ڈیرہ اسماعیل، خیبر پختونخوا کے جنوبی اضلاع میں کئی حوالوں سے اہمیت کا حامل ہے۔ اس کے مشرق اور جنوب میں اس کی سرحدیں پنجاب کے شہروں میانوالی، بھکر اور ڈیرہ غازی خان سے ملتی ہیں جبکہ بلوچستان کے شہر ژوب سے اس کی سرحد تحصیل درازندہ کے ذریعے ملتی ہے، پھر&nbsp; اس کے پڑوس میں لکی مروت، ٹانک اور جنوبی وزیرستان کے اضلاع ہیں۔

تینوں صوبوں&nbsp; کے سنگم پر یہی ایک بڑا شہر ہے، اسی لئے لوگ اپنی مختلف ضروریا ت کے لئے اسی شہر کا رُخ کرتے ہیں۔ ملحقہ قبائلی اضلاع اور 60 کلومیٹر کے فاصلے پر ضلع ٹانک میں امن و امان کی بگڑتی صورتحال اور ان علاقوں میں صحت اور دیگر سہولیات کی عدم دستیابی کی وجہ سے وہاں کے زیادہ تر خاندان جز وقتی اور کل وقتی ڈیرہ اسماعیل خان میں رہائش اختیار کر چکے ہیں۔جبکہ کئی خاندان اپنے بچوں کی معیاری تعلیم اور بہتر مستقبل کے لئے عارضی بنیادوں پر اس شہر میں رہائش پذیر ہیں۔

سولہ لاکھ سے بھی زائد آبادی والے اس شہر میں تین بڑے ہسپتال، ڈسٹرکٹ ہیڈکوارٹر ہسپتال، ڈسٹرکٹ ہیڈکوارٹر زنانہ ہسپتال اور مفتی محمود ہسپتال موجود ہیں۔جہاں ضلع ڈی آئی خان کے علاوہ ٹانک، پیزو، درازندہ، بھکر، وانا، جنڈولہ، مکین، دریا خان اور ملحقہ علاقوں سے مریض لائے جاتے ہیں۔

ان مریضوں کی اکثریت خواتین اور بچوں پر مشتمل ہوتی ہے، ان تین ہسپتالوں کے علاوہ ڈیرہ اسماعیل خان شہر میں بیسیوں پرائیویٹ ہسپتال بھی ہیں لیکن نہ صرف ضلع بھر بلکہ پورے جنوبی ریجن میں بچوں کے علاج کے لیے کوئی مناسب اور مخصوص ہسپتال موجود نہیں ہے۔

ماضی میں برسر اقتدار آنے والی تمام حکومتوں ، بشمو ل پاکستان تحریک انصاف جو دو بار صوبے کی باگ دوڑ سنبھال چکی ہے، نے ہمیشہ یہاں چلڈرن ہسپتال تعمیر کرنے کا وعدہ تو ضرور کیا، مگر کبھی اس وعدے کو وفا کرنے کے لئے عملی طور پر کچھ نہیں کیا۔ یہی وجہ ہے کہ مریض بچوں کی اکثریت کو ملتان، پشاور، لاہور یا اسلام آبادکے ہسپتالوں میں بھیج دیا جا تا ہے۔

میڈیسن کمپنی میں بطور ایس ٹی ایم کام کرنے والے ڈی آئی خان کے نوجوان محمد عامر بتاتے ہیں ان کا چار سالہ بیٹا جب بھی بیمار ہوتا ہے تو وہ&nbsp; اسے ملتان لے جاتے ہیں کیونکہ انہیں ڈی آئی خان میں بچوں کے بہتر علاج کے لیے کسی بھی ماہر امراض اطفال پر&nbsp; اعتماد نہیں۔

&quot;ڈی ایچ کیو میں بچوں کی مختلف بیماریوں جیسے یرقان، نیورو پروبلم (پیدائش کے وقت سانس میں مشکلات کی وجہ سے دماغ کو پہنچنے والے نقصان )، ٹائیفائڈ، دماغی امراض، ہڈیوں کی کمزوری (اوسٹیو پوریسس)، پیدائش کے بعد جھٹکے لگنا جیسی&nbsp; بیماریوں کا علاج یہاں ممکن نہیں ان بچوں کو بھی دیگر شہروں میں لے جایا جاتا ہے&quot;۔

&nbsp;ڈیرہ اسماعیل خان کے زنانہ ہسپتال میں روزانہ درجنوں بچوں کی پیدائش ہوتی ہے، کئی سال قبل تعمیر ہونے والے زنانہ ہسپتال کے لیے شاید اب مزید بچوں کی دیکھ بھال کی گنجائش ممکن نہیں۔ نرسری وارڈ میں گنجائش نہیں ہوتی اور ایک بیڈ پر دو دو خواتین اور ان کے نومولود بچے زیر علاج ہوتے ہیں۔

ڈسٹرکٹ ہسپتال ڈیرہ اسماعیل خان میں زچہ و بچہ ڈپارٹمنٹ قائم تھے بعدازاں 1981 میں ڈسٹرکٹ زنانہ ہسپتال کو الگ کر کے نئی بلڈنگ دی گئی۔

محمد عامر کہتے ہیں کہ بچوں اور خواتین کے علاج کے لئے ضلع بھر میں نجی ہسپتالوں اور کلینکس کا رخ کیا جاتا ہے، جہاں قابل ڈاکٹر موجود ہیں لیکن یہ ہسپتال کم آمدنی والے اور متوسط طبقے کی پہنچ سے باہر ہوتے ہیں۔

بچوں کے لئے مخصوص ہسپتال کی عدم موجود گی کے حوالے سے ڈپٹی ڈسٹرکٹ ہیلتھ آفیسر، ڈیرہ اسماعیل خان ڈاکٹر فاروق گل نے لوک سجاگ سے گفتگو کرتے ہوئے بتایا کہ اس وقت&nbsp; ضلعی اور زونل ہیلتھ کوارٹرز پر مریضوں کا بہت دباؤ ہے۔

&quot; اتنی بڑی تعداد میں مریض آتے ہیں کہ دیگر سہولتوں کے ساتھ ساتھ ادویہ بھی کم پڑ جاتی ہیں&nbsp; اور بہتر دیکھ بھال بھی نہیں ہو پاتی۔ خاص طور پر زنانہ ہسپتال میں روزانہ 25 سے 28 بچے پیدا ہوتے ہیں&quot;۔

ہسپتال کے ریکارڈ کے مطابق بچوں کی پیدائش کے فورا&quot; بعد تشویش ناک حالت یا درپیش مرض کے لیے مناسب سہولیات نا ہونے کی وجہ سے روزانہ دو سے چار بچوں کو ملتان یا اسلام آباد ریفر کیا جاتا ہے۔ کچھ والدین بذات خود اپنوں بچوں کو دیگر شہروں میں علاج کے لیے لے جاتے ہیں۔اس طرح ایک ماہ میں اوسطاً 90 بچے دوسرے ہسپتالوں کو ریفر کیے جاتے ہیں۔

&nbsp;نیشنل لیبارٹری آف میڈیسن کی رپورٹ کے مطابق نوزائیدہ بچوں میں سے تقریباً 65 فیصد اموات صرف 10 ممالک میں ہوتی ہیں۔ ان میں سے زیادہ تر ممالک ایشیا میں واقع ہیں۔

ان ٹاپ ٹین ممالک میں پاکستان تیسرے نمبر پر ہے۔ ملک میں ایک اندازے کے مطابق سالانہ تین لاکھ نوزائیدہ بچوں کی اموات ہوتی ہیں۔

تازہ ترین دستیاب اعداد و شمار بتاتے ہیں کہ پاکستان میں نوزائیدہ اموات کی شرح 42 فی 1000 زندہ پیدائش ہے، یعنی زندہ پیدا ہوانے والوں میں 42 کا پیدائش کے بعد انتقال ہو جاتا ہے۔

عالمی بینک کے اعداد و شمار کے مطابق بھارت میں 20 اور افغانستان میں 35 فی 1000 زندہ پیدائش نوزائیدہ اموات کی شرح ہے۔

یونیسف کی 2015ء میں شائع ہونے والی رپورٹ میں بتایا گیا تھا کہ پاکستان میں ایک ماہ سے کم عمر پانے والے 77 فیصد نوزائدہ بچے پیدائش کی پیچیدگیوں کا شکار ہوتے ہیں۔

ڈاکٹر فاروق کہتے ہیں کہ&nbsp; روزانہ دو درجن سے زائد بچوں کی پیدائش کی وجہ سے&nbsp; نرسری وارڈ میں بھی جگہ کم پڑجاتی ہے، کیونکہ نومولود بچوں کی ابتدائی نگہداشت کے لئے انہیں وہاں رکھنا پڑتا ہے۔ جبکہ بعض اوقات دوران پیدائش ہونے والی پیچیدگیوں کے باعث بھی بچے کی جان کو خطرہ ہوتا ہے۔

وہ کہتے ہیں کہ ڈی آئی خان میں بچوں کے لئے الگ سے ہسپتال موجود ہو تو نہ صرف نرسری وارڈ سے اضافی بوجھ کم ہو جائے گا بلکہ بچوں کی شرح اموات میں کمی بھی ہو گی، کیونکہ بعض کیسز میں بچوں کی حالت ایسی نازک ہوتی ہے کہ ملتان، پشاور یا کسی اور شہر پہنچنے سے پہلے ہی وہ دم تو ڑ جاتے ہیں۔

ڈاکٹر فاروق گل بتاتے ہیں کہ بطور ڈاکٹر اور بحیثیت ڈپٹی ڈی ایچ او، ڈیرہ اسماعیل خان میں&nbsp; چلڈرن ہسپتال کے قیام کے لیے انہوں نے ہر دروازہ کھٹکھٹایا۔ سابق وفاقی وزیر علی امین گنڈہ پور سے بھی درخواست کی۔ انہوں نے چلڈرن ہسپتال کے قیام کا وعدہ کیا لیکن دس سال صوبائی اور وفاقی دور گزارنے کے باوجود اس پر کسی قسم کی پیش رفت ممکن نہیں ہوسکی۔

&nbsp;چائلڈ سپیشلسٹ ڈاکٹر اکرام اللہ کہتے ہیں کہا کہ ڈیرہ اسماعیل خان میں چلڈرن ہسپتال کا نہ ہونا صوبائی حکومتوں اور یہاں کے منتخب نمائندوں کی کارکردگی پر سوالیہ نشان ہے۔چلڈرن ہسپتال کے قیام سے بچوں کی شرح اموات میں یقینی طورپر کمی آئے گی۔

مسلم لیگ(ن) کے سابق ڈویژنل صدر یوتھ اور سرگرم ورکر رحمت اللہ خان عرف گلو نے لوک سجاگ کو بتایا کہ ماضی کی حکومتوں کا سارا زور گلیوں، سڑکوں، نالیوں کی تعمیر اور ٹرانسفارمرز کی تنصیبات پر رہا، جبکہ بارہا چلڈرن ہسپتال کے قیام کا وعدہ کرنے کے باجود اس سلسلے میں کوئی عملی قدم نہیں اٹھایا۔

المددگار فاونڈیشن کے چیئرمین&nbsp; زین خان کا کہنا تھا کہ سابقہ حکومتوں نے دیگر ترقیاتی کاموں پر توجہ ضرور مرکوز رکھی، لیکن بچوں کی شرح اموات میں کمی&nbsp; اور ان کی بہتر نشوونما اور علاج معالجے کے لیے ابھی تک کوئی ٹھوس قدم نہیں اٹھایا۔&quot;

دوائیں، نہ ٹیسٹ نہ ڈاکٹر: ٹنڈو محمد خان کا ضلعی ہسپتال مریضوں کے لیے 'مسائل گاہ' بن گیا

جنوبی اضلاع میں چلڈرن ہسپتال کا وعدہ ایفا نہ ہو سکا

text

خیبر پختونخوا کے جنوبی اضلاع خصوصاً ڈیرہ اسماعیل خان کی زراعت اور پینے کے پانی کیلئے خصوصی اہمیت کی حامل چشمہ رائٹ بنک کینال(سی آر بی سی) پچھلے سال آنے والے بدترین سیلاب کے باعث متعدد جگہوں سے ٹوٹ گئی تھی۔ اس نہر کی لمبائی تقریباً تین کلومیٹر ہے اور اب اس کا مرمتی کام طویل تاخیر کے بعد ہیڈ جمعہ شریف سے جھوک عبداللہ تک آخری اور حتمی مراحل میں داخل ہوچکا ہے۔

اس نہر سے سیراب ہونے والے علاقے دامان میں لاکھوں ایکڑ اراضی کو اسی نہر کا پانی لگتا ہے اور اسی علاقے سے ضلع ڈیرہ اسماعیل خان اور صوبہ خیبرپختونخوا کو گندم، گنا، چاول، مکئی، سبزیاں اور دیگر اجناس کی بھاری مقدار فراہم کی جاتی ہے۔

مقامی شوگر مل کے ملازم عبدالرحمٰن نے بتایا کہ سی آر بی سی کے ساتھ آباد زمینوں میں گنا بڑی مقدار میں کاشت کیا جاتا ہے کیونکہ اس نہر سے متصل کراچی روڈ پر تین بڑی شوگر ملیں &#39;چشمہ شوگرملز، میرن شوگر ملز اور چشمہ شوگر ملز ٹو قائم ہیں&#39; جو ان زمینوں میں کاشت ہونے والا سارا گنا خریدتی ہیں اور مقامی کسانوں کو اپنی پیداوار سے اچھی خاصی آمدنی ہوتی ہے۔

پچھلے سال کے بدترین سیلاب نے جہاں درجنوں بستیاں صفحہ ہستی سے مٹادیں وہاں اس نہر میں جگہ جگہ پڑنے والے شگافوں کے نتیجے میں ملحقہ زمینوں کو بھی شدید نقصان پہنچا اور کھڑی فصلیں تباہ ہوئیں، لوگوں کا کروڑوں روپے کا نقصان ہوا اور مقامی آبادی نقل مکانی پر مجبور ہوئی۔ اس نہر کی بحالی کے کام میں تاخیر کے باعث اب یہاں کے لوگوں کو اجناس کی قلت کا سامنا ہے۔

مقامی زمیندار لال خان کیتھران نے بتایا کہ سی آر بی سی کے ٹوٹنے سے اس علاقے میں ایک سال سے زمینیں بنجر اور خشک پڑی ہیں اور یہ سلسلہ چشمہ بیراج سے پنجاب کے ضلع ڈیرہ غازی خان تک پھیلا ہوا ہے۔

&quot;اس نہر کی مرمت کا کام اگرچہ پچھلے سال سے جاری ہے اور ہیڈ جمعہ شریف سے جھوک عبداللہ تک تقریباً تین کلومیٹر تک مختلف شگافوں، موگاجات کی ٹوٹ پھوٹ اور سلیٹوں کے اصل جگہوں سے ہٹ جانے والے حصوں کو مٹی اور کنکریٹ سے دوبارہ بنایا جا رہا ہے لیکن اس میں تاخیر سے لوگوں کا بہت نقصان ہوا ہے جس کے خلاف چھوٹے بڑے مقامی کاشتکاروں نے احتجاجی جلوس بھی نکالے اور دھرنے بھی دیے ہیں۔&quot;

لال خان کے مطابق یہ نہر کندیاں کے قریب دریائے سندھ کے چشمہ بیراج سے نکالی گئی ہے اور اس پر کام کی تاخیر سے علاقہ میں غذائی اجناس کی شدید قلت پیدا ہوچکی ہے اور خشک سالی کے باعث بیسیوں خاندان دیگر علاقوں اور ڈیرہ اسماعیل خان شہر کو ہجرت کرچکے ہیں۔

چشمہ رائٹ بنک کینال پر کام کرنے والے انجینئروں اور دیگر عملے کا کہہنا ہے نہر پر 95 فیصد کام مکمل ہوچکا ہے، تین کلومیٹر کے متاثرہ حصے کی تعمیر کو دو مراحل میں مکمل کیا جارہا ہے، پہلے مرحلے میں نہر کے بیرونی حصے کی مٹی سے بھرائی کی جا رہی ہے جبکہ اندرونی حصے کو کنکریٹ سے مضبوط کیا جا رہا ہے، علاقہ کی اہم ڈسٹری ڈسٹری نمبر 15 پر کنکریٹ سے گیٹ تعمیر کیا جا رہا ہے تاکہ پانی کی تقسیم کو منظم طریقے سے بروئے کار لایا جاسکے۔ اس کی تکمیل سے سات لاکھ ایکڑ زیر کاشت رقبہ سیراب ہوگا۔

اس بارے میں جب منصوبے کے چیف انجنیئر گوھر زمان بھابھہ سے بات کی گئی تو ان کا کہنا تھا کہ چشمہ رائٹ بنک کینال میں آزمائشی بنیادوں پر کچھ پانی چھوڑا گیا تو ایک جگہ پر مسئلے کی نشاندہی ہوئی جہاں تقریباً بیس سے پچس فٹ کا شگاف پڑ چکا ہے۔

سیلاب کی وجہ سے اس جگہ زمین نرم پڑچکی ہے۔ نہر کی تعمیر شروع کرنے سے قبل ماہرین نے خدشہ ظاہر کیا تھا کہ نہر میں شگاف پڑ سکتے ہیں تاہم ان مسائل کو دور کرنے کے لیے کام جاری ہے۔ اگرچہ کسانوں کی شکایات بجا ہیں لیکن انہیں مزید نقصان سے بچانے کے لیے نہر کی بحالی میں احتیاط کے تقاضے ملحوظ رکھے جانا ضروری ہیں۔

سی آر بی سی کی مرمت کا کام مکمل ہونے کے بعد 31 اکتوبر کو نہر میں باضابطہ طور پر پانی چھوڑا جانا ہے، تعمیر کے بعد سی آر بی سی کا 60 فیصد پانی خیبرپختونخوا جبکہ 40 فیصد پانی ڈیرہ غازی خان (پنجاب) کو ملے گا۔

سی آر بی سی سے منسلک دیہاتوں کیلئے یہ نہر زندگی اور موت کا مسئلہ ہے اور اس پورے خطے کے کاروباری، معاشرتی اور سماجی معاملات کا دارومدر اسی نہر کے پانی پر ہے۔ اسی لیے پورے علاقے کے لاکھوں افراد نہر کی مرمت میں تاخیر سے پریشان ہیں اور مرمتی کام کی جلد تکمیل چاہتے ہیں۔ ایک اندازے کے مطابق اس نہر سے براہ راست اور بالواسطہ طور پر تقریباً 12 لاکھ افراد کا روزگار وابستہ ہے۔

نثار بیٹنی

جنوبی اضلاع میں چلڈرن ہسپتال کا وعدہ ایفا نہ ہو سکا

سیلاب سے متاثرہ چشمہ رائٹ بینک کینال کی بحالی میں تاخیر سے ڈیرہ اسماعیل خان میں 12 لاکھ افراد کا روزگار متاثر