راجن پور کے حمزہ مغل کاشت کاری کرتے ہیں جہاں فاضل پور میں ان کی زرعی زمین ہے۔ ان کے والد بھی کھیتی باڑی میں ان کا ہاتھ بٹاتے ہیں۔ ایک روز وہ صبح سویرے موٹرسائیکل پر اپنی اراضی کی جانب جا رہے تھے کہ سڑک پر&nbsp; ایک گڑھے کی وجہ سے توازن کھو کر گر گئے۔ اس حادثے میں انہیں شدید چوٹیں آئیں جن سے وہ جانبر نہ ہو سکے۔

حمزہ بتاتے ہیں کہ جس سڑک پر ان کے والد سفر کر رہے تھے اس پر ایسے واقعات رونما ہوتے رہتے ہیں۔ کئی قیمتی جانیں اس سڑک کی نذر ہو چکی ہیں۔ کئی لوگ شدید زخمی ہوئے اور عمر بھر کے لیے معذور ہو گئے۔

یہ راجن پور کے علاقے فاضل پور سے ٹبی لُنڈان تک جانے والی 53 کلومیٹر طویل سڑک ہے جو فاضل پور، حاجی پور، میراں پور اور لال گڑھ سمیت 37 دیہاتوں کو آپس&nbsp; میں ملاتی ہے اور ان علاقوں کے لوگوں کی آمد و رفت کا واحد راستہ ہے۔

اس سڑک کو 2004ء میں 37 کروڑ روپے کی لاگت سے تعمیر کیا گیا۔ اس کی حالت انتہائی خستہ ہونے پر 2017ء میں اس وقت کی حکومت کی جانب سے ترقیاتی پروگرام کے تحت اسے 25 کروڑ روپے کی لاگت سے دوبارہ بنایا گیا تاہم یہ پائیدار ثابت نہ ہوئی اور ابتدا ہی میں سڑک کی بالائی سطح اکھڑ گئی اور اندر سے پتھر باہر نکل آئے۔

گزشتہ برس کے سیلاب نے اس سڑک کی حالت مزید بگاڑ دی اور اس میں کئی کئی فٹ گہرے گڑھے پڑ گئے اور سڑک پر تعمیر کی گئی اکثر پُلیاں زمین بوس ہو گئیں۔ خطرناک حادثات کے باعث اب اسے خونی سڑک کے نام سے بھی پکارا جاتا ہے۔

ریسکیو 1122 کے مطابق گزشتہ تین برس کے دوران اس سڑک پر 58 کاریں، 99 رکشے، تین بسیں، سات ٹریکٹر اور 219 موٹر سائیکل حادثات کا شکار ہوئے۔ یوں مجموعی طور پر 386حادثات ہوئے جن میں 319 افراد موت کے منہ میں چلے گئے اور 862 شدید زخمی ہوئے۔

اس حوالے سے لنڈی سیدان کے رہائشی نجم عرف نجو نے بتایا کہ وہ کاروبار کے لیے روزانہ اس سڑک پر سفر کرتے ہیں۔ یہ سڑک تباہ ہو چکی ہے اور اس پر سفر کرنا انتہائی دشوار ہے۔ رات کے وقت تو بس دعائیں مانگتے ہوئے سفر کرتے ہیں۔

&quot;اگر بارش ہو تو جگہ جگہ پانی جمع ہو جاتا ہے۔ کہیں کئی کئی فٹ گہرا پانی، کہیں کیچڑ، کہیں ٹوٹی ہوئی پُلیاں اور کہیں نہروں کی طرح بہتا ہوا پانی ملتا ہے۔ اس لیے جب بھی بارش ہوتی ہے ہم تین چار دن کے لیے گھروں میں محصور ہو جاتے ہیں جس سے روزی روٹی کا حصول اور دیگر معمولات زندگی ٹھپ ہو کر رہ جاتے ہیں۔&quot;

لال گڑھ کے رہائشی محمد طارق کا کہنا ہے کہ سڑک تباہ حال ہونے کی وجہ سے ایک سے دوسرے شہر جانا انتہائی دشوار ہے۔ رات کے وقت کوئی ایمرجنسی بھی ہو جائے تو مریض کو شہر کے ہسپتال تک نہیں لے جایا جا سکتا۔ سڑک پر رات کو پبلک ٹرانسپورٹ بھی نہیں ملتی۔ کاروبار تو دوبارہ بحال ہو سکتا ہے لیکن انسانی زندگیوں کا کوئی متبادل نہیں۔

مقامی شہری اکرم حجانہ کے مطابق اس سڑک پر دو پل میراں پور والی پل اور قطب کینال پل بہت خطرناک ہیں۔ ان سے گزرنا کسی خطرے سے کم نہیں۔ اس کی تعمیر کے لیے درخواستیں بھی دی گئیں لیکن ان پر کوئی عمل نہیں ہوا۔ علاقہ مکین صفدر مغل نے بتایا کہ اس حوالے سے محکمہ اینٹی کرپشن اور ڈپٹی کمشنر آفس کو متعدد درخواستیں دی گئیں لیکن کوئی شنوائی نہیں ہوئی۔

ڈپٹی کمشنر آفس سے رابطہ کیا گیا تو وہاں موجود ایک سرکاری افسر فیاض نے کہا کہ گزشتہ برس اس سڑک کی تعمیر شروع ہونے کو تھی کہ سیلاب نے تباہی مچا دی۔ پھر یہ منصوبہ اچانک ختم کرنا پڑا اور اس کی رقم سیلاب متاثرین کے فنڈ میں استعمال ہو گئی۔

ان کاکہنا تھا کہ فی الوقت اس سڑک کی تعمیر کے لیے فنڈز نہیں ہیں۔ حکام بالا سے فنڈز کے دوبارہ اجرا کے لیے کہا گیا ہے اور جیسے ہی مالی وسائل دستیاب ہوں گے تو اس کی تعمیرومرمت کا کام شروع کر دیا جائے گا۔

'انہی پتھروں پہ چل کر اگر آ سکو تو آؤ' سیالکوٹ کی سڑکوں پر سفر موت کا کھیل بن گیا

راجن پور کی 'خونی سڑک' پر تین سال میں 319 ہلاکتیں، 53 کلومیٹر کا راستہ موت کا سفر بن گیا

text

راجن پور کے قصبے فاضل پور کے دیہی مرکز صحت میں پرچی کے نظام کو جدید بنا دیا گیا ہے اور اب مریضوں کو آن لائن رجسٹر ہونے کے بعد ٹوکن دیا جاتا ہے۔ اس طرح مریضوں کو قدرے سہولت میسر آئی ہے لیکن انہیں دی جانے&nbsp; والی ادویات میں بڑے پیمانے پر کمی کر دی گئی ہے جس کے باعث یہاں آنے والے ایسے مریضوں کو پریشانی کا سامنا ہے جو مارکیٹ سے مہنگے داموں ادویات نہیں خرید سکتے۔

ریکارڈ کے مطابق گزشتہ تین سال کے دوران یہاں 63 ہزار 252 مریضوں کا علاج کیا جا چکا ہے۔ روزانہ 50 سے 70 افراد کو علاج کے لیے ٹوکن جاری کیے جاتے ہیں۔

مرکز صحت میں ادویات کی قلت کے معاملے پر وہاں تعینات ایک کلرک کا کہنا ہے کہ پہلے یہاں ادویات کا ٹرک بھیجا جاتا تھا جن سے 70 فیصد مریض سہولت یاب ہوتے تھے لیکن اب عملے کو ہدایت ہے کہ ایک دن میں مریضوں کو صرف 30 ادویات جاری کرنا ہیں۔ ان میں پیناڈول، بروفن سیرپ، فلیجل گولیاں اور میتھی کوبال وغیرہ خاص طور پر قابل ذکر ہیں۔

ان کا کہنا ہے کہ ایک سال پہلے تک ہسپتال میں ہر ماہ ادویات کے ٓ40 کارٹن آتے تھے جبکہ اب ماہانہ صرف 15 کارٹن آتے ہیں۔

راجن پور کا شمار پنجاب کے پسماندہ ترین اضلاع میں ہوتا ہے۔ یہاں کے سماجی کارکن ابرار خان دریشک کہتے ہیں کہ مہنگائی کی لہر نے فاضل پور جیسے پسماندہ علاقوں کو سب سے زیادہ متاثر کیا ہے۔ اب یہاں لوگوں کی بڑی تعدادیا تو اپنا پیٹ پال سکتی ہے یا علاج معالجہ کروا سکتی ہے۔

حاجی پور کی 55 سالہ شرماں بی بی اس مرکز صحت میں علاج کے لیے آئی ہیں اور کہتی ہیں کہ یوں لگتا ہے ڈاکٹر ہم سے تنگ ہیں۔&nbsp; ہم جب ہسپتال آتے ہیں تو کوئی توجہ نہیں دی جاتی۔

&quot;میں صبح سے طویل سفر کر کے یہاں آئی ہوں۔ پرچی ملنے اور قطار میں لگنے کے بعد ڈاکٹرنے چیک اپ کیا اوروہ دوائی لکھ دی جو ہسپتال نہیں بلکہ بازار سے ملے گی۔ اب میں مایوس ہو کر گھر جا رہی ہوں۔&quot;

جوڑوں کے درد کا علاج کرانے کے لیے آنے والی ملوک بی بی نے بتایا کہ مرکز میں انہیں صرف پیناڈول دی گئی ہے اور جوڑوں کے درد کے لیے ڈکلوران جیل اور گولیاں باہر میڈیکل سٹور سے خریدنے کے لیے لکھ دی ہیں۔ وہ اتنی مہنگی ادویات خریدنے کی استطاعت نہیں رکھتیں۔ پہلے یہ دوائیں انہیں مرکز صحت&nbsp; سے مل جاتی تھیں اور ڈاکٹر تسلی سے چیک بھی کرتے تھے لیکن اب حالات بہت خراب ہیں۔

40 سالہ شاہدہ بی بی جلد پر شدید خارش اور آنکھوں کی الرجی کا شکار ہیں اور وہ مفت دوا لینے کی آس میں مرکز صحت آئی ہیں۔

انہوں نے بتایا کہ ڈاکٹر نے پرچی پر ادویات لکھ دی ہیں۔ مرکز صحت سے پینا ڈول کی دو گولیاں ملی ہیں اور ڈاکٹر نے کہا ہے کہ الرجی لوشن اور آنکھوں کے ڈراپس انہیں باہر سے خریدنا ہوں گے۔

شاہدہ کے مطابق وہ پہلے آٹھ اگست کو ہسپتال آئیں، دوا نہ ملنے پر 16 اگست کو دوبارہ آئیں اور اس امید پر تیسری مرتبہ آئیں کہ انہیں دوا یہاں سے مل جائے گی مگر دو گولیوں کے سوا کچھ نہ ملا۔

&quot;یہاں ہر بیماری کاعلاج دو گولی پیناڈول ہے۔خون کے&nbsp; ٹیسٹ اور ایکسرے کی سہولت بھی نہیں، ہم جائیں تو کہاں جائیں۔&quot;

مرکز صحت کے سینئر میڈیکل آفیسر (ایس ایم او) ڈاکٹر قاسم مستوئی نے دعویٰ کیا کہ ادویات موجود ہیں اور لوگوں کو فراہم بھی کی جا رہی ہیں۔ جب شاہدہ بی بی نے ان کے سامنے بتایا کہ الرجی لوشن نہیں ملا تو ڈاکٹر قاسم نے کہا کہ وہ ختم ہو گیا ہے۔ انہوں نے کہا کہ وہ کوشش میں ہیں کہ ہسپتال کے نظام کو بہتر بنایا جائے اور لوگوں کو ہر طرح کی ادویات مہیا کی جائیں۔

چیف ایگزیکٹو آفیسر (سی ای او) محمد ارشد خان اور ایس ایم او کے مطابق اب صوبائی ہیڈکوارٹر سے پیناڈول، بروفن، ہائیڈرلن سیرپ اور فلیجل کے علاوہ کچھ اینٹی بائیوٹیکس، سرنجیں اور ڈرپس ہی آتی ہیں جبکہ ایک سال قبل کم و بیش تمام ضروری دوائیں فراہم کی جاتی تھیں۔ 
ایس ایم او نے ادویات کی فراہمی سے متعلق کوئی بھی دستاویز دکھانے سے یہ کہتے ہوئے انکار کر دیا کہ انہیں افسران بالا کی جانب سے اجازت نہیں ہے۔

اسی حوالے سے سی ای او ڈسٹرکٹ ہیڈکوارٹر ہسپتال راجن پور ڈاکٹر محمد راشد نے ٹیلی فونک رابطے پر بتایا کہ موجودہ معاشی بحران کی وجہ سے پنجاب حکومت کے پاس کوٹہ کم پڑ گیا ہے جس کے نتیجے میں ادویات کی فراہمی بھی کم کر دی گئی ہے لیکن اب اس نظام کو بہتر کیا جا رہا ہے۔ ادویات کی قلت جلد ختم ہو جائے گی۔

ضلع قلعہ عبداللہ: 'میری اہلیہ کو لیڈی ڈاکٹر میسر آتی تو اس کی جان بچ سکتی تھی'

راجن پور کے دیہی مراکز صحت، جہاں ہر بیماری کا علاج پینا ڈول کی دو گولیاں ہیں

مغرب میں کوہ سلیمان سے بارشوں کا پانی بڑی مقدار میں بہہ کر آئے یا مشرق میں دریائے سندھ میں طغیانی ہو، دونوں صورتوں میں راجن پور کی تحصیل روجھان میں سیلاب کا خطرہ پیدا ہو جاتا ہے۔ حالیہ دنوں میں بھی یہی کچھ ہوا جب دونوں اطراف سے آنے والے سیلاب پانی نے اس تحصیل میں تباہی مچا دی۔

کوہ سلیمان پر 27 جولائی کو ہونے والی شدید بارشوں سے رودکوہی کے سیلاب نے روجھان کی متعدد بستیوں کو ڈبو دیا۔ اس سے&nbsp; موضع کُن، واہ بمبلی اور واہ چک خاص طور پر متاثر ہوئے۔

موضع کُن میں میں سڑک زیر آب آنے سے علاقہ مکینوں کی آمد و رفت تقریباً معطل ہو گئی۔ ان مواضعات کے بہت سے لوگوں کو جان بچانے کے لیے اپنی مدد آپ کے تحت راجن پور شہر اور دیگر محفوظ مقامات پر منتقل ہونا پڑا۔

اس سیلاب میں 12سالہ شمیم بی بی، 14 سالہ نسرین اور 24 سالہ بلاول عباس جاں بحق ہو گئے۔ شمیم بی بی کے والد اللہ دتہ نے بتایا کہ سیلاب اچانک آیا اور اس سے نکلنے کی کوشش میں جب وہ اپنی اہلیہ اور بیٹی کا ہاتھ پکڑ کر باہر جانے لگے تو پانی کا دباؤ زیادہ ہونے سے ان کی بیٹی کا ہاتھ چھوٹ گیا اور وہ پانی میں بہہ گئیں۔

انہوں نے بتایا کہ کئی روز تلاش بسیار کے بعد اس کی لاش ملی۔

&nbsp;24 سالہ بلاول عباس کے گھر والوں کا کہنا ہے کہ وہ اپنی 14 سالہ بھانجی نسرین کو بچانے کوشش کر رہے تھے کہ تیز سیلابی پانی دونوں کو بہا لے گیا۔ دونوں کی لاشیں قریبی گاؤں سے ملیں۔

سات اگست کو دریائے سندھ کے پانی نے ہیرو بند میں شگاف ڈالا۔ وقت کے ساتھ اس شگاف کی چوڑائی بڑھتی رہی اور کئی سو فٹ تک جا پہنچی۔ اس کے بعد قریبی بستیوں میں پانی گھس آیا۔

بند ٹوٹنے سے موضع ہیرو، اعظم گڑھ اور موضع برخوردار&nbsp; کے سیکڑوں مکین بے گھر ہوئے۔ ان کی فصلیں تباہ ہو گئیں اور مال مویشی ہو گئے۔

سیلاب سے متاثرہ بستی گوپانگ کے رہائشی عارف گوپانگ نے بتایا کہ بند ان کے گھر کے قریب ہے جو دریا میں پانی کے تیز بہاؤ سے ٹوٹ گیا۔ اس سے ان کا گھر اور فصلیں ڈوب گئیں۔ موضع ہیرو کے طالب احمد کا کہنا ہے کہ سیلاب میں ان کا گھر بھی بہہ گیا اور کپاس کی فصل زیرآب آ گئی۔ 
دریائے سندھ میں معمول سے زیادہ پانی آنے سے تحصیل روجھان کے مواضعات مندری، چک اڑیا، ڈیرہ دلدار اور ڈیرہ جیون کے بھی زیر آب آئے۔ ان علاقوں کے لوگوں کو بھی اپنی مدد آپ کے تحت محفوظ مقامات پر منتقل ہونا پڑا۔ یہاں بڑی تعداد میں کچے مکانات گر گئے اور ہزاروں ایکڑ پر کھڑی کپاس اور مونگ کی فصلیں تباہ ہوئیں۔

&nbsp;موضع ڈیرہ دلدار کے مکین پیر بخش نے بتایا کہ وہ دو سال سے کپاس کی فصل اگا رہے ہیں لیکن یہ سیلاب کی نذر ہو جاتی ہے۔

راجن پور کے ڈپٹی کمشنر ڈاکٹر منصور احمد بلوچ اور ڈسٹرکٹ پولیس آفیسر کیپٹن (ر) دوست محمد نے سیلاب کی صورت حال کا جائزہ لیا۔ علاقے میں ریسکیو اہلکار تعینات کیے گئے۔ ریسکیو گاڑیاں اور فرسٹ ایڈ کا سامان بھی پہنچایا گیا۔ پولیس اور سول ڈیفنس اہلکاروں کو بھی ذمہ داریاں سونپی گئیں اور سیلاب متاثرین کے لیے بوائز ہائر سیکنڈری سکول کوٹلہ مغلاں جام پور میں فلڈ ریلیف کیمپ قائم کیا گیا۔

2010ء میں دریائے سندھ اور رودکوہیوں دونوں میں اونچے درجے کے سیلاب سے اس تحصیل کا 71 فیصد علاقہ متاثر ہوا تھا۔ 2022ء میں سیلاب نے ایک بار پھر 2010ء کی طرح تباہی مچائی۔

قدرتی آفات سے نمٹنے کے ادارے پی ڈی ایم اے کی رپورٹ کے مطابق&nbsp; روجھان کو زیادہ تر درہ کاہ اور درہ چھاچھڑ سے آنے&nbsp; والے سیلاب متاثر کرتے ہیں۔ مغرب میں واقع کوہ سلیمان سے آنے والا پانی کاہ اور چھاچھڑ رودکوہیوں میں کئی کلومیٹر سفر کے بعد دریائے&nbsp; سندھ میں گرتا ہے۔ پانی زیادہ ہونے کی صورت میں یہ اردگرد کے میدانی علاقوں میں پھیل جاتا ہے۔

درہ کاہ سے گزرتے ہوئے سیلابی پانی ٹبی لنڈان اور پھر روجھان میں داخل ہوتا ہے جبکہ درہ چھاچھڑ کا پانی براستہ بندھو والی ٹاور چوک روجھان کی طرف آتا ہے۔

روجھان شہر کو رود کوہی کے سیلاب سے بچانے کے لیے سوا بارہ کلومیٹر طویل بند موجود ہے لیکن یہ بند اسے بچانے میں ہمیشہ کامیاب نہیں ہوا۔

انچارج سول ڈیفنس فیاض نے بتایا کہ رود کوہی کے سیلاب سے متاثر ہونے والوں کو محفوظ مقامات پر منتقل کرنے کے لیے کشتیاں چلائی گئیں اور میڈیکل کیمپ قائم کیے گئے جن میں سانپ کے کاٹے کی ویکسین بھی موجود رہی۔

سماجی کارکن خضرخان مزاری تحصیل روجھان کی پسماندگی کی بڑی وجہ بار بار آنے والے سیلاب کو سمجھتے ہیں۔ انہوں نے بتایا کہ لوگوں کی محنت پر سیلاب نے ایک مرتبہ پھر پانی پھیر دیا ہے۔

ان کا کہنا ہے کہ جب تک روجھان کو سیلاب سے بچانے کا کوئی مستقل حل نہیں نکالا جاتا اس وقت تک یہ علاقہ غربت اور پسماندگی سے بھی نہیں نکلے گا۔

عمیراختر

عمیراختر کا تعلق راجن پور سے ہے۔ عمیراخترگزشتہ چند برسوں سے سوشل میڈیا پراردو بلاگ بھی لکھ رہے ہیں۔

راجن پور کی 'خونی سڑک' پر تین سال میں 319 ہلاکتیں، 53 کلومیٹر کا راستہ موت کا سفر بن گیا

راجن پور کے دیہی مراکز صحت، جہاں ہر بیماری کا علاج پینا ڈول کی دو گولیاں ہیں

روجھان پر پانی کا دوطرفہ حملہ: 'لوگوں کو غربت اور پسماندگی سے بچانے کے لیے شہر کو سیلاب سے بچانا ہو گا'