اکیس سالہ سمیعہ وسیم تنگ و تاریک زینوں سے گزرتی چوتھی منزل پر واقع اپنے فلیٹ میں پہنچتی ہیں جہاں بیٹری کی مدد سے ایک ننھا سا بلب ٹمٹمارہا ہے۔ تین بلاکس پر مشتمل اس چار منزلہ بلڈنگ میں مجموعی طور پر 40 فلیٹس ہیں۔

وہ بتاتی ہیں کہ وہ صبح گھر سے نکلتی ہیں، شام کو جب واپسی لوٹتی ہیں تو اکثر لوڈشیڈنگ کے باعث اندھیرا ان کا استقبال کرتا ہے۔ انہوں نے کئی بار سولر سسٹم لگوانے کا سوچا لیکن معلومات حاصل کیں تو اندازہ ہوا کہ یہ کام آسان نہیں ہے۔

وہ یونیورسٹی کی طالبہ ہیں جو اپنے اخراجات پورے کرنے کے لیے ایک پرائیویٹ فرم میں جاب بھی کرتی ہیں۔ وہ کراچی کے مرکزی علاقے میں کرائے کے ایک فلیٹ میں رہتی ہیں۔

&quot;کرایہ دار کے لیے مالک سے سولر لگوانے کی اجازت ملنا تقریباً ناممکن ہے۔ میں اگر کسی طرح سولر لگا بھی لوں تو گھر تبدیل کرنے کی صورت میں دوبارہ اخراجات برداشت کرنا پڑیں گے جس کی میری جیب اجازت نہیں دیتی۔&quot;

دنیا بھر کی طرح پاکستان میں بھی گرین انرجی کے سستے آپشن یعنی روف ٹاپ سولر پینلز سے فائدہ اٹھایا جا رہا ہے لیکن کراچی کے گنجان آباد فلیٹس کے لاکھوں مکین اس سے استفادہ حاصل کرنے سے محروم ہیں۔

پچیس سالہ سید زین وصال ضلع وسطی کی چار منزلہ بلڈنگ میں رہتے ہیں جس میں کل 99 فلیٹس ہیں۔ وہ ان خوش قسمت لوگوں میں سے ہیں جو سولر سسٹم لگانے میں کامیاب ہو گئے۔ بتاتے ہیں کہ ان کا ملکیتی فلیٹ پہلی منزل پر واقع ہے جس کے لیے انہوں نے عمارت کی چھت پر سولر پینل لگوائے ہیں۔

&quot;میرے بجلی کے بل میں تقریباً 15 ہزار روپے کا فرق آ گیا ہے جو پہلے 20 ہزار ہوتا تھا اب پانچ ہزار کے قریب آتا ہے۔ تاہم پینلز لگوانے میں مجھے کئی رکاوٹیں کا سامنا کرنا پڑا۔&quot;

<h2>سندھ حکومت &nbsp;فلیٹس کے مکینیوں کی سولر تک آسان رسائی کے لیے کوئی خاص اقدام نہیں کر رہی</h2>

اگرچہ کراچی کی گنی چنی عمارتیں ہی کونسل آن ٹال بلڈنگز اینڈ<a href="https://www.skyscrapercenter.com/cities"> اربن ہیبیٹیٹ </a>کے اونچی عمارتوں کے معیار (150 میٹر سے زیادہ بلندی) پر پورا اترتی ہیں تاہم اعدادوشمار کا جائزہ لیا جائے تو ملک کے دیگر اربن سنٹرز کے مقابلے میں یہ شہر فلیٹس کا جنگل بن چکا ہے۔

<a href="https://www.pbs.gov.pk/sites/default/files/population/2023/tables/table_26_sindh_province.pdf">ڈیجیٹل مردم شماری</a> کے نتائج بتاتے ہیں کہ میٹروپولیٹن سٹی کے چار اضلاع میں مجموعی طور پر 67 ہزار 575 کثیرالمنزلہ (ہائی رائز) عمارتیں ہیں جن میں 44 ہزار 328 خالصتاً رہائشی ہیں، ایک ہزار 616 عمارتیں کمرشل اور 21 ہزار 631 کمرشل و رہائشی دونوں مقاصد کے لیے استعمال ہوتی ہیں۔

اس شہر کی رہائشی عمارتوں میں عموماً چھ سے 12 فلیٹ ہوتے ہیں لیکن ایسی درجنوں بلڈنگز موجود ہیں جن میں سے ہر ایک میں سیکڑوں خاندان مقیم ہیں۔ اب بھی یہاں گنجان آباد علاقے میں ایک 50 منزلہ رہائشی منصوبہ زیرتعمیر ہے۔

وزیر اعلیٰ مراد علی شاہ نے گزشتہ ماہ سندھ سولر انرجی پراجیکٹ کا اعلان کیا جس کے تحت کم آمدنی والے خاندانوں کو جولائی 2025ء تک دو لاکھ سولر کٹس مفت تقسیم کی جائیں گی۔ ان کٹس میں سولر پینلز، پنکھا، تین بلب، بیٹری بیک اپ، اور موبائل چارجر شامل ہیں۔

بلدیہ عظمیٰ کراچی کی مرکزی عمارت گزشتہ سال ہی سولر پر منتقل کر دی گئی جہاں 259 پینلز لگائے گئے جو یومیہ تقریباً 700 یونٹ بجلی پیدا کرتے ہیں۔

وزیراعلیٰ کے بقول رواں سال صوبے میں 656 سکولز، 24 لائبریریاں اور دیگر سرکاری عمارتیں سولر پر منتقل کردی جائیں گی۔ تاہم فلیٹس کے مکینیوں کے حوالے سے کوئی اقدامات سامنے نہیں آئے۔

ایسا نہیں کہ یہاں سولر کو اپنانے کی رفتار کم ہے بلکہ بیشتر کثیرالمنزلہ عمارتیں پینلز سے بھری ہوئی نظر آتی ہیں۔ تاہم فلیٹس کے مکین ضرورت کے مطابق سولر کا فائدہ نہیں اٹھا سکتے۔&nbsp;

<h2>بلڈنگ کی چھت پر جگہ کم اور ہر فلیٹ والا سولر پینلز لگونا چاہتا ہے</h2>

سید زین وصال بتاتے ہیں کہ ان کے لیے سولر انسٹال کرانا آسان نہیں تھا۔ تمام فلیٹس کے واٹر ٹینک چھت پر ہیں جن کی وجہ سے جگہ کم رہ جاتی ہے جبکہ ہر کوئی بجلی کے بھاری بلوں سے جان چھڑانے کے لیے پینل لگانا چاہتا ہے۔ اس لیے بلڈنگ انتظامیہ سے اجازت مشکل سے ملتی ہے۔

&quot;سب سے بڑی پریشانی یہ ہے کہ ساتھ والی بلڈنگز زیادہ اونچی ہیں جن کی وجہ سے ہماری چھت پر دھوپ کا دورانیہ کم ہو جاتا ہے۔ دوسرا مسئلہ یہ ہے کہ چھت اپنی نہیں بلکہ مشترکہ ہے۔ پلیٹیں چوری ہونے کا ڈر رہتا ہے ان کے لیے ہم نے اضافی رقم خرچ کرکے چھت پر کیمرے لگوائے ہیں۔&quot;&nbsp;

تاہم سولر کمپنی &#39;دی فیوچر پاور&#39; کے سی ای او عمادالدین خان بتاتے ہیں کہ انہیں فلیٹس سے چوری سے زیادہ شکایات ہوائی فائرنگ اور گولیاں لگنے سے پینلز کو نقصان پہنچنے کی موصول ہوتی ہیں۔

وہ کہتے ہیں کہ کراچی کا موسم سولر کے حساب سے بہت اچھا ہے۔ اس لیے تمام تر رکاوٹوں اور مشکلات کے باوجود سولر صارفین میں رواں سال 30 فیصد کا اضافہ ہوا ہے۔ یہاں مسئلہ صرف آلودگی ہے جس کی وجہ سے صارفین کو مہینے میں چار بار یعنی ہر ہفتے پینلز کی صفائی کرنا پڑتی ہے۔&nbsp;

ان کا کہنا ہے کہ فلیٹس میں سولر سسٹم کی تنصیب بہت مشکل ہوتی ہے۔ بعض چھتوں اور پینٹ ہاؤسز پر تو جگہ ہوتی ہے لیکن فلیٹس والے بیشتر لوگ گیلری میں پینلز لگواتے ہیں جہاں بمشکل ایک سے دو پلیٹس لگائی جاسکتی ہیں۔ چھوٹا سسٹم لگانا کوئی زیادہ منافع بخش ثابت نہیں ہوتا۔

سولر انرجی کے ماہر ارسلان محمود، بجلی کا سامان بنانے والی نجی کمپنی کے آپریشنز مینیجر ہیں۔ وہ تصدیق کرتے ہیں کہ کراچی میں سولر پر منتقل ہونے والوں کی تعداد لاہور سے کم ہے۔

اس کی بڑی وجہ یہاں کی اونچی عمارتیں ہیں جو دھوپ روکنے کا سبب بنتی ہے اور دوسری وجہ فلیٹ سسٹم ہے جہاں چھت پر پینلز کے لیے کم جگہ دستیاب ہوتی ہے۔

<h2>سیزر سٹرکچرز اور پارکنگ ایریاز میں&nbsp;سولر پینلز کی تنصیب کو رواج دینا ہو گا</h2>

ارسلان محمود کہتے ہیں کہ کراچی کی آبادی کا ایک بڑا حصہ فلیٹس میں رہتا ہے جن کو سستی بجلی کی فراہمی کے لیے اقدامات کیے جانے ضروری ہیں۔ فوری ترجیح یہ ہونی چاہیے کہ فلیٹس کے پارکنگ ایریاز میں ایلیویشن سٹرکچرز بنا کر ان پر پینلز نصب کیے جائیں۔

&nbsp;یوں بہت سی عمارتوں کے لیے سولر سسٹم کا مسئلہ حل ہوجائے گا اور گاڑیاں بھی دھوپ سے بچیں گی۔ اسی طرح بلدیہ عظمیٰ کے اندر موجود تمام بڑے بڑے مالز کی چھتوں اور ان کے پارکنگ ایریاز کو سولر کے لیے استعمال کیا جائے۔

ان کا ماننا ہے کہ کراچی میں بڑے کمرشل پلازہ مالکان و بڑی رہائشی عمارتوں کے مکینوں کو اگر فزیبیلیٹی بنا کر دی جائے تو یہ لوگ اپنی بجلی خود بنائیں گے لیکن اس میں سب سے بڑا کردار نیٹ میٹرنگ کا ہو گا۔ یعنی اگر کے الیکٹرک آگے بڑھے تو یہ مسئلہ باآسانی حل ہوسکتا ہے۔

دوسرا طریقہ یہ ہے کہ دو بلند عمارتوں کے درمیان خالی جگہ پر ایک سٹرکچر لگایا جاتا ہے جسے عام زبان میں سیزر (قینچی) سٹرکچر کہتے ہیں۔ اس سٹرکچر پر پینلز لگا کر دونوں اطراف کے لیے سولر انسٹالیشن کی گنجائش نکالی جا سکتی ہے۔&nbsp;

ارسلان محمود کا کہنا ہے کہ پاکستانی منصوبہ سازوں کو دوسرے ممالک سے سیکھنا چاہیے۔ سعودی عرب سولر پلانٹس لگا کر دارالحکومت ریاض کو مکمل طور پر گرین انرجی پر منتقل کر رہا ہے۔

&quot;ہمارے ہاں کراچی کے اندر اور اطراف میں خالی زمینیوں کو سولر پارکس و پلانٹس کے لیے استعمال کیا جا سکتا ہے۔ حکومت اور کے الیکٹرک یا کوئی دوسری نجی کمپنی جائنٹ وینچر کے ذریعے سولر پراجیکٹ شروع کر سکتی ہے۔&quot;

ان کے بقول شہر کے اردگرد سولر پارکس کی تعمیر اور ان کی دیکھ بھال آسان ہو گی۔ بجلی کی ٹرانسمشن پر اخراجات کم ہوں گے اور سستی بجلی بھی دستیاب ہوگی۔

<h2>کراچی میں نیٹ میٹرنگ صارفین کی تعداد&nbsp;ساڑھے چھ ہزار ہو گئی، مزید اضافے کی توقع&nbsp;</h2>

امپورٹر کمپنی آئی ای سولر انرجیز کے سی ای او سہیل غوری کا ماننا ہے کہ کراچی میں انڈسٹری تیزی سے گرین انرجی کی طرف جارہی ہے۔

ٹیکسٹائل سیکٹر، سیمنٹ، الیکٹرونکس اور آٹوموبائل انڈسٹری سمیت سب بین الاقوامی سٹینڈرڈز اور سرٹفیکیشنز کے لیے سولر کا رخ کررہی ہیں جس کا ملکی ایکسپورٹس کو بہت فائدہ پہنچتا ہے۔ ٹیکسٹائل کی صنعت خاص طور پر ایک قدم آگے ہے۔

ان کے خیال میں کراچی میں سولر کنزیومرز کی تعداد حوصلہ افزا ہے۔اعدادوشمار پر ںظر ڈالتے ہوئے وہ دعویٰ کرتے ہیں کہ ایک اندازے کے مطابق یہاں گھریلو صارفین اس وقت تک دو ہزار میگاواٹ کے سولر سسٹم لگوا چکے ہیں۔ ان میں سے کچھ نیٹ میٹرنگ پر آ رہے ہیں اور کچھ آف گرڈ ہیں۔

ارسلان محمود کا ماننا ہے کہ &#39;کے الیکٹرک&#39; نجی ادارہ ہونے کی وجہ سے اس کی نیٹ میٹرنگ پالیسی سرکاری ڈسکوز کی نسبت آسان ہے۔ اسی لیے یہاں نیٹ میٹرنگ صارفین کی تعداد جو 2023ء میں ساڑھے چار ہزار تھی وہ اب لگ بھگ ساڑھے چھ ہزار تک پہنچ گئی ہے اور مستقبل میں اس تعداد میں مزید اضافہ ہو گا۔

ان کا دعویٰ ہے کہ پاکستان میں سولرائزیشن میں اضافے کا رحجان 2028ء تک جاری رہے گا۔ اگر پارکنگ ایریاز اور سیزر سٹرکچرز پر سولر پلیٹیں لگانے کا رواج پا جاتا ہے تو پھر کراچی میں سولر کی دیکھ بھال کا سب سے زیادہ کام ہو گا اور یقیناً ہزاروں لوگوں کو روزگار ملے گا۔

فلیٹس اور بلند عمارتوں میں رہنے والوں کی سولر انرجی تک رسائی، ناممکن تو نہیں مگر انتہائی مشکل

text

رنچھوڑ لائن کراچی کی تنگ گلیوں سے گزر کر ہرداس سٹریٹ میں جائیں تو یہاں &#39;گجراتی بچاؤ تحریک&#39; (کاٹھیاوار منصوری جماعت ) کا دفتر قائم ہے۔ اس کے دکان جیسے شٹروں پر بڑا سا بینر آویزاں ہے جس پر اردو کے ساتھ گجراتی رسم الخط میں &#39;فری گجراتی کلاس&#39; لکھا ہے۔&nbsp;

پینسٹھ سالہ محمد یونس، اس ہال نما دفتر میں تین طالب علموں کو گجرانی زبان پڑھا رہے ہیں۔ وہ سفید بورڈ پر ایک طرف اردو اور دوسری طرف گجراتی حروف تہجی لکھتے جنہیں بچے بولنے کے ساتھ نوٹ بھی کرتے جاتے ہیں۔

محمد یونس پیشے کے لحاظ سے استاد ہیں جو کراچی کے علاقے ابراہیم حیدری کے رہائشی ہیں۔ وہ ہر اتوار کو ناصرف رنچھوڑ لائن میں بچوں کو بلامعاوضہ گجراتی پڑھانے آتے ہیں بلکہ شہر کے دیگر علاقوں میں بھی اپنی مادری زبان کی کلاسز لیتے ہیں۔&nbsp; 
انہیں پریشانی یہ ہے کہ پاکستان میں گجراتی زبان معدوم ہونے کا خطرہ بڑھ گیا ہے۔ کہتے ہیں کہ اگر یہ زبان ختم ہوئی تو یہاں سے ان کی کمیونٹی کی ثقافتی روایات بھی دم توڑ جائیں گی۔&nbsp;

&quot;کمیونٹی نے بچوں کو گجراتی زبان اور رسم الخط سکھانے کی فری کلاسیں شروع کی ہیں تاکہ اپنی مادری زبان کو بچایا جا سکے۔ اس مقصد کے لیے میں نے گجراتی زبان کا قاعدہ بھی اپنی مدد آپ کے تحت ترتیب دیا ہے۔&quot;&nbsp;

<h2>کبھی گجراتی زبان کراچی میں راج کرتی تھی</h2>

کراچی میں گجراتی ایک زمانے میں بہت اہمیت کی حامل زبان رہی ہے بلکہ گجراتیوں کو ماڈرن کراچی کے بانیوں میں شمار کیا جاتا ہے جو کاروباری طبقے کی پہلی صف میں آتے ہیں۔

کراچی سے تین اخبارات - ملت، وطن اور ڈان - گجراتی میں شائع ہوتے رہے ہیں۔ دس کے قریب چھاپہ خانوں میں گجراتی رسائل اور کتابیں چھاپی جاتی تھیں۔ بھارت سے بھی اخبارات و لٹریچر منگوایا جاتا تھا۔

باوا حیدر خوجہ، گجراتی بچاؤ تحریک کے سیکرٹری اطلاعات ہیں۔ وہ بتاتے ہیں کہ کراچی میں گجراتیوں کی آباد کاری دو سو سال سے بھی پہلے شروع ہوئی۔ قیام پاکستان تک یہاں رہنے والے گجراتی، بلوچ، سندھی، پارسی، مسیحی سب گجراتی زبان بولتے تھے۔

پرانی تصویریں دیکھیں تو یہودی عبادت گاہوں پر بھی گجراتی رسم الخط میں تحریر نظر آتی ہے۔قران پاک، بائبل اور پارسیوں کی مذہبی کتابوں کے علاوہ رومانوی ادب ہو، شاعری یا کمیونسٹ لٹریچر سب کچھ گجراتی زبان میں دستیاب تھا۔&nbsp;

وہ کہتے ہیں کہ تقسیم کے وقت کراچی میں چار گجراتی میڈیم سکول تھے جبکہ دو سندھی میڈیم سکولوں کے پرنسپل گجراتی تھے۔ 1971ء تک نصاب میں گجراتی بطور اختیاری مضمون شامل تھی اور 1974ء تک ٹیکس گوشوارے بھی گجراتی زبان میں بھرے جاتے رہے۔

<h2>بانی پاکستان کی مادری زبان کی پاکستان میں کوئی جگہ نہیں!</h2>

باوا حیدر خوجہ جو خود آن لائن ٹیکسی بزنس سے وابستہ ہیں کا کہنا ہے کہ پھر ایسا ہوا کہ &quot;ہم گجراتیوں نے اپنی مادری زبان کو چھوڑ کر مارکیٹ کی زبان یعنی اردو اور کاروبار کو اپنا لیا۔&quot; سیاسی معاملات نے پیچیدگیوں کو مزید الجھا دیا۔ اب گجراتی چھاپنے والے تین چار پرنٹنگ پریس اور دو اخبارات باقی رہ گئے ہیں۔&nbsp;

&quot;ون یونٹ کی تشکیل اور ماردی زبانوں کی حوصلہ شکنی کا گجراتی پر بہت منفی اثر پڑا۔ اس دور کے کمیونٹی رہنماؤں نے مزاحمت کی بجائے اپنے کاروبار اور اردو کو فوقیت دی جس کا ہمیں کافی نقصان اٹھانا پڑا۔&quot;

وہ کہتے ہیں کہ قائد اعظم محمد علی جناح خود گجراتی تھے لیکن ان کے بنائے ملک میں سرکاری سطح پر ان کی مادری زبان کی ضرورت نہیں رہی اور کمیونٹی کا بھی زبان سے رشتہ کمزور ہو گیا۔ یہاں تک کہ نادرا &nbsp; نے 2017ء میں شناختی فارم میں مادری زبان کے خانے سے گجراتی کو ہٹا دیا۔&nbsp;

&quot;اب تو ہم بچوں سے گجراتی زبان سیکھنے کا کہیں تو وہ سوال کرتے ہیں کہ جب ضرورت ہی نہیں تو ہم اسے کیوں سیکھیں؟ لیکن ہمارے لیے یہ جذباتی معاملہ ہے۔&quot;&nbsp;

تحریک کے ایک اور رہنما محمد انوار بتاتے ہیں کہ 1974ء سے 1984ء تک کا عرصہ کراچی میں گجراتی زبان پر بہت بھاری ثابت ہوا۔ یہاں بوہرہ، پارسی، میمن، ہندو برادری و دیگر گجراتی زبان بولتی سمجھتی ہے لیکن لکھنا پڑھنا کم ہی لوگ جانتے ہیں۔

باوا حیدر کے مطابق گجراتی زبان سے اس ناروا سلوک کے باعث کمیونٹی نے 2019ء میں &#39;گجراتی بچاؤ تحریک&#39; کی بنیاد رکھی تاکہ گجراتی زبان و ثقافت کو بحال کرنے کے لیے جدوجہد کی جائے۔&nbsp;

<h2>گجراتی زبان کتنے لوگ بولتے ہیں؟</h2>

دنیا بھر میں گجراتی بولنے والوں کی آبادی چھ کروڑ سے زائد ہے جن میں سے لگ بھگ ساڑھے پانچ کروڑ &nbsp;لوگ بھارت میں رہتے ہیں۔ یہ بھارت میں بولی جانے والی چھٹی بڑی زبان ہونے ساتھ ریاست گجرات کی سرکاری زبان بھی ہے۔

تعمیراتی شعبے سے وابستہ اعظم گھانچی، آل پاکستان گجراتی فیڈریشن کے صدر ہیں۔ ان کے بقول پاکستان میں گجراتی بولنے والوں کی آبادی لگ بھگ 35 لاکھ ہے جن کی اکثریت کراچی میں مقیم ہے۔&nbsp;

&quot;یہاں گجراتیوں میں خوجہ اسماعیلی، خوجہ شیعہ، خوجہ سنی، میمن، گھانچی، کاٹھیاواڑی، جونا گڑھی، کچھی، مومنہ اسماعیلی، مومنہ شیعہ، مومنہ سنی، سپاہی، چھیپا، پارسی، گجراتی ہندو و دیگر برادریاں شامل ہیں لیکن ہماری زبان ختم ہوتی جا رہی ہے۔&quot;&nbsp;

گجراتی، ادب و ثقافت، آرٹ کلچر، شاعری اور علوم و فنون کے لحاظ سے وسیع زبان ہے جس میں ڈیجیٹل دنیا کے ساتھ چلنے کی بھرپور صلاحیت موجود ہے۔&nbsp;

بھارت میں اس زبان کے اپنے &nbsp;اے آئی ماڈلز، جنریٹو وائس اے آئی الگورتھم، سپیچ رکگنیشن ماڈلز، سپیچ اینالیٹکس ماڈلز، سمارٹ اسسٹینس اور چیٹ بوٹس وغیرہ موجود ہیں لیکن پاکستان میں ڈیجیٹل کنٹینٹ تو دور، گجراتی زبان پڑھنے لکھنے والے بھی کم ہوتے جارہے ہیں۔

<h2>&#39;پانچ سال میں تین ہزار بچے گجراتی پڑھنا لکھنا سیکھ چکے ہیں&#39;</h2>

گجراتی بچاؤ تحریک کے رہنماؤں کو شکوہ ہے کہ کراچی کی لائبریریوں یہاں تک کہ قائد اعظم ریزیڈینسی کی لائبریری سے بھی گجراتی کتابوں کو ہٹا دیا گیا ہے۔ جامعہ کراچی میں بنگالی ڈیپارٹمنٹ بنایا گیا ہے لیکن گجراتی زبان پر کام نہیں ہو۔

وہ کہتے ہیں کہ&#39;عائشہ باوانی سکول&#39; گجراتی میمن لوگوں نے بنایا تھا مگر وہاں بھی گجراتی نہیں پڑھائی جا رہی۔ حال یہ ہے کہ اب گجراتی کے استاد ختم ہو گئے ہیں۔ اس سب کے باوجود گجراتی کمیونٹی کے سیاسی رہنما خاموش ہیں۔

محمد یونس اردو-گجراتی لغت کی کمی شدت سے محسوس کرتے ہیں۔ وہ لغت مرتب کرنے کا کام ہاتھ سے کر رہے ہیں۔ وسائل اور نوجوانوں کی مدد حاصل نہ ہونے کے باعث ٹیکنالوجی کا استعمال نہیں کر پارہے جس کی وجہ سے اس میں کافی وقت لگے گا۔

گجراتی بچاؤ تحریک کے رہنماؤں کا دعویٰ ہے کہ ان کی کوششوں کے نتیجے میں 2020ء سے اب تک آن لائن اور روایتی کلاسز ملا کر تین ہزار سے زائد بچے گجراتی زبان لکھنا پڑھنا سیکھ چکے ہیں۔

محمد یونس بچوں کو پڑھاتے ہوئے کہتے ہیں کہ وہ مایوس نہیں ہیں، اپنی تعلیمی ضرورت پوری کرنے کے لیے وہ مادری زبان کی کتابیں خود مرتب کر رہے ہیں اور ٹیبلوز بھی لکھ رہے ہیں۔

<h2>گجراتی کا دیو ناگری سے ملتا جلتا رسم الخط اس کے آڑے آ گیا&nbsp;</h2>

گجراتی زبان کا اپنا رسم الخط ہے جو ہندی کے رسم الخط (دیوناگری) سے ملتا جلتا ہے۔ بھارت کی بیشتر زبانیں جن رسم الخط میں لکھی جاتی ہیں ان کا تعلق ایک ہی خاندان سے ہے۔ بنگالی زبان کا رسم الخط بھی اسی خاندان سے ہے اور سکھ پنجابی جس رسم الخط میں لکھتے ہیں وہ بھی اسی گروپ سے ہے۔ برصغیر میں رسم الخط اور مذہبی شناخت کے درمیان تعلق بہت گہرا ہو گیا ہے۔ اردو، سندھی اور پشتو کا رسم الخط عربی اور فارسی کے خاندان ہے۔

لسانیات کے بعض ماہرین کا خیال ہے کہ پاکستان میں گجراتی زبان اپنے رسم الخط کی وجہ سے کمزور پڑ رہی ہے۔ پاکستان میں اس کو پڑھنے اور لکھنے والے لوگوں کی تعداد بہت قلیل رہ گئی ہے۔

محمد یونس نے بتایا کہ ہندو دھرم کے لوگ اپنی مذہبی کتابیں دیوناگری رسم الخط میں ہونےکے باعث گجراتی رسم الخط سیکھنے میں زیادہ دلچسپی رکھتے ہیں۔ آغا خانی کمیونٹی کو گجراتی زبان کی ضرورت پڑتی ہے۔

کشور کمار اپنے بچوں کو گجراتی کلاس پڑھانے تحریک کے دفتر لائے ہیں۔ وہ بتاتے ہیں کہ ہندو برادری کے نوجوان کراچی کے کئی علاقوں میں گجراتی زبان کے لیے کام کررہے ہیں جو بلا معاوضہ گجراتی کی کلاسز بھی پڑھاتے ہیں۔

ہندو برادری کی تنظیم دی ایجوکیشن سنستا، کاٹھیاواڑی ہندو سماج، شری سوامی نرائن مندر اور خوجہ (پیرائی) شیعہ اثناء عشری جماعت کراچی آن لائن اور فری کلاسز کے ذریعے اپنے لوگوں کو گجراتی کی تعلیم دے رہی ہیں۔&nbsp;

<h2>کیا گجراتی فلمیں زبان کے بقا میں کوئی کردار ادا کر پائیں گی؟</h2>

گجراتی بچاؤ تحریک، کراچی میں اپنی کمیونٹی کو بھارت میں بننے والی گجراتی فلموں سے بھی روشناس کرارہی ہے۔ اعظم گھانچی بتاتے ہیں کہ سوشل میڈیا پر اس تحریک کی کوشوں کے بعد گجراتی فلم سازوں اور ڈسٹری بیوٹرز نے ان سے رابطہ کیا ہے تاہم ابھی تک اس میں کوئی پیشرفت نہیں ہوئی۔تحریک کے رہنما پرعزم ہیں کہ کمیونٹی کی سطح پر کام ہو رہا ہے، آہستہ سہی مگر یہ جاری رہے گا۔ یہاں کلچرل تقریبات منعقد کی جاتی ہیں، کھوجہ جماعت محرم میں گجراتی مشاعرہ کراتی ہے اور دو گجراتی لائبریریاں بھی عوام کے لیے جلد کھول دی جائیں گی۔

&quot;ہم اپنی مادری زبان کو بچانے کے لیے مختلف سیاسی جماعتوں کے رہنماؤں سے بھی رابطے میں ہیں لیکن اب تک کوئی کامیابی نہیں ملی۔ ہمارا حکومت سے مطالبہ ہے کہ وہ گجراتی زبان کی بحالی کے لیے مشاورت اور اقدامات کرے۔&quot;

نور فاطمہ

فلیٹس اور بلند عمارتوں میں رہنے والوں کی سولر انرجی تک رسائی، ناممکن تو نہیں مگر انتہائی مشکل

کبھی کراچی میں راج کرنے والی گجراتی زبان: 'ہم نے اپنے کاروبار کو فوقیت دی اور مارکیٹ کی زبان کو اپنا لیا'