اعلیٰ تعلیم کے تمام ملکی اداروں میں جنسی ہراسانی سے تحفظ کے لیے ہائر ایجوکیشن کمیشن (ایچ ای سی) نے 2020ء میں ایک پالیسی تشکیل دی تھی۔ ایچ ای سی کی پالیسی دستاویز کے مطابق اسے دس برس قبل منظور ہونے والے &#39;پروٹیکشن اگینسٹ ہراسمنٹ آف ویمن ایٹ دی ورک پلیس ایکٹ&#39; کی روشنی میں بنایا گیا ہے۔ طلبا و طالبات، فیکلٹی اور ادارے سے وابستہ دیگر افراد کے علاوہ وہاں رہنے اور آنے والے لوگ اس کے دائرہ کار میں شامل ہیں۔

اس پالیسی میں اعلیٰ تعلیم کے اداروں کو کہا گیا ہے کہ وہ جنسی ہراسانی کی شکایت پر فوری معاونت کے لیے انتظامیہ کے کم از کم دو افراد کو فوکل پرسن نامزد کریں جن میں سے ایک کا خاتون ہونا ضروری ہے۔ نیز اداروں میں جنسی ہراسانی کی شکایت کی تفتیش کے لیے تین رکنی انکوائری کمیٹی بھی تشکیل دی جائے۔

تاہم بہت سے اداروں میں تاحال ایسی کوئی پالیسی تشکیل نہیں دی جا سکی۔

این ایف سی انسٹی ٹیوٹ آف انجینئرنگ اینڈ ٹیکنالوجی یونیورسٹی کی لیکچرر انجینئر مہوش قریشی کہتی ہیں کہ انسداد ہراسانی کمیٹی نہ ہونے کے باعث ان کا کیس جامعہ میں انضباطی کمیٹی کے حوالے کیا گیا۔ &quot;اگرچہ ملزم کو ملازمت سے برطرف کر دیا گیا ہے تاہم تاحال جامعہ میں انسداد ہراسانی کمیٹی تشکیل نہیں دی جا سکی۔&quot;

انہوں نے بتایا کہ جامعہ میں انسداد ہراسانی ایکٹ یا متعلقہ معلومات آویزاں نہ ہونے کے باعث انہیں بھی ایسے امور کے متعلق زیادہ علم نہیں تھا۔

بہاءالدین زکریا یونیورسٹی کی پروفیسر ڈاکٹر سیما محمود کا خیال ہے کہ طالبہ اور خواتین اساتذہ دونوں ہراسانی کا شکار ہو رہے ہیں۔ &quot;جامعات میں ہراسانی کی شکایت کرنے پر انہیں خاموش یا خوفزدہ کر دیا جاتا ہے جس کے بعد متاثرین اکثر اپنے کیس سے دست بردار ہو جاتے ہیں۔ بعض طالبات تعلیم ادھوری چھوڑ دیتی ہیں اور گوشہ نشینی اختیار کر لیتی ہیں&quot;

ان کا کہنا ہے کہ جب وہ انسداد ہراسانی سیل کی سربراہ تھیں، اسسٹنٹ پروفیسر نعمان واصف پر ایک معذور طالبہ کو جنسی طور پر ہراسانی کرنے کا الزام لگایا گیا تھا۔ 2020ء میں انہوں نے مخالفت کے باوجود اپنے فیصلے میں سینڈیکیٹ کو ان کی برطرفی کی سفارش کی۔ بعد ازاں یہ کیس ایف آئی اے کو رپورٹ ہوا جس کی تحقیقات کی روشنی میں ملزم کو ملازمت سے برطرف کیا گیا۔ وہ سمجھتی ہیں کہ کئی مرتبہ انسداد ہراسانی کمیٹی یا سیل میں حق دار عورتوں کو جگہ نہیں ملتی۔

بہاءالدین زکریا یونیورسٹی کی اسسٹنٹ پروفیسر ڈاکٹر رفیدہ نواز نے 2018ء میں اپنے شعبہ انٹرنیشنل ریلیشن کے چیئرپرسن ڈاکٹر عمرفاروق زین پر ہراسانی کا الزام لگایا۔ ان کا کیس تین سال سے سینڈیکیٹ اور صوبائی خاتون محتسب کے پاس زیرالتوا ہے۔ اس دوران ملزم ڈین کے عہدہ پر ترقی پا چکے ہیں۔انہوں نے کہا کہ ایک سابق وی سی نے ان کی شکایت پر ایکشن لینے کے بجائے انہیں بلا کر کہا کہ &quot;آپ کا پولیٹکل سائنس میں تبادلہ کر دیتے ہیں تاکہ آپ سکون سے کام کر سکیں۔&quot;

جامعہ کے انسداد ہراسانی سیل کو نائب قاصد اصغر کے خلاف طالبات کو غیر اخلاقی پیغامات بھیجنے اور بلیک میل کرنے کی شکایت موصول ہوئی۔ نائب قاصد اصغر کے خلاف پیڈا ایکٹ کے تحت کارروائی عمل میں لائی گئی ہے۔ البتہ بعدازاں اس کا تبادلہ دوسرے ڈیپارٹمنٹ میں کر دیا گیا۔

2022ء میں جامعہ بہاءالدین زکریا ملتان کے شعبہ باٹنی کی طالبہ شکیلہ (فرضی نام) نے بتایا کہ مائیکرو بیالوجی کے ایک لیکچرار کئی ماہ سے انہیں جنسی طور پر ہراساں کرتے رہے۔ وہ انہیں واٹس ایپ کے ذریعے گھر آنے کے پیغامات دیتے اور غیرشائستہ پیغامات اور ویڈیو بھیجتے ہیں۔ ان کے مطابق انہوں نے سکرین شارٹس بھی پیش کیے لیکن جامعہ کی انتظامیہ نے کوئی کارروائی کرنے کے بجائے ان پر درخواست واپس لینے کے لیے دباؤ ڈالا اور ملزم نے بھی انہیں دھمکایا۔ بالآخر انہوں نے نہ صرف شکایت واپس لے لی بلکہ اپنی تعلیم ادھوری چھوڑ کر گھر واپس لوٹ گئیں۔

یونیورسٹی کی ایک اہلکار وزیراں بی بی نے وائس چانسلر کو درخواست دی کہ سکیورٹی آفیسر انہیں کافی عرصہ سے ہراساں کر رہے ہیں۔ اس شکایت کی تصدیق ان کے دفتر نے بھی کی ہے تاہم کا ابھی تک اس کا کوئی نتیجہ نہیں نکلا۔

کچھ عرصہ قبل جامعہ بہاالدین زکریا کے شعبہ اردو کے چیئر پرسن ڈاکٹر ممتاز کلیانی کے خلاف ہراسانی کی شکایت پر انہیں خبردار کیا گیا مگر الزامات سے بری قرار دے دیا گیا۔ اس کیس میں جامعہ نے تین اساتذہ پر مشتمل کمیٹی تشکیل دی تھی۔ کیس ایسے وقت میں سامنے آیا جب ان کی مدت ملازمت ختم ہونے کو تھی۔ یہ ان کے خلاف دوسرا کیس تھا۔

جامعہ زکریا شعبہ اردو ایم فل کی متاثرہ طالبہ شمیم (فرضی نام) کہتی ہیں کہ وہ کئی ماہ سے ذہنی اذیت میں مبتلا ہیں۔ شعبہ کے چیئرپرسن ڈاکٹر ممتاز کلیانی نے انہیں اپنے دفتر بلایا اور چہرے سے حجاب اتارنے کے لیے دباؤ ڈالا اور بات نہ ماننے پر بعد ازاں فیل کرنے کی دھمکی دی۔

&quot;نتیجہ آیا تو میں فیل تھی۔ میری کہیں شنوائی نہیں ہو سکی۔ میں نے محتسب اور گورنر کو درخواست دے رکھی ہے۔ مجھ یونیورسٹی اور ہاسٹل سے بھی بے دخل کر دیا گیا ہے۔&quot;

جامعہ زکریا ملتان میں انسداد ہراسانی سیل کے چیئر پرسن ڈاکٹر عابد کھرل کہتے ہیں کہ انہیں دو ماہ پہلے چارج ملا ہے اور جامعہ میں ایسے صرف دو کیس رپورٹ ہوئے ہیں جن میں سے ایک ڈاکٹر ممتاز کلیانی کے خلاف تھا جو نمٹا دیا گیا جبکہ دوسرا شعبہ ایگری کلچر کا ہے۔

جامعہ زکریا کے ذرائع کے مطابق یونیورسٹی میں انسداد ہراسانی سیل کے دو ارکان ڈاکٹر لابر اور ڈاکٹر غزالہ یاسمین برسوں سے تعینات ہیں۔ سیکرٹری جامعہ کے رجسٹرار ہیں۔ رواں سال چوتھی ممبر ڈاکٹر روما کا اضافہ کیا گیا ہے۔

&nbsp;بہاالدین زکریا یونیورسٹی ملتان کی پروفیسر ڈاکٹر سیما محمود کہتی ہیں کہ 14-2013 میں انہیں اپنے شعبہ کی ڈائریکٹر بنایا گیا۔ ان کے مطابق اس عہدے کے امیدوار پروفیسر علیم خان نے ایک موقع پر دیگر ساتھیوں کے سامنے انہیں تھپٹر مارنے کی کوشش کی اور سنگین نتائج کی دھمکیاں دیں۔ اس پر انہوں نے وی سی کو شکایت کی تاہم عملی اقدامات نہ ہونے پر 2015ء میں وفاقی محتسب کو تحریری شکایت کی۔ محتسب نے ملزم کے خلاف کارروائی کے لیے جامعہ کو ہدایت دی جسے اسے نظر انداز کر دیا گیا اور ملزم شعبے کا ڈائریکٹر بھی بن گیا۔ بعدازاں انسداد ہراسانی سیل کی سربراہی ان سے لے کر ملزم کےحوالے کر دی گئی۔

ایف آئی اے سائبر کرائم ونگ ملتان ریجن کے مطابق اسے اب تک صرف بہاءالدین زکریا یونیورسٹی سے ہی دو شکایات موصول ہوئی تھیں جن میں سے ایک 2019ء میں اسسٹنٹ پروفیسر نعمان واصف اور دوسری شعبہ نفسیات کے کلرک اور بیالوجی کے طالب علم کے خلاف 2022ء میں ملی۔ ان پر طالبات کو ہراساں کرنے اور بلیک میل کرنے کا الزام تھا اور تینوں ملزموں کے خلاف سخت کارروائی عمل میں لائی گئی۔

جنسی زیادتی کا نشانہ بننے والی طالبہ کے شوھر نے انہیں چھوڑ دیا، "بہت سی طالبات بدنامی کے خوف سے خاموش ہیں"

تعلیمی اداروں میں انسداد ہراسانی کمیٹیاں آزادانہ کردار ادا کرنےسے قاصر کیوں ہیں؟

text

غازی یونیورسٹی میں پروفیسر کی مبینہ جنسی زیادتی کا نشانہ بننے والی طالبہ نے لوک سجاگ سے بات کرتے ہوئے اس واقعے سے متعلق مزید انکشافات کیے ہیں جن سے ظاہر ہوتا ہے کہ یونیورسٹی میں مبینہ طور پر بہت سی لڑکیاں اپنے اساتذہ کے ہاتھوں جنسی زیادتی، ہراسانی اور بلیک میلنگ کا نشانہ بنتی چلی آئی ہیں۔

ڈیرہ غازی خان کی اس یونیورسٹی میں بی ایس فزکس کی طالبہ ثنا ارشاد کا ایک ویڈیو بیان چند روز پہلے سوشل میڈیا پر وائرل ہوا تھا جس میں وہ بتا رہی ہیں کہ انہیں ان کے ایک پروفیسر نے جنسی زیادتی کا نشانہ بنایا اور دوسرے نے بھی اس مقصد کے لیے دباؤ ڈالا۔ 
یہ ویڈیو سامنے آنے کے بعد دونوں ملزموں کو معطل کر کے گرفتار کر لیا گیا جن کے خلاف قانونی کارروائی جاری ہے۔

اس واقعے سے متعلق مزید تفصیلات جاننے کے لیے لوک سجاگ نے ثنا سے رابطہ کیا جنہوں نے بتایا جب انہوں نے اس واقعے کی شکایت یونیورسٹی انتظامیہ سے کی تو دو پروفیسروں نے یہ کہہ کر ان کا ویڈیو بیان ریکارڈ کر لیا کہ اسے سامنے نہیں لایا جائے گا۔ تاہم ان پروفیسروں نے ان کے بیان کو وائس چانسلر کے خلاف اپنے مقاصد کے حصول کے لیے وائرل کر دیا۔

ڈیرہ غازی خان کی تحصیل تونسہ شریف میں بستی سوکڑ کی رہنے والی ثنا ارشاد کا کہنا ہے کہ انہیں یونیورسٹی میں تعلیم حاصل کرنے کے لیے گھر سے بمشکل اجازت ملی تھی۔

اعلیٰ تعلیم حاصل کرنے کے شوق میں انہوں ںے گھر والوں کی یہ شرط بھی منظور کر لی کہ پہلے انہیں شادی کرنا ہو گی۔ ان کا رشتہ اپنے ماموں زاد سے ہوا تھا اور شادی کے بعد وہ ڈیرہ غازی خان کے ایک ہوسٹل میں مقیم ہو گئیں کیونکہ اس طرح انہیں یونیورسٹی آنے جانے میں آسانی تھی۔

انہوں نے اپنے ساتھ زیادتی پر درج کرائے گئے مقدمے میں پولیس کو بیان دیا ہے کہ ان کی ایک ہم جماعت نے انہیں یہ کہہ کر جام پور روڈ پر سٹیٹ لائف کارپوریشن کی عمارت میں بلایا کہ وہاں امتحانی پرچوں کی مارکنگ ہو رہی ہے اور وہ انہیں اچھے نمبر دلا دیں گی۔ اس موقع پر ان کے فزکس کے پروفیسر ڈاکٹر خالد خٹک اور شعبے کے سربراہ ڈاکٹر ظفر وزیر بھی موجود تھے۔

بیان کے مطابق اس موقع پر انہیں کولڈ ڈرنک دی گئی جسے پی کر ان کا سر چکرانے لگا اور وہ نیم بیہوش سی ہو گئیں۔ اس وقت ڈاکٹر ظفر نے باقی لوگوں کو کمرے سے باہر بھیج دیا اور انہیں جنسی زیادتی کا نشانہ بنایا جبکہ وہ مزاحمت کرنے کے قابل نہیں تھیں۔

ثنا کے بقول اس واقعے کے بعد ڈاکٹر خالد خٹک نے انہیں بلیک میل کرنا اور اپنے ساتھ تعلقات قائم کرنے پر اصرار شروع کر دیا۔ جب انہوں ںے انکار کیا تو دھمکی دی کہ وہ ان کی چھوٹی بہن کو بھی اپنے ساتھ مراسم قائم کرنے مجبور کریں گے۔

تنگ آ کر دونوں بہنوں ںے ان پروفیسروں کے خلاف یونیورسٹی کی انتظامیہ کو شکایت کی جس پر انکوائری شروع کر دی گئی۔ تاہم اسی دوران ثںا کا ویڈیو بیان وائرل ہوا جس کے بعد ڈاکٹر ظفر وزیر اور ڈاکٹر خالد خٹک پولیس کی حراست میں ہیں۔

ثنا نے بتایا کہ سوشل میڈیا پر وائرل ہونے والا ان کا بیان ڈاکٹر ظفر وزیر کی جگہ تعینات ہونے والے شعبہ فزکس کے سربراہ ڈاکٹر محمد راشد نے ریکارڈ کیا تھا جنہوں ںے غلط بیانی کرتے ہوئے انہیں یقین دہانی کرائی تھی کہ یہ بیان یونیورسٹی انتظامیہ کی ہدایت پر ریکارڈ کیا جا رہا ہے اور اسے صیغہ راز میں رکھا جائے گا۔ تاہم تین ماہ کے بعد ڈاکٹر راشد نے شعبہ اسلامیات کے اسسٹنٹ پروفیسر ارشد منیر لغاری کی ملی بھگت سے یہ ویڈیو وائرل کر دی۔

ثنا ارشاد نے وائس چانسلر کو اس کے خلاف تحریری شکایت جمع کرائی جس کے بعد ڈاکٹر راشد کو بھی گرفتار کر لیا گیا۔

ثنا ارشاد کا کہنا ہے کہ انہوں نے اپنے ساتھ پیش آنے والے واقعے کے بعد اپنی بہن کی حفاظت کی خاطر یونیورسٹی انتظامیہ کو شکایت درج کرائی تھی جس کے بعد واقعات کا یہ تمام سلسلہ شروع ہوا جس نے ان کی زندگی تباہ کر دی ہے۔

ویڈیو بیان وائرل ہونے کے بعد ثنا کے شوہر نے انہیں چھوڑ دیا ہے۔ سوشل میڈیا پر ساتھی طلبہ اور اساتذہ نے الٹا ثنا کو ہی قصور وار قرار دیتے ہوئے تنقید کا نشانہ بنایا گیا جس کے بعد انہوں نے اپنا فون بند کر دیا ہے۔

ان کا کہنا ہےکہ ان تمام حالات میں والد نے ان کا ساتھ نہیں چھوڑا اور انہی کی حوصلہ افزائی کی بدولت وہ انصاف کے لڑ رہی ہیں۔

ثنا کے والد ارشاد احمد کا کہنا ہے کہ وہ اپنی بیٹی کو تعلیم کے حصول سے نہیں روکیں گے اور اس کا کسی اور یونیورسٹی میں تبادلہ کروا دیں گے۔

ان کے بقول ملزم ان کے گاؤں کے سرکردہ افراد کے ذریعے دباؤ ڈال رہے ہیں کہ ان کے خلاف بیان نہ دیا جائے اور اس کے عوض انہوں ںے بھاری رقم کی پیشکش بھی کی ہے لیکن انہوں نے اسے قبول کرنے سے انکار کیا ہے۔

ثنا کہتی ہیں کہ جو کچھ ان کے ساتھ ہوا وہ ان کی متعدد ہم جماعت طالبات کے ساتھ بھی ہو چکا ہے لیکن کمزور سماجی حیثیت اور بدنامی کے خوف سے کوئی ایسے واقعات کے خلاف آواز بلند نہیں کرتا۔

ان کا یہ بھی کہنا ہے کہ ان کے ویڈیو بیان کو وائرل کرنے والے ڈاکٹر راشد کے قبضے سے بھی پولیس نے متعدد طالبات کی ویڈیوز، تصاویر اور انہیں بھیجے گئے پیغامات پکڑے ہیں۔ تاہم جب پولیس نے ان طالبات کے والدین سے رابطہ کیا تو انہوں ںے یہ کہہ کر کوئی قانونی کارروائی کرنے سے انکار کر دیا کہ اس طرح ان کی عزت خطرے میں پڑ جائے گی۔

ثنا ارشاد کے بقول ان کا ویڈیو بیان ریکارڈ کرنے کا مقصد اس معاملے میں ان کی مدد کرنا نہیں بلکہ اسے وائس چانسلر کو عہدے سے ہٹانے کے لیے استعمال کرنا تھا۔ ان کا کہنا ہے کہ ڈاکٹر راشد اور پروفیسر ارشد منیر لغاری سرگودھا یونیورسٹی سے آنے والے قائم مقام وائس چانسلر کو اس عہدے پر دیکھنا نہیں چاہتے تھے۔

یونیورسٹی کے وائس چانسلر ڈاکٹر محمد کامران نے بتایا کہ جب ثنا ارشاد نے اپنے ساتھ پیش آنے والے واقعے کی بابت انہیں آگاہ کیا تو اسی وقت اس معاملے کو 2021 میں بننے والی یونیورسٹی کی انسداد ہراسانی کمیٹی کے سپرد کر دیا گیا تھا۔ اس کمیٹی کے رکن ڈاکٹر سعد اللہ لغاری اور ڈاکٹر طاہرہ پروین نے انکوائری کے بعد خالد خٹک اور ظفر وزیر کو عہدوں سے ہٹانے کے لیے کہا اور ان کے خلاف سخت کارروائی تجویز کی۔

ہیومن رائٹس کمیشن آف پاکستان کے ریجنل کوآرڈینیٹر فیصل محمود تنگوانی نے اس واقعے پر بات کرتے ہوئے کہا ہے کہ جنسی زیادتی کے ایسے بیشتر متاثرین قانونی معاملات سے آگاہ نہیں ہوتے اور اسی لیے انہیں انصاف کے حصول میں مشکلات بھی جھیلنا پڑتی ہیں۔ ان کا کہنا ہے کہ ایسے واقعات میں طبی معائنہ کرانے میں تاخیر کا فائدہ ملزم کو ہوتا ہے اور ممکنہ طور پر اس واقعے میں بھی ملزم تکنیکی بنیادوں پر سزا سے بچ سکتے ہیں۔

بلوچ ویمن فورم کی ترجمان ام ہانی بلوچ کہتی ہیں کہ یونیورسٹیوں میں اساتذہ کی جانب سے طالبات کو ہراساں کیے جانے کے واقعات عام ہیں۔ جب تک ان واقعات میں ملوث ملزموں کو قانونی طریقے سے سزا نہیں دی جائے گی اس وقت تک کوئی عبرت نہیں پکڑے گا اور ایسے واقعات ہوتے رہیں گے۔

یونیورسٹی آف میانوالی: "مجھے فکر ہے کہ کوئی میری بیٹی کی تصویر سوشل میڈیا پر لگا کر تماشا نہ بنا دے"

اسلامیہ یونیورسٹی بہاولپور کی طالبہ صدف (فرضی نام) شدید ذہنی دباؤ کا شکار ہیں۔ حالیہ دنوں یونیورسٹی میں طالبات کے ساتھ جنسی ہراسانی کا سکینڈل سامنے آنے کے بعد سوشل میڈیا پر وائرل ہونے والے مواد میں ان کی تصویر بھی شامل ہے۔ اگرچہ اس میں ان کا چہرہ غیرواضح ہے لیکن وہ اس قدر خوف زدہ ہیں کہ انہوں نے فیس بک پر اپنا اکاؤنٹ لاگ آؤٹ کر دیا ہے۔

صدف کا تعلق رحیم یار خان کے نواحی علاقے سے ہے اور وہ یونیورسٹی میں بی ایس کے آخری سمیسٹر کی طالبہ ہیں۔ وہ بتاتی ہیں کہ یونیورسٹی میں داخلے کے بعد ان کے ایک پروفیسر نے انہیں کہا کہ وہ انہیں اسائنمنٹ کی تیاری خود کروائیں گے تاکہ وہ اچھے نمبر لے سکیں اور اس کے لیے انہوں نے ابتداً ان کی بہتر رہنمائی بھی کی۔ چونکہ پڑھنے اور سمجھنے کے لیے استاد کا کردار بہت اہم تھا اس لیے وہ ان کے پاس جاتی رہیں جو اکثر زور دیتے تھے کہ وہ ان کے دفتر میں آ کر مضمون کی تیاری کریں۔

صدف کا کہنا ہے کہ کچھ عرصہ کے بعد استاد نے ان کے ساتھ اپنی گھریلو معاملات بھی شیئر کرنا شروع کر دیے۔ اگرچہ وہ ان باتوں میں شریک ہونا نہیں چاہتی تھیں لیکن استاد کے احترام اور پڑھائی کا سوچ کر خاموش رہیں۔ 
بات یہیں تک رہتی تو حرج نہیں تھا لیکن ایک روز استاد نے انہیں سفوف بھری ایک پڑیا دینے کی کوشش کی اور کہا کہ اسے کھانے سے وہ رات کے وقت بھی چاک و چوبند رہ کر اچھی طرح پڑھائی کر سکیں گی۔ تاہم صدف نے اسے لینے سے انکار کر دیا۔

ایک روز پروفیسر نے صدف کو بتایا کہ ان کے ڈیپارٹمنٹ کا سالانہ عشایہ آ رہا ہے جس میں انہیں لازمی شرکت کرنا ہو گی۔ عشائیے کے روز وہ رات کو خود صدف کے ہوسٹل میں پہنچ گئے اور انہیں باہر بلا کر کہا کہ شٹل سروس چلی گئی ہے اس لیے وہ انہیں لینے کے لیے آئے ہیں۔

صدف نے انہیں انکار کرتے ہوئے کہا کہ وہ خود ڈیپارٹمنٹ میں پہنچ جائیں گی لیکن انہوں نے ہوسٹل کے ملازم کی مدد سے انہیں تقریباً زبردستی&nbsp; گاڑی میں بٹھا لیا اور ڈیپارٹمنٹ میں جانے کے بجائے یہ کہہ کر گاڑی کا رخ اپنے گھر کی جانب موڑ دیا کہ انہیں کوئی ضروری کام درپیش ہے۔

صدف کہتی ہیں کہ انہوں نے گھر کے اندر جانے سے معذوری ظاہر کی تو وہ بولے کہ گھر میں ان کے اہلخانہ موجود ہیں اس لیے وہ بلا جھجھک اندر آ سکتی ہیں۔ مجبوری اور غصے کی کیفیت میں وہ ان کے ساتھ گھر میں چلی آئیں جہاں وہ انہیں کمرے میں بٹھا کر ایک بار پھر وہی پڑیا اور سگریٹ لے آئے اور صدف پر زور دینے لگے کہ وہ اسے استعمال کریں۔ یہ پڑیا دراصل نشہ آور چیز تھی۔ صدف نے انہیں کہا کہ وہ نشہ نہیں کریں گی اور واپس جانے کے لیے اٹھ کھڑی ہوئیں لیکن استاد نے زبردستی سگریٹ کے ذریعے انہیں یہ سفوف سنگھانے کی کوشش کی جس کی وجہ سے وہ بے حال ہو کر وہ نیم بے ہوش سی ہو گئیں۔

کچھ دیر کے بعد جب ان کے اوسان بحال ہوئے تو وہ جیسے تیسے وہاں سے نکل آئیں۔ اس واقعے کے بعد وہ کئی دن ذہنی دباؤ میں رہیں اور فیصلہ کیا کہ آئندہ وہ اس پروفیسر سے فاصلہ رکھیں گی۔ تاہم ایک دن پروفسیر نے صدف کو اپنے دفتر میں طلب کیا اور انہیں اپنے موبائل فون میں ان کی تصاویر اور ویڈیوز دکھائیں جو پروفیسر کے گھر میں وقت لی گئی تھیں جب وہ نشہ آور شے کے زیراثر بے ہوشی کی کیفیت میں تھیں۔

پروفیسر نے انہیں دھمکی دی کہ اگر انہوں نے کبھی اس کا حکم نہ مانا تو وہ یہ تصاویر اور ویڈیوز دوسروں کو بھیج دے گا۔ اس طرح پروفیسر نے انہیں بلیک میل کرنا شروع کر دیا۔ صدف ںے بارہا اس بارے میں یونیورسٹی کی انتظامیہ کو حقائق سے آگاہ کرنے کا سوچا لیکن بدنامی اور پڑھائی چھوٹ جانے کے خوف سے ایسا نہ کر پائیں۔

ویسے یونیورسٹی میں شکایت کا کوئی نظام بھی نہیں تھا۔

صدف یہ سوچ کر خوف زدہ ہیں اگر ان کے گھر والوں کو اس بات کا علم ہو گیا تو کیا ہو گا۔ اگرچہ ان کے والد اور بھائی سوشل میڈیا پر ان کی تصویر وائرل ہونے سے آگاہ نہیں ہیں لیکن یہ سکینڈل میڈیا پر آنے کے بعد وہ پہلے ہی انہیں یونیورسٹی میں جانے سے روک چکے ہیں۔

رواں سال اسی یونیورسٹی سے ڈگری مکمل کرنے والی طالبہ حمیرا کنول (فرضی نام) بھی اساتذہ کے استحصالی ہتھکنڈوں کا شکار ہو چکی ہیں۔ وہ بتاتی ہیں کہ یونیورسٹی میں اساتذہ کا اپنی پوزیشن سے فائدہ اٹھاتے ہوئے طالبات کا استحصال کرنا کوئی ڈھکی چھپی بات نہیں۔

ان کا کہنا ہے کہ بہت سی طالبات کو بتایا گیا ہے کہ امتحان میں اچھی کارکردگی دکھانے کے لیے &quot;آئس&quot; کا استعمال ضروری ہے۔ان میں بعض طالبات کو&nbsp; مختلف ہتھکنڈوں سے نیند پر قابو پانے کے لیے آئس متعارف کرائی گئی۔ &quot;یہ نشہ آور چیز ہے جسے یہ طالبات ابتداً صرف جاگتے رہنے کے مقصد سے استعمال کرتی ہیں اور بعد میں اس کی عادی ہو جاتی ہیں&quot;۔

حمیرا کہتی ہیں کہ یونیورسٹی کے ہاسٹل میں ملازمین کا گروہ آئس کی فروخت کا دھندا کرتا ہے اور منظم طریقے سے طالبات کو اس کا عادی بناتا ہے۔ انتظامیہ نے کئی مرتبہ ہاسٹل سے آئس برآمد بھی کی ہے لیکن اسے یہاں پہنچانے والوں اور اس معاملے میں سہولت کاروں کے خلاف کبھی کوئی کارروائی عمل میں نہیں آئی۔

&quot;طالبات کے تعلیمی مستقبل کا دارومدار ان کے اساتذہ کے ہاتھ میں ہوتا ہے اس لیے کئی پروفیسر اپنی پوزیشن سے ناجائز فائدہ اٹھاتے ہوئے طالبات سے ناصرف ناجائز مطالبات کرتے ہیں بلکہ بات نہ ماننے پر انہیں تعلیمی نقصان کی دھمکیاں بھی دیتے ہیں&quot;۔

ان کا کہنا ہے کہ یونیورسٹی میں ہراسانی کی شکایت کرنا اور کسی زیادتی پر انصاف کا حصول مشکل کام ہے۔

&quot;ایک جانب تو طالبات کو یہ خوف لاحق ہوتا ہے کہ استاد ان کے تعلیمی نتائج پر اثرانداز ہو سکتا ہے، دوسری جانب انہیں اپنی اور اپنے خاندان کی عزت بھی رکھنا ہوتی ہے۔ یہی وجہ ہے کہ اساتذہ کی جانب سے دست درازی کی کوششوں کے جواب میں بہت سی طالبات کے پاس اپنی اور اپنے مستقبل کی حفاظت کرنا آسان نہیں ہوتا&quot;۔

حمیرا کے بقول پروفیسر حضرات اچھے نمبروں کا لالچ اور حکم عدولی پر سنگین نتائج کی دھمکیاں دے کر بہت سی طالبات کا استحصال کرتے ہیں۔ جو طالبات ان کے چنگل میں پھنس جاتی ہیں انہیں پارٹیوں میں لے جایا جاتا ہے جہاں انہیں نشہ اور جسمانی تعلقات قائم کرنے پر مجبور کیا جاتا ہے۔

&quot;ان طالبات کی ویڈیو اور تصاویر بنا لی جاتی ہیں جن کی بنیاد پر انہیں بلیک میل کیا جاتا ہے۔ یہی نہیں بلکہ ان لڑکیوں کی مجبوری سے فائدہ اٹھا کر انہیں کہا جاتا ہے کہ وہ مزید طالبات کو بھی &#39;گھیر&#39; کر لائیں&quot;۔

اسلامیہ یونیورسٹی بہاولپور میں مبینہ طور پر طالبات کے ساتھ پیش آنے والے ایسے بہت سے واقعات کی اطلاعات یونیورسٹی کے چیف سکیورٹی آفیسر اعجاز حسین کی گرفتاری کے بعد میڈیا پر آئیں۔

پولیس نے ان کے قبضے سے کرسٹل آئس نامی نشہ آور مواد اور خواتین کی غیر اخلاقی تصاویر اور ویڈیوز برآمد کرنے کا دعویٰ کیا۔ پولیس حراست میں اعجاز حسین کا اعترافی بیان بھی جاری ہو چکا ہے جس میں پانچ پروفیسروں کے نام بھی آئے ہیں۔

اسی طرح کا مقدمہ کچھ عرصہ پہلے یونیورسٹی کے خزانچی ڈاکٹر ابوبکر کے خلاف بھی درج ہو چکا ہے جس پر قومی اسمبلی کی قائمہ کمیٹی نے یونیورسٹی کے وائس چانسلر کو بھی طلب کیا تھا۔ تاہم نامعلوم وجوہات کی بنا پر اس معاملے میں مزید کوئی کارروائی نہ ہوئی۔

یہ سکینڈل سامنے آنے کے بعد عہدہ چھوڑنے والے وائس چانسلر ڈاکٹر اطہر محبوب نے ان تمام الزامات کو رد کیا اور پریس کانفرنس میں یونیورسٹی انتظامیہ خصوصاً چیف سکیورٹی آفیسر کا دفاع کرتے رہے۔

اس مقدمے میں کوئی مدعی نہ ہونے کی وجہ سے چیف سکیورٹی آفیسر کا موبائل فون پنجاب فرانزک ایجنسی کو بھجوایا جا چکا ہے اور نگران وزیراعلیٰ پنجاب نے اس معاملے کی انکوائری کے لیے جوڈیشل کمیشن بنانے کا اعلان کیا ہے۔

سائبر جرائم سے متعلقہ معاملات پر مہارت رکھنے والے ہادی چٹھہ ایڈووکیٹ کہتے ہیں کہ یہ معاملہ ایسا ہے جس میں سماجی خوف کے باعث کسی مدعی کے سامنے آنے کا امکان بہت کم ہے۔ ان کا کہنا ہے کہ پولیس کو موبائل فون سے مواد ملتے ہی یہ معاملہ ایف آئی اے کے سپرد کرنا چاہیے تھا۔ اگر فرانزک ٹیسٹ میں موبائل فون کا ڈیٹا حقیقی ثابت ہو جائے تو تب بھی ملزموں کو سزا ملنے کا امکان نہیں کیونکہ متاثرین بدنامی کے خوف سے سامنے نہیں آئیں گے۔

<h2>سمیسٹر سسٹم کا ہراسانی سے کیا تعلق ہے؟</h2>

ملتان کی بہاءالدین ذکریا یونیورسٹی میں خواتین کو ہراساں کیے جانے کے خلاف آواز بلند کرنے والی اسسٹنٹ پروفیسر رفیدہ نواز کہتی ہیں کہ یونیورسٹیوں میں ایسے واقعات عام ہونے کی ایک بڑی وجہ سمیسٹر سسٹم ہے جس میں طلبہ کا مستقبل اساتذہ کے رحم وکرم پر ہوتا ہے۔

اس نظام میں سیکشنل نمبر دینا متعلقہ استاد کی صوابدید ہے اور ہر شعبے نے عام طور پر اپنے الگ ضابطے بنا رکھے ہوتے ہیں۔ ایسے میں کئی اساتذہ اپنے صوابدیدی اختیارات اور خود ساختہ ضوابط کو استعمال کر کے طلبہ کا استحصال کرنے کی کوشش کرتے ہیں۔

یہاں یہ بات قابل ذکر ہے کہ اسلامیہ یونیورسٹی بہاولپور سمیت ایسے بیشتر اداروں میں سمیسٹر سسٹم کی نگرانی اور ریگولر اساتذہ کی کارکردگی جانچنے کا عمل کاغذی کارروائی تک محدود ہے جبکہ وزیٹنگ اساتذہ کی سرے سے کوئی نگرانی ہی نہیں ہوتی۔

اسلامیہ یونیورسٹی میں تدریسی معیار میں اضافے سے متعلق شعبہ بھی قائم ہے اور طے شدہ طریقہ کار کے مطابق تام شعبہ جات اساتذہ کی کارکردگی جانچنے کے لیے ہر سمیسٹر کے اختتام پر طلبہ کو اس کا لنک دینے کے پابند ہیں تاکہ طالب علم اپنی&nbsp; رائے دے سکیں۔

تاہم طلبہ کو یہ لنک مہیا نہیں کیا جاتا۔ یوں اس نظام میں پروفیسر کو غیرمعمولی اختیارات حاصل ہو جاتے ہیں جنہیں بہت سے واقعات میں خاص طور پر طالبات پر دباؤ ڈالنے اور ان کا استحصال کرنے کے لیے بھی استعمال کیا جاتا ہے۔

اسلامیہ یونیورسٹی کی ایک طالبہ ظل ہما (فرضی نام) کی باتوں سے اس کی تصدیق ہوتی ہے۔ ان کا کہنا ہے کہ جب وہ بی ایس کے چھٹے سمیسٹر میں زیرتعلیم تھیں تو ان کے ایک پروفیسر نے انہیں اپنی گاڑی پر پک اینڈ ڈراپ دینے کی پیشکش کی۔

ظل ہما کہتی ہیں کہ ان کا گھر یونیورسٹی سے دور ہے اور پروفیسر یہ بات جانتے تھے۔ تاہم انہوں نے پروفیسر کو انکار کر دیا اور کہا کہ وہ خود یونیورسٹی آ جا سکتی ہیں۔ تاہم ایک روز صبح سویرے پروفیسر کسی طرح ان کے گھر پہنچ گئے اور انہیں مجبور کیا جس کی وجہ سے&nbsp; وہ ایک مرتبہ ان کے ساتھ یونیورسٹی چلی گئیں تاہم بعد میں پروفیسر نے اسے معمول بنا لیا۔

وہ کہتی ہیں کہ جب انہوں نے پروفیسر سے کہا کہ وہ آئندہ ان کی یہ پیشکش قبول نہیں کریں گے تو اس کا کہنا تھا کہ اگر اس نے ان کی بات نہ مانی تو وہ انہیں سمیسٹر میں اچھے نمبر لینے نہیں دیں گے۔ اس کے بعد بعد پروفیسر کبھی انہیں زبردستی اپنے ساتھ کیفے میں لے جاتے اور کبھی پارٹیوں میں ساتھ جانے کے لیے دباؤ ڈالتے تھے۔

ظل ہما کے بقول یونیورسٹی کے سمیسٹر سسٹم میں طلبہ کا تعلیمی کیریئر ان کے بعض اساتذہ کے &#39;رحم و کرم&#39; پر ہوتا ہے اور یہی وہ سب سے بڑا ہتھیار ہے جو خاص طور پر طالبات کے خلاف استعمال کیا جاتا ہے۔

وہ اعتراف کرتی ہیں کہ تعلیمی کیریئر کو بچانے کی خاطر وہ مذکورہ پروفیسر کے دباؤ اور پھر بلیک میلنگ کا شکار ہوئیں۔

ان کا یہ بھی کہنا ہے کہ یونیورسٹی کی بہت سی طالبات کو اسی صورت حال کا سامنا کرنا پڑتا ہے جس میں وہ خود کو پروفیسروں کے بااختیار کردار کے سامنے بے بس پاتی ہیں۔

<h2>انسداد ہراسانی کی پالیسی اور اسلامیہ یونیورسٹی کی صورتحال</h2>

ہائر ایجوکیشن کمیشن نے اعلیٰ تعلیمی اداروں میں طلبہ کو ہر طرح کی ہراسانی سے تحفظ فراہم کرنے کے لیے 2020ء میں بنائی گئی پالیسی کے تحت تمام سرکاری اور غیر سرکاری یونیورسٹیوں میں انسداد ہراسانی کمیٹیوں کا قیام لازمی قرار دے رکھا ہے۔ اگر کسی یونیورسٹی میں ایسی کمیٹی موجود نہ ہو تو اس کے خلاف کڑی انضباطی کارروائی کی جا سکتی ہے۔

اس پالیسی کے مطابق طلبہ کو ہراساں کیے جانے کے واقعات کی شکایات سننے اور ان پر کارروائی کرنے کے لیے ایک خاتون سمیت تین ارکان پر مشتمل کمیٹی ہونا ضروری ہے۔ تعلیمی ادارے کی انتظامیہ پر لازم ہے کہ وہ ایسی کوئی شکایت موصول ہونے کے بعد اسے چوبیس گھنٹے کے اندر کمیٹی کو بھیجے گی جس پر تین روز کے اندر تحقیقات شروع کرانا لازمی ہے۔

اسلامیہ یونیورسٹی بہاولپور میں اس پالیسی پر عملدرآمد کیلئے کوئی عملی اقدامات نہیں کیے گئے اور نہ ہی ہائر ایجوکیشن کمیشن نے کبھی اس یونیورسٹی کو کسی معاملے پر کوئی وارننگ جاری کی۔ اس یونیورسٹی میں اب تک نہ تو انسداد ہراسانی کمیٹی کا وجود تھا اور نہ ہی ضوابط کے مطابق طلبہ کو عملی طور پر انسداد ہراسانی سے متعلق قوانین سے آگاہ کیا گیا۔

سماجی کارکن اطہر جہانیاں کا کہنا ہے کہ انسداد ہراسانی کمیٹیوں کی غیرموجودگی میں جب تعلیمی اداروں میں ہراسانی کے واقعات پیش آئیں تو عام طور داخلی انکوائری کے نام پر انہیں دبا دیا جاتا ہے اور بہت سی یونیورسٹیوں میں اس کی کئی مثالیں موجود ہیں۔ وہ تجویز دیتے ہیں کہ ایسی کمیٹیوں میں ضلعی انتظامیہ کے ارکان، خواتین وکلا اور سول سوسائٹی کی نمائندہ خواتین کو بھی شامل کیا جانا چاہیے تاکہ ایسے واقعات کا موثر طور سے توڑ کیا جا سکے۔

'ہراس کے خلاف آواز اٹھائی تو نوکری سے نکال دیا گیا' فیصل آباد میں خواتین ٹیکسٹائل ورکر جنسی بدسلوکی کے سامنے بے بس

"پروفسیر نے اپنے فون میں میری تصاویر اور ویڈیوز دکھائیں جو اس نے میری بے ہوشی کی کیفیت میں بنائی تھیں" اسلامیہ یونیورسٹی کی متاثرہ طالبات سامنے آگئیں

راجن پور کی طاہرہ بی بی٭ اپنے پانچ سالہ بیٹے شکیل٭ کو تعلیم دلانا چاہتی ہیں لیکن کوئی سکول اسے داخلہ نہیں دیتا۔بچے کو سکول میں داخل کروانے کے لیے اس کا شناختی ب فارم اور والد شناختی کارڈ ہونا ضروری ہے لیکن طاہرہ سکول کو یہ دونوں چیزیں مہیا نہیں کر سکتیں۔

انہوں نے سکول کی ہیڈمسٹریس سے درخواست کی تھی کہ ان کا یا بچے کے نانا کا نام سرپرست کے طور پر لکھ کر شکیل کو داخلہ دے دیں لیکن انہوں نے انکار کر دیا۔

طاہرہ کا تعلق تحصیل جام پور کی&nbsp; نواحی بستی سے ہے۔ان کے بقول 2016ء میں مقامی زمیندار عبداللہ کا بیٹا اسلم انہیں محبت کے جال میں پھنسا کر جنسی زیادتی کا نشانہ بناتا رہا جس کے نتیجے میں وہ حاملہ ہو گئیں۔

جب انہوں نے اپنے اہل خانہ&nbsp; کو اس صورتحال سے آگاہ کیا تو اس وقت ان کے حمل کو پانچ ماہ گزر گئے تھے۔

ڈاکٹروں کا کہنا تھا کہ اس مرحلے پر حمل کو ساقط نہیں کیا جا سکتا۔

طاہرہ کے والد نے کاشف کے والد انور کو یہ بات بتائی اور اس موقع پر گاؤں کے بڑوں نے ملزم اور طاہرہ کا نکاح کرانے کی تجویز دی۔ ابتدا میں اسلم کے والد نے اس پر رضامندی ظاہر کی لیکن بعد میں انکار کر دیا۔

طاہرہ کے خاندان نے ملزم کے خلاف مقدمہ درج کرایا جس نے ضمانت قبل ازگرفتاری کروا لی تاہم بعد میں عدالتی حکم پر اسے گرفتار کر لیا گیا۔

چند ماہ کے بعد طاہرہ نے راجن پور کے ڈسٹرکٹ ہیڈکوارٹر ہسپتال میں بیٹے کو جنم دیا۔

بچے کی پیدائش سے قبل پولیس نے ایڈیشنل سیشن جج جام پور کی ہدایت پر طاہرہ اور ملزم کاشف کے ڈی این اے کے نمونے پنجاب فرانزک سائنس ایجنسی کو بھجوائے تھے جس کے نتائج آج تک متاثرہ خاندان کو نہیں مل سکے۔

اس کا نتیجہ یہ نکلا کہ ملزم ہائیکورٹ ملتان بینچ سے ضمانت پر رہا ہوا اور بعد ازاں ایڈیشنل سیشن جج جام پور نے عدم ثبوت کی بنا پر نومبر 2018ء میں اسے بری کر دیا۔

اس عرصہ میں طاہرہ کی گود میں آنے والے شکیل کی عمر دو برس ہو چکی تھی۔ انہوں نے ملزم کی بریت کے خلاف لاہور ہائی کورت کے ملتان بینچ میں اپیل دائر کی جو جون 2020ء میں دوبارہ سماعت کے لیے سیشن کورٹ میں بھیج دی گئی جہاں اس پر تاحال تاریخیں پڑ رہی ہیں۔

طاہرہ کے وکیل عرفان عاربی نے بتایا کہ ایسے واقعات میں ملزموں کے وکیل نظام انصاف کی پیچیدگیوں اور قانونی موشگافیوں سے فائدہ اٹھا کر تاخیری حربے استعمال کرتے ہیں۔

&quot;چونکہ بیشتر متاثرہ فریق زیادہ پڑھے لکھے نہیں ہوتے اور انہیں قانونی باریکیوں کے بارے میں آگاہی بھی نہیں ہوتی اسی لئے بیشتر مقدمات میں یہ لوگ تھک ہار کر ملزموں سے صلح کر لیتے ہیں&quot;۔

طاہرہ بچے کو سکول میں داخلہ دلوانے کے لیے در در کی ٹھوکریں کھا رہی ہیں لیکن ولدیت سے &#39;محرومی&#39; ایک ایسا مسئلہ ہے جس کا حل ان کے پاس نہیں ہے۔

یہ حالات طاہرہ کے علاوہ بھی بہت سی ایسی خواتین کو درپیش ہیں جو جنسی زیادتی کے نتیجے میں ماں بنی ہیں۔

ان میں ایسی خواتین بھی ہیں جنہیں ان کے قریبی رشتہ داروں نے زیادتی کا نشانہ بنایا یا شوہر انہیں ایسے حالات میں چھوڑ چکے ہیں جن میں ان کے بچوں کو والد کی شناخت نہیں مل سکی۔

کچھ عرصہ پہلے ملتان کی سیشن عدالت نے سونیا بی بی٭ کو جنسی زیادتی کا نشانہ بنانے کے مقدمے میں بلال نامی ملزم کو عمر قید اور سات لاکھ روپے جرمانے کی سزا سنائی تھی۔

زیادتی کے نتیجے میں سونیا حاملہ ہو گئی تھیں۔ اس مقدمے کی تفتیش اور فیصلے میں تین سال لگے۔

سونیا کے بچے کو بھی والد کی شناخت نہیں مل سکی۔

مظفرگڑھ کی فرزانہ بی بی٭ اپنے سگے چچا کی زیادتی کے نتیجے میں ایک بیٹی کی ماں بن چکی ہیں۔

اسی شہر کی نجمہ بی بی٭ اور لیہ کے علاقے چوک اعظم کی نوعمر ارم کو ان کے ہمسایوں نے زیادتی کا نشانہ بنایا جس کے نتیجے میں پیدا ہونے والے بچے اپنے باپ کی شناخت سے محروم ہیں۔

اسی طرح ملتان کے علاقے قادر پور راں کی 15سالہ علشبہ٭کو 55 سالہ ملزم قادر نے زیادتی کانشانہ بنایا جس کے نتیجے میں حاملہ ہونے کے بعد انہوں نے بیٹی کو جنم دیا۔

یہ اور اس جیسے تمام واقعات میں پیدا ہونے والے بچوں کو ان کی ماؤں کے علاوہ کسی نے قبول نہیں کیا اور ولدیت کی غیرموجودگی میں ان کے لیے تعلیم کا حصول اور زندگی میں آگے بڑھنا بہت مشکل ہو گیا ہے۔

بن بیاہی ماؤں کے بچوں کو سکولوں میں داخلے کے حوالے سے درپیش مشکلات پر بات کرتے ہوئے جنوبی پنجاب کے ڈپٹی سیکرٹری سکول ایجوکیشن سیف الرحمٰن خان وضاحت کرتے ہیں کہ حکومت پنجاب نے 2016ء میں سکولوں میں داخلے کے لئے آن لائن نظام بنایا تھا۔

&quot;اس نظام کے تحت داخلہ حاصل کرنے والے بچے کے کوائف درج کرنا ضروری ہوتا ہے جس میں بچے کے والد کے نام کے اندراج کے ساتھ اس کا شناختی کارڈ بھی درج کیا جاتا ہے۔ والد کے بغیر آنے والے بچے کی ماں کو بچہ داخل کرانے کے لیے نادرا یا عدالت سے رجوع کرناپڑتا ہے اور وہاں سے احکامات آنے کے بعد ہی اسے داخلہ دیا جا سکتا ہے&quot;۔

مختار مائی ویلفیئر آرگنائزیشن کی چیئرپرسن مختارمائی کا کہنا ہے کہ جنوبی پنجاب میں جنسی زیادتی کے نتیجے میں ماں بننے والی خواتین اور بے شناخت بچوں کی تعداد بڑھ رہی ہے لیکن اس حوالے سے اعدادو شمارجمع کرنے کا کوئی طریقہ وضع نہیں کیا گیا۔

&quot;اگرچہ زیادتی کے واقعات سے متعلق اعداد و شمار مل جاتے ہیں لیکن ان میں شادی شدہ اور غیر شادی شدہ خواتین کی تفریق نہیں ہوتی&quot;۔

جنوبی پنجاب کی سیشن عدالتوں میں بن بیاہی ماﺅں کے بچوں کی شناخت کے حوالے سے 56 مقدمات زیرالتوا ہیں۔

ملتان کے سابق ڈپٹی ڈسٹرکٹ پبلک پراسیکیوٹر شوکت حیات ہراج بتاتے ہیں کہ بہت سے عدالتی فیصلوں کے بعد اب ایسے بچوں کو شناخت دینے کا قانونی طریقہ کار ہے لیکن بن بیاہی ماﺅں کو اس مقصد کے لیے طویل عدالتی جنگ لڑنا پڑتی ہے جو کم وسائل اور ناخواندہ خواتین کے بس کی بات نہیں ہوتی۔

ڈیجیٹل رائٹس فاﺅنڈیشن کی سی ای او نگہت داد واضح کرتی ہیں کہ نادرا نے یتیم خانوں میں پلنے والے اور گود لیے گئے بچوں کی سرپرستی سرٹیفکیٹ کے ذریعے رجسٹریشن کا عمل شروع کیا ہے۔

&quot;تاہم بن بیاہی ماﺅں کے لیے یہ مسئلہ اب بھی حل نہیں ہوا۔ ان کے بچوں کو شناخت کے لیے نادرا میں مسائل کا سامنا کرنا پڑتا ہے کیونکہ عدالتی فیصلوں کے بغیر انہیں شناخت جاری نہیں کی جاتی&quot;۔

انیلہ اشرف

انیلہ اشرف ملتان سے تعلق رکھنے والی تحقیقاتی صحافی و سماجی کارکن ہیں۔ گذشتہ 19 سال سے صحافت سے وابستہ ہیں۔

تعلیمی اداروں میں انسداد ہراسانی کمیٹیاں آزادانہ کردار ادا کرنےسے قاصر کیوں ہیں؟

جنسی زیادتی کا نشانہ بننے والی طالبہ کے شوھر نے انہیں چھوڑ دیا، "بہت سی طالبات بدنامی کے خوف سے خاموش ہیں"

"پروفسیر نے اپنے فون میں میری تصاویر اور ویڈیوز دکھائیں جو اس نے میری بے ہوشی کی کیفیت میں بنائی تھیں" اسلامیہ یونیورسٹی کی متاثرہ طالبات سامنے آگئیں

'والد کے نام کے بغیر سکول میں داخلہ نہیں ملے گا'، بن بیاہی ماؤں کے بے شناخت بچوں کی مشکلات