خیبر پختونخوا کے کئی اضلاع میں نئی انتخابی حلقہ بندیوں پر جہاں سیاسی جماعتیں تحفظات کا اظہار کر رہی ہیں، وہیں جنوبی وزیرستان میں قومی اسمبلی کے دو حلقوں کو ضم کرنے پر سابق ارکان پارلیمنٹ شدید تنقید کر رہے ہیں۔

جنوبی وزیرستان دو اضلاع پر مشتمل ہے۔ 2017ء کی مردم شماری کے مطابق دونوں اضلاع کی مجموعی آبادی چھ لاکھ 75 ہزار تھی۔

پرانی حلقہ بندی میں جنوبی وزیرستان میں&nbsp; قومی اسمبلی کے دو حلقے بنائے گئے تھے جن میں سے ایک حلقہ این اے 49 (ضلع جنوبی وزیرستان اپر) محسود علاقے پر مشتمل تھا جبکہ دوسرا حلقہ این اے 50 (جنوبی وزیرستان لوئر) وزیر سلیمان خیل اور دوتانی قبائل کے علاقوں پر مشتمل تھا۔

2023ء کی مردم شماری کے مطابق جنوبی وزیرستان (اپر اور لوئر)کی کل آبادی آٹھ لاکھ 88 ہزار 675 افراد تک پہنچ چکی ہے۔

&nbsp;نئی حلقہ بندی میں دونوں اضلاع کے حلقوں (این اے 49 اور این اے 50) کو ملا کر ایک ہی حلقہ این اے 42 بنا دیا گیا ہے۔

جب جنوبی وزیرستان ایک ضلع تھا اس وقت بھی اس ضلعے کی دو صوبائی نشستیں تھیں۔ ان میں پی کے 113 محسود ایریا پر مشتمل تھا جو نئی حلقہ بندی میں پی کے 109 جنوبی وزیرستان اپر ہو گیا ہے۔

دوسرا حلقہ پی کے 114 وزیر اور دوتانی علاقے پر مشتمل تھا۔ یہ حلقہ اب پی کے 110 جنوبی وزیرستان لوئر ہو گیا ہے۔

جنوبی وزیرستان لوئر سے سابق رکن قومی اسمبلی علی وزیر کہتے ہیں کہ جنوبی وزیرستان کی آبادی دراصل ٹانک، ڈیرہ اسماعیل خان اور ملحقہ علاقوں سے زیادہ ہے مگر لوگ نقل مکانی کر کے دوسرے علاقوں میں آباد ہو گئے ہیں۔ وہ بدامنی اور معاشی مواقع کی کمی کے باعث اپنے آبائی علاقوں میں واپس آنے سے کترا رہے ہیں۔

&quot;دہائیوں سے جنگ زدہ جنوبی وزیرستان کو خصوصی رعایتیں ملنی چاہئیں تھیں۔ اس کی بجائے ہماری نمائندگی کم کر دی گئی ہے اور دو حلقوں کا ایک ہی حلقہ بنا کر ہماری ترقی کی راہیں محدود کر دی گئی ہیں۔&quot;

علی وزیر کہتے کہ دو اضلاع پر مشتمل جنوبی وزیرستان کے حلقے میں الیکشن لڑنا بالکل ایسے ہوگا جیسے کوئی ایک وقت میں پانچ حلقوں سے لڑ رہا ہو کیونکہ یہ حلقہ ضلع ٹانک سے شروع ہو کر ایک طرف بلوچستان بارڈر پر ختم ہوتا ہے اور دوسری طرف افغان سرحد سے شروع ہو کر شمالی وزیرستان اور بنوں سے جا ملتا ہے۔

وہ سوال کرتے ہیں کیا امیدوار کا اس قدر وسیع علاقے میں لوگوں کے پاس پہنچنا ممکن ہو گا؟

جنوبی وزیرستان سے تحریک انصاف کے سینیٹر دوست محمد محسود کا کہنا ہے&nbsp; کہ قبائل، انضمام سے پہلے حاصل مراعات سے بھی محروم ہو چکے ہیں۔ ایسے میں جنوبی وزیرستان کے لوگوں سے قومی اسمبلی کی سیٹ چھن جانے کو کیسے تسلیم کریں گے؟

&quot;جنوبی وزیرستان کی نئی حلقہ بندی سے محسود اور وزیر قبائل میں تنازعات برقرار رکھنے کا بندوبست کر دیا گیا ہے&quot;۔

انہیں خدشہ ہے کہ قومی اسمبلی کی نشست ایک ہونے سے دونوں جگہوں میں لوگ چھوٹی چھوٹی چیزوں کو قبائلی معاملات کے ساتھ جوڑیں گے۔

جمعیت علمائے اسلام کے رہنما اور سابق رکن اسمبلی مولانا جمال الدین بتاتے ہیں کہ ان کی جماعت ابتدا ہی سے فاٹا انضمام کے حق میں نہیں تھی۔ اسی وجہ سے چھ قومی نشستیں کم ہو گئی ہیں اور سینیٹ کی آٹھ نشستیں بھی ختم ہو چکی ہیں۔ آئندہ فاٹا سے شاید کوئی بھی سینیٹر نہیں بن پائے گا۔

انہیں خدشہ ہے کہ اب یہاں سے وزیر امیدوار جیتے، محسود یا دوتانی، ان کے لیے مزید مشکلات پیدا ہوں گی کیونکہ قبائل میں پہلے ہی اختلافات موجود ہیں۔

&quot;اگر ترقیاتی فنڈز ایک علاقے کو ملیں گے تو باقی اپنے نمائندے کو شک کی نظر سے دیکھیں گے اور اس بات کو قبائلیت کا رنگ دیا جائے گا&quot;۔

الیکشن کمیشن کے ضلعی افسر محمد بلال بتاتے ہیں کہ جنوبی وزیرستان محل وقوع کے لحاظ سے پاکستان میں شاید سب سے پیچیدہ علاقہ ہے۔ پرانی حلقہ بندی میں تیارزہ کے محسودوں کو جنوبی وزیرستان لوئر میں شامل کیا گیا تھا لیکن نئی مردم شماری کے بعد تیارزہ کو واپس محسود حلقے میں شامل کر دیا گیا ہے۔

چیئرمین نیشنل ڈیموکریٹک موومنٹ اور سابق ممبر قومی اسمبلی شمالی وزیرستان محسن داوڑ بتاتے ہیں کہ انہوں نے ضم شدہ علاقوں میں صوبائی الیکشن سے پہلے ہی قومی اسمبلی میں بل جمع کرایا تھا جس میں ضم شدہ اضلاع کے لیے صوبائی اسمبلی کی 24 جنرل نشستیں اور قومی اسمبلی کی 12 سیٹیں رکھی گئی تھیں جبکہ صوبائی اسمبلی کی سات مخصوص نشستیں ان کے علاوہ تھیں۔

وہ کہتے ہیں کہ ایوان زیریں نے بھاری اکثریت سے اس بل کی منظوری دے دی تھی لیکن اسٹیبلشمنٹ کو یہ بات پسند نہیں آئی۔ اس دوران خڑ کمر کا واقعہ ہوا جس میں علی وزیر اور وہ گرفتار ہو گئے، پھر انہیں رہائی تب ملی جب صوبائی الیکشن ہو چکے تھے۔ اب جنوبی وزیرستان کے دو اضلاع کا ایک حلقہ بنانا عوام کے ساتھ بہت بڑی زیادتی ہے۔

ضلع بہاولپور: چار قومی اور آٹھ صوبائی انتخابی حلقوں میں تبدیلیاں، فائدہ کس کو ہو گا؟

"جنوبی وزیرستان کی نئی حلقہ بندی سے محسود اور وزیر قبائل میں تنازعات برقرار رکھنے کا بندوبست کر دیا گیا ہے"

text

پاکستان میں کم لوگ ہی جانتے ہیں کہ &#39;بری خبروں&#39; کی وجہ سے تذکروں میں رہنے والا وزیرستان کا خطہ خیبر پختونخوا کے زرخیز ترین علاقوں میں شمار ہوتا ہے۔ سالانہ اربوں روپے کے چلغوزے پیدا کرنے والا یہ علاقہ شمالی اور جنوبی وزیرستان میں منقسم ہے۔ جنوبی وزیرستان قبائلی علاقوں کے کل رقبے کا چالیس فیصد ہے اور یہاں نئی انتظامی تقسیم کے تحت اسے دو اضلاع میں تقسیم کر دیا گیا ہے جس میں محسود قبائل کا علاقہ اپر جنوبی وزیرستان جبکہ وزیر قبائل کا علاقہ لوئر جنوبی وزیرستان کہلاتا ہے۔

اس خطے میں لوئر وزیرستان کے علاقے وانا کے لوگوں کی بڑی تعداد زرعی سرگرمیوں اور سبزیوں، پھلوں کی کاشت سے منسلک ہے اور مقامی طور پر کہا جاتا ہے کہ وزیرستان میں زرعی انقلاب انہی کی بدولت آیا ہے۔ وانا اور ملحقہ علاقوں کی پیداوار پاکستان بھر کی سبزیوں اور پھلوں کی منڈیوں تک پہنچتی ہے۔

خیبرپختونخوا حکومت کے مطابق قبائلی اضلاع سے مارکیٹ میں پہنچنے والے 73 فیصد پھل جنوبی وزیرستان سے آتے ہیں۔ حالیہ انتظامی تقسیم کے تناظر میں دیکھا جائے تو&nbsp; اس میں سے 71 فیصد پھل وانا سے مارکیٹ میں پہنچ رہا ہے۔

پھلوں کے کاروبار سے وابستہ رفیق الدین وزیر کہتے ہیں کہ وانا کی مٹی قدرت کا تحفہ ہے یہاں دوسرے علاقوں کی نسبت پودے کی نشوونما بیس سے پچیس فیصد تیزی سے ہوتی ہے لیکن گزشتہ چند برس سے وانا میں زیر زمین پانی کی سطح خطرناک حد تک کم ہو رہی ہے جس کی وجہ سے یہاں کی زراعت متاثر ہونے کا خدشہ ہے۔

وانا سے تعلق رکھنے والے انجینئر سیف الرحمن وزیر کے مطابق پانی کی سطح ہر سال 30 سے 40 فٹ نیچے جارہی ہے جو آنے والے وقتوں کیلئے تباہی کا پیغام ہے۔

ان کا کہنا ہے کہ وانا میں 10 سے 20 ہزار کے درمیان سولر ٹیوب ویل چل رہے ہیں جو کہ پانی کی تیزی سے کم ہوتی سطح کے پیش نظر نہایت خطرناک بات ہے۔

بجلی کی عدم دستیابی کے باوجود ٹیوب ویلوں کی اتنی بڑی تعداد کے بارے میں سیف الرحمٰن وزیر کا کہنا ہے کہ وانا کی ساڑھے چار لاکھ کی آبادی میں تین لاکھ سے زیادہ افراد نے باغات لگا رکھے ہیں، ان میں سے اکثر لوگ ایسے ہیں جن کے کئی کئی باغات ہیں، یہ سارے باغات ٹیوب ویل کے پانی پر انحصار کرتے ہیں جنہیں سولر انرجی سے چلایا جاتا ہے۔

&quot;سولر انرجی کے باعث بجلی کے بلوں کا خرچہ تو ہے نہیں، سارا دن موٹریں چلتی ہیں، اس طرح زمین سے بے دریغ نکالے جانے والے پانی کی مقدار ضرورت سے بھی زیادہ ہوتی ہے اور اس کا بڑا حصہ ضائع ہو جاتا ہے۔&quot;

سیف الرحمٰن کے مطابق اس وقت وانا یا مجموعی طور پر ضلع لوئر جنوبی وزیرستان میں ہنگامی بنیادوں پر چھوٹے ڈیم بنانے کی ضرورت ہے، بصورت دیگر آنے والے سالوں میں پانی کی ایسی قلت پیدا ہو گی کہ لوگوں کو علاقہ چھوڑنا پڑ سکتا ہے۔

وانا میں پانی کی سطح میں کمی کے بارے میں آگاہی پھیلانے اور اس مسئلے پر قابو پانے کے لیے کئی سال سے متحرک سماجی تنظیم وانا ویلفیئر ایسوسی ایشن کے کرتا دھرتا اس بارے میں لوگوں کو خبردار کرتی آئی ہے۔ سابق وزیر اعلیٰ خیبر پختونخوا محمود خان تنظیم کی درخواست پر اس مسئلے کے جائزے کیلئے پچاس کروڑ روپے کی منظوری دی جو کہ سالانہ ترقیاتی پروگرام (اے ڈی پی) کا حصۃ تھی۔ لیکن تحریک انصاف کی صوبائی حکومت اس اجتماعی مسئلے کے جامع حل پر قائم نہ رہ سکی اور ہر گزرتے دن کے ساتھ فیزیبلٹی رپورٹ کے مطابق حل کے بجائے کئی چھوٹے منصوبوں میں بٹ گئی۔

سینئر صحافی دلاور خان وزیر وانا میں پانی کے مسئلے کی نشاندہی اور حل کی کوششوں میں کافی عرصے سے سرگرم ہیں۔ ان کا کہنا ہے کہ پانی کی سطح میں کمی سے وانا کی خوبصورتی اور ذرخیزی بھی خطرے میں پڑ گئی ہے۔ ان کا کہنا ہے کہ وانا میں چھوٹے ڈیم بنانے کی ضرورت ہے۔ آئندہ چند روز میں ایک تکنیکی ٹیم وانا کا دورہ کر رہی ہے جو ایسے ڈیم بنانے کے لیے موزوں جگہوں کا جائزہ لے گی۔

صورتحال کی سنگینی کے پیش نظر گزشتہ دنوں وانا میں احمد زئی وزیر&nbsp; قبیلے کے نو بڑے ذیلی قبائل پر مشتمل جرگے کا انعقاد کیا گیا جس میں اہم علاقائی مشران نے شرکت کی۔

اس جرگے میں شامل تمام قبائل کے نمائندے اس مسئلے کے حل کیلئے پرعزم تھےجنہوں نے مشترکہ اعلان میں کہا کہ سمال ڈیم بننے کی صورت میں قبائلی علاقوں میں مروجہ معاوضہ (قومی کمیشن) بھی نہیں لیا جائے گا جس کا مطلب یہ ہے کہ علاقے کے لوگ اس خطرناک مسئلے کے حل کیلئے باہم متفق ہیں۔

وانا ویلفیئر ایسوسی ایشن کے جنرل سیکرٹری جلال وزیر نے اس بارے میں بتایا کہ پانی کا مسئلہ ان کے علاقے کے مستقبل کیلئے اہم ہے اور تکنیکی سروے کے مطابق زیرزمین آبی سطح میں کمی سے ٹیوب ویلز کا پانی بھی خشک ہوتا جا رہا ہے۔ علاقے کے لوگوں، مشران اور نوجوانوں کی کوشش ہے کہ اس مسئلے کو قومی اتفاقِ رائے سے حل کیا جائے اور اس مقصد کا حصول ان کے لئے بڑی کامیابی ہو گی۔

راجن پور میں زیرزمین پانی میں کیمیائی مادوں کی مقدار خطرناک حد سے تجاوز کر گئی، شہریوں کی صحت اور زندگی کو خطرہ

جنوبی وزیرستان میں ماحول کی خوبصورتی اور ارضی زرخیزی ماند پڑنے کا خطرہ

خیبر پختونخوا کے ضم شدہ قبائلی اضلاع میں چالیس فیصد علاقے پر مشتمل ضلع جنوبی وزیرستان کو بہتر انتظام کے مقصد سے دو اضلاع میں تقسیم&nbsp; کیے جانے کو ایک سال مکمل ہونے والا ہے۔ تاہم مقامی سیاسی قیادت کی جانب سے علاقے میں ضلعی دفاتر بنانے کے پرزور مطالبے کےباوجود سردست اس سمت میں کوئی قدم نہیں اٹھایا گیا جس سے لوگوں کو کئی طرح کی مشکلات کا سامنا ہے۔

&nbsp;پچھلے سال اکتوبر میں محسود آبادی پر مشتمل ان علاقوں کو ملا کر ضلع جنوبی وزیرستان اپر اور احمد زئی وزیر قبائل کی اکثریتی آبادی پر مشتمل علاقوں کو جنوبی وزیرستان لوئر کا نام دیا گیا۔

اس فیصلے سے ممکنہ طور پر وانا سب ڈویژن اور اس کی چار تحصیلوں وانا، شکئی، تولخیلہ اور برمل پر مشتمل ضلع جنوبی وزیرستان لوئر کو ہی فائدہ ہو گا۔

اس کی وجہ یہ ہے کہ وانا پہلے بھی ضلعی ہیڈکوارٹر تھا اور اس لئے وہاں ضلعی سطح کا انتظامی ڈھانچہ کسی حد تک موجود تھا کیونکہ جنوبی وزیرستان کے ضلعی انتظامیہ کے دفاتر بیک وقت وانا اور ملحقہ ضلع ٹانک دونوں میں موجود تھےاور ڈپٹی کمشنر کے اوقات کار دونوں دفاتر میں منقسم تھے۔ لیکن محسود علاقوں میں پہلے بھی ضلعی انتظامیہ کا کوئی خاص عمل دخل نہیں تھا اور ضلع جنوبی وزیرستان اپر (جو تیارزہ، سرویکئی، شوال، لدھا، مکین، شکتوئی اور سراروغہ کے علاقوں پر مشتمل ہے) کے الگ ضلع کا درجہ حاصل کرنے کے بعد بھی اس میں ںہ تو کوئی بہتری آئی ہے اور نہ یہاں کسی طرح کی انتظامی مشینری کا کوئی وجود ہے۔

جنوبی وزیرستان لوئر کے ہیڈ کوارٹر وانا میں چونکہ پہلے سے کافی حد تک سرکاری انفراسٹرکچر موجود تھا، اس لئے نئے ضلع کی تشکیل کے بعد اب ڈپٹی کمشنر وانا میں ہی کام کررہا ہے اور دیگر دفاتر بھی شروع ہو چکے ہیں۔

اس سے برعکس جنوبی وزیرستان اپر میں ہیڈکوارٹر کے مقام کے تعین پر مسائل طوالت اختیار کر گئے، جس پر مقامی شخصیات ان خدشات کا اظہار کرتی رہیں ہیں کہ شاید حکومت محسود علاقے کی ترقی کے لیے مخلص نہیں ہے۔

اب صورتحال یہ ہے کہ جنوبی وزیرستان اپر کے ڈپٹی کمشنر محسود آبادی کے علاقے سے سو کلومیٹر دور ٹانک میں بیٹھتے ہیں۔ اسی طرح عدالتیں بھی ضلع ٹانک میں قائم کی گئیں، ٹی ایم اے آفس، ایجوکیشن آفس یہاں تک کہ ڈسٹرکٹ ہیلتھ آفیسر کا دفتر بھی ضلع ٹانک میں قائم کیا گیا ہے۔

محسود علاقوں میں تعلیمی ادارے نہ ہونے کے برابر ہیں جبکہ صحت کے حوالے سے بھی حالات نہایت خراب ہیں کیونکہ تقریباً اسی فیصد کے قریب آبادی کو ایک عام میڈیکل پریکٹیشنر تک بھی رسائی نہیں ہے۔

سمل بوبڑ سے ضلع ٹانک میں ڈسٹرکٹ ہیلتھ آفیسر اپر کے دفتر میں آئے ہوئے امجد محسود نے مایوسی کا اظہار کرتے ہوئے کہا کہ اپنے گاؤں سمل بوبڑ سے ضلع ٹانک آنے کیلئے انہیں کئی گھنٹے پیدل سفر کرنا پڑتا ہے اور اس کے بعد تین سے چار گھنٹے گاڑی میں لگتے ہیں۔

&quot;ہمارے پاس زندگی کی بنیادی سہولیات موجود نہیں ہیں۔ غریب لوگوں کے پاس سرکاری علاج کرانے کی ہی استطاعت ہوتی ہے اور مجھ سمیت بہت سے لوگوں کو بہت دور سے یہاں آنا پڑتا ہے۔ اب ہم کسی نہ کسی طرح یہاں پہنچ ہی گئے ہیں تو ڈسٹرکٹ ہیلتھ آفیسر موجود نہیں ہیں۔&quot;

امجد محسود کا کہنا تھا کہ کسی بھی محکمے سے سوال کریں تو یہی جواب ملتا ہے کہ وہاں سیکیورٹی کا مسئلہ درپیش ہے، لیکن ہم اچھی طرح جانتے ہیں کہ محکمۂ صحت کو سیکیورٹی کا کوئی مسئلہ نہیں، اس کے باوجود ڈی ایچ او آفس یہاں دوسرے ضلع میں قائم کیا گیا ہے۔

زنگاڑا سے ٹانک آنے والے سید عالم محسود بھی یہی کہتے ہیں کہ اتنے بڑے علاقے میں صحت کا کوئی چھوٹا سا مرکز بھی کام نہیں کر رہا اور اگر سرکاری کاغذات میں کوئی موجود بھی ہے تو نہ انہیں اس بارے میں کوئی علم ہے نہ ہی علاقے کے دوسرے لوگ جانتے ہیں۔ ان کا کہنا ہے کہ یوں لگتا ہے جیسے ان لوگوں کی تکالیف کا کسی کو احساس نہیں۔

شوال سے تعلق رکھنے والے غلام خان یاد کرتے ہیں کہ دو سال قبل ان کے گاؤں تور الگاڈ شوال میں دو بچے بارودی سرنگوں کی زد میں آ کر جاں بحق ہو گئے جنہیں اگر فرسٹ ایڈ مل جاتی تو انہیں بچایا جا سکتا تھا۔

&quot;راستے میں لاتے ہوئے ان بچوں کے زخموں سے اتنا خون بہا کہ وہ جانبر نہ ہوسکے، ہم تو وزیرستان کے انتہائی دور دراز علاقوں کے لوگ ہیں یہاں تو مکین جیسے بڑے علاقے اور شہر میں بھی صحت کے سرکاری مراکز پوری طرح فعال نہیں ہیں۔&quot;

بدر کے علاقے سے آئے سوال الدین نے بتایا کہ ان کے علاقے میں ایک ہی ڈسپنسری ہے، جو تب ہی کھولی جاتی ہے جب فوٹو سیشن ہونا ہو۔

&quot;ہم گھنٹوں پیدل سفر کرکے اور گاڑیوں میں دھکے کھا کر یا تو وانا میں علاج کرانے چلے جاتے ہیں یا پھر ضلع ٹانک آجاتے ہیں۔&quot;

اسسٹنٹ کمشنر سرویکئی عمر خطاب نے بتایا کہ سب ڈویژن سرویکئی میں دفاتر قائم کر دیے گئے ہیں جو سازوسامان کی کمی کے باعث تاحال مکمل طور پر فعال نہیں ہوئے، لیکن یہ کام جلد مکمل کرلیا جائے گا اور محسود قبیلے کے بنیادی مطالبے کے حل کی جانب اہم پیش رفت ہو گی جبکہ اگلے مرحلے میں لدھا سب ڈویژن کیلئے بھی یہی طریقہ کار اختیار کیا جائے گا۔

ڈی ایچ او آفس کے جنوبی وزیرستان میں قیام کے حوالے سے انہوں نے کہا کہ اس وقت علاقے میں ہیڈکوارٹر کے مقام کے تعین پر بھی اتفاق رائے موجود نہیں، جب تک باہمی مشاورت سے اتفاق رائے نہیں ہوتا اس حوالے سے کوئی بھی فیصلہ منفی نتائج کا حامل ہوسکتا ہے۔

ملک سعید انور محسود الزام عائد کرتے ہیں کہ بنیادی مسئلہ حکومتی سطح پر نیک نیتی کے فقدان کا ہے، اگر ایسا نہ ہوتا تو محسود علاقے میں اب تک ہیڈکوارٹر بن بھی چکا ہوتا۔ عوامی مشکلات کے ازالے کیلئے ڈی ایچ او آفس کے ساتھ تمام محکموں کے دفاتر جلد از جلد س علاقے میں منتقل کرنے کی ضرورت ہے، لیکن اس اہم مسئلے&nbsp; پر سرکاری سطح پر کوئی دلچسپی نظر نہیں آرہی جو قابلِ افسوس ہے۔

شہریار محسود

شہریار محسود 2006/007 سے بد امنی سے متاثرہ ضلع جنوبی وزیرستان سے صحافت کر رہے ہیں اور مقامی اخبارات کے ساتھ ساتھ ڈیجیٹل پلیٹ فارمز پر لکھتے آرہے ہیں۔

"جنوبی وزیرستان کی نئی حلقہ بندی سے محسود اور وزیر قبائل میں تنازعات برقرار رکھنے کا بندوبست کر دیا گیا ہے"

جنوبی وزیرستان میں ماحول کی خوبصورتی اور ارضی زرخیزی ماند پڑنے کا خطرہ

نہ صحت کے مراکز نہ سرکاری دفاتر، جنوبی وزیرستان میں محسود آبادی علیحدہ ضلع کے ثمرات سے محروم