گذشتہ مون سون میں اچھی بارشیں ہونے پر سومار جے پال بہت خوش تھے لیکن ان کی خوشی کچھ زیادہ دیرپا ثابت نہیں ہوئی۔

سومار تھرپارکر کی تحصیل ڈیپلو کے گاؤں چڑھیل سے ہیں۔ مال مویشی پالنا ان کا آبائی پیشہ اور گزر بسر کا واحد ذریعہ ہیں۔ وہ صحرائے تھر کی کھلی چراگاہوں میں گھوم پھر کر اپنے مویشی چراتے ہیں۔ ان چراگاہوں کی زمین کسی کی ملکیت نہیں۔ موسم ساز گار ہو تو یہاں سبزہ اچھا اور وافر ہوتا ہے اور سومار اور ان کے مویشی خوش رہتے ہیں۔

تھر میں بارشوں کے موسم میں گوار، مونگ، تربوز اور ٹنڈوں سمیت دیگر کئی سبزیاں اگائی جاتی ہیں اور ان کے بچے کھچے ہرے حصے بھی جانوروں کے چارے کے طور پر کام آتے ہیں۔

لیکن صحرائے تھر میں سردیوں کے اختتام سے لے کر برسات کی آمد تک کے چھ سات ماہ سبزہ ناپید ہو جاتا ہے۔

سومار نے بتایا: &quot;بارشوں کا پانی کچھ دن ہی ترایوں (قدرتی تالابوں) میں میسر رہتا ہے اور کچھ عرصے بعد جب کنووں کا پانی بھی نیچے چلا جاتا ہے تو ہمیں نقل مکانی کرنا پڑتی ہے&quot;۔

&nbsp;سومار دو ماہ قبل اپنے مویشیوں کو لے کر اپنے گاؤں سے ایک سو کلومیٹر دور ضلع بدین کی جانب نقل مکانی کر گئے تھے۔ انہوں نے مورجھر نامی بیراجی علاقے کے نزدیک پڑاؤ کیا۔ انہوں نے رہنے کے لیے لکڑیوں اور گھاس پھوس سے عارضی ٹھکانہ تعمیر کر لیا جسے لانڈھی کہا جاتا ہے اور وہیں اپنی تھری نسل کی بیس گائیوں کا باڑا بھی بنا لیا۔

بیراجی یعنی بیراج کے قریبی علاقے میں نہری پانی سے کاشتکاری ہوتی ہے۔ ضلع بدین میں شادی لارج سے لیکر گولاڑچی اور کڈھن سے ماتلی تک تمام اراضی کوٹری بیراج کے پانی پر انحصار کرتی ہیں۔

سومار بتاتے ہیں کہ یہاں حال ہی میں دھان کی فصل کی کٹائی ہوئی ہے اس لئے خشک چارہ&nbsp; دستیاب ہے۔ درختوں کی شاخیں ہری بھری ہیں اور نالیوں (واٹرکورس نمبر 41 - ایل اور 42 - ایل) میں کچھ پانی بھی موجود ہے۔ &quot;ضرورت پڑنے پر قریبی شہر گولاڑچی اور بدین سے خشک چارہ، ہری اور سوکھی گھاس بھی مل جاتی ہے&quot;۔

سومار اکیلے نہیں جو اپنے گاؤں سے یہاں پہنچے ہیں۔ تھر کے تمام ہی باڑے اس وقت خالی ہیں۔ جوں ہی سبزہ ختم ہوتا ہے مال دار (مویشی پالنے والے) سبزے اور پانی کی راہ ڈھونڈتے نکل کھڑے ہوتے ہیں۔ اُن دنوں کراچی، اسلام کوٹ تھرکول روڈ کے دونوں اطراف مویشیوں کے بڑے بڑے قافلے رواں دواں دکھائی دیتے ہیں۔

ایک مقامی این جی او فاسٹ رورل ڈیویلپمینٹ&nbsp; پروگرام&nbsp; کی تھر کے حوالے سے ایک رپورٹ کے مطابق خشک موسم میں یہاں کے تقریباً&nbsp; 96.4&nbsp; فیصد بڑے مویشی بیراجی علاقوں میں منتقل کر دیئے جاتے ہیں۔

تھر میں سالانہ اوسطاً 56 ملی میٹر&nbsp; بارش ہوتی ہے لیکن پچھلی برسات میں 193 ملی میٹر بارش برسی۔ جس سے نہ صرف فصلیں اچھی ہوئیں بلکہ چراگاہیں بھی سبزے سے لہلہا گئیں۔

سومار سوچتے تھے کہ شاید اس بار تادیر چارہ مہیا رہے گا لیکن ایسا نہیں ہوا۔

اس کی ایک اہم وجہ یہ ہے کہ سبزے کے موسم میں تھر کی چراگاہوں میں اب صرف تھری ہی اپنے مویشی نہیں چراتے بلکہ بیراجی علاقوں کے مال دار بھی اپنے مویشی چرانے یہاں آ جاتے ہیں۔

تھری مال داروں کی خشک موسم میں بیراجی علاقوں کی جانب نقل مکانی تو صدیوں سے جاری ہے اور یہ ان کے رہن سہن میں معمول کا درجہ رکھتی ہے لیکن ہریالی کے موسم میں بیراجی علاقوں سے تھر کی جانب الٹی نقل مکانی گذشتہ چند سالوں میں ہی دیکھنے میں آئی ہے اور پانی اور سبزے کی دستیابی میں کسی ممکنہ بڑی تبدیلی کی جانب اشارہ کرتی ہے۔

ناتھو خاصخیلی اور مور خاصخیلی ان مال داروں میں سے جو اب یہ الٹی نقل مکانی کرتے ہیں۔ ان کے پاس&nbsp; سندھی نسل کی 30 گائیں ہیں۔ وہ ضلع بدین میں رہتے ہیں اور جب تھر میں زیادہ بارشیں ہوتی ہیں تو وہ اپنا گاؤں چھوڑ کر تھر میں بسیرا کر لیتے ہیں۔

ناتھو بتاتے ہیں کہ اس موسم میں ان کے علاقے میں ہر طرف پانی کھڑا ہو جاتا ہے جس سے گھاس کی قلت ہو جاتی ہے اور مچھروں اور حشرات کی بہتات۔ مویشی بیمار ہو کر مرنے لگتے ہیں۔دوسری جانب تھر ہرا بھرا ہوتا ہے اور یہاں گندگی اور کیچڑ وغیرہ بھی نہیں ہوتی۔اس لیے ہم بھی تھری لوگوں کی طرح نقل مکانی کر کے اپنے بیراجی علاقے سے تھر چلے جاتے ہیں۔

ان کا کہنا ہے کہ تھر میں سبزہ تین سے چار مہینے رہتا ہے اور اس دوران وہ وہیں قیام کرتے ہیں۔

تھر کے مقامی لوگوں کا کہنا ہے کہ اس سال تھرپارکر میں بدین، میرپورخاص اور عمرکوٹ اضلاع کے بیراجی علاقوں سے ہزاروں کی تعداد میں مویشی&nbsp; تھر لائے گئے۔ جس کی وجہ سے یہاں گھاس وافر ہونے کے باوجود وقت سے پہلے ختم ہو گئی اور تھر کے مالداروں کو پہلے کی طرح ہی نقل مکانی کرنا پڑی۔

2017 کی مردم شماری کے مطابق ضلع تھرپارکر میں آباد گھرانوں کی کل تعداد تین لاکھ اور کل آبادی ساڑھے سولہ لاکھ ہے۔ سرکاری تخمینوں کے مطابق ضلع میں ساڑھے 13 لاکھ گائیں، ساڑھے 48 لاکھ بھیڑ بکریاں اور ڈیڑھ لاکھ اونٹ ہیں۔

گویا یہاں اوسطاً ہر گھرانے کے پاس چار سے زائد گائیں اور 16 بھیڑ بکریاں ہیں۔

ضلع میں آباد افراد کی زندگی انہی مویشیوں کے گرد گھومتی ہے۔

سومار جے پال کے بیٹے ہریش کمار کی شادی پچھلے سال ہی ہوئی تھی۔ وہ اس بار ابھی تک اپنے والد کے ساتھ بیراجی علاقے میں نہیں گئے۔ وہ بتاتے ہیں کہ خشک موسم میں وہ اکثر اپنا کوئی مویشی بیچ کر گزارہ کرتے ہیں لیکن اگر وہ تھر میں ہی رہیں تو چارے کی کمی سے جانور کمزور اور کم وزن ہو جاتے ہیں۔ &quot;جو بکرا 15 ہزار میں بکتا ہے وہ 10 ہزار پہ آ جاتا ہے۔ گائے کے دام بھی گر جاتے ہیں اور ڈیڑھ، پونے دو لاکھ میں فروخت ہونے والی گائے کی قیمت 20، 30 ہزار تک کم ہو جاتی ہے۔&quot;

نقل مکانی سے گائیں تو بچ جاتی ہیں لیکن گھرانہ روازنہ کے وافر دودھ، دھی اور مکھن سے محروم ہو جاتا ہے۔ ایسے میں ان کا مکمل انحصار اپنی بھیڑ بکریوں پر ہوتا ہے جن کی چارے کی ضرورت محدود ہوتی ہے اور اسی لیے ان کو موسمی ہجرت کے عمل سے نہیں گزارنا پڑتا۔

ہریش کی اہلیہ شانتی بائی دیگر کام کاج کے علاوہ اپنے گھرانے کی نو بکریوں کی دیکھ بھال کی ذمہ داری بھی نبھاتی ہیں۔ انہوں نے بتایا کہ کھیت تو اب خالی پڑے ہیں، اس لیے وہاں کوئی کام نہیں اور مویشی بھی بیراجی علاقے جا چکے ہیں لیکن اب یہاں پانی کی قلت ہے اور اس کا خمیازہ بھی وہی بھگتتی ہیں۔

&quot;گاؤں کے نلکے میں اب پانی کھارا آتا ہے جو پینے لائق نہیں ہے۔ اس سے صرف برتن، کپڑے دھوئے جا سکتے ہیں۔ میٹھے پانی کے لیے صبح سویرے اٹھنا پڑتا ہے تاکہ تین کلومیٹر دور کنویں پر جلد پہنچ سکوں، وہاں پانچ پانچ گھنٹے قطار میں انتظار کرنا پڑتا ہے&quot;۔

دادو میں سیلاب سے بچ جانے والے ہزاروں مویشی علاج معالجے کی عدم دستیابی، آلودہ پانی اور خوراک کی قلت سے ہلاک ہو رہے ہیں

بیراجی علاقوں سے تھر کی چراہگاہوں کی جانب الٹی نقل مکانی: مویشیوں کی موسمی ہجرت کا روایتی پیٹرن کیوں تبدیل ہو رہا ہے؟

text

اس سال جولائی کے اواخر میں جیسے ہی بارشیں شروع ہوئیں 37 سالہ کاشت کار کیول میگھواڑ کو یقین ہو گیا کہ انہیں گھر بار چھوڑ کر نقل مکانی کرنا پڑے گی۔

وہ سندھ کے ضلع میرپور خاص کے گاؤں کوٹ میر جان محمد ٹالپر میں رہتے ہیں جو لیفٹ بینک آؤٹ فال ڈرین (ایل بی او ڈی) نامی نالے سے صرف ایک کلومیٹر دور ہے۔ وہ کہتے ہیں کہ ان بارشوں کے نتیجے میں اس نالے میں بہنے والا پانی اس کے کناروں سے باہر نکل کر اس کے ارد گرد واقع دیہات میں پھیل گیا ہے جس سے نہ صرف ان کی فصلیں ملیامیٹ ہو گئی ہیں بلکہ ان کا پورا گاؤں بھی پانی میں ڈوب گیا ہے۔

چنانچہ وہ اپنے مال مویشی اپنے گھر میں ہی چھوڑ کر اپنے بیوی بچوں کے ساتھ اپنے رشتہ داروں کے ہاں منتقل ہو گئے ہیں جو نواحی ضلع تھرپارکر کے کلوئی نامی علاقے میں رہتے ہیں۔ تاہم ان کا کہنا ہے کہ اس طرح کی نقل مکانی ان کے لیے کوئی نیا تجربہ نہیں بلکہ &quot;جب بھی ایل بی او ڈی کا پانی سیلابی صورت اختیار کرتا ہے ہمیں ایسا ہی کرنا پڑتا ہے&quot;۔

اس ضمن میں وہ 2011 میں ہونے والی بارشوں اور ان کے نتیجے میں آنے والے سیلاب کا خاص طور پر ذکر کرتے ہیں اور کہتے ہیں کہ ان کی وجہ سے انہیں کئی ہفتوں کے لیے بے گھر ہونا پڑا تھا۔

انہی کے گاؤں کے ایک اور باسی 35 سالہ اشوک میگھواڑ نے بھی اپنے بیوی بچوں کو کلوئی منتقل کر دیا ہے جبکہ وہ خود اپنے گاؤں میں ہی رہ رہے ہیں جہاں، ان کے مطابق، &quot;سیلابی پانی ابھی بھی ایل بی او ڈی&nbsp; سے نکل کر انسانی آبادی اور زرعی اراضی میں داخل ہو رہا ہے&quot;۔ وہ کہتے ہیں کہ ان کے علاقے سے گزرنے والی ایک اہم سڑک جو دو بڑے مقامی قصبوں جھڈو اور نوکوٹ کو آپس میں ملاتی ہے ٹریفک کے لیے بند کر دی گئی ہے کیونکہ ایل بی او ڈی کے آرپار بنایا گیا اس کا پل مکمل طور پر پانی میں ڈوب گیا ہے۔ ان حالات میں مقامی لوگوں کو محفوظ مقامات پر لے جانے کے لیے حکومت کی جانب سے کشتیاں چلائی جا رہی ہیں۔

اگرچہ ہر برسات میں صورتِ حال اتنی خراب نہیں ہوتی لیکن اشوک میگھواڑ کہتے ہیں کہ معمول سے ہٹ کر ہونے والی ہر بارش کے بعد مقامی لوگوں کو ایل بی او ڈی میں &quot;سیلاب آنے کا دھڑکا لگا رہتا ہے&quot;۔ اس لیے، ان کے مطابق، &quot;جیسے ہی اس میں پانی کی مقدار بڑھنے لگتی ہے ہم جان جاتے ہیں کہ اب ہمیں اپنا گھر بار، مال مویشی اور فصلیں چھوڑ کر نقل مکانی کرنا پڑے گی&quot;۔

ان کے ضلعے کے دوسرے علاقوں میں رہنے والے لوگوں کو بھی اسی طرح کے مسائل کا سامنا ہے۔

میرپور خاص شہر سے 48 کلومیٹر جنوب میں واقع گوٹھ امیر بخش کلوئی نامی گاؤں کے رہنے والے 60 سالہ بھیرو کولہی کا کہنا ہے کہ پچھلے ماہ آنے والے سیلاب نے ان کی نو ایکڑ اراضی پر کھڑی مرچوں اور کپاس کی فصلیں تباہ کر دی ہیں۔ اگرچہ یہ تباہی لانے والا پانی ڈھورو پران نامی ایک قدیم برساتی ندی کا حفاظتی بند ٹوٹنے سے ان کے گاؤں میں داخل ہوا تھا لیکن وہ کہتے ہیں کہ اس بند کے ٹوٹنے کی بنیادی وجہ ایل بی او ڈی ہی ہے کیونکہ &quot;اس نے جگہ جگہ ڈھورو پران کا قدرتی راستہ روک رکھا ہے&quot;۔ اسی بنا پر ان کا کہنا ہے کہ ایل بی او ڈی ان جیسے &quot;ہزاروں لوگوں کی زندگی اور روزگار کے لیے ایک مستقل خطرہ بن گیا ہے&quot;۔

ان کا یہ بھی کہنا ہے کہ سیلاب کا پانی ابھی تک ان کے گاؤں میں کھڑا ہے کیونکہ اس کے اخراج کا واحد ذریعہ ایل بی او ڈی ہے جو خود لبا لب بھرا ہوا ہے۔ اسی لیے انہوں نے اپنی بیوی اور چار بچوں کے ساتھ نواحی ضلع بدین کے قصبے ملکانی شریف کے قریب پناہ لے رکھی ہے۔

<h2>قدرتی راستے، سرکاری رکاوٹیں&nbsp;</h2>

اگرچہ بارشیں ختم ہوئے دو ہفتوں سے زیادہ عرصہ گزر چکا ہے لیکن جھڈو کا پورا قصبہ اب بھی پانی میں ڈوبا ہوا ہے جبکہ اس کی 90 فیصد آبادی دوسرے علاقوں میں منتقل ہو چکی ہے۔

مقامی لوگوں کا کہنا ہے کہ ان کے قصبے میں آنے والے سیلاب کا سبب ڈھورو پران کے حفاظتی بند میں پڑنے والا شگاف اور ایل بی او ڈی کے کناروں سے باہر نکلنے والا پانی ہیں۔ ان کے مطابق اس سیلاب نے جہاں مقامی ذرائعِ آمدورفت کو شدید متاثر کیا ہے وہیں اس نے ہزاروں گھروں کو منہدم کر دیا ہے اور لاکھوں ایکڑ اراضی پر کھڑی مرچوں اور کپاس کی فصلوں کو شدید نقصان پہنچایا ہے۔

اس سیلاب سے متاثر ہونے والے لوگوں کی ایک بڑی تعداد میرپور خاص اور بدین کے مختلف حصوں میں تقریباً روزانہ احتجاجی مظاہرے کر رہی ہے۔ ان مظاہرین کا حکومت سے مطالبہ ہے کہ وہ فوری امدادی کارروائیاں کرنے کے ساتھ ساتھ ایل بی او ڈی کے پیدا کردہ مسائل کا بھی کوئی پائیدار حل تلاش کرے۔

کیول میگھواڑ ان کے خیالات کی ترجمانی کرتے ہوئے کہتے ہیں کہ &quot;اگر یہ نالا پانی کے قدیم راستوں پر تعمیر کیا جاتا تو اس میں آنے والا سیلاب کبھی اتنا نقصان نہ کرتا جتنا وہ اب کر رہا ہے&quot;۔

ایل بی او ڈی وسطی سندھ کے ضلع شہید بینظیر آباد (جسے کچھ عرصہ پہلے تک نواب شاہ کہا جاتا تھا) سے شروع ہوتا ہے اور سانگھڑ، میر پور خاص، ٹندو اللہ یار اور بدین کے اضلاع سے گزرتا ہوا بحیرہ عرب میں جا گرتا ہے۔ مرکزی حکومت نے اس کی تعمیر کا منصوبہ 1984 میں عالمی بنک اور ایشیائی ترقیاتی بنک کی مالی امداد سے بنایا تھا لیکن اسے مکمل ہونے میں 11 سال لگ گئے۔

ناصر علی پنہور، جو عالمی بنک اور یو ایس ایڈ جیسے امداد دینے والے اداروں کے ساتھ مل کر سندھ کے ماحولیاتی مسائل پر کافی تحقیق کر چکے ہیں، کہتے ہیں کہ ایل بی او ڈی کی تعمیر کا بنیادی مقصد نہروں سے سیراب ہونے والی زمینوں سے سیم کا پانی نکالنا اور صنعتی اور شہری فضلہ سمندر میں لے کر جانا تھا۔ ان کے مطابق &quot;یہ دونوں مقاصد تو ٹھیک طرح سے پورے نہیں ہوئے البتہ اپنے ڈیزائن اور روٹ کی خرابیوں کی وجہ سے یہ نالا میرپور خاص اور بدین کے اضلاع میں سیلاب کا سبب ضرور بن گیا ہے&quot;۔

ضلع بدین کے ساحلی علاقے کڈھن سے تعلق رکھنے والے محقق اللہ بچایو جمالی بھی انہی مسائل کی نشان دہی کرتے ہوئے کہتے ہیں کہ مشرقی سندھ کی قدیم برساتی ندیوں ہاکڑو اور ڈھورو پران کی جگہ ایل بی او ڈی کی تعمیر سے پانی کے بہاؤ کے قدرتی راستے بند ہو گئے ہیں۔

مزیدبرآں ان کا کہنا ہے کہ &quot; مقامی لوگوں نے جگہ جگہ ہاکڑو اور ڈھورو پران کی گزرگاہوں پر قبضے کر کے وہاں نہ صرف کاشت کاری کر رکھی ہے بلکہ رہائشی عمارتیں بھی بنا لی ہیں&quot;۔ ان کے مطابق &quot;ان دونوں عوامل کا مجموعی نتیجہ یہ نکلا ہے کہ جب بھی ان ندیوں میں سیلاب آتا ہے تو اس کا پانی حفاظتی بند توڑ کر اردگرد کے علاقوں کو ڈبو دیتا ہے&quot;۔

سندھ کے وزیر اعلیٰ مراد علی شاہ نے بھی چند روز پہلے میر پور خاص میں سیلاب سے متاثرہ علاقوں کا دورہ کرتے ہوئے کہا تھا کہ ان ندیوں پر بنی ہوئی تجاوزات سیلاب کا باعث بن رہی ہیں۔ انہوں نے مقامی صحافیوں کو یہ بھی بتایا کہ &quot;2011 میں آنے والے سیلاب کے بعد ان تجاوزات کے بارے میں تفصیلی رپورٹیں بھی تیار کی گئیں لیکن ان میں تجویز کیے گئے اقدامات پر عملدرآمد نہیں ہو سکا&quot;۔ اس کی وجہ بیان کرتے ہوئے ان کا کہنا تھا کہ &quot;اس کام کے لیے 45 ارب روپے درکار ہیں جن کا انتظام کرنا حکومتِ سندھ کے لیے ممکن نہیں&quot;۔&nbsp;

سترام سانگی

بیراجی علاقوں سے تھر کی چراہگاہوں کی جانب الٹی نقل مکانی: مویشیوں کی موسمی ہجرت کا روایتی پیٹرن کیوں تبدیل ہو رہا ہے؟

میری وجہِ تباہی صرف طوفاں ہو نہیں سکتا: 'لیفٹ بنک آؤٹ فال ڈرین زیریں سندھ میں ہزاروں لوگوں کی زندگی اور روزگار کے لیے ایک مستقل خطرہ بن گیا ہے'۔

Lok Sujag