی وجہ ہے کہ اس کے لئے پہلے مرحلے میں 10 بھٹیوں کو جدید ٹیکنالوجی پر منتقل نہیں کرایا جا سکا ہے۔

ان کے مطابق، اب رجسٹریشن نہ کرانے والی یا زگ زیگ ٹیکنالوجی لگانے سے انکار کرنے والی بھٹیوں کے خلاف کارروائی کی جا رہی ہے اور صوبے کے مختلف اضلاع میں 35 سے زائد اینٹ کی بھٹیوں کو ضلعی انتظامیہ کے تعاون کے ساتھ بند کیا گیا ہے۔

انجینئر فیضان کے مطابق خیبرپختونخوا انوارمینٹل پروٹیکشن ایکٹ 2014 کے سیکشن 17 کے تحت ان غیر رجسٹرڈ فیکٹریوں کے خلاف کارروائی کی جاتی ہے اور انہیں مجبور کیا جاتا ہے کہ وہ زگ زیگ ٹیکنالوجی لگا کر نہ صرف اپنے پیداوار میں اضافہ کریں بلکہ ماحولیاتی آلودگی بھی کم کریں۔

&quot;زگ زیگ ٹیکنالوجی کو سمجھنے کیلئے روایتی طریقے کے تحت کام کرنے والے مزدوروں کو جدید تربیت دی گئی اور اب تک 14 مزدوروں کو پنجاب میں ایک مہینے تک تربیت دی گئی، جس پر لاکھوں روپے خرچ کیے گئے ہیں۔

صوبے میں گاڑیوں سے خارچ ہونے والے دھویں کے بعد کارخانے اور اینٹ کی بھٹیاں فضائی آلودگی کی سب سے بڑی وجہ ہیں۔ اینٹ کی بھٹیوں سے خارج ہونے والی آلودگی سے متعلق چیئرمین شعبۂ ماحولیات، جامعہ پشاور پروفیسر ڈاکٹر نفیس کا کہنا تھا کہ 30 فیصد آلودگی کارخانوں اور اینٹ کی بھٹیوں سے خارج ہونے والے دھویں کے باعث ہے۔

زگ زیگ ٹیکنالوجی سے متعلق ان کا کہنا تھا کہ یہ بہت پرانی ٹیکنالوجی ہے، جو پہلی بار 1868 میں سوئٹرز لینڈ میں متعارف ہوئی، اس کے بعد 1970 میں ہندوستان میں بھی ایسی ٹیکنالوجی متعارف کرائی گئی۔ پاکستان میں یہ ٹیکنالوجی سال 2019 میں آئی لیکن اب بھی اس کا صحیح معنوں میں استعمال نہیں کیا جارہا ہے کیونکہ حکومت اور بھٹیوں کے مالکان کے درمیان اس ٹیکنالوجی کو لگانے پر اتفاق رائے نہیں ہوسکا ہے۔ ان کے مطابق ان بھٹیوں میں پرانے ٹائرز جلائے جاتے ہیں، جن کا دھواں نہایت مضر ہے، جس کیلئے جو بھی جدید ٹیکنالوجی استعمال کی جائے، وہ بے کار ہے۔

خیبرپختونخوا میں سرکاری سطح پر آلودگی کی جانچ کا کوئی مناسب بندوسبت نہیں، جبکہ طلبہ یا تحقیق کرنے والے افراد کے اکھٹے کیے گئے اعداد و شمار کے مطابق پشاور کی ہوا میں پی پی ایم 02 اور پی پی ایم 05 پارٹیکولیٹ میٹر موجود ہے، جو انتہائی خطرناک بات ہے۔

ڈاکٹر نفیس کہتے ہیں کہ ایک اینٹ کی بھٹی کو زگ زیگ پر منتقل کرنے کیلئے بھٹہ مالک کو 50 لاکھ روپے درکار ہوتے ہے، ان کے خیال میں شاید اسی وجہ سے یہ منصوبہ ناکامی سے دوچار ہے۔

ذیشان اعظم کاکاخیل

پشاور سے تعلق رکھنے والے ذیشان اعظم کاکاخیل 2015 سے صحافت کے شعبہ سے وابستہ ہیں۔ ذیشان اعظم گورننس اور سماجی مسائل پر رپورٹنگ کرتے ہیں۔

خیبر پختونخوا میں تاریخی ورثے کے تحفظ کا قانون کتنا مؤثر ہے؟

خیبرپختونخوا میں اینٹوں کے بھٹوں کی زگ زیگ ٹیکنالوجی پر منتقلی کا منصوبہ پانچ سال میں بھی اہداف حاصل نہ کر سکا