جمیلہ نظامی نو سال پاکستان میں گزارنے کے بعد نومبر 2020ء میں اپنے ملک آذربائیجان چلی گئیں۔

وہ اکتوبر 2011 میں پاکستان آئیں۔ ان کے اپنے بیان کے مطابق اس وقت وہ ایک آٹھ سالہ بیٹے کی ماں تھیں اگرچہ ان کے خاوند سے ان کی علیحدگی ہو چکی تھی۔ ان کے دیگر اہلِ خانہ میں ان کی والدہ، دو بھائی اور ایک بہن شامل تھے۔&nbsp;

آذربائیجان روانگی سے قبل اسلام آباد کے ایدھی سنٹر میں ایک انٹرویو دیتے ہوئے ان کا کہنا تھا کہ وہ اپنے ملک کے کمزور معاشی حالات کی وجہ سے پاکستان آنے پر مجبور ہوئیں۔ انہوں نے کہا: &#39;میں چاہتی تھی کہ کسی اچھے خاندان میں میری شادی ہو، میرے پاس نوکری ہو تاکہ میں اپنے گھر والوں کی مدد کر سکوں۔ میں اپنے چھوٹے بھائی کو بھی پڑھانا چاہتی تھی&#39;۔

ان کی والدہ کی جاننے والی ایک عورت نے جمیلہ کو امید دلائی کہ وہ انہیں پاکستان لے جاکر ان کی شادی کرا دیں گی۔ اس عورت کی اپنی بیٹی بھی پاکستان میں رہتی تھی۔&nbsp;

لیکن جمیلہ نے سجاگ کو بتایا کہ جب وہ راولپنڈی میں اس عورت کی بیٹی کے پاس پہنچیں تو انہِیں ایک اور آذربائیجانی عورت کے حوالے کر دیا گیا جس نے ان کا پاسپورٹ چھیننے کے بعد انہیں جسم فروشی پر مجبور کیا۔ جمیلہ کا کہنا تھا: &#39;میری شادی کرانے کے لئے مجھے یہاں لایا گیا مگر مجھ سے گندے کام کروائے گئے&#39;۔

تین سال راولپنڈی میں گزارنے کے بعد جمیلہ کو ایک دوسری آذربائیجانی عورت کے ہاتھوں ایک لاکھ روپے کے عوض بیچ دیا گیا جو انہیں کراچی لے گئی جہاں انہیں ڈیفنس کے علاقے میں فلوریڈا ہومز نامی اپارٹمنٹ بلڈنگ میں ٹھہرایا گیا۔

اس آذربائیجانی عورت کا خاوند ایک پاکستانی تھا جو جمیلہ کے مطابق جسم فروشی کے ساتھ ساتھ کوکین اور آئس جیسے نشے بیچنے مِیں بھی ملوث تھا۔ ان دونوں میاں بیوی کی ایک ساتھی عورت جمیلہ کو کراچی کے بنگلوں اور اپارٹمنٹوں میں جسم فروشی کے لئے بھیجتی تھی۔ اگلے پانچ سال ان سے یہی کام لیا جاتا رہا۔

جمیلہ نے سجاگ کو بتایا کہ اس دوران ان کی ملاقات ایک ایسے شخص سے ہوئی جس سے ان کی دوستی ہوگئی لیکن ان کے مطابق اس دوستی کی وجہ سے ان پر تشدد کیا گیا اور اپارٹمنٹ سے بھی نکال دیا گیا۔

اپارٹمنٹ چھوڑنے &nbsp;کے بعد کچھ دن وہ اپنے دوست کے گھر میں رہیں لیکن 13 جنوری 2019 کو ان کے دوست کے والد انہیں رفاہی تنظیم ایدھی فاؤنڈیشن کے کلفٹن میں قائم سنٹر میں چھوڑ آئے جہاں سے ایک ماہ بعد انہیں ایدھی ہومز اسلام آباد منتقل کیا گیا تاکہ وہ آذربائیجان کے سفارت خانے سے رابطہ کر کے اپنے ملک واپس جانے کا بندوبست کر سکیں۔

ایدھی فاؤنڈیشن نے 5 نومبر 2019 کو وزارتِ داخلہ کو ایک خط لکھا جس میں کہا گیا کہ جمیلہ کو آذربائیجان واپس جانے کی اجازت دی جائے کیونکہ آذربائیجانی پاسپورٹ سمیت ان کی تمام سفری دستاویزات مکمل ہیں اور یہ کہ ان کے ہوائی ٹکٹ سمیت ان کے سفر کا خرچ ایدھی فاؤنڈیشن ادا کرے گی۔

چھ نومبر 2019ء کو اسلام آباد میں آذربائیجان کے سفارت خانے نے پاکستانی وزارتِ خارجہ اور وزارتِ داخلہ دونوں کو ایک خط لکھا جس میں کہا گیا کہ جمیلہ انسانی سمگلنگ کا شکار ہوئی ہیں لیکن ویزے کے بغیر پاکستان میں رہنے کی وجہ سے وزارتِ داخلہ نے انہیں آذربائیجان جانے سے روک دیا ہے اور ان پر ساڑھے پانچ لاکھ روپے جرمانہ بھی عائد کر دیا ہے۔ اس خط میں حکومتِ پاکستان سے درخواست کی گئی کہ جتنی جلدی ممکن ہو جمیلہ کو اپنے ملک جانے کی اجازت دی جائے اور ساتھ ہی یہ کہا گیا کہ ان کو جسم فروشی پر مجبور کرنے والی ایک آذربائیجانی عورت وسیلہ کو گرفتار کیا جائے اور اس کے خلاف مقدمہ چلانے میں مدد کی جائے۔&nbsp;

سفارت خانے کے ذرائع کا کہنا ہے کہ پاکستانی حکام نے اس خط کا کوئی جواب نہیں دیا۔

اس کے بعد ایدھی فاؤنڈیشن کے سربراہ فیصل ایدھی نے کراچی میں انسانی حقوق پر کام کرنے والے وکیل ضیا اعوان سے رابطہ کیا تاکہ وہ اس معاملے میں ان کی مدد کر سکیں۔ نتیجتاً ضیا اعوان نے اسلام آباد ہائی کورٹ میں ایک رٹ دائر کی جس کی سماعت کئی مہینے چلتی رہی۔

اکتوبر 2020 میں اسلام آباد ہائی کورٹ نے بالآخر حکومتِ پاکستان کو حکم دیا کہ جمیلہ پر عائد جرمانہ ختم کیا جائے اور انہیں ان کے ملک واپس جانے کی اجازت دی جائے۔

اس رِٹ کی سماعت کے دوران ضیا اعوان نے عدالت کو یہ بھی بتایا کہ متعدد بار مطلع کیے جانے کے باوجود وفاقی تحقیقاتی ادارے، ایف آئی اے نے جمیلہ کو پاکستان لانے اور ان سے جسم فروشی کرانے والے لوگوں کے بارے میں کوئی سنجیدہ قدم نہیں اٹھایا۔

ایف آئی اے نے اس پر یہ موقف اختیار کیا کہ اس نے اس معاملے میں کوئی کارروائی اس لئے نہیں کی کیونکہ اسے اس ضمن میں کوئی شکایت ہی موصول نہیں ہوئی۔

لیکن فیصل ایدھی کی طرف سے ایف آئی کو لکھے گئے خطوط کا حوالہ دیتے ہونے ضیا اعوان نے کہا کہ ان خطوط میں جمیلہ کے ساتھ پاکستان میں پیش آنے والے حالات کی مکمل تفصیل موجود تھی جس کے باوجود &#39;ایف آئی اے صرف اس وقت حرکت میں آئی جب کچھ ماہ پہلے نیوز میڈیا نے جمیلہ کے کیس کی کارروائی پر رپورٹنگ کرنا شروع کی&#39;۔

جمیلہ کے معاملے میں ملوث افراد کے بارے میں تحقیقات کرنے کا کام اب اسلام آباد سے کراچی منتقل کر دیا گیا ہے جہاں متعین ایف آئی اے کے اسسٹنٹ ڈائریکٹر برائے انسداد انسانی اسمگلنگ شعیب خان کا کہنا ہے کہ &#39;اس معاملے سے متعلقہ تمام اداروں کو خطوط لکھ دیے گئے ہیں اور مختلف دستاویزات کی چھان بین جاری ہے&#39;۔ ان کا یہ بھی دعویٰ ہے کہ وہ جلد ہی ان تمام لوگوں کو گرفتار کر لیں گے جو پاکستان میں جمیلہ کی حالتِ زار کے ذمہ دار تھے۔

نوٹ: اس رپورٹ کی تیاری میں کراچی سے رابعہ بگٹی نے معاونت کی۔

یہ رپورٹ لوک سجاگ نے پہلی&nbsp;دفعہ 14 جنوری 2021&nbsp;کو اپنی پرانی ویب سائٹ پر شائع کی تھی۔

آذربائیجانی خاتون کے اغواہ اور تشدد کا معاملہ

text

انیلہ اشرف لگ بھگ ایک سال بے روزگار رہی ہیں۔ انہوں نے ملتان کی بہاءالدین ذکریا یونیورسٹی سے صحافت میں ایم اے کر رکھا ہے اور 2004 سے لے کر مختلف اخبارات اور نشریاتی اداروں میں کام کرتی چلی آئی ہیں جن میں جنگ گروپ اور دنیا گروپ جیسے قومی سطح کے میڈیا ہاؤسز بھی شامل ہیں۔&nbsp;

ابھی حال ہی میں انہیں ایک نوکری ملی ہےجہاں انکی تنخواہ ان کی تعلیم اور تجربے کی مناسبت سے بہت کم ہے۔

انیلہ کے لئے یہ صورتِ حال خاصی حوصلہ شکن ہے۔

ان کی پوری زندگی جدوجہد سے بھری ہوئی ہے۔ ان کا تعلق ایک ایسے گھرانے سے ہے جس کے پاس اتنے معاشی وسائل نہیں کہ وہ کام کاج کئے بغیر اپنی زندگی بسر کر سکیں لیکن ان کی آبائی رہائش گاہ جنوبی پنجاب کی ایک دور دراز اور معاشی اور سماجی طور پر پسماندہ تحصیل تونسہ میں ہے جہاں لڑکیوں کے تعلیم حاصل کرنے اور ملازمت کرنے کی حوصلہ افزائی نہیں کی جاتی۔

لیکن ان ساری رکاوٹوں کو عبور کرنے کے بعد اب انہیں اپنی پیشہ وارانہ زندگی میں فوری طور پر کوئی مثبت تبدیلی آتی دکھائی نہیں دے رہی۔

انیلہ اس بات سے بھی آگاہ ہیں کہ وہ اکیلی اس طرح کے نامساعد حالات کا شکار نہیں بلکہ ان جیسے بہت سے دوسرے صحافی پاکستانی صحافت میں پائے جانے والے ادارتی آزادی کے فقدان اور معاشی استحکام کی عدم موجودگی کی وجہ سے اپنے مستقبل کے بارے میں بے یقینی کا شکار ہیں۔ وہ کہتی ہیں: &#39;پورے ملک میں ہر جگہ ہی گزشتہ دو سالوں میں صحافیوں کو کم و بیش ایک جیسے مسائل کا سامنا کرنا پڑا ہے&#39;۔

تاہم ان کا یہ بھی کہنا ہے کہ خواتین صحافیوں کو در پیش صنفی تفریق کم از کم ایک ایسا مسئلہ ہے جس کا سامنا مرد صحافیوں کو نہیں کرنا پڑتا۔ 
اکثر اوقات صحافی خواتین کے لئے اس تفریق کے خاصے سنگین نتائج نکلتے ہیں کیونکہ انیلہ کے بقول &#39;جب بھی کسی صحافتی ادارے نے اپنے سٹاف میں کمی کرنا ہوتی ہے تو سب سے پہلے خواتین کو اس کا نشانہ بنایا جاتا ہے&#39;۔

صحافتی اداروں میں لگ بھگ روزانہ کی بنیاد پر کی جانے والی سنسر شپ کے بارے میں بھی انیلہ کا خیال ہے کہ اس کا اثر خواتین صحافیوں اور خواتین سے متعلقہ موضوعات پر زیادہ شدت سے دیکھنے میں آتا ہے کیونکہ تقریباً تمام اخبارات اور ٹیلی وژن چینلز کے اندر ادارتی فیصلہ سازی کا اختیار مردوں کے پاس ہے جو، ان کے بقول، عام طور پر خواتین کے مسائل اور ان کے حقوق کی پامالی کو کوئی بڑی خبر نہیں سمجھتے۔

اس ضمن میں وہ اپنی دو خبروں کو ثبوت کے طور پر پیش کرتی ہیں۔ &#39;2018 کے عام انتخابات سے پہلے ملتان سے تعلق رکھنے والے سابق صوبائی وزیر جیل خانہ جات عبد الوحید ارائیں کو ان انتخابات میں حصہ لینے کے لئے نا اہل قرار دے دیا گیا جس کے بعد انہوں نے اپنی بیوی &nbsp;کو اپنی جگہ انتخابی میدان میں اتارا لیکن ان کے تمام اشتہاری مواد پر امیدوار کا نام بیگم عبد الوحید ارائیں لکھا ہوتا تھا جس میں بیگم کا لفظ بہت ہی چھوٹا درج کیا جاتا تھا&#39;۔

اسی طرح کی صورتِ حال ملتان کے نزدیکی ضلعے مظفر گڑھ میں بھی موجود تھی جہاں سابق رکنِ قومی اسمبلی سید باسط سلطان بخاری کی بیوی ان کی جگہ انتخاب میں حصہ لے رہی تھیں حالانکہ اشتہاری مواد میں امیدوار کا پورا نام کہیں موجود نہیں تھا۔

ضیاالحق کی سنسرشپ اور عمران خان کے دور کی سنسرشپ میں ایک بڑا فرق یہ ہے کہ آج سوشل میڈیا موجود ہے جسے مکمل طور پر چپ کرانا کسی ترقی پذیر ریاست کے بس کا روگ نہیں کیونکہ اس کے لئے جو ٹیکنالوجی اور مہارات چاہیے وہ ان ریاستوں کے پاس موجود نہیں ہے: مونا خان

انیلہ کا کہنا ہے کہ یہ بات انہیں دو وجوہات کی بنا پر قابلِ ذکر لگی۔ ایک تو یہ کہ ایک خاتون کی ذاتی شناخت کو بالکل پسِ پردہ ڈال کر اسے محض اپنے شوہر کی کٹھ پتلی کے طور پر کیا پیش جا رہا تھا اور دوسرے یہ کہ ایسا کرنے سے عوام کا اپنے انتخابی امیدوار کو جاننے کا قانونی حق متاثر ہو رہا تھا۔&nbsp;

لیکن جب انہوں نے اس معاملے پر ایک رپورٹ تیار کی تو ان کے ایڈیٹر نے اسے چھاپنے سے انکار کر دیا۔ &#39;میرے ایڈیٹر نے کہا کہ اس رپورٹ سے ہمارے اخبار کو نقصان ہو سکتا ہے&#39;۔

جب انیلہ نے رپورٹ کو چھاپنے پر اصرار کیا تو انہیں کہا گیا کہ &#39;آپ اس کو ڈھکے چھپے الفاظ میں لکھ دیں اور کسی کا نام ظاہر نہ کریں&#39;۔ اس ہدایت پر عمل درآمد کرتے ہوئے انہوں نے اپنی رپورٹ میں کچھ تبدیلیاں بھی کیں لیکن اس کے باوجود اسے کئی روز تک نہ چھاپا گیا۔

&#39;میں نے بالآخر اسے اپنے فیس بک پیج پرلگا دیا جس کے بعد ایڈیٹر نے اسے مجھ سے دوبارہ مانگ لیا اور اس میں ڈھیر سارا رد و بدل کر کے اسے بالآخر اخبار میں چھاپ ہی دیا&#39;۔

اسی طرح 2019 میں انہوں نے ملتان کے ایک علاقے شاہ رکنِ عالم کالونی کے بارے میں خبر دی کہ وہاں پر حکومت کی طرف سے لگائے گئے پانی صاف کرنے کے ایک پلانٹ پر واضح طور پر لکھا گیا ہے کہ یہاں خواتین کا پانی بھرنا شرعی طور پر منع ہے۔ &#39;یہ خبر صرف ایک کالم میں ایک غیر اہم صفحے پر چھاپی گئی&#39;۔ 
کچھ عرصہ بعد انیلہ کو نوکری سے بھی نکال دیا گیا۔

<h2>خوف و ہراس کی فضا</h2>

بینظیر شاہ لاہور میں رپورٹر کے طور پر کام کرتی ہیں۔ ان کی کورونا وائرس کے بارے میں کی گئی رپورٹنگ پر وفاقی حکومت کے کچھ عہدے دار اور حکمران جماعت پاکستان تحریکِ انصاف کے کچھ رہنما اس قدر برہم ہیں کہ انہوں نے ناصرف بینظیر شاہ کی صحافت پر انگلیاں اٹھائی ہیں بلکہ ان میں سے کچھ نے تو ان کی کردار کشی کرنے سے بھی گریز نہیں کیا۔

سجاگ سے بات کرتے ہوئے وہ کہتی ہیں کہ &#39;حکومتی پارٹی سے منسلک سوشل میڈیا اکاؤنٹس اور پارٹی کے عہدیداران نے مجھ پر پاکستان تحریکِ انصاف کے سیاسی مخالفین سے رشوت لینے اور جھوٹی خبریں پھیلانے کے الزامات لگائے ہیں&#39;۔

ان الزامات لگانے والوں میں وزیر اعظم عمران خان کے معاونِ خصوصی برائے سیاسی ابلاغ ڈاکٹر شہباز گل بھی شامل ہیں جنہوں نے بارہا یہ سوال اٹھایا ہے کہ بینظیر شاہ صرف صوبہ پنجاب کے حوالے سے رپورٹ کیوں کرتی ہیں جہاں پاکستان تحریکِ انصاف کی حکومت ہے اور صوبہ سندھ پر رپورٹنگ کیوں نہیں کرتیں جہاں ایک دوسری پارٹی کی حکومت ہے۔ &#39;اس کا جواب بہت سادہ ہے۔ چونکہ میں پنجاب میں مقیم ہوں اس لئے میں پنجاب ہی کے حوالے سے رپورٹنگ کروں گی&#39;۔

حالیہ مہینوں میں کئی اور مشہور صحافی خواتین کو بھی سوشل میڈیا پر اسی طرح کی ذاتیات پر مبنی تنقید اورمغلظات کا سامنا کرنا پڑا ہے۔ جس کا تدارک کرنے کے لئے انہوں نے چند ہفتے پہلے ایک مشترکہ پٹیشن تیار کی اور اسے انسانی حقوق کی تنطیموں اور صحافیوں کے حالاتِ کار کی بہتری کے لئے کام کرنے والے اداروں کو فراہم کرنے کے ساتھ ساتھ سینٹ کی انسانی حقوق کے حوالے سے قائم کمیٹی کے سامنے بھی پیش کیا۔ کمیٹی کے چیئر مین نے بعد ازاں ان کی شکایات بالمشافہ سننے کے لئے انہیں کمیٹی کے اجلاس میں بلا کر انہیں پارلیمان کے ممبران کے سامنےبولنے کا موقع بھی دیا۔

صحافی خواتین کو درپیش اس مسئلے کے بارے میں بارے میں بات کرتے ہوئے بینظیر پاکستانی صحافت کے اندر بڑھتے ہوئے خوف اور گھٹن کا بھی ذکر کرتی ہیں۔ ان کا کہنا ہے: &#39;سنسرشپ تو اس حد تک بڑھ گئی ہے کہ صحافی ٹویٹ کرتے ہوئے بھی ڈرتے ہیں&#39;۔

وہ خود بھی اکثر ٹویٹ کرنے سے پہلے خوف زدہ ہو جاتی ہیں۔ &#39;آپ کو نہیں معلوم کب آپ پر غداری کا مقدمہ بن جائے یا کب ایف آئی اے (وفاقی تحقیقاتی ادارہ) آپ کو کسی الزام میں دھر لے یا پھر پاکستان تحریک انصاف کی سوشل میڈیا ٹیم آپ کو سوشل میڈیا پر نشانہ بنالے&#39;۔

بینظیر پچھلے بارہ سال سے باقاٰعدہ صحافت سے منسلک ہیں لیکن ان کا کہنا ہے کہ انہوں نے پہلے کبھی اس قسم کے حالات نہیں دیکھے۔

عافیہ سلام نے بینظیر سے بھی زیادہ وقت براہِ راست یا بالواسطہ طور پر صحافت کے میدان میں گزارا ہے۔ ان کا بھی خیال ہے کہ 2018 میں موجودہ حکومت کے اقتدار میں آنے کے بعد صحافیوں کے حالاتِ کار میں بہت سی منفی تبدیلیاں آئی ہیں جن میں سنسر شپ میں اضافہ سرِ فہرست ہے۔

لیکن ان کا یہ بھی کہنا ہے کہ موجودہ سنسرشپ کسی اخبار یا ٹیلی وژن چینل کو مجموعی طور پر خبریں دینے سے روکنے کے بجائے اپنا زیادہ زور کچھ ایسے صحافیوں کا منہ بند کرنے پر لگا رہی ہے جو حکومتی اور ریاستی اداروں کو ایک تنقیدی نگاہ سے دیکھتے ہیں۔ &#39;صاف لگ رہا ہے کہ یہ تنقید حکومت کے لئے ناقابلِ برداشت ہے کیونکہ حکومتی اور ریاستی ادارے کسی صورت میں بھی اپنے اقدامات کے لئے کسی کو جواب دہ نہیں ہونا چاہتے&#39;۔

عافیہ کہتی ہیں کہ حکومت کے ناقد صحافیوں کو اس قدر خوف و ہراس کا سامنا کرنا پڑتا ہے کہ ان کے صحافتی اداروں کے مالکان بھی ان کا ساتھ چھوڑ جاتے ہیں۔ &#39;یا تو ان کے ادارے ان کو نکال دیتے ہیں یا کچھ واقعات میں صحافیوں کو جبری طور پر گم کر دیا جاتا ہے&#39;۔

ایسے مغوی صحافی جب کام پر واپس آتے ہیں تو اکثر اوقات &#39;ان کے لب و لہجے میں بھی آپ کو واضع فرق نظر آتا ہے&#39;۔

اس فرق کی وضاحت کرتے ہوئے عافیہ اسے سیلف سنسرشپ کا نام دیتی ہیں۔ وہ کہتی ہیں کہ آج سیلف سنسرشپ کا دور دورہ ہے جو &#39;سنسرشپ کی سب سے خطرناک قسم&#39; ہے اور جس کا مطلب ہوتا ہے &#39;اپنے اوپر خود سے پابندی لگانا، اپنی سوچوں پر قدغن لگانا کہ ہم اگر یہ بات کہیں گے تو اس کا کوئی خطرناک نتیجہ نہ نکلے اس کا ہمیں کوئی خمیازہ نہ بھگتنا پڑے&#39;۔

جب صحافی ہر وقت انہی &nbsp;باتوں کے بارے میں فکرمند ہوتے ہیں تو ان کا &#39;لب و لہجہ، ان کے قلم کی طاقت کمزور پڑ جاتی ہے&#39;۔

صحافی، انسانی حقوق کے کارکن اور ہیومن رائٹس کمیشن آف پاکستان کے سابق سیکرٹری جنرل &nbsp;آئی اے رحمٰن کا بھی کہنا ہے کہ جبری گم شدگی سے واپس آنے والے صحافیوں کے بات کرنے اور رپورٹ کرنے کے طریقے تک میں تبدیلی آجاتی ہے۔ &#39;ان میں سے کچھ نے تو یہ تک کہا ہے کہ انہیں کسی نے اغوا نہیں کیا بلکہ وہ تو کھیلنے کودنے کے لئے ادھر ادھر چلے گئے تھے&#39;۔

آئی اے رحمٰن کے مطابق آج کل سنسر شپ میں نئے نئے رجحانات &nbsp;دیکھے جا رہے ہیں۔ &#39;خبروں کے چھپنے یا نشر ہونے سے پہلے کی جانے والی سنسر شپ کے زمانے سے گذر کر اب ہم اس دور میں آگئے ہیں جہاں براہِ راست نشریات کے دوران آوازیں بند کر دی جاتی ہیں یا انٹرویو اور خبر کو آخری وقت پر روک کر نشر ہی نہیں ہونے دیا جاتا&#39;۔

وہ سمجھتے ہیں کہ حکومت اور ریاست کو سنسرشپ کے نئے نئے طریقے اختیار کرنے کی ضرورت اس لئے پیش آتی ہے کہ آئین میں دی ہوئی متعدد پابندیوں کے باوجود یہ بات کہیں واضح نہیں کی گئی کہ کیا چیز سنسر ہونی چاہیے اور کیا نہیں۔ &#39;میں تو کہتا ہوں کہ آپ نے جو کچھ بھی سنسر کرنا ہے اس کا ایک قانون بنائیں تاکہ ہمیں بطور صحافی معلوم ہو کہ ہم نے کیا کیا نہیں کہنا&#39;۔

<h2>حال بمقابلہ ماضی</h2>

فریڈم نیٹ ورک صحافیوں کے حالاتِ کار پر کام کرنے والی ایک غیر سرکاری تنظیم ہے اس کی ایک حالیہ رپورٹ کے مطابق یکم مئی 2017 سے یکم اگست 2018 تک &nbsp;کم از کم 157 ایسے واقعات ہوئے جنہیں آزادئِ صحافت پر حملہ قرار دیا جا سکتا ہے۔ ان میں سے 35 فیصد واقعات صرف اسلام آباد میں پیش آئے جس کا مطلب واضح ہے کہ اقتدار کے مرکز میں متعین لوگوں میں تنقید برداشت کرنے کی صلاحیت کم سے کم ہوتی جا رہی ہے۔

آزادئِ صحافت پر ان حملوں میں سے 137 کا نشانہ ٹیلی وژن سے منسلک صحافی بنے ہیں جبکہ 39 فیصد واقعات میں متاثرہ صحافی یا اس کے خاندان نے ریاست اور اس کے خفیہ اداروں کے ملوث ہونے کا خدشہ ظاہر کیا ہے۔

اسی طرح مختلف ملکی اور بین الاقوامی اداروں کی طرف سے جاری کی گئی رپورٹوں کے مطابق پاکستان میں گزشتہ دو سالوں میں ہزاروں صحافیوں کو نوکریوں سے ہاتھ دھونا پڑے ہیں۔ لگ بھگ اتنے ہی صحافیوں کی تنخواہوں میں بھاری کٹوتیاں کی گئی ہیں جبکہ کئی صحافتی ادراوں میں کام کرنے والے لوگوں کو کئی مہیںوں سے تنخواہیں ہی نہیں دی گئیں۔ &nbsp;

لیکن اگر موجودہ دور کا موازنہ پاکستان مسلم لیگ نواز کے 2013 سے لے کر 2018 تک جاری رہنے والے دورِ حکومت سے کیا جائے تو صحافیوں کے حالاتِ کار تب بھی زیادہ سازگار نہیں تھے (اگرچہ ان کی ملازمتوں میں نسبتاً استحکام تھا اور انہیں تنخواہیں کافی باقاعدگی سے مل رہی تھیں)۔

محض 2014 میں 14 صحافیوں کو قتل کیا گیا جبکہ 2013 سے لے کر اب تک 37 صحافی مختلف مجرمانہ حملوں میں ہلاک ہو چکے ہیں۔ ان میں سے محض 34 کیسوں کی پولیس رپورٹ درج ہوئی ہے جب کہ کسی ایک مقدمے میں بھی مجرموں کو سزا نہیں ملی۔

آئی اے رحمٰن کے مطابق گزشتہ کچھ عرصے میں یہ بہتری ضرور آئی ہے کہ سوشل میڈیا پر آوازیں بلند ہونے کے باعث جبری طور پر گم کیے گئے صحافیوں کو جلدی چھوڑ دیا جاتا ہے۔ وہ کہتے ہیں: &#39;(اسلام آباد کے فری لانس صحافی) مطیع اللہ جان کا کیس ہو یا (کراچی میں جیو نیوز کے رپورٹر) علی عمران کا، لوگوں کے آواز بلند کرنے پر ان کے اغوا کاروں کو انہیں چھوڑنا پڑا&#39;۔

مونا خان آئی بی اے کراچی کے سنٹر فار ایکسیلنس اِن جرنلزم میں پڑھاتی ہیں۔ وہ بھی سنسر شپ کے خلاف صحافیوں کی جدوجہد میں سوشل میڈیا کے کردار کو اہم سمجھتی ہیں- ان کے مطابق جنرل ضیاالحق کے دور کی سنسرشپ اور عمران خان کے دور کی سنسرشپ میں ایک بڑا فرق یہی ہے کہ آج سوشل میڈیا موجود ہے جسے مکمل طور پر چپ کرانا کسی ترقی پذیر ریاست کے بس کا روگ نہیں کیونکہ اس کے لئے جو ٹیکنالوجی اور مہارات چاہیے وہ ان ریاستوں کے پاس موجود نہیں۔

لیکن وہ کہتی ہیں کہ نوجوان صحافیوں کو جہاں سنسرشپ کے خلاف لڑنے کے نئے طریقوں سے واقف ہونا چاہئے وہیں انہیں اس لڑائی کے گر بڑے صحافیوں سے بھی سیکھنا چاہئیں۔

&#39;ایک زمانہ تھا کہ لوگ اپنے اخباروں میں سنسرشپ کے خلاف احتجاج کے طور پر خبر کی جگہ خالی چھوڑ دیا کرتے تھے۔ کبھی اس ملک میں ایسا ماحول بھی موجود تھا جس میں ہیرلڈ میگزین کا پورا سٹاف سنسرشپ کے خلاف احتجاج کے طور پر دفتر سے نکل کھڑا ہوا۔ ان لوگوں نے بعد میں اپنا رسالہ نیوز لائن نکالا۔ لیکن آج صحافت کے بہت سے طالب علم سمجھتے ہیں کہ جو کچھ سنسر کیا جا رہا ہے وہ صحیح ہی کیا جا رہا ہے&#39;۔

مثال کے طور پر بہت سے نوجوان لوگ یہ سمجھتے ہیں ہیں کہ پشتون تحفظ موومنٹ جیسی تنظیمیں ریاست مخالف ہیں لہٰذا نیوز میڈیا کو ان کی کوریج نہیں کرنی چاہیئے۔ &#39;آج پرانے صحافیوں کو ان نوجوانوں سے بات کرنی چاہیے اور انہیں یہ سمجھانا چاہیے کہ کس طرح سے سنسرشپ کے ذریعے صحافت کو کچلا جا رہا ہے&#39;۔

یہ رپورٹ لوک سجاگ نے پہلی دفعہ 3 نومبر 2020&nbsp; کو اپنی پرانی ویب سائٹ پر شائع کی تھی۔

لائبہ زینب

لائبہ زینب گزشتہ 7 سال سے صحافت سے وابستہ ہیں اور فی الوقت جسٹس پراجیکٹ پاکستان کے ساتھ بطور کمیونیکیشن آفیسر کام کر رہی ہیں۔

آذربائیجانی خاتون کے اغواہ اور تشدد کا معاملہ

'یہ خبر شائع نہیں ہو گی': پاکستان میں میڈیا کو بدترین سنسرشپ کے ذریعے کچلا جا رہا ہے