Explore the unique dynamics of HIV patient care in Gujarat, Pakistan, including challenges, healthcare initiatives, and community support. Gain valuable insights into the evolving landscape o

Insights into HIV Patients in Gujarat, Pakistan: Understanding Challenges and Opportunities

گجرات کی تحصیل جلال پور جٹاں کے 14 سالہ احمد آٹھویں جماعت کے طالب علم ہیں جو اپنے قصبہ جوگی پور کے سرکاری سکول میں زیر تعلیم ہیں۔ وہ بتاتے ہیں کہ وہ جونہی کلاس روم میں جاتے تھے ٹیچر انہیں تمام بچوں سے الگ آخری کونے میں بٹھا دیتے تھے۔

&nbsp;&quot;میری کلاس کے بچے مجھ سے نفرت کرتے ہیں اور محلے دار بھی میرے گھر والوں سے دور بھاگتے ہیں کیونکہ میرے والد کا ایچ آئی وی پازیٹو آ&nbsp; گیا تھا&quot;۔

احمد، عزیز بھٹی شہید ہسپتال گجرات کے ایچ آئی وی ڈیپارٹمنٹ میں اپنے والد کے ساتھ ان کے چیک اپ کے لیے آئے تھے۔ وہ کہتے ہیں کہ 2022ء میں ان کے والد کی طبیعت خراب رہتی تھی۔ پچھلے سال جنوری میں ان کا ٹیسٹ کرایا تو ایچ آئی وی پازیٹو کی رپورٹ آئی۔

&quot;ہمارے گھر میں تو جیسے قیامت آ&nbsp; گئی۔ خاندان والے چاہتے تھے کہ بات یہیں دبا دی جائے مگر میری والدہ نے انکار کر دیا اور انہوں نے نہ صرف ہم سب کی سکرینگ کرائی بلکہ والد کے قریبی لوگوں کو بھی ٹیسٹ کرانے کا مشورہ دیا&quot;۔

احمد بتاتے ہیں کہ ان کے والد کی کسی نے مدد نہیں کی۔ ان کی والدہ نے اپنے زیور بیچ دیے جبکہ گھر کا نظام چلانے کے لیے بہنوں کو پڑھائی چھوڑ کر کام کرنا پڑا۔

ایچ آئی وی ( ہیومن امیونو وائرس)&nbsp; ایک وائرس ہے جو جسم کے دفاعی نظام کر کمزور کر دیتا ہے اور جسم کے لیے دوسری بیماریوں سے لڑنا مشکل ہو جاتا ہے اور مختلف انفیکشنز، کینسر وغیرہ جنم لے سکتے ہیں۔

ایچ آئی وی تقریباً چار عشروں سے عالمی مسئلہ بنا ہوا ہے۔ تحقیقی رپورٹس بتاتی ہیں کہ یہ وائرس اپنی ساخت بدلتا رہتا ہے جس کی وجہ سے ابھی تک اس کی کوئی ویکسین تیار نہیں کی جا سکی ہے۔

اہم بات یہ ہے ایچ آئی وی ناقابل علاج نہیں۔ تاہم بر وقت علاج نہ ہونے کی صورت میں یہ بیماری ایڈز پر منتج ہوتی ہے۔

عالمی ادارہ صحت ( ڈبلیو ایچ او) کے مطابق ایچ آئی وی، متاثرہ شخص کی جسمانی رطوبت دوسرے شخص میں منتقل ہونے سے پھیلتا ہے۔ یہ وائرس حمل اور بچے کی پیدائش کے دوران بھی منتقل ہو سکتا ہے۔

متاثرہ شخص کے عام رابطے یعنی گلے ملنے، ہاتھ ملانے، یا ذاتی اشیاء اور کھانا وغیرہ بانٹنے سے یہ وائرس منتقل نہیں ہوتا۔

ڈبلیو ایچ او&nbsp; کے اعداد و شمار بتاتے ہیں کہ 2022ء میں دنیا بھر میں تین کروڑ 90 لاکھ لوگ ایچ آئی وی کے ساتھ زندگی بسر کر رہے تھے جن میں سے دو تہائی افراد کا تعلق افریقی ممالک سے ہے۔ اسی سال چھ لاکھ 30 ہزار لوگ اس مرض سے ہلاک ہو ئے۔

گلوبل ایڈز مانیٹرنگ کی کنٹری رپورٹ پاکستان 2020ء کے مطابق ایچ آئی وی کے ساتھ زندگی گزارنے افراد کی سب سے زیادہ تعداد دو صوبوں یعنی سندھ اور پنجاب میں رہتی ہے جو مجموعی مریضوں کا 91 فیصد ہے۔ ایڈز سے متاثرہ شہروں میں کراچی سرفہرست ہے جس کے بعد فیصل آباد اور پھر لاہور کا نمبر آتا ہے۔

یہ رپورٹ بتاتی ہے کہ ملک بھر میں ایک لاکھ 83 ہزار 705 افراد ایچ آئی وی کے ساتھ زندگی گزار رہے ہیں جن میں 69 فیصد مرد، 21 فیصد خواتین اور تین فیصد 14 سال سے کم عمر بچے شامل ہیں۔ رپورٹ کہتی کہ پاکستان میں ایچ آئی وی سے متاثرہ افراد میں سب سے زیادہ تعداد ٹرانس جینڈرز&nbsp; اور مردوں سے جنسی تعلقات رکھنے والے مردوں کی ہے جن کا تناسب 25 فیصد ہے۔دوسرے نمبر پر منشیات کے ٹیکے لگانے والے آتے ہیں جن کا تناسب 24 فیصد ہے۔

متاثرہ افراد میں سیکس ورکرز اور ٹرانس جینڈرز کا تناسب دو، دو فیصد بنتا ہے جبکہ 47 فیصد افراد ایسے گروپوں سے تعلق رکھتے ہیں جن کے جنسی رویوں سے ان کے پارٹنر&nbsp; متاثر ہوتے ہیں۔

فی الحال ایچ آئی وی پازیٹو لوگوں کا واحد علاج&nbsp; اے آر ٹی ہے جو دوائیوں اور تھراپی کا امتزاج ہوتا ہے۔

ایشیا پیسفک ایچ آئی وی ڈیٹا ہب کے 2022ء کے اعداد و شمار کے مطابق پاکستان میں دو لاکھ 70 ہزار افراد ایچ آئی وی سے متاثرہ ہیں ۔ جن میں سے صرف 13 فیصد افراد اے آر ٹی حاصل کر رہے ہیں۔

نیشنل ایڈز کنٹرول پروگرام میں رجسٹرڈ ایچ آئی وی کیسز 53 ہزار 718 ہو گئے ہیں جن میں سے 32 ہزار 972 افراد ملک میں قائم 51 مراکز سے اینٹی ریٹرو وائرل تھراپی (اے آر ٹی) حاصل کر رہے ہیں۔

پاکستان میں متاثرین کا ڈیٹا ظاہر کرتا ہے کہ ڈیڑھ لاکھ کے قریب لوگ رجسٹریشن سے باہر ہیں جبکہ نیشنل ایڈز کنٹرول پروگرام میں رجسٹرڈ 32 ہزار 972 افراد اے آر ٹی حاصل کر رہے ہیں۔ جن میں سے سات ہزار 182 افراد پچھلے 6 ماہ میں اے آرٹیز میں سپلائی کی کمی کے باعث فالو اپ اپائنٹمنٹس سے محروم رہے۔

پاکستان کی وزارت صحت بھی ملک میں ایچ آئی وی کے اضافے کا اعتراف کرتی کرتی ہے۔ لگ بھگ دو ماہ قبل&#39; ایڈز کنٹرول کے عالمی دن&#39; پر وزارت نے بتایا تھا کہ ملک میں ہر ماہ ایچ آئی وی کے تقریباً 900 سے ایک ہزار&nbsp; نئے کیس سامنے آرہے ہیں جن میں سے زیادہ تر پنجاب اور سندھ سے ہیں۔

ضلع گجرات میں بھی صورت حال کم تشویشناک نہیں ہے۔

مئی 2019ء میں دو ہزار افراد ایچ آئی وی پازیٹو پائے گئے تھے اور ان میں 120 بچے بھی شامل تھے۔

جی پی او ہیلتھ ڈیپارٹمنٹ گجرات کے مطابق 2022ءکے آخر تک ضلعے میں تین ہزار ایچ آئی وی پازیٹو کیس رجسٹرڈ کیے گئے جن میں دو ہزار 346 مرد، 600 خواتین اور 54 ٹرانس جینڈرز شامل تھے۔

انہوں نے بتایا کہ اس وقت گجرات میں پنجاب ایڈز کنٹرول پروگرام کے تحت چار اے آر ٹی سنٹرز کام کر رہے ہیں جن میں سول ہسپتال، عزیز بھٹی شہید ہسپتال، ڈی ایچ کیو اور مدر اینڈ چائلڈ سنٹر شامل ہیں جہاں 780 ایکٹیو کیسز ہیں۔

گجرات کے سب سے بڑے آر ٹی سنٹر عزیز بھٹی شہید ہسپتال کا 2023ء کا ریکارڈ بتاتا ہے کہ یہاں ایکٹیو کیسز کی تعداد 319 ہے جس میں سے 224 میڈیسن اور تھراپی لے رہے ہیں، 88 افراد نے ایچ آئی وی پازیٹو رپورٹ آنے کے بعد علاج نہیں کرایا اور غائب ہو گئے۔ سات افراد موت کے منہ میں جا چکے ہیں۔

اعداد و شمار سے اندازہ ہو تا ہےکہ اس علاقے میں ایچ آئی وی اسی رفتار سے پھیلتا رہا تو یہاں بھی صورت حال افریقی ممالک سے مختلف نہیں ہو گی۔ وسیع پیمانے پر ایڈز کی سکریننگ کی جائے تو ناقابل یقین نتائج سامنے آ سکتے ہیں۔

ڈاکٹر تبسم 2020ء سے عزیز بھٹی ہسپتال کے ایچ آئی وی ڈیپارٹمنٹ میں کام کر رہی ہیں۔ وہ بتاتی ہیں کہ یہاں اوسطاً ماہانہ 50 سے 60 افراد کی سکرینگ ہوتی ہے جن میں 70 فیصد مرد، 30 فیصد خواتین اور اکا دکا ٹرانس جینڈر ہوتے ہیں۔

وہ کہتی ہیں کہ اکثر افراد کسی ریفرنس سے آتے ہیں حالانکہ یہاں ایچ آئی وی کی تشخیص مفت ہے۔ پھر بھی اپنی مرضی سے سکرینگ کے لیے مشکل سے ہی کوئی آتا ہے جبکہ سب کو ہر چھ ماہ بعد ٹیسٹ کرانے چاہئیں۔

عزیز بھٹی ہسپتال کے&nbsp; شعبہ ایچ آئی وی کے سربراہ ڈاکٹر عمران نذیر بتاتے ہیں کہ ضروری نہیں ایچ آئی وی پازیٹو شخص لازمی ایڈز کا شکار ہو بلکہ ایسے لوگ ایڈز کے بغیر برسوں زندہ رہ سکتے ہیں اور علاج سے معمول کے قریب تر زندگی گزار سکتے ہیں۔ تاہم یہ بھی حقیقت ہے کہ ایچ آئی وی پازیٹو شخص ہی ایڈز کا شکار ہوتے ہیں۔

&quot; اگر کوئی فرد ایڈز کا شکار ہو جاتا ہے تو اس بیماری کا دوسری بیماریوں سے فرق کرنا مشکل ہوتا ہے۔ ایڈز کی علامات کافی عرصے بعد واضح ہو تی ہیں اور اس کی تشخیص خون کے ٹیسٹ کے ذریعے ہی ہوتی ہے۔

&quot;سرکاری ریکارڈ کے مطابق ضلع گجرات کے تین لاکھ سے زائد افراد اس وقت مشرق وسطیٰ، یورپ اور امریکہ میں کام کر رہے ہیں۔ اس ڈیٹا کو سامنے رکھ کر ہی اس علاقے میں ایڈز کے پھیلاؤ کے عوامل کو دیکھنا اور اس کا انتظام کرنا ہو گا&quot;۔

ڈاکٹر ندیم احمد سائیکالوجسٹ ہیں اور چھ سال سے عزیز بھٹی ہسپتال میں کام کر رہے ہیں۔ وہ بتاتے ہیں کہ ایچ آئی وی سے متاثرہ افراد میں 18 سے 30 سال کی عمر کے افراد کی تعداد زیادہ ہے۔ ان میں سرنج کے ذریعے ڈرگز لینے والے اور بیرون ملک سے وطن واپس آنے والے مزدور اور غیر محفوظ جنسی سرگرمیوں میں ملوث افراد زیادہ ہیں۔

&quot;یہاں کے تقریباً ہر خاندان کا کم از کم ایک فرد باہر گیا ہوا ہے۔ بیرون ملک مقیم مزدور علامات ظاہر ہونے پر واپس آ جاتے ہیں اور بیماری چھپائے رکھتے ہیں جس سے اپنے پارٹنرز اور آنے والے بچے کو بھی متاثر کرتے ہیں&quot;۔

&nbsp;عزیز بھٹی شہید ہسپتال میں ایچ آئی وی سے متاثر فرد اپنی بیماری کے بارے میں بات کرنے کو تیار نہیں تھا۔

خواجہ سرا &zwnj;روزی کا تعلق گجرات سٹی کی ٹرانس کمیونٹی سے ہے جن کا 2022ء میں ایچ آئی وی پازیٹو ہونے کی تصدیق ہوئی تھی۔ ان کا کہنا تھا کہ نہ صرف ان کی پوری کمیونٹی اور برادری بلکہ خاندان کے افراد بھی نفرت کرتے ہیں۔

&quot;ہم اپنا گھر چھوڑنا نہیں چاہتے ہیں مگر مجبوراً نقل مکانی کرنا پڑی۔ اب در در ٹھوکریں کھا رہے ہیں۔&quot;

احمد کے والد کی طبیعت میں کافی سدھار آ گیا ہے۔

&quot; ہم نارمل زندگی کی طرح بڑھ رہے ہیں تاہم لوگوں کے روئیے اب بھی ویسے ہیں۔ مگر میں میں ان چیزوں کا عادی ہو گیا ہوں&quot;۔

گجرات:  خواتین کینسر کی تشخیص کے بعد غائب کیوں ہو جاتی ہیں؟

گجرات میں ایچ آئی وی پازیٹیو افراد کی تعداد کیوں بڑھ رہی ہے؟

text

Discover the landscape of breast cancer in Pakistan, including awareness efforts, treatment options, and prevailing challenges. Stay informed on initiatives, resources, and advancements in th

Understanding Breast Cancer in Pakistan: Awareness, Treatment, and Challenges

رخسانہ کا تعلق گجرات سے ہے، ان کی عمر ستائیس برس اور وہ کینسر کی مریضہ ہیں۔ان کی شادی کو چار سال ہو چکے ہیں اور ان کا ایک بچہ بھی ہے۔ رخسانہ بتاتی ہیں جب ان میں چھاتی کے کینسر کی تشخیص ہوئی تو انہیں احساس شرمندگی نے آن گھیرا، کیونکہ پہلی بار ان کے جسم کے بارے میں خاندان کے مرد&nbsp; اور عورتیں بات کر رہے تھے۔ انہیں شوہر اور ان کے بچے سے بھی دور کر دیا گیا کہ کہیں ان پر بیماری کا اثر نہ ہوجائے۔ حتٰی کہ گھر میں شوہر کی دوسری شادی کی باتیں بھی ہونے لگیں۔

&quot;تیمارداری کرنے والی خواتین کا رویہ تکلیف دہ ہوتا وہ مجھے یوں محسوس کرواتیں جیسے میں ایک بری عورت ہوں اور بیماری کی شکل میں مجھے سزا مل رہی ہے۔&quot;

چھاتی کا کینسر ایک عالمی اور اہم مسئلہ ہے اور پچھلی نصف صدی میں تیزی سے منظر عام پر آنے والی بیماریوں میں سے سرفہرست ہے۔

ڈاکٹر فضیلت گائناکالوجسٹ ہیں اور گجرات کے شفا ہسپتال میں 2018ء سے کام کر رہی ہیں۔ ان کے پاس جو خواتین آتی ہیں وہ انہیں بریسٹ کینسر کے حوالے سے بھی رہنمائی دیتی رہتی ہیں۔

انہوں نے لوک سجاگ کو بتایا کہ پاکستان میں اس مرض کے ساتھ شرم و حیا کا عنصر جڑا ہوا ہے، اس کے علاو خاتون ڈاکٹر کی عدم دستیابی، مریض کی طرف سے لاپروائی ایسے عوامل ہیں جن کی وجہ سے مرض کی بروقت تشخیص نہیں ہو پاتی۔

&quot;گجرات جیسے چھوٹے شہروں میں اگر کسی خاتون میں کینسر کی تشخیص ہو جاتی ہے تو بروقت علاج نہیں ہو پاتا کیونکہ&nbsp; وہ اس بارے میں بات کرنے سے شرماتی ہیں، ان کے پاس علاج کے پیسے نہیں ہوتے۔ اس مرض کے ساتھ ضیف العتقادی بھی جڑی ہے، وہ پیروں فقیروں سے دم کیے پانی پر اکتفا کرتی ہیں۔ اس دوران مرض بڑھتا رہتا ہے&quot;۔

انہوں نے بتایا کہ ضلع گجرات کے&nbsp; تین ہسپتالوں میں کسی حد تک اسکریننگ یونٹس قائم تو ہیں مگر تربیت یافتہ افرادی قوت اور انفراسٹرکچر دونوں لحاظ سے بہت سی خامیاں موجود ہیں۔

ضلع&nbsp; گجرات میں عزیر بھٹی ہسپتال، ویمن کلینک ٹی ایچ کیو ڈنگا، ٹی ایچ کیو ہسپتال کھاریاں، سرائے عالمگیر اور میجر شبیر شریف شہید ٹی ایچ کیو ہسپتال کنجاہ کے ریکارڈ کے مطابق 2020ء سے 2023ء کے دوران 24 ہزار 202 خواتین کی سکرینگ کی گئی جن میں سے 789 خواتین میں چھاتی کے کینسر کی علامات دیکھی گئی۔ ہسپتال میں رجسٹرڈ کیسز کی تعداد 267 ہے۔ یعنی علاج&nbsp; پر راضی ہونے والی مریضوں کا تناسب 30 فیصد سے بھی کم ہے۔

عزیز بھٹی شہید ہسپتال&nbsp; کے اعداد و شمار کے مطابق 2020ء سے 2023ء تک&nbsp; کل 641 خواتین مریضوں کی سکرینگ کی گئی جن میں سے 89 خواتین&nbsp; میں چھاتی کے کینسر کی تشخیص ہوئی۔ان میں سے 23خواتین نے علاج جاری رکھا جبکہ 57 خواتین تشخیص کے بعد غائب ہو گئیں۔ نو مریض خواتین جانبر نہ ہو سکیں۔

نیشنل انسٹیٹیوٹ آف ہیلتھ میں چھپنے والی ایک تحقیق کے&nbsp; مطابق پاکستان میں ہر نو میں سے تقریباً ایک عورت چھاتی کے کینسر میں مبتلا ہو سکتی ہے۔ ہر 24 گھنٹے میں 109 خواتین بریسٹ کینسر کی وجہ سے موت کے منہ میں چلی جاتی ہیں۔ سالانہ 90 ہزار سے زائد خواتین چھاتی کے کینسر کا شکار ہوتی ہیں جن میں سے 40 ہزار جان سے ہاتھ دھو بیٹھتی ہیں۔

عالمی ادارہ صحت کے مطابق پاکستان میں متاثرہ خواتین کی تشخیص ایسے مرحلے پر ہوتی ہے جب کینسر کافی حدتک بگڑ چکا ہوتا ہےاور علاج ناممکن ہو جاتا ہے۔

جرنل آف کینسر پالیسی میں چھپنے والی ایک تحقیق کے مطابق، سال 2020ء میں پاکستان میں خواتین میں چھاتی کے کینسرکے ایک لاکھ 78ہزار کیس رپورٹ ہوئے۔

عالمی ادارہ صحت کے ذیلی ادارے، انٹرنیشل کینسر ریسرچ ایجنسی کے مطابق پوری دنیا میں ہر سال تقریباً 13 لاکھ 80 ہزار خواتین میں بریسٹ کینسر کی تشخص ہوتی ہے جن میں سے چار لاکھ 58 ہزار جان کی بازی ہار جاتی ہیں۔

رقیہ بی بی گجرات کے نواحی گاؤں پھلاں کی رہائشی ہیں، ان کی عمر 47 برس ہے۔ چند سال پہلے ان میں چھاتی کے کینسر کی تشخیص ہوئی تھی۔ علاج کے بعد وہ ایک نارمل زندگی گزار رہی ہیں۔

&quot; میری زندگی کامشکل ترین وقت تھا جب مجھے پتہ چلا کہ مجھے چھاتی کا کینسر ہے۔ مجھے لگا اب چند دنوں میں، میں مر جاؤں گی تو بہتر ہے علاج پر اپنے گھروالوں کے پیسے ضائع نہ کرواؤں۔ اب میں اس ڈاکٹر کو دعائیں دیتی ہوں جنہوں نے مجھے علاج پر قائل کیا اور اب سرجری کے بعد میں ایک صحت مندانہ زندگی گزار رہی ہوں۔میرے جیسی کتنی ہی کم پڑھی لکھی خواتین اس مرض کا شکار ہوں گی جنہیں بالکل نہیں علم کہ اس بیماری کا علاج ممکن ہے&quot;۔

پاکستان میں اس مرض کے علاج میں بڑی رکاوٹ ضیعف العتقادی بھی ہے۔

آمنہ کی عمر 34 برس ہے، ان کا تعلق گجرات شہر سے ہے، انہوں نے لوک سجاگ کو بتایا کہ پہلے پہل جب انہوں نے اپنی چھاتی میں ایک گلٹی محسوس کی تو اپنی بہنوں اور کزنر کو اس بارے میں بتایا۔ ان کی ایک کزن نے انہیں روحانی علاج کا نہ صرف مشورہ دیا بلکہ ایسی کئی کہانیاں بھی سنائیں جن میں دم اور تعویزوں کے استعمال سے خواتین کو صحت یابی مل گئی تھی۔

&quot;میں اس بیماری کے بارے صرف اتنا جانتی تھی اگر ڈاکٹری علاج کروایا جائے تو عورت کی چھاتیاں کاٹ دی جاتی ہیں۔ اس ڈر سے میں چھ ماہ تک مختلف آستانوں پر جاتی رہی لیکن گلٹی سکڑنے کی بجائے پھیلتی رہی اور میری تکلیف دن بدن بڑھتی رہی۔&quot;

ڈاکٹر نعمان عزیر بھٹی ہسپتال میں کیسنر وارڈ کے انچارج&nbsp; ہیں۔ انہوں نے&nbsp; لوک سجاگ کے ساتھ گفتگو کرتے ہوئے بتایا کہ بیشتر خواتین مرد ڈاکٹر سے علاج کروانا معیوب سمجھتی ہیں۔ان پر خاندان کی طرف سے بھی دباؤ ہوتا ہے کہ وہ مرد معالج کے پاس نہیں جائیں گی۔ ایسی صورت میں اگر خاتون ڈاکٹر دستیاب نہ ہو تو علاج میں بہت دیر ہوجاتی ہے۔اس کے علاوہ کینسر کا علاج بہت مہنگا ہوتا ہے اور عام طور پر کمآمدنی والے خاندان ان اخراجات کو برداشت کرنے سے قاصر ہوتے ہیں۔ یہی وجہ ہے کہ خواتین اپنے درد کو چھپاتی ہیں۔

ڈاکٹر مائلہ کھاریاں ہسپتال میں ایم بی ایس جنرل سرجن ہیں اور کینسر ڈیپارٹمنٹ میں اپنے فرائض سر انجام دے رہی ہیں۔

انہوں نےلوک سجاگ کو بتایا کہ خواتین میں آگاہی پھیلانے کی ضرورت ہے۔انہیں بتایا جائے کہ اس مرض کی بروقت تشخیص بہت ضروری ہے۔ وہ اپنا معائنہ خود سے کر سکتی ہیں اگر انہیں چھاتی میں کسی قسم کی گلٹی یا ساخت میں تبدیلی&nbsp; محسوس ہو تو فورا ڈاکٹرسے رابطہ کرنا چاہیے۔ جو مائیں اپنے بچوں کو دودھ پلاتی ہیں ان میں اس بیماری کا خطرہ کم ہوتا ہے۔

ڈاکٹر محسن 2020ء سے اکرام ہسپتال گجرات میں آنکولوجسٹ کی ڈیوٹی سرانجام دے رہے ہیں۔ انہوں نے لوک سجاگ کو بتایا کہ چھاتی کا کینسر خاموش مرض ہے۔ بعض اوقات آخری سٹیج تک چھاتی میں کسی قسم کا درد نہیں ہوتا لیکن چھاتی کے اطراف کا رنگ یا ساخت بدل جاتی ہے، نپل سے خون آلود&nbsp; یا بد بودار مواد نکلتا ہے۔

&quot;بروقت تشخیص کے لیے ضروری ہے کہ چالیس سال کی عمرکے بعد خواتین باقاعدگی سے سکریننگ کرواتی رہیں۔ چھاتی کے کینسر کی تشخیص زیادہ تر بیماری کے مرحلے پر منحصر ہے۔ ٹیومر جتنا چھوٹا ہو گا، علاج اتنا ہی آسان اور سستا ہو گا&quot;۔

اپنا شریکِ درد بنائیں کسی کو کیا: چھاتی کے کینسر میں مبتلا خواتین کیسے گھٹ گھٹ کر مر رہی ہیں۔

پروین کا تعلق ڈیرہ غازی خان کے علاقے سمینہ سادات کی ایک چھوٹی سی بستی سے ہے۔ پروین اور ان کے شوہر 12 سال سے دریا کے کنارے اپنی آٹھ ایکڑ خاندانی اراضی پر کھیتی باڑی کر رہے تھے مگر 2022ء میں آنے والا سیلاب ان کا گھر بار اور کھیت کھلیان بہا لے گیا۔

اس خاندان کو مجبوراً شہر کا رخ کرنا پڑا۔ پروین اور ان کی دونوں بیٹیاں اب لوگوں کے گھروں میں کام کر کے اپنا اور اپنے خاندان کا پیٹ پال رہی ہیں۔

2022ء کے سیلاب سے بالخصوص دریائے سندھ کے کناروں پر موجود آبادیاں شدید متاثر ہوئیں۔ دریائے سندھ کا کٹاؤ بھی اس سیلاب سے شدت اختیار کر گیا اور آس پاس کا بہت سا رقبہ دریا برد ہونے لگا ہے۔

ریلیف ویب کے مطابق 2022ء میں آنے والے سیلاب سے ضلع میں بچوں اور عورتوں سمیت 67 افراد بچے جاں بحق ہوئے اور 342 دیہات سیلاب کی زد میں آئے، 24 ہزار سے زیادہ گھروں کو جزوی یا مکمل طور پر نقصان پہنچا اور لگ بھگ سات لاکھ لوگ متاثر ہوئے۔

مقامی حکومت کی ویب سائٹ کے مطابق دریائے سندھ کی ضلع میں لمبائی 200 کلومیٹر ہے۔ دریا ضلع کے مشرق میں ہے جبکہ مغربی جانب کوہ سلیمان کا پہاڑی سلسلہ ہے۔

پہاڑوں سے آنے والی رودکوہیوں اور دریا میں آنے والی طغیانی دونوں کے باعث یہاں سیلاب کا خطرہ زیادہ رہتا ہے۔ اپنے مخصوص جغرافیے کے سبب موسمیاتی تبدیلی سے اس خطے کے زیادہ متاثر ہونے کا احتمال رہتا ہے۔

موسمیاتی سروس میٹیو بلیو کے اعداد و شمار سے معلوم ہوتا ہے کہ 1994ء کے بعد ضلع ڈیرہ غازی خان میں سب سے زیادہ بارشیں 2022ء میں ہوئیں۔

گزشتہ 10 برسوں میں ان کے پیٹرن میں واضح تبدیلی بھی نظر آتی ہے۔ مثلاً 1979ء کے بعد سب سے زیادہ بارشیں 2010ء، 2015 اور 2020ء میں ہوئیں۔ دوسری جانب ضلع میں 2021ء میں چار دہائیوں میں سب سے کم بارشیں ہوئی تھیں۔

2010ء میں آنے والے سیلاب کو قیام پاکستان کے بعد علاقے میں آنے والا سب سے بڑا سیلاب تصور کیا جاتا ہے۔ دریائے سندھ میں تونسہ بیراج کے مقام پر دو اگست 2010ء کو نو لاکھ 60 ہزار کیوسک کا سیلابی ریلا آیا&nbsp; تھا جو 1958ء میں ریکارڈ کیے گئے سات لاکھ 88 ہزار 646 سے زیادہ تھا۔

پروین کے شوہر لوک سجاگ کو دریائے سندھ کے کنارے اپنی &#39;بستی بھائی&#39; کی باقیات دکھانے لے گئے۔

انہوں نے بتایا گزشتہ سال کا سیلاب بستی کے 250 گھر، سکول، مسجد، قبرستان سب بہا لے گیا۔ متاثرین میں سے کچھ&nbsp; نے شہر اور آس پاس کے دیہات میں پناہ لے لی۔ بہت سے خاندان چند کلومیٹر کے فاصلے پر بستی کھاکھی میں جا بسے جنہیں رہائش کے مسائل کا سامنا ہے۔

بستی بھائی کے بزرگوں نے بتایا کہ دریا بہت سا زرعی رقبہ بہا لے گیا ہے اور اب بہت سے لوگ ادھر اُدھر مزدوری کر کے پیٹ پالتے ہیں۔

ان کا کہنا تھا کہ گزشتہ 40 برسوں میں دریا ان کی 50 مربع زمین کھا گیا ہے۔

&quot;کاشت کی زمین تو کجا، اب ہمارے پاس گھر بنانے کی زمین بھی نہیں ہے۔ اب ہم نے پانی کے حصول کے لیے زمین میں بور کرنے کا فیصلہ بھی ترک کر دیا ہے۔ کیا فائدہ جب چھ ماہ بعد دریا اسے بھی خراب کر دے گا۔&quot;

ایک بزرگ عورت کا کہنا تھا کہ لوگوں کی تسلی کے لیے دو سال قبل یہاں بند بنانے کی غرض سے 10 ٹرک پتھر لائے گئے تھے، مگر پانی سب پتھر بہا لے گیا۔ ابھی بس دو ٹرکوں کا پتھر پڑا ہے باقی سب دریا کی نذر ہو گیا ہے۔

&quot;وہ رات مُجھے اچھے سے یاد ہے جب مسجد سے اعلان ہو رہا تھا کہ سیلاب آگیا ہے، خود کو سنبھالو، اور اتنے میں مسجد میں پانی آ&nbsp; گیا۔ مسجد کے بعد لوگوں کے گھر تھے۔ ایک طرف قبرستان تھا، دوسری جانب سکول، دریا سب کچھ بہا لے گیا۔ ہر کوئی بس اپنا سامان سمیٹ کر بھاگ رہا تھا۔ &quot;

یہاں کے سابق یونین کونسلر محبوب حسین کشانی کا کہنا تھا کہ انہوں نے علاقے کے لوگوں کے ساتھ مل کر سپر بند بنوانے کی بھرپور کوشش کی، وہ متعدد اعلیٰ حکام تک عرضیاں لے کر گئے۔ اس کے بعد لاہور سے ٹیمیں جائزہ لے کر گئیں۔ سپر بند کی منظوری دے دی گئی، نقشہ بھی تیار ہو گیا مگر عملاً کوئی قابل ذکر اقدام نہیں اٹھایا گیا۔

مقامی لوگوں کے مطابق انیسویں صدی کے اواخر تک دریائے سندھ کے اطراف جنگلات سے اٹے ہوئے تھے۔ یہ جنگلات لکڑی اور ایندھن کا ذریعہ، مختلف انواع کی جنگلی حیات، دریائی اور مہمان پرندوں کا گھر تھے۔

ان میں لگی جھاڑیاں اور درخت سیلابوں میں قدرتی رکاوٹ تھے جن سے ان کی شدت اور اثرات کم ہو جاتے تھے۔ انسانی آبادی میں اضافے، تعمیرات اور زرعی زمینوں کے پھیلاؤ سے جنگلات کم ہوتے گئے۔

گلوبل فاریسٹ واچ کے مطابق 2001ء سے 2022ء تک ڈیرہ غازی خان میں درختوں کا دو ہیکٹر سایہ ختم ہوا ہے اور 2000ء سے اب تک اس میں چار فیصد کمی ہوئی ہے، یوں کاربن ڈائی آکسائیڈ کے اخراج میں اضافہ ہوا ہے۔

آسٹریلیا کی چارلس ڈارون یونیورسٹی اور نیشنل یونیورسٹی آف سنگاپور کی ایک تحقیق کے مطابق جنگلات کی کٹائی میں ہر 10 فیصد اضافے کے ساتھ سیلاب کا خطرہ 28 فیصد تک بڑھ جاتا ہے۔ جنگلات پانی کو فلٹر کرتے ہیں، کٹاؤ کو کم کرتے ہیں، بارشوں کو کنٹرول کرتے ہیں، زمینی پانی کی سطح برقرار رکھنے اور خشک سالی اور سیلاب کے اثرات کے خلاف بفر کا کام کرتے ہیں۔

بشام زین نے ایکوسٹ کے نام سے ایک گروپ بنایا ہوا ہے جو&nbsp; چند برسوں سے ڈیرہ غازی خان میں جنگلات کی افادیت سے متعلق آگاہی فراہم کر رہا ہے۔ بشام کا کہنا ہے کہ دریائے سندھ کے کنارے جنگلات کی دوبارہ شجرکاری آسان حل ہے۔ اس سے نہ صرف دریا کے کٹاؤ کو روکا جا سکتا ہے بلکہ سیلاب کے اثرات کو انتہائی حد تک کم کیا جا سکتا ہے۔

سمینہ کی رہنے والی نور بی بی کا کہنا ہے کہ وہ اور ان کا خاندان کئی سالوں سے زراعت سے وابستہ ہے، مگر اس بدلتی ہوئی آب و ہوا سے ان کی فصل کی پیداوار بری طرح متاثر ہوئی ہے۔ مسلسل خشک سالی اور غیر متوقع بارشوں سے ان کے خاندانوں میں مالی عدم استحکام اور خوراک کے حصول میں عدم تحفظ کا احساس بڑھتا جا رہا ہے۔

&quot;ہمارے پاس&nbsp; ساڑھے 10 ایکڑ رقبہ ہے جس میں کپاس اگاتے ہیں۔ بدلتی ہوئی آب و ہوا سے پچھلے سال پیداوار مشکل سے پچاس فیصد تک پہنچی۔ باقی کسانوں کی بھی ایسی ہی صورتحال تھی&quot;۔

وہ بتاتی ہیں کہ بہت سے خاندان دیہی علاقوں میں اپنے گھر بار چھوڑنے اور بہتر مواقع کی تلاش میں دوسرے گاؤں دیہات اور شہروں کی طرف ہجرت کرنے پر مجبور ہو گئے ہیں۔

موسمیاتی تبدیلی کے اثرات ہجرت پر بھی منتج ہوتے ہیں۔ ایشیائی ترقیاتی بنک کی ایک رپورٹ کے مطابق ایسی ہجرتیں عام طور پر داخلی یا اندرون ملک ہوتی ہیں۔ 2017ء کی مردم شماری کے مطابق ضلع ڈیرہ غازی خان کی کل آبادی کا 81 فیصد دیہات میں رہتا ہے۔ دیہات میں لوگوں کا زیادہ تر انحصار زراعت پر ہے۔

نقل مکانی اور ہجرت پر پالیسی ادارہ برائے پائیدار ترقی (ایس ڈی پی آئی) کی&zwnj;2017ء میں جاری ہونے والی رپورٹ میں ایک سروے کے حوالے سے بتایا گیا ہے کہ ڈیرہ غازی خان کے 50 فیصد گھرانوں میں کم از کم ایک نے گاؤں سے ہجرت کی ہے۔ رپورٹ کے مطابق 17 فیصد ہجرتوں کا سبب سیلاب اور بارشیں ہیں۔

پروین کی یادوں سے اپنا آبائی علاقہ محو نہیں ہوا۔ انہیں امید ہے کہ حالات ٹھیک ہو جائیں گے اور وہ دریا کے پاس اپنی بستی لوٹ جائیں گے۔

اسما طارق

اسما طارق کا تعلق گجرات سے ہے۔ ماحولیات، صنفی مساوات اور تعلیم ان کے دلچسپی کے موضوعات ہیں۔

گجرات میں ایچ آئی وی پازیٹیو افراد کی تعداد کیوں بڑھ رہی ہے؟

گجرات: خواتین کینسر کی تشخیص کے بعد غائب کیوں ہو جاتی ہیں؟

موسمیاتی تبدیلی سے نبرد آزما ڈیرہ غازی خان کو جنگل کا سہارا چاہیے