حال ہی میں انٹرمیڈیٹ کا امتحان پاس کرنے والی ضلع باجوڑ کی طالبہ ایمن مسیح اپنی مذہبی برادری کے لیے مخصوص سمجھی جانے والی ملازمتوں کے بجائے کوئی دوسرا شعبہ اختیار کرنا چاہتی ہیں۔ ایمن کو تعلیم کے حصول میں والدین کی بھرپور سپورٹ حاصل رہی ہے اور وہ چاہتی ہیں کہ پڑھ لکھ کر کسی اچھی جگہ کام کریں لیکن مسیحی برادری کے ساتھ سرکاری ملازمتوں کے حصول میں روا رکھے جانے والی امتیازی رویے کے باعث وہ کئی طرح کے خدشات کا شکار ہیں۔

ان کا کہنا ہے کہ برادری کے لوگ انہیں یہی کہتے ہیں کہ اپنے لیے بروقت کوئی ملازمت ڈھونڈ لو ورنہ وقت گزرتا جائے گا اور کچھ ہاتھ نہیں آئے گا۔

&quot;ان کا کہنا کچھ ایسا غلط بھی نہیں ہے، کیونکہ برادری کی اکثر لڑکیاں پڑھنے لکھنے کے باوجود بھی سینٹری ورکر جیسی ملازمتوں پر ہی بھرتی ہو جاتی ہیں اور ملازمتوں میں ان کے لیے مختص پانچ فیصد کوٹہ بھی بڑی حد تک خالی ہی رہتا ہے۔&quot;

ایمن کے والد جمیل مسیح 1990 سے باجوڑ میں مقیم ہیں۔ وہ پاکستان آرمی سے ریٹائرڈ ہیں جس میں ان کا انتخاب بطور فٹبال کھلاڑی ہوا تھا اور وہ آرمی کی فٹ بال ٹیم کے کپتان رہ چکے ہیں۔

جمیل مسیح، ضلع باجوڑ کی مسیحی برادری کی تنظیم کے جنرل سیکریٹری ہیں۔ ان کے مطابق اس وقت باجوڑ میں مسیحی برادری کے کل 37 خاندان آباد ہیں، جن کی آبادی 327 افراد ہے۔ ان میں سے 41 افراد تحصیل خار کے جنرل ہیڈ کوارٹر ہسپتال میں خدمات سر انجام دے رہے ہیں۔ ان لوگوں میں 12 خواتین اور 29 مرد ہیں جبکہ ایک خاتون اور پانچ مرد سول کالونی خار میں ملازمت کرتے ہیں۔

جمیل کہتے ہیں کہ جب بھی کوئی بھرتی کھلتی ہے تو اس میں اقلیتوں کا ذکر نہیں کیا جاتا، محکمہ تعلیم میں حالیہ بھرتیوں کیلئے شائع ہونیوالے اشتہار میں اقلیتوں کا ذکر ہی نہیں تھا، جب ان کی برادری کو اس کا علم ہوا تو ملازمتوں کے لیے درخواست دینے کی مدت ختم ہو چکی تھی۔

کلاس فور میں بھرتیوں کے لیے یہ اشتہار ایک ایسے اخبار میں دیا گیا تھا جو بہت کم لوگ پڑھتے ہیں۔ اگر محکمہ ان لوگوں کو بھرتی کرنا چاہتا ہے تو اسے چاہیے کہ گرجا گھروں پر اشتہار لگائے تاکہ اقلیتی برادری کے لوگوں کو پتہ چلے اور وہ بھرتی کیلئے درخواستیں دے سکیں۔

ضلع باجوڑ سے ملحقہ قبائلی ضلع مہمند میں بھی اقلیتی برادری کے درجنوں خاندان کئی دہائیوں سے آباد ہیں۔ سرکاری ملازمت کے سرگرداں 24 سالہ&nbsp; نیلم مسیح ( فرضی نام ) کہتی ہیں کہ اقلیتوں کیلئے سرکاری ملازمتیں زیادہ تر محکمہ تعلیم، صحت، پولیس اور میونسپل نظام میں ہیں۔

&quot;سرکاری ملازمتوں کا ہمارے معاشرے میں سیاست سے گہرا تعلق ہے۔ جب ملازمتیں آتی ہیں تو بھرتیوں کا عمل دیانت داری سے انجام نہیں دیا جاتا۔ اگر کہیں کسی کی نمائندگی نہ ہو تو کوٹہ اور طرفداری تو چھوڑیں میرٹ پر بھی ملازمت نہیں ملتی۔ اسی وجہ سے اقلیتی برادری اچھی ملازمت حاصل کرنے سے محروم رہتی ہے۔&quot;

نیلم بتاتی ہیں کہ اقلیتی آبادی غربت اور معاشی مشکلات کا شکار ہے جو اعلیٰ تعلیم کا خواب بھی نہیں دیکھ سکتی، جو چھوٹی موٹی ملازمتیں بچتی ہیں ان میں بھی سیاسی عمل دخل اتنا زیادہ ہوتا ہے کہ اقلیتیں ان کے حصول سے محروم رہ جاتی ہیں۔

&quot;ان مسائل کے حل کیلئے ہم نے ہر دروازے پر دستک دی، پی ٹی آئی کے دور حکومت میں صوبائی وزیر انور زیب خان سمیت اراکین اسمبلی سے ملاقاتوں میں تسلیاں دی گئیں لیکن عملی طور پر کچھ نہیں ہوا۔ اقلیتی برادری سے پی ٹی آئی کے سابق صوبائی وزیر ولسن وزیر بھی بے بس نظر آئے اور اپنے لوگوں کیلئے کچھ نہ کر سکے۔&quot;

نیلم کے خیال میں اس کی بنیادی وجہ اقلیتی نمائندوں کا نامزدگی کے ذریعے منتخب ہونا ہے۔ وہ کہتی ہیں کہ 1997 تک جب اقلیتی نمائندگان الیکشن کے ذریعے منتخب ہوتے تھے تو ان لوگوں کے مسائل باآسانی حل ہو جاتے تھے اب چونکہ وہ نامزدگی کی بنیاد پر آتے ہیں اس لئے وہ صرف اپنی تنخواہ، مبینہ کمیشن اور تصویر کشی تک محدود رہتے ہیں۔

عابد رضا آل کرسچن کمیونٹی ضلع مہمند کے صدر ہیں۔ ان کے مطابق ضلع مہمند کے علاقے غلنئی میں اقلیتی برادری کے 39 خاندان آباد ہیں جو 1975 سے یہاں رہائش اختیار کیے ہوئے ہیں۔ یہاں اقلیتی کوٹے پر کسی حد تک عملدرآمد ہوتا ہے لیکن انہیں ان کا حق اب بھی پورا نہیں مل رہا۔

&quot;میں نیشنل ڈیٹا بیس رجسٹریشن اتھارٹی (نادرا) میں برسر روزگار ہوں لیکن مجھ جیسے بہت سارے تعلیم یافتہ نوجوان ایسے ہیں جو اپنے حق کے لیے کوششیں کر رہے ہیں لیکن وہ تاحال اس سے محروم ہیں۔ ہماری ہمیشہ کوشش رہی ہے کہ مخصوص کوٹے پر عملدرآمد ہو مگر بسا اوقات ہمیں ملازمتیں کھلنے کا تب علم ہوتا ہے جب لوگ ان نوکریوں پر بھرتی ہو کر ڈیوٹی شروع کر چکے ہوتے ہیں۔

خیبرپختونخوا میں ضم شدہ قبائلی اضلاع میں اقلیتی برادری کے لیے تمام محکموں میں بھرتی کے وقت پانچ فیصد کوٹے پر عملدراۤمد یقینی بنانے کیلئے کئی بار نوٹیفکیشن جاری ہو چکے ہیں جن میں ان کے پانچ فیصد کوٹے پر سختی سے عملدراۤمد یقینی بنانے کو کہا گیا ہے۔

باجوڑ کے سابق پولیٹیکل ایجنٹ عامر خٹک نے 27 دسمبر 2017 کو ضلع باجوڑ کے تمام محکموں کو خط ارسال کیا تھا کہ وفاقی حکومت کے احکامات کی روشنی میں پانچ فیصد کوٹے پر لازمی عملدراۤمد یقینی بنایا جائے۔ تاہم اب بھی زیادہ تر محکموں نے اس پر کوئی عمل نہیں کی، حالیہ بھرتیوں میں محکمۂ ابتدائی وثانوی تعلیم نے ان تمام احکامات کو مکمل نظر انداز کرتے ہوئے&nbsp; کلاس فور سیٹوں میں اقلیتوں کی حق تلفی کی ہے۔

اقلیتی برادری کا کہنا ہے کہ آتی جاتی حکومتیں جتنے بھی دعوے کرلیں کہ انہوں نے ہزاروں شہریوں کو نوکریاں دی ہیں، ان کا گلہ یہی ہے کہ اقلیتی برادری کو کسی نے ان کا مکمل حق نہیں دیا۔

جو چلے تو جاں سے گزر گئے: واسا فیصل آباد کے مسیحی مزدوروں کو درپیش جان لیوا خطرات

خیبرپختونخوا میں اقلیتی برادری مخصوص ملازمتی کوٹے میں حق تلفی پر نالاں

text

&nbsp;پچپن سالہ حاجی معروف خان ضلع باجوڑ کی تحصیل ماموند میں ماربل فیکٹری کے مالک ہیں جہاں ان کے ساتھ 10 سے زیادہ ملازمین کام کرتے ہیں۔

اشیائے خور و نوش کی بڑھتی قیمتوں، مہنگائی کی بلند شرح اور کئی طرح کے ٹیکسوں کے نفاذ سمیت دیگر ضروریات سے پریشان معروف خان کو رواں مہینے اس وقت ایک بڑا جھٹکا لگا جب انہوں نے اپنے فیکٹری کے بجلی کا بل دیکھا۔ جو بل کبھی چار سے پانچ لاکھ روپے تک آتا تھا، وہ اب ساٹھ ستر فیصد اضافے کے ساتھ جست لگا کر آٹھ لاکھ 65 ہزار روپے پر پہنچ گیا ہے۔

ان کا کہنا ہے کہ چند ماہ سے وہ بمشکل کاروبار چلا رہے ہیں۔ کئی طرح کے ٹیکس عائد ہونے سے ان کا منافع پہلے بہت کم رہ گیا ہے اور اب یہ سمجھ نہیں آ رہی کہ وہ بجلی کا اس قدر بھاری بل کیسے ادا کریں گے۔ انہیں اپنے ملازمین کی فکر کھائے جا رہی ہے کہ اگر فیکٹری بند ہو گئی تو یہ سب بے روزگار ہوجائیں گے۔

باجوڑ میں اس وقت کل 29 ماربل فیکٹریاں قائم ہیں۔ ان میں تحصیل ماموند کے علاقے تنی عمرے میں 13، شیخ کلے لوئے سم میں 15 اور خار میں ایک فیکٹری کام کر رہی ہے۔ ان فیکٹروں میں 600 سے زیادہ افراد برسر روزگار ہیں۔

یہاں اکثر ملازمین تنخواہ پر کام کرتے ہیں جن میں عام لیبر کی تنخواہ کم سے کم 25 ہزار جبکہ استاد کی تنخواہ 50 سے 60 ہزار روپے تک ہوتی ہے۔ تجربہ بڑھنے کے ساتھ مزدور اور استاد کی تنخواہوں میں بھی اضافہ ہوتا رہتا ہے۔ ان کے علاوہ کچھ مزدور دیہاڑی پر&nbsp; بھی کام کرتے ہیں جنہیں فیکٹری کے جانب سے کھانے اور چائے وغیرہ کے علاوہ 1200 روپے دیہاڑی دی جاتی ہے۔ یہاں پر کام کرنے والے اکثر افراد کا تعلق باجوڑ کے مختلف علاقوں سے ہے جنہیں اپنے گھر کے قریب روزگار میسر نہیں ہوتا۔

تحصیل ماموند کے گاؤں تنگئی کے رہائشی 23 سالہ فضل وہاب خان نے معاشی مشکلات کے باعث گھریلو اخراجات میں حصہ ڈالنے کے لیے ساتویں جماعت میں تعلیم چھوڑی اور چھ سال قبل تنی ماموند میں واقع مدینہ ماربل فیکٹری میں کام شروع کردیا۔

وہ کہتے ہیں کہ ابتدا میں ان کی آمدنی بہت کم تھی مگر انہیں امید تھی کہ اگر وہ فیکٹری میں موجود کسی بھی مشین کو چلانا سیکھ لیں گے تو ان کی تنخواہ بڑھ جائے گی۔ اس غرض سے وہ کبھی دیہاڑی اور کبھی تنخواہ پر کام کرتے رہے اور ماربل کی کٹائی اور صفائی سیکھنے لگے۔

&quot;پانچ سال مزدوری کرکے میں نے لیبر کے درجے سے ترقی پائی اور اب استاد یعنی ہنرمند کاریگر کے طور پر کام کر رہا ہوں، اب بھاری بھر کم کام کے بجائے مشین کا کام ہے جو قدرے آسان ہو گیا ہے اور تنخواہ میں بھی اچھا خاصا اضافہ ہوگیا ہے۔ لیکن بجلی کے بلوں میں بھاری اضافے سے مجھے یہ پریشانی لاحق ہے کہ کہیں کارخانہ بند نہ ہو جائے۔ اس طرح کڑی محنت کے بعد جو اچھے دن دیکھنے کو ملے ہیں وہ ختم ہو جائیں گے۔&quot;

واپڈا کے جانب سے ان فیکٹریوں کو روزانہ کی بنیاد پر 12 گھنٹے بلا ناغہ بجلی فراہم کی جاتی ہے۔ ان کی بجلی کے اوسط ماہانہ بل چھوٹی بڑی فیکٹری کے حساب سے دو لاکھ سے لیکر چار لاکھ روپے تک آتے تھے، مگر اس مہینے ان میں بہت زیادہ اضافہ ہو گیا ہے۔

آل باجوڑ ماربل فیکٹریز ایسوسی ایشن کے صدر طفیل خان کہتے ہیں کہ مہنگائی کی بے لگام لہر کے باعث فیکٹری کے اخراجات پہلے ہی بڑھ گئے اور اب رہی سہی کسر بجلی کے دگنے بلوں نے پوری کردی ہے اور ان حالات میں ماربل کی صنعت سے وابستہ لوگ اپنے کارخانے بند کرنے کے بارے میں سوچنے پر مجبور ہیں۔

&quot;چند ماہ قبل حکومت نے معدنیات ٹیکس کے نام پر ہر گاڑی پر 7000 روپے ٹیکس مقرر کیا گیا۔ اس کے علاوہ باجوڑ کے اندر ہی ٹریفک پولیس کے جانب سے ہر گاڑی سے پرچے کے نام پر 1500 روپے لیے جاتے ہیں۔ یہاں ماربل کی گاڑیوں کے علاوہ سیمنٹ ، لوہے، سٹیل اور دیگر سامان سے لوڈ گاڑیاں بھی روز آتی ہیں لیکن کسی کو اتنا تنگ نہیں کیا جاتا، جتنا ہمیں تنگ کیا جا رہا ہے۔ حکومت اگر ہمیں ریلیف نہیں دے سکتی تو بے جا تنگ بھی نہ کرے ۔ ہم نے اس مرتبہ پختہ فیصلہ کرلیا ہے کہ اگر اگلے ماہ بھی اس طرح بھاری بل آئے تو ہم احتجاجاً اپنے کارخانے بند کردیں گے ۔&quot;

ایک فیکٹری مالک جان غنی نے بتایا کہ ان کا خاندان طویل عرصہ سے ماربل کے کاروبار سے منسلک ہے، لیکن گزشتہ ماہ بعض خاندانی معاملات کے باعث ان کی فیکٹری بند رہی، ایک دن بھی کام نہیں ہوا، اس کے باوجود ان کا بل ایک لاکھ 65 ہزار روپے آیا ہے۔

&quot;میرے پاس فیکٹری کو مستقل بنیادوں پر بند کرنے کے علاوہ کوئی چارہ نہیں، کیونکہ جب میں نے کارخانہ چلایا نہیں تو مجھ پر بجلی کے بل کی صورت میں اتنے ٹیکسوں کا بوجھ کیوں لاد دیا گیا ہے، اگر فیکٹری چلاؤں گا تو کیا حال ہوگا۔

محکمہ واپڈا کے مقامی ذمہ دار نے نام ظاہر نہ کرنے کی شرط پر بتایا کہ ضلع باجوڑ چونکہ نئے ضم ہونے والے اضلاع میں سے ایک ہے جہاں رہائشی آبادیوں کو بمشکل دو سے تین گھنٹے بجلی دی جاتی ہے، جس کا بل بھی لوگ ادا نہیں کرتے، اس لئے یہاں واپڈا کیلئے آمدن کا واحد ذریعہ یہی ماربل فیکٹریاں ہی ہیں۔ انہی سے آنے والی آمدنی سے کام چل رہا ہے۔

&quot;اگر یہ لوگ بل نہیں دیں گے تو واپڈا یہاں رہائشی علاقوں کو جو تھوڑی بہت مفت بجلی دے رہا ہے، وہ بھی بند کردے گا۔&quot;

اوور بلنگ میں مقامی انتظامیہ کے کردار کے حوالے سے انہوں نے کہا کہ یہ مسئلہ حکام بالا کی جانب سے ہے اور وہی اس کا کوئی حل نکال سکتے ہیں۔

پتھر پیسنے والے کارخانوں میں موت پھانکتے مزدور: 'یہ کام ہم سب کو کھا گیا ہے'۔

'کاروبار چلانا دہرا عذاب بن گیا ہے'، باجوڑ میں ماربل کے صنعت کاروں نے فیکٹریاں بند کرنے کا الٹی میٹم دے دیا

خیبر پختونخوا حکومت کے محکمہ اطلاعات نے اپریل 2020 میں عسکریت پسندی کے اثرات زائل کرنے، حکومت کا مدعا بہتر انداز میں عوام تک پہنچانے اور مقامی انتظامیہ کے حوالے سے بہتر اطلاعات کیلئے قبائلی اضلاع میں پانچ نئے ریڈیو سٹیشنوں کے قیام کی منظوری دی جن میں شمالی وزیرستان، جنوبی وزیرستان، کرّم، مہمند اور باجوڑ کے اضلاع شامل ہیں۔ ضلع باجوڑ ان میں پہلا ضلع تھا جہاں ریڈیو سٹیشن کاقیام عمل میں آیا اور اس نے اپنی نشریات کا باقاعدہ آغاز بھی کردیا تھا۔

پختونخوا ریڈیو باجوڑ ایف ایم 91.1 کے ساتھ گزشتہ دو سال سے ایک پروگرام میں بطور میزبان کام کرنے والے ساحل تنہا کا کہنا ہے کہ باجوڑ میں تقریباً&nbsp; 80 فیصد لوگ دیہی علاقوں میں رہتے ہیں جہاں ٹی وی کا کلچر نسبتاً کم ہے، کیبل وغیرہ بھی نہیں ہے، چوبیس گھنٹوں میں اٹھارہ سے بیس گھنٹے بجلی کی عدم دستیابی بھی ایک مسئلہ ہے جبکہ ریڈیو ہر جگہ دستیاب ہوتا ہے بلکہ اب تو موبائل فون میں بھی ہے۔ لہٰذا ان علاقوں میں ہمیشہ کی طرح ریڈیو اب بھی بے پناہ مقبول ہے۔

اس چینل کی ابتداء کے بارے میں پختونخوا ریڈیو باجوڑ کے پروڈیوسر اور مینجنگ ڈائریکٹر فطرت بونیری نے بتایاکہ شروع میں یہ ریڈیو پراجیکٹ کے تحت چل رہا تھا اور ابتدا میں سٹاف کو ریگولر کرنے کا مسئلہ تھا۔ یکم جنوری 2022 کو ریڈیو کے عملے کو مستقل کر دیا گیا جو ایک بڑی کامیابی تھی۔ لیکن اس کے بعد سے ریڈیو کے آر جے اور دیگر سٹاف کی تنخواہیں، بجلی کے بل، انٹرنیٹ، جنریٹر کے تیل سمیت تمام آپریشنل اخراجات محکمۂ فنانس کی جانب سے جاری نہیں ہوئے۔

&quot;ہم نے ہر دروازے پر دستک دی مگر یہ اخراجات نہ تو ہمیں ریگولر بنیادوں پر جاری کیے جا رہے ہیں اور نہ ہی یکمشت، جس کے وجہ سے ہمیں شدید مشکلات کا سامنا ہے۔ محکمے کے اعلیٰ افسروں کے جانب سے کئی بار یقین دہانی کرائی جاچکی ہے کہ انہیں بلوں کی ادائیگی ہوجائے گی اور سٹاف اور ریڈیو کے مسائل حل ہوجائیں گے لیکن ابھی تک اس بارے میں کوئی واضح ٹائم ٹیبل نہیں دیا گیا۔&quot;

نوجوان صحافی تحسین اللہ خان پچھلے ڈیڑھ برس سے پختونخوا ریڈیو باجوڑ سے وابستہ ہیں۔ انہوں نے بتایا کہ ایک سال ہونے کو ہے اور حکومت ریڈیو کو چلانے کےکیلئے کوئی مالی وسائل فراہم نہیں کر رہی۔ ہر دفعہ امید بندھائی جاتی ہے کہ اس بار ہمارے بقایا جات جاری ہوجائیں گے مگر اب تک ایسا نہیں ہوسکا جو نہایت مایوس کن ہے۔

باجوڑ کے رہائشی شیخ جہانزادہ کہتے ہیں کہ قبائلی عوام کیلئے پختونخوا ایف ایم ریڈیو کسی نعمت سے کم نہیں، مگر حکومت شاید جان بوجھ کر اس نعمت سے عوام کو محروم کرنا چاہتی ہے۔ اگر عملے کو تنخواہیں اور ریڈیو چلانے کے اخراجات نہیں ملیں گے تو یہ چینل بند ہو جائے گا۔

باجوڑ کے سیاستدان شیخ جہانزادہ کئی بار قومی اسمبلی کا الیکشن لڑ چکے ہیں۔ ان کا کہنا ہے کہ انہوں نے 1982 سے ریڈیو سننا شروع کیا جب وہ میٹرک کے طالب علم تھے کیونکہ اس زمانے میں باجوڑ جیسے قبائلی علاقے میں خبروں تک رسائی کا واحد ذریعہ ریڈیو ہی تھا۔ ان کا کہنا ہے کہ مقامی لوگوں کو اطلاعات تک رسائی کے اس ذریعے کی دستیابی جاری رہنی چاہیے۔

باجوڑ کی تحصیل ماموند سے تعلق رکھنےو الے ضیاءالدین ماموند پختونخوا ریڈیو کے مستقل سننے والے ہیں۔ انہوں نے اس نمائندے کو بتایا کہ پہلے پختونخوا ریڈیو کی نشریات دن رات چلتی تھیں۔ مگر اب رات کے وقت ریڈیو بند رہتا ہے جس کے باعث ہم نہایت اچھے اور معلوماتی پروگرام سننے سے محروم ہوگئے ہیں، اب تو خدشہ یہ ہے کہ پورا چینل ہی بند ہو جائےگا۔

بڑے شہروں کی طرح اطلاعات کے جدید ذرائع، ٹی وی چینلز کی بھرمار اور تیز رفتار انٹرنیٹ تک رسائی نہ ہونے کے باعث خیبر پختونخوا کے ضم شدہ قبائلی اضلاع میں اب بھی معلومات تک رسائی کا اہم ذریعہ ریڈیو ہی ہے۔ اقوام متحدہ کے ادارے یو این ڈی پی کے ایک بیس لائن سروے کے مطابق قبائلی اضلاع میں اب بھی چونتیس فیصد (%34) لوگ اطلاعات اور خبروں کیلئے ریڈیو پر انحصار کرتے ہیں۔ اس ضرورت کو پورا کرنے کیلئے بین الاقوامی نشریاتی اداروں کی نشریات، سرکاری ریڈیو، فوج کے شعبہ تعلقات عامہ کے تحت چلنے والا ریڈیو چینل اور مختلف پرائیویٹ ریڈیو چینل کام کرتے آرہے ہیں۔

قبائلی علاقوں میں ایف ایم ریڈیو کی تاریخ ، افادیت اور اثرات کے حوالے سے کام کرنے والے محقق اور صوابی یونیورسٹی سے بطور اسسٹنٹ پروفیسر وابستہ ڈاکٹر علم خان کامقالہ &quot;Relevance of Radio in social construction in fata, A case study of Bajaur&quot; کے عنوان سے چھپ چکا ہے۔

ان کا تعلق باجوڑ کے پسماندہ علاقے ماندل سے ہیں۔ وہ کہتے ہیں کہ صدائے باجوڑ کے نام سے ریڈیو چینل کا آغاز جماعت اسلامی کے زیر اہتمام چلنے مدرسہ احیاء العلوم، یوسف آباد نے کیا تھا، جس پر صبح و شام دینی نشریات ہوتی تھیں، اس نے فوری مقبولیت حاصل کرلی تھی، پھر 2007 اور 2008 میں کالعدم تحریک طالبان پاکستان کے مقامی سربراہ مولوی فقیر محمد نے اپنے پروپیگنڈے کیلئے تحصیل ماموند کے علاقے سیوئی سے ایف ایم ریڈیو نشریات شروع کیں جن پر ان کی کاروائیوں کی تفصیلات اور جہادی ترانے نشر کیے جاتے۔

ان دنوں خیبر پختونخوا میں سو سے زیادہ ایف ایم ریڈیو چینل چل رہے تھے جن کے ذریعے عسکریت پسند اپنے ایجنڈے کو آگے بڑھا رہے تھے۔ انہوں نے ایف ایم ریڈیو سے مذہبی پروگراموں کے ذریعے عوام کو اپنی جانب راغب کیا اور اسی کی آڑ میں اپنے ایجنڈے کو آگے بڑھایا۔

2009 ء میں عسکریت پسندوں کے خلاف کارروائیوں کے ساتھ ان کی طرف سے چلائے جانے والے ایف ایم ریڈیو بند کیے جانے کا سلسلہ بھی شروع ہوا۔ اس دوران فوج کے زیر اہتمام &quot;ریڈیو امن&quot; کی نشریات شروع ہوئیں جن سے روزانہ کی بنیاد پر خبریں، مختلف موضوعات پر پروگرام اور کھیلوں کی لائیو کمنٹری نشر کی جاتی تھی، اس چینل کا بنیادی مقصد عوام میں طالبانائزیشن کے اثرات کو کم کرنا تھا۔

اسی سال صوبائی حکومت نے سرکاری ریڈیو چینلز کے ساتھ نجی ایف ایم ریڈیو شروع کرنے کی بھی اجازت دی۔ یہ ایف ایم چینلز زیادہ تر مقامی زبان میں اپنے پروگرام پیش کرتے آ رہے ہیں اور ان کا مقصد حکام کے مطابق قبائلی عوام کو آزاد معلومات دینا اور ان علاقوں میں غیرملکی ریڈیو چینلز پرانحصار کم یا ختم کرنا تھا۔

یہ چینلز تفریح کے ساتھ ساتھ معلومات، تبصرے، اصلاحی ڈرامے، حالات حاضرہ ، کھیل، ثقافت ،صحت، تعلیم اور دیگر اہم شعبوں میں عوام کو معلومات اور انٹرٹیمنٹ فراہم کررہے ہیں۔ ان میں سب سے مقبول پاکستان پیپلز پارٹی (پی پی پی) کے مقامی رہنما سید اخونزادہ چٹان کا ضلعی انتظامیہ کے ساتھ شروع کیا گیا &quot;ریڈیو شمال&quot; رہا ہے۔ پختونخوا ریڈیو کا قیام بھی اس عمل کا تسلسل ہے، اس کا چلتے رہنا عوام کیلئے اطلاعات تک رسائی کیلئے ضروری ہے

پاکستان میں مقیم افغان موسیقار: 'ہمارا سب کچھ ہمارے وطن میں رہ گیا ہے'۔

باجوڑ ریڈیو کے ملازمین تنخواہوں اور کام جاری رکھنے کے لیےضروری وسائل سے محروم: چینل بند ہونے کا خدشہ

حاجی محمد جان دو دہائیوں تک پاکستان اور افغانستان کے درمیان عام اشیاء کی تجارت سے وابستہ رہے ہیں۔ وہ باجوڑ میں واقع راہداریوں سے جلال آباد، خوست، کنڑ اور افغانستان کے دیگر شہروں تک سامان لاتے اور&nbsp; لے جاتے تھے۔

&quot;میں یہاں سے ٹرکوں میں چائے کی پتی، صابن، خوردنی تیل، دالیں، چاول اور شادی کا سامان نوا پاس سے اُدھر لے جایا کرتا تھا اور وہاں سے خشک میوہ جات اِدھر لاتا تھا جس سے اچھا خاص منافع ہوتا تھا۔&quot;

2008ء میں حکومت پاکستان نے نوا پاس اور پاکستان اور افغانستان کے درمیان اس جیسی درجنوں دیگر رسمی اور غیر رسمی راہداریوں کو سیکیورٹی وجوہات کی بنیاد پر بند کر دیا۔

جان محمد کا کاروبار راتوں رات ٹھپ ہو گیا۔

باجوڑ کی مقامی آبادی گذشتہ 15 سالوں سے ضلع کی تین راہداریوں - ناوا پاس، لیٹئی پاس اور کگا پاس- کو دوبارہ کھولنے کا مطالبہ کرتی آ رہی ہے۔ ان میں سے ناوا پاس ان کی ترجیحات میں شامل ہے۔

مولانا خان زیب ضلع باجوڑ کی تاریخ پر پشتو زبان میں لکھی گئی ایک کتاب کے مصنف ہیں۔ ساتھ ہی وہ ایک کاروباری شخصیت بھی ہیں اور تحصیل نواگئی کے بازار کے تاجروں کی نمائندہ تنظیم کے صدر رہ چکے ہیں۔

وہ کہتے ہیں: &quot;ان راہداریوں کی اہمیت صرف تجارتی نہیں بلکہ یہ عوامی روابط کا اہم ذریعہ ہیں کیونکہ اکثر جگہوں پر سرحد کے دونوں جانب ایک ہی قبیلہ آباد ہے۔ جب بدامنی کو جواز بنا کر یہ گزر گاہیں بند کی گئیں تو اطراف کے لوگوں کے درمیان سماجی روابط بھی متاثر ہوئے۔&quot;

جان محمد جب اپنے کاروبار کے مستقبل سے بالکل مایوس ہو گئے تو انہوں نے اپنی تمام جمع پونجی جوڑ کر باجوڑ ہی میں ماربل کا ایک چلتا ہوا کارخانہ خرید لیا اور اسی کاروبار سے وابستہ ہو گئے۔ لیکن وہ اب بھی سرحد کے اُس پار اپنی دوستیوں، کاروباری مراسم اور عزیزوں کا ذکر بڑے لگاؤ سے کرتے ہیں۔

نوا پاس کے دوبارہ کھلنے کی امید پر وہ کہتے ہیں کہ &quot;اگرچہ عمر گزرنے کے ساتھ پہلے کی طرح بھاگ دوڑ کی ہمت نہیں رہی ہے، لیکن اگر بارڈر کھلا تو ایک بار ضرور اپنے بچوں کو اس طرف افغانستان لے جا کر انہیں اپنے پرانے کاروباری دوستوں سے ملواؤں گا، شاید ہماری اگلی نسل میں کاروباری اور سماجی مراسم کا ٹوٹا ہوا سلسلہ بحال ہو جائے&quot;۔

<h2>راہداریاں بند ہونے سے کس کا بھلا ہوا؟</h2>

انور حسین کا تعلق بھی باجوڑ سے لیکن وہ چند دہائیوں سے سوات میں مقیم ہیں اور وہاں سبزی اور پھلوں کی منڈی میں آڑھت کا کام کرتے ہیں۔

انہوں نے لوک سجاگ کو بتایا کہ ان کے آبائی ضلع باجوڑ میں پھل اور سبزیاں وافر پیدا ہوتے ہیں۔ وہاں کے کاشت کار اور آڑھتیوں کو انہیں براستہ ناوا پاس افغانستان کے علاقوں کنڑ اور جلال آباد میں اچھے ریٹ مل جاتے تھے۔

&quot;اس قیمت پر ہم سوات کی منڈی میں وہ سبزیاں نہیں لے سکتے تھے۔ ان کے لیے ناوا پاس کا آپشن ختم ہونے کا ہمیں فائدہ ہوا۔ شام کو وہاں سے سبزی کی گاڑی لوڈ ہو کر علی الصبح ہماری منڈی پہنچ جاتی ہے، ہمیں تازہ سبزیاں کم نرخ پر مل جاتی ہیں۔&quot;

وہ مثال دیتے ہوئے بتاتے ہیں کہ باجوڑ کا آلو اکتوبر کے وسط تک منڈی میں آ جاتا ہے۔ اس وقت پاکستان کے کئی علاقوں میں آلو ناپید ہوتا ہے، اس لیے اس آلو کی فروخت سے انہیں کافی منافع ہوتا ہے۔

انہوں نے کہا &quot;دیکھا جائے تو (نواپاس) بارڈر کھلنے کا ہمیں تو نقصان ہی ہو گا، البتہ جو لوگ افغانستان سے آنے والے پھل پشاور کی منڈی کے توسط سے منگواتے ہیں، ان کو ضرور فائدہ ہوگا۔&quot;

پشاور کی منڈی میں کام کرنے والے تاجر حاجی رحمان کہتے ہیں کہ طورخم کی راہداری سے درآمد و برآمد کے لیے پشاور کے بیوپاری مڈل مین کا کردار ادا کرتے ہیں۔ راہداریوں کی بندش کے باعث باجوڑ اور ملاکنڈ ڈویژن کے دیگر اضلاع افغان تاجروں اور منڈیوں سے براہ راست معاملات نہیں کر پاتے۔ &quot;ان اضلاع کے بیوپاری ہمارے ہی ذریعے ساری تجارت کرتے ہیں&quot;۔

حاجی صاحب نے بتایا کہ مقامی پیداوار پہلے بڑی گاڑیوں کے ذریعے ان کے پاس پہنچتی ہے، جنہیں وہ دوسری گاڑیوں پر لاد کر افغانستان روانہ کرتے ہیں جس سے نقل و حمل کے اخراجات بڑھ جاتے ہیں۔

&quot;جیسے ہمارے پاس لوکاٹ یہاں پشاور 45 ہزار روپے کرایہ ادا کرنے کے بعد پہنچا، ہم نے دوسری گاڑی میں افغانستان بھجوایا، دونوں پر ہم نے کل ایک لاکھ 40 ہزار روپے کرایہ ادا کیا۔ اگر یہ باجوڑ کے راستے جائے تو چالیس سے پچاس ہزار روپے بچ سکتے ہیں۔&quot;

ضلع باجوڑ کے حاجی حبیب اللہ کئی دہائیوں سے چائے کی&nbsp; پتی کے کاروبار سے منسلک ہیں۔ انہوں نے بتایا کہ ناوا پاس راہداری سے افغان صوبے کنڑ کے علاقے اسد آباد تک ایک گھنٹے کی مسافت ہے لیکن اگر اسی مقام پر جانے کے لیے طورخم بارڈر سے براستہ جلال آباد جائیں تو سات گھنٹے لگتے ہیں۔ ناوار پاس سے ٹرک چالیس سے پچاس ہزار روپے تک لے گا جبکہ براستہ طورخم جانے میں اس سے تین گنا زیادہ رقم خرچ ہوتی ہے۔

<h2>نوا پاس جرگے کی کوششیں: کیا سب اچھا ہے؟</h2>

2018ء میں خیبر پختونخوا میں ضم ہونے والے سات قبائلی اضلاع میں سے اورکزئی کے سوا سب کی سرحد افغانستان سے ملتی ہے۔ ان اضلاع کو افغانستان سے ملانے والی درجنوں راہداریاں ہیں جو 15 سال سے بند ہیں

بس ضلع خیبر میں طورخم، ضلع شمالی وزیرستان میں غلام خان، ضلع جنوبی وزیرستان میں انگور اڈہ اور ضلع کرّم میں خرلاچی کی راہداریوں ہی کھلی ہیں۔

ان علاقوں کے خیبر پختونخوا میں انضمام کے بعد لوگ انفراسٹرکچر کی تعمیر&nbsp; کی توقع لگائے ہوئے ہیں۔ ساتھ ہی وہ یہ بھی سمجھتے ہیں کہ اس ترقی کے مکمل ثمرات انہیں تبھی نصیب ہو سکتے ہیں جب ان بند راہداریوں کو پھر سے کھول دیا جائے۔

چند ماہ پہلے ضلع باجوڑ اور افغان صوبے کنڑ کے قبائلی عمائدین اور تاجروں نے ناوا پاس راہداری کھولنے کے لیے ایک نمائندہ جرگہ تشکیل دیا تھا۔

اس جرگے کی قیادت کرنے والے باجوڑ چیمبر آف کامرس اینڈ انڈسٹری کے بانی اور صدر حاجی لعلی شاہ پختونیار&nbsp; کہتے ہیں &quot;یہ جرگہ بہت بڑی سطح پر ہو رہا ہے، جس کے کئی دور ہو چکے ہیں۔ یہ سلسلہ پچھلے سال اکتوبر میں شروع ہوا۔ 11 اکتوبر کو پہلا اور تین دسمبر کو دوسرا دور مکمل ہوا۔ رواں برس 21 جنوری، 18 فروری اور 27 مارچ&nbsp; کو بالترتیب تیسرا، چوتھا اور پانچواں دور چلا۔ چھٹا دور گزشتہ ماہ 17 اپریل کو مکمل ہوا۔&quot;

یہ تمام نشستیں ناوا پاس کی راہداری پر واقع زیرو پوائنٹ پر ہوتی رہیں جس میں دونوں اطراف سے حکومتی نمائندے، تاجر اور قبائلی مشران شریک ہوئے۔&quot;دونوں جانب سے ہمیں حتمی پیش رفت کی یقین دہانی کرائی گئی ہے۔ انشاء اللہ جلد ہی قوم کو اچھی خبر سننے کو ملے گی۔&quot;

اسی طرح کے خیالات کا اظہار کنڑ کے مرکز اسد آباد سے تعلق رکھنے والے قبائلی رہنما دلبار خان نے بھی کیا۔ وہ کہتے ہیں کہ کنڑ کی آدھی سے زیادہ آبادی کی رشتہ داریاں سرحد کے دوسری جانب آباد قبائل سے ہیں۔ ان گزر گاہوں کے کھلنے سے سماجی رشتے بھی بحال ہوں گے جو نہایت خوش آئند بات ہوگی۔

دلبار خان کہتے ہیں کہ ہمارے علاقے میں تازہ پھل اور خشک میوہ جات کثیر مقدار میں پیدا ہوتے ہیں، مگر پاکستانی منڈیوں تک ان کی رسائی میں کافی مشکلات پیش آتی ہیں۔ اگر یہ راہداریاں کھل جاتی ہیں تو&nbsp; امن و خوش حالی کا دور لوٹ آئے گا۔

کاروباری برادری کی ان کوششوں کے بارے میں ڈپٹی کمشنر ضلع باجوڑ انوارالحق نے کہا کہ مذاکراتی عمل وفاقی و صوبائی ارباب اختیار کی ہدایت کی روشنی اور ضلعی انتظامیہ کی سرپرستی میں جاری ہے۔ اس جرگے کو ضلعی انتظامیہ کا مکمل تعاون اور حمایت حاصل ہے۔

محمد بلال یاسر

خیبرپختونخوا میں اقلیتی برادری مخصوص ملازمتی کوٹے میں حق تلفی پر نالاں

'کاروبار چلانا دہرا عذاب بن گیا ہے'، باجوڑ میں ماربل کے صنعت کاروں نے فیکٹریاں بند کرنے کا الٹی میٹم دے دیا

باجوڑ ریڈیو کے ملازمین تنخواہوں اور کام جاری رکھنے کے لیےضروری وسائل سے محروم: چینل بند ہونے کا خدشہ

باجوڑ کے نوا پاس کے کھلنے کی امید: اب مقامی معیشت کیا رُوپ بدلائے گی؟