محمد زبیر اپنی آرا مشین پر لکڑی کی کٹائی (چیرائی) میں مصروف ہیں جو باجوڑ کے ڈسٹرکٹ ہیڈکوراٹر خار کی ترکھان مارکیٹ میں واقع ہے۔ آج ہفتے کا روز ہے انہیں بہت سا کام نپٹانا ہے۔ وہ تیزی سے کام کر رہے ہیں کیونکہ دن کے 11 بج رہے ہیں اور چار بجتے ہی بجلی چلی جائے گی۔

&nbsp;خار بازار میں ٹیسکو (ٹرائبل الیکٹرک سپلائی کمپنی) کے میٹرز کی تنصیب کا سسٹم نہیں ہے۔ یہاں صبح آٹھ سے شام چار بجے تک بجلی فراہم کی جاتی ہے اور کمپنی کے ٹھیکیدار ہر دکان دار سے ان کے کام کے نوعیت کے مطابق 350 سے 1200 روپے روزانہ کے حساب سے بل وصول کرتے ہیں۔

محمد زبیر بجلی کے بھاری بل، سپلائی کے کم دورانیے اور طویل لوڈشیدنگ سے تنگ ہیں۔

وہ بتاتے ہیں کہ انہیں ٹیسکو کے ٹھیکیدار کو ہر ماہ 25ہزار سے 28 ہزار روپے بطور فکسڈ بل جمع کرانے پڑتے ہیں۔ ورکشاپ کا کرایہ، کاریگروں کی تنخواہیں دیگر اخراجات علاوہ ہیں۔ ہفتے میں ایک چھٹی ہوتی ہے۔

&nbsp;بعض اوقات مرمت یا کسی دوسری وجہ سے بجلی بند ہوتی ہے تو پورا دن خسارے کا ہوتا ہے۔ ایسے میں اتنا بل ناقابل برداشت ہو رہا ہے۔

صرف محمد زبیر ہی نہیں یہاں کام کرنے والے 210 آرا مشینوں، فرنیچر ورکشاپس کے مالکان، دکان دار اور سیکڑوں کاریگر بھی پریشان ہیں۔

عبدالحکیم جان قریبی مارکیٹ میں 20 سال سے خراد کا کام کر رہے ہیں۔ انہوں نے مشین کے لیے 500 روپے روزانہ پر بجلی کنکشن لگوا رکھا ہے لیکن انہیں بھی اکثر جنریٹر استعمال کرنا پڑتا ہے۔

&quot;حکومت نے برسوں پہلے یہاں منی سولر گرڈ منصوبہ شروع کیا تھا وہ مکمل ہو جاتا تو ہمیں اس بے اعتباری بجلی اور جنریٹر کے دوگنا خرچے سے نجات مل سکتی تھی۔&quot;

<h3>13 لاکھ لوگوں کے لیے ایک چھوٹا سا گرڈ گھروں، بازاروں کو تین گھنٹے بجلی ملتی ہے</h3>

ضلع باجوڑ کی آبادی لگ بھگ 13 لاکھ نفوس &nbsp;پر مشتمل ہے جہاں واپڈا کا صرف ایک 132 کے وی گرڈ قائم ہے۔ ڈسٹرکٹ ہیڈکورٹر خار کی 15 ہزار آبادی اور نواح کو 67 میگا واٹ بجلی مل رہی ہے جس میں ایک ایکسپریس لائن بھی شامل ہے جو میٹر والے کمرشل اداروں کو یونٹس کی بنیاد پر 23 گھنٹے بجلی فراہم کرتی ہے۔

تاہم رہائشی علاقوں، بازاروں والے فیڈرز کو میٹرز نہ ہونے کی وجہ سے باری باری تین تین گھنٹے سپلائی دی جاتی ہے۔

خار ضلع باجوڑ کا سب سے بڑا تجارتی مرکز ہے جہاں تاجر یونین کے مطابق ساڑھے تین ہزار دکانیں ہیں۔ ان میں دودھ فروش سے پرنٹنگ پریس مالکان تک تقریباً ایک ہزار 200 سو لوگ ایسے ہیں جن کا کاروبار بجلی کے بغیر نہیں ہو سکتا۔

اس صورت حال کے پیش نظر پختونخوا انرجی ڈیویلپمنٹ آرگنائزیشن (پیڈو) نے خار میں عادل چوک کے مقام پر چار سال قبل منی سولر گرڈ کا منصوبہ شروع کیا تاکہ کاروباری افراد کو رعایتی نرخوں پر بلا تعطل بجلی فراہم کی جا سکے۔

مذکورہ آف گرڈ 175 کے وی پراجیکٹ کے لیے 10کنال زمین پر 580 واٹ کے 324 سولر پینل نصب کیے گئے۔ حفاظتی دیوار کی تعمیر بھی مکمل ہے لیکن ابھی تک یہاں سے بجلی کی ترسیل شروع نہیں ہوسکی۔

پراجیکٹ ڈائریکٹر اسفندیار خٹک بتاتے ہیں کہ باجوڑ سولر گرڈ بھی نو منی گرڈز کا حصہ ہے جو ضم شدہ اضلاع میں لگائے جا رہے ہیں۔ ان پر 2019ء میں کام شروع کیا تھا اور ان کے لیے ساڑھے 57 کروڑ روپے مختص کیے گئے تھے۔

ان تمام گرڈز کو جون 2024ء میں مکمل ہونا تھا لیکن فنڈز بروقت جاری نہ ہونے اور کووڈ کے باعث کام روکنا پڑا۔

<h3>باجوڑ سولر گرڈ 70 فیصد مکمل ہو چکا لیکن&nbsp;اب بارش میں ڈوبنے کے خطرے سے دوچار ہے</h3>

پیڈو کے اسسٹنٹ ڈائریکٹر ذوالفقار احمد منی سولر گرڈز پراجیکٹ کے نگران ہیں۔ وہ تصدیق کرتے ہیں کہ ضم شدہ اضلاع کے نو منی گرڈز میں سے صرف مہمند منی گرڈ ہی فعال ہو سکا ہے۔ خیبر منی گرڈ تکمیل کے آخری مراحل میں ہے جس کی بعد باجوڑ میں کام دوبارہ شروع ہوگا۔

منی سولر گرڈ اور خار بازار کے درمیان ایک کلو میٹر کا فاصلہ ہے جس کے لیے ٹرانسمشن لائن بچھائی جانی تھی۔ ذوالفقار احمد کے بقول کمیونٹی نے اپنے گھروں کے ساتھ لائن گزارنے کی اجازت نہیں دی جس سے یہ منصوبہ تاخیر کا شکار ہوا۔ تاہم اب یہ لائن دوسرے راستے سے گزاری جائے گی جہاں کسی کو اعتراض نہیں۔ ممکن ہے اس منصوبے میں التوا کی وجہ ٹرانسمشن لائن بھی رہی ہو مگر کچھ تکنیکی مسائل بھی سامنے آئے ہیں۔

اسسٹنٹ ڈائریکٹر پیڈو (الیکٹریکل) محمد نعمان بتاتے ہیں کہ دیگر منصوبوں کی طرح باجوڑ سولر گرڈ کا تخمینہ بھی چار کروڑ روپے تھا جو حکومت سالانہ ترقیاتی پروگرام سے دے رہی ہے۔ گرڈ کا مجموعی طور پر 70 فیصد کام مکمل ہو چکا ہے صرف لائین بچھانے کا کام باقی ہے۔

تاہم جب خار بائی پاس روڈ بنی تو سولر گرڈ بہت نیچے رہ گیا اور یہاں سے بارش کا پانی نہیں نکل رہا یعنی گرڈ کسی بھی وقت بارش میں ڈوب سکتا ہے۔

پیڈو حکام کے مطابق اب نصب شدہ پینلز کو اکھاڑ کر پہلے بھرائی کرنا ہو گی اور پھر انہیں دوبارہ نصب کیا جائے گا۔ اس کام کے لیے مزید فنڈز کی ضرورت ہو گی جس کی منظوری لینا ابھی باقی ہے۔

<h3>منی سولر گرڈ سے کاروباری افراد کو 16 روپے یونٹ بجلی ملے گی</h3>

ذوالفقار احمد بتاتے ہیں کہ سولر منی گرڈ کو کمیونٹی بیس آرگنائزیشن (سی بی او) کے حوالے کیا جائے گا جو اس کو چلائے گی اور کاروباری افراد کو واپڈا کمرشل ریٹ سے بہت کم نرخ یعنی تقریباً 16 روپے یونٹ بجلی دے گی۔

سی بی او کمیٹی میں باجوڑ کا ایڈیشنل ڈپٹی کمشنر، اسسٹنٹ کمشنر، تاجر برادری کا صدر اور جنرل سیکر ٹری شامل ہوں گے۔ منی گرڈ سے ہونے والی آمدنی اس کے آپریشنل اخراجات (مینٹنینس اور سٹاف کی تنخواہوں) پر خرچ ہوگی۔ پہلے دو سال متعلقہ کمپنی ہی گرڈ کی مینٹنینس کی ذمہ دار ہو گی۔

صدر تاجر یونین واجد علی شاہ کہتے ہیں کہ انہوں نے جب سے عہدہ سنبھالا ہے دوسرے مسائل اتنے تھے کہ سولر گرڈ کی طرف توجہ کی فرصت ہی نہیں ملی۔ انہیں نہیں معلوم کہ یہ گرڈ کہاں لگایا جا رہا ہے اور اس سے کاروباری افراد کو کیا فوائد ملیں گے۔

تاہم سابق صدر حاجی امیر رحمٰن بتاتے ہیں کہ انہوں نے پچھلے سال گرڈ کو فعال کرانے کی بہت کوششیں کیں لیکن ٹرانسمشن لائن کا روٹ مسئلہ بنا ہوا تھا۔

&quot;ہم نے اس کا حل نکالنے کے لیے منی گرڈ کے ذمہ داران اور افسران سے تین ملاقاتیں کیں مگر مقامی انتظامیہ اور پیڈو حکام نے کوئی اجلاس نہیں بلایا۔ اس تاخیر سے کاروباری افراد کئی مشکلات میں گھرے ہوئے ہیں۔&quot;

عمر رسیدہ ٹرک باڈی میکر نعمت اللہ بتاتے ہیں کہ خار میں برسوں پہلے بلاتعطل فری بجلی دستیاب ہوتی تھی لیکن پھر ٹھیکیدار آ گئے اور بجلی مہنگی ہو گئی۔ اب انہیں جنریٹر وارے نہیں کھاتا اور سولر پینلز لگانے کے پیسے نہیں ہیں۔

&quot;طویل لوڈ شیڈنگ کے باعث ہمیں معمولی ٹانکہ (ویلڈنگ سے) لگانے کے لیے بعض اوقات گھنٹوں انتظار کرنا پڑتا ہے۔ حکومت گرڈ منصوبہ جلد فعال کام کرے تاکہ مشکلات کم ہوں۔&quot;

<h3>انتظار نہ بل، جس نے پہلے ہی اپنا&nbsp;سولر سسٹم لگا لیا وہ فائدے میں رہا</h3>

خار بازار کے ٹیلر ماسٹر سبز علی خان ان خوش نصیبوں میں سے ایک ہیں جنہوں نے تین سال قبل اپنی دکان پر سولر پینلز لگا لیے تھے۔ وہ بتاتے ہیں کہ پہلے وہ واپڈا کی بجلی پر کام کرتے تھے لیکن طویل لوڈ شیڈنگ اور زیادہ بل نے سولر سسٹم لگانے پر مجبور کر دیا۔

مجھے سولر کا بہت فائدہ ہوا۔ میرے آٹھ کاریگر صبح آٹھ بجے سے شام پانچ بجے تک بلاتعطل کام کرتے ہیں۔ جو کاریگر پہلے دو جوڑے تیار کرتا تھا وہ اب چار کر لیتا ہے جس سے نہ صرف کام بروقت ہو جاتا ہے بلکہ گاہکوں میں اِضافہ بھی ہوا ہے۔&quot;

وہ کہتے ہیں کہ انہوں نے سولر سسٹم پر ڈھائی لاکھ روپے خرچ کیے جس میں آٹھ پینلز اور ایک انورٹر شامل ہیں ۔ اس سے آٹھ سلائی مشینیں اور دو استریاں آسانی سے چلتی ہیں۔ اس وقت پینل مہنگے تھے مگر اب تو وہ بھی سستے ہو گئے ہیں۔

&quot;میری بجلی کے ہر ماہ بھاری بل اور جنریٹر پر ہزاروں روپے خرچ سے جان چھوٹ گئی ہے جو ہماری استطاعت سے باہر ہو گیا تھا۔&quot;

باجوڑ کے رہائشی ریسرچر اور سولر انرجی پر کام کرنے والے وقاص احمد کہتے ہیں موسمیاتی تبدیلیوں کے باعث رواں سال بھی یہاں کلاؤڈبرسٹ کے واقعات اور سیلابوں کی وجہ سے بڑے پیمانے پر جانی و مالی نقصانات ہوئے۔

&quot;دنیا بھر میں لوگ ماحول دوست انرجی اپنا رہے ہیں، بڑے بڑے سولر پارکس بن رہے ہیں۔ بدقسمتی سے ہمارے قبائلی اضلاع میں اس پر توجہ نہیں دی جا رہی۔ باجوڑ منی گرڈ سمیت تمام سولر منصوبے جلد مکمل ہونے چاہیئیں جن سے سستی بجلی میسر ہوگی اور ماحول پر منفی اثر بھی نہیں ہو گا۔&quot;

باجوڑ کا منی سولر گرڈ، چار سال بعد بھی فعال نہ ہو سکا، اب پینلز اکھاڑنا پڑیں گے

text

Explore how climate change impacts bees and the economic lives of women in Khyber Pakhtunkhwa. Understand how these changes affect women's livelihoods and daily lives in the region.

The Relationship Between Climate Change and Bees in the Economic Lives of Women in Khyber Pakhtunkhwa

پچاس سالہ شاہی مندروز بی بی، باجوڑ کے ضلعی ہیڈکوارٹر خار سے 26 کلومیٹر دور واقع گاؤں گیلے کی رہائشی ہیں جو 20 سال سے گھر میں مگس بانی کر رہی ہیں۔ انہوں نے شہد کی مکھیاں پالنے کا کام اپنی ساس سے سیکھا تھا۔

وہ بتاتی ہیں کہ پچھلے سال تک اس کاروبار سے انہیں اچھی آمدنی ہوتی رہی&nbsp; وہ سال میں دو مرتبہ شہد فروخت کرتی تھیں اور آسانی سے گھر چلا لیتی تھیں۔ لیکن اب شہد کی مکھیوں نے ان کے مٹکوں کا رخ کرنا چھوڑ دیا ہے۔

&rsquo;&rsquo;میں نے گھر میں چار مٹکے لگا رکھے ہیں جن سے سال میں دو مرتبہ 10کلو سے زائد شہد حاصل ہوتا تھا۔ یوں مجھے چار ہزار روپے فی کلو کے حساب سے تقریباً ایک لاکھ روپے آمدنی ہو جاتی تھی لیکن اب ان مٹکوں میں مکھیاں نہیں آتیں اور اگر آتی ہیں تو کچھ ہی دنوں میں مر جاتی ہیں۔&quot;

وہ کہتی ہیں کہ مگس بانی کی آمدنی پوری طرح ختم ہو چکی ہے اور اب گزارہ صرف مردوں کی محنت مزدوری پر چل رہا ہے۔ اسی وجہ سے وہ اپنے 14 سالہ بیٹے کی تعلیم جاری نہیں رکھ پائیں اور وہ مزدوری کے لیے کشمیر چلے گئے ہیں۔

ایسا صرف شاہی مندروز بی بی کے ساتھ نہیں ہوا بلکہ موسمیاتی تبدیلیوں کے باعث اس گاؤں میں شہد کی مکھیوں کے لیے رکھے تمام مٹکے خالی پڑے ہیں۔

باجوڑ کے پہاڑی علاقوں کے اکثر مرد مزدوری اور خواتین گھروں میں روایتی طریقوں سے شہد کی مکھیاں پالتی ہیں۔ تین لاکھ فراد پر مشتمل تحصیل ماموند میں بھی یہی صورت حال ہے جہاں بیشتر خاندانوں کی روزی روٹی کا واحد ذریعہ مگس بانی ہے۔

گیلے گاؤں میں 200 گھرانے آباد ہیں۔ مقامی کونسلر کے مطابق موسمیاتی تبدیلیوں کی وجہ سے صرف اسی یونین کونسل میں پانچ سو سے زائد خواتین کا روزگار ختم ہو کر رہ گیا ہے۔ جس سے ان گھروں میں دو وقت کی روٹی کے لالے پڑ چکے ہیں۔

<a href="https://www.pbc.org.pk/wp-content/uploads/Potential-of-Honey-in-Pakistan-An-Analysis-of-the-Global-and-Domestic-Market.pdf">پاکستان بزنس کونسل کے مطابق ملک میں سالانہ تقریباً 15ہزار ٹن خالص شہد پیدا ہوتا ہے جس کا تقریباً 25 فیصد ہی برآمد ہو پاتا ہے۔</a>

مئی 2022ء میں جاری کردہ بزنس کونسل کی ریسرچ رپورٹ&nbsp; بتاتی ہے کہ شہد کی عالمی مارکیٹ کا حجم 7.84 ارب امریکی ڈالر ہے۔دنیا میں سب سے زیادہ خالص شہد پیدا کرنے والے ٹاپ ٹین ممالک میں چین پہلے نمبر پر ہے جس کے بعد بالترتیب ترکی، ایران، ارجنٹائن، یوکرین، امریکہ، بھارت، روس، میکسیکو اور ایتھوپیا&nbsp; آتے ہیں۔

شہد کی عالمی پیداوار میں 50 فیصد حصہ ٹاپ فائیو ممالک کا ہے جبکہ مجموعی عالمی پیداوار کاایک تہائی سے زیادہ صرف چین اور ترکی پیدا کرتے ہیں۔

ماموند کے نواحی گاؤں ناواگئی کے رہائشی 55سالہ مولانا خان زیب پچھلے 30 برس سے مگس بانی کے کاروبار سے وابستہ ہیں۔ انہوں نے لوک سجاگ کو بتایا کہ پاکستان میں شہد کی مکھیوں کے تقریباً 30 ہزار&nbsp; فارمز ہیں لیکن گھر یلو مگس بانی کا کوئی مستند ڈیٹا دستیاب نہیں۔

پاکستان&nbsp; نے 2020 ء میں 98 لاکھ امریکی ڈالر ( عالمی تجارت کا نصف فیصد سے بھی کم) کا شہد برآمد کیا جبکہ اسی سال 18 لاکھ ڈالر مالیت کا شہد درآمد کیا گیا۔

<a href="https://wits.worldbank.org/trade/comtrade/en/country/PAK/year/2022/tradeflow/Exports/partner/ALL/product/040900">تاہم پاکستانی شہد کی برآمد اب مزید کم ہو گئی ہے جوعالمی تجارتی ڈیٹا ویب سائٹ&nbsp; &#39;ورلڈ انٹیگریٹڈ ٹریڈ سالوشن&#39; کے مطابق</a> 2022ء میں 80 لاکھ 49 ہزار ڈالر رہی جبکہ ایک اور <a href="https://oec.world/en/profile/bilateral-product/honey/reporter/pak">ویب سائٹ او ای سی&nbsp; یہ ایکسپورٹ 87 لاکھ 40 ہزار ڈالر اور امپورٹ 12 لاکھ 80 ہزار ڈالر بتاتی ہے۔</a>

پاکستان بزنس کونسل کی رپورٹ کہتی ہے کہ شہد کی عالمی پیداوار 2015ء میں تقریباً 1.87 ملین میٹرک ٹن تک پہنچ گئی تھی لیکن 2020ء میں کم ہو کر تقریباً 1.77 ملین میٹرک ٹن پر آ گئی۔

&quot;شہد کی پیداوار میں حالیہ کمی کی بڑی وجوہات کیڑے مار ادویات کا بڑھتا استعمال، مکھیوں کے مسکن کی تباہی، فضائی آلودگی اور گلوبل وارمنگ ہیں۔&quot;

مولانا خان زیب بتاتے ہیں کہ پاکستان میں مگس بانی&nbsp; سے لاکھوں افراد کا روزگار وابستہ ہے جن میں بیشتر خیبر پختونخوا سے تعلق رکھتے ہیں۔ ضلع باجوڑ میں مگس بانی کے لگ بھگ ایک ہزار فارم ہیں جہاں تقریباً تین ہزار لوگ کام کرتے ہیں۔

&quot;ہمارے ضلعے میں سالانہ تین ٹن سے زائد خالص شہد پیدا ہوتا ہے جس میں گھروں میں پالی جانے والی مکھیوں کا شہد بھی شامل ہے۔

باجوڑ سمیت ملک بھر میں مئی اور ستمبر میں شہد حاصل کیا جاتا ہے جس کی اقسام میں پلوسہ، شوہ، مالٹا، بیکھڑ، الائچی، کریچی، شینشوب اور بیر کا شہد قابل ذکر ہیں۔&quot;

طیب خان مروت، ضم شدہ اضلاع میں محکمہ نان ٹمبر فاریسٹ پراڈکٹس کے اسسٹنٹ ڈائریکٹر رہ چکے ہیں اور مگس بانی کے ماہر ہیں۔ ان کا ماننا ہے کہ موسمیاتی تبدیلیوں کے باعث پھولوں کے موسم کا دورانیہ کم ہو گیا ہے۔

وہ بتاتے ہیں کہ پھولوں کے موسم کا دورانیہ کم ہونے کے نتیجے میں شہد کی مقامی مکھیوں کی اقسام جو چار ہوتی تھیں اب کم ہو کر دو رہ گئی ہیں۔ یعنی شہد کی مکھیوں کی دو اقسام ہی ختم ہو گئی ہیں۔

<h2>موسمیاتی تبدیلی اور مگس بانی</h2>

ایگریکلچر ریسرچ انسٹی ٹیوٹ سوات میں تعینات، ماہرموسمیات ڈاکٹر روشن علی بتاتے ہیں کہ اگر 2008ء سے 2022ء تک کے موسمیاتی ڈیٹا پر نظر ڈالیں تو بہت زیادہ فرق آچکا ہے۔ اس ریجن میں پہلے اوسط درجہ حرارت کم اور بارشیں زیادہ ہوتی تھیں جس کے نتیجے میں موسم خوشگوار رہتا تھا لیکن اب ایسا نہیں ہے۔

وہ کہتے ہیں کہ یہاں کے موسم میں دو بنیادی تبدیلیاں واقع ہوئی ہیں جو فصلوں اور باغات کے لیے نقصان کا باعث بن رہی ہیں۔ ایک تو بارشوں کے سیزن میں تبدیلی آئی ہے اور دوسرا ایک ہی وقت میں زیادہ بارش ہوتی ہے۔

&quot;ان بے ہنگم تبدیلیوں سے فصل میں زیادہ جڑی بوٹیاں اگ آتی ہیں جنہیں تلف کرنے کے لیے کاشت کار زہریلی دوا کا بے دریغ سپرے کرتے ہیں جوشہد کی مکھیوں کو تباہ کر رہا ہے۔&quot;

ان کا کہنا تھا کہ متعدل موسم شہد کی مکھیوں کی پیداواری صلاحیت بڑھاتا ہے۔ اس کے برعکس بے وقتی بارشوں، تیز ہواؤں اور شدید موسمی حالات کی وجہ سے نہ صرف شہد کی مکھیوں کی تعداد بلکہ ان کی نسلوں (اقسام) میں بھی نمایاں کمی آ گئی ہے۔

شاہی مندروز کا کہنا ہے کہ وہ نہیں جانتیں کہ موسمیاتی تبدیلی کیا ہوتی ہے تاہم انہیں اس بات کا علم ہے کہ اس علاقے میں پہلے ہر طرف ہریالی تھی، پہاڑوں اور میدانوں میں پھول کھلے رہتے تھے۔ لیکن اب بے وقتی بارشوں اور خشک سالی کے باعث مکھیوں نے خوراک کی تلاش میں ادھر آنا چھوڑ دیا ہے۔

&quot;شہد کی جو مکھیاں ہمارے مٹکوں میں آتی ہیں انہیں بیماریاں لگ جاتی ہیں اور وہ مرنا شروع جاتی ہیں۔&quot;

شاہی مندروز کے شوہر ابراہیم شاہ اپنی اہلیہ کے کاروبار سے بہت خوش تھے اور مگس بانی میں ان کی مدد کرتے تھے۔ وہ کہتے ہیں کہ کاروبار ٹھپ ہونے سے انہیں تنگدستی نے گھیر لیا ہے۔ اب حکومت کو چاہیے کہ اس مسئلے کا حل نکالے۔

<a href="https://parc.gov.pk/SiteImage/Misc/files/Annual_Report_2020_21.pdf">اگرچہ پاکستان ایگریکلچر ریسرچ کی رپورٹ 21-2020ء میں دعویٰ کیا گیا تھا کہ شہد کی مکھیوں میں بہتری (منیجمنٹ ٹیکنالوجیز امپروومنٹ) لائی گئی ہے</a> جو بیماریوں کے خلاف زیادہ مزاحمت اور خشک سالی برداشت کرنے کی صلاحیت رکھتی ہیں۔

&nbsp;&quot;ان اقسام کو مختلف زرعی ماحولیاتی زونز یعنی بلوچستان، شمالی علاقہ جات کے خشک اور سرد ماحول کے لیے منتخب کیا گیا ہے جن کے پھیلاؤ (تقسیم کاری)نے پاکستان کو شہد کی زیادہ پیداوار دینے والا ملک بنا دیا ہے۔&quot; تاہم باجوڑ میں اس کے آثار دیکھنے کو نہیں ملے۔

محکمہ نان ٹیمبر فارسٹ پراڈکٹس ضلع باجوڑ کے سینئر سپروائزر گل بادشاہ بتاتے ہیں کہ ان کا ڈیپارٹمنٹ 2014ء سے 2019ء تک لوگوں کو شہد کی مکھیاں پالنے کے لیے سالانہ 900 باکس تقسیم کرتا رہا مگر وہ بھی اب نہیں دیے جاتے۔

&quot;تاہم خواتین ہمیشہ سے اپنی مدد آپ کے تحت گھروں میں مگس بانی کرتی رہی ہیں لیکن اب ان کو مالی امداد اور تربیت کی شدید ضرورت ہے۔&quot;

خلیجی ممالک میں منافع بخش پاکستانی شہد کےکاروبار کو زوال کا سامنا کیوں کرنا پڑ رہا ہے؟

موسمیاتی تبدیلی، شہد کی پیداور اور مگس بان خواتین کے روزگار کو کیسے تباہ کر رہی ہے؟

انیس سالہ ٹرانس جینڈر نسرین بی بی مہینے میں دو تین مرتبہ باجوڑ کی تحصیل نواگئی کے گاؤں&nbsp; سے 27 کلومیٹر سفر کرکے ضلعی ہیڈکوارٹر خار میں قائم محکمہ سوشل ویلفیئر کے دفتر آتی ہیں۔ وہ باجوڑ کی پہلی ٹرانس جینڈر خاتون ہیں جنہوں نے اپنے حقوق کے حصول کیلئے دوسال پہلے محکمہ سوشل ویلفیئر کے ساتھ رجسٹریشن کرائی تھی۔

رجسٹریشن کا مرحلہ اتنا آسان نہیں تھا۔ پہلے انہیں قومی شناختی کارڈ بنانےکا معاملہ درپیش تھا، جس کے لیے دستاویزات اکٹھی کرنے کی بھاگ دوڑ ہوئی، پھر اگلے مرحلے میں ادارے کے پاس نام کا اندراج کرانا تھا۔ ضلع باجوڑ میں رجسٹریشن کرانے والی وہ پہلی ٹرانس جینڈر خاتون تھیں۔ ان کا خیال تھا کہ رجسٹریشن ہو گی تو روزگار کے حصول یا اپنی کمیونٹی کے حقوق کیلئے سرگرمیوں میں حکومتی تعاون کا کوئی راستہ نکل آئے گا۔

نسرین بی بی کے مطابق وہ مہینے میں دو تین بار محکمہ سوشل ویلفیئر کے دفتر کا چکر لگاتی ہیں تاکہ حکام سے ٹرانس جینڈر کمیونٹی کے مسائل پر بات ہو سکے۔ انہوں نےکئی مرتبہ محکمے کے ضلعی اہلکاروں کے سامنے اپنی ذاتی مشکلات کا تذکرہ بھی کیا جس میں نوکری کا مطالبہ بھی شامل تھا کیونکہ ان کے بقول مڈل تک سکول میں پڑھنے کے ساتھ انہوں نے دینی تعلیم بھی حاصل کر رکھی ہے۔ وہ کہتی ہیں کہ انہیں ٹرانس جینڈرز افراد کیلئے مخصوص کوٹے پر نوکری دی جائے تاکہ ان کی معاشی مشکلات حل ہوسکیں۔&nbsp;

&quot;میں گھر میں بچیوں کا مدرسہ بھی چلارہی ہوں، جس میں70 بچیاں&nbsp; ناظرہ قرآن سیکھ رہی&nbsp; ہیں اور ان سے میں کوئی فیس نہیں لیتی۔ مدرسے کے&nbsp; انتظامات اور مالی معاملات میں میرے گھر والے، خاندان&nbsp; کے دیگر افراد اور گاؤں کے کچھ لوگ بھی مدد کردیتے ہیں۔&quot;

نسرین بی بی کے والد محنت مزدوری کرتے ہیں، جس سے گھریلو اخراجات بمشکل پورے ہوتے ہیں۔ اس کے باوجود انہوں نے نسرین کو مڈل تک پڑھایا، تاہم مالی مشکلات کے باعث مزید تعلیم کا سلسلہ منقطع ہو گیا۔

&quot;میری دو بہنیں بھی ٹرانس جینڈر ہیں، ہمارے والد نے اپنی حد تک ہماری پرورش میں کوئی کسر نہیں چھوڑی، جس پر بہت خوشی بھی ہوتی ہے لیکن معاشرتی رویوں اور لوگوں کی طرف سے طرح طرح کے القابات کی وجہ سے وہ زیادہ تر وقت گھر پر ہی گزارتی ہیں۔&quot;

محکمہ سوشل ویلفیئر کے ضلعی انچارج فضل امین باجوڑ میں ٹرانس جینڈر برادری کے مسائل کے حوالے سے بتاتے ہیں کہ انہوں نے ڈائریکٹوریٹ کے سطح پر پچھلے سال&nbsp; ایک میٹنگ کی تھی تاکہ باجوڑ کی خواجہ سرا برادری کی لئے کوئی پراجیکٹ شروع کرسکیں لیکن&nbsp; ان کے پاس اب تک دوہی ٹرانس جینڈر رجسٹرڈ ہوئی ہیں جن میں ایک نسرین بی بی اور دوسری ان کی بہن ذاکرہ بی بی ہے۔

&quot;اگر دیکھا جائے تو ساتویں مردم شماری کے&nbsp; مطابق باجوڑ کی آبادی بارہ لاکھ 87 ہزار 960&nbsp; افراد پر مشتمل ہے جن میں اندازے کے مطابق خواجہ سراؤں کی تعداد تین ہزار تک ہونی چاہئے۔ لیکن بد قسمتی سے سخت قبائلی روایات اور آگاہی نہ ہونے کی وجہ سے ٹرانس جینڈر افراد اپنی رجسٹریشن نہیں کرواتے۔ رجسٹریشن ہوگی، صحیح اعداد و شمار ہوں گے تو تب ہی ہم ان کیلئے کوئی پراجیکٹ شروع کرسکیں گے۔&quot;

فضل امین نے لوگوں سے اپیل کی ہے کہ وہ اپنے خاندان میں موجود ٹرانس جینڈرز افراد کی محکمہ سوشل ویلفیئر میں رجسٹریشن کرائیں تاکہ ان کی فلاح و بہبود کیلئے کوئی پروگرام شروع کیا جاسکے۔

نسرین بی بی کا کہنا ہے کہ باجوڑ میں ٹرانس جینڈرز افراد کی تعداد کافی زیادہ ہے، لیکن قبائلی روایات اور گھریلو پابندیوں کی وجہ سے وہ&nbsp; رجسٹرڈ نہیں ہوتے۔ پھر رجسٹریشن میں انہیں کوئی فائدہ بھی نظر نہیں آتا۔

&quot;مجھے رجسٹریشن کرائے دوسال ہوگئے، لیکن ابھی تک میری کسی قسم کی&nbsp; مدد نہیں کی گئی، ایسی صورتحال میں کوئی اپنے آپ کو کیوں رجسٹرڈ کروائے گا۔&quot;

نسرین کے والد، پچاس سالہ نواز خان گاؤں کے قریب ایک کان میں روزانہ اجرت پر کام کرتے ہیں۔ وہ کہتے ہیں کہ شروع میں انہوں نے نسرین اور&nbsp; دوسرے ٹرانس جینڈرز بچوں کو ڈاکٹر کو بھی دکھایا تھا، وہ سمجھتے تھے کہ علاج سے وہ دوسرے لوگوں کی طرح نارمل ہوسکیں گے لیکن ڈاکٹروں نے کہا یہ قدرتی طور پر ایسی ہیں اور ان کاعلاج نہیں ہوسکتا۔&quot;

نواز خان کہتے ہیں کہ انہوں نے اسے قسمت کا لکھا مان لیا اور انہیں یکساں توجہ دی، اس میں کوئی فرق نہیں کیا کہ یہ ٹرانس جینڈرہے۔ وہ اپنے بچوں کو نارمل ہی سمجھتے ہیں۔

&quot;نسرین نے کبھی مجھے کمزور نہیں پڑنے دیا، وہ بہت محنتی ہے، مجھے اور اپنی بہنوں کو حوصلہ دلاتی ہے۔ ساتھ ہی وہ گاؤں کی بیمار خواتین کو ہسپتال لے جانے، نادرا دفتر میں شناختی کارڈ بنوانے اور بینظیر انکم سپورٹ پروگرام کے تحت مالی مدد کے حصول کیلئے ان کے ساتھ جاتی ہے اور ان کے مسائل حل کرنے میں مدد کرتی ہے۔&quot;

باجوڑ سے تعلق رکھنے والے ممتاز محقق اور سماجی امور کے ماہر ڈاکٹر انور نگار خیبر پختون خواہ کے لوگوں کی معاشرتی و سماجی زندگی پر گہری نظر رکھتے ہیں۔ انہوں نے&nbsp; خواجہ سراؤں کے حوالے سے عام معاشرتی رویوں کے&nbsp; بارے میں کہا کہ حالیہ برسوں میں ان کے خلاف تشدد میں اضافہ ہوا ہے۔ جس کی بڑی وجہ آگہی کی کمی ہے، علم سے دوری نے عدم برداشت کو جنم دیا ہے۔ حکومتی سطح پر جتنے بھی قوانین ان کی فلاح و بہبود کیلئے بنے ہیں ان پر سختی سے عمل درآمد کی ضرورت ہے

خیبر پختونخوا میں ٹرانس جینڈرز کے حقوق کیلئے کام کرنے والے ٹرانس جینڈرز الائنس کی سربراہ آرزو خان کے مطابق صوبے بشمول قبائلی اضلاع میں ٹرانس جینڈر کمیونٹی کی تعداد کے بارے میں کوئی مستند ڈیٹا موجود نہیں کیونکہ ایک تو مردم شماری میں بھی صحیح اعدادوشمار سامنے&nbsp; نہیں آئے، پھر پشتون روایات اور لوگوں کے رویوں کی وجہ سے بھی وہ اپنی جنس چھپاتے ہیں۔آرزو خان کا دعویٰ ہے کہ خیبر پختونخوا میں بیس&nbsp; ہزار سے بھی زیادہ ٹرانس جینڈر افراد موجود ہیں۔

وہ بتاتی ہیں کہ صوبے کے دوسرے شہروں کی نسبت قبائلی اضلاع کے ٹرانس جینڈرز افراد کو زیادہ مشکلات کا سامنا کرنا پڑتا ہے کیونکہ وہاں صوبائی ادارے ابھی پوری طرح فعال نہیں اور غیر سرکاری تنظیموں کیلئے بھی کام میں رکاوٹیں موجود ہیں۔

مذہبی سکالر مولانا نور محمد بنوری کے مطابق اسلام نے میراث میں ٹرانس جینڈرز کا بھی حصہ متعین کیا ہے، ریاست میں جس طرح دوسرے شہریوں کے حقوق ہیں، اسی طرح ٹرانس جینڈر افراد کے بھی حقوق ہیں۔

انہوں نے کہا کہ بیٹوں اور بیٹیوں کی طرح ٹرانس جینڈر اولاد کی کفالت بھی والدین کا فرض ہے، معاشرے کی بھی ذمہ داری ہے کہ انہیں اچھا شہری بننے میں مدد دے، انہیں غلط ناموں سے نہ پکاراجائے اور ان کے ساتھ شفقت کا سلوک کیا جائے&nbsp; کیونکہ یہ بھی اللہ تعالیٰ کی تخلیق ہے۔

نسرین بی بی فلاحی تنظیموں اور حکومت سے مطالبہ کرتی ہیں کہ&nbsp; ملک کے دوسرے اضلاع کے طرح ان کو بھی اپنے حقوق دیے جائیں، انہیں روزگار کے مواقع فراہم کیے جائیں تاکہ باجوڑ کی ٹرانس جینڈر برادری میں تحفظ اور برابری کا احساس ہو اور جو لوگ ابھی تک رجسٹرڈ نہیں ہیں وہ اپنی رجسٹرڈ کرواسکیں۔

شاہ خالد

شاہ خالد کا تعلق قبائلی ضلع باجوڑ سے ہے۔ وہ مختلف علاقائی اور قومی نیوز ویب سائٹس، میگزین، اخبارات اور ریڈیو کے ساتھ کام کرنے کا تجربہ رکھتے ہیں۔

باجوڑ کا منی سولر گرڈ، چار سال بعد بھی فعال نہ ہو سکا، اب پینلز اکھاڑنا پڑیں گے

موسمیاتی تبدیلی، شہد کی پیداور اور مگس بان خواتین کے روزگار کو کیسے تباہ کر رہی ہے؟

باجوڑ میں ٹرانس جینڈر افراد کی فلاح و بہبود کا پروگرام مطلوبہ نتائج کے حصول میں ناکام