انیس سالہ زرینہ بی بی سول ہسپتال کوئٹہ کے نرسنگ کالج میں زیر تعلیم ہیں۔ وہ 600 کلو میٹردور ایرانی سرحد پر واقع ضلع پنجگورکی رہائشی ہیں۔ ان کے والد وہیں تحصیل پروم میں کجھور کے باغ میں کام کرتے ہیں جس سے وہ 20 ہزار روپے ماہانہ کماتے ہیں۔

زرینہ بتاتی ہیں کہ ان کا گاؤں پنجگور شہر سے 95 کلو میٹر آگے ہے۔ دو سال قبل ان کی کزن کو ڈائریا ہو گیا تھا۔ وہ انہیں مقامی سرکاری ہسپتال لے گئیں۔ مریضہ پیٹ کے درد سے تڑپ رہی تھیں لیکن انجیکشن لگانے کے لیے ڈسپنسر تک دستیاب نہیں تھا۔

&quot; مجبوراً ہم کزن کو اتائی کے پاس لے گئے۔وہاں میرے چچا اور بھائی نے مرد سے انجکشن یا ڈرپ لگوانے سے انکار کر دیا مگر بیٹی کی جان پچانے کے لیے آخرکار مان گئے۔ یہی وہ وقت تھا جب میں نے نرسنگ کرنے کا فیصلہ کیا۔ &quot;

کلثوم اقبال ڈائریکٹر نرسنگ کوئٹہ تعینات ہیں، قائم مقام ڈی جی نرسنگ بلوچستان کا اضافی چارج بھی انہی کے پاس ہے۔ وہ بتاتی ہیں کہ صوبے میں اس وقت لگ بھگ ساڑھے 14 سو نرسز کام کرہی ہیں۔ان میں سے 315 صوبائی دارالحکومت کے تین بڑے سرکاری ہسپتالوں میں تعینات ہیں۔

ڈی جی ہیلتھ سروسز بلوچستان نور قاضی ان اعدادو شمار کی تصدیق کرتے ہوئے بتاتے ہیں کہ ان میں بیشتر کا تعلق پنجاب سے ہے۔ صوبے کو سات ہزار نرسوں کی ضرورت ہے۔

<h2>نرسوں کی تعداد کم کیوں ہے؟</h2>

یورپ میں نرسنگ کا باضابطہ آغاز انیسویں صدی کی چھٹی دہائی میں ہی ہو گیا تھا۔ تاہم برصغیر میں نرسنگ کی تاریخ &#39;عجیب و غریب&#39;ہے۔ یورپین چرچ نے مسیحیت کے فروغ کے لیے مشننریز کے ساتھ &#39;سسٹرز&#39;کو بھیجنا شروع کیا۔ تو یہاں نرسنگ کی تربیت کے تمام ادارے چرچ سے منسلک کر دیے تھے۔

لاہور میں پہلا نرسنگ سکول اگرچہ میئو ہسپتال میں 1884ء میں بنایا گیا تھا لیکن اس کے نصاب کی 1907ء میں منظوری دی گئی تھی۔ تب تک مقامی مسیحی خواتین کے ساتھ کچھ ہندو اور مسلم لڑکیوں کو بھی نرسنگ کی تربیت میں شامل کیا جانے لگا تھا۔

&#39;نرسنگ ہسٹری آف انڈو پاک&#39; کے مطابق&quot; ہندو اور مسلمان خواتین کو جہاں نرسنگ کا پیشہ اپنانے میں تحفظات تھے وہیں یورپی رویہ بھی حوصلہ افزا نہیں تھا۔ صورت حال یہ تھی کہ 1934ء تک میئو ہسپتال میں کسی مقامی لڑکی کو باضابطہ &#39;بطور نرس&#39; تعینات نہیں کیا گیا تھا۔&#39;میٹرن&#39; اور &#39;نرسنگ سپرنٹنڈنٹ&#39; یورپ سے آتی تھیں۔

پاکستان میں پہلا باضابطہ نرسنگ سکول سر گنگا رام پرائیویٹ ہسپتال لاہور میں 1948ء میں قائم کیا گیا۔جہاں سے سات لڑکیوں پر مشتمل پہلے بیچ نے 1952ء میں کورس مکمل کیاتھا جبکہ کراچی نرسنگ سکول (جے پی ایم سی) میں پہلے گروپ نے 1957ء میں کورس مکمل کیاتھا۔

کوئٹہ میں اگرچہ پہلا نرسنگ سکول 1961ء میں سنڈیمن ہسپتال(سول ہسپتال)میں قائم کر دیا گیا تھا۔ تاہم اس صوبے میں قبائلی رسم و رواج نے دیر تک بلوچ اور پشتون خواتین کو اس شعبے میں آنے سے روکے رکھا۔

لیکن اب صرف ذرینہ ہی نہیں بلکہ بلوچستان بھر کی لڑکیوں میں نرسنگ کا رحجان بڑھ رہا ہے۔

<h2>حالات بہتر ہونے کی امید</h2>

ڈائریکٹر نرسنگ بتاتی ہیں کہ کوئٹہ کے سول ہسپتال میں186، بولان میڈیکل کالج ہسپتال میں 112 اور شیخ زید ہسپتال میں 17 نرسز کام کر رہی ہیں۔ تاہم تین ہسپتالوں میں بھی نرسز کی 200 سے زائد اسامیاں خالی پڑی ہیں۔

قومی ادارہ صحت کے تعاون سے ہونے والے سروے کے مطابق بلوچستان کے صرف 36 فیصد سرکاری ہسپتالوں میں نوزائیدہ بچوں کی دیکھ بھال کی سہولت میسر ہے۔ ضلعی ہسپتالوں اور مراکز صحت میں تربیت یافتہ عملے کی کمی کا سامنا ہے۔

ڈی ایچ او حب ڈاکٹر عبدالغنی کے مطابق حب کے تمام سرکاری ہسپتالوں میں صرف 26 نرسیں کام کر رہی ہیں۔

کلثوم اقبال کہتی ہیں کہ صوبے میں اب 13 نرسنگ کالجز قائم ہو چکے ہیں، ان میں&nbsp; سے تین کوئٹہ میں ہیں۔ ان کے علاوہ پشین، لورالائی، سبی، خضدار، حب، ژوب، خاران اور پنجگور میں بھی طالبات نرسنگ کی تعلیم مکمل کر رہی ہیں۔دیگر شہروں میں جلد کلاسیں شروع ہو جائیں گی۔

ان کا کہنا تھا کہ 2018ء سے قبل میٹرک کے بعد نرسنگ کا چار سالہ ڈپلومہ کرایا جاتا تھا۔ تاہم اب بی ایس ڈگری پروگرام شروع کیا گیا ہے۔

&quot;اب نرسنگ کی ڈگری میں داخلے کے لیے ایف ایس سی میڈیکل میں50 فیصد نمبروں کو لازمی قرار دیا گیا ہے&quot;۔

کلثوم اقبال نے بتایا کہ بی ایس کے&nbsp; پہلے بیچ&nbsp; کی طالبات فورتھ ائیر تک پہنچی ہیں۔

ڈی جی ہیلتھ سروسزنور قاضی بلوچستان میں نرسنگ کے شعبے میں بہتری کے لیے پر امید ہیں۔وہ کہتے ہیں کہ صوبے کے 13 نرسنگ کالجز سے سالانہ تین سو نرسز تربیت مکمل کریں گی اور جب پیشہ وارانہ ذمہ داریاں نبھانے کے لیے میدان میں آئیں گی تو اس شعبے میں کمی پوری ہو جائے گی۔

میل نرس بابر انصاری سول سپتال کوئٹہ کے نرسنگ سپرٹنڈنٹ ہیں۔ وہ بتاتے ہیں کہ نرسنگ کالج سنڈیمن میں پوسٹ گریجوایٹ ڈپلومہ بھی کرایا جا رہا ہے۔ جہاں پوسٹ کارڈیک، بیسک میڈیکل اورسرجیکل فیکلٹی کے لیے 25، 25 نشستیں مختص کی گئی ہیں۔ جبکہ انستھیزیا اور سائیکاٹری کےلیے 20، 20 سیٹیں ہیں۔

<h2>نرس کا عہد</h2>

&quot;میں خدا اور لوگوں کے سامنےعزم کرتی ہوں کہ صاف ستھری زندگی گزاروں گی اور اپنے پیشے کو دیانتدای سےاستعمال کروں گی۔ ایسی کسی بھی چیز سے پرہیز کروں گا جو صحت کے لیے نقصان دہ ہو۔۔۔۔۔۔۔۔&quot;

نرسنگ کے سوا دنیا کا کوئی بھی پیشہ شروع کرنے سے پہلے ایسا عہد یا حلف (the pledge) لیا جاتا ہے نہ دیا جاتا ہے۔ آئینی عہدیدار اور حکمران حلف ضرور اٹھاتے ہیں مگر وہ آئین اور ملک سے وفاداری کا ہوتا ہے پیشے سے وفاداری کا نہیں۔

پورے ضلع صحبت پور میں ایک لیڈی ڈاکٹر: 'ایسا نہ ہوتا تو بیٹی کے سر پر ماں کا سایہ سلامت ہوتا'

بلوچستان میں ڈیڑھ ہزار سے بھی کم نرسیں، زیادہ تر کا تعلق پنجاب سے ہے

text

زرینہ سول ہسپتال کوئٹہ کے گائنی وارڈ میں بینچ پر بیٹھی ہیں۔ان کی عمر لگ بھگ 21 سال اور تعلق ایک پشتون قبیلے سے ہے۔ وہ کوئٹہ کے نواحی علاقے اوڑک میں رہتی ہیں۔ ان کے ہونے والے بچے کا ان کے پیٹ میں ہی انتقال ہو گیا ہے اور انہیں ہنگامی بنیاد پر علاج کی ضرورت ہے۔

ان کا کہنا ہے کہ وہ پہلی بار ماں بننے والی تھیں لیکن انہوں نےچار ماہ کے دوران&nbsp; کبھی کسی ڈاکٹر سے رجوع نہیں کیا۔ اوڑک کے مرکز صحت میں خاتون ڈاکٹر ہی نہیں ہیں اس لیے وہ وہاں بھی نہیں گئیں۔ مناسب رہنمائی اور نگہداشت نہ ہونے کے سبب ان کا بچہ زندہ نہ رہ سکا۔ جب صورتحال کا اندازہ ہوا تو تب بہت دیر ہو چکی تھی اور اب وہ آپریشن کروانے کی منتظر ہیں۔

یہ کہہ کر وہ قریب بیٹھی معمر خاتون کے ساتھ کھانا کھانے میں مصروف ہو گئیں۔

&nbsp;اس ہسپتال کے گائنی وارڈ میں زرینہ جیسی بہت سی نوجوان خواتین دکھائی دیتی ہیں جو صوبے کے دور دراز علاقوں سے میلوں سفر طے کر کے آئی ہیں۔

بلوچستان کے بیشتر علاقوں میں طبی سہولیات نہ ہونے کے برابر ہیں۔کئی خواتین زچگی کے دوران دم توڑ جاتی ہیں یا پیدائش سے پہلے ہی بچے سے محروم ہو جاتی ہیں۔

پاکستان میٹرنل مورٹیلٹی سروے 2019ء کے مطابق ملک میں زچگی کے دوران اموات کی سب سے زیادہ شرح بلوچستان میں ہے جہاں ایک لاکھ میں سے 298 مائیں دوران زچگی انتقال کر جاتی ہیں۔

ملکی سطح پر ماؤں کی اموات کا تناسب ایک لاکھ پر 187 ہے یعنی بلوچستان میں اموات کی شرح باقی ملک سے تقریباً 40 فیصد زیادہ ہے۔

ماہر امراض نسواں ڈاکٹر گل ناز بلوچ بتاتی ہیں کہ دیہی علاقوں میں آج بھی زچگی گھروں میں کرنے کو ترجیح دی جاتی ہے۔ اکثر اوقات غیر تربیت یافتہ دائیاں معاملے کو پیچیدہ بنادیتی ہیں۔ایسی صورت میں ڈاکٹروں کے لیے آپشن کم رہ جاتے ہیں اور اس کا براہ راست اثر ماں اور بچے کی زندگی پر پڑتا ہے۔

پینتالیس سالہ میران بگٹی بھی گائنی وارڈ کے باہر بیٹھے ہیں۔وہ ڈیرہ بگٹی سے 360کلومیٹر&nbsp; سفر کر کے اپنی اہلیہ&nbsp; کو سول ہسپتال لائے جو زچگی کے دوران چل بسیں۔ اب نوزائیدہ سمیت ان چار بچوں کی ذمہ داری انہی کےکندھوں پر آن پڑی ہے۔

میران بتاتے ہیں کہ ان کے علاقے میں ہسپتال کی عمارت تو ہے مگر وہاں کوئی طبی سہولت ہے نہ ہی لیڈی ڈاکٹر۔ اسی لیے وہاں سے حاملہ خواتین کو طویل سفر طے کر کے کوئٹہ آنا پڑتا ہے۔

محکمہ صحت کے مطابق بلوچستان کے 34 اضلاع میں نو ٹیچنگ ہسپتال، دو ڈویژنل ہیڈ کوارٹر ہسپتال، 28 ڈی ایچ کیو، پانچ ٹی ایچ کیو ہسپتال،784 دیہی و بنیادی مراکز صحت اور 91 زچہ و بچہ سنٹر قائم کیے گئے ہیں۔

اعداو شمار کو دیکھا جائے تو صوبے میں مراکز صحت&nbsp; کی تعداد اتنی کم نہیں ہے۔ مگر ڈائریکٹر جنرل ہیلتھ سروسز بلوچستان ڈاکٹر نور قاضی کا کہنا ہے ہسپتالوں اور مراکز صحت میں تربیت یافتہ عملے کی کمی ہےاور خواتین کو طبی سہولیات سے آراستہ ہسپتالوں اور صحت کے مراکز تک رسائی میں مشکلات ہیں۔

صحافی پلہان خان بگٹی کہتے ہیں کہ ڈیرہ بگٹی کے ضلعی ہسپتال میں لیڈی ڈاکٹر کبھی آئی ہی نہیں۔جنہیں بھی وہاں تعینات کیا جاتا ہے وہ کوئٹہ میں ڈیوٹی لگوا لیتی ہیں یا گھر بیٹھے تنخواہیں لیتی رہتی ہیں۔ یہاں سے زچگی کے لیے زیادہ تر خواتین دو، ڈھائی سو کلو میٹر دور رحیم یار خان یا سکھر لے جائی جاتی ہیں اور ان کی کچھ تعداد کوئٹہ کا رخ کرتی ہے۔

وہ بتاتے ہیں کہ ڈیرہ بگٹی میں لیڈی ڈاکٹر نہ ہونے کی وجہ سے 2018 ءمیں 20 روز کے دوران سات حاملہ خواتین جاں بحق ہو گئی تھیں ان خواتین کو ڈیرہ بگٹی سے رحیم یار خان ریفر کیا گیا لیکن خراب سڑک اور زیادہ فاصلے کی وجہ سے راستے میں ہی دم توڑ گئیں۔

ڈیرہ بگٹی کے ضلعی ہیلتھ آفیسر کہتے ہیں کہ ڈی ایچ کیو ہسپتال میں لیڈی ڈاکٹر سہولیات نہ ملنے اور دیگر مسائل کی وجہ سے ڈیوٹی پر حاضر نہیں ہوتیں۔

&quot;ایک مقامی لیڈی ڈاکٹر کو یہاں عارضی طور پر تعینات کیا گیا ہے۔مگر وہ بھی قبائلی رسوم و رواج کی بنا پر ہسپتال آنے پر رضامند نہیں ہیں &quot;۔

گل ناز بلوچ کہتی ہیں کہ دیہی اضلاع میں مناسب رہائش اور سکیورٹی میسر ہوتو لیڈی ڈاکٹر وہاں جانے پر زیادہ اعتراض نہیں کرتیں۔مگر&nbsp; ڈی ایچ کیو میں طبی عملہ ہی پورا نہیں ہوتا یہاں تک کہ زچگی میں استعمال ہونے والے آلات اور دوائیں بھی دستیاب نہیں ہوتیں۔

محکمہ صحت بلوچستان کے پاس زچگی کے دوران ہونے والی اموات کا ڈیٹا دستیاب نہیں ہے۔ صرف ڈیرہ بگٹی ہی نہیں ،بارکھان، شیرانی، آواران، کوہلو، موسیٰ خیل، واشک، خاران سمیت کئی اضلاع میں بھی زچگی کے دوران ماؤں کی اموات کی شرح زیادہ ہے۔لیکن حکام اس دعوے کی تصدیق یا تردید نہیں کرتے۔

بلوچستان حکومت نے آئندہ چار سال میں زچگی کے دوران اموت کا تناسب 298 سے کم کر کے 200 تک لانے کا ہدف مقرر کررکھا ہے۔ تاہم اس پروگرام کے سربراہ ڈاکٹر سمین خان بتاتے ہیں کہ پروگرام کو فنڈز، ماہرڈاکٹرز، لیڈی ڈاکٹروں اور سٹاف کی کمی کا سامنا ہے۔اس لیے مطلوبہ اہداف حاصل کرنے میں مشکلات پیش آ رہی ہیں۔

اقوام متحدہ کے ادارے پاپولیشن فنڈ (یو این ایف پی اے)کے مطابق تقریباً ہر پانچ میں سے ایک خاتون میں دوران زچگی پیچیدگیاں پیدا ہونے کا امکان ہوتا ہے۔ایسے کیسوں کے لیے اعلیٰ پیشہ ورانہ مہارت کی ضرورت پڑ سکتی ہے لیکن بلوچستان میں صرف ماہر ڈاکٹروں کی ہی نہیں بلکہ تربیت یافتہ دائیوں کی بھی کمی ہے۔

اس کے باوجود ڈاکٹر نور قاضی پر امید ہیں۔ان کا کہنا ہے کہ حکومت ماں اوربچوں کی شرح اموات کم کرنے کے لیے کوشاں ہے اور ضلعی سطح پر بہتر طبی سہولیات کی فراہمی کے لیے جلد مزید ڈاکٹر تعینات کیے جائیں گے۔

سعدیہ جہانگیر

سعدیہ جہانگیر گزشتہ 16 برس سے صحافت کررہی ہیں، وہ مختلف صحافتی اداروں کے ساتھ منسلک رہنے کے ساتھ ساتھ مختلف موضوعات پر لکھتی بھی ہیں۔

بلوچستان میں ڈیڑھ ہزار سے بھی کم نرسیں، زیادہ تر کا تعلق پنجاب سے ہے

ہسپتال ہیں مگر علاج نہیں: بلوچستان میں خواتین کے لیے زچگی زندگی و موت کی جنگ بن گئی

Lok Sujag