عام انتخابات جوں جوں قریب آرہے ہیں سسنسنی بڑھتی جا رہی ہے لیکن ابھی تک انتخابی مہم کے روایتی رنگ دکھائی نہیں دے رہے۔ تاہم اکا دکا گاڑیوں پر امیدواروں کے پوسٹر ضرور نظر آنے شروع ہو گئے ہیں۔

ضلع حافظ آباد&nbsp; 13 لاکھ 20 ہزار نفوس کی آبادی پر مشتمل ہے۔ یہاں رجسٹرڈ ووٹرز کی تعداد آٹھ لاکھ 10 ہزار 723ہےجن میں چار لاکھ 39 ہزار 770 مرد اور تین لاکھ 70 ہزار 953 خواتین ووٹر ہیں۔

اس ضلعے میں قومی اسمبلی کی ایک اور صوبائی اسمبلی کی تین نشستیں دی گئی ہیں۔ پچھلے انتخابات میں یہاں قومی حلقے کا نمبر این اے 87 تھا جو اب این اے 67 ہو گیا ہے۔

2018ء کے انتخابات میں یہاں سے تحریک انصاف کے شوکت علی بھٹی نے ن لیگ کی سائرہ افضل تارڑ اور اپنے چچا لیاقت عباس بھٹی دونوں کو ہرا دیا تھا۔ لیاقت بھٹی تحریک لیبک پاکستان(ٹی ایل پی) کے امیدوار تھے اور&nbsp; 44 ہزار سے زائد ووٹ لے کر تیسرے نمبر پر آئے تھے۔

حافظ آباد کی سیاست دہائیوں سے افضل حسین تارڑ اور مہدی حسن بھٹی کے خاندانوں کے گرد گھوم رہی ہے۔ سائرہ افضل تارڑ سابق صدر رفیق تارڑ کی بہو اور افضل تارڑ کی بیٹی ہیں۔

<hr />
<h2 style="text-align:center">حافظ آباد نئی حلقہ بندیاں 2023</h2>

2018 کا قومی اسمبلی کا حلقہ این اے 87 حافظ آباد 1 اب این اے 67 حافظ آباد 1 ہے 
یہ حافظ آباد ضلع کا واحد قومی اسبملی کا حلقہ ہے۔ جس میں اس ضلع کی مکمل آبادی شامل ہے۔

2018 کا صوبائی حلقہ پی پی 69 حافظ آباد 1 اب پی پی 37 حافظ آباد 1 ہے 
یہ حلقہ تحصیل حافظ آباد اور تحصیل پنڈی بھٹیاں کی دیہی آبادی پر مشتمل ہے۔ جس میں وینکے تاررڈ، کولو تاررڑ اور جلال پور بھٹیاں کی آبادیاں شامل ہیں۔ نئی حلقہ بندیوں میں اس حلقے میں کافی تبدیلیاں کی گئی ہیں جیسا کہ حافظ آباد شہر کے قریبی&nbsp; قانون گو حلقے حافظ آباد ایک اور دو ٹاؤن کمیٹی وینکے تارڑ دیہات کو بھی شامل کیا گیا ہے کالکی قصبے کے دو پٹوار سرکل چھوڑ کر باقی کو نکال دیا گیا ہے۔

2018 کا صوبائی حلقہ پی پی 70 حافظ آباد 2 اب پی پی 38 حافظ آباد 2 ہے 
یہ حافظ آباد ضلع کا شہری حلقہ ہے جس میونسپل کمیٹی حافظ آباد کی مکمل آبادی شامل ہے۔ اس کے علاوہ قصبہ چک چھٹہ کے تمام پٹوار سرکل اورکالکی قصبے کے کچھ پٹوار سرکل شامل ہیں۔ نئی حلقہ بندیوں میں اس حلقے سے حافظ آباد ایک اورحافظ آباد دو قانون گو حلقے کو نکال دیا گیا ہے جبکہ کچھ پٹوار سرکل چھوڑ کر پورا کالکی قانون گو حلقہ بھی اس حلقے میں شامل کردیا گیا ہے۔

2018 کا صوبائی حلقہ پی پی 71 حافظ آباد 3 اب پی پی 39 حافظ آباد 3 ہے 
یہ پنڈی بھٹیاں تحصیل کا حلقہ ہے۔ جس میں بھنڈی بھٹیاں میونسپل کمیٹی اور قصبہ سکھیکی کی آبادی بھی شامل ہے۔ نئی حلقہ بندیوں میں اس حلقے میں کالکی کے تین پٹوار سرکل شامل ہوئے ہیں جبکہ کسیسے قصبے کے تین پٹوار سرکل نکال دیے گئے ہیں۔ 
&nbsp;

<hr />
&nbsp;

تارڑ خاندان کے سربراہ میاں افضل دو مرتبہ رکن قومی اسمبلی رہے۔ 2002ء میں گریجویشن کی شرط کے باعث&nbsp; انہوں نے الیکشن نہیں لڑا اور پھر 2008ء میں اپنی صاحبزادی سائرہ تارڑ کو میدان میں اتار دیا۔ تبھی سے وہی اس نشست سے الیکشن لڑتی آ رہی ہیں۔

شوکت علی بھٹی کے والد مہدی حسن بھٹی 1985ء سے 1993ء تک مسلسل تین بار رکن پنجاب اسمبلی اور پھر دو مرتبہ رکن قومی اسمبلی&nbsp; بنے۔ مہدی حسن کے بھائی اور شوکت کے چچا لیاقت عباس بھٹی بھی تین بار ایم این&nbsp; اے منتخب ہو چکے ہیں۔

سائرہ افضل تارڑ اور شوکت علی بھٹی 2008ء سے اب تک تین بار مدمقابل آئے ہیں۔ دو چناؤ سائرہ افضل نے جیتے اور ایک میں شوکت علی کامیاب ہوئے۔ وہ ایم این اے سے پہلے ایک بار رکن صوبائی اسمبلی اور وزیر بھی رہ چکے ہیں۔

آٹھ فروری 2024 کے عام انتخابات کے لیے&nbsp; این اے 67 حافظ آباد سے 35 امیدواروں نے کاغذات نامزدگی جمع کرا دیے ہیں۔

اس بار بھی روایتی حریف سائرہ افضل تارڑ ن لیگ سے اور شوکت علی بھٹی تحریک انصاف کے ممکنہ امیدوار ہوں گے۔ تاہم مہدی حسن بھٹی نے احتیاطاً اس حلقے سے اپنی بیٹی انیقہ بھٹی کے کاغذات بھی جمع کرا&nbsp; دیے ہیں۔

دونوں امیدوار پارٹی کے ساتھ ذاتی ووٹ بینک بھی رکھتے ہیں۔ سائرہ افضل تارڑ&nbsp; ہمیشہ ن لیگ کے ساتھ کھڑی ہیں جبکہ بھٹی خاندان&nbsp; تحریک انصاف سے پہلے ق لیگ اور آزاد حیثیت میں جیت چکا ہے۔ یوں اس قومی نشست پر کانٹے دار مقابلہ متوقع ہے۔

اس حلقے سے امیدواروں میں وسیم الحسن شاہ بھی شامل ہیں۔ جنہوں نے پچھلا چناؤ یہاں صوبائی حلقے سے ٹی ایل پی کے ٹکٹ پر لڑا تھا اور 24 ہزار سے زائد ووٹ لیے تھے۔دلچسپ بات یہ ہےکہ وہ پیپلز پارٹی کے ممکنہ امیدوار بتائے جا رہے ہیں۔

شوکت بھٹی کے چچا اور یہاں سے ٹی ایل پی کے سابق امیدوار&nbsp; لیاقت&nbsp; بھٹی&nbsp; مسلم لیگ ن میں شامل ہو چکے ہیں اور انھوں نے کاغذات نامزدگی بھی جمع کرا رکھے ہیں۔ اسی طرح حافظ آباد سے تحریک انصاف کے سابق ایم پی اے مامون تارڑ اس قومی نشست پر استحکام پاکستان&nbsp; پارٹی کے امیدوار ہو سکتے ہیں۔

ضلع حافظ آباد میں صوبائی اسمبلی کی تین نشستیں ہیں جن کو پی پی 37، پی پی 38 اور پی پی 39 کے نمبر دیے گئے ہیں۔ ان تینوں حلقوں میں ن لیگ کے ٹکٹ کے خواہش مندوں کی فہرست کافی لمبی ہے اور اسی وجہ سے یہاں مقامی پارٹی عہدیداروں میں اختلافات بھی ہیں۔

حلقہ پی پی 37 حافظ آباد ون تحصیل پنڈی بھٹیاں اور تحصیل حافظ آباد کے بیشتر دیہات پر مشتمل ہے۔ اس نشست کے لیے سابق ایم پی اے مامون تارڑ سمیت 27 امیدوار میدان میں آئے ہیں۔

اس حلقے میں میاں شاہد بھٹی ن لیگ کے متوقع امیدوار&nbsp; ہیں لیکن ن لیگ کے ضلعی صدر محمد بخش تارڑ بھی کاغذات جمع کرا چکے ہیں۔ یہاں تحریک انصاف کے ٹکٹ کے لیے مہدی حسن بھٹی کے دوسرے بیٹے عمران عباس بھٹی اور امان اللہ سندھو امیدوار ہیں۔ جبکہ سابق ایم پی اے چوہدری اسد اللہ بھی کوشش کر رہے ہیں۔

پچھلے الیکشن میں مامون تارڑ نے اس حلقے سے&nbsp; تحریک انصاف کے ٹکٹ پر ن لیگ کے شاہد حسین بھٹی کو ہرا دیا تھا۔ لیکن وہ عمران خان کی گرفتاری کے بعد پارٹی چھوڑ گئے تھے اب یہاں صوبائی اور قومی دونوں نشستوں پر آئی پی پی کی طرف دیکھ رہے ہیں۔

پی پی 38 حافظ آباد ٹو حافظ آباد میونسپل کمیٹی اور نواحی دیہات پر مشتمل ہے۔ یہاں سے 26 امیدوار اپنے کاغذات نامزدگی جمع کرا چکے ہیں۔

شیخ گلزار ن لیگ کے ٹکٹ کے لیے مضبوط امیدوار ہیں۔ وہ اس حلقے سے منتخب ہونے والے ن لیگ کے سابق ایم پی اے&nbsp; مظفر علی شیخ کے قریبی رشتہ دار ہیں۔ اور اس خاندان کے متفقہ امیدوار بتائے جا رہے ہیں۔

اسی حلقے سے نامزدگی فارمز جمع کرانے والوں میں مہدی حسن بھٹی کے دو بھتیجے سکندر نواز، ضمیر الحسن بھٹی اور ایک بھتیجی رفعت بتول شامل ہیں۔سکندر نواز یا سابق&nbsp; پی ٹی آئی ٹکٹ ہولڈر ملک فیاض اعوان میں سے کوئی ایک تحریک انصاف کے امیدوار ہو سکتے ہیں۔

گل نواز اعوان،&nbsp; رائے صفدر علی، وسیم الحسن شاہ، زاہد سہیل اور عثمان خضر مانگٹ نے بھی اس حلقے سے کاغذات جمع کرا رکھے ہیں۔

پی پی 39 حافظ آباد تھری میونسپل کمیٹی پنڈی بھٹیاں، میونسپل کمیٹی سکھیکی اور تحصیل پنڈی بھٹیاں کے دیہات پر مشتمل ہے۔ اس حلقے سے گذشتہ انتخابات میں میاں انصر احسن بھٹی پی ٹی آئی کے ٹکٹ پر منتخب ہوئے تھے۔

انصر بھٹی نے نو مئی کے بعد تحریک انصاف چھوڑ دی تھی۔ اب ان کے تایا زاد بھائی عون انتصار بھٹی ن لیگ سے الیکشن لڑنا چاہتے ہیں۔ جبکہ&nbsp; سابق رکن قومی اسمبلی&nbsp; لیاقت بھی ن لیگ کے ٹکٹ کے لیے امیدوار ہیں۔

اس حلقے سے قمر جاوید گجر ایڈووکیٹ&nbsp; تحریک انصاف کے امیدوار ہوسکتے ہیں۔ وہ مہدی حسن بھٹی کے بھی کافی قریب سمجھے جاتے ہیں۔ بابر شفیق، سابق ایم پی اے سید شعیب شاہ نواز، ضمیر الحق اور سعدیہ لیاقت عباس سمیت 24 امیدوار سامنے آئے ہیں۔

اس حلقہ میں ٹکٹ پر ن لیگ تقسیم&nbsp; ہے۔ ضلعی صدر کی زیر قیادت ایک دھڑا&nbsp; لیاقت عباس بھٹی کو سپورٹ کے رہا ہے، جبکہ دوسرا گروپ جس کے سرپرست میاں شاہد ہیں وہ میاں شاہد بھٹی کے عزیز عون انتصار بھٹی کی حمایت کر ریا ہے۔

تاہم&nbsp; قومی حلقے میں تارڑ اور بھٹی خاندان میں مقابلہ ہے تو حافظ آباد کی تینوں صوبائی نشستوں پر بھی وہی امیدوار مضبوط ہو گا جسے ان خاندان کی سپورٹ ہو گی۔

<h2>حافظ آباد کے لوگ الیکشن کمیشن سے ناراض کیوں ہیں؟</h2>

حافظ آباد&nbsp; پنجاب&nbsp; کے سب سے چھوٹے اضلاع میں سے ایک ہے۔ مگر 2008ء اور 2013ء کے انتخابات میں قومی اسمبلی کے دو حلقے تھے لیکن پھر ضلعے کو ایک ہی قومی نشست دے دی گئی۔ اسے مقامی لوگ ناانصافی قرار دیتے ہیں۔

&nbsp;نئی حلقہ بندیوں میں الیکشن کمیشن نے حافظ آباد شہر اور اس کے کچھ دیہات کو ضلع گوجرانوالہ کے حلقہ این اے 81 میں شامل کر دیا۔ جبکہ باقی ضلعے کی آباد ی پر مشتمل این اے 67 بنا دیا ہے۔ یہاں کے سیاسی کارکن حافظ آباد کو طنزاً&nbsp; &#39;سر کٹا ضلع &#39; کہہ کر پکارتے ہیں۔ یعنی ضلعے کا ہیڈکوارٹر ہی دوسرے شہر کے حلقے کا حصہ بن گیا ہے۔

الیکشن کمیشن نے حلقہ بندیوں کی ابتدائی رپورٹ میں میونسپل کمیٹی اور حافظ آباد قانونگوئی کو تحصیل نوشہرہ&nbsp; ورکاں سے ملا کر این اے 81 &#39;گوجرانوالہ کم حافظ آباد&#39; کا نام دے دیا۔ جس میں حافظ آباد ضلعے کی تقریباً ساڑھے تین لاکھ آبادی شامل ہے۔

&nbsp; مسلم لیگ نواز کی امیدوار سائرہ افضل تارڑ نے بھی اس اقدام پر اعتراضات اٹھائے تھے۔

حافظ آباد کے سیاسی کارکن محمد منیر بتاتے ہیں کہ ضلع جہلم اور حافظ آباد کی آبادی میں صرف 62 ہزار کا فرق ہے لیکن وہاں قومی اسمبلی کے دو حلقے جبکہ یہاں ایک ہی حلقہ ہے۔ یہ سراسر نا انصافی ہے۔

ابتدائی حلقہ بندیوں کے بعد حافظ آباد سے معروف قانون دان احسن بھون سمیت متعدد&nbsp; افرد نے درخواستیں دائر کی تھیں۔ ان سب لوگوں کا موقف تھا کہ اس ضلع کو دو مکمل قومی اسمبلی کے حلقے دیے جائیں۔ لیکن ضلعے کے ڈیڑھ حلقے کو بھی پھر ایک کر دیا گیا۔

خوشاب میں ماضی کے اتحادی آمنے سامنے، مخالف ایک دوسرے کے مددگار بن گئے

ضلع حافظ آباد کی سیاست دہائیوں سے تارڑ اور بھٹی کے خاندانوں کے گرد گھوم رہی ہے

text

پنجاب کے وسطی ضلع حافظ آباد کے گاؤں سیرے تارڑ کے کاشت کار عابد علی پھلروان نے مقامی اور عالمی مارکیٹ میں چاول کی بڑھتی ہوئی طلب اور قیمت کو دیکھتے ہوئے اپنے چار ایکڑ زرعی رقبے میں سے تین ایکڑ پر دھان کاشت کرلی۔ انہیں امید تھی کہ وہ اس بار بہتر آمدن حاصل کرنے میں کامیاب ہوجائیں گے اور اس طرح ان کے لیے اپنے بیٹے کو کسی اچھی یونیورسٹی میں داخلہ دلوانا ممکن ہو جائے گا۔

لیکن ان کی یہ امید پوری نہ ہوسکی کیوں کہ ایک تو ان کی پیداوار بہت کم رہی ہے اور دوسرا انہیں توقعات کے مطابق منڈی میں اس کا ریٹ بھی نہیں ملا۔ اس لیے انھوں نے اپنے انٹرمیڈیٹ پاس بیٹے کو کسی کالج یا یونیورسٹی میں داخل کرانے کا ارادہ ترک کردیا ہے۔

فصل کی پیداوار کیوں کم رہی ہے اس حوالے سے عابد علی بتاتے ہیں کہ جب ان کی فصل دانہ بنانے کے مرحلے میں داخل ہوئی تو اس کے پتے اور شاخیں پیلے پڑنے لگے تھے جس سے مطلوبہ مقدار اور سائز کا دانہ نہیں بن سکا یوں ان کی پیداوار جو 60 من ہوسکتی تھی 35 من تک رہ گئی۔ اس کے علاوہ انہیں منڈی میں فصل کی قیمت چار ہزار فی من ملی۔

&quot; کسانوں کو امید تھی کہ اس بار انہیں چھ سے آٹھ ہزار روپے فی من قیمت ضرور ملے گی لیکن قسمت نے یاوری نہیں کی۔ میری فصل پر &#39;پتےجھلساؤ&#39; نامی بیماری کا حملہ ہوگیا تھا جو کسی بھی زرعی دوا سے دور نہیں ہوئی اور نہ ہی اس وقت محکمے زراعت کے کسی افسر کی طرف سے کوئی رہنمائی ملی۔&quot;

عابد علی کا کنبہ پانچ افراد پر مشتمل ہے۔ ان کے بڑے بیٹے کے علاوہ دو اور بچے بھی ہیں جنہوں نے ابھی سکول جانا شروع نہیں کیا۔ وہ بتاتے ہیں کہ گھر کا ایک ماہ کا خرچ 60 سے 70 ہزار روپے ہے۔ چاول کی فصل سے انھوں نے چھ ماہ میں دو لاکھ دس ہزار اور اس سے پہلے گندم کی تین ایکڑ فصل سے ڈیڑھ لاکھ روپے آمدن حاصل کی تھی۔

ان کے بقول سال بھر کے گھریلو اخراجات پورے کرنے کے لیے انہیں 10 لاکھ روپے درکار ہوتے ہیں جبکہ اس سال انہیں کھیتی باڑی سے تین لاکھ 60 ہزار روپے آمدن ہوئی ہے۔ اب وہ یہ سوچ رہے ہیں کہ اپنے بچوں کو تعلیم کیسے دلائیں۔

عابد علی اپنے بیٹے کو کسی فیکٹری میں نوکری کے لیے بھیج دیں گے تاکہ گھر&nbsp; میں اضافی آمدنی آئے کیونکہ&nbsp; اشیائے صرف کی بڑھتی ہوئی قیمتوں کے باعث گھریلو اخراجات میں ہوشربا اضافہ ہو چکا ہے اور ان کا بجلی کا بل بھی کم از کم 15 ہزار روپے آنے لگا ہے۔

پاکستان زرعی تحقیقاتی کونسل کے زیر انتظام لاہور کے قریب کالا شاہ کاکو کے مقام پر قائم رائس ریسرچ پروگرام کے ادارے کے پروگرام لیڈر ڈاکٹر شہباز حسین کے بقول پتوں کے جھلساؤ کی اس بیماری کو سائنس کی زبان میں بیکٹیریل لیف بلائٹ کہا جاتا ہے۔ جو ایک خاص بیکٹیریا سیوڈوموناس سیرنج پی وی- سیرنج کی وجہ سے ہوتی ہے۔

ان کے مطابق بیماری سے متاثرہ پودوں کے پتوں کی اوپری سطح پر چاروں طرف پیلے دائرے کے ساتھ چھوٹے سیاہ دھبے نظر آتے ہیں۔ یہ بیماری پورے کھیت کے بجائے اسے کے مختلف حصوں میں رونما ہوتی ہے اور اگر اس کا حملہ اس وقت ہوجائے جب پودا ابتدائی مرحلے میں پھل پھول رہا ہوتا ہے تو یہ زیادہ نقصان کرتی ہے اور اگر اس کا حملہ دانہ بنانے کے مرحلے میں ہوجائے تو بھی یہ فصل کی پیداوار کو دس فیصد تک متاثر کرسکتی ہے۔

ڈاکٹر شہباز کہتے ہیں کہ یہ بیماری پچھلے سالوں میں بھی آتی رہی ہے لیکن اس مرتبہ یہ زیادہ ہے اور چاول کی باسمتی اقسام کے بھی اس بیماری سے متاثر ہونے کا اندیشہ ہے۔

ضلع حافظ آباد کے کسان آصف کمبوہ کا شمار علاقے کے جدت پسند کاشت کاروں میں ہوتا ہے۔ انھوں نے اس بار اپنے 12 ایکڑ رقبے پر چاول کی فصل کاشت کر رکھی ہے اور ان کو بھی یہ خدشہ لاحق ہے کہ اس بار ان کی فصل کی پیداوار مایوس کن رہے گی۔

انھوں نے ابھی تک فصل کی کٹائی نہیں کی لیکن ان کے بقول جھلساؤ کی بیماری نے ان کے کھیت کو بھی کافی حد تک متاثر کیا ہے۔

آصف کمبوہ کہتے ہیں کہ یہ بیماری ان کے پورے علاقے میں پھیلی ہوئی ہے۔ جس سے ناصرف کسانوں کو نقصان ہوگا بلکہ یہاں پر کاشت کار اور زرعی مزدور کا تو روزگار متاثر ہو گا لیکن اس کے ساتھ ملک کو بھی نقصان ہو گا کیونکہ چاول کی برآمد سے کثیر زرمبادلہ حاصل ہوتا ہے۔

ان کے مطابق چاول کی بوائی اور کٹائی پر جتنا خرچہ ہو ا ہے اس لحاظ سے غلہ منڈی میں قیمت نہیں مل رہی جس کی وجہ سے کاشتکاروں کی حوصلہ شکنی ہوئی ہے۔ انہیں خدشہ ہے کہ اس بار فصل کو جس حد تک نقصان پہنچ چکا ہے اس سے آئندہ سال وہ چاول کم مقدار میں کاشت کریں گے۔

پاکستان میں چاول کا شعبہ برآمدی آمدنی، گھریلو روزگار، دیہی ترقی اور غربت میں کمی کے حوالے سے انتہائی اہم ہے۔ چاول پاکستان میں ایک اہم خوراک کے ساتھ ساتھ نقد آور فصل بھی ہے۔ ٹریڈ ڈویلپمنٹ اٹھارٹی آف پاکستان (ٹی ڈی اے پی ) کی سالانہ امپورٹ ایکسپورٹ رپورٹ 2023 کے مطابق چاول، کپاس کے بعد دوسری بڑی برآمدی جنس ہے اور جی ڈی پی میں اس کا حصہ 0.4 کا حصہ ہے۔

<h2>چاول کے شہر کی مشکلات</h2>

لاہور سے موٹر وے پر اسلام آبا کی طرف سفر کرتے ہوئے 80 کلو میٹر کے فاصلے پر ایک بڑا بل بورڈ نمایاں طور پر دکھائی دیتا ہے جس پر THE CITY OF RICE&nbsp; لکھا ہوا ہے جسے پڑھنے سے ہی اندازہ ہو جاتا ہے کہ ضلع حافظ آباد چاول کی ایک بڑی منڈی ہے۔ 
حافط آباد کو 1992میں ضلع کا درجہ دیا گیا جبکہ اس سے پہلے وہ گوجرانوالہ کی ایک تحصیل تھی۔

صوبائی محکمہ زراعت کے مطابق خریف کے موسم میں ضلع حافظ آباد کے 94 فیصد رقبے پر چاول کی فصل کاشت کی جاتی ہے۔ اس ضلع میں کل زیر کاشت رقبہ چار لاکھ 67 ہزار 939 ایکڑ ہے اور پچھلے سال یہاں پر تین لاکھ 73 ہزار ایکڑ رقبے پر چاول اگائے گئے تھے۔

حافظ آباد کو ضلع کا درجہ ملنے کے بعد سے یہاں پر چاول کی کاشت میں تقریبا دو گنا تک اضافہ ہوا ہے۔ 1992 میں یہاں دو لاکھ 11 ہزار ایکڑ رقبے پر چاول لگے تھے جو پچھلے سال تک تین لاکھ 73 ہزار ایکڑ تک پہنچ چکے ہیں۔

اس ضلع کا باسمتی چاول دنیا بھر میں اپنے ذائقے اور خوشبو کے لحاظ سے شہرت رکھتا ہے۔

نئی مردم شماری کے مطابق ضلع حافظ آباد کی آباد 13 لاکھ 20 ہزار ہے جبکہ لیبر فورس سروے 2020-21 کے مطابق اس ضلع میں 3 لاکھ 77 ہزار 400 افراد محنت مزدوری کرتے ہیں جن میں سے 39 فیصد کا روزگار زراعت اور 28 فیصد کا انڈسٹری سے وابستہ ہے۔ اس ضلع میں زیادہ تر انڈسٹری چاول سے منسلک ہے۔

ضلع حافظ آباد میں 40 سے زیادہ بڑی اور چھوٹی رائس ملیں ہیں جن میں ہزاروں کی تعداد میں مزدور کام کرتے ہیں۔

کسانوں کی ایک غیر سرکاری تنظیم &#39;کسان بورڈ&#39; کے نائب صدر امان اللہ چٹھہ کا تعلق بھی حافظ آباد سے ہے۔ انہیں خدشہ ہے کہ اس بیماری سے پورے صوبے میں چاول کی فصل متاثر ہوگی۔ تاہم ان کے ضلعے کے کاشت کاروں اور بیشتر مزدوروں کے لیے یہ فصل بہت اہم ہے اس لیے ان کا سب سے زیادہ نقصان ہو گا۔

ان کے خیال میں جب یہ بیماری شروع ہوئی تو اس وقت محکمہ زراعت کو موثر اقدامات اٹھانے چاہئیں تھے لیکن مشکل وقت میں محکمے نے کسانوں کو تنہا چھوڑ دیا۔

امان اللہ کہتے ہیں کہ جب فصل تیار نہیں تھی تو اس وقت چاول کی موٹی اقسام کے نرخ پانچ ہزار روپے فی من تھے لیکن جیسے ہی فصل منڈی میں آنا شروع ہوئی ہے تو اس کے نرخ 3500 روپے فی من تک گر گئے ہیں۔

&nbsp;ان کا کہنا ہے کہ چاول ایک ایسی جنس ہے جسے کاشتکار مناسب قیمت ملنے کے انتظار میں زیادہ دیر تک اپنے پاس نہیں رکھ سکتا۔ اسے سٹور کرنے کے لئے پہلے خشک کرنا پڑتا ہے ۔ دھان خشک کرنے والی مشین عام کاشتکار کی پہنچ سے باہر ہے اور پاسکو بھی دھان کی خریداری پر توجہ نہیں دیتا جس کی وجہ سے کاشتکار کو چند دن کے اندر اندر دھان کو سرمایہ داروں اور رائس ڈیلروں کے پاس فروخت کرنا پڑتا ہے وہ بتاتے ہیں کہ آڑھتی یا ایکسپورٹرز فصل کی ادائیگیوں میں بھی تاخیر کرتے ہیں۔

وہ کہتے ہیں کہ سرمایہ دار ملز مالکان اپنی مرضی کے نرخوں پر دھان خریدتے ہیں اور چند ماہ بعد اپنی مرضی سے مارکیٹ میں فروخت کرنے ہیں۔ کاشتکار کی مشقت کا بہت زیادہ فائدہ سرمایہ دار لے جاتا ہے۔

امریکی محکمہ زراعت کی غیرملکی زرعی سروس کے ادارے کی طرف سے 28 سمتبر 2023 کو جاری ہونے والی ایک رپورٹ میں یہ بتایا گیا ہے کہ پاکستان میں رواں سیزن کی فصل مارکیٹ میں آںا شروع ہوگئی ہے اور رواں سال پاکستان میں 9.0 ملین میٹرک ٹن پیداوار متوقع ہے۔ کسانوں کے لیے اچھی بات یہ ہے کہ انٹرنیشنل مارکیٹ میں اس کی قیمت کافی اچھی ہے اور دوسرا بھارت نے اپنی ایکسپورٹ پر پابندی لگائی ہوئی ہے اور اس طرح پاکستان کو فائدہ ہو سکتا ہے۔

&nbsp;اگلے مالی سال پاکستان سے 4.8 ملین میٹرک ٹن چاول کی برآمد کا تخمینہ ہے جو سال 2021-22 سے لگ بھگ قریب ہے جب ملک میں ریکارڈ 9.3 ملین ٹن چاول کی فصل ہوئی تھی۔

چاول کی فصل کے ڈنٹھل غلط طریقے سے تلف کرنے کے ماحولیاتی اثرات: کھیتوں میں لگی آگ کو کون روکے گا؟

پتے جھلساؤ: کاشت کاروں اور زرعی مزدوروں کی محنت بھسم، 'چاول کے شہر' میں مایوسی کے ڈیرے

ساٹھ سالہ محمد رفیق کی ساری زندگی مزدوری کرتے گزر گئی ہے اور وہ اب بھی روزانہ کام پر جاتے ہیں۔ اس عمر کو پہنچنےکے بعد ان کے پاس نہ تو روزگار کا کوئی ایسا ذریعہ ہے جس میں انہیں جسمانی مشقت نہ کرنا پڑے اور نہ ہی انہیں اپنے بچوں کا سہارا میسر ہے۔

رفیق کا تعلق ضلع حافظ آباد کے گاؤں ہرسکھ رائے سے ہے جہاں 10 گھرانے آباد ہیں۔ یہاں ان کا کچی اینٹوں سے بنا گھر ہے جس میں وہ اپنی اہلیہ اور 19 سالہ معذور بیٹے علی اصغر کے ساتھ رہتے ہیں۔ ان کی ایک بیٹی بھی معذور ہے لیکن وہ ایک سال پہلے جیسے تیسے اس کی شادی کر چکے ہیں۔

علی اصغر دونوں ٹانگوں سے معذور ہیں۔ انہیں پڑھائی کا بہت شوق تھا اور وہ شہر کے سرکاری سکول سے ساتویں جماعت تک پڑھائی کر چکے ہیں۔ وہ مزید تعلیم حاصل کر کے معذور افراد&nbsp; کے کوٹے پر سرکاری نوکری لینا چاہتے تھے لیکن گھر کے معاشی حالات تنگ ہونے کے باعث انہیں پڑھائی چھوڑنا پڑی جس کے بعد وہ گھر پر ہی رہتے ہیں کیونکہ معذوری کے باعث ان کے لیے کوئی کام کرنا ممکن نہیں ہے۔

رفیق کہتے ہیں کہ انہیں زندگی بھر سکون کا سانس نہیں ملا۔ اب وہ خود بھی بیمار رہنے لگے ہیں لیکن مزدوری نہیں چھوڑ سکتے کیونکہ اسی پر ان کا گھر چلتا ہے۔

ان کا کہنا ہے کہ بے شمار مصیبتوں میں انہیں راحت کا جو لمحہ میسر آیا ہے وہ پچھلے سال ان کی بیٹی کی شادی تھی۔ تاہم انہیں آج بھی افسوس ہے کہ وہ اپنے بچوں کو تعلیم نہ دے سکے۔ وہ اس کا ذمہ دار حکومت کو ٹھہراتے ہوئے کہتے ہیں کہ سرکاری سطح پر کبھی ان کی کوئی مدد نہیں کی گئی۔ اگر ان کے بچوں کو تعلیم مل جاتی تو آج ان کا گھرانہ بہت اچھی زندگی گزار رہا ہوتا۔

2021 میں صنفی مساوات کے حوالے سے جاری ہونے والی ایک رپورٹ کے مطابق حافظ آباد میں خصوصی افراد کے لیے صرف تین ہی تعلیمی ادارے ہیں اور یہ ضلع چنیوٹ کے بعد زیرتعلیم خصوصی طلبہ کے حوالے سے پورے صوبے میں سب سے پیچھے ہے۔

2021 میں حافظ آباد میں 480 خصوصی بچے سکولوں میں زیرتعلیم تھے جن میں 300 لڑکے اور 180 لڑکیاں تھیں۔

رپورٹ کے مطابق پنجاب میں خصوصی تعلیم کے 332 ادارے کام کررہے ہیں جن میں سے 90 فیصد یعنی 273 سکولوں میں مخلوط تعلیم دی جا رہی ہے جبکہ 16 لڑکیوں اور 14 لڑکوں کے لیے مخصوص ہیں۔ ان میں سب سے زیادہ یعنی 194 سکول پرائمری ، 106 مڈل، 67 ہائی، سات ہائر سیکنڈری، 10 ڈگری کالج اور تین ووکیشنل انسٹیٹوٹ ہیں۔

2021 میں پنجاب میں ہر طرح کی معذوری کا شکار 23 ہزار 390 افراد نے ان تعلیمی اداروں میں داخلہ لیا۔ ان میں سب سے کم تعداد جسمانی معذوری کا شکار بچوں کی تھی اور ان میں لڑکیاں صرف 800 تھیں۔

سپیشل ایجوکیشن ڈیپارٹمنٹ پنجاب کی ویب سائٹ کے مطابق صوبے بھر میں خصوصی تعلیم کے اداروں میں 38 ہزار طالب علم رجسٹرڈ ہیں۔ محکمے کے پاس اساتذہ اور طلبہ دونوں کے لیے پک اینڈ راپ سروس کے لیے 600 سے زیادہ بسیں ہیں، اور رہائش کے لیے 42 ہاسٹل ہیں جن میں مجموعی طور پر دو ہزار افراد کی گنجائش ہے۔

پنجاب کے 36 میں سے 25 اضلاع ایسے ہیں جہاں پر لڑکیوں یا لڑکوں کے لیے الگ سے سکول نہیں ہے۔ صنفی مساوات سے متعلق رپورٹ میں یہ بھی کہا گیا ہے کہ اس کا مطلب یہ ہو سکتا ہے کہ بہت سے ضرورت مند طالب علم ممکنہ طور پر نظام کی ان خامیوں کے باعث تعلیم سے محروم رہ جاتے ہیں۔ اس صورتحال سے لڑکیاں خاص طور پر متاثر ہوتی ہیں جنہیں مخلوط تعلیمی ماحول میں پڑھنے کے خلاف سماجی دباؤ کا سامنا رہتا ہے۔

حافظ آباد میں خصوصی تعلیم کے تینوں ادارے مخلوط ہیں اور یہاں پر لڑکوں کے مقابلے میں لڑکیوں کے داخلوں کی تعداد نصف سے بھی زیادہ کم ہے۔

پاکستان میں سماجی اور معیار زندگی سے متعلق جائزہ رپورٹ 2019-20 میں بتایا گیا ہے کہ حافظ آباد میں 3.41 افراد کسی نہ کسی جسمانی معذوری کا شکار ہیں جن کی کم از کم تعداد 39 ہزار 452 ہے۔ لیکن 2017 کی مردم شماری میں یہ تعداد 6047 بتائی گئی ہے۔

حافظ آباد کی ڈپٹی ڈائریکٹر سوشل ویلفیئر آمنہ اشرف بتاتی ہیں کہ 30 جون 2023 تک چار ہزار 260 خصوصی افراد ان کے ادارے کے ساتھ رجسٹرڈ ہو چکے ہیں۔ جن میں ایک ہزار 832 خواتین، 1001 مرد اور 627 بچے شامل ہیں۔

ضلع کے سپیشل ایجوکیشن ڈیپارٹمنٹ سے ملنے والی معلومات کے مطابق حافظ آباد شہر میں قائم سیکنڈری سکول میں 287 بچے زیر تعلیم ہیں جبکہ پنڈی بھٹیاں کے مقام پر قائم مڈل سکول میں 135 طلبہ و طالبات پڑھتے ہیں۔ ضلع میں ایک سلو لرنرز ایجوکیشن سنٹر بھی ہے جہاں 115 طلبہ پڑھ رہے ہیں۔

ضلعے کی مجموعی آبادی کو مدنظر رکھا جائے تو ان سکولوں میں پڑھنے والے بچوں کی تعداد بہت کم ہے۔ لیکن حافظ آباد قانونی اور سرکاری شناختی دستاویزات کی رجسٹریشن کے حوالے سے بھی پورے صوبے میں پسماندہ ترین ہے۔ یہی نہیں بلکہ اس ضلعے کا معذور افراد کی رجسٹریشن یعنی انہیں خصوصی لوگو والے شناختی کارڈ کی فراہمی کے حوالے سے بھی آخری نمبر ہے۔

سماجی کارکن محمد عزیز الرحمان اور ساجدہ فریاد کہتے ہیں کہ یہاں سرکاری دفاتر، ہسپتالوں اور بینکوں میں خصوصی افراد کے لیے سپیشل کاؤنٹر نہیں ہیں۔ ان افراد کو معذوری کا میڈیکل سرٹیفکیٹ جاری کرنے کے لیے ڈسٹرکٹ ہیڈ کوارٹر ہسپتال میں مہینے میں صرف ایک ہی دن مخصوص ہے۔ جب ان کا طبی معائنے کا مرحلہ مکمل ہوجاتا ہے تو پھر سرٹیفکیٹ حاصل کرنے کے لیے محکمہ سوشل ویلفئیر کے دفتر جانا پڑتا ہے جو کہ شہر سے باہر ہے۔

قومی مردم شماری 2017 کے مطابق پنجاب میں معذور افراد کی تعداد پانچ لاکھ 15 ہزار 815 بتائی گئی ہے جس میں سے پانچ سے نو سال یعنی سکول جانے کی عمر کے بچوں کی تعداد 68 ہزار ہے۔

اس کا مطلب ہوا کہ پنجاب کے تعلیم اداروں میں داخل ہونے والے خصوصی بچوں کی آدھی آبادی سکول نہیں جا پاتی۔

حافظ آباد کے سرکاری سکول کے ایک معذور استاد محمد جاوید کے مطابق عام بچوں کی تعلیم کی طرح خصوصی بچوں کی تعلیم میں بھی سب سے بڑی رکاوٹ معاشی پسماندگی ہے۔ یہاں لوگوں کے پاس اتنے وسائل نہیں ہیں کہ وہ اپنے بچے اور خاص طور پر معذور بچے کو سکولوں کے لیے گاڑی لگوا کردے سکیں۔

ان کے خیال میں حافظ آباد کے حالات تو اس سے بھی برے ہیں کیوں کہ یہاں پر خصوصی بچوں کے سکول شہری علاقے میں ہیں۔ ان سکولوں کے پاس اتنی بسیں بھی نہیں ہیں جو دیہات میں جاکر ان بچوں کو لے سکیں۔ اس لیے اگر یوں کہا جائے کہ ضلع حافظ آباد میں یہ تعلیمی ادارے صرف شہری آبادی کے لیے ہیں تو غلط نہ ہوگا اور 95 فیصد دیہی آبادی اس سے محروم ہے۔

سیماب علی صوبائی محکمہ خصوصی تعلیم میں گزشتہ 15 سال سے بطور استاد خدمات سرانجام دے رہی ہیں اور ان دنوں راولپنڈی کے سکول میں پڑھاتی ہیں۔ ان کاکہنا ہے کہ مردم شماری میں لوگ بچے کی معذوری ظاہر نہیں کرتے اور معذوری کو معاشرے میں موضوعِ ممنوع بنا دیا گیا ہے۔ حالانکہ اس سے بچے کا فائدہ ہونے کی بجائے نقصان ہوتا ہے۔ اگر حکومت کو ایسے بچوں کی صحیح تعداد معلوم ہوگی&nbsp; تو تب ہی وہ ان کی تعلیم اور فلاح و بہبود کے لیے زیادہ بہتر اقدام کرسکے گی۔

وہ مشورہ دیتی ہیں کہ اگر خصوصی بچوں کو عام سکولوں میں ہی پڑھایا جائے تو اس کے اچھے نتائج آئیں گے کیونکہ بچوں کو سکول میں لانے کا مقصد انہیں معاشرے میں بہتر انداز میں رہنے کے قابل بنانا ہے جو انہیں سکولوں سے دور رکھ کرحاصل نہیں ہو سکتا۔

بشیر احمد رحمانی

بشیر احمد کا تعلق ضلع حافظ آباد سے ہے۔ آپ مختلف ملکی اخبارات اور اور ریڈیو پاکستان کے ساتھ بطور صحافی منسلک رہے ہیں۔

ضلع حافظ آباد کی سیاست دہائیوں سے تارڑ اور بھٹی کے خاندانوں کے گرد گھوم رہی ہے

پتے جھلساؤ: کاشت کاروں اور زرعی مزدوروں کی محنت بھسم، 'چاول کے شہر' میں مایوسی کے ڈیرے

"حکومت معذور بچوں کو پڑھا لکھا دیتی تو مجھے بڑھاپے میں مزدوری نہ کرنا پڑتی"