شمو کورائی ملتان کے اولیاء کرام کے مزارات پر حاضری دینے سندھ کے علاقے تھر سے آتے ہیں۔ گزشتہ ماہ جب وہ ملتان سے واپس جانے لگے تو موسلاھار بارش شروع ہو گئی۔ کسی زائر نے انہیں ایک قریبی عمارت میں پناہ لینے کا مشورہ دیا۔

زائرین کے لیے 1991ء میں تعمیر کی گئی یہ عمارت بہاءالدین زکریا کمپلیکس کہلاتی ہے۔ اس میں 200 سے زیادہ زائرین کے ٹھہرنے کی گنجائش ہے۔

شمو بتاتے ہیں کہ وہاں کمروں کو لگے تالے دیکھ کر مجھےسخت مایوسی ہوئی۔ &quot;دیگر زائرین کے ہمراہ مجھے رات برآمدے میں گزارنی پڑی۔&quot;

گھوٹکی کی زائرہ سلمٰی ابڑو کو بھی ملتان میں مناسب رہائش نہ ہونے کی وجہ سے سخت پریشانی کا سامنا کرنا پڑتا ہے۔ان کا کہنا ہے کہ سندھ سے جو ہزاروں زائرین ہر سال حاضری دینے ملتان آتے ہیں، وہ نذرانہ بھی دیتے ہیں۔

انہوں نے بتایا کہ میرا سکھوں کے مذہبی مقام گردوارہ ننکانہ صاحب جانے کا اتفاق ہوا۔ وہاں زائرین کو بہترین لنگر اور رہائش دی جاتی ہے لیکن افسوس کہ ملتان کے کسی دربار میں اس طرح کی سہولیات نہیں۔

قلعہ کہنہ قاسم باغ پر حضرت بہاءالدین زکریا ملتانی کے دربار کے قریب چھ کنال سے زائد رقبے پر قائم یہ کمپلیکس 20 سے زیادہ کمروں پر مشتمل ہے۔

ملتان ڈویلپمنٹ اتھارٹی (ایم ڈی اے) نے 10 کروڑ روپے سے زیادہ کی لاگت پر اسے تعمیر کیا تھا۔

اس کمپلیکس کی تعمیر کا مقصد دور دراز سے آنے والے زائرین کو دربار کے قریب ہی صاف ستھری اور محفوظ رہائش مفت میں فراہم کرنا تھا۔

زونل ایڈمنسٹریٹر محکمہ اوقاف ملتان ضیا المصطفیٰ نے لوک سجاگ کو بتایا کہ ایم ڈی اے نے بہاءالدین زکریا کمپلیکس تعمیر کرنے کے بعد محکمہ اوقاف کے حوالے کیا تھا جس نے اگلے ہی برس اس کے سات کمروں میں اپنے دفاتر قائم کر لیے۔

&nbsp;پھر 1996ء میں ڈپٹی کمشنر کے حکم پر تقریباً آدھی عمارت حاجی کیمپ انتظامیہ کو دے دی گئی جہاں سے جنوبی پنجاب کے لیے حج آپریشن کا آغاز ہوا۔ حاجی کیمپ وزارتِ مذہبی مذہبی کے زیراہتمام ہوتا ہے۔

ڈائریکٹر حج ملتان ریحان عباس کھوکھر نے بتایا کہ ملتان میں قائم ہونے والے حاجی کیمپ کے لیے کوئی مناسب جگہ دستیاب نہیں تھی اس لیے حج آپریشن کا آغاز زائرین کے لیے تعمیر ہونے والے کمپلیکس سے کرنا پڑا۔

&quot;اب یہ جگہ بھی حج آپریشن کے لیے کم پڑ گئی ہے۔ اس لیے حاجی کیمپ کے گراسی پلاٹ میں مارکیاں لگانی پڑتی ہیں۔&quot;

2014ء میں کمپلیکس کے تین کمروں میں لوہاری گیٹ تھانہ میں تعینات پولیس افسروں نے اپنے دفاتر قائم کر لیے۔

اب اس عمارت کے واش رومز&nbsp; تک کو تالے لگے ہوتے ہیں۔اس لیے عورتوں، بچوں سمیت زائرین کو حاجت کے لیے کھلے آسمان تلے کپڑے کا پردہ لگانا پڑتا ہے۔

محکمہ اوقاف کے اعدادوشمار کے مطابق حضرت بہاءالدین زکریا ملتانی اور حضرت شاہ رکن عالم کے سالانہ عرس کے موقع پر سندھ کے مختلف علاقوں سے 25 ہزار کے قریب زائرین چار دن کے لیے ملتان آتے ہیں۔

حضرت بہاءالدین زکریا ملتانی کا سالانہ عرس پانچ سے سات صفر المظفر کو جبکہ حضرت شاہ رکن الدین عالم کا سالانہ عرس پانچ&nbsp; سے سات جمادالاول کو ہوتا ہے۔

ضلعی انتظامیہ کی جانب سے ان کی رہائش کے لیے محکمہ تعلیم کے 15 سکول اور کالج خالی کرائے جاتے ہیں۔مگر تین، چار روز کے لیے فراہم کی جانے والی رہائش کی یہ سہولیات ناکافی رہتی ہیں۔

عرس کے موقع پر درباروں کے احاطہ اور مسجد میں بھی زائرین رہائش اختیار کرتے ہیں۔

ان مخصوص دنوں کے علاوہ سال بھر سیکڑوں زائرین ٹولیوں اور قافلوں کی شکل میں درباروں پر حاضری کے لیے آتے رہتے ہیں۔

2014ء میں بہاؤالدین زکریا کمپلیس کے قریب زائرین کے لیے ایک لنگر خانہ بھی تعمیر کیا گیا تھا۔ لوہاری گیٹ پولیس نے تعمیرکے فوراً بعد اپنا سامان رکھ کر اسے اپنے استعمال میں لانے کوشش کی۔

شاہ محمود قریشی ان مزاروں کے سجادہ نشین ہیں، وہ اس علاقے سے کئی بار منتخب ہو کر وفاقی وزیر کے عہدے پر فائز رہ چکے ہیں۔

انہوں نے حضرت بہاءالدین زکریا ملتانی کے سالانہ عرس کے موقع پر ایک پریس کانفرنس میں اعلان کیا کہ تھانہ لوہاری گیٹ جلد از جلد لنگر خانہ کی بلڈنگ کو خالی کر دے ورنہ وہ خود زائرین کے ہمراہ لنگر خانہ سے تھانے کا سامان اٹھا کر باہر پھینک دیں گے۔

اس کے بعد پولیس نے لنگر خانہ خالی کر کے اپنا سامان عارضی طور پر اوقاف کے دفاتر اور بہاءالدین زکریا کمپلیکس کے دوسرے کمروں میں منتقل کر دیا۔

یہ سامان ابھی تک وہیں ہے۔

بہاءالدین زکریا کمپلیکس کے منیجر عبدالکریم پلی کا کہنا ہے کہ کمپلیکس کی عمارت کو واگزار کرانے کے لیے محکمہ مذہبی امور اور پولیس کو کئی بار لکھا گیا ہے لیکن تا حال اس پر کوئی عمل نہیں ہوا۔

ملتان میں محکمہ اوقاف اور میپکو کے تنازعے کا شکار ہوتا شمسی توانائی کا منصوبہ

ملتان کا بہاءالدین زکریا کمپلیکس: زائرین کے لیے تعمیر عمارت 32 برس سے کون استعمال کررہا ہے؟

text

توانائی کے حصول کے قابل تجدید ذرائع سے کام لینے کے لیے ایک سال پہلے پنجاب حکومت نے صوبے کے طول و عرض میں مزاروں پر شمسی توانائی سے بجلی فراہم کرنے کا فیصلہ کیا تھا۔ اس سلسلے میں ابتداً ملتان میں دربار حضرت شاہ رکن عالم، دربار حضرت غوث بہاءالدین ذکریا ملتانی اور دربار حضرت شاہ شمس کا انتخاب کیا گیا۔ لیکن اب تک یہ منصوبہ فعال نہیں ہو سکا اور اس کے لیے لگائے جانے والے سولر پینل خراب ہونے لگے ہیں۔

اس منصوبے کے لئے ساڑھے چھ کروڑ روپے مختص کئے گئے تھے جس کے تحت ان تینوں مزاروں کے درمیان قلعہ کہنہ قاسم باغ میں پانچ کنال جگہ پر سولر پینل لگانے کا فیصلہ کیا گیا اور نومبر 2021 میں 900 سے زیادہ پینل نصب کر دیے گئے۔

پورے جنوبی پنجاب سمیت ملک بھر سے ان مزاروں پر آنے والے زائرین اس جگہ کو بیٹھنے اور سستانے کے لیے استعمال کرتے تھے۔ اسی لیے درگاہ بہاء الدین ذکریا ملتانی کے سجادہ نشین شاہ محمود قریشی نے اس جگہ سولر پینل نصب کرنے کی مخالفت کی۔ والڈ سٹی پراجیکٹ کے ڈائریکٹر نجم ثاقب بھی اس منصوبے کے حق میں نہیں تھے کیونکہ ان کی رائے میں اس سے تاریخی قلعے کی خوبصورتی ماند پڑنے کا خدشہ تھا۔

اس منصوبے کے تحت دربار حضرت شاہ شمس پر 45، محکمہ اوقاف کے دفاتر کی چھت پر 65، حاجی کیمپ میں 170 اور دربار حضرت شاہ رکن عالم کے سامنے 620 سولر پینل نصب کر دیے گئے۔

متبادل توانائی کے اس منصوبے سے درگاہ حضرت بہاءالدین ذکریا کو 180.39 کلو واٹ، درگاہ حضرت شاہ رکن عالم کو 338 کلو واٹ اور درگاہ حضرت شاہ شمس کو 42 کلو واٹ شمسی توانائی فراہم کی جانا تھی۔ لیکن ایک سال سے زیادہ عرصہ گزرنے کے باوجود اس منصوبے سے فائدہ نہیں اٹھایا جا سکا۔

سولر سسٹم کو اپ گریڈ کرنے کے لیے ملتان الیکٹرک پاور کمپنی (میپکو) گرین میٹر نصب کرتی ہے جو سولر پینل سے حاصل ہونے والی توانائی صارف سے میپکو کر فراہم کرتا ہے۔ رات کے اوقات میں جب پینل سے توانائی نہیں ملتی تو یہ میٹر میپکو سے بجلی لے کر صارف کو دیتا ہے۔ ایک ماہ بعد شمسی توانائی اور میپکو سے لی گئی بجلی کو ایڈجسٹ کیا جاتا ہے اور اس کے بعد صارف یا میپکو میں سے جس کے ذمے جتنے بقایا جات ہوتے وہ ایک دوسرے کو ادا کر دیے جاتے ہیں۔ اس عمل کو نیٹ میٹرنگ کا نام دیا جاتا ہے۔

ملتان میں مزاروں کو شمسی توانائی فراہم کرنے کے نظام کی نیٹ میٹرنگ کے لیے گرین میٹر تاحال مہیا نہیں کیا گیا جس کی وجہ سے سولر سسٹم نہیں چل رہا۔

محکمہ اوقاف سرکل 2 کے مینیجر سید ایاز الحق گیلانی کے مطابق آٹھ دسمبر 2022ء کو انہوں نے سولر سسٹم کی اپ گریڈیشن کے لیے میپکو کے حکام سے ملاقاتیں کیں جس میں&nbsp; کمپنی کا کہنا تھا کہ محکمہ اوقاف کے ذمے اس کے 31 لاکھ روپے واجب الادا ہیں۔ 27 دسمبر 2022ء کو محکمہ اوقاف نے بقایا جات کی مد میں میپکو کو نصف رقم یعنی ساڑھے 15 لاکھ روپے دے دیے اور باقی پیسے بھی جلد ادا کرنے کی یقین دہانی کرائی۔

محکمہ اوقاف نے سول کورٹ میں ایک کیس بھی دائر کر رکھا ہے جس میں اس کا کہنا ہے کہ میپکو کی جانب سے 31 لاکھ روپے کا دعویٰ درست نہیں۔ دوسری جانب میپکو افسروں کا کہنا ہے کہ اس معاملے کو حل کرنے کے لیے محکمے کو کمپنی کے خلاف اپنا کیس واپس لینا ہو گا۔

اسی دوران سولر سسٹم کے قریب پارکس اینڈ ہارٹیکلچر اتھارٹی (پی ایچ اے) کی جانب سے لگائی گئی چھتری زمین میں دھنسنے سے کئی پینل ٹوٹ پھوٹ گئے ہیں۔

اس منصوبے کے فعال ہونے میں تاخیر کی بابت جب صوبائی وزارت توانائی کے نمائندے انجینئر وقاص سے بات کی گئی تو ان کا کہنا تھا کہ سولر پینل مقررہ وقت پر نصب کیے جا چکے ہیں اور اب یہ معاملہ محکمہ اوقاف ملتان زون اور میپکو کے کے تنازعے کی وجہ سے تاخیر کا شکار ہے۔

اس معاملے میں سپیشل برانچ نے اپنی رپورٹ میں لکھا ہے کہ دربار حضرت شاہ رکن عالم اور دربار حضرت غوث بہاء الدین ذکریا کے درمیان جس پانچ کنال اراضی پر یہ پینل لگائے گئے ہیں وہاں گھنے درخت ہیں جن کا سایہ سورج کی روشنی کو پینل تک پہنچنے سے روکتا ہے اس لیے یہ جگہ اس مقصد کے لیے مناسب نہیں ہے۔

ایازالحق گیلانی بتاتے ہیں کہ قلعہ کہنہ قاسم باغ کی مٹی بھربھری ہے جہاں سولر پینل کھڑے کرنے کے لیے بنایا گیا ڈھانچہ زیادہ عرصہ قائم نہیں رہ سکتا۔ اگر اس جگہ پر شیڈ لگا کر ان پر سولر پینل نصب کیے جاتے تو دہرا فائدہ ہوتا۔ اس طرح ناصرف زائرین کو بیٹھنے کے لیے سایہ دار جگہ مل جاتی بلکہ سورج کی روشنی بھی سولر پینل تک باآسانی پہنچ جاتی۔

وزارت توانائی نے صوبے بھر میں ساڑھے 26 کروڑ روپے کی لاگت ان تینوں درگاہوں کے علاوہ داتا دربار لاہور، بلھے شاہ دربار قصور، دربار سلطان باہو شور کوٹ، دربار بابا فرید الدین پاکپتن، دربار حضرت سخی سرور اور بادشاہی مسجد لاہور میں بھی سولر پینل نصب کرنا تھے لیکن یہ منصوبہ کسی بھی جگہ مکمل نہیں ہو سکا۔

ملتان کے مزاروں پر آئے زائرین نے لوک سجاگ کو بتایا کہ اب جس جگہ سولر پینل نصب کر دیے گئے ہیں وہاں پہلے سبھی زائرین مل بیٹھتے، آرام کرتے اور لنگر تقسیم کرتے تھے۔ اب یہ جگہ اس مقصد کے لیے استعمال نہیں ہو سکتی جبکہ دربار کے اندر لنگر لے جانا منع ہے۔ ان حالات میں زائرین سڑکوں کے کنارے بیٹھنے اور وہیں لنگر بانٹنے پر مجبور ہیں۔

رانا عرفان

رانا عرفان الاسلام کا تعلق ملتان سے ہے۔ گزشتہ 18سالوں سے شعبہ صحافت کے ساتھ وابستہ ہیں۔ مذہب سیاست تقافت اقلیتوں کے مسائل ان کے بنیادی موضوعات ہیں۔

ملتان کا بہاءالدین زکریا کمپلیکس: زائرین کے لیے تعمیر عمارت 32 برس سے کون استعمال کررہا ہے؟

ملتان میں محکمہ اوقاف اور میپکو کے تنازعے کا شکار ہوتا شمسی توانائی کا منصوبہ