فائزہ اقبال خضدار کالج آف نرسنگ میں بیچلر آف نرسنگ (بی ایس این) کی طالبہ ہیں۔ انہیں یہاں پڑھتے ہوئے تین سال ہو گئے ہیں لیکن وہ ابھی سیکنڈ ایئر کے تیسرے سمسٹر میں ہیں۔ ہر سمیسٹر پر لگ بھگ ان کا پورا سال ہی صرف ہوا ہے اور اس میں ان کی تعلیمی کارکردگی یا کسی کوتاہی کا کوئی کردار نہیں۔

وہ بتاتی ہیں کہ ان کے کالج میں بیشتر مضامین کی اساتذہ ہی نہیں ہیں جس کی وجہ سے کلاسیں بھی باقاعدگی سے نہیں ہوتیں۔ اگر یہ حالات نہ ہوتے تو آج وہ چھٹے سمیسٹر میں پڑھ رہی ہوتیں۔ ان کا کہنا ہے کہ موجودہ صورت حال برقرار رہی تو بیچلر آف نرسنگ (بی ایس این) کی چار سالہ ڈگری مکمل کرنے میں انہیں آٹھ سال تو لازمی لگ جائیں گے۔

اس کالج میں تمام طالبات کو انہی حالات کا سامنا ہے جبکہ دو سال قبل انہیں ملنے والے ماہانہ وظائف بھی روک لیے گئے ہیں۔

خضدار میں نرسنگ سکول 2017ء میں کسی اور محکمے کی خالی کردہ ایک پرانی عمارت میں عارضی طور پر قائم کیا گیا تھا۔ ملک بھر میں جب نرسنگ ڈپلومہ ختم کر کے بی ایس این شروع کیا گیا تو 2019 میں اس سکول کو بھی کالج آف نرسنگ کا درجہ دے دیا گیا۔

نرسنگ سکول سے کالج تو بن گیا مگر اس کے لیے مطلوبہ وسائل فراہم نہیں کیے گئے۔ یہ کالج تین سو بستروں پر مشتمل خضدار ٹیچنگ ہسپتال سے منسلک ہے۔ ہسپتال میں نرسنگ سپرنٹنڈنٹ ہی تعینات نہیں جس کی اضافی ذمہ داریاں کسی مرد ڈاکٹر کو سونپی گئی ہیں۔

خضدار، قلات، سوراب، مستونگ، واشک اور آواران کے لیے اس واحد نرسنگ کالج میں بی ایس این کی 79 طالبات زیر تعلیم ہیں۔ پہلےسال میں19، دوسرے اور تیسرے سال میں یہاں 30، 30 طالبات نے داخلہ لیا جبکہ چوتھا بیچ ابھی شروع نہیں ہوا۔

دوسرے سمیسٹر کی طالبہ خالدہ عبدالحق بھی کالج کے حالات سے سخت مایوس اور انتظامیہ کے رویے نالاں ہیں۔ وہ شکوہ کرتی ہیں کہ محکمہ صحت کو نرسنگ کالج کی پرواہ ہے نہ ہی طالبات کے مستقبل کی فکر ہے۔ ہر تعلیمی سال کے ساتھ ان کا ایک سال ضائع ہو جاتا ہے۔

&quot;ہمارے والدین مایوسی کا شکار ہورہے ہیں۔ کوئی ان سے تو پوچھے کہ قبائلی سماج میں بارہ سال کن مشکلات سے انہوں نے ہمیں پڑھایا ہے۔اب وہ چار سال کے بجائے آٹھ سال کیسے برداشت کریں گے اور کیا ہمیں سکالر شپ صرف چار سال کا ہی ملے گا۔&quot;

طالبات نے تنگ آکر گزشتہ ماہ کالج آف نرسنگ میں پرنسپل تعینات نہ ہونے، سکالر شپس کی عدم ادائیگی، ٹرانسپورٹ اور بنیادی سہولیات کی عدم فراہمی کے خلاف احتجاج کیا اور دھرنا دیا جو ڈپٹی کمشنر اور ہیلتھ افسران سے مذاکرات کے بعد ختم کر دیا گیا۔

خالدہ کہتی ہیں کہ کالج میں انگریزی پڑھانے کے لیے استاد ہی دستیاب نہیں ہیں۔ طالبات نے کالج انتظامیہ سے مل کر ایک انگریزی ٹیچر کی خدمات حاصل کی ہیں جنہیں طالبات ماہانہ پانچ سو روپے چندہ جمع کر کے 25 ہزار روپے تنخواہ ادا کرتی ہیں۔

انہوں نے بتایا کہ نرسز ہاسٹل نہ ہونے کے باعث وہ پبلک ہیلتھ سکول کی لڑکیوں کے ساتھ رہائش پذیر ہیں اور کالج کے لیے مڈ وائفری ہی کی بس سے سفر کرتی ہیں۔ یہ بس صرف پک اینڈ ڈراپ دیتی ہے اس لیےکئی طالبات تو گاڑی نہ ہونے کےباعث کلینیکل آورز (وارڈ پریکٹس) پر ہی نہیں جا پاتیں۔

فائزہ اقبال نے انکشاف کیا کہ نرسنگ کالج کی عمارت میں پانی تک دستیاب نہیں ہے۔ تین کلاسز کے لیے صرف دو کمرے ہیں۔ طویل عرصہ سے پرنسپل کے بغیر محض دو ہی اساتذہ نرسنگ کالج کو چلارہی ہیں اسی لیے سکالرشپس بھی رکے ہوئےتھے۔

انہوں نے بتایا کہ مسلسل احتجاج کایہ فائدہ ہوا کہ ایک سینئرٹیوٹر کو پرنسپل کا عارضی چارج دے دیا گیا جو پڑھانے کے ساتھ کالج کا انتظام بھی سنبھال رہی ہیں۔اس سے طالبات کو ایک سال کے سکالر شپس مل گئے ہیں۔ تاہم دیگر یقین دہانیوں پر ابھی عمل نہیں ہوا۔

نرسنگ سکول خضدار میں پہلی پرنسپل رفعت ہدایت جنوری 2017ء میں تعینات ہوئی تھیں۔ اسی سال اگست میں مستونگ سے تعلق رکھنے والی سلمہ گل کو پرنسپل بنا دیا گیا۔ رفعت ہدایت نے پچھلے سال کوئٹہ تبادلہ کرا لیا اور سلمہ گل رواں سال ٹریننگ کے لیے چلی گئیں۔

اسی دوران چار ٹیوٹرز اور ایک ہیڈ نرس کو کالج میں رپورٹ کرنے کے احکامات جاری کیے گئے مگر ان میں کوئی بھی حاضر ہونے پر تیار نہیں ہوئیں ۔طالبات کے احتجاج پر نرسنگ کالج کی پرنسپل (گریڈ17)کا ایکٹنگ چارج ٹیوٹر بےنظیر (گریڈ 16) کو دے دیا گیا ہے۔

ایکٹنگ پرنسپل بے نظیر نرسنگ سکول کے قیام سے ہی یہاں ٹیوٹر چلی آرہی ہیں ۔وہ بتاتی ہیں کہ کالج کی عمارت صرف چھ کمروں پر مشتمل ہے جس میں سے چار چھوٹے کمروں میں پرنسپل آفس، لائبریری، کلرک آفس اور سٹور بنائے گئے ہیں اور صرف دو ہی کمروں میں کلاسز ہو سکتی ہیں۔

&quot;پہلے دو کلاسیں تھیں لیکن اب ہمارے پاس تیسرا بیچ بھی آ گیا ہے۔کلاس روم صرف دو ہیں۔ کالج کے ساتھ متصل ڈسٹرکٹ ہیلتھ ڈویلپمنٹ سنٹر کی عمارت اگر عارضی طور پر ہمیں دے دی جائے اور اس میں چند کمرے بن جائیں تو کلاسز شروع ہو جائیں گی۔&quot;

پرنسپل کا کہنا تھا کہ کالج میں نرسنگ انسٹرکٹرز اور ٹیوٹرز کی کل چھ اسامیاں ہیں۔ مگر نرس ٹیوٹر اور انگریزی ٹیوٹر سمیت پانچ اسامیاں خالی ہیں۔ نان ٹیچنگ سٹاف کی کل اٹھارہ اسامیاں ہیں جن پر صرف چار ملازم کام کر رہے ہیں۔ خضدار جیسے حساس علاقے میں طالبات کے لیے سیکورٹی گارڈ تک نہیں ہے۔

انہوں نے بتایا کہ سپرنٹنڈنٹ، اسسٹنٹ لائبریرین، سینئر کلرک، جونیئر کلر ک اور اسسٹنٹ وارڈن کی سیٹیں بھی خالی ہیں۔ اسی طرح کمپیوٹر آپریٹر، لیبارٹری اسسٹنٹ، ڈرائیور، نائب قاصد، سوئیپر، آیا اور مالی تک بھرتی کرنے کی اجازت نہیں ملی۔

پرنسپل کے مطابق نرسنگ کالج کا بجٹ نہ ہونے کے برابر ہے۔ طالبات کے ہاسٹل کا مسئلہ یہ ہے کہ کبھی بجلی تو کبھی جنریٹر خراب رہتا ہے۔ عمارت کی مرمت کے لیے فنڈ مانگے جاتے ہیں تو وہ بھی نہیں ملتے۔

گزشتہ سال صوبائی حکومت نے نرسنگ کالج کی نئی عمارت بنانے کی منظوری دے دی تھی۔ اس کے بجٹ کا تخمینہ 30 کروڑ لگایا گیا ہے۔ ایم پی اے خضدار میر یونس عزیز زہری نے17جولائی 2022ء کو ساسول روڈ پر کالج کی عمارت کا سنگ بنیاد رکھاتھا جس کے لیے اب تک 18کروڑ روپے جاری ہو چکے ہیں مگر عمارت کی ابھی چھتیں ڈالی جارہی ہیں۔

خضدار کے ڈسٹرکٹ ہیلتھ افسر بشیر احمد بنگلزئی بتاتے ہیں کہ نرسنگ کالج ڈویژنل ڈائریکٹر ہیلتھ سروسز کے ماتحت ہوتا ہے ۔ یہاں ہیلتھ سروس کا ڈویژنل ڈائریکٹر ہے اور نہ ہی اضافی چارج کسی کے پاس ہے اس لیے نرسنگ کالج کے امور متاثر ہیں۔اگر انہیں ایڈیشنل چارج دے دیا جائے تو وہ ان امور کو دیکھ سکیں گے۔

دلچسپ بات یہ ہے کہ بلوچستان میں ڈائریکٹر جنرل نرسنگ کا عہدہ بھی خالی پڑا ہے۔ ڈی جی ہیلتھ سروسز ڈاکٹر نور قاضی ہی ڈی جی نرسنگ کی اضافی ذمہ داری ادا کررہے ہیں۔

ان کا کہنا ہے کہ انہیں طالبات کی مشکلات کا احساس ہے۔ نرسنگ کالج کےلیے جلد از جلد ایڈہاک ٹیوٹر&nbsp; رکھے جائیں گے۔ اس ضمن میں کام ہو رہا ہے اور اسامیاں جلد مشتہر کر دی جائیں گی۔ نرسنگ کالج خضدار کےلیے رواں مالی سال میں مزید ساڑھے تین کروڑ روپے کا بجٹ رکھا گیا اور اس پر کام بھی تیزی سے جاری ہے۔

ناقص منصوبہ بندی یا سیاسی اقربا پروری: خضدار کے بچے اپنے تعلیمی حق سے کیوں محروم ہیں؟

'خضدار کالج آف نرسنگ میں چار سالہ ڈگری آٹھ سال میں مکمل ہونے کی گارنٹی'

text

خضدار کی سعدیہ نےغربت سے تنگ آکر&nbsp; قبائلی روایت توڑی اور بھائیوں کے خلاف موروثی جائداد میں حصہ لینے کے لیے عدالت کا دروازہ کھٹکٹا دیا۔

سعدیہ 15 سال کی تھیں کہ جب ان کے بھائیوں نے والد کی وفات کے بعد اپنی اکلوتی بہن کا وٹہ سٹہ کے تحت نکاح کر دیا۔

نکاح کے پانچ سال بعد سعدیہ کی شادی کر دی گئی توان کی تعلیم ادھوری رہ گئی۔

اب وہ 32 سال کی ہو چکی ہیں اور ان کے تین بچے ہیں۔شوہر کی بیروزگاری کے باعث گھر میں فاقوں نے ڈیرے ڈال رکھے ہیں۔

سعدیہ کے والد سکندر مسقط کی فوج سے بطور میجر ریٹائرڈ ہوئے تھے۔ بیٹی سے بہت پیار کرتے تھے اور انہیں عالمہ بنانا چاہتے تھے۔ سعدیہ کو&nbsp; اب بھی&#39;گلستان سعدی&#39; ازبر ہے۔

ان والد نے ترکے میں دو ایکڑ&nbsp; پر خوبانی اور سیب کا باغ، ایک مِنی ٹرک اور 12 ایکڑ غیر آباد اراضی چھوڑی تھی۔

سعدیہ اپنے بچوں کو اعلیٰ تعلیم دلانا چاہتی ہیں لیکن تنگدستی دامن گیر ہے۔ مسلسل اصرار کے باوجود انہیں والد کی جائیداد سے حصہ نہ ملا تو انہوں نے شادی کے 17 سال بعد&nbsp; حق وراثت کے لیے اگست 2022ءکو مقامی عدالت میں کیس دائر کردیا۔

اب وہ پُرامید ہیں کہ انہیں عدالت سے انصاف مل جائے گا۔

مگر سعدیہ اپنے وراثتی حصے کے لیے قانون کا دروازہ کھٹکھٹانے والی اکیلی عورت نہیں۔

پچھلے دو سال میں حق وراثت کے لیے اوسطاً سالانہ 42 خواتین نے ضلع کی مختلف عدالتوں سے رجوع کیا ہے۔

ڈسٹرکٹ بار کے مطابق رواں سال اس نوعیت کے 36 کیسوں کا فیصلہ ہو چکا ہے جبکہ 16 دعوے زیر سماعت ہیں۔

خضدار بار ایسوسی ایشن کے جنرل سیکریٹری عبدالسلام لہڑی 12 سے زیادہ خواتین کو وراثتی حق دلا چکے ہیں۔ان کے پاس اب بھی اسی نوعیت کے چھ مقدمات ہیں۔

وہ کہتے ہیں کہ یہاں اکثر خواتین کو وراثت میں حصہ نہیں ملتا۔ خواتین بھی بھائیوں اور رشتہ داروں کی ناراضی مول نہیں لینا چاہتیں۔

ضلع خضدار کی آبادی 16 لاکھ کے لگ بھگ ہے جس میں سے چھ لاکھ 81 ہزار کے قریب خواتین ہیں۔ یہاں خواتین میں شرح خواندگی 30 فیصد بتائی جاتی ہے۔

ضلعی ہیڈ کوارٹرز سے صرف 15 کلومیٹر دور جنوب میں واقع گاؤں فیروزآباد کی رہائشی 38 سالہ نور بی بی بھی وراثت سے محروم ہیں۔

&nbsp;نور بی بی چار بچوں کی ماں ہیں۔ان کے والد کا 2008ء میں انتقال ہوا تھا اور وہ ترکے میں دوپلاٹ چھوڑ گئے تھے۔

یہ دونوں پلاٹ سی پیک (بسیمہ ٹو خضدار) روڈ میں آگئے۔ سرکار نے ان کا 43 لاکھ 32 ہزار روپے معاوضہ دیا۔گزشتہ سال رقم ہاتھ آئی تو بھائی نے انہیں حصہ دینے سے انکار کردیا۔

نور بی بی کے بقول ان کا حصہ ساڑھے 14لاکھ کے قریب بنتا ہے۔ انہوں نے فروری 2023ء میں سیشن جج سے رجوع کر لیا۔ مقدمے کی دو پیشیاں ہوچکی ہیں اور رواں ماہ فیصلہ آنے کا امکان ہے۔

&nbsp;ان کے وکیل حیات کاکڑ کہتے ہیں کہ بدقسمتی سے خواتین کے حق وراثت کے حوالے سے کوئی خاص قانون نہیں ہے۔ بہت کم خواتین حق وراثت کے لئےعدالت سے رجوع کرتی ہیں کیونکہ حقوق ملنا تو در کنار کبھی کبھی انہیں جان سے بھی ہاتھ دھونا پڑتے ہیں۔

&quot;اگر وراثت کے تنازع پر کسی خاتون کا قتل ہو جائے تو خود کشی وغیرہ کا رنگ دے کر معاملہ دبا دیا جاتا ہے۔&quot;

انہوں نے بتایا کہ عموماً کہا جاتا ہے کہ &quot;حق وراثت کے لیے اس نے خاندان کو بدنام کر دیا ہے۔ اس قدر آزاد ہو گئی ہیں کہ عدالت جا پہنچیں۔&quot;

&quot;طعنہ زنی، مہنگے وکیلوں اور عدالتوں کے چکروں سے بچنے کے لئے زیادہ تر خواتین خاموش ہوجاتی ہیں&quot;۔

شہید بے نظیر ویمن سنٹر خضدار&nbsp; سے حاصل کردہ معلومات کے مطابق 2022ء میں حق وراثت کے لئے 54 خواتین نے اس سنٹر کے توسط سے عدالت سے رجوع کیا تھا جن میں سے 39 کو عدالتی حکم پر حصہ مل چکا ہے۔

عدالت نے فیصلہ دیا کہ شرعی حکم کے مطابق خواتین کو وراثت میں سے حصہ دیا جائے۔ ایسے پندرہ کیسز تاحال زیر سماعت ہیں۔

خواتین کو وراثت میں حصہ دینے کے بارے میں سپریم کورٹ کا منظور احمد ملک، امین الدین خان و دیگر کے کیس میں 21جنوری 2020ء کا فیصلہ بھی موجود ہے۔

اس فیصلے کے مطابق موروث اعلیٰ کی موت کے بعد تمام قانونی وارثان مرحوم کی چھوڑی گئی جائیداد کے ازخود مالک بن جاتے ہیں۔

جولائی 2021ء میں بلوچستان ہائیکورٹ کے ایک فیصلے میں کہا گیا کہ خواتین وارثان کے نام شامل کیے بغیر جائیداد کے معاملات کا عمل مکمل نہیں کیا جاسکتا۔ عدالت نے&nbsp; اپنے فیصلے میں کہا تھا کہ &quot;جائیداد کے انتقال سے قبل خواتین سمیت تمام حصے داران&nbsp; کے نام شامل کیے جائیں۔ خواتین کا نام شامل نہ کیا گیا تو انتقال کا سارا عمل کالعدم ہوجائے گا۔&quot;

ہائی کورٹ نے بورڈ آف ریونیو کو ہدایت کی تھی کہ قانونی وارث کو محروم رکھنے والوں کے خلاف تعزیرات پاکستان کی دفعہ 498&nbsp; اے کے تحت کیس درج&nbsp; کیا جائے۔

اس دفعہ کے تحت کم سے کم سزا پانچ سال اور زیادہ سے زیادہ 10سال قید اور 10 لاکھ روپے جرمانہ ہے۔

&quot;مخصوص مائنڈ سیٹ ہے۔وراثت کی تقسیم سے قبل ہی بہنوں کو حیلے بہانوں سے اپنا حصہ ہبہ یا معاف کرنے پر آمادہ کر لیاجاتا ہے۔ لیکن ایسا کبھی نہیں ہوا کہ بھائی بھی اپنا حصہ بہنوں کو ہبہ کر دیں۔&quot;

رکن صوبائی اسمبلی&nbsp; اوربلوچستان نیشنل پارٹی کے رہنما خواجہ ثناء بلوچ کہتے ہیں کہ بلوچ سماج میں کوئی ایسا رواج یا روایت نہیں کہ خواتین کو وراثت سے محروم رکھا جائے۔

انہوں نے بتایا کہ صوبائی اسمبلی میں خواتین کے حق وراثت پر قراردادیں تو بہت منظور کی گئیں مگر قانون سازی نہیں ہوئی۔

&quot;وفاق میں&#39; ویمن امپاورمنٹ ایکٹ 2017 &#39; پاس ہوا تو اس میں بھی حق میراث سے متعلق کوئی شق نہیں تھی&quot;۔

ثنا بلوچ کا کہنا ہے کہ 18ویں آئینی ترمیم کے تحت 2010 ء صوبوں کو قوانین بنانے کے اختیارات مل گئے تھے تاہم بلوچستان اسمبلی نے ایسا کوئی قانون بنایا نہ ہی کبھی بل پیش کئے جانے کی نوبت آئی۔

وہ کہتے ہیں اگر آن لائن سسٹم متعارف کرا دیا جائے تو وراثت سے محروم خواتین گھر بیٹھے دعویٰ دائر کرسکتی ہیں۔

مقامی رکن صوبائی اسمبلی میر یونس عزیز زہری&nbsp; کا خیال ہے کہ اگر کسی خاتون کو وراثت نہیں ملتی تو وہ شرعی عدالت جاسکتی ہے۔

&quot;قاضی شرعی قانون کے تحت فیصلہ دے دیتا ہے&quot;۔

انہوں نے دلیل دی کہ شرعی قانون موجود ہے اس لیے وراثت پر قانون سازی نہیں ہوئی تاہم اب اگر ضرورت پیش آتی ہے تو اسمبلی میں اس پر بات کی جا سکتی ہے۔

بارش کا پہلا قطرہ: وراثتی جائداد میں اپنے حصہ کے لیے عدالت کا دروازہ کھٹکھٹانے والی قبائلی خواتین

خضدار کی سعدیہ نے نہ طعنوں کی پروا کی نہ تھانے کچہری سے خوفزدہ ہوئیں، اپنے حق کے لیے عدالت پہنچ گئیں

خضدار کے قصبے باجکی میں نو سالہ طاہرہ اپنی کتابیں کاپیاں گود میں لئے سارا دن گھر کی دہلیز پر بیٹھی رہتی ہیں جیسے کسی کی راہ دیکھ رہی ہوں۔

وہ اپنے قصبے میں قائم لڑکیوں کے سرکاری پرائمری سکول میں پہلی جماعت کی طالبہ تھیں۔ ان کے سکول میں ایک ہی استانی پڑھاتی تھی جس کے جانے کے بعد سکول کو تالے لگ گئے۔ اس سکول میں 23 بچیاں زیرتعلیم تھیں جنہوں نے لڑکوں کے پرائمری سکول میں جانا شروع کر دیا جہاں طاہرہ کے والد عبدالفتاح بروہی واحد استاد کی حیثیت سے تعینات تھے۔ اس طرح طاہرہ اپنی ہم جماعت طالبات کے ساتھ اپنے والد کی شاگرد ہو گئیں۔

طاہرہ کے والد یرقان میں مبتلا رہنے کے بعد امسال جنوری میں انتقال کر گئے تو باجکی میں لڑکوں کے پرائمری سکول پر بھی تالا لگ گیا اور وہاں پڑھنے والے 55 بچوں کی تعلیم منقطع ہو گئی۔ اب اس سکول کے بچے مویشی چراتے ہیں اور بچیاں گھروں میں بیٹھی ہیں۔

باجکی کے رئیس دوست محمد بیس سال پہلے محکمہ مواصلات و تعمیرات سے بطور&#39; قلی&#39; ریٹائر ہوئے تھے۔ وہ کہتے ہیں کہ اس علاقے میں گرلز پرائمری سکول قائم ہوئے اٹھارہ سال ہو گئے ہیں لیکن یہ صرف چند سال ہی فعال رہا ہے۔ لڑکیوں کا سکول بند ہوا تو ان کی بیٹی افنانہ بھی اپنے آٹھ سالہ بھائی عدنان کے ساتھ لڑکوں کے سکول میں جانے لگی تھی جو ماسٹر عبدالفتاح کے انتقال کے بعد غیرفعال ہے۔

&quot;میں نے گزر بسر کے لیے چند بکریاں پال رکھی ہیں، بمشکل گھر چلا رہا ہوں، سوچا تھا بچوں کو پڑھاؤں گا مگر انہیں شہر بھیجنے کے اخراجات نہیں اٹھا سکتا۔ اب میں نے اپنے کمسن بیٹے عدنان کو بھی بکریاں چرانے کے لئے کہہ دیا ہے۔&#39;&#39;

محکمہ سیکنڈری ایجوکیشن کے مطابق ضلع خضدار میں تقریباً 670 پرائمری سکول قائم ہیں جن میں 183 لڑکیوں، 29 مخلوط اور باقی لڑکوں کے ہیں۔ ریکارڈ کے مطابق لڑکوں کے 141 اور لڑکیوں کے 45 سکول اساتذہ نہ ہونے کی وجہ سے غیرفعال ہو چکے ہیں۔ مجموعی سکولوں میں یہ تعداد 28 فیصد ہے۔

محکمہ ثانوی تعلیم کے ڈسٹرکٹ افسر نیاز احمد سمالانی نے &#39;لوک سجاگ&#39; کو بتایا کہ غیر فعال سکولوں کی اکثریت دیہات میں ہے اور یہ وہ سکول ہیں جہاں اساتذہ کی ریٹائرمنٹ یا انتقال کے باعث پوسٹیں خالی ہو گئی تھیں اور اساتذہ کی عدم دستیابی کے باعث وہاں تعیناتیاں نہیں ہو سکیں۔

ان کا کہنا ہے کہ انہوں&nbsp; نے ان سکولوں کی بحالی کے لیے کئی مرتبہ سیکرٹری ایجوکیشن کو خطوط بھی لکھے ہیں لیکن تاحال یہ مسئلہ حل نہیں ہوا۔

&#39;&#39;ضلعے کے سرکاری پرائمری سکولوں میں 628 اساتذہ کی کمی ہے۔ ان خالی پوسٹوں پر تقرری میرے اختیار میں نہیں ہے۔ چھ سات سکول ایسے ہیں جہاں رضاکارانہ خدمات انجام دینے والے اساتذہ میسر آ گئے ہیں اور ان سکولوں کو بحال کر دیا گیا ہے۔&quot;

ڈپٹی ڈسٹرکٹ ایجوکیشن افسر رئیس تنویر کرد اس مسئلے کے ایک اور پہلو کا تذکرہ کرتے ہوئے کہتے ہیں کہ اکثر سکولوں میں صرف ایک استاد تعینات ہوتا ہے اور اساتذہ کی ٹرانسفر، پوسٹنگ اور اٹیچمنٹ (طے شدہ علاقے کے بجائے کسی اور جگہ عارضی تعیناتی) عام طور پر سیاسی بنیادوں پر ہوتی ہے جس کے نتیجے میں بہت سے سکول اساتذہ سے محروم ہیں۔

انہوں نے بتایا کہ خضدار شہر سے چند کلومیٹر دور قومی شاہراہ پر واقع پیر عمر پرائمری سکول کا واحد استاد دو سال قبل انتقال کر گیا تھا جس کے بعد سکول بند ہے اور وہاں پڑھنے والے سو بچوں کی تعلیم متاثر ہوئی ہے۔

ماہر تعلیم ،مُصنفہ اورشاعرہ پروفیسر طاہرہ احساس جتک کا کہنا ہے کہ آٹھ لاکھ سے زیادہ آبادی والے اس ضلعے کے ہر پرائمری سکول میں کم از کم تین اساتذہ کی تعیناتی ضروری ہے۔ ایک استاد نرسری سے پانچویں جماعت تک سب بچوں کو نہیں پڑھا سکتا۔

&#39;&#39;خضدار میں بعض اساتذہ اپنے سیاسی تعلقات کی وجہ سے گھر بیٹھے تنخواہیں لے رہے ہیں اور بعض سکول میں محض حاضری دینے کو ہی کافی سمجھتے ہیں۔&#39;&#39;

سرکاری ریکارڈ کے مطابق ضلعے کے 814 سرکاری سکولوں میں مجموعی طور پر 47 ہزار 850 بچے زیر تعلیم ہیں جبکہ ان میں لڑکیوں کے 108 سکولوں سمیت 202 سکولوں کی عمارتیں ہی نہیں ہیں۔

تنویر کرد کا کہنا ہے کہ 318 سکولوں کی عمارتیں خستہ ہو چکی ہیں اور اگر ان کی بروقت مرمت نہ ہوئی تو یہ بھی ناقابل استعمال ہو جائیں گی۔

چھ ماہ قبل یونیسف نے خضدار میں سیلاب سے متاثرہ 178 سکولوں کی تعمیر ومرمت کے لئے ایک منصوبہ شروع کیا تھا لیکن اس میں بھی تاحال کوئی پیش رفت نہیں ہو سکی۔

اقبال مینگل

محمد اقبال مینگل کا تعلق خضدار سے ہے۔ وہ گزشتہ آٹھ سال سے شعبہ صحافت سے منسلک ہیں۔

'خضدار کالج آف نرسنگ میں چار سالہ ڈگری آٹھ سال میں مکمل ہونے کی گارنٹی'

خضدار کی سعدیہ نے نہ طعنوں کی پروا کی نہ تھانے کچہری سے خوفزدہ ہوئیں، اپنے حق کے لیے عدالت پہنچ گئیں

ناقص منصوبہ بندی یا سیاسی اقربا پروری: خضدار کے بچے اپنے تعلیمی حق سے کیوں محروم ہیں؟

Lok Sujag