پچاس سالہ ملک قاسم پچھلے تیس سال سے مسافر بس چلا رہے ہیں۔ عام طور پر وہ میانوالی سے لیہ کے علاقے چوک اعظم کے روٹ پر آتے جاتے ہیں۔ گزشتہ دونوں وہ اس سڑک پر سفر کر رہے تھے کہ ایک نوکیلے پتھر کی زد میں آ کر ان کی بس کا ٹائر پنکچر ہو گیا۔ انہوں ںے بمشکل بس کو کنٹرول میں رکھا لیکن بریک لگاتے وقت دوسرا ٹائر بھی پھٹ گیا۔ تاہم اس وقت تک بس کی رفتار بہت کم ہو چکی تھی اس لیے تمام مسافر محفوظ رہے۔

اس واقعے کے بعد قاسم نے ایک لاکھ 30 ہزار روپے خرچ کر کے بس کے دو ٹائر تبدیل کرائے۔ ان کا کہنا ہے کہ اتنی رقم انہوں نے پچھلے چھ ماہ میں نہیں کمائی تھی جتنی ٹائروں پر خرچ ہو گئی۔

چوک اعظم کے ٹرانسپورٹر گلزار احمد پٹھان کی دو درجن بسیں میانوالی مظفرگڑھ روڈ پر چلتی ہیں۔ ان کا کہنا ہے کہ آئے روز ان&nbsp; کی کوئی نہ کوئی گاڑی حادثے کا شکار ہو جاتی ہے۔ اس روٹ پر سڑک پچھلے دس برس سے خراب ہے اور اب دوبارہ تعمیر کے نام پر طویل عرصہ سے اس کی توڑ پھوڑ جاری ہے۔ سڑک تو تاحال نہیں بن سکی لیکن حادثوں میں لاکھوں روپے کا نقصان ضرور ہو رہا ہے۔

اس سڑک کو عام طور پر میانوالی مظفرگڑھ روڈ (ایم ایم روڈ) کہا جاتا ہے۔ یہ شاہراہ مظفرگڑھ، کوٹ ادو، لیہ، بھکر اور میانوالی میں آمدورفت کا بڑا ذریعہ ہے۔ دریائے سندھ کے مشرق میں آباد تھل کے ان اضلاع کو باہم جوڑنے والی سینکڑوں رابطہ سڑکیں ایم ایم روڈ سے منسلک ہیں۔

ایم ایم روڈ جو گلگت سے کراچی جانے کے لیے بھی استعمال ہوتی ہے۔ ملتان اور جنوبی خیبرپختونخوا کے درمیان رابطے کے لیے مدتوں سے یہی سڑک کام آ رہی ہے۔ بھکر اور لیہ کے لوگ معمول میں چکوال یا وفاقی دارالحکومت کو اسی راستے سے جاتے ہیں۔

یہ سڑک تین سال پہلے تک صوبائی محکمہ شاہرات کے زیر انتظام تھی۔ مئی 2020ء میں اسے این 135 کا نام دے کر نیشنل ہائی وے اتھارٹی (این ایچ اے) کے حوالے کر دیا گیا۔

این ایچ اے نے اسی سال 129 کلومیٹر بلکسر میانوالی روڈ (این 135) اور286 کلومیٹر طویل ایم ایم روڈ (این135) کو پبلک پرائیویٹ پارٹنر شپ کے تحت دو رویہ (ڈبل کیرج وے) بنانے کا اعلان کیا۔

تاہم کنسلٹنٹ نے پبلک پرائیویٹ پارٹنر شپ کے تحت اس منصوبے کی تکمیل&nbsp; کو &#39;ناقابل عمل&#39; قرار دیا جس کے بعد این ایچ اے نے بلکسر سے مظفرگڑھ (براستہ میانوالی )موجودہ سڑک ہی کو بحال کر نے کا منصوبہ بنایا۔

اس سڑک پر گزشتہ سال فروری میں کام کا آغاز ہوا جس کی مدت تکمیل ایک سال رکھی گئی۔ تاہم ابھی تک سڑک کی تعمیر مکمل ہونے کے کوئی آثار دکھائی نہیں دیتے۔ این ایچ اے نے اب منصوبے کی تکمیل کی نئی تاریخ 13 دسمبر دے رکھی ہے۔

ایم ایم روڈ پر فتح پور ٹول پلازہ کے مینیجر فرہاد خان بتاتے ہیں کہ پہلے یہاں سے روزانہ 13سے 15 ہزار گاڑیاں گزرتی تھیں۔تعمیراتی کام شروع ہونے کے بعد ان گاڑیوں کی یومیہ تعداد پانچ ہزار کےقریب رہ گئی ہے اور بیشتر لوگ متبادل شاہراہیں استعمال کر رہے ہیں۔

سڑک کی دوبارہ تعمیر شروع ہوئی تو یہاں ٹریفک میں کمی کے باوجود حادثات بڑھ گئے ہیں۔ ریسکیو 1122کے ترجمان محمد وسیم کے مطابق ضلع لیہ میں اس سڑک پر2022 ء میں 3700 ٹریفک حادثات ہوئے۔ ان میں430 افراد ہلاک اور 40 ہزار زخمی ہوئے۔

رواں سال کے پہلے چھ ماہ میں 2206 حادثات میں 10ہزار افراد زخمی اور 250 افراد ہلاک ہوچکے ہیں۔ ان میں دوران علاج ہسپتالوں میں ہونے والی اموات شامل نہیں ہیں۔

بڑھتے حادثات کے باعث لوگوں نے ایم ایم روڈ کو &#39;قاتل روڈ&#39; اور &#39;خونی سڑک&#39; جیسے نام دے رکھے ہیں۔ فتح پور کے لوگوں نے سڑک کی تعمیر فوری مکمل کرنے کے لیے احتجاج کا راستہ بھی اختیار کیا ہے۔

سڑک کے ایک حصے پر کام کرنے والی تعمیراتی کمپنی سچل کے ایڈمن مینیجر شمس الدین کہتے ہیں کہ کام میں تاخیر فنڈز کی وجہ سے ہو رہی ہے۔ کمپنی کو ابھی تک نصف رقم بھی نہیں ملی۔ یہی وجہ ہے کہ وہ ہفتے میں صرف تین دن کام کرتے ہیں۔

اس منصوبے کا ابتدائی تخمینہ 13ارب 80 کروڑ روپے تھا لیکن بعد ازاں اس میں کچھ تبدیلیاں کی گئیں۔ اس کی کل لاگت کا 90 فیصد وفاقی حکومت اور دس فیصد این ایچ اے کے ذمے تھا۔

این ایچ اے کے پراجیکٹ ڈائریکٹر فضل اللہ خان بتاتے ہیں۔ کہ ایم ایم روڈ (286 کلو میٹر) کی تعمیرنو کی لاگت کا کل تخمینہ 12 ارب 82 کروڑ 80 لاکھ روپے ہے جس میں سے چھ ارب 61 کروڑ 40 لاکھ روپے کی ادائیگی ہو چکی ہے۔

منصوبے پر کام کرنے والے ایک سول انجینئر نے بتایا کہ یہ سڑک پی سی ون کے مطابق تعمیر نہیں ہو رہی۔ اچلانہ موڑ سے رحمت آباد کے درمیان متعدد مقامات پر سڑک بیٹھ چکی ہے اور سڑک پر تارکول بھی بہت کم استعمال کیا گیا ہے۔

تاہم این ایچ اے ان الزامات کو درست نہیں سمجھتی۔ اتھارٹی کے جنرل مینیجر کے دفتر کا کہنا ہے کہ سڑک پر کام طے شدہ معیار کے مطابق ہو رہا ہے۔ تاہم کام کے دوران کچھ خرابیاں بھی آتی ہیں جنہیں دور کر دیا جاتا ہے۔

بس ڈرائیور ملک جبار کہتے ہیں کہ سڑک پر کام کی رفتار جو بھی ہو ٹریفک کو محفوظ راستہ تو ملنا چاہیئے۔ قاضی آباد سے فتح پور تک پتھر ڈالںے کے بعد ٹھیکیدار تو جیسے غائب ہو چکا ہے۔ دھول کے طوفان میں آگے جانے یا آنے والی گاڑی اکثر اوقات نظر ہی نہیں آتی۔

&quot;میری گاڑی کو ایک سال میں تین مرتبہ حادثات پیش آ چکے ہیں۔موٹر سائیکل سواروں کے لیے تو یہ سڑک اور بھی خطرناک ہو گئی ہے۔

سولہ سالہ نسیم لیاقت ایف ایس سی کی طالبہ ہیں۔ وہ لیہ کے چک 312 ٹی ڈی اے سے&nbsp; روزانہ رکشے (چنگ چی) پر فتح پور میں کالج آتی ہیں۔ وہ بتاتی ہیں کہ ایم ایم روڈ پر کام شروع ہونے سے پہلے رکشہ انہیں 20 منٹ میں پہنچا دیتا تھا۔ اب 45 منٹ لگ جاتے ہیں۔

&quot;پورے راستے گرد کا طوفان ہوتا ہے۔جب ہم کالج پہنچتے ہیں تو ہماری شکلیں پہچانی جاتی ہیں اور نہ ہی کپڑوں کا رنگ۔ یہ سڑک نہ تو مکمل ہوتی ہے نہ اس پر کوئی چھڑکاؤ کرتا ہے۔&quot;

ایمبولینس ڈرائیوررانا محمد اعظم بتاتے ہیں کہ وہ اس خراب سڑک پر دیہی علاقوں سے مریضوں کو لاتے ہوئے اکثر ٹریفک جام میں پھنس جاتے ہیں جس سے مریضوں کی زندگی کو خطرہ لاحق رہتا ہے۔

این ایچ اے کے جنرل مینیجر کے دفتر کا کہنا ہے کہ منصوبے کے بیشتر حصوں پر زیادہ تر کام مکمل ہو چکا ہے۔ کام کی تکمیل فنڈز سے مشروط ہے اور اگر مالی وسائل برقت فراہم کیے جاتے رہے تو سڑک کے تمام حصے 31 دسمبر تک مکمل کر لیے جائیں گے۔

آواران کا جھاؤ-بیلہ روڈ جہاں پیاز سے لدا ٹرک 90 کلومیٹر کا فاصلہ ایک دن میں طے کرتا ہے!

6 ہزار حادثات، 680 ہلاکتیں، میانوالی تا مظفرگڑھ روڈ ڈیڑھ سال میں 'خونی سڑک' کیسے بنی؟

text

چودھری محمد عباس نے فیصلہ کیا ہے کہ وہ اس بار اپنے 30 ایکڑ اراضی پر صرف تِل کی فصل کاشت کریں گے۔

وہ جنوبی پنجاب کے ضلع لیہ میں 150 ایکڑ زرعی رقبے کے مالک ہیں۔ اس میں سے 70 ایکڑ پر انھوں نے مالٹے کا باغ لگا&nbsp; رکھا ہے جبکہ باقی 80 ایکڑ&nbsp; پر وہ کپاس، مونگ اور سبز چارہ کاشت کرتے آئے ہیں۔

اس مرتبہ وہ دوسری فصلوں کے زیر کاشت رقبے میں کمی کرتے ہوئے زیادہ سے زیادہ اراضی پر تِل اگانا چاہتے ہیں۔ انھوں نے یہ فیصلہ اس فصل سے حاصل ہونے والے زیادہ منافعے کو دیکھتے ہوئے کیا ہے۔

عباس بتاتے ہیں کہ پچھلے سال انھوں نے 10 ایکڑ رقبے پر تِل کاشت کیے تھے جس سے انہیں صرف چار ماہ میں پانچ لاکھ سے بھی زیادہ منافع حاصل ہوا جبکہ کپاس اور مونگ کی فصلیں جو تِل سے تین گنا زیادہ رقبے پر لگی ہوئی تھیں ان سے بھی وہ اتنا منافع نہیں کما سکے۔

تل ایک تیل دار فصل ہے جسے اعلیٰ معیار کے تیل اور پروٹین کی وجہ سے فصلوں کی ملکہ بھی کہا جاتا ہے۔ تل کے بیج میں تیل کی مقدار 50 سے 58 فیصد اور پروٹین 22 فیصد تک ہوتی ہے۔

تِل کے بیج کچے بھی کھائے جاتے ہیں اور کنفیکشنری کے علاوہ مٹھائیوں اور بیکری کی مصنوعات کے ساتھ صابن، پرفیوم، سبزیوں کے تیل اور کاربن پیپر میں بھی استعمال ہوتے ہیں۔

تل کی کاشت کے لیے لیہ جیسے گرم اور خشک آب و ہوا والے علاقے انتہائی ساز گار ہیں۔

اسی ضلعے سے تعلق رکھنے والے کاشتکار ملک محمد فہد پہلی بار 12 ایکڑ رقبے پر تل کی فصل کاشت کرنے کا ارادہ رکھتے ہیں حالانکہ ان کی کل ملکیتی زمین 20 ایکڑ ہے۔

فہد نے بھی اس بار کپاس اور مونگ کے زیر کاشت رقبے میں کمی کرنے کا فیصلہ کیا ہے۔

عباس کی طرح وہ بھی زیادہ منافعے کو اس کی بنیادی وجہ قرار دیتے ہیں لیکن ان کی نظر میں اس فصل پر آنے والے کم اخراجات بھی اس فیصلے کا ایک بڑا سبب ہیں۔

ملک فہد اور چودھری عباس کا خیال ہے کہ موسمیاتی تبدیلیوں کی وجہ سے کپاس کی فصل کی پیداوار میں کمی آتی جارہی ہے جس کی وجہ سے کسانوں کا خرچ بھی پورا نہیں ہوتا۔

عباس کہتے ہیں کہ تل کی فصل کو دو سے تین بار پانی دینا پڑتا ہے۔ بارش ہوجائے تو پھر اس کی بھی ضرورت نہیں پڑتی۔

اس کے مقابلے میں کپاس پانچ سے چھ پانی لیتی ہے۔ پھر اس پر کھادوں اور کیڑے مار ادویات کے اخراجات اس قدر زیادہ ہیں جو کاشت کاروں کی پہنچ سے دور ہوتے جارہے ہیں۔

&quot;مونگ اور کپاس کی چنائی اور کٹائی کی مزدوری کے اخراجات بھی بہت زیادہ ہیں جبکہ تِل پر خرچہ نہ ہونے کے برابر ہے&quot;۔

کپاس کی فصل چھ ماہ کے عرصے کی ہے جبکہ اس کے مقابلے میں تِل ساڑھے تین سے چار ماہ میں تیار ہوجاتے ہیں۔

عباس کہتے ہیں کہ پچھلے سال انھوں نے ایک ایکڑ سے سات من تک تِل کی پیداوار حاصل کی اور اسے منڈی میں 14 ہزار روپے فی من کے حساب سے فروخت کیا۔ اس بار مارکیٹ میں اس کی قیمت 17 سے 18 ہزار روپے فی من تک چل رہی ہے۔

پنجاب ایگریکلچر مارکیٹنگ سروس کے اعداد شمار سے اس کی تصدیق ہوتی ہے کہ 2020ء سے اب تک تل کی قیمت میں دو گنا اضافہ ہوچکا ہے۔

2020ء میں مارکیٹ میں ایک سو کلو گرام تل 22 ہزار 850 روپے میں ملتے تھے لیکن آج ان کی قیمت 44 ہزار تک پہنچ گئی ہے۔

اس کے مقابلے میں مونگ کی قیمت میں ان چار سال میں صرف پانچ ہزار روپے فی سو کلو گرام&nbsp; کا اضافہ ہوا ہے۔ 2020ء میں سو کلو گرام مونگ کی قیمت 16 ہزار 746 روپے تھی جو آج 21 ہزار 362 روپے ہے۔

<h2>تِل دھرنے کی جگہ نہیں رہے گی</h2>

عباس کہتے ہیں کہ جس طرح انھوں نے تل کے اپنے زیرکاشت رقبے میں اضافہ کیا ہے اسی طرح ان کے ضلعے میں اور لوگ بھی اسے پہلے سے زیادہ رقبے پر کاشت کررہے ہیں۔

&quot;ضلعے میں ریتلہ یا کمزور رقبہ رکھنے والے کاشت کار جو پہلے مونگ کی فصل کاشت کرتے تھے وہ بھی اس بار تِل لگا رہے ہیں&quot;۔

لیہ پاکستان کا وہ ضلع ہے جہاں تِل کی کاشت سب سے زیادہ ہوتی ہے۔ 2022ء میں یہاں ایک لاکھ 62 ہزار ایکڑ رقبے پر یہ فصل اگائی گئی تھی جو پنجاب میں اگنے والی تِل کی مجموعی فصل کا 27 فیصد تھی۔

خانیوال، پاکپتن اور ساہیوال میں بھی تِل بڑے پیمانے پر کاشت ہوتے ہیں لیکن پچھلے سال ان تینوں اضلاع میں اس فصل کا زیر کاشت رقبہ 27 فیصد تھا جبکہ اکیلے لیہ میں اتنے ہی رقبے پر تِل کاشت کیے گئے۔ 
ملک بھر میں مجموعی طور پر تل کے زیر کاشت رقبے میں پچھلے کچھ سال کے مقابلے میں بڑے پیمانے پر اضافہ ہوا ہے۔

جس طرح پنجاب میں سب سے زیادہ تِل لیہ میں اگائے جاتے ہیں اسی طرح ملک بھر میں تِل کی فصل میں پنجاب کا حصہ 89 فیصد ہے۔

لیہ میں 11 لاکھ 88 ہزار ایکڑ رقبہ زیر کاشت ہے جس میں سے نو لاکھ ایکڑ سے زیادہ رقبہ آبپاش اور پونے تین لاکھ ایکڑ کے قریب غیر بارانی ہے۔

اس ضلع میں سب سے زیادہ لگائی جانے والی فصلوں میں گندم، چنا، کپاس، مونگ، گنا اور چاول ہیں۔ اب تل بھی اب اس علاقے کی ایک اہم فصل بن گئی ہے۔

اس سال چونکہ تل کی فصل کاشت کے مرحلے میں ہے اور حکومت نے تل کے متوقع زیر کاشت رقبے کے حوالے سے اعداد و شمار ظاہر نہیں کیے لیکن پچھلے سال کی معلومات سے اندازہ ہوتا ہے کہ تب پنجاب میں چھ لاکھ ایکڑ سے زیادہ رقبے پر تِل کاشت کئے گئے تھے۔

پنجاب میں یہ 2021ء کی نسبت 39 فیصد اضافہ تھا۔

لیہ میں بھی پچھلے سال یہ فصل 16 فیصد زیادہ رقبے پر کاشت کی گئی تھی۔

پاکستان میں فصلوں پر تحقیق کرنے والے ادارے نیشنل ایگریکلچر ریسرچ کونسل کے تیل دار اجناس سے متعلق شعبے کے سائنسدان مبشر احمد خان کسانوں کے رجحان کو دیکھتے ہوئے امید ظاہر کررہے ہیں کہ اس بار تِل کے زیر کاشت رقبے میں مزید اضافہ ہوگا۔

محکمہ زراعت (توسیع) تحصیل چوبارہ کے عہدیدار غلام مصطفیٰ اپنے ضلعے میں تِل کی کاشت کے بڑھتے ہوئے رجحان کو تیل دار اجناس کے فروغ کے لئے دی جانے والی سرکاری مراعات سے جوڑتے ہیں۔

محکمہ زراعت پنجاب کی ویب سائٹ کے مطابق سال 2019ء میں تیل دار اجناس کے فروغ کے لیے پانچ سال قومی منصوبہ شروع کیا گیا تھا جس کی کل لاگت پانچ ارب ساڑھے گیارہ کروڑ روپے ہے۔

اس منصوبے کے تحت تِل کے فروغ کے لیے کسانوں کو فی ایکڑ پر مراعات دینے کے علاوہ لیہ سیمت پنجاب کے بعض دوسرے اضلاع میں نمائشی پلاٹوں پر فصل کی کاشت پر فی ایکڑ 15 ہزار روپے بھی دیے جارہے ہیں۔

مبشر احمد خان سرکاری مراعات کے علاوہ اس رجحان کو بھی تِل کی بڑھتی ہوئی برآمد سے بھی جوڑتے ہیں۔

ان کے مطابق پاکستان میں اگائی جانے والی زیادہ تر فصل چین برآمد کی جاتی ہے جہاں پر اس کی کھپت بہت زیادہ ہے۔ اسی وجہ سے مقامی مارکیٹ میں اس کی قیمتیں بہت زیادہ بڑھ گئی ہیں۔

لیہ کی غلہ منڈی میں تِل کی خریدوفروخت کا کام کرنےو الے آڑھتیوں کا بھی یہی ماننا ہے کہ تیل دار اجناس خاص کر تل کی عالمی مارکیٹ میں بڑھتی ہوئی مانگ کے پیچھے چین کی ڈیمانڈ ہے۔

ان کا کہنا ہے کہ چین میں تل کی بڑھتی ہوئی طلب کی بدولت پاکستانی مارکیٹ میں پچھلے سال ایک من تِل کی قیمت نو ہزار روپے تھی جو اب بڑھ کر 17 ہزار روپے تک پہنچ گئی ہے۔

2021-22 کے مالی سال میں پاکستان نے ریکارڈ ایک لاکھ 38 ہزار میٹرک ٹن تِل برآمد کئے جس سے 32 ارب 65 کروڑ روپے سے زیادہ منافع حاصل ہوا۔

اس سے پچھلے مالی سال کے مقابلے میں تِل کی برآمد میں 74 فیصد اور قیمت میں 131 فیصد اضافہ ہوا ہے۔

سرکاری نیوز ایجنسی ایسوسی ایٹڈ پریس آف پاکستان (اے پی پی) کی 16 جون 2022ء کو جاری کردہ رپورٹ میں پاکستان اور چین کے درمیان اس فصل کی بڑھتی ہوئی تجارت کا سبب دونوں ملکوں کے مابین آزاد تجارتی معاہدے کو قرار دیا گیا ہے۔

رپورٹ میں کہا گیا ہے کہ پاکستان کے تِل کے بیجوں کی برآمد پر ایکسپورٹ ڈیوٹی نہیں لگائی گئی۔

چین نے مالی سال 2022ء کے پہلے تین ماہ میں دنیا کے مختلف ممالک سے تقریباً 60 کروڑ ڈالر مالیت کے تقریباً چار لاکھ ٹن تِل درآمد کیے ہیں۔

چین کو تِل برآمد کرنے والے ملکوں میں نائیجر، ٹوگو اور سوڈان سرفہرست ہیں جبکہ پاکستان کا چھٹا نمبر ہے جس کا چین کو تِل کی مجموعی برآمدات میں تقریباً 7.67 فیصد حصہ ہے۔

(اس رپورٹ کی تیاری میں لاہور سے آصف ریاض نے معاونت فراہم کی)

&nbsp;

صابر عطا

صابرعطا کا تعلق لیہ سے ہے۔صحافی ،شاعر اور محقق ہیں قومی اخبارات میں فیچر شائع ہوتے ہیں ۔ مختلف ویب سائیٹس کے لیے بھی تحقیقی مضامین لکھتے ہیں۔

6 ہزار حادثات، 680 ہلاکتیں، میانوالی تا مظفرگڑھ روڈ ڈیڑھ سال میں 'خونی سڑک' کیسے بنی؟

لیہ کے کسانوں میں تِل کی فصل کاشت کرنے کا رحجان کیوں بڑھ رہا ہے؟