In Narang Mandi, concerns mount as cheating becomes rampant, reportedly aided by private school invigilators and examination center staff. Explore the alarming rise and potential consequences

Cheating Epidemic in Narang Mandi: Private School Invigilators Allegedly Complicit in Rising Trend

نارنگ منڈی میں آپ جس راستے سے داخل ہوں تو آپ کو&nbsp; دیو ہیکل سائن بورڈ دیکھنے کو ملیں گے جن میں اکثر پر نجی تعلیمی اداروں کی اشتہاری مہم چلائی جا رہی ہے۔ ان بورڈز پر میٹرک یا انٹر میں اچھے نمبر لینے والے طلبا و طالبات کی بڑی بڑی تصاویر نظر آتی ہیں اس دعوے کے ساتھ کہ یہ ادارہ نہ صرف علاقے&nbsp; بلکہ صوبے بھر کامیاب ترین تعلیمی ادارہ ہے۔

تصاویر پر درج بچوں کے نمبر تو &quot;حقیقی&quot; ہیں مگر ان نتائج پر بہت سے سوال ہیں۔

نارنگ منڈی ضلع شیخوپورہ کا ایک بڑا قصبہ ہے۔ جو لاہور سے 76 کلومیٹر دور ہے۔ بھارتی بارڈر اس سے&nbsp; محض آٹھ کلومیٹر کے فاصلے پر ہے۔ یہ قصبہ عام طور پر رائس ملوں اور چاول کی منڈی کی وجہ سے پاکستان بھر میں مشہور ہے لیکن پچھلے ایک سال سے یہ امتحانی مراکز میں نقل کی وجہ سے بہت بدنام ہوا ہے۔

زہرا فاطمہ نے حال ہی میں شیخوپورہ کے قصبے نارنگ منڈی میں نویں جماعت کا امتحان دیا ہے۔ وہ الزام عائد کرتی ہیں کہ جس امتحانی مرکز میں انھوں نے پرچے دیے، وہاں کھلے عام نقل کرائی گئی۔ کچھ اساتذہ نے مخصوص طالبات کو کتابیں اور نوٹس فراہم کیے تاکہ وہ ان کی مدد سے پرچے حل کر سکیں۔

&quot;بعض طالبات کو الگ کمرے میں بٹھا کر سجبیکٹ سپیشلسٹ کی مدد فراہم کی گئی تھی۔&quot;

ایک اور طالبہ ایمان فاطمہ بھی یہی شکایت کرتی ہیں۔

انہوں نے گورنمنٹ ایسوسی ایٹ ڈگری کالج برائے خواتین میں بنائے گئے امتحانی سینٹر پر دسویں جماعت کا امتحان دیا ہے۔

سابق سرکاری استاد نثار احمد مغل جن کا تعلق قصبہ نارنگ منڈی سے ہے ان کے بقول صرف رواں سال ہی نہیں بلکہ پچھلے کچھ سالوں سے بورڈ کے امتحانات خاص کر میٹرک میں اس طرح کے واقعات تواتر کے ساتھ ہو رہے ہیں۔

وہ پچھلے سال کی مثال دیتے ہیں کہ 2023ء کے میٹرک کے سالانہ امتحانات میں نارنگ منڈی کے گورنمنٹ ایسوسی ایٹ کالج فار بوائز میں تو پرچے باہر سے حل کرکے اندر جاتے رہے ہیں۔ اس حوالے سے سوشل میڈیا پر کافی شور ہوا، لوگوں نے احتجاج بھی کیا اور معاملہ لاہور بورڈ کے کنٹرولر کے نوٹس میں لایا گیا لیکن کوئی کارروائی نہیں کی گئی۔

نارنگ منڈی کے ایک نجی تعلیمی ادارے کے پرنسپل نے نام ظاہر نہ کرنے کی شرط پر لوک سجاگ کو بتایا کہ اس سال لڑکیوں کے اس امتحانی مرکز پر مرد اساتذہ&nbsp; کو نگران مقرر کیا گیا تھا حالانکہ پہلے ایسا کبھی نہیں ہوا ہے۔

نارنگ منڈی میں ہی 2023ء کے میٹرک کے امتحان میں گورنمنٹ ایسوسی ایٹ کالج فار بوائز میں وٹس ایپ کے ذریعے پرچہ حل کرنے کی ایک وڈیو وائرل ہوئی تو اس پر مزکورہ طالب علم بختاور اور اس کے والد محمد اشفاق پر ہی پرچہ درج کرا دیا گیا۔

بختاور اور اس کے والد نے میڈیا کے سامنے نگرانوں کو فی پرچہ 10 ہزار روپے دینے کا اعتراف بھی کیا۔

نثار احمد کہتے ہیں کہ رواں سال بھی میٹرک کے امتحانات میں کچھ ایسا ہی چلتا رہا۔

نارنگ منڈی کے بعض سرکاری اور نجی سکولوں کے اساتذہ بھی اس کی تصدیق کرتےہوئے بتاتے ہیں کہ گورنمنٹ ہائی سکول رفیق آباد میں یکم اپریل 2024ء کو نہم کلاس کے ریاضی کے پرچے کی جوابی شیٹ امتحانی سنٹر سے باہر آئی۔ اسی امتحانی سنٹر میں گورنمنٹ ڈگری کالج کے اہلکار کے بیٹے ہارون کی جگہ پر کسی دوسرے بچے نے پرچہ دیا جس کے وڈیو ثبوت بھی ہیں۔

عبدالمجید سرکاری سکول میں استاد ہیں وہ کہتے ہیں کہ رواں سال جب دسویں کلاس کا پہلا پرچہ تھا تو ان کی ڈیوٹی گورنمنٹ ہائی سکول میں لگائی گئی تھی۔

&quot; میرے سوا وہاں کا سارا عملہ پرائیویٹ تھا۔ میں نے اعتراض کیا تو مجھے سینٹر سے ہٹا دیا گیا اور باقی تمام پرچوں میں میری جگہ پر کسی پرائیویٹ شخص نے ڈیوٹی دی۔&quot;

ان کا کہنا ہے کہ ہر پرچے میں عملہ تبدیل کر لیا جاتا تھا۔

&quot;جس مضمون کا پرچہ ہوتا، اسی سبجیکٹ کے سپیشلسٹ سے ڈیوٹی کروائی جاتی جو مخصوص طلباء کو نقل کروایا کرتے تھے۔&quot;

سماجی شخصیت اور قانون دان مرزا عبدالباسط اس سارے واقعے&nbsp; کے ثبوت حاصل کیے اور چیئرمین لاہور بورڈ کو وٹس اپ کیے جن میں &quot;موبائل کے ذریعے نقل کرنے کے&quot; سکرین شارٹ اور دیگر ثبوت موجود تھے۔

2024ء کے سالانہ میٹرک کے امتحانات میں بعض واقعات میں کارروائیاں بھی ہوئی ہیں جیسا کہ گورنمنٹ ایسوسی ایٹ کالج فار گرلز سینٹر پر ایک نجی کالج کی طالبہ کو علیحدہ کمرے میں بٹھا کر پرچہ حل کرانے کے واقعے پر لاہور بورڈ کے کنٹرولر محمد زاہد میاں نے اس سینٹر کا سارا عملہ معطل کر دیا تھا۔

اسی طرح گورنمنٹ ہائی سکول نارنگ میں نجی کالج کے طالب علم کا کیس سامنے آیا جسے علیحدہ کمرے میں بٹھایا گیا تھا اور پرائیویٹ افراد اس کا پیپر کروا رہے تھے۔ کنٹرول لاہور بورڈ نے سنٹر کاسارا عملہ معطل کر دیا۔

رواں سال مارچ کے آخری ہفتے میں میڈیا پر کچھ ایسی خبریں گردش کرتی رہی کہ میٹرک امتحانات میں نقل کے خلاف پنجاب کے وزیر تعلیم نے سخت ایکشن لیا ہے۔

اکتیس مارچ کو شائع ہونے والی ایک خبر کے مطابق وزیر تعلیم پنجاب رانا سکندر حیات نے میٹرک امتحانی سینٹرز پر چھاپے مارے اور چیئرمین لاہور بورڈ کو معطل اور کنٹرولر امتحانات کو عہدے سے ہٹا دیا۔

نارنگ منڈی میں ایک نجی سکول چلانے والے عامر مغل کہتے ہیں کہ چند پرائیویٹ تعلیمی اداروں نے سپرنٹنڈنٹ، نگران، بورڈ عملے سمیت سبجیکٹ سپیشلسٹ خرید رکھے ہیں۔ ان کے پرائیویٹ نگران نہ صرف نقل کرواتے ہیں بلکہ لاہور بورڈ کے عملے کی ملی بھگت سے اپنے طلباء و طالبات کے اضافی نمبر بھی لگواتے ہیں۔

سرکاری ٹیچر نثار احمد مغل الزام عائد کرتے ہیں کہ نجی تعلیمی اداروں کے مالکان تعلیم کا نظام بہتر کرنے کی بجائے ہر سال امتحان اور رزلٹ خرید لیتے ہیں جس سے ان کے اداروں کا رزلٹ اچھا آتا ہے اور پھر اسی رزلٹ کی بنیادپر وہ والدین کو قائل کرتے ہیں کہ ان کے بچے سرکاری سکولوں کی بجائے ان کے پرائیویٹ تعلیمی اداروں میں تعلیم حاصل کریں گے۔

ان کے بقول ضلع شیخوپورہ سمیت پورے صوبے کے سرکاری سکولوں میں پڑھنے والے طلباء کی تعداد میں حیران کن کمی آرہی ہے۔ والدین اچھے رزلٹ کے لالچ میں سرکاری سکولوں کی بجائے نجی تعلیمی اداروں میں بچوں کو پڑھانے میں ترجیح دیتے ہیں۔

تین دہائیوں سے علم و تدریس کے شعبے سے وابستہ اور پنجاب ٹیکسٹ بک بورڈ لاہور کے سابق اسسٹنٹ ڈائریکٹر طاہر محمود شیخ بھی نثار احمد کی تائید کرتے ہیں۔ وہ کہتے ہیں کہ نجی تعلیمی اداروں کے سائن بورڈ کا مقصد نمود و نمائش کے سوا کچھ نہیں۔

&quot;ایسے نجی تعلیمی اداروں کا مقصد زیادہ طلبہ کو گھیرنا اور زیادہ سے زیادہ پیسہ کمانا ہے۔اپنے سکولوں کے بچوں کو&nbsp; زیادہ نمبر دلانے کے لیے وہ ہر جائز و ناجائز حربہ استعمال کرنے کی کوشش کرتے ہیں۔

نجی تعلیمی ادارے ارقم کالج کے ڈائریکٹر عبدالمنان الزامات کی تردید کرتے ہوئے کہتے ہیں کہ&nbsp; ان کے پاس کوالیفائیڈ اساتذہ ہیں جو مختلف بڑے تعلمی اداروں میں کام کرنے کا 10 سے 15 سالہ تجربہ رکھتے ہیں۔یہ تمام سبجیکٹ سپیشلسٹ ہیں۔

&quot;ہم کوالٹی آف ایجوکیشن پر کوئی سمجھوتہ نہیں کرتے۔ اس وجہ سے ہر سال ہمارے بچے ٹاپ پوزیشنیں لیتے ہیں۔&quot;

لوگ سجاگ سے بات کرتے ہوئے عبدالمنان نے امتحانی سینٹر میں نقل کراونے کے الزام کو بھی رد کر دیا۔

زاہد عمران آل پرائیویٹ سکولز ایسوسی ایشن نارنگ کے صدر ہیں۔ وہ&nbsp; کہتے ہیں کہ مافیا کی وجہ سے میٹرک اور ایف اے کا سالانہ امتحان مذاق بن کر رہ گیا ہے سارا سال محنت کرنے طلباء پیچھے رہ جاتے ہیں اور نقل کرنے والے بچے آگے نکل جاتے ہیں۔ 
نقل کے معاملے میں سرکاری تعلیمی اداروں کا حال بھی بہتر نہیں۔

ایک سرکاری استاد نے نام ظاہر نہ کرنے پر بتایاکہ گزشتہ سال کامرس کے امتحان میں پورا پیپر حل کرکے 38 فوٹو کاپیاں کروائی گئیں اور امتحان دینے والے 38 طلباء میں تقسیم کی گئیں ان 38 طلباء نے ان فوٹو کاپیوں سے دیکھ کر پورا پیپر حل کیا۔

پنجاب حکومت کی جانب سے امتحانی عمل کو شفاف بنانے اور بوٹی مافیاکے خاتمے&nbsp; کے لیے 31 مارچ کو محکمہ مال کو ذمہ داری سونپ دی گئی ہے۔ اسسٹنٹ کمشنر اور محکمہ مال کے افسران نے مارچ میں ہونے والے مختلف امتحانی سینٹروں میں امتحانی عمل کی کڑی نگرانی کی۔

تین اپریل 2024 کو پنجاب کالج آف کامرس مرید کے میں نہم کلاس کے امتحان میں سپرنٹنڈنٹ شہزاد اور پرائیویٹ نگران محمد یوسف کی جانب سے پیسے لے کر نقل کروانے کی شکایت ملنے پر اسسٹنٹ کمشنر شوکت مسیح نے دونوں اہلکاروں کو معطل کر دیا۔

صوبائی وزیر تعلیم راناسکندر حیات نے لوک سجاگ کو بتایا کہ میٹرک کے امتحان میں مختلف امتحانی سنٹرز پر بوٹی مافیا کے ملوث ہونے کے ثبوت ملنے کے بعد پنجاب بھر میں سختی کر دی گئی ہے۔ بوٹی مافیاکے خاتمے کے لیے تمام وسائل بروئے کار لائے جائیں گے اور محنتی طلباء کا مستقبل کسی صورت بھی تباہ نہیں ہونے دیں گے۔

انہوں نے بتایا کہ&nbsp; امتحانی سینٹرز میں پرائیویٹ عملہ کی تعیناتی کی&nbsp; شکایات کو دور کر دیا گیا ہے۔ امتحان اور سینٹرز کی نگرانی کے لیے گریڈ 17 اور اس سے اوپر کے آفیسرز کو تعینات کیا گیا ہے۔

&quot;ایس ایچ او اور ایس پیز سمیت پنجاب پولیس کے اعلی افسران کو بھی اختیارات دے دیے گئے ہیں وہ کسی بھی امتحانی سینٹر کو چیک کرسکتے ہیں۔&quot;

صوبائی حکومت نے میٹرک کے بعد 24 اپریل 2024 سے شروع ہونے والے ایف اے، ایف ایس سی اور آئی سی ایس کے امتحانات میں نارنگ منڈی کے تمام امتحانی سینٹروں میں سی سی ٹی وی کیمرے لگوا دیے ہیں جن کو براہ راست لاہور بورڈ اور ڈپٹی کمشنر آفس شیخوپورہ سے مانیٹر کیا جا رہا ہے۔

امتحانی عملہ نارنگ منڈی سے باہر سے منگوایا گیا ہے اور محکمہ پولیس اور اسسٹنٹ کمشنر سمیت محکمہ مال کا عملہ امتحانی سینٹروں پر ڈیوٹی دے رہا ہے-

ڈیجیٹل امتحانی نظام، سہولت یا مصیبت؟

نارنگ منڈی: نجی سکولوں کے طالب علموں کے نمبر زیادہ کیوں آتے ہیں؟

text

Delve into the factors driving the declining enrollment in government schools versus the allure of private institutions. Is it the perceived quality of education or the social status linked w

Unveiling the Decline: Exploring the Impact of Education Quality and Social Status on Student Enrollment in Government vs. Private Schools

ایک وقت تھا جب علاقے کے ہر امیر غریب کی خواہش تھی کہ ان کے بچے کا داخلہ کسی بھی طرح &quot;گورنمنٹ ہائی سکول نارنگ نمبر ون&quot; میں ہو جائے۔ کیوں کہ اس زمانے میں یہ سکول نہ صرف نصابی بلکہ غیرنصابی سرگرمیوں میں ضلع شیخوپورہ&nbsp; میں ایک ممتاز مقام رکھتا تھا۔

نارنگ منڈی ایک چھوٹا کا قصبہ ہے اور آج سے دو دہائیاں پہلے تک اس کی آبادی بھی کوئی اتنی زیادہ نہیں تھی لیکن مقامی لوگ بتاتے ہیں کہ ان دنوں جب سکول میں چھٹی ہوتی تھی تو اطراف کی سڑکیں جام ہو جایا کرتی تھیں۔ گلیوں اور بازاروں میں ہر طرف دیہات جانے والے بچوں کی سائیکلیں، رکشے اور ویگنیں نظر آتی تھیں۔

یہ سکول 1895ء میں پرانی سبزی منڈی میں بنا تھا جو شروع میں پرائمری تک کی تعلیم کے لیے تھا۔ 1922ء میں اس کو مڈل کا درجہ دیا گیا پھر 1950ء میں اس کی عمارت کو نارنگ منڈی میں قائم ایک ہندو ڈاکٹر بیساکھی رام کی ڈسپنسری کی جگہ (جو چار کنال پر محیط تھی) منتقل کرکے ہائی سکول کا درجہ دے دیا گیا۔ اس کے کچھ عرصے بعد اپ گریڈیشن ہوئی تو اس سکول کو 25 کنال (تقریبا تین ایکڑ)&nbsp; رقبہ مل گیا۔

اب بھی سکول کے 16 کنال رقبے پر کھیلنے کے لیے میدان ہیں اور نو کنال رقبے پر 30 کلاس رومز۔

1952ء میں اس گورنمنٹ ہائی سکول سے میٹرک امتحان میں پہلی پوزیشن حاصل کرنے والے طالب علم بشیر احمد جٹھول کہتے ہیں کہ ان کی کلاس کے تمام بچے بہترین نمبروں سے پاس ہوئے تھے۔

&quot;وقت گزرنے کے ساتھ ساتھ اس سکول میں طلبا کی تعداد بڑھتی ہی چلی گئی کیوں کہ یہ سکول اچھی پڑھائی کے ساتھ ساتھ بیت بازی، نعت خوانی اور کھیلوں میں بھی بہت آگے تھا۔ 80ء اور 90ء کی دہائی میں تو اس سکول میں پڑھنے والے بچوں کی تعداد تین ہزار سے بھی زیادہ ہوا کرتی تھی۔&quot;

وہ بتاتے ہیں کہ اس ادارے نے بہت سے ایسے نام پیدا کیے ہیں جو پاکستان کے بڑے عہدوں پر فائز رہ چکے ہیں یا پھر ابھی بھی کام کر رہے ہیں۔

&quot;سابق آئی جی اسلام آباد مروت شاہ، سابق ایڈیشنل آئی جی اسلام آباد افتخار سیہول، اسسٹنٹ ڈائریکٹر انٹرنل اکاؤنٹبلٹی برانچ آئی جی آفس شیخ زاہد محمود، پاکستان پیپلز پارٹی کے سابق ایم این اے نثار احمد پنوں اسی سکول سے پڑھے ہیں۔

سابق ڈائریکٹر آئی ایس آئی راشد معین، سابق ممبر صوبائی اسمبلی و پارلیمانی سیکرٹری ایکسائز اینڈ ٹیکسیشن اعجاز احمد سیہول، معروف صحافی اطہر مسعود اور ڈسٹرکٹ پولیس آفیسر منڈی بہاؤالدین رضا صفدر کاظمی نے بھی اسی سکول سے تعلیم حاصل کی ہے۔&quot;

لیکن اب اس سکول میں پڑھنے والے بچوں کی تعداد محدود ہو کر رہ گئی ہے اور وقت گزرنے کے ساتھ اس میں مزید کمی آ رہی ہے۔

محمد نعمان جو اسی سکول سے پڑھے اور پچھلے 14 سال سے یہاں پڑھا رہے ہیں وہ بتاتے ہیں کہ چھٹی کلاس سے دسویں کلاس تک اب تقریباً 600 بچے زیر تعلیم ہیں حالانکہ آج سے کچھ سال پہلے تک تو صرف ایک کلاس میں بچوں کی اتنی تعداد ہوا کرتی تھی اور ہر کلاس کے پانچ سے چھ سیکشن بنائے جاتے تھے۔

سکول کے پرنسپل محمد شفقت چھٹہ بتاتے ہیں کہ سکول میں 42 تجربہ کار اور اعلی تعلیم یافتہ اساتذہ ہیں جن میں ایک پی ایچ ڈی باقی ایم فل اور مختلف سبجیکٹس سپیشلسٹ ہیں۔

سکول میں فزکس، کیمسٹری، بیالوجی، الیکٹریکل اور ایئرکنڈیشنڈ کمپیوٹر لیب موجود ہیں۔ دو ہزار کتابوں پر مشتمل لائبریری اور 30 روشن اور ہوا دار کمرے، وسیع میدان اور سکول میں سکیورٹی کیمرے تک لگے ہوئے ہیں۔

&quot;اتنی سہولیات ہونے کے باوجود موجودہ تعداد کے حساب سے اس سکول میں ہر ایک کوالیفائیڈ استاد کے حصے 14 بچے آتے ہیں اور ہر 20 بچوں کے لیے ایک کمرہ ہے۔&quot;

چیف ایگزیکٹو آفیسر ایجوکیشن ضلع شیخوپورہ علی احمد سیان نے لوک سجاگ کو بتایا&nbsp; کہ ضلع بھرکے سرکاری سکولوں، خصوصی طور پر گورنمنٹ ہائی سکول نارنگ کی مینجمنٹ کو اس سیشن چھٹی اور نہم کلاس میں داخلہ بڑھانے اور چیک اینڈ بیلنس کے لیے خصوصی ٹاسک دے دیا گیا ہے۔ امید ہے اس سے کافی بہتری آئے گی۔

وہ کہتے ہیں کہ گزشتہ چند سالوں میں پرائیویٹ تعلیمی اداروں کی تعداد میں کافی اضافہ ہو گیا ہے اس وجہ سے سرکاری سکولوں میں بچوں کی تعداد میں کافی کمی دیکھی گئی ہے۔

سرکاری سکولوں میں بچوں کی تعداد کم ہونے کی کہانی صرف نارنگ منڈی کی نہیں بلکہ پورے ملک کے&nbsp; ایک لاکھ 74 ہزار 96 سرکاری سکولوں کی آج کل یہی صورتحال ہے۔

وزارت تعلیم کے زیر کنٹرول کام کرنے والے ادارے <a href="http://www.neas.gov.pk/SiteImage/Downloads/PES%20Report%202021-22.pdf">پاکستان انسٹی ٹیوٹ آف ایجوکیشن کے 2022ء کے اعداد و شمار</a> کے مطابق ملک میں پانچ کروڑ 48 لاکھ 70 ہزار 964 طالب علم زیر تعلیم ہیں جن میں سے دو کروڑ 87 لاکھ 55 ہزار 946 یعنی 52.4 فیصد سرکاری سکولوں میں اور دو کروڑ 55 لاکھ 11 ہزار 588 (46.5 فیصد) بچے نجی سکولوں میں پڑھ رہے ہیں۔

دیگر پبلک سکولوں میں بھی چھ لاکھ تین ہزار 430 بچے زیر تعلیم ہیں۔ جو کل تعداد کا 1.1 فیصد ہیں۔

اس رپورٹ کے مطابق پاکستان میں سکول جانے کی عمر کے دو کروڑ 62 لاکھ بچے سکول نہیں جارہے ہیں۔ صرف صوبہ پنجاب میں سکول نہ جانے والے بچوں کی تعداد ایک کروڑ 17 لاکھ 30 ہزار ہے۔

رپورٹ میں بتایا گیا ہے کہ پاکستان میں 70&nbsp; سے 80 فیصد سکول ایسے ہیں جہاں پر بجلی، پانی، واش رومز اور چار دیواری سمیت اہم اور بنیادی سہولیات موجود ہیں۔

2018-19ء میں سرکاری سکولوں میں دو کروڑ 94 لاکھ97 ہزار 275 بچے زیر تعلیم تھے لیکن 2021-22ء میں ان کی تعداد کم ہوکر دو کروڑ 87 لاکھ 55 ہزار 946 رہ گئی جبکہ نجی سکولوں میں سال 2018-19ء میں پڑھنے والے بچوں کی تعداد دو کروڑ 32 لاکھ 54 ہزار 395 تھی جو 2021-22ء میں بڑھ کر دو کروڑ 55 لاکھ 11 ہزار 588 تک پہنچ گئی۔

<h2>پرائیویٹ سکولوں میں تعلیم کا احساس برتری</h2>

سابق سکول ٹیچر اور سماجی کارکن نثار احمد مغل کہتے ہیں کہ نجی سکول نمود و نمائش پر زیادہ توجہ دیتے ہیں۔

&quot;والدین اور بچے ان سکولوں کی طرف نہ چاہتے ہوئے بھی راغب ہو رہے ہیں حالانکہ چھوٹے شہروں اور دیہی علاقوں میں گورنمٹ سکول میں نجی سکول سے زیادہ سہولیات ہیں۔ سرکاری سکولوں میں کوالیفائیڈ اساتذہ ہیں۔ جبکہ نجی سکولوں کی اکثریت ایک، دو کمروں پر مشتمل وہاں پر سوائے رٹا لگانے کے کچھ نہیں سکھایا جاتا۔&quot;

ان کے خیال میں سرکاری سکولوں پر لوگوں کے عدم اعتماد کے پچھلے تعلیم اور معیار نہیں بلکہ جیسے ملک میں مڈل کلاس بڑھ رہی ہے تو ان کا &quot;سو کالڈ&quot; معیار بھی بڑھتا جا رہا ہے۔&nbsp; وہ سمجھتے ہیں کہ سرکاری سکول ان کے سٹینڈر کے مطابق نہیں ہیں، یہاں پر مادری زبانیں بولی جاتی ہیں جبکہ لوگ اردو اور انگلش کو ترجیح دیتے ہیں۔

&quot;اب تو یہ صورتحال پیدا ہو گئی ہے جن کے بچے سرکاری سکولوں میں پڑھتے ہیں، انہیں رشتہ دار یہ احساس دلاتے ہیں کہ شاید وہ غریب ہیں اور ایسی صورتحال میں کوئی بھی اپنے بچے کو احساس کمتری میں مبتلا نہیں کرنا چاہتا اور مجبور ہو کر نجی سکول بھیج دیتا ہے۔&quot;

پاکستان انسٹی ٹیوٹ آف ایجوکیشن کے ڈائریکٹر جنرل ڈاکٹر محمدشاہد سرویا بھی اس بات سے اتفاق کرتے ہوئے کہتے ہیں کہ یہ طبقاتی فرق اور نام نہاد احساس کمتری ناصرف دیہی علاقوں بلکہ شہروں میں بھی پائی جاتی ہے۔ والدین کو لگتا ہے کہ جتنا زیادہ مہنگا سکول ہو گا انہیں اتنا ہی زیادہ ایلیٹ گروپ میں گنا جائے گا۔

ان کے مطابق یہ طبقاتی فرق مصنوعی طور پر پیدا کیا جا رہا ہے اور اس من گھڑت احساس کم تری یا برتری نے پورے سرکاری نظام کو متاثر کیا ہے۔

لاہور یونیورسٹی آف مینیجمنٹ سائنسز میں معاشیات کے استاد ڈاکٹر فیصل باری اس بات کو آگے بڑھاتے ہوئے کہتے ہیں کہ یہ تاثر عام ہے کہ اگر آپ کے پاس پیسے نہیں ہیں، تو ہی آپ سرکاری سکول جاتے ہیں۔ پیسے ہیں تو نجی سکول جائیں گے۔

&quot;والدین کے نجی سکولوں کی طرف رجحان کے پیچھے طبقاتی برتری کے احساس کے علاوہ کوئی اور بڑی وجہ نظر نہیں آتی ہے۔ویسے بھی بہتر، معیاری تعلیم اور اچھی تربیت کی بات کرنا شاید اب مناسب نہیں رہا ہے، کیوں کہ سکول کوئی بھی ہو سب رٹا ہی لگواتے ہیں۔&quot;

<h2>کیا پرائیویٹ سکول بہتر ہیں؟</h2>

فیصل باری کہتے ہیں کہ سوائے چند بڑے نجی سکولوں کو چھوڑ کر باقی سرکاری اور نجی سکولوں میں تعلیم کے معیار کا موازنہ کیا جائے تو اس میں بھی کوئی اتنا بڑا فرق نہیں ہے۔

&quot; کچھ سال پہلے تک جب&nbsp; پانچویں اور آٹھویں جماعت کا بورڈ کا امتحان ہوا کرتا تھا تو تب بھی کوئی ایسی بڑی مثال سامنے نہیں آئی تھی کہ نجی سکولوں میں پڑھنے والے بچوں نے غیر معمولی کارکردگی دکھائی ہو۔&quot;

وہ کہتے ہیں کہ ہاں ایک کام جو نجی سکولوں کو بخوبی آتا ہے وہ والدین اور بچوں کو ہر حال میں خوش رکھنے کا ہے، جس کے لیے انھوں نے روازنہ کی بنیاد پر سٹار دینے اور امتحانات کے نتائج پر انعام و کرام کا سلسلہ شروع رکھا ہے۔

&quot; ایک تو ہمارے ہاں انگریزی کو&nbsp; ہوا بنا دیا گیا ہے۔ تعلیم اب ایک جنس(کموڈٹی) بن چکی ہے۔ اس کی مارکیٹنگ ہو رہی اور دیگر کموڈیٹیز کی طرح&nbsp; اس میں ملاوٹ بھی ہو رہی ہے۔&quot;

حال ہی میں <a href="https://aserpakistan.org/index.php">پاکستان اینول سٹیٹس آف ایجوکیشن(اثر) کی رپورٹ</a> میں بتایا گیا ہے کہ سندھ کے دیہی علاقوں کے سرکاری سکولوں میں تیسری جماعت کے 44 فیصد بچے اور نجی سکولوں کے 43 فیصد بچے اردو اور سندھی فقرے پڑھ سکتے ہیں جبکہ پانچویں جماعت میں سرکاری سکولوں کے 45 فیصد اور نجی سکولوں کے 49 فیصد بچوں کو اردو/سندھی میں کہانی پڑھنی آتی ہے۔

انگلش سرکاری سکولوں میں تیسری جماعت کے 48 فیصد اور نجی سکولوں کے 52 فیصد بچے انگریزی حروف کو پڑھ سکتے ہیں۔ سرکاری سکولوں کے پانچویں جماعت کے 42 اور نجی سکولوں کے 51 فیصد بچوں کو انگریزی فقرے پڑھنے آتے ہیں۔

رپورٹ میں بتایا گیا ہے کہ&nbsp; سرکاری سکولوں کے تیسری جماعت کے 39 فیصد اور نجی سکولوں کے 43 فیصد بچے کم از کم جمع تفریق کر لیتے ہیں۔ پانچویں جماعت کے سرکاری سکولوں کے 35 فیصد اور نجی سکولوں کے 41 فیصد بچے تقسیم کرنا جانتے ہیں۔

<h2>&quot;نئے سرکاری سکول نہیں بن رہے&quot;</h2>

پچھلے 20 سال سے صحافتی شعبے سے وابستہ شاہد یوسف کہتے ہیں کہ سرکاری سکول میں پڑھانے والے اساتذہ نے پرائیویٹ سکول اور اکیڈمیاں بھی کھول رکھی ہیں اور سرکاری سکول کے طلباء اور والدین کو اپنے پرائیویٹ سکول میں پڑھنے پر مجبور کرتے ہیں۔

ان کا ماننا ہے کہ سرکاری سطح پر پابندی ہونی چاہیے کہ کوئی بھی سرکاری استاد اپنا پرائیویٹ سکول یا اکیڈمی نہیں کھول سکے گا۔

شاہد سرویا کہتے کہ ایک تو اساتذہ کی اکاؤنٹیبلٹی نہیں ہے، دوسرے مقامی لوگوں کی سرکاری سکولوں میں دلچسپی بھی کم ہے۔ بعض جگہوں پر سکول موجود نہیں ہیں یا پھر مڈل اور ہائی سکولوں کے فاصلے زیادہ ہیں جس کی وجہ سے بچے خاص طور پر لڑکیوں کا جانا مشکل ہوتا ہے۔ دوسری طرف نجی تعلیمی اداروں کی تعداد بڑھ رہی ہے کیونکہ وہ قریب سے قریب تر بنائے جاتے ہیں۔

فیصل باری کا بھی یہی ماننا ہے۔ وہ بتاتے ہیں کہ ملک میں نئے سرکاری سکول کافی عرصے سے نہیں بنائے گئے ہیں۔

&quot;پہلے یہ طریقہ کار تھا کہ چار پرائمری سکولوں کے اوپر ایک مڈل سکول ہوتا تھا لیکن اب ان دیہات یا علاقوں کی آبادی دوگنا ہو گئی ہے تو طلب بھی بڑھ گئی ہے اور اس طلب کو نجی سکول پورا کر رہے ہیں۔&quot; 
کیا کوئی حل ہے؟

فیصل باری کہتے ہیں کہ آئین میں بھی یہ بات لکھی ہوئی ہے کہ بچوں کی تعلیم ریاست کی ذمہ داری ہے۔ باقی ملکوں میں یہ ہو بھی رہا ہے اور اس کی بہت اچھی مثالیں بھی ہیں، سری لنکا اور بنگلہ دیش جیسے ترقی پذیر ممالک بھی عوام کو اچھے طریقے سے تعلیم دے رہے ہیں اور ایسا حکومتی اداروں کے ذریعے ہی کیا جارہا ہے۔

&quot;بدقسمتی سے ہمارا سرکاری ایجوکیشن سسٹم ہم سے سنبھل نہیں رہا۔ اس کا فائدہ نجی شعبے نے اٹھایا ہے۔صاحب حیثیت اور پالیسی سازوں نے اپنے بچے پرائیویٹ سکولوں میں ڈال دیے۔ انہیں تعلیمی شعبے کو ٹھیک کرنے میں کوئی دلچسپی نہیں۔&quot;

اب سوال یہ ہے کہ ہم جہاں&nbsp; کھڑے ہیں،&nbsp; کیا ہمیں بس انتظار کرنا چاہیے یا اس کا کوئی حل بھی ڈھونڈنا ہے؟

&quot;بہت سے لوگ&nbsp; بپلک پرائیویٹ پارٹنر شپ جیسے آپشن تجویز کرتے ہیں۔ دیکھا جائے تو پہلے ہی بچوں کے لیے ٹرانسپورٹ، کتابوں کی چھپائی، یونیفارم یا کچھ دوسری چیزیں ایسی ہی شراکت داری سے چل رہی ہیں۔&quot;

تاہم، وہ کہتے ہیں کہ اگر ایسا کرنا ضروری ہے تو اس کے لیے ایک قانونی طریقہ کار اپنانے کی ضرورت ہوگی۔ وہ یہ کہ سکول سرکاری ہی رہیں اور حکومت انہیں قلیل عرصے کے لیے ٹھیکے پر دیدے۔

&quot;اس سے یہ تاثر بالکل نہیں دینا چاہیے کہ حکومت نے عوام کو بے یارو مدد گار چھوڑ دیا ہے،&nbsp; اس عرصے میں حکومت اپنی صلاحیتوں کو بہتر&nbsp; کرے تاکہ وہ بچوں کو بہتر تعلیم مہیا کرنے لگے۔

پاکستان انسٹی ٹیوٹ آف ایجوکیشن کے ڈائریکٹر جنرل ڈاکٹر محمد شاہد سرویا نشاندہی کرتے ہیں کہ پنجاب میں پبلک پرائیویٹ پارٹنر شپ کے حوالے سے پہلے ہی تجاویز زیر غور ہیں۔

پنجاب اور سندھ میں تو کچھ سکولوں میں یہ نظام ایجوکیشن فاؤنڈیشن کے ذریعے پہلے ہی چل رہا ہے، جس کے نتائج بہتر آئے ہیں۔ دوسری بات یہ کہ جہاں پر بھی صوبائی حکومتوں نے بہتر اقدامات کیے ہیں وہاں کے نتائج بھی اچھے ہی رہے ہیں۔

پنجاب کے پرائیویٹ سکولوں میں کیا ہو رہا ہے؟

پرائیویٹ سکول میں تعلیم: احساس برتری یا کچھ اور ؟

Dive into the complexities surrounding the Narang Mandi crime, exploring its impact, investigations, and the broader implications for the community. Uncover the challenges and efforts to addr

Narang Mandi Crime: Unraveling the Incidents and Implications

محمد اکرم نارنگ منڈی کے محلہ رحمان پارک کے رہائشی ہیں جو&nbsp; صدر بازار میں چائے کا کاروبار کرتے ہیں۔ وہ 30 نومبر 2022ء کو اہل خانہ کے ساتھ نارووال گئے ہوئے تھے۔ اگلے روز جب واپس لوٹے تو گھر کے تالے الماریاں ٹوٹی پڑی تھیں اور تقریباً 85 لاکھ روپے کا سامان و نقدی غائب تھی۔

وہ بتاتے ہیں کہ ان کی بہن کی شادی طے تھی لیکن وہ ایک ہفتہ قبل انتقال کر گئیں جن کے جہیز کے لیے رکھی رقم 15 لاکھ روپے اور 15 تولے زیورات کے علاوہ 35 لاکھ روپے کے پرائز بانڈ چور لے جا چکے تھے۔

&quot;میں 15 ماہ سے تھانے اور ڈی پی او آفس کے چکر لگا کر تھک گیا ہوں مگر برآمدگی تو دور ابھی تک پولیس ملزمان کو ہی تلاش نہیں کر پائی۔&quot;

ضلع شیخوپورہ کے تھانہ نارنگ منڈی کے علاقے میں لگ بھگ 148 دیہات آتے ہیں جہاں تین پولیس چوکیاں بھی قائم کی گئی ہیں جن میں مہتہ سوجا، جنڈیالہ کلساں اور چک بھلہ شامل ہیں۔ اس کے باوجود یہاں جرائم کی شرح بہت زیادہ ہے۔

پولیس ریکارڈ بتاتا ہے کہ تھانہ نارنگ میں پچھلے تین ماہ میں 583 مقدمات درج ہوئے ہیں جن میں چوری اور ڈکیتی کے تقریباً 275 مقدمات شامل ہیں&nbsp; جبکہ 177 کیسز روزمرہ کے چھوٹے موٹے واقعات پر درج کیے گئے۔

مقدمات کی تفصیل سے پتہ چلتا ہے کہ اس دوران 50 سے زائد موٹرسائیکل، 80 تولہ زیور اور 50 لاکھ روپے سے زائد کا دھان چوری ہوا جبکہ مختلف وارداتوں میں کروڑوں روپے نقدی لوٹ لی گئی۔ محتاط اندازے کے مطابق ان چار ماہ میں شہریوں کو تقریباً پانچ کروڑ روپے کے مال و اسباب سے محروم کیا جا چکا ہے۔

بھارت کی سرحد سے آٹھ کلومیٹر کے فاصلے پر واقع اس تھانے کے پاس گشت کے لیے دو گاڑیاں ہیں جبکہ یہاں ایس ایچ او، ایک محرر، دو سب انسپکٹر، چار اے ایس آئی اور آٹھ کانسٹیبلوں سمیت 12 اہلکاروں پر مشتمل عملہ تعینات ہے، نو کانسٹیبل تین پولیس چوکیوں پر ڈیوتی دیتے ہیں۔

اعداد&nbsp; و شمار سے متعلق قابل بھروسا سمجھی جانے والی ویب سائٹ (statista) کے مطابق 2023ء میں لندن میٹروپولیٹن کی آبادی 14.37 ملین تھی جبکہ میٹروپولیٹن پولیس افسروں کی تعداد 34 ہزار 889 تھی یعنی لگ بھگ 412 افراد پر ایک پولیس افسر بنتا ہے۔

تھانہ نارنگ کے علاقے کی آبادی لگ بھگ دو لاکھ 60 ہزار ہے۔اس حساب سے دیکھا جائے تو 43 ہزار 333 افرد کے لیے ایک تفتیشی اور 12 ہزار 381 شہریوں کے لیے صرف ایک پولیس کانسٹبیل موجود ہے۔

ایک ہفتہ قبل اس تھانے سے 300 میٹر کے فاصلے پر ڈاکوؤں نے بینک سے رقم نکلوا کر جانے والے تاجر منیر راٹھور سے پانچ لاکھ روپے چھین لیے تھے۔ منیر بتاتے ہیں کہ متعدد بار ہیلپ لائن 15 پر کال کرنے کے باوجود پولیس ایک گھنٹہ 13 منٹ بعد پہنچی اور اس کے لیے بھی تاجروں کو سڑک پر احتجاج کرنا پڑا۔

اس سلسلے میں تھانہ نارنگ کے محرر اعجاز احمد یہ جواز پیش کرتے ہیں کہ پولیس کے پاس وسائل اور عملے کی قلت ہے جس کی وجہ سے جائے وقوع پر پہنچنے میں وقت لگ جاتا ہے۔

یہاں تعینات اسسٹنٹ سب انسپکٹر ارشاد احمد کا کہنا ہے&nbsp; کہ انہیں ایک پولیس موبائل کے لیے روزانہ صرف پانچ لٹر فیول (پٹرول یا ڈیزل)دیا جاتا ہے جبکہ تھانے کا علاقہ کافی وسیع ہے جس کے لیے یہ ایندھن انتہائی کم ہے۔ وسائل نہ ہونے کے برابر ہیں اور اس پر طرہ یہ کہ افسران، عدالت اور مدعی کا دباؤ الگ ہوتا ہے۔

وہ کہتے ہیں کہ نارنگ منڈی کا زیادہ تر حصہ پاک بھارت بارڈر کے قریب ہے جہاں راستے مشکل ہیں اور گاڑی کی سپیڈ انتہائی کم رکھنا پڑتی ہے۔ سرحدی دیہات میں کوئی واردات ہو جائے تو وہاں پہنچنے میں گھنٹوں لگ جاتے ہیں۔

مقامی صحافی شاہد یوسف یہ جواز تسلیم نہیں کرتے۔ وہ بتاتے ہیں کہ گزشتہ ماہ حکومت نے تھانہ نارنگ کی عمارت کی آرائش پر کم و بیش 30 لاکھ روپے خرچ کیے ہیں۔ جب عمارت پر اتنی رقم لگائی ہے تو یہاں تربیت یافتہ عملہ اور وسائل بھی مہیا کیے جا سکتے ہیں۔

انجمن تاجران کے جنرل سیکرٹری سیٹھ شاہد محمود بتاتے ہیں کہ نارنگ سے شیخوپورہ کوسوں دور ہے جہاں ڈی پی او آفس پہنچنا یہاں کے سائلین کے لیےآسان نہیں جس کی وجہ سے بہت سے لوگ اپنے مقدمات کی پیروی ہی نہیں کر پاتے۔

&quot; اگر ڈسٹرکٹ پولیس افسر ہر ماہ ایک دو دن نارنگ کو دے دیں یا یہاں کھلی کچہری لگا لیں تو جرائم میں کمی ہو سکتی ہے اور سائلین کی داد رسی بھی ہو جائے گی&quot;۔

شاہد یوسف کا کہنا تھا کہ اس علاقے میں مختلف خاندانوں کی آپسی دشمنیوں کے باعث لوگوں کے پاس اسلحہ ہے۔ معمولی تلخ کلامی پر بھی فائرنگ ہو جاتی ہے۔ اسلحے کو کنٹرول کرنے سے بھی امن وامان کی صورت حال بہتر ہو سکتی ہے۔

سابق جنرل سیکرٹری فیروزوالہ بار اورنگزیب ریحان سمجھتے ہیں کہ پولیس مقامی سیاست کاروں کے ہاتھوں استعمال ہوتی ہے جس کی وجہ سے چوری ڈکیتی و دیگر جرائم بڑھ رہے ہیں۔

تاہم تھانہ نارنگ کے سب انسپکٹر ملک اقبال جرائم میں اضافے کی وجہ لوگوں کے رویے کو قرار دیتے ہیں۔ وہ بتاتے ہیں کہ پولیس ملزم کو پکڑ کر مسروقہ مال برآمد کرتی ہے اور جب مدعی کو مال واپس مل جا تا ہے تو وہ گھر بیٹھ جاتا ہے جس کا جرائم پیشہ لوگوں کو براہ راست فائدہ ہوتا ہے۔

&quot; مدعی کی عدم پیروی کی وجہ سے عدالت ملزم کو ضمانت دے دیتی ہے اور وہ دوبارہ سرگرم ہو جاتا ہے۔ اگر مدعی کیس کی پیروی کرے اور ملزم کو عدالت سے سزا دلوائی دی جائے تو جرائم کی شرح کم ہوسکتی ہے&quot;۔

قانون دان مرزا عبدالباسط کا خیال ہے کہ اگر نارنگ میں دو تھانے بنا دیے جائیں اور علاقے کے داخلی و خارجی راستوں پر 24 گھنٹے پولیس موجود ہو تو امن و امان کے مسائل میں کمی ہو سکتی ہے۔

ایس ایچ اوتھانہ نارنگ انسپکٹر رانااعظم تصدیق کرتے ہیں کہ ان کے تھانے میں آٹھ کانسٹیبل اور چار تفتیشی ہیں جبکہ دیگر نو کانسٹیبلز کو چوکیوں میں تعینات کیا گیا ہے۔

&quot; کوئی سپیشل ٹاسک ہو تو پولیس لائنز سے نفری منگوا لی جاتی ہے۔ تاہم فی الحال ہمارے چار تفتیشی سارے نارنگ کو دیکھ رہے ہیں اور مقدمات کے بوجھ کے باوجود بہتر کام کر رہے ہیں۔&quot;

ڈی پی او شیخوپورہ نواز خاں کا کہنا ہے کہ 40 لاکھ سے زائد آبادی پر مشتمل اس ضلعے میں تین ہزار کے قریب پولیس اہلکار تھانوں میں تعنینات ہیں۔ کچھ نفری پولیس لائنز میں ریزو ہے اور کچھ سپیشل ڈیوٹی، سکواڈ و دیگر جگہ فرائض انجام دے رہے ہیں۔

وہ کہتے ہیں کہ ضلعے میں مزید 600 اہلکار بھرتی کیے جا رہے ہیں جنہیں مختلف تھانوں میں تعینات کیا جائے گا۔ تھانوں کو نئی موبائل گاڑٰیاں بھی فراہم کرنے پر غور کر رہے ہیں۔

انہوں نے دعویٰ کیا کہ پچھلے برسوں کی نسبت رواں سال شیخوپورہ پولیس کی کارکردگی میں 20 فیصد بہتری آئی ہے۔ اسلحہ کی نمائش اور منشیات فروشوں کے خلاف سخت کریک ڈاؤن کیا جا رہا ہے جس سے امید ہے کہ آنے والے دنوں میں مزید بہتری آئے گی۔

لیکن پولیس کے اپنے اعدادو شمار ڈی پی او کے دعوے کی تردید کرتے ہیں۔ 
پولیس کے فرنٹ ڈیسک ذرائع کے مطابق گزشتہ چار ماہ کے دوران تھانہ نارنگ منڈی میں سب سے زیادہ وارداتیں چوری اور ڈکیتی کی رپورٹ ہوئی ہیں جن کے بعد فائرنگ اور لڑائی جھگڑوں و دیگر واقعات کا نمبر آتا ہے۔

معظم نواز

نارنگ منڈی سے تعلق رکھنے والے معظم نواز مختلف پرنٹ, ڈیجیٹل اور الیکٹرانک میڈیا کے ساتھ کام کر رہے ہیں۔

نارنگ منڈی: نجی سکولوں کے طالب علموں کے نمبر زیادہ کیوں آتے ہیں؟

پرائیویٹ سکول میں تعلیم: احساس برتری یا کچھ اور ؟

شیخوپورہ: پولیس نارنگ منڈی میں جرائم کیوں نہیں روک پا رہی وجہ وسائل کی کمی یا کچھ اور؟