&nbsp;حیدر آباد كے علاقے ٹنڈو یوسف کے رہنے والے پرکاش ٹھاکر پرچون کی دکان چلاتے ہیں۔ ہولی اور دیوالی پر جب بھی وہ اپنے پیاروں كی قبروں پر پھول چڑھانے جاتے ہیں تو آنكھوں میں آنسو لیے واپس لوٹ آتے ہیں۔ اس دکھ کی وجہ اپنے پیاروں کی جدائی نہیں بلکہ کچھ اور ہے۔

یہاں ہندو اور مسیحی کمیونٹی كے مشترکہ قبرستان میں پرکاش کی بہن، دادا اور کئی عزیز رشتہ دار مدفون ہیں۔

بلدیہ نے اس قبرستان کو کچرا کنڈی بنا دیا ہے۔

بلدیہ كے ٹرک آس پاس کے علاقوں کا كچرا اسی قبرستان میں ڈالتے ہیں حتٰی كہ اس بار تو مئیر حیدر آباد نے بڑی عید پر اس قبرستان میں آلائیشیں ڈلوانے کا منصوبہ بنایا تھا۔ جب ہندو برداری نے بھرپور احتجاج کیا تو میئر اپنا فیصلہ واپس لینے پر مجبور ہو گئے۔

پرکاش کے رشتہ داروں سمیت قبرسات کی بیشتر قبریں گندے پانی میں ڈوبی ہوئی ہیں۔

پاکستان میں ہندو کمیونٹی کے کچھ لوگ اپنے مردوں کو نذرآتش کرنے کی بجائے&nbsp; دفن بھی کرتے ہیں۔

پرکاش ٹھاکر نے لوک سجاگ کو بتایا کہ سیوریج کا یہ گندا پانی ایک دم سے&nbsp; نہیں آیا بلکہ کئی سالوں سے یہیں کھڑا ہے۔ محلے کے کچھ لوگوں نے ہائی کورٹ میں درخواست بھی دائر کی تھی لیکن مکینوں کے پاس وکیلوں کو دینے کے لیے بھاری فیس نہیں تھی تو کیس نہیں چلا پائے۔

صرف گندہ پانی ہی نہیں، اس 65 سال پرانے قبرستان کو ایک اور خطرے کا بھی سامنا ہے۔

&nbsp;پچھلے کئی سالوں سے قبرستان سکڑتا جا رہا ہے۔ اس کے گرد چار دیواری نہ ہونے کی وجہ سے لوگوں نے قبروں کو مسمار کر کے اپنے گھر تعمیر کر لیے ہیں۔

پرکاش الزام لگاتے ہیں کہ پیپلز پارٹی ضلع حیدر آباد کے جنرل سیکریٹری اور گذشتہ انتخابات میں ایم این اے کے ٹکٹ ہولڈر علی محمد سہتو&nbsp; نے قبرستان کی زمین پر غیر قانونی قبضہ کر کے گھر تعمیر کروایا ہے جبکہ یہاں سیوریج کا پانی چھوڑنے کا منصوبہ بھی انہی کا ہے، کیونکہ وہ اس واحد اقلیتی قبرستان کی ساری زمین ہڑپ کرنا چاہتے ہیں۔

علی محمد سہتو اس الزام کی تردید کرتے ہیں اور کہتے ہیں کہ ان کا کسی قبضے سے کوئی لینا دینا نہیں۔

&quot;لوگ سیاسی مخالفت کی وجہ سے کچھ بھی کہہ دیتے ہیں۔ میں الزام لگانے والوں کے خلاف عدالت میں جاؤں گا&quot;۔

حیدر آباد بلدیہ کے اس حلقے سے آزاد امیدوار کی حیثیت سے کامیاب اقلیتی&nbsp; کونسلر رانی کمار&nbsp; نے لوک سجاگ کو بتایا کہ وہ ابھی کچھ ہی مہینے ہوئے کونسلر ہوئی ہیں لیكن یہ مسئلہ سالوں سے موجود ہے۔

وہ بتاتی ہیں كہ ان كی اپنی بیٹی، سسر اور والد اسی قبرستان میں دفن ہیں، گندے پانی سے قبرستان میں تعفن پھیل چكا ہے، قبر پر پھول چڑھانے تو دور كی&nbsp; بات ہے، قبرستان كے نزدیک سے گزرنا محال ہو چكا ہے۔ وہ علاقے كے مئیر اور دیگر افسران سے اس معاملے پر بات كر رہی ہیں۔

یہاں تقریبا چار ہزار سے زائد قبریں ہیں جو گندے پانی میں ڈوب چكی ہیں، صرف کچھ قبریں نظر آ رہی ہیں۔

&quot;اس قبرستان میں ہماری عظیم شخصیات دفن ہیں۔ یہاں ہمارے گرو پانچا رام، پیر منگو رام اور دیگر دھرمی رہنما دفن ہیں&quot;۔

حیدر آباد جیسے بڑے شہر کی آبادی 19 لاکھ ہے جبکہ شہر میں غیر مسلموں کی تعداد دو لاکھ سے زائد ہے۔ اتنی بڑی آبادی کے باجود اس شہر میں&nbsp; ہندو اور مسیحی کمیونٹی کے لوگ اس وقت اپنے مردوں کی تدفین اور آخری رسومات کے لیے پریشان ہیں۔

&nbsp;کیونکہ شہر کے مختلف علاقوں میں موجود ان کے شمشان گھاٹ اور قبرستان پر غیر قانونی قبضے کئے جا رہے ہیں۔

سابق ممبر ضلع كونسل حیدر آباد مہاویر نے لوک سجاگ كو بتایا كہ ٹنڈو یوسف قبرستان كی گزشتہ بیس سالوں سے یہی حالت ہے۔ وہ جب خود ضلع كونسل كے ممبر بنے تھے تب انہوں نے دو سے تین بار پانی نكلوایا بھی تھا لیكن اس كا فائدہ كچھ نہیں ہوا كیونكہ قبرستان كی زمین پر قبضہ كر كے جو گھر بنائے گئے ہیں ان گھروں كے نكاسی آب كا كوئی انتظام نہیں ہے، ان گھروں كا گندا پانی یہیں آتا ہے۔

حیدر آباد ڈسٹرکٹ ہندو پنچائت کے چیئرمین اور تین مرتبہ ضلع کونسل کے ممبر رہنے والے رہنما&nbsp; 72 سالہ ایم پرکاش ایڈووکیٹ نے لوک سجاگ کو بتایا کہ اس مسئلے&nbsp; کا واحد حل یہی ہے كہ قبرستان كے اطراف چار دیواری بنائی جائے اور نكاسی آب كے نظام كو بہتر بنایا جائے۔

&quot;کچھ عرصہ پہلے ایک سرکاری ٹیم نے یہاں کے دورے کے بعد اپنی رپورٹ میں لکھا تھا کہ&nbsp; قبرستان کے لیےکروڑوں روپے کے فنڈز چاہییں&nbsp; اور کوئی فنڈز دینے کو تیار نہیں ہے۔&quot;

وہ بتاتے ہیں کہ یہ قبرستان تقریبا دس ایکڑ پر مشتمل تھا اور قبضوں کی وجہ سے اب سُکڑ کر تین ایکڑ پر رہ گیا ہے اور وہ بھی&nbsp; گندے پانی میں ڈوبا ہوا ہے۔

&quot;ہم نے ہر جگہ پر اس مسئلے پر آواز اٹھائی ہے لیکن کوئی فائدہ&nbsp; نہیں ہوا&quot;۔

ایم پرکاش کہتے ہیں کہ ٹندو ولی محمد&nbsp; والے قدیم شمشان گھاٹ&nbsp; کی 12 ایکڑ زمین پر ہندوستان سے آئے ہوئے مہاجرین نے قبضہ كر لیا تھا۔ اس معاملے كے خلاف 1970 سے كیس چل رہا ہے۔ ہائی كورٹ نے اویکیو ٹرسٹ پراپرٹی بورڈ کو یہ معاملہ حل کرنے كا حكم جاری كیا&nbsp; لیكن یہ مقدمہ 1976 سے زیر التوا ہے۔

مسیحی برداری کے رہنما بوٹا مسیح نے بتایا کہ ہندو برادری نے بھائی چارے كے تحت قبرستان كا ایک حصہ مسیحیوں کو دے رکھا ہے۔

&quot;1957میں ہمیں حیدر آباد کے علاقے لطیف آباد یونٹ پانچ میں ایک ایکڑ زمین پر قبرستان الاٹ کیا گیا تھا۔ وہاں ہم نے چندا جمع کر کے چار دیواری بنائی تھی، جگہ کم ہونے کی وجہ سے ایک قبر میں چار چار مردے دفنانا پڑے تھے&quot;۔

&nbsp;وہ بتاتے ہیں کہ دس سال پہلے انہیں شہر سے دور&nbsp; گنجو ٹکر پر دس ایکڑ زمین قبرستان كے لیے ملی لیكن وہاں بھی قبضہ ہو گیا۔

&quot;ہم كہاں جائیں اور اپنے مردوں كو كہاں دفنائیں؟ گھوڑا گراؤنڈ والے قبرستان كے داخلی دروازے بند کر دیے گئے ہیں&quot;۔

گھوڑا گراؤنڈ والے قبرستان کے سامنے&nbsp; کنٹونمنٹ بورڈ نےایک بڑا پیٹرول پمپ اور شاپنگ سینٹر بنایا ہے جس کی وجہ سے مسیحی قبرستان&nbsp; کا اصل راستہ بند ہو گیا ہے۔

اقلیتی رہنما بوٹا امتیاز مسیح نے بتایا کہ سابق میئر طیب حسین کے دور میں، 2016 میں اس قبرستان کے لیے ایک کروڑ 37 لاکھ روپے کا پراجیکٹ منظور ہوا تھا۔ منصوبے کے تحت قبرستان كی چار دیواری، مین گیٹ اور ایک چھوٹے سے كمرے كی تعمیر ہونا تھی، لیكن اس پراجیكٹ پر كبھی كام شروع ہی نہیں ہو سكا۔

&quot;اس وقت ہم نے ڈپٹی کمشنر حیدر آباد کو درخواست دی تھی اس کے بعد یہ&nbsp; پروجیکٹ بنا۔ اس حوالے سے پیمائش وغیرہ بھی ہو گئی تھی مگر اس کے بعد سیاسی مداخلت کی وجہ سے منصوبہ رک گیا &quot;۔

بوٹا امتیاز&nbsp; بتاتے ہیں کہ&nbsp; منصبے کی منظوری کے بعد ایم این اے رمیش وانکوانی اس معاملے میں کود پڑے اور&nbsp; کریڈٹ لینے کے لیے کام اپنے مطابق کروانے کی کوشش کی تو&nbsp; معاملہ لٹک گیا۔

حیدر آباد میونسپل کارپوریشن کے ڈائریکٹر&nbsp; منصور احمد کہتے ہیں کہ ٹنڈو&nbsp; یوسف کے قبرستان سے انہوں نے کئی مرتبہ پانی نکلوایا لیکن دوبارہ بھر جاتا ہے۔

&quot;یہ قبرستان نشیب میں ہے، جس کی وجہ سے یہاں آبادی کا گندا پانی آجاتا ہے۔ جب تک یہاں سے قبضے ختم نہیں ہوں گے مسئلہ حل نہیں ہو گا&quot;۔

ڈپٹی كمشنر حیدر آباد طارق قریشی نے لوک سجاگ کو بتایا کہ انہیں یہاں تعینات ہوئے چند مہینے ہوئے ہیں، تاہم&nbsp; وہ اتنا جانتے ہیں كہ نقشے كے مطابق یہ قبرستان دس ایكڑ پر مشتمل تھا۔ انہوں نے کہا کہ یہاں غیر قانونی قبضوں کی بات ان کے علم میں ہے۔

انہوں نے مزید كہا كہ ان كے پاس اس حوالے سے كبھی كوئی شكایت نہیں آئی، پھر بھی وہ قبرستان سے جلد از جلد پانی نكلوانے كا بندوبست كریں گے اور غیرقانونی قبضے كے حوالے سے بھی اقدامات كریں گے۔

میئر حیدر آباد کاشف شورو سے لوک سجاگ نے&nbsp; رابطہ کیا لیكن انہوں نے اپنا موقف دینے سے معذرت کر لی۔

گنگا دور اور سندھ سُوکھا: استھیاں بہانے والے ہندوؤں کی مایوسی

حیدر آباد کی اقلیتی آبادی  مُردوں کو دفن کرنے کے لیے کیوں پریشان ہے؟

text

خالد مراد ضلع عمر کوٹ کے شہر کنری کے بینک میں ملازمت کرتے ہیں۔ ان کا خاندان سال میں کم از کم تین ماہ سخت تکلیف میں گزارتا ہے۔ مسلسل کھانسی، آنکھ سے پانی بہنا اور گلے میں خراش معمول بن جاتی ہے۔

یہ کوئی خاندانی بیماری نہیں ہے بلکہ وہ کنری کی مرچ منڈی سےصرف سو گز دور مجاہد کالونی میں اپنی بیوی، دو بچوں اور والدین کے ساتھ رہتے ہیں۔

خالد کہتے ہیں کہ سب سے زیادہ تکلیف شام کو ہوتی ہے۔ فضا میں مرچوں کی دھول کے باعث پورے علاقے میں سانس لینا دشوار ہوتا ہے۔

&quot;ہم پانچ سے رات دس بجے تک خود کو کمروں میں بند کر لیتے ہیں۔ گھر کی عورتیں چہرے پر گیلا کپڑا رکھ کر کام کاج کرتی ہیں۔ بچوں اور والدین کو ہم گھر سے نکلنے ہی نہیں دیتے۔ پندرہ سال سے شہر کے باہر بننے والی نئی مرچ منڈی مکمل ہونے کا انتظار کر رہے ہیں۔&quot;

سنٹر فار ایگریکلچر اینڈ بائیو سائنس انٹرنیشنل(سی اے بی آئی ) کے مطابق لال مرچ کی پیداوار کے لحاظ سے پاکستان دنیا میں چوتھے نمبر پر آتا ہے اور مرچ ہی کی برآمد سے سالانہ 9.6 ملین امریکی ڈالر کماتا ہے۔

ملک میں مرچ کی سالانہ اوسط پیداوار عموماً ایک سے ڈیڑھ لاکھ ٹن کے درمیان رہتی ہے۔ اس کا 80 فیصد حصہ سندھ کے تین اضلاع میرپور خاص، عمر کوٹ اور بدین پیدا کرتے ہیں۔ مرچ کی خرید و فروخت کے لیے کنری کو بڑا مرکز مانا جاتا ہے۔

یہ مرچ منڈی تحصیل ہیڈ کوارٹر کنری کے عین درمیان میں واقع ہے۔جہاں اکتوبر&nbsp; سے دسمبر تک سیزن کے دوران روزانہ تقریباً مرچوں کی 10 ہزار بوری کی خرید و فروخت ہوتی ہے۔

&nbsp;مرچ منڈی کے دکاندار شنکر لال بتاتے ہیں کہ یہاں صرف ثابت (خام)مرچ کا کاروبار نہیں ہوتا بلکہ منڈی میں مرچی پیسنے والی 35 چکیاں اور چار پیکنگ فیکڑیاں بھی کام کر رہی ہیں۔ مرچ کی دھول اور دھانس سے فضا انتہائی آلودہ ہو جاتی ہے جس سے سانس لینا د شوار ہوتا ہے۔

&quot; شہر کے باہر مرچ منڈی کی تعمیر مکمل ہو جاتی تو شہریوں اور تاجروں دونوں کے لیے آسانی ہوتی لیکن وہاں تو عرصہ دراز سے کام بھی بند ہو چکا ہے&quot;۔

کنری شہر کی آبادی 30 ہزار نفوس پر مشتمل ہے۔ ان میں سے 10 ہزار مرچ منڈی سے متصل آبادیوں میں لوگ رہتے ہیں۔ نئی منڈی کی تعمیر کے ساتھ حکومت نے کنری مرچ منڈی میں &#39;چلی پروسیسنگ یونٹ&#39; بھی قائم کیا تھا۔ اس پر 25 کروڑ خرچ ہو چکے ہیں مگر یونٹ فعال نہیں ہو سکا۔

خالد مراد نے بتایا کہ مرچ کی آلودگی سب سے زیادہ برا حال مجاہد کالونی، پٹھان کالونی، عاقب نگر اور بھٹائی کالونی کے علاقوں میں ہوتا ہے۔

&quot;گھر کے مکین ہی نہیں قریبی تھانہ تھانہ کنری کے قیدی بھی اذیت میں ہوتے ہیں، کیونکہ سلاخیں مرچوں کی دھول کو نہیں روک سکتیں&quot;۔

کنری تعلقہ ہسپتال کے اسسٹنٹ میڈیکل سپرنٹنڈنٹ ڈاکٹر مبارک درس نے لوک سجاگ کو بتایا کہ ان کے پاس آؤٹ ڈور میں روزانہ سات سے آٹھ سو مریض آتے ہیں۔ ساٹھ&nbsp; فیصد سے زائد مرچوں کی گرد کے متاثرین ہوتے ہیں۔

وہ کہتے ہیں کہ متاثرہ مریضوں میں بیشتر بچے اور بوڑھے چہرے اور آنکھوں میں جلن کی شکایت کے ساتھ آتے ہیں۔ کچھ کو کھانسی یا سانس لینے میں تکلیف ہوتی ہی اور یہ بعض اوقات دمہ یا ٹی بی میں بدل جاتی ہے۔

&quot;یہاں آنکھوں کی جلن کے کیسز عام ہیں لیکن بدقسمتی سے ہمارے پاس آنکھوں کا کوئی ڈاکٹر ہی دستیاب نہیں ہے۔&quot;

&nbsp;ایم ایس ڈاکٹر نندلال بتاتے ہیں کہ ہسپتال میں 60 ڈاکٹروں&nbsp; کی قلت ہے اور مرچ کے سیزن میں ہسپتال پر بوجھ بڑھ جاتا ہے۔

&quot;پچھلے تین ماہ میں یہاں ٹی بی اور دمے کے 215 مریض داخل ہوئے۔ مرچ منڈی کی شہر سے باہر منتقلی بھی ضروری ہے&quot;۔

کنری مرچ منڈی میں کروڑوں کا کاروبار ہوتا ہے۔ یہاں تقریباً 50 دکانیں اور پانچ سو کانٹے ہیں۔ لگ بھگ ایک ہزار مزدور کام کرتے ہیں اور روزانہ درجنوں گاڑیاں اور لوڈر رکشے منڈی میں داخل ہوتے ہیں۔

چالیس سالہ جگدیش کمار یہاں مرچی منڈی میں کئی سال سے مزدوری کر رہے ہیں اور اکثر بیمار رہتے ہیں۔

وہ بتاتے ہیں کہ انہیں دس روپے بوری مزدوری ملتی ہے اور وہ دن میں زیادہ سے زیادہ پانچ چھ سو روپے کماتے ہیں۔ سمجھ نہیں آتا وہ بیماری پر لگائیں یا بچوں کی روزی روٹی پر۔

وہ کہتے ہیں کہ بیمار مزدور کا علاج تو دور کی بات ہے، دکاندار ایک روپیہ نہیں دیتا۔

&quot;یہاں کام کرنے والے بیشتر&nbsp; مزدور دمے اور سانس کی بیماریوں میں مبتلا ہیں۔ حالت یہ ہے کہ پینے کے لیے پانی تک نہیں ملتا۔ تمام مزدوروں کے لیے صرف ایک واش روم ہے&quot;۔ 
&nbsp; 
&nbsp;دکان دار وجئے کمار کہتے ہیں کہ مرچ منڈی مسائل کا گڑھ بنی ہوئی ہے۔ سڑکیں ٹوٹی ہوئی ہیں۔ سیوریج کا پانی خراب ہے اور صفائی ستھرائی کا کوئی انتظام ہی نہیں ہے۔ نئی منڈی بن جاتی تو سب کو ریلیف مل جاتا۔

نئی مرچ کا منڈی کا منصوبہ 2007ء میں سابق ایم پی اے ڈاکٹر دوست محمد میمن نے منظور کرایا تھا۔ منڈی کے لیے 22 ایکڑ زمین کنری کے سابق تحصیل ناظم جام میمن نے پہلے ہی خرید کر رکھی تھی۔ اسی سال تعمیر کا آغاز بھی ہو گیا تھا۔

منصوبے کے پی سی ون کے مطابق نیو مرچ منڈی میں 300 دکانیں، گودام، ڈسپسنری، مسجد، بیوپاریوں کی سہولت کے لیے تین ہوٹل اور ایک ریسورینٹ بنائے جانا تھے۔ دو پولیس چیک پوسٹیں، واٹر سپلائی ٹینک اور پختہ سڑکوں کی تعمیر بھی اس منصوبے کا حصہ تھی۔

ڈاکٹر دوست محمد میمن بتاتے ہیں کہ منڈی کی لاگت کا تخمینہ سات کروڑ روپے تھا اور یہ منصوبہ تین سال میں مکمل ہونا تھا۔ پہلے سال پانچ کروڑ روپے ریلیز کیے گئے تھے۔ پیپلز پارٹی کی حکومت آتے ہی ٹھیکیدار بھاگ گیا۔

وہ کہتے ہیں کہ اس دوران ٹھیکیدار تعمیراتی سامان کی قیمتیں بڑھنے اور ٹھیکے کے ریٹ ریوائیز نہ ہونے کی وجہ سے کام چھوڑ گئے۔ اب کروڑوں روپے مالیت کا سامان وقت گزرنے کے ساتھ ساتھ ضائع ہو رہا ہے۔

&nbsp;وہ الزام لگاتے ہیں کہ نئی منڈی منصوبے میں بڑے پیمانے پر کرپشن ہوئی ہے۔ نیب اور ایف آئی اے نے نامعلوم درخواستوں پر تحقیقات بھی کی تھیں۔ مگر کوئی حتمی رپورٹ سامنے نہیں آئی نہ ہی کوئی مقدمہ درج ہوا۔ کروڑوں روپے خرچ ہونے کے باوجود یہ منصوبہ آج تک مکمل نہیں ہو سکا۔

&nbsp;محکمہ بلڈنگ اینڈ ورکس کے حکام نے منڈی کی تعمیر کے لیے جاری ہونے والی رقم کی تفصیل بتاتے سے گریز کیا ہے۔ تاہم ایک افسر نے اپنا نام ظاہر نہ کرنے کی شرط پر بتایا کہ منڈی کے پی سی ون میں کوئی تبدیلی نہیں آئی تھی۔ منڈی پر لاگت کا تمخینہ مہنگائی کے باعث بڑھ گیا ہے۔

سابق تحصیل ناظم جام میمن بتاتے ہیں کہ جب وہ ناظم تھے تو وہ شہر میں ایک شادی پر گئے۔ وہاں فضا میں مرچ کی گرد کی وجہ سے کسی براتی نے کھانا نہیں کھایا تھا۔ تب انہوں نے مرچ منڈی شہر سے باہر نکالنے کا عہد کر لیا تھا۔

&quot;میرا بیٹا ایم پی اے اور میں ناظم تھا۔ ہم دونوں نے بھرپور کوشش کی کہ مرچ منڈی مکمل ہوجائے مگر افسوس ابھی تک کام ادھورا&nbsp; پڑا ہے۔&quot;

این ایل سی کے پلانٹ کی آلودگی: راولپنڈی کی ہاؤسنگ سوسائٹی کے مکین عدالت کیوں نہیں جاتے؟

کنری کے شہریوں کی آنکھوں میں کون مرچوں کی دھول جھونک رہا ہے؟

حیدر آباد کے علاقے گاڑی کھاتا میں محمد علی میمن نے ایک کیبن میں پان کی دکان کھول رکھی ہے۔ صبح سے رات تک ان کے ہاں گاہکوں کا تانتا بندھا رہتا ہے۔&nbsp; وہ طرح طرح کے پان بیچتے ہیں تاہم خاص پان کی قیمت پانچ سو سے آٹھ سو روپے تک ہوتی ہے۔

وہ کہتے ہیں &quot;پان میں شامل کی جانے والی اشیا مختلف ہو سکتی ہیں مگر پتا سب میں ایک سا&nbsp; پڑتا ہے۔ پہلے ہم سری لنکا سے آنے والا پتا استعمال کرتے تھے مگر ایک تو وہ بہت مہنگا ہو گیا ہے دوسرا آتا کم ہے، اسی لیے اب ہم گاڑہو سے پان منگواتے ہیں جو سستے اور آسانی سے دستیاب ہیں، اور ذائقے میں بھی کوئی خاص فرق نہیں ہے۔&quot;

صوبہ سندھ کے ضلع ٹھٹہ کے ساحلی شہر گاڑہو سے ملک بھر کو پان کے پتے بھیجے جاتے ہیں اور ان کی مانگ بڑھ رہی ہے۔

50 سالہ رحمت اللہ گاڑہو میں چھوٹے کسان ہیں اور ایک ایکڑ پر پان کاشت کرتے ہیں۔ انہوں نے بتایا کہ &quot;پاکستان میں پہلے انڈیا اور سری لنکا سے پان کے پتے درآمد کیے جاتے تھے لیکن چند برس قبل ہم نے یہاں پان لگانے کا کامیاب تجربہ کیا۔ سری لنکا کا پان ہمارے پان کی نسبت بڑا اور میٹھا ہوتا ہے مگر ہمارا پان بھی مارکیٹ میں اپنی جگہ بنا رہا ہے۔ ہمارے پاس تین اقسام کے پان سانجی، سیلون اور پاکستانی بڑے پیمانے پر اگائے جاتے ہیں۔

انہوں نے بتایا کہ ایک ایکڑ پر پان کاشت کرنے کے لیے تقریباً 20 لاکھ روپے خرچ ہوتے ہیں۔ اچھی فصل ہو تو اس سے سال میں ایک کروڑ روپے کمائی ہو جاتی ہے۔

رحمت اللہ بتاتے ہیں کہ پان دیگر فصلوں کی طرح کھلے آسمان کے نیچے نہیں اگتے۔ ان کو ہلکے سائے کی ضرورت پڑتی ہے اسی لیے پہلے چھاپرے بنائے جاتے ہیں۔چھاپرا تیار کرنے کے لیے پہلے لکڑی کےکھمبے یا پلر لگائے جاتے ہیں۔ ایک ایکڑ میں ایک ہزار سے 12 سو پلر لگائے جاتے ہیں جن پر چھ لاکھ کے قریب لاگت آتی ہے۔ چھت بنانے کے لیے چٹائی درکار ہوتی ہے۔ ایک ایکڑ میں سات سو سے زیادہ چٹائیوں کی ضرورت ہوتی ہے۔ ایک چٹائی کی قیمت تقریباً چھ سو روپے ہے اور اس چھت پر مجموعی طور پر پانچ لاکھ روپے کے قریب خرچ ہوتے ہیں۔ چھت کی بدولت پودے تیز دھوپ کے علاوہ تیز ہوا اور مٹی سے بھی محفوظ رہتے ہیں۔

پان کی کاشت کے لیے ایک ایکڑ میں تقریباً پانچ سو سے چھ سو تک گملے لگتے ہیں۔ ایک گملے کی قیمت نو سو روپے تک ہوتی ہے۔ پان کی فصل کے چاروں طرف دیوار بنائی جاتی ہے۔ کھاد، ادویات اور مزدوری کے علاوہ دیگر اخراجات بھی ہوتے ہیں۔

ان کا کہنا ہے کہ اگر سیلاب، بارشیں اور تیز ہوائیں نقصان نہ پہنچائیں تو پان کے پودے کی عمر 20 سے 25 سال ہو سکتی ہے۔ ایک ہفتے میں دو مرتبہ پان کے پتے چنے جاتے ہیں۔ بڑے، چھوٹے اور سب سے چھوٹے پتوں کو الگ الگ کیا جاتا ہے۔ ان کی قیمتیں مختلف ہوتی ہیں۔ پتے توڑنے کے بعد دو ہفتوں میں نئے پتے پیدا ہو جاتے ہیں۔&quot;

انہوں نے بتایا کہ سندھ کے تین شہروں کراچی ، حیدرآباد اور ٹھٹہ میں پان کی منڈی لگتی ہے۔

گاڑہو سے تعلق رکھنے والے ایک اور کاشت کار میر بلوچ نے بتایا کہ وہ پان کی فصل کا اپنی اولاد کی طرح خیال رکھتے ہیں۔ پان نازک ہوتے ہیں اس لیے ان کی سارا دن دیکھ بھال کی جاتی ہے۔ کھیت میں گودائی اور پٹائی ہوتی ہے اور پودوں کی بیماری پر ہر وقت نظر رکھی جاتی ہے۔

ان کا کہنا ہے کہ سانجی پان کی فصل سب سے اچھی ہوتی ہے۔ سیلون پان نازک ہوتا ہے اور اس میں ہوا اور گرمی برداشت کرنے استطاعت بہت کم ہوتی ہے۔ اسی لیے اس کی پیداوار بھی کم ہوتی ہے۔

پاکستان میں کسانوں کے لیے سود مند اس فصل پر اب تک کوئی تحقیق منظر عام پر نہیں آئی اور نہ ہی محکمہ زراعت کے عملے کو اس بارے میں کچھ علم ہے۔

گاڑہو میں سات سے آٹھ ہزار چھاپروں میں بڑے پیمانے پر پان کی پیداوار ہوتی ہے۔

پان کے کھیت پر مزدوری کرنے والے عثمان بلوچ نے بتایا کہ وہ ہفتے میں دو دن پان کے پتے چنتے ہیں۔ پانی بھی بہت احتیاط سے دینا پڑتا ہے۔ پان کے کھیتوں میں نالیوں کے ذریعے اتنا پانی دیاجاتا ہے جو چند منٹوں کے اندر زمین میں جذب ہو جائے۔ اگر پانی کھڑا ہو جائے گا تو پان کی فصل تباہ ہو جائے گی۔انہوں نے بتایا کہ موسم سرما میں پان کی پیدوار میں کمی آجاتی ہے۔

حیدر آباد میں پان منڈی کے کمیشن ایجنٹ اعجاز عزیز نے بتایا کہ وہ گاڑہو کے زمین داروں سے کمیشن پر مال خریدتے ہیں۔ انہیں پان پر 15 روپے فی کلو کمیشن ملتا ہے اور وہ اسے دکان داروں اور دیہی علاقوں میں فروخت کرتے ہیں۔

انہوں نے بتایا کہ سیلون پان دو ہزار سے تین ہزار روپے کلو، سانجی پان 13 سو سے 15 سو روپے کلو جبکہ سری لنکا کا پان ساڑھے چار ہزار روپے کلو فروخت ہوتا ہے۔

&quot;اس کاروبار میں کبھی کبھی ہمیں بھاری نقصان اٹھانا پڑتا ہے ۔ ہم مال خرید کر جلد آگے فروخت کر دیتے ہیں۔ اگر تین دن میں پان فروخت نہ ہو تو پتا سُکڑ کر خراب ہو جاتا ہے جس سے ہمیں بھاری نقصان ہو سکتا ہے۔&quot;

انہوں نے بتایا کہ حیدرآباد میں منگل اور ہفتے کے روز منڈی لگتی ہے جس میں پان کا ہزاروں کلو پتا فروخت ہوتا ہے۔ منڈی کے ایک دکان دار کامران قائم خانی نے بتایا کہ وہ مال خرید کر اسی وقت برف کے ٹکڑے کے ساتھ ٹوکری میں ڈال کر ٹھنڈی جگہ پر رکھ دیتے ہیں اور پھر اسے عمر کوٹ، بدین، سانگھڑ، نواب شاہ، تھرپارکر سمیت دیگر اضلاع میں فروخت کیا جاتا ہے۔

رحمت اللہ کا کہنا ہے کہ اگر کسانوں کو پان کی کاشت کے حوالے سے رہنمائی اور وسائل مہیا کیے جائیں تو یہ ملک کی نقد آور فصلوں میں ایک اور اچھا اضافہ ہو گا۔

اویس رحمانی

محمد اویس رحمانی کا تعلق سندھ کے ضلع سانگھڑ سے ہے۔ پانچ سال سے حیدرآباد میں صحافت کر رہے ہیں۔ زراعت اور رورل ڈیولپمینٹ پر لکھنے کا شوق ہے۔

حیدر آباد کی اقلیتی آبادی مُردوں کو دفن کرنے کے لیے کیوں پریشان ہے؟

کنری کے شہریوں کی آنکھوں میں کون مرچوں کی دھول جھونک رہا ہے؟

ٹھٹھہ میں گاڑہو کا پان: مقامی سطح پر پان کی کاشت نے کسانوں کے لیے امکانات کے نئے در کھول دیے