پینتیس سالہ حلیمہ باجوڑ کی تحصیل اتمانخیل کے ایک گاؤں کی رہائشی ہیں جو اپنے چھ بچوں سمیت گھر کے دس افراد کا کھانا تیار کر رہی ہیں۔ اگرچہ بچے ان کا ہاتھ بٹا رہے ہیں تاہم اتنے لوگوں کا روزانہ دو وقت کھانا بنانا آسان نہیں ہوتا۔

وہ بتاتی ہیں کہ چند سال پہلے تک وہ لکڑیوں پر کھانا بناتی تھیں۔ سالن اور چائے بنانا تو بڑا مسئلہ نہیں تھا، روٹی تندور پر پکانی ہوتی تھی جس کو گرم کرنے کے لیے بہت ساری لکڑیاں ڈالنا پڑتی تھیں۔ پہاڑوں پر جا کر لکڑیاں جمع کرنا اور انہیں گھر لانا زیادہ مشکل ہوتا تھا &quot;

&quot;سردیوں میں ہماری مشکلات مزید بڑھ جاتی تھیں کیونکہ مسلسل بارشوں سے خشک لکڑیاں کم پڑ جاتی تھیں۔ دن رات یہی فکر ہوتی کہ کھانا وقت پر نہ بنا تو کیا ہوگا؟ کئی بار گھر والوں کی باتیں سننا پڑتی تھیں۔&quot;&nbsp;

حلیمہ اپنے بازو پر جلن کا نشان دکھاتے ہوئے کہتی ہیں کہ یہ 13 سال پہلے تندور میں روٹی لگاتے ہوئے جھلس گیا تھا۔ ہاتھ تو اکثر جل جاتے تھے، تندور کا دھواں اتنا تیز ہوتا تھا کہ سانس لینا مشکل ہو جاتا اور آنکھوں میں آنسو آ جاتے تھے۔

&quot;ہمیں دو چار منٹ تاخیر ہو جاتی یا روٹیاں زیادہ لگانی ہوتیں تو تندور کی تپش کم ہو جاتی اور اسے دوبارہ گرم کرنا پڑتا تھا۔&quot;

تاہم اب وہ بائیو گیس پر کھانا بنا رہی ہیں، کہتی ہیں کہ شکر ہے حکومت کو خواتین کا بھی خیال آیا جس نے یہاں بائیو گیس کا پلانٹ لگا کر دیا ہے۔ تب سے ان کی لکڑیاں جمع کرنے، تپش اور دھوئیں کے عذاب سے جان چھوٹ گئی ہے۔

ایسے ہی بائیو گیس پلانٹس نے ناصرف حلیمہ بلکہ قبائلی اضلاع میں سیکڑوں خواتین کی مشکل آسان کردی ہے۔ تاہم ابھی تک لاکھوں گھرانے معلومات کی کمی یا دیگر وجوہات کے باعث لکڑی کو بطور ایندھن استعمال کر رہے ہیں۔&nbsp;

<h2>لاکھوں ٹن لکڑی کا بطور ایندھن استعمال درختوں اور ماحولیات کی تباہی&nbsp;</h2>

محکمہ شماریات کا 2023ء کا ڈیٹا &nbsp;بتاتا ہے کہ خیبرپختونخوا کے تقریباً 58 لاکھ 61 ہزار گھروں میں سے 41 لاکھ 84 ہزار اب بھی لکڑی پر کھانا پکاتے ہیں۔ 13لاکھ 22 ہزار گھرانے کھانا بنانے کے لیے قدرتی گیس، ایک لاکھ 70 ہزار سلنڈر اور ایک لاکھ 85 ہزار دیگر ذرائع استعمال کرتے ہیں۔

پاکستان انسٹی ٹیوٹ آف ڈیویلپمنٹ اکنامکس (پائیڈ) اور کامسیٹس اسلام آباد کی مشترکہ سٹڈی رپورٹ &nbsp;کے مطابق ملک کے ایک اوسط گھرانے نے 19-2018ء میں سالانہ اوسطاً ایک ہزار 706 کلو گرام لکڑی استعمال کی جس سے 19.29 گیگا گرام کاربن کا اخراج ہوتا ہے۔

واضح رہے یو این ڈی پی نے پاکستان میں 1991ء میں فی گھرانہ لکڑی کے سالانہ استعمال کا اندازہ دو ہزار 324 کلو گرام لگایا تھا۔

اگر تازہ ترین رپورٹ پر بھروسہ کیا جائے تو اس کا مطلب یہ ہے کہ خیبرپختونخوا میں 41 لاکھ 84 ہزار کنبے کھانا بنانے اور گھروں کو گرم کرنے کے لیے سالانہ لگ بھگ 71لاکھ 38 ہزار ٹن لکڑی جلاتے ہیں۔&nbsp;

یعنی صوبے میں گھریلو ایندھن کےلیے ہر سال لاکھوں درخت کاٹے جاتے ہیں جس سے ناصرف ماحول تباہ ہو رہا ہے بلکہ اس ایندھن کے جلنے سے ٹنوں کے حساب سے کاربن بھی خارج ہوتی ہے جو ماحولیاتی آلودگی کا باعث بن رہی ہے۔&nbsp;

ضلع باجوڑ کی 12 لاکھ 88 ہزار آبادی &nbsp;مجموعی طور پر ایک لاکھ 81ہزار 699 گھرانوں &nbsp;پر مشتمل ہے جن میں سے ایک لاکھ 54 ہزار 436 گھروں میں اب بھی لکڑی پر کھانا بنتاہے۔ ایک ہزار 348 خاندان قدرتی گیس، 786 سلنڈر اور باقی 25 ہزار کنبے مٹی کا تیل، بجلی، بائیو گیس وغیرہ بطور ایندھن استعمال کرتے ہیں۔

<h2>لکڑی جلانا انسانی صحت کے لیےخطرناک، آخر غریب کے لیے متبادل کیا ہے؟</h2>

طبی ماہرین کا کہنا ہے کہ گھر میں لکڑیاں جلانا انسانی صحت خاص طور پر خواتین اور بچوں کے لیے انتہائی خطرناک ہے۔&nbsp;

فزیشن ڈاکٹر محمد اقبال بتاتے ہیں کہ کھانا بنانے کے دوران لکڑی و کوئلے سے اٹھنے والا زہریلا دھواں اور کاربن کے ذرات ہر عمر کے لوگوں میں الرجی، سانس اور پھیپھڑے کی بیماریوں کا باعث بنتے ہیں۔

وہ کہتے ہیں کہ آگ کی تپش عورتوں کے بازو و چہرے کی جلد کو شدید نقصان پہنچاتی ہے جبکہ دھوئیں کے علاوہ شعاعیں (ریڈی ایشنز) آنکھوں کو متاثر کرتی ہیں۔ بعض صورتوں میں کاربن کے ذرات دل کی بیماری اور پھیپھڑے کے کینسر کی وجہ بھی بن سکتے ہیں۔

ڈاکٹر اقبال کے بقول گھریلو ایندھن کے لیے لکڑی کی بجائے گیس کا استعمال بہتر ہے۔&nbsp;

لیکن باجوڑ سمیت قبائلی اضلاع کے دیہات میں زیادہ تر لوگ غربت کی لکیر سے نیچے زندگی بسر کر رہے ہیں جن کے لیے قدرتی گیس تک رسائی اور ایل پی جی کے اخراجات برداشت کرنا ممکن نہیں ہے۔

اس صورت حال کے پیش نظر دیہی آبادی کے لیے بظاہر لکڑی کا کوئی متبادل نہیں جو انہیں پہاڑوں و جنگلات سے مفت میسر آجاتی ہے۔&nbsp;

تاہم انرجی ماہرین کہتے ہیں کہ لکڑی کا متبادل نہ ہونے کی بات سچ نہیں ہے، قدرتی گیس اور گرڈ کی بجلی ضرور مہنگی ہے مگر بائیوگیس اور سولر توانائی دونوں ابتدائی خرچے کے بعد مفت حاصل کی جا سکتی ہیں بشرطیکہ آپ پیدا کرنے والے بنیں۔ جن گھروں میں دوچار جانور موجود ہیں وہ ان کا ویسٹ (گوبر) استعمال کر کے مفت بائیوگیس حاصل کر سکتے ہیں۔ اس سلسلے میں قبائلی اضلاع میں کچھ کام ہوا بھی ہے۔

<h2>قبائلی اضلاع میں اب تک 300 بائیو گیس پلانٹس لگ چکے ہیں</h2>

پاکستان میں بائیو(گوبر) گیس کی پیداوار کا آغاز ویسے تو 20 ویں صدی کے دوسرے نصف میں ہوا جب 1959ء میں ٹنڈو جام &nbsp;(سندھ) میں پہلا بائیو گیس پلانٹ لگایا گیا۔ جبکہ خیبر پختونخوا میں 70ء کے عشرے میں پلانٹس لگانے کی کوششیں کی گئیں۔

سمال انڈسٹریز ڈیویلپمنٹ بورڈ &nbsp;خیبر پختونخوا نے 2011ء میں بھی 400 بائیوگیس پلانٹس لگانے کا منصوبہ بنایا مگر پسماندہ ٹیکنالوجی اور کمیونٹی میں عدم آگاہی کے باعث یہ بیل منڈھے نہ چڑھ سکی۔

تاہم صوبائی حکومت نے2017 میں &#39;اپ لفٹنگ دی سوشو اکنامک کنڈیشن اینڈ جینڈر مین سٹریمنگ آف لائیوسٹاک ان فاٹا&#39; کے نام سے ایک منصوبے کی منظوری دی جو محکمہ لائیوسٹاک نے تجویز کیا تھا۔

اس پراجیکٹ کے ڈائریکٹر ڈاکٹر محمد کامران بتاتے ہیں کہ وہ 2017 میں دو ماہ کے لیے جاپان گئے تھے جہاں جانوروں کے گوبر سے کمرشل لیول پر گیس پیدا کی جا رہی تھی۔ پلاننگ اینڈ ڈیویلپمنٹ(پی اینڈ ڈی) کی منظوری کے بعد اس منصوبے پر عمل درآمد شروع ہوا جس کے لیے ابتدائی طور پر چار کروڑ رکھے گئے۔

وہ کہتے ہیں کہ یہاں اکثر گھروں میں تین چار گائے یا بھینسیں موجود ہوتی ہیں اس لیے گھریلو سطح سے کام کا آغاز کیا گیا۔ اس کا مقصد گوبر (ویسٹ) منیجمینٹ، کاربن کے اخراج پر کنٹرول اور قابل تجدید توانائی کا حصول تھا۔

&quot;ہماری (حکومت کی) سوچ یہ تھی کہ اس منصوبے کا زیادہ فائدہ خواتین کو ہوگا ان پر کام کا بوجھ کم ہوگا اور لکڑی جلانے کے لیے درختوں کی کٹائی میں بھی کمی آئے گی۔&quot;

ڈائریکٹر کی مطابق پہلے مرحلے میں باجوڑ اور مہمند میں 150 بائیوگیس پلانٹس لگائے گئے، بعد ازاں اس منصوبے میں ایف آر کوہاٹ، کرم اور دیگر علاقوں کو بھی شامل کر لیا گیا۔ یوں 2022ء تک سرکاری سطح پر قبائلی اضلاع میں لگ بھگ 300 بائیو پلانٹس لگائے گئے۔

<h2>گھریلو بائیو پلانٹ کے اخراجات اور یہ کیسے کام کرتا ہے؟</h2>

ڈاکٹر محمد کامران بتاتے ہیں کہ فاٹا اپ لفٹنگ پراجیکٹ کے تحت انہوں نے جتنے بھی پلانٹ لگائے ان پر فی پلانٹ اوسطاً ایک لاکھ 70 ہزار روپے خرچ آئے۔ تاہم کسی بھی گھرانے سے کوئی رقم وصول نہیں کی گئی اور یہ تمام سرکاری خزانے سے لگا کر دیے گئے۔&nbsp;

انہوں نے بتایا کہ بائیو گیس کے لیے پہلے فلوٹنگ ڈرم زمین میں نصب کیے جاتے، ان میں گوبر ڈال دیا جاتا تھا جس سے گیس پیدا ہوتی تھی۔ لیکن اس میں مسئلہ یہ پیش آیا کہ ڈرم زنگ آلود ہو کر لیک ہوتے تو وہاں اکثر دھماکا ہو جاتا تھا۔

پھر نیپال میں اینٹوں اور کنکریٹ کے ڈرم بنانے کی ٹیکنالوجی (یا طریقہ کار) متعارف کرائی گئی۔ اب یہاں بھی زمین میں آٹھ سے دس کیوبک فٹ (226 سے 283 لٹر) کا گول ڈرم یاحوض تعمیر کیا جاتا ہے اور اس میں گوبر ڈالا جاتا ہے۔

ڈرم میں 24 گھنٹے کے اندر فرمینٹیشن (گلنے سڑنے کا عمل) سے گیس بننا شروع ہوجاتی ہے جو پائپ کے ذریعے 60 سے 70 فٹ دور موجود کچن میں پہنچائی جاتی ہے۔ اب گیس لیک نہیں ہوتی، یہ تجربہ زیادہ کامیاب رہا۔&nbsp;

ڈائریکٹر کے مطابق ایک گائے 24 گھنٹوں میں زیادہ سے زیادہ 20 کلوگرام گوبر دیتی ہیں جبکہ پلانٹ کو فعال رکھنے کے لیے روزانہ 40 کلوگرام ویسٹ چاہیے ہوتا ہے۔&nbsp;

یوں آٹھ سے 12 افراد پر مشتمل خاندان جس کے پاس کم از کم تین گائے موجود ہوں وہ گھر میں بائیو گیس پلانٹ آسانی سے لگا سکتا ہے۔ اس سے روزانہ ایک کلو گیس ملے گی جو تمام گھریلو ضروریات کے لیے کافی ہے۔&nbsp;

<h2>70 فیصد پلانٹس کامیابی سے چل رہے ہیں تو 30 فیصد غیرفعال کیوں؟</h2>

انٹرنیشنل جرنل آف انجنیئرنگ ورکس &nbsp;میں 2019ء میں شائع شدہ ایک سروے رپورٹ کے مطابق خیبرپختونخوا کے مختلف اضلاع میں نجی، سرکاری اور غیرکاری تنظیموں کے سرمائے سے لگائے جانے والے بائیو گیس پلانٹس میں سے تقریباً 27 فیصد بند پائے گئے جبکہ 73 فیصد کامیابی سے چل رہے تھے۔&nbsp;

بعد ازاں 2022ء میں ایگریکلچر یونیورسٹی پشاور اور محکمہ لائیو سٹاک کی مشترکہ سٹڈی میں بھی لگ بھگ 30 فیصد پلانٹس غیرفعال ہونے کی تصدیق ہوئی۔&nbsp;

پراجیکٹ ڈائریکٹر ڈاکٹر کامران اس حوالے سے بتاتے ہیں کہ ان کی کوشش تھی کہ صرف مطلوبہ معیار پر پورا اترتے والے خاندانوں ہی کو پلانٹس دیے جائیں۔ لیکن سیاسی مداخلت پر کچھ ایسے گھروں میں پلانٹس لگائے گئے جہاں محکمہ مطمئن نہیں تھا وہ پلانٹ آج غیرفعال پڑے ہیں۔

دوسرے کچھ لوگ پلانٹس میں گوبر برقت نہیں ڈالتے۔ ضروری ہے کہ پلانٹ کو روزانہ ایک مقررہ وقت پر فیڈ کیا ( گوبر ڈالا) جائے۔ اگر دو دن کا وقفہ ہو جائے تو گیس نہیں بنتی اور پورا ڈرم خالی کرنا پڑتا ہے جو زمیندار نہیں کرتے۔ یعنی زمیندار یا مالک کی سستی اور عدم دلچسپی پلانٹ کو غیرفعال کر دیتی ہے۔

ان کا کہنا ہے کہ حکومت چاہتی تھی کہ یہ پلانٹس لگانے کے عمل میں مقامی کاریگروں کو شامل کیا جائے تاکہ ٹیکنالوجی مقامی سطح پر منتقل ہو، لوگ اپنے گھروں میں پلانٹس لگائیں اور تکنیکی خرابی کی صورت میں خود ہی ٹھیک کریں۔

&quot;ہمارا مقصد روزگار کے مواقع پیدا کرنا، غربت میں کمی اور جنگلات و ماحول کا تحفظ بھی تھا مگر اس طرف لوگوں نے توجہ نہیں دی۔ الٹا ہم سے نوکری مانگنے آ جاتے تھے۔&quot;

اگرچہ قبائلی اضلاع میں سرکاری کے علاوہ مقامی لوگوں نے ذاتی سرمائے سے بھی نجی بائیو گیس پلانٹس لگائے ہیں مگر ابھی تک متبادل توانائی کا یہ ذریعہ زیادہ فروغ نہیں پا سکا۔

<h2>توانائی کا سستا ذریعہ، مگر گائے بھینسیں کم ہوتی جا رہی ہیں</h2>

بائیو گیس سے صرف خواتین ہی نہیں ککنگ سے وابستہ مرد بھی بھرپور استفادہ کررہے ہیں۔ تحصیل ماموند کے رہائشی فضل حق پچھلے 10 سال سے باجوڑ کے ایک ڈیری فارم میں بطور کک ملازمت کر رہے ہیں۔&nbsp;

وہ بتاتے ہیں کہ وہ چند سال پہلے تک گیس سلنڈر پر کھانا بناتے تھے۔ ہفتے میں چار سے پانچ کلو گیس استعمال کرتے تھے جو بہت مہنگی پڑتی تھی۔ بعض اوقات اچانک گیس ختم ہوتی انہیں کئی کلومیٹر سفر کر کے گیس لینے بازار جانا پڑتا تھا۔

&quot;جب سے فارم پر بائیو گیس پلانٹ لگا ہے، 24 گھنٹے گیس میسر ہے۔ یہ توانائی کا بہترین اور سستا ذریعہ ہے، بٹن کھولو کھانا بنانے کے علاوہ وضو، غسل یا برتن دھونے کے لیے پانی گرم کر لو۔ یہ گیس ہم 30 ملازمین کے لیے سردی گرمی میں کافی ہو جاتی ہے۔&quot;&nbsp;

ڈیری فارم کے منیجر ڈاکٹر رحمت شاہ بتاتے ہیں کہ اس علاقے میں تین بائیو گیس پلانٹس ہیں اور تینوں فعال ہیں۔ ضرورت پڑے تو بائیو گیس سے جنریٹر بھی چلایا جا سکتا ہے، بس یہ سٹور نہیں ہو سکتی۔&nbsp;

وہ سمجھتے ہیں کہ بائیو گیس پلانٹس میں لوگ بہت دلچسپی لے رہے ہیں مگر ماضی کے مقابلے میں اب گھروں میں گائے اور بھینسیں کم ہوتی جا رہی ہیں جس سے گوبر کی دستیابی کم ہو گئی ہے۔ یہاں لوگوں کی اکثریت کے پاس پلانٹ لگانے کے وسائل بھی نہیں ہیں۔

ان کا خیال ہے کہ باجوڑ میں 30 سے زیادہ ڈیری فارمز ہیں، اگر حکومت تعاون کرے تو یہاں بیشتر بے وسیلہ لوگوں کو بائیو گیس فراہم کی جا سکتی ہے۔&nbsp;

&quot; ان ڈیری فارمز پر بڑے بائیو گیس پلانٹس لگا دیے جائیں تو پائپ لائنوں کے ذریعے ارد گرد کے گھروں میں سپلائی دی جا سکتی ہے۔ اس طرح یہاں ماحول اور قدرتی جنگلات کو بچانے میں مدد مل سکتی ہے ورنہ درختوں کی کٹائی نہیں رکے گی &quot;

بلوچستان: دیسی بائیو گیس پلانٹ ضرورت کے ساتھ منافع بھی

قبائلی اضلاع میں بائیو گیس پلانٹس ماحول اور جنگلات کو بچانے میں کتنے مدد گار ہو سکتے ہیں؟

text

Residents of Bajaur, Khyber Pakhtunkhwa, planted trees on a mountain to protect their village from landslides. Over time, this initiative transformed the area into a dense forest, leading to 

Residents of Bajaur, Khyber Pakhtunkhwa, Turn a Mountain into a Dense Forest to Protect Against Landslides and Bring Positive Environmental Changes

پہاڑ نے بدلے میں قدرتی جنگل سے نواز دیا

video

Discover the unforeseen impact of Khyber Pakhtunkhwa's Billion Tree Tsunami Project, as dwindling groundwater levels prompt forced migration. Explore the delicate balance between environmenta

Unintended Consequences: Migration Amidst Khyber Pakhtunkhwa's Billion Tree Tsunami Project

ڈسٹرکٹ باجوڑ سے دیر کی طرف جائیں تو&nbsp; 14 کلو میٹر دور بائیں طرف کو ایک تنگ اور دشوار گزار لنک روڈ نکلتی ہے۔ یہ &quot;سڑک&quot; تین کلو میٹر دور گنداؤ گاؤں کی طرف جاتی ہے۔ راستہ اس قدر ناہموار ہے کہ گاڑی کو گاؤں پہنچنے کے لیے 30 سے 35 منٹ لگتے ہیں۔

گنداؤ پہنچتے ہی آپ کا سامنا ایک اونچے پہاڑ سے ہوتا ہے۔ مقامی لوگ اسے شینگس کہتے ہیں۔

پہاڑ اور اس کا دامن سرسبز درختوں سے ڈھکا ہوا ہے۔ گنداؤ تقریبا 200 خاندانوں پر مشتمل گاؤں ہے۔ یہاں بیشتر لوگوں کا ذریعہ معاش کھیتی باڑی ہے۔ وہ کبھی گندم، مکئی اور سبزیاں اگایا کرتے تھے مگر اب بیشتر زمینیں بنجر پڑی ہیں اور کئی خاندان یہاں سے دوسرے علاقوں کی جانب نقل مکانی کر رہے ہیں۔

نثار احمد کی عمر 43 برس ہے اور ان کے سات بچے ہیں۔ ان کا خاندان دو صدیوں سے شینگس پہاڑ کے دامن میں واقع گنداؤ گاؤں میں مقیم تھا۔ مگر کچھ عرصہ پہلے وہ اور ان کے بھائی کے اہل خانہ 18 کلو میٹر دور تحصیل سلار زئی میں منتقل ہوچکے ہیں۔

وہ بتاتے ہیں کہ پہاڑوں سے بہتے چشمے صدیوں سے یہاں کے باسیوں کی ضرورتوں کو پورا کرتے رہے۔ لیکن چند سال پہلے یہاں کے چشمے سوکھنے لگے اور زیر زمین پانی کی سطح بھی گرنے لگی۔

وہ بتاتے ہیں کہ پچھلے تین سالوں کے دوران یہاں سے 12 خاندانوں نے پانی کی کمی کی وجہ سے نقل مکانی کی ہے۔

نثار احمد نے لوک سجاگ کو بتایا کہ ان کے گاؤں میں 12 سے زیادہ قدرتی چشمے تھے جس سے سیکڑوں خاندانوں کو پانی ملتا تھا لیکن اب اس علاقے زیر زمین پانی 120 گز سے بھی زیادہ نیچے جا چکا ہے۔ لوگ شدید مشکلات کا شکار ہیں، خواتین کئی کئی کلومیٹر دور سے سروں پر اٹھا کر پانی لانے پر مجبور ہیں۔

<h2>گاؤں کا پانی کہاں گیا؟</h2>

خیبر پختونخوا میں تحریک انصاف کی صوبائی حکومت نے بلین ٹری منصوبہ شروع کیا تھا۔ اس منصوبے کا باقاعدہ آغاز 2015ء میں تحریک انصاف کے سربراہ عمران خان نے کیا۔ 2018ء تک بلین ٹری سونامی پراجیکٹ کے تحت 75 لاکھ درخت لگائے گئے جن میں یوکلپٹس کے پودے لگانے کا تناسب کل جنگلات کے پروگرام کا 23 فیصد تھا۔

محکمہ جنگلات باجوڑ کے ایک افسر نے نام نہ ظاہر کرنے کی شرط پر بتایا کہ محکمہ زراعت نے بھی ایکسلریٹیڈ ایمپلیمینٹیشن پروگرام کے تحت باجوڑ میں ایک لاکھ سے زائد درخت لگائے تھے جن میں یوکلپٹس کے دس ہزار 637 درخت شامل ہیں۔

ذاکر اللہ جان ماحولیاتی سائنس کے ماہر ہیں اور وہ خیبر پختونخوا کے محکمہ ریسرچ اینڈ ڈیویلپمنٹ میں بطور واٹر اینڈ سائل ایکسپرٹ کام کر رہے ہیں۔ انہوں نے لوک سجاگ کو بتایا کہ باجوڑ میں قدرتی چشمے خشک ہونے اور پانی کی زیر زمین سطح کم ہو جانے کی بنیادی وجہ بلین ٹری سونامی پراجیکٹ کے دوران ماحول دشمن درختوں کی شجرکاری ہے۔

&quot;حکومت نے بلین ٹری سونامی پراجیکٹ کے تیز ترین نتائج حاصل کرنے کے لیے زیادہ مقدار میں یوکلپٹس کے درخت لگائے کیونکہ یہ جلد بڑے ہو جاتے ہیں۔&quot;

انہوں نے بتایا کہ یوکلپٹس کا ایک درخت دن میں زمین سے پانچ سے پندرہ گیلن تک پانی جذب کرتا ہے، ایک گیلن تقریباً چار لٹر کے&nbsp; برابر&nbsp; ہوتا ہے۔&nbsp;

ذاکر اللہ کہتے ہیں یوکلپٹس کے پتے زہریلے ہوتے ہیں، یہی وجہ ہے کہ پرندے گھونسلا تو دور ان درختوں پر بیٹھنا بھی گوارا نہیں کرتے۔

&quot;یہ درخت قریبی فصلوں اور باغات کے لیے نقصان دہ ہوتا ہے۔ اس کی لکڑی عمارتی شٹرنگ یا ماچس کی تیلیاں بنانے کے علاوہ کسی اور کام نہیں آتی۔&quot;

محکمہ جنگلات باجوڑ کے کے کمیونٹی ڈیویلپمنٹ آفیسر جمیل احمد سرکاری بیانیے کے حمائتی ہیں۔

انہوں نے لوک سجاگ سے گفتگو کرتے ہوئے کہا کہ یوکلپٹس کی شجرکاری مقامی لوگوں کے مشورے سے کی گئی تھی اور اس علاقے کا موسم بھی یوکلپٹس کے لیے موزوں ہے۔

&quot;باجوڑ میں زیادہ تر لوگ لاچی ( یوکلپٹس کا مقامی نام)&nbsp; کو ترجیح دیتے ہیں کیونکہ وہ اس کو منافع بخش سمجھتے ہیں، یہ جلد تناور درخت بن جاتا ہے اور&nbsp; کٹائی کے بعد یہ اور&nbsp; تیزی سے بڑھتا ہے۔&quot;

وہ مزید کہتے ہیں، یوکلپٹس سے زیر زمین پانی کی سطح کا متاثر ہونا محض ایک مفروضہ ہے۔ ان درختوں سے پانی کی سطح بالکل بھی متاثر نہیں ہوتی۔ انہیں صرف پہلے تین سال دیکھ بھال کی ضرورت ہوتی ہے جبکہ چیڑ اور دیگر درخت تو اتنے وقت میں قد بھی نہیں نکال پاتے۔

اٹھاون سالہ حبیب الرحمن بھی گنداؤ گاؤں کے رہائشی ہیں۔ ان پر بیتنے والی افتاد سرکاری افسر کے بیانیے سے میل نہیں کھاتی۔

حبیب کھیتی باڑی کرتے ہیں لیکن اب پانی کی قلت سے بہت پریشان ہیں اور نقل مکانی کا سوچ رہے ہیں۔ مگر ان کے معاشی حالات انہیں اس بات کی اجازت نہیں دیتے۔

وہ&nbsp; بتاتے ہیں کہ 2019ء میں یہاں لاکھوں کی تعداد میں لاچی کے درخت لگائے گئے تو قدرتی چشمے آہستہ آہستہ خشک ہونا شروع ہو گئے جن چشموں سے پانچ انچ پانی آتا تھا اب ان کی سطح نصف انچ بھی نہیں رہی۔

&rsquo;&rsquo;یہ صرف ہمارے علاقے کا مسئلہ نہیں ہے جہاں بھی یہ درخت لگائے گئے ہیں وہاں اب لوگوں کو پانی کی کمی کا سامنا ہے۔&quot;

<h2>کیا صرف یوکلپٹس &quot;مجرم&quot; ہے؟</h2>

<a href="https://pcrwr.gov.pk/wp-content/uploads/2020/Water-Management-Reports/FATA-water-studies.pdf">پاکستان کونسل آف ریسرچ ان واٹر ریسورسز (PCRWR) کے 2019ء کی ایک تحقیق </a>کے مطابق چار سے پانچ سالوں کے دوران، مہمند اور خیبر کے اضلاع میں پانی کی سطح میں 90 میٹر سے زیادہ کمی دیکھی گئی ہے۔

اسی تحقیق میں یہ بھی کہا گیا کہ ضم شدہ اضلاع کی 36 فیصد آبادی پانی کے روایتی ذرائع کا استعمال کرتی ہے جن میں چشمے، ندی، نالے، اور بارش کے پانی کا ذخیرہ شامل ہے۔

اگست 2021ء کو وفاقی وزارتِ پانی و آبی ذخائر کی جانب سے سینیٹ میں ایک رپورٹ پیش کی گئی جس میں کہا گیا تھا کہ موسمیاتی تبدیلیوں کی وجہ سے خیبر پختونخوا کے پانچ اضلاع میں زیرِزمین پانی کی سطح پچھلے 10 سالوں سے انتہائی تیزی سے گر رہی ہے۔ اس رپورٹ میں اس خدشے کا بھی اظہار کیا گیا تھا کہ آئندہ چند سالوں میں انہیں شدید خشک سالی کا سامنا کرنا پڑ سکتا ہے۔ رپورٹ کے مطابق ضلع باجوڑ بھی فہرست میں شامل تھا جہاں زیر زمین پانی کی سطح 32.79 فٹ نیچے جا چکی ہے۔

پاکستان اس وقت آبادی کے لحاظ سے دنیا کا پانچواں بڑا ملک ہے جبکہ پاکستان ان سات ممالک میں شامل ہے جو موسمیاتی تبدیلی سے سب سے زیادہ متاثر ہوئے ہیں۔

تیس سالہ رحمان سید گنداؤں میں دو ایکڑ رقبے پرکھیتی باڑی کرتے تھے لیکن اب وہ ایک ہوٹل میں کام کرنے پر مجبور ہیں۔

رحمان بتاتے ہیں کہ پانی اتنا نیچے چلا گیا&nbsp; کہ ٹیوب ویل کے لیے اسے کھینچنا مشکل ہو گیا تھا۔

&quot;کبھی ہماری وادی سرسبز ہوا کرتی تھی، لوگ سبزیاں اگاتے اور انہیں اچھی خاصی آمدن ہو جاتی تھی لیکن اب زیادہ تر لوگ ہوٹلوں اور دکانوں میں مزدوری کرنے پر مجبور ہیں۔&quot;

ذاکر اللہ&nbsp; بتاتے ہیں کہ زیر زمین پانی کی سطح نیچے جانے کی ایک وجہ آبپاشی کا صدیوں پرانا نطام ہے۔

&quot;دنیا بھر میں آب پاشی کے لیے زمین سے پانی نکالا جاتا ہے لیکن وہ اپنے وسائل کی اہمیت اور استعداد سے واقف ہیں۔ ہم نے اپنے آبی ذخائر کو بغیر کسی حکمت عملی کے ضائع کیا ہے۔&quot;

اسسٹنٹ کمشنر باجوڑ خار محب یوسفزئی نے لوک سجاگ کو بتایا کہ باجوڑ میں قدرتی چشمے خشک ہونے اور زیر زمین پانی کی سطح نیچے جانے کی کئی وجوہات ہیں جن میں یوکلپٹس کی شجر کاری بھی ایک بڑی وجہ ہے۔

&quot;ضلعی انتظامیہ نے اسی لیے اپنی پالیسی میں کچھ تبدیلی کی ہے اور ہم یوکلپٹس کے بجائے ماحول دوست درخت لگانے پر کام کر رہے ہیں جس کے مثبت اثرات جلد نظر آ جائیں گے۔&quot;

اسسٹنٹ کمشنر خار محب اللہ خان نے لوک سجاگ کو بتایا، ضلعی انتظامیہ پانی کی سطح کو بہتر بنانے کے لیے چھوٹے ڈیمز بنانے کے مختلف منصوبوں پر کام کر رہی ہے۔ محکمہ آب پاشی نے گنداؤ گائوں کو پانی پہنچانے کے لیے تحصیل سلارزئی میں واقع راغگان ڈیم سے مختلف واٹر چینلز بنائے ہیں جس کے ذریعے اس علاقے تک پانی کی ترسیل یقینی بنائی جائے گی۔&nbsp;

دریائے پنجکوڑہ کے پانی کو دیر شہر کے سیوریج سے بچانا کس کی ذمہ داری ہے؟

بلین ٹری سونامی میں ماحول دشمن درختوں کی شجر کاری

ضلع باجوڑ کی تحصیل اتمانخیل سے تعلق رکھنے والے 48 سالہ عبدالرحمن کی صاحبزادی گورنمنٹ گرلز ڈگری کالج، تحصیل خار میں پہلے سمسٹر کی طالبہ تھیں لیکن انہوں نے پہلے ہی سمسٹر میں اپنا داخلہ کینسل کرا دیا، اب وہ ایک نیم سرکاری ادارے میں کام کرتی ہیں۔

&ldquo;میں نے اپنی بیٹی کو مجبوراً پہلے ہی سال کالج سے نکالا کیونکہ ان کے زیادہ تر کلاسز خالی ہوتی تھیں اور وہ تدریسی عمل سے بھی بالکل مطمئن نہیں تھی۔&quot;

یہ ضلع کا واحد گرلز کالج ہے، جس کا افتتاح ستمبر 2003ء میں اس وقت کے گورنر لیفٹیننٹ جنرل(ر) سید افتخار حسین شاہ نے ایمرجنسی بنیادوں پر ایک سرکاری ہسپتال کی پرانی عمارت میں کیا تھا۔ 2017ء میں یہاں بی ایس (اسلامیات) اور بی ایس (باٹنی) کی کلاسز کا بھی آغاز کیا گیا، لیکن تعلیمی سرگرمیوں اور تدریس کے معیار سے نہ تو طالبات، نہ ہی سٹاف اور نہ ہی والدین مطمئن نظر آتے ہیں۔

<h2>باجوڑ میں زیادہ تر بچیاں میٹرک کے بعد ہی تعلیم کو خیرباد کہہ دیتی ہیں</h2>

عبدالرحمن کا کہنا ہے کہ یہاں موزوں سٹاف نہیں ہے اور نہ ہی یہاں میرٹ پر تعیناتیاں ہوتی ہیں۔ انہوں نے کہا کہ باجوڑ کی لڑکیوں میں صلاحیتوں کی کوئی کمی نہیں لیکن یہاں تعلیمی ادارے اور سہولیات نہ ہونے کی وجہ سے زیادہ تر بچیاں میٹرک کے بعد ہی تعلیم کو خیرباد کہہ دیتی ہیں اور ان کے خواب ادھورے رہ جاتے ہیں۔

محکمہ تعلیم باجوڑ کی جانب سے فراہم کردہ دستاویز کے مطابق باجوڑ میں لڑکیوں کا ایک ہائیرسیکنڈری سکول، 14 ہائی سکول، 42 مڈل سکول اور 186 پرائمری سکول موجود ہیں، جبکہ یہاں لڑکیوں کی تعلیمی شرح 7.8 فیصد ہے جو مردوں کے مقابلے میں 22 فیصد کم ہے۔

کمیونٹی وولنٹیر نیٹ ورک کے سربراہ عطاء اللہ درانی کہتے ہیں کہ گورنمنٹ گرلز ڈگری کالج کے زوال کی بنیادی وجہ، مستقل عمارت&nbsp; کی عدم موجودگی ہے۔موجودہ عمارت جس نقشے پر بنائی گئی ہے، وہ تعلیمی ادارے کا ہے ہی نہیں، یہاں ہسپتال کے مختلف وارڈز کی شکل میں چھوٹے چھوٹے کلاس رومز ہیں، جن میں ایک کلاس کی سیکڑوں بچیوں کو بٹھانا مشکل ہو جاتا ہے۔

انہوں نے بتایا کہ کالج کی بس موجود ہے لیکن اس سے لڑکیوں کو کوئی فائدہ نہیں ہو رہا۔ پورے باجوڑ سے لڑکیوں کو کئی کلومیٹر فاصلہ طے کر کے پبلک یا پرائیویٹ ٹرانسپورٹ میں آنا پڑتا ہے، زیادہ تر معاشی طور پر کمزور والدین ٹرانسپورٹ کی سہولت نہ ہونے کی وجہ سے بھی اپنے بچیوں کو کالج نہیں بھیج سکتے۔

عطاء اللہ درانی کے مطابق کچھ عرصہ پہلے کالج کی لڑکیوں کے لیے پک اینڈ ڈراپ کی سہولت شروع کی گئی لیکن جلد ہی اسے یہ کہہ کر بند کر دیا گیا کہ بس خسارے میں ہے۔

<h2>60 فیصد سے زیادہ بچیاں داخلوں سے محروم رہتی ہیں</h2>

ضلع باجوڑ میں قائم 14 ہائی سکولوں سے ہر سال 600 سے زیادہ بچیاں میٹرک پاس کرکے اسی کالج کا رخ کرتی ہیں جن میں 60 فیصد سے زیادہ بچیاں داخلوں سے محروم رہ جاتی ہیں۔

گورنمنٹ گرلز ڈگری کالج خار میں رواں سال فرسٹ ائیر داخلوں کے لیے 400 سے زیادہ امیدواروں نے اپلائی کیا تھا جن میں 220 طالبات کو داخلہ دیا گیا تاہم گنجائش نہ ہونے کی وجہ سے سیکڑوں طالبات خواہش کے باوجود داخلہ لینے میں کامیاب نہ ہوسکیں۔ اس وقت سیکنڈ ائیر میں 215 طالبات زیر تعلیم ہیں جبکہ&nbsp; بی ایس (باٹنی) میں 128 اور بی ایس اسلامیات میں 124 طالبات داخل ہیں۔

فرسٹ ائیر کی طالبہ مناہل (فرضی نام) نے بتایا کہ چھوٹے کلاس رومز اور زیادہ تعداد کی وجہ سے انہیں امتحانی حال میں بٹھایا جاتا ہے، جہاں نہ تو سب لڑکیوں تک ٹیچرز کی آواز پہنچتی ہے اور نہ ہی شور کی وجہ سے وہ اور دیگر طالبات کچھ سمجھ پاتی ہیں۔ انہوں نے کہا کہ امتحانی حال میں پڑھانے کے لیے کالج انتظامیہ نے مائیک کا بندوبست کیا تھا لیکن کچھ ہی دن بعد وہ بھی خراب ہو گیا۔

<h2>شماریات (سٹیٹیسٹکس )کی ٹیچر بچیوں کو انگلش پڑھاتی ہیں</h2>

ضلع کے واحد گورنمنٹ گرلز ڈگری کالج خار باجوڑ میں انٹر کے تمام سیکشنوں اور بی ایس کے دونوں پروگرامز کے لیے انگلش کی صرف ایک لیکچرر تعینات ہے۔ بی ایس پروگرام کے لیے تعینات سٹاف میں ایک بھی ایم فل سکالر موجود نہیں ہے۔ بی ایس ریسرچ میتھاڈلوجی میں میں گورنمنٹ پوسٹ گریجویٹ فار بوائز کے کوالیفائیڈ سٹاف کی خدمات حاصل کی جاتی ہیں۔

مناہل بتاتی ہیں&nbsp; کہ کالج میں سٹاف کی کمی کی وجہ سے سٹیٹیسٹکس کی ٹیچر بچیوں کو انگلش پڑھاتی ہیں۔ اس طرح ایک سبجیکٹ کی ٹیچر دوسرا سبجیکٹ پڑھاتی ہے، جس پر ان کو کوئی عبور نہیں اور اس سے نتائج متاثر ہوتے ہیں۔

مالاکنڈ یونیورسٹی کی ویب سائٹ پر موجود معلومات کے مطابق سال 2023ء کے موسم بہار (سپرنگ) سمسٹر کے حالیہ امتحانات میں گورنمنٹ گرلز ڈگری کالج باجوڑ کے بی ایس چوتھے سمیسٹر کی 36 طالبات میں سے سات فیل ہوئیں جبکہ 12 طالبات پر یو ایف ایم ( نقل) کے کیسز بنائے گئے ہیں۔

مناہل کے مطابق کالج میں پینے کے پانی کا بھی کوئی بندوبست نہیں اور نہ ہی یہاں واش رومز فعال ہے۔ &quot;کالج میں صفائی والے سے لے کر مالی تک سب مرد تعینات ہیں، جو نہ خود اپنا کام کرتے ہیں اور نہ ہی ہم ان کے حوالے سے کوئی شکایت کر سکتے ہیں&quot;۔

انہوں نے کہا کہ کالج میں پریکٹیکل نہیں کرایا جاتا ہے کیونکہ لیبارٹیاں بند اور وہاں پڑا سامان خراب ہو چکا ہے۔

کالج میں تین لیب اٹینڈینٹ موجود ہیں، جن میں دو خواتین جبکہ ایک مرد شامل ہے۔

<h2>کالج میں پرنسپل سمیت خالی اسامیوں کی تعداد 13 ہے</h2>

کالج میں موجود سٹاف کی تعداد 21 جبکہ خالی اسامیوں کی تعداد 13 ہے، جس میں پرنسپل کی پوسٹ بھی شامل ہے۔ کالج&nbsp; کو اب 20 گریڈ پروفیسر کی جگہ 17 گریڈ کی ایک لیکچرر بطور پرنسپل چلا رہی ہیں۔

کالج کے لئے منظور شدہ 19 سکیل کی ایسوسی ایٹ پروفیسر کی چار اسامیوں پر ابھی تک ایک بھی تعیناتی نہیں ہوئی ہے اس طرح 18 سکیل کی اسسٹنٹ پروفیسرز کی نو پوسٹوں میں صرف ایک اسسٹنٹ پروفیسر یہاں تعینات ہے۔

کالج میں موجود مسائل اور ان کے حل کے حوالے سے لوک سجاگ نے پرنسپل اور سٹاف کا موقف جاننے کی کوشش کی لیکن انہوں نے اس حوالے سے اپنا موقف دینا سے انکار کر دیا۔

<h2>12لاکھ آبادی کے لیے لڑکیوں کا صرف ایک کالج کا ہونا عوام کے ساتھ مذاق ہے</h2>

سابقہ ممبر صوبائی اسمبلی سراج الدین خان نے لوک سجاگ کو بتایا کہ گورنمنٹ گرلز ڈگری کالج کے مسائل کے حل کے لیے انہوں نے کئی بار اسمبلی کی فلور پر آواز اٹھائی ہے اور قرار داد بھی جمع کی ہے کہ 12لاکھ آبادی کے لیے لڑکیوں کا صرف ایک کالج کا ہونا عوام کے ساتھ مذاق ہے لیکن کچھ نہیں ہوا۔

انہوں نے کہا کہ ایسی غفلت سے&nbsp; تعلیم کی فروغ میں حکومتی دلچسپی کا اندازہ لگایا جا سکتا ہے۔

&quot;اگر ہمیں موقع ملا تو گورنمنٹ گرلز ڈگری کالج خار کے تمام مسائل ترجیحی بنیادوں پر حل کریں گے&quot;۔

نگراں صوبائی وزیر برائے ٹرائبل افئیر سید عامر عبداللہ نے ضلع باجوڑ کے واحد گرلز ڈگری کالج میں سہولیات کے فقدان پر افسوس کا اظہار کرتے ہوئے لوک سجاگ کو بتایا کہ انہوں نے سیکرٹری ایجوکیشن کو ہدایات جاری کی ہیں کہ وہ باجوڑ کے گرلز کالج میں بی ایس پولیٹیکل سائنس، بی ایس کمپیوٹر سائنس، بی ایس لاء اور بی ایس زوالوجی کے پروگرام شروع کرنے کے لیے اقدامات اٹھائے۔

انہوں نے کہا کہ وہ کالج میں جدید سہولیات سے آراستہ معیاری کمپیوٹر لیب بنائیں گے اور یہاں موجود سٹاف کی کمی سمیت دیگر مسائل کے حل میں اپنا بھرپور کردار ادا کریں گے۔

مصباح الدین اتمانی

قبائلی اضلاع میں بائیو گیس پلانٹس ماحول اور جنگلات کو بچانے میں کتنے مدد گار ہو سکتے ہیں؟

پہاڑ نے بدلے میں قدرتی جنگل سے نواز دیا

بلین ٹری سونامی میں ماحول دشمن درختوں کی شجر کاری

باجوڑ کی 12 لاکھ آبادی کے لیے لڑکیوں کا واحد کالج پچھلے 20 سال سے سرکاری ہسپتال کی عمارت میں قائم