عام انتخابات 2024ء کے لیے بلوچستان میں بھی انتخابی سرگرمیاں نظر آنے لگی ہیں۔ کچھی میں امیدواروں کے کاغذات نامزدگی جمع ہوتے ہی انتخابی مہم کا آغاز ہو گیا ہے۔

کوئٹہ سے 41 کلومیٹر جنوب میں ضلع کچھی (سابقہ بولان) پانچ ہزار 682 مربع کلومیٹر رقبے پر محیط ہے۔ یہ درہ بولان اور کول پور ریلوے سٹیشن سے شروع ہوتا ہے اور نیچے وسیع میدانوں میں آکر ختم ہوتا ہے۔

گذشتہ عام انتخابات میں کچھی کو ضلع نصیر آباد اور جھل مگسی سے ملا کر قومی حلقہ بنایا گیا تھا۔ اس حلقے(این اے 260) سے بلوچستان عوامی پارٹی کے موجودہ سربراہ خالد مگسی رکن اسمبلی منتخب ہوئے تھے۔

سردار یارمحمد رند تحریک انصاف کے امیدوار تھے اور وہ دوسرے نمبر پر آئے تھے۔ جبکہ اس حلقے میں 12 ہزار 930 ووٹ مسترد ہوئے تھے۔

نئی ڈیجیٹل مردم شماری کے مطابق ضلع کچھی کی کل آبادی چار لاکھ 42 ہزار 612 ہے۔

الیکشن کمیشن کی ابتدائی رپورٹ بتاتی ہے کہ کم آبادی کے باعث کچھی اور ارد گرد کے پانچ اضلاع میں سے کسی ایک کی بھی قومی اسمبلی کی الگ نشست نہیں بنتی تھی۔ اسی لیے نصیرآباد، جھل مگسی، کچھی، جعفرآباد، اوستہ محمد اور صحبت پور کو ملا کر دو قومی نشستیں این اے 254 اور این اے 255 بنائی گئی ہیں۔

یوں ضلع کچھی کو قومی اسمبلی کے حلقہ این اے 254 میں شامل کیا گیا ہے جس کو&#39; جھل مگسی- کم- کچھی- کم- نصیرآباد &#39; کانام دیا گیا ہے۔

اب اس قومی حلقے میں ضلع کچھی، جھل مگسی اور ضلع نصیر آباد کی تحصیل تمبو، بابا کوٹ اور لندھی کے علاقے شامل ہیں۔

<hr />
<h2 style="text-align:center">نئی حلقہ بندیاں 2023</h2>

2018 کا قومی اسمبلی کا حلقہ این اے 260 نصیر آباد کم&nbsp; کچھی کم جھل مگسی&nbsp; اب این اے 254 نصیر آباد کم&nbsp; کچھی کم جھل مگسی&nbsp; ہے

یہ حلقہ ضلع جھل مگسی، ضلع&nbsp; کچھی&nbsp; اور ضلع نصیر آباد پر مشتمل ہے۔ نئی حلقہ بندیوں کے تحت اس حلقے میں ضلع نصیر آباد کی تحصیل ڈیرہ مراد جمالی کو نکال دیا ہے۔

صوبائی حلقہ پی بی 12 کچھی &nbsp; 
یہ نیا حلقہ ضلع کچھی کے علاقوں پر مشتمل ہے۔ 2023 کی حلقہ بندیوں کے مطابق ضلع کچھی کو نیا حلقہ دے دیا گیا ہے۔ جس کے علاقوں کو پہلے مستونگ اور جھل مگسی کے حلقوں پر تقسیم کیا گیا تھا۔ اب ان کے الگ حلقے بن گئے ہیں۔

<hr />

یہاں رجسٹرڈ ووٹوں کی تعداد تین لاکھ 24 ہزار 739 ہے جن میں ایک لاکھ79 ہزار 411 مرد اور ایک لاکھ 45 ہزار328 خواتین ووٹر ہیں۔

آئندہ انتخابات میں اس نشست پر خالدحسین مگسی بی اے پی، یارمحمد رند آزاد، میر ہمایوں کرد آزاد، میر عبدالروف لہڑی ن لیگ، میر سراج عمرانی اور بالو امین عمرانی پیپلز پارٹی اور یاسمین لہڑی نیشنل پارٹی کی امیدوار ہیں۔

ولی محمد زہری بلوچستان کی گرین بیلٹ (کچھی، جھل مگسی، نصیرآباد، اوستہ محمد) کی سیاست کو قریب سے جانتے ہیں۔ وہ بتاتے ہیں کہ قبائلی نظام&nbsp; اور خوف کے باعث ضلع جھل مگسی کے اکا دکا کے سوا تمام ووٹ بلا تخصیص خالد مگسی کو ملتے ہیں۔ اسی طرح ڈھاڈر، سنی شوران کا ووٹ سردار یار محمد کو پڑتا ہے۔

خالد مگسی کا تعلق نصیر آبادکے علاقے جھل مگسی سے ہے ان کا تعلق نصیر آباد کے سب سے زیادہ اثر رسوخ رکھنے والے مگسی خاندان سے ہے۔ ان کے بڑے بھائی نواب ذوالفقار مگسی مگسی قبیلے کے سردار ہیں اور سابق گورنر بلوچستان بھی رہ چکے ہیں۔

خالد مگسی 2013 میں مسلم لیگ ن کے ٹکٹ پر اور 2018 میں بلوچستان عوامی پارٹی کے ٹکٹ پر رکن قومی اسمبلی منتخب ہوئے اور اس وقت وہ بلوچستان عوامی پارٹی کے مرکزی صدر کی حیثیت سے انتخابات میں حصہ لے رہے ہیں۔

مگسی خاندان کے کئی افراد قومی اسمبلی، سینیٹ اور صوبائی اسمبلی کا حصہ رہے ہیں اور جھل مگسی اور کچھی پر مشتمل قومی اسمبلی کی نشست مسلسل جیتتے آ رہے ہیں۔

ولی محمد کہتے ہیں کہ اس حلقے میں شامل نصیر آباد کے علاقوں میں میر عبدالغفور لہڑی کا اثر زیادہ ہے۔ خالد مگسی ان سے اتحاد کی کوشش کر رہے ہیں دوسری جانب یار محمد رند ن لیگ اور پیپلز پارٹی کے مقامی قیادت سے انتخابی اتحاد کے حوالے سے مذاکرات کر رہے ہیں۔

سردار یار محمد رند کا تعلق کچھی کے علاقے سنی شوران سے ہے۔وہ رند قبیلے کے سربراہ اور ان کا خاندان کچھی کے بیشتر علاقوں میں مکمل اثر و رسوخ رکھتا ہے۔ انہوں نے سیاست کا آغاز چيرمین ضلع کونسل کچھی سے کیا۔ 1985ء سے اب تک کئی بار سینیٹ، قومی اسمبلی اور صوبائی اسمبلی کا حصہ رہے ہیں۔&nbsp; 2019ء کو تحریک انصاف بلوچستان کے صدر اور رکن صوبائی اسمبلی سردار یار محمد رند کو وزیراعظم کا معاون خصوصی مقرر کیا گیا تھا، بعد میں وہ صوبائی وزیر تعلیم بھی بنے۔

&quot;جھل مگسی میں لاشاری، مگسی اور جاموٹ جبکہ نصیرآباد میں عمرانی، لہڑی، جمالی، رند، جاموٹ اور کھوسہ قبائل کی اکثریت ہے۔ اسی طرح ضلع کچھی میں رند، بنگلزئی، سمالانی، کرد، جاموٹ، کھوسہ، شاہوانی، چھلگری، جتوئی، مغیری اور مستوئی قبائل نمایاں ہیں&quot;۔

ولی محمد سمجھتے ہیں کہ یہاں امیدوار کا زیادہ انحصار اپنے زیر اثر علاقے اور قبیلے کے ووٹوں پر ہوتا ہے۔ موجودہ صورت حال میں اس قومی نشست پر مقابلہ مگسی اور رند سرداروں کے درمیان رہےگا۔

<h2>صوبائی حلقہ پی بی 12</h2>

2017ء میں ضلع کچھی کی آبادی تین لاکھ نو ہزار 932 نفوس پر مشتمل تھی۔ پچھلے انتخابات میں کچھی سے متصل ضلع مستونگ کے علاقے دشت کو ملاکر صوبائی حلقہ پی بی17 (کچھی کم مستونگ) بنایا گیا تھا۔

یہاں سے یارمحمد رند پی ٹی آئی کے ٹکٹ پر ایم پی اے منتخب ہوئے اور بی اے پی کے میر عاصم کرد گیلو دوسرے نمبر پر رہے تھے۔

نئی حلقہ بندیوں میں الیکشن کمیش کے فارمولے کے تحت آبادی کے لحاظ سے ضلع کچھی کا صوبائی اسمبلی میں حصہ 1.52 نشست بنتا تھا لیکن یہاں ایک ہی نشست دی گئی ہے اور پورے ضلعے کو صوبائی حلقہ ڈیکلیئر کر دیا گیا ہے۔

پی بی 12 کچھی میں رجسٹرڈ ووٹرز کی کل تعداد ایک لاکھ 47 ہزار 474 ہے جن میں 84 ہزار 161 مرد اور 63 ہزار 313 خواتین ووٹر ہیں۔

آئندہ عام انتخابات کے لیے اس نشست پر سردار یارمحمد رند، ن لیگ کے میر عاصم کرد کے علاوہ پیپلز پارٹی، بلوچستان عوامی پارٹی، بلوچستان نیشنل پارٹی، جے یو آئی کے امیدواروں نے انتخابی سرگرمیاں تیز کر دی ہیں۔

یارمحمد رند نے مقامی عمائدین کی دعوت پر آزاد امیدوار کے طور پر بھاگ ناڑی سے اپنی انتخابی مہم کا آغاز کیا ہے۔ ن لیگ کے امیدوار میرعاصم کرد، بی اے پی کے محمد یونس سمالانی اور پیپلز پارٹی کے مولا بخش راہیجہ نے اپنی اپنی انتخابی سرگرمیاں مچھ سے شروع کی ہیں۔

ولی محمد کہتے ہیں کہ یہاں کے لوگ نہ تو پارٹی کے انتخابی منشور کو اور نہ ہی پارٹی کو اہمیت دیتے ہیں۔اس لیے عام آدمی انتخابی عمل سے لاتعلق رہتا ہے اور ان علاقوں میں ہیمشہ ٹرن آوٹ کم رہتا ہے۔

سماجی کارکن عمران سمالانی بتاتے ہیں کہ یارمحمد رند پچھلا چناؤ تحریک انصاف کے نشان پر لڑے تھے لیکن اب آزاد امیدوار کے طور پر الیکشن میں حصہ لے رہے ہیں۔ اسی طرح میرعاصم کرد پچھلی بار بی اے پی کے امیدوار تھے مگر اب شیر کے نشان پر انتخاب لڑ رہے ہیں۔

&quot;یہاں ووٹ سردار یا میر کی حیثت اور ڈنڈے کی بنیاد پر پڑتے ہیں۔ کوئی قبائلی شخصیت جتنی طاقتور ہے اتنا ہی اس کی جیت کے امکانات ہوتے ہیں۔ سردار یار محمد اور میر عاصم کرد جس پارٹی میں ہوں، عام لوگ بھی اسی پارٹی میں ہوں گے۔&quot;

وہ کہتے ہیں کہ اس علاقے میں نیشنل پارٹی، جے یو آئی اور ان کے امیدوار کسی حد متحرک ہیں۔ڈھاڈر اور مچھ میں دونوں کا ووٹ بینک بھی ہے لیکن اتنا نہیں کہ پورے حلقے کے نتائج پر اثرانداز ہو سکے۔

عمران سمالانی سمجھتے ہیں کہ اس صوبائی نشست پر میر عاصم کرد کے مقابلے میں یار محمد رند کو اس بات کی برتری ہے کہ ان کے صاحبزادے سرادر بیبرگ رند، ضلع کچھی کے ڈسٹرکٹ چئیرمین ہیں اور علاقے میں خاصے متحرک ہیں۔

جمیل احمد کچھی کے علاقے درخان ڈھاڈر کے رہائشی ہیں۔ وہ بتاتے ہیں کہ یہاں چند لوگ ہی امیدوار کی کارکردگی کو دیکھتے ہیں ورنہ بیشتر اپنے قبیلے کی روایات کو ترجیح دیتے ہیں۔ اسی لیے ووٹ بھی پارٹی یا نظریات پر نہیں بلکہ ذاتی تعلق کی بنیاد پر ڈالتے ہیں۔

تاہم ڈھاڈر ہی کے رہائشی ڈاکٹر طاہر مستوئی کی رائے ان سے مختلف ہے۔ وہ کہتے ہیں کہ جو نمائندہ علاقے اور لوگوں کی بہتری کے لیے کام کرتا ہے وہی ووٹ لیتا ہے۔

ضلع کچھی پانچ تحصیلوں ڈھاڈر ، مچھ ،بھاگ ، بالا ناڑی اور سنی پر مشتمل ہے۔ ڈسٹرکٹ ہیڈکوارٹر &#39;ڈھاڈر&#39; ریاست قلات کا سرمائی دارالخلافہ ہوا کرتا تھا۔ مگر ان تمام علاقوں میں بکھری ہوئی آبادی کو بے شمارمشکلات درپیش ہیں اور لوگوں کی اکثریت بنیادی سہولیات تک سے محروم ہے۔

پینے کے پانی کی عدم دستیابی، زرعی زمینوں کے لیے پانی کی قلت، ٹوٹی پھوٹی سڑکیں، بیروزگاری، سیلاب سے تباہ شدہ املاک کی عدم بحالی اور مارگٹ کول مائنز کی بندش اس علاقے کے بڑے مسائل ہیں۔

بقول عمران سمالانی کچھی کے عام لوگوں میں مایوسی دکھائی دیتی ہے۔ بیشتر لوگ، خاص طور پر یہاں کے پڑھے لکھے نوجوان کہتے ہیں کہ الیکشن یہاں کے سرداروں اور میروں کے &#39;سٹیٹس&#39; کا مسئلہ ہے۔ ان کو عوام کے مسائل سے کوئی سروکار نہیں۔

میانوالی کے دو سابق ارکان قومی اسمبلی جیل میں ہیں، متبادل امیدواروں اور روایتی سیاسی خاندانوں میں مقابلے

جھل مگسی کم کچھی کم نصیر آباد: انتخابی میدان، کون مارے گا؟ مگسی، رند یا کوئی اور

text

ستائیس سالہ زرینہ (فرضی نام) کوئٹہ کے نواحی علاقے کچلاک کی رہائشی ہیں۔ان کا تعلق&nbsp; پشتون قبیلے خلجی سے ہے۔ وہ پڑھی لکھی نہیں ہیں۔ ان کی دو بہنیں اور&nbsp; تین بھائی ہیں، بہنیں ابھی چھوٹی ہیں اوربھائی محنت مزدوری کرتے ہیں۔

زرینہ کی منگنی کئی سال قبل اپنے ہی قبیلے کے نوجوان تواب خان (فرضی نام) سے ہوئی تھی۔ وہ برسوں سے ایران میں محنت مزدوری کر رہے ہیں لیکن وہ ابھی تک اپنی منگیتر کے والد کو &#39;ولور&#39; کی رقم ادا نہیں کرپا رہے۔ جب وہ یہ رقم ادا کر دیں گے تو تب ہی ان کی شادی ہو سکے گی۔

زرینہ بتاتی ہیں کہ ان کے والد اور خاندان والوں نے تواب خان سے دس لاکھ روپے ولور مانگا ہے۔

&quot;منگنی کے آٹھ سال بعد بھی شادی نہیں ہو رہی۔ میرے والد اگر ولور نہ لیں تو لوگ انہیں طعنے دیں گے۔ میں اذیت میں ہوں، رشتہ دار کہتے ہیں کہ تواب کو چاہیے وہ کہیں سے ادھار پکڑیں اور اپنی دلہن لے جائیں۔&quot;

زرینہ سمجھتی ہیں کہ ان کے والدین ولور ضرور لیں گے۔ چاہے انہیں ساری عمر ہی یہیں کیوں نہ رہنا پڑے۔ ان کی والدہ بھی پریشان ہیں۔ لیکن بدقسمتی سے پشتون زیادہ رقم کا تقاضا کرنا اپنی شان سمجھتے ہیں۔ ان کا کہنا ہے کہ ولور کا ناسور ختم ہونا چاہیے۔

پشتون رواج کے مطابق &#39;ولور&#39; وہ رقم ہے جو دولہاشادی کے لیے دلہن کے والدین یاخاندان کو ادا کرتا ہے۔ اسے بلوچی میں &#39;لب&#39; کہتے ہیں۔ اب ان علاقوں میں اسے بھی &#39;جہیز&#39; کہا جانے لگا ہے۔ پشتونوں کے ساتھ بعض بلوچ قبائل میں بھی یہ رسم&nbsp; موجود ہے۔

ولور کی روایت یہاں کتنی مضبوط ہے، اس کا کوئی سروے تو نہیں ہوا اور نہ&nbsp; ہی اس حوالے سے کوئی سرکاری یا غیر سرکاری اعدادوشمار دستیاب ہیں۔ البتہ ایک قبائلی رہنما کا کہنا ہے کہ افغانستان اور بلوچستان کے پشتون علاقوں میں &#39;ولور &#39;کے بغیر شادی کا تصور بھی نہیں کیا جا سکتا۔

وہ بتاتے ہیں کہ یہاں اکثر شادیاں رجسٹر نہیں ہوتیں نہ ہی ان کا کوئی تحریری ریکارڈ ہوتا ہے۔ عالم دین زبانی نکاح پڑھاتے ہیں اور رخصتی کر دی جاتی ہے۔ ولور کے معاملات بھی دونوں خاندانوں یا جرگے میں زبانی ہی طے پاتے ہیں۔

ولور کےکا نقصانات &nbsp; 
زرکون قبیلے کے سردار عبدالرشید خان بتاتے ہیں کہ ولور کی رقم اب بہت زیادہ ہو چکی ہے۔اس سے پشتون سوسائٹی کو سخت نقصان ہو رہا ہے۔ اتنی بڑی رقم کی ادائیگی عام آدمی کے لیے ناممکن ہوتی جارہی ہے۔

&quot;دیہاڑی دار پشتون&nbsp; ولور کے لیے قرضوں کے دلدل میں پھنس جاتا ہے اور برسوں قرضے چکاتا رہتا ہے۔ اس دوران مقروض کے خاندان کی کفالت اور بچوں کی تعلیم&nbsp; بری طرح متاثر ہوتی ہے۔ ولور اور بعض دوسری رسموں کی وجہ سے مسائل پیدا ہورہے ہیں، جن کا خاتمہ ناگزیر ہوچکا ہے۔&quot;

انہوں نے اپنے قبیلےکے معتبر لوگوں کے ساتھ تین سال مشاورت کے بعد اس معاملے پر 21 مئی 2023 کو کوہلو میں جرگہ بلایا جس میں علما کا 15 رکنی وفد شامل تھا۔

پشتونخواہ ملی عوامی پارٹی (محمود اچکزئی ) اور پشتونخواہ ملی عوامی پارٹی (خوشحال خان گروپ) کے دو دو نمائندے اور قبیلے کے معززین اور دیگر افرادکی بڑی تعداد&nbsp; بھی اس میں شریک ہوئی۔

اس جرگے نے شادی کی لیے جہیز کی حد مقرر کرنے اور خواتین کو جائیداد میں حصہ دینے سمیت متعدد فیصلے کیے ہیں جن کے تحت ولور کی زیادہ سے زیادہ رقم 6 لاکھ روپے مقرر کی گئی ہے اور شادی بیاہ&nbsp; پوش (دلہن اور اس کے خاندان کی عورتوں کو کپڑوں کے جوڑے دینا)، کڑیچو(دولہے کے خاندان&nbsp; کا دلہن کے گھر جاکر میٹھے پکوان بنانا)، سوٹ دوپٹہ (دلہن کے سر پر دوپٹہ ڈالنے کے ساتھ رقم وصولی)، گیٹ کھولنے (باراتیوں کا راستہ روکنا) کی رسومات کو ختم کردیا گیا ہے۔

اس کے علاوہ دولہا کے خاندان کے لیے شادی&nbsp; کے دن دلہن کے خاندان کو بطور دعوت صرف دو دنبے دینے کی حد مقرر کی گئی ہے جبکہ اب سے بہن اور بیٹی کو جائیداد میں شریعت کے مطابق مکمل حصہ دیا جائے گا۔

&nbsp;اڑتالیس سالہ سردار عبدالرشید کہتے ہیں کہ پشتون سماج میں بڑے بڑے مسائل اور تنازعات کا حل جرگے کے ذریعے نکالا جاتا ہے۔ اس لیے انہوں نے بھی ان رسومات کے خاتمے کے لیے اسی کا انتخاب کیا۔اور اس کی شدت سے ضرورت تھی۔

ان کا کہنا ہے کہ ولور پر جرگے کا فیصلہ کثرت رائے سے ہوا ہے اس پر عمل درآمد کرانا مشکل نہیں ہو گا۔اس سلسلے میں وہ تمام عمائدین سے دوبارہ&nbsp; بھی ملاقات کریں گے۔

انہوں نے کہا کہ ولور دولہےکےخاندان والے دیتے ہیں۔ مقصد یہ تھا کہ دلہن کے والدین کو آسانی ہو اور اپنے بچی کےلیے زیور، کپڑے و دیگر چیزیں خرید سکیں۔لیکن لوگ حد سے زیادہ رقم مانگ لی جاتی ہے۔یوں ولور کا مقصد فوت ہوگیا ہے اور یہ رسم لوگوں پر بوجھ بن گئی ہے۔ 
&nbsp;ولور ختم کیوں نہیں گیا گیا؟

سردار رشید کہتے ہیں کہ ولور کا مکمل خاتمہ ممکن نہیں۔ یہ جہیز کے لیےلڑکی کے والدین کی مالی مدد ہوتی ہے۔ تاہم رقم کی حد مقرر کرنے کے فیصلے کو پشتون قبائل نے سراہا ہے۔

میر حسن اتل پشتوادب و تاریخ کے&nbsp; پی ایچ ڈی سکالر اور ژوب کالج میں لیکچرار ہیں۔ وہ سمجھتے ہیں کہ زرکون قبیلے کا ولور کے حوالے سے فیصلہ مثبت قدم ہے۔بے روزگاری اور غربت کے اس دور میں ولور کے نام بھاری رقم کا تقاضا ٹھیک نہیں ہے۔

حسن اتل بتاتے ہیں کہ ولور کی روایت سب سے بڑے پشتون قبیلے خلجی میں دوسروں سے زیادہ مضبوط رہی ہے۔ ہوتک، خروٹی، اندڑ اور ترہ کئی وغیرہ خلجی کی ذیلی شاخیں ہیں اور ان میں بھی یہ رسم چلی آ رہی ہے۔ اس کے ساتھ زرکون ، اچکزئی ، کاکڑ ، نورزئی قبیلوں میں سرداروں سےلے کر غریب آدمی تک سبھی ولور لیتے اور دیتے ہیں۔

انہوں نے بتایا کہ اب ولور کی رسم نے کاروبار کی شکل اختیار کرلی ہے۔ لڑکیوں کے والدین اور بھائیوں نے لڑکے والوں سے زیادہ&nbsp; سے زیاد پیسے لینا شروع کر دیے ہیں۔بڑا نقصان یہ بھی ہے کہ مردوں میں خواہ خرابی بھی ہو یا ان کی چاہے جتنی بھی عمر ہو، اسے نظر انداز کر کے رقم کے عوض لڑکی کی ان سے شادی کر دی جاتی ہے۔

میرحسن کہتے ہیں کہ ولور سے بچنے کی ایک ہی صورت ہوتی ہے اور وہ ہے وٹہ سٹہ کی شادی۔اس&nbsp; لیے جن لوگوں کو ولور دینا ہو وہ یہ رقم جمع کرنے کی خاطر گھر بار چھوڑ دیتے ہیں۔ بیرون ملک جا کر مزدوریا ں کرتےہیں۔ ان میں بعض بہت سے لوگ ذہنی، جسمانی اور نفسیاتی مسائل سے&nbsp; شکار ہوجاتےہیں۔

عورت فاونڈئشن کے&nbsp; ریذیڈنٹ ڈائریکٹر علاؤالدین خلجی کہتے ہیں کہ ولور کے خاتمے کیلئے اب تک سرکاری سطح پر کوئی قانون سازی نہیں کی گئی۔ اس رسم سے نوجوان لڑکوں اور لڑکیوں عمریں ضائع ہو رہی ہیں۔ عام طور پر ولور کی رقم دس لاکھ سے 70 لاکھ تک ہوتی ہے اور اس کا بڑی حد تک انحصار لڑکی کی خوبصورتی پر بھی ہوتا ہے۔ کوئٹہ جیسے بڑے شہروں میں ولور کا تصور قدرے کم ہوا ہے تاہم باقی پشتون بیلٹ بشمول قلعہ عبداللہ ، قلعہ سیف اللہ ، ژوب اور لورالائی&nbsp; میں اب بھی ولور لیا اور دیا جاتا ہے۔

شادی کرو یا 15 لاکھ ہرجانہ دو: پنجاب کے قبائلی علاقوں میں لڑکیوں کی زندگی پنچایت کے ہاتھ میں کھلونا بن گئی

جہیز کی رقم 6 لاکھ، بہن بیٹی کا جائیداد میں حصہ: بلوچستان میں پشتون قبائل کے 'غیرمعمولی' فیصلے کے نتائج کیا ہوں گے؟

بلوچستان کے ضلع نصیر آباد میں تین بچوں کی ماں خدیجہ بی بی امدادی تنظیم سے ملنے والے خیمے کے سامنے دھوپ میں بیٹھی روٹی بنا رہی ہیں۔ ان کی عمر تیس سال ہے مگر عسرت زدہ چہرے اور مدقوق رنگت کے باعث وہ اپنی اصل عمر سے کہیں بڑی دکھائی دیتی ہیں۔

نواحی گوٹھ سلطان کوٹ میں ان کا گھر پچھلے سال سیلاب میں بہہ گیا تھا اور اس آفت نے ان کے شوہر کا کاروبار بھی ختم کر دیا۔ بے روزگار ہونے کے بعد ان کے شوہر ذہنی دباؤ کا شکار ہو گئے اور اکثر اپنا غصہ بیوی پر اتارتے ہیں۔

&quot;بچے اگر کسی چیز کے لیے ضد کریں تو میں مجبوراً شوہر سے کہتی ہوں۔ جواباً وہ جھگڑا اور مار پیٹ شروع کر دیتے ہیں اور اب یہ معمول بن گیا ہے۔ میں کسی سے شکایت بھی نہیں کر سکتی ورنہ مزید تشدد جھیلنا پڑے گا۔&quot;

نصیر آباد میں کام کرنے والی غیر سرکاری تنظیم &#39;سحر آرگنائزیشن&#39; کے قانونی مشیر امتیاز منجھو کچھ عرصہ سے اس علاقے میں خواتین پر تشدد کے واقعات کا جائزہ لے رہے ہیں۔ وہ کہتے ہیں کہ سیلاب کے بعد اس ضلعے میں گھریلو تشدد کے واقعات میں27 فیصد اضافہ ہوا ہے۔

پچھلے چھ ماہ کے دوران یہاں تھانوں اور ان کی تنظیم کے &#39;جینڈر ڈیسک&#39; پر گھریلو تشدد کے 39 واقعات رپوٹ ہوئے۔ ان میں سے چھ واقعات میں مقدمات بھی درج کئے گئے جن میں نو افراد کو قید اور جرمانے کی سزائیں ہوئیں۔ لیکن باقی تمام واقعات میں فریقین نے عدالت سے باہر صلح کر لی۔

عالمی ادارہ صحت کے تعاون سے صنفی تشدد کی روک تھام کے لئے نصیرآباد ڈویژن میں کام کرنے والے ماہر نفسیات بہرام لہڑی سیلاب کے بعد گھریلو تشدد کے واقعات میں اضافے کی تصدیق کرتے ہیں۔ ان کا کہنا ہے کہ مالی پریشانی کا نفسیاتی مسائل سے قریبی تعلق ہوتا ہے۔

سیلاب زدہ علاقوں میں لوگوں کے گھر،کھڑی فصلیں اور کاروبار ان کی آنکھوں کے سامنے تباہ ہو گئے جس کا بہت سے لوگوں کی ذہنی صحت پر منفی اثر پڑا۔

بہرام بتاتے ہیں کہ نصیر آباد ڈویژن کے چھ اضلاع سیلاب سے بری طرح متاثر ہوئے ہیں اور یہاں خواتین پر گھریلو تشدد اور غیرت کے نام پر قتل کے واقعات بھی پہلے سے بڑھ گئے ہیں۔

انسانی حقوق کمیشن کے مطابق جون 2022ء کے بلوچستان میں گھریلو تشدد کے 157 واقعات رپورٹ ہوئے، کاروکاری کے الزام میں 35 افراد کو قتل کیا گیا جن میں نصف تعداد خواتین کی تھی جبکہ 40 خواتین کو جنسی زیادتی کا نشانہ بنایا گیا۔

اس سے پہلے 2021 میں گھریلو تشدد کے رپورٹ ہونے والے واقعات کی تعداد 127 تھی جبکہ 30 خواتین جنسی تشدد کا شکار ہوئیں۔

بلوچستان میں گھریلو تشدد کی روک تھام کے لئے 2021 میں بنائے گئے قانون کے تحت اس جرم کا ارتکاب کرنے والوں کے لئے کم از کم چھ ماہ قید اور ایک لاکھ روپے تک جرمانے کی سزا تجویز کی گئی ہے۔ تاہم نصیر آباد میں غیرسرکاری تنظیم شفا فاؤنڈیشن کے ضلعی کوآرڈینیٹر محمد زبیر مخدوم کہتے ہیں کہ ایسے بہت کم واقعات میں ہی ملزموں کو سزا ہو پاتی ہے

ان کا کہنا ہے کہ آگاہی نہ ہونے اور خاندان کی بدنامی کے ڈر سے بیشتر خواتین تشدد کی رپورٹ ہی درج نہیں کراتیں۔ بعض خواتین کو خوف ہوتا ہے کہ اگر انہوں نے مقدمہ کیا تو انہیں قتل کر دیا جائے گا۔ صوبے میں گھریلو تشدد کا مسئلہ بہت پرانا اور گھمبیر ہے تاہم مخصوص&nbsp; سماجی روایات کے سبب ایسے بیشتر واقعات ریکارڈ پر نہیں آتے۔

زبیر مخدوم تسلیم کرتے ہیں کہ سیلاب کے بعد گھریلو تشدد کے واقعات بڑھ گئے ہیں اور ان سے خواتین اور بچے سب سے زیادہ متاثر ہو رہے ہیں۔

ان کا کہنا ہے کہ گھر تباہ ہو جائے اور سر چھپانے کو جگہ نہ ہو تو انسان مایوس ہو جاتا ہے۔ بلوچستان جیسے معاشرے میں جہاں گھر کی تمام ذمہ داری مرد پر ہوتی ہے وہاں اس کا روزگار ہی نہ رہے تو یقیناً پریشانی بڑھے گی اور اس کا نتیجہ غصہ، چڑچڑے پن اور جھگڑے کی صورت میں نکلے گا۔

عبدالکریم

عبدالکریم کا تعلق کوئٹہ سے ہے وہ ملٹی میڈیا جرنلسٹ ہے ۔ انہوں نے جامعہ بلوچستان سے ماس کمیونیکشن میں ماسٹرز کیا ہوا ہے ۔ گزشتہ آٹھ سال سے صحافت سے وابستہ ہے۔

جھل مگسی کم کچھی کم نصیر آباد: انتخابی میدان، کون مارے گا؟ مگسی، رند یا کوئی اور

جہیز کی رقم 6 لاکھ، بہن بیٹی کا جائیداد میں حصہ: بلوچستان میں پشتون قبائل کے 'غیرمعمولی' فیصلے کے نتائج کیا ہوں گے؟

نصیر آباد ڈویژن: ایک سال میں خواتین پر گھریلو تشدد کے واقعات میں غیرمعمولی اضافہ