سندھ کے 43 کسانوں نے جرمنی کی دو کمپنیوں کو 2022ء کے سیلاب اور اس سے ہونے والے ان کے نقصان کا ذمہ دار ٹھہراتے ہوئے ان سے 10 لاکھ یورو ہرجانہ ادا کرنے کا مطالبہ کیا ہے اور اس سلسلے میں قانونی کاروائی کا آغاز کر دیا ہے۔

دادو، جیکب آباد اور لاڑکانہ کے مختلف دیہات سے تعلق رکھنے والے ان کسانوں کا دعویٰ ہے کہ یہ سیلاب موسمیاتی تبدیلیوں کا شاخسانہ تھا جس کی مرکزی ذمہ داری ترقی یافتہ ممالک میں آلودگی پھیلانے والی بڑی کمپنیوں پر عائد ہوتی ہے۔

ان کسانوں نے 28 اکتوبر کو جرمن کمپنیوں رینش ویسٹ فیلین الیکٹریسٹی ورکس (آر ڈبلیو ای) اور ہائیڈل برگ میٹیریلز کو قانونی نوٹس بھیجے ہیں جس میں چار ہفتوں میں ہرجانہ ادا کرنے کا کہا گیا ہے۔

کسانوں کی معاونت انسانی حقوق کی دو جرمن تنظیمیں &nbsp;یورپی مرکز برائے آئینی و انسانی حقوق (ای سی سی ایچ آر) اور میڈیکو انٹرنیشنل کر رہی ہیں جبکہ مقامی سطح پر نیشنل ٹریڈ یونین فیڈریشن (ٹی این یو ایف) اور ہینڈز ویلفیئر فاؤنڈیشن کسانوں کا ساتھ دے رہی ہیں۔

یہ دو جرمن کمپنیاں یورپ میں وسیع پیمانے پر کاربن کا اخراج کرنے کی ذمہ دار ہیں۔&nbsp;

آر ڈبلیو ای یورپ میں بجلی کی سب سے بڑی کمپنیوں میں سے ایک ہے جو کوئلے پر انحصار کے باعث یورپ کی تاریخ میں بدترین آلودگی پھیلانے والوں میں شامل ہے جبکہ ہائیڈل برگ میٹیریلز دنیا کی بڑی سیمنٹ ساز کمپنیوں میں سے ایک ہے اور سیمنٹ انڈسٹری سب سے زیادہ کاربن خارج &nbsp;کرنے والی صنعت شمار ہوتی ہے۔

<h2>ان دو کمپنیوں کے خلاف ہی کیوں؟</h2>

کسانوں کی معاونت کرنے والے ادارے ای سی سی ایچ آر کی برلن میں مقیم سینئر قانونی مشیر اینابیل بروگمین نے لوک سجاگ کو آن لائن انٹرویو میں بتایا کہ آر ڈبلیو ای اور ہائیڈل برگ ان 180 کمپنیوں میں شامل ہیں جو دنیا بھرکے 70 فیصد صنعتی کاربن کے اخراج کی ذمہ دار ہیں۔ آر ڈبلیو ای کا حصہ 0.68 فیصد بنتا ہے اور ہائیڈل برگ کا 0.12 فیصد ہے۔

وہ کہتی ہیں کہ یہ مقدار بظاہر زیادہ نہیں لگتی لیکن یہ بہت سے ممالک کے کاربن اخراج سے بھی زیادہ ہے۔ کاربن کے عالمی اخراج میں پاکستان کا حصہ 0.51 فیصد بنتا ہے جو آر ڈبلیو ای اور ان دونوں کمپنیوں کے مجموعی حصے سے کم ہے۔ دوسرے الفاظ میں گو پاکستان نے عالمی اخراج میں بہت کم حصہ ڈالا &nbsp;ہے مگر ماحولیاتی تبدیلی کے منفی اثرات کا وہ سب سے زیادہ شکار ہو رہا ہے۔

اینابیل وضاحت کرتی ہیں کہ ان کمپنیوں کے دہائیوں سے جاری کاربن اخراج نے دنیا کے مجموعی درجہ حرارت میں اضافہ کیا ہے جو موسمیاتی تباہیوں کی شدت اور تعدد میں اضافے کا ذمہ دار ہے جس کی ایک مثال پاکستان میں 2022ء آنے والا سیلاب ہے۔

آر ڈبلیو ای کا ماضی ماحولیاتی کارکنوں کے مطالبات کے خلاف جارحانہ رویے سے عبارت ہے۔

جرمن پاکستانی منہاج العارفین یورپ میں ماحولیات کی تحریک میں سرگرم ہیں اور میڈیکو انٹرنیشنل کے ساتھ بطور رضاکار کام کرتے ہیں۔ انہوں نے لوک سجاگ کو بتایا کہ آر ڈبلیو ای نے 2023ء میں لوتزرارت کی کوئلے کی کانوں کے خلاف احتجاج کرنے والے کارکنوں پر 20.7 لاکھ یورو کا مقدمہ کیا تھا۔

اس سے واضح ہو جاتا ہے کہ یہ کمپنیاں ماحولیاتی تباہی کے معاملے کو سنجیدگی سے لیتی ہی نہیں ہیں۔ انہیں صرف منافع کی فکر ہے چاہے دنیا میں کتنے ہی لوگوں کو ان کے اعمال کے برے نتائج بھگتنا پڑیں۔&nbsp;

<h2>کیا جرمن کمپنیوں کی پھیلائی آلودگی کا سندھ کے سیلاب سے تعلق عدالت میں ثابت کیا جا سکے گا ؟</h2>

عام تصور تو یہی ہے ماحولیاتی تباہی ایک غیرواضح اور مبہم سا مسئلہ ہے اور اس کی براہِ راست ذمہ داری کسی پر نہیں ڈالی جاسکتی پھر عدالت میں کسی کو مجرم ثابت کرنے کے لئے جو کچھ درکار ہوتا ہے وہ اس معاملے میں شاید ممکن ہی نہیں ہے۔

لیکن اینابیل سمجھتی ہیں کہ کاربن اخراج اور موسمیاتی تباہیوں کے درمیان علت اور معلول کا رشتہ (causal link) ثابت کرنا ممکن ہے۔ وہ بتاتی ہیں کہ موسمیات کی انتسابی سائنس (climate attribution science) موسمیاتی سٹیشنوں کے ڈیٹا کی مدد سے بتاتی ہے کہ عالمی درجہ حرارت میں اضافے نے سیلاب جیسے شدید موسمی واقعات کے وقوع پذیری ہونے کے امکان اور ان کی شدت میں کس حد تک اضافہ کیا۔&nbsp;

ان کے بقول بہت سے سائنسدان 2022ءکے سیلاب پر تحقیق کر رہے ہیں اور سب متفق ہیں کہ اس سیلاب میں ماحولیاتی تبدیلی کے کردار کا واضح اشارہ موجود ہے۔

اینابیل کیس سے متعلق کہتی ہیں کہ ان کی تنظیم نے اس سیلاب پر تحقیق کرنے والے سائنسدانوں سے ماہرانہ رائے حاصل کی ہے اور مقامی ڈیٹا بھی جمع کر رہی ہے تاکہ ثابت کیا جا سکے کہ ماحولیاتی تبدیلی نے اس واقعے پر کس طرح اثر ڈالا۔

&quot;اگر کمپنیاں نوٹس کا جواب نہیں دیتیں تو ہم اگلے مرحلے میں یہ سب کچھ جرمن عدالت میں پیش کریں گے۔&quot;

<h2>پیرو کے کسان کی قانونی نظیر: سندھی کسانوں کے لیے امید کی کرن</h2>

یہ پہلا موقع نہیں ہے جب کسی کمیونٹی نے آلودگی پھیلانے والی کمپنیوں کو اپنے نقصانات کا ذمہ دار ٹھہرانے کی قانونی کوشش کی ہو۔ فلپائن میں طوفان اوڈیٹ کے متاثرین نے اکتوبر 2025ء میں برطانیہ میں شیل کے خلاف مقدمی دائر کیا ہے۔ اس سے پہلے انڈونیشیا کے جزیرے پاری کے رہائشیوں نے سوئس سیمنٹ کمپنی ہولسِم کے خلاف 2022ء میں سوئٹزرلینڈ میں اور ایک بیلجین کسان نے ٹوٹل اینرجیز کے خلاف مارچ 2024ء میں عدالت کا دروازہ کھٹکھٹایا تھا۔ ان تمام کیسز میں بڑے اخراج کنندگان سے حالیہ یا ممکنہ نقصانات کے ازالے کی مانگ کی گئی ہے۔

جرمنی میں اس مقدمے سے منسلک ادارے جرمنی کے ساول لوسیانو لیویا بنام آر ڈبلیو ای کیس کی قانونی نظیر پر کافی امید لگائے ہوئے ہیں۔

2015ء میں پیرو کے ایک کسان لیویا نے آر ڈبلیو ای پر مقدمہ دائر کیا تھا کہ کمپنی کا اخراج ان کے آبائی شہر ہُواراز کے اوپر موجود گلیشیئر کے پگھلاؤ میں تیزی لایا جس کے نتیجے میں نزدیک واقع پالکا کوچا جھیل میں پانی کی سطح بلند ہو گئی اور پورا شہر تباہ کن سیلاب کے خطرے سے دوچار ہو گیا۔

اینابیل بروگمین کہتی ہیں کہ اگرچہ &nbsp;کسان لیویا کیس ہار گیا کیونکہ یہ &nbsp;ثابت نہیں ہوا &nbsp;کہ ان کے گھر کو سیلاب سےکس حد تک خطرہ تھا۔ تاہم عدالت نے اس مقدمے میں ایک اہم نظیر &nbsp;قائم کر دی کہ جرمن ٹارٹ قانون کے تحت آر ڈبلیو ای جیسے کاربن میجرز کو اخراج کے باعث ہونے والے نقصانات کا ذمہ دار ٹھہرایا جا سکتا ہے۔

ان کے مطابق عدالت نے تسلیم کیا کہ 1965ء کے بعد سے آر ڈبلیو ای اور دیگر کاربن میجرز &nbsp;یا تو جانتے تھے کہ ان کے اخراج کے ماحولیات پر تباہ کن اثرات ہوتے ہیں یا پھر یہ جانکاری ان کی دسترس میں تھی اس لئے انہیں یہ معلوم ہونا چاہیے تھا لیکن اس کے باوجود &nbsp;ان کمپنیوں نے کچھ نہیں کیا جو ایک اہم قانونی نقطہ ہے۔

<h2>ماحولیاتی انصاف کے لیے عدالتوں کا دروازہ کھٹکھٹانا کیوں ضروری ہو گیا ہے؟</h2>

میڈیکو انٹرنیشنل کے ساتھ اس کیس پر کام کرنے والی ماحولیاتی انصاف کی آرگنائزر کارین زینِگ اس مقدمے کی ایک اور اہم جہت کی جانب توجہ دلاتی ہیں۔ فرینکفرٹ سے آن لائن انٹرویو میں انہوں نے لوک سجاگ کو بتایا کہ مقامی سطح کے گروہوں کا اپنی ریاستوں پر انحصار کرنے کے بجائے کارپوریشنز کو جوابدہ ٹھہرانے کے لیے براہِ راست قانونی کارروائی کی طرف آنا حالیہ سیاسی تناظر میں بہت اہمیت رکھتا ہے۔

وہ کہتی ہیں کہ پچھلے چند برسوں میں گلوبل نارتھ (ترقی یافتہ ممالک) میں ایسی حکومتیں برسراقتدار آئیں جنہوں نے سماجی، معاشی اور ماحولیاتی تبدیلی کی پالیسیوں کا خاتمہ کر دیا ہے یا ایسا کرنے کے درپے ہیں۔ان کا ماننا ہے کہ اب کوئی ایسی سیاسی قوت باقی نہیں رہی جو &nbsp;ماحول دوست پالیسیوں (یا گرین ٹرانزیشن کے عمل) کو عملی جامہ پہنانے پر آمادہ ہو اس لیے ماحولیاتی انصاف کے مقصد کو آگے بڑھانے کے لیے دوسرے ایوانوں تک پہنچنا پہلے سے زیادہ ضروری ہو گیا ہے۔

ان کے مطابق یہی اس مقدمے کی اہمیت ہے۔ اگر جرمن عدالت نے فیصلہ کسانوں کے حق میں دیا تو یہ دنیا بھر میں موسمیاتی تبدیلی سے متاثرہ کمیونیٹیز کے لیے ایک نئی راہ کھول سکتا ہے۔

کارین زیننگ کہتی ہیں کہ کسانوں کے حق میں فیصلہ آنے کا مطلب یہ ہوگا کہ کارپوریشنز کو اپنی پیداواری لاگت میں وہ ماحولیاتی نقصان کی قیمیت بھی شامل کرنا پڑے گی جو ابھی وہ غریب ملکوں کے عوام پر منتقل کر کے بچ جاتی ہیں۔ اس صورت میں موجودہ طریقہ کار منافع بخش نہیں رہے گا اور نئے زیادہ ذمہ دارانہ اور منصفانہ پیداواری ماڈل کی ضرورت پڑے گی۔

<h2>&quot;ہم صرف اس لیے خاموش نہیں رہ سکتے کہ دشمن بڑا ہے&quot;</h2>

اس کیس میں کسانوں کی مدد گار تنظیم این ٹی یو ایف کے سیکریٹری جنرل ناصر منصور کہتے ہیں کہ ہر سال کلائمیٹ کانفرنس (سی او پی) کے موقع پر عموماً سب سرگرم ہو جاتے ہیں لیکن اب تک موسمیاتی احتساب کا مطالبہ کرنے کے لیے قانونی راستہ اختیار نہیں کیا گیا۔ یہ مقدمہ انصاف کے دروازے کھولے گا۔

آر ڈبلیو ای اور ہائیڈل برگ &nbsp;قانونی نوٹسز کے نتیجے میں مذاکرات پر آمادہ ہو سکتے ہیں، معاوضہ کی پیشکش کر سکتے ہیں یا انکار کر سکتے ہیں۔ انکار &nbsp;کی صورت میں دعویٰ جرمنی کی عدالت میں چلا جائے گا۔

اگر ایسا ہوا تو یہ عمل طویل، پیچیدہ اور مہنگا ہونے کا امکان ہےجس میں ماہرین کی گواہیاں، موسمیاتی ماڈلز اور متعدد اپیلیں شامل ہوں گی۔ اس نوعیت کے مقدمات عموماً سالوں چلتے ہیں اور آر ڈبلیو ای اور ہائیڈل برگ جیسی بڑی کمپنیوں &nbsp;کے پاس بے شمار وسائل اور بہترین وکلاء موجود ہیں۔

تاہم اس کوشش میں شامل لوگ یہ سب جانتے ہیں اور یاد دہانی پر کہتے ہیں کہ وہ اس کے لیے تیار ہیں۔ میڈیکو انٹرنیشنل کی کارین زینِگ کارین کا عزم &nbsp;اس بات کی تصدیق &nbsp;کرتا ہے۔ &quot;ہم صرف اس لیے خاموش نہیں رہ سکتے کہ دشمن بڑا ہے۔ ضروی ہے کہ وہ حقائق کا سامنا کریں، جتنے بڑے وہ ہیں ان کی ذمہ داریاں بھی اتنی زیادہ ہیں۔&quot;

<h2>&quot;ہم نے اتنا کچھ کھو دیا کہ کوئی رقم ہماری اصل تکلیف کا ازالہ نہیں کر سکتی&quot;</h2>

ضلع دادو کے گاؤں دید شریف کے عبدالخالق اس مقدمے کے 43 مدعیان میں شامل ہیں۔ 2022ء کے تباہ کن سیلاب میں ان کی 60 ایکڑ زرعی اراضی کو اتنا نقصان پہنچا تھا کہ اگلے دو سال وہاں &quot;گھاس تک نہیں اُگی۔ میں نے سیلاب میں اپنے ساری فصل اور مویشی کھو دیے، بہت سے لوگ گھروں تک سے محروم ہو گئے۔&quot;

انہوں نے لوک سجاگ سے بات کرتے ہوئے کہا کہ 10 لاکھ یورو (تقریباً 32 کروڑ روپے) اگرچہ مدعی کسانوں کے لیے مددگار ہو سکتے ہیں تاہم یہ کیس محض مالی نقصان کے ازالے کے لیے نہیں ہے۔ &quot;ہم نے اتنا کچھ کھو دیا کہ کوئی رقم ہماری اصل تکلیف کا ازالہ نہیں کر سکتی۔&quot;

وہ کہتے ہیں کہ اس کیس کا مقصد ماحولیاتی انصاف کے تصور کو ایک نئی جہت دینا ہے۔ &quot;یہ ناانصافی ہے کہ بڑی کمپنیاں سالہا سال منافع کماتی رہیں اور ان کی پھیلائی آلودگی کے نتائج گلوبل ساؤتھ (ترقی پذیر ممالک) کے عوام بھگتتے رہیں۔&quot;

وزارتِ منصوبہ بندی کی سربراہی میں ہونے والے سروے (پوسٹ ڈیزاسٹر نیڈز اسیسمنٹ) کے مطابق 2022ء کے سیلاب سے ملک میں تقریباً چار کھرب 30 ارب روپے کا معاشی نقصان ہوا جس میں سے 70 فیصد حصہ صرف سندھ کے کسانوں کا تھا۔

لوک سجاگ نے اس معاملے پر تبصرے کے لیے دونوں جرمن کمپنیوں سے رابطہ کیا۔ آر ڈبلیو ای نے تاحال کوئی جواب نہیں دیا جبکہ ہائیڈل برگ نے بذریعہ ای میل نوٹس ملنے کی تصدیق کی ہے۔

&quot;ہمیں 28 اکتوبر &nbsp;کو ایک لاء فرم کی طرف سے خط موصول ہوا ہے جس میں مبینہ طور پر موسمیاتی تبدیلی سے متعلق نقصان کے ازالے کا مطالبہ کیا گیا ہے۔ ہم فی الحال اس خط کا جائزہ لے رہے ہیں۔&quot;

موسمیاتی انصاف: سیلاب سے متاثر 43 سندھی کسانوں نے دو جرمن کمپنیوں پر ہرجانے کا دعویٰ کر دیا

text

منیر احمد شیخوپورہ کی تحصیل شرقپور میں اپنے 10 ایکڑ امرود کے اُجڑے باغ کو حسرت بھری نگاہوں سے دیکھ رہے ہیں جو کبھی سرسبز و شاداب تھا۔ انہوں نے چند ماہ قبل ہی یہ زمین باغ سمیت ٹھیکے پر لی اور اس پر تقریباً 10 لاکھ روپے خرچ کیے۔

انہیں اچھی فصل کی اُمید تھی جس سے اگلے کئی مہینے ان کا گھر چلتا لیکن سیلاب سب کچھ بہا لے گیا۔ اب باغ کی جگہ کیچڑ اور پانی رہ گیا ہے۔

&quot;سیلاب نے ہمیں بہت نقصان پہنچایا ہے، میرا 25 سے 30 لاکھ روپے کا نقصان ہوا ہے۔ میں نے تیمیر گرہ (لوئر دیر) کے ایک بیوپاری سے رقم لے کر یہاں لگائی تھی۔ وہ قرضہ سر پر کھڑا ہے اور اگلی فصل کے لیے بیج خریدنے تک کے پیسے نہیں ہیں۔&quot;

وہ بتاتے ہیں کہ انہوں نے مزید 20 ایکڑ زمین ٹھیکے پر لے کر باجرہ، مکئی اور دھان لگایا تھا۔ وہ کھیت بھی مکمل طور پر تباہ ہو گئے جس سے انہیں تقریباً 50 لاکھ روپے کا نقصان ہوا ہے۔

دریا تو اب پر سکون ہو گئے ہیں مگر منیر احمد جیسے ہزاروں کسان ایک نئے بحران سے دوچار ہیں۔

پنجاب میں 1988 کے سیلاب کے بعد اتنے بڑے پیمانے پر نقصان کبھی نہیں دیکھا۔ ستمبر کے آخر میں محکمہ زراعت پنجاب کے زیر کنٹرول کام کرنے والے ادارے کراپ رپورٹنگ سروس کی ابتدائی رپورٹ کے مطابق سیلاب سے تقریباً 25 لاکھ ایکڑ فصلیں متاثر ہوئیں جس سے لاکھوں خاندانوں کی روزی روٹی داؤ پر لگ گئی۔

<h3>کھیت ڈوبے تو منڈیاں سونی ہوگئیں</h3>

سیلاب سے پنجاب میں سبزیوں کا زیرِ کاشت ایک لاکھ 15 ہزار ایکڑ میں سے 51 ہزار ایکڑ (44 فیصد) رقبہ متاثر ہوا۔ ان میں زیادہ سبزی پیدا کرنے والی لاہور، ساہیوال اور فیصل آباد ڈویژن سب سے زیادہ متاثر ہوئیں ہیں جہاں پر بالترتیب ایک لاکھ 75 ہزار، ایک لاکھ 77 ہزار اور چار لاکھ 92 ہزار ایکڑ زرعی ارازعی کو نقصان پہنچا ہے۔

سیلاب سے لاہور جیسے بڑے شہر کی ضرورت پوری کرنے والے اضلاع &nbsp;قصور اور شیخوپورہ بھی شدید متاثر ہوئے جس سے آنے والے دنوں میں سبزیوں کی فراہمی میں کمی آسکتی ہے۔

ضلع شیخوپورہ براہِ راست دریائے راوی کے قہر کا شکار ہوا۔ سیلاب نے شرقپور کے علاقے میں تقریباً پانچ کلومیٹر اندر تک درجنوں دیہات کی زرعی زمینوں کو ڈبو دیا۔ یہاں کے کسان عموماً خریف سیزن میں چاول اور باغات کے ساتھ سبزیاں بھی کاشت کرتے ہیں جو لاہور کی طلب بھی پوری کرتی ہیں۔

شرقپور کے گاؤں بھولے شاہ کے کسان ملک جہانگیر منظور کی بھنڈی، توری، آلو اور لوکی کی فصل مکمل تباہ ہوگئی۔ وہ بتاتے ہیں کہ یہ سبزیاں روز منڈی جا رہی تھیں اور نرخ کم تھے لیکن اب ان کی قیمتیں آسمان کو چھو رہی ہیں۔

اسی طرح فیض پور کلاں کے عبدالستار کہتے ہیں کہ انہوں نے بھنڈی، توری اور لوکی کاشت کیا جس پر فی ایکڑ ایک لاکھ روپے خرچ ہوئے مگر سب ختم ہوگیا۔

ویجیٹیبل ریسرچ انسٹیٹیوٹ فیصل آباد کے پرنسپل سائنٹسٹ غضنفر حماد بتاتے ہیں کہ سیلاب اُس وقت آیا جب گرمیوں کی سبزیاں بھنڈی، کریلا ، ٹنڈے اور دوسری فصلیں تیار تھیں۔ جیسے ہی ان کی رسد متاثر ہوئی تو قیمتوں میں فوراً اضافہ شروع ہوگیا۔

&nbsp;اگست کے آخری ہفتے میں ان سبزیوں کی قیمتیں پچھلے سال کے مقابلے میں بہت زیادہ بڑھ گئیں۔ بھنڈی کی قیمت میں 98 فیصد، کریلے کی87 فیصد، لوکی کی 55 فیصد اور تربوز کی قیمت 36 فیصد زیادہ &nbsp;ہوگئی۔

لاہور میں صارفین کو اب سبزیوں کی قلت اور بڑھتی قیمتوں کا سامنا ہے جو براہِ راست سیلاب سے کھیتوں کی تباہی اور سپلائی چین منقطع ہونے کا نتیجہ ہے۔

راوی روڈ کی سبزی منڈی میں دکاندار محمد فرمان بتاتے ہیں کہ پہلے کریلا شکرگڑھ اور نارووال سے آتا تھا لیکن اب سندھ سے منگوانا پڑتا ہے جس سے ٹرانسپورٹ کی لاگت دگنا ہوگئی ہے۔

&quot;پہلے کریلا 500 سے 600 روپے دھڑی (پانچ کلو) ملتا تھا جو اب ہزار سے 12 سو روپے ہو گیا ہے۔ ہماری فروخت کم ہوگئی ہے اور صارفین بھی پریشان ہیں۔&quot;

<h3>اب آم اور امرود کہاں سے آئیں گے؟</h3>

سیلاب نے پنجاب میں سبزیوں کے علاوہ باغات کو بھی طویل مدتی نقصان پہنچایا ہے۔ کراپ رپورٹنگ سروس پنجاب کے مطابق تقریباً 71 ہزار 467 ایکڑ پر لگے باغات متاثر ہوئے جو کل رقبے کا 12.5 فیصد ہیں۔ ان میں سے 64 ہزار 480 ایکڑ آم کے باغات ہیں۔

باغات ملتان ڈویژن سب سے زیادہ متاثر ہوئے ہیں جہاں اکیلے 38 ہزار 355 ایکڑ آم &nbsp;کے پودے زیرِ آب آ گئے۔

مظفر گڑھ ملک میں سب سے زیادہ آم پیدا کرنے والے اضلاع میں سے ایک ہے۔ یہاں کے ڈپٹی ڈائریکٹر زراعت حبیب الرحمان بتاتے ہیں کہ اس ضلعے میں 14 ہزار ایکڑ باغات زیرِ آب ہیں جن میں 80 فیصد پودے تین سے چار سال پرانے ہیں۔ ان کے بچنے کے امکانات نہ ہونے کے برابر ہیں۔

مینگو ریسرچ سٹیشن شجاع آباد کے سینیئر سائنٹسٹ جاوید اقبال کے مطابق کھڑے پانی میں فنگس اور جراثیم تیزی سے پھیلتے ہیں جو درختوں کی جڑوں اور چھال کو نقصان پہنچاتے ہیں۔پانی اُترنے کے بعد بھی بیماری برقرار رہتی ہے اور درختوں کی بحالی کے لیے جراثیم کش ادویات اور کھاد کی ضرورت ہوتی ہے۔

یہ سیلاب آم اور دیگر پھلوں کی ملکی پیداوار کے لیے بڑا دھچکا سمجھا جا رہا ہے جس سے کسانوں کو سنبھلنے میں کئی سال لگیں گے۔ سبزیاں اگلے موسم میں دوبارہ بوئی جا سکتی ہیں لیکن پھلدار پوتوں کو پیداوار دینے میں کئی سال لگ جاتے ہیں۔

جاوید اقبال کہتے ہیں کہ آم کا پودا چار سے پانچ سال میں پیداوار دینا شروع تو کردیتا ہے لیکن عروج پر پہنچنے کے لیے 8 سال لگتے ہیں۔ اسی طرح امرود کے پودوں کو بھی پھل دینے میں دو سے تین سال اور مکمل پیداوار تک پہنچنے میں آٹھ سال لگ جاتے ہیں۔

جنوبی پنجاب جہاں پر آم کے باغات زیادہ ہیں تو لاہور ڈیژن کے اضلاع شیخوپورہ اور ننکانہ صاحب امرود کے لیے مشہور ہیں، یہاں پر پنجاب میں امرود کی کل پیداوار کا 41 فیصد حصہ پیدا ہوتا ہے۔ ان دونوں اضلاع میں 28 ہزار ایکڑ رقبے پر امرود کے باغات ہیں جو راوی کے بپھرنے سے بہت زیادہ متاثر ہوئے ہیں۔

منیر احمد کے امرود کے باغ میں پھل سوکھ کر سیاہ ہو چکے ہیں جبکہ ایک اور کسان سلامت علی بتاتے ہیں کہ ان کا دو ایکڑ باغ تھا جو انہوں نے ڈھائی لاکھ روپے فی ایکڑ ٹھیکے پر لیا تھا۔ اس پر ایک لاکھ روپے سے زیادہ فی ایکڑ خرچہ آیا۔ ان کے بقول انہیں تقریباً 8 لاکھ روپے کا نقصان ہوا ہے۔

درجنوں کسان جن کی زمینیں نچلے علاقوں میں ہیں، وہ نہیں جانتے کہ وہ اب اس مشکل سے کیسے نکل پائیں گے۔

<h3>کیا سیلاب زدہ زمینیں نئی فصل کے لیے تیار ہو پائیں گی&nbsp;</h3>

فیصل آباد کے ویجیٹیبل ریسرچ انسٹیٹیوٹ کے محمد سجاد سعید کا خیال ہے کہ رواں سال کے سیلاب کے معاشی اثرات سنگین ہوں گے۔ طویل مدتی سپلائی گیپ پیدا ہو گا جس سے قیمتیں کئی گنا بڑھ جائیں گی۔

شرقپور کے ملک جہانگیر بتاتے ہیں کہ نچلے علاقوں میں کھیتوں پر پانچ سے چھ فٹ موٹی مٹی اور ریت کی تہہ جم گئی ہے اور ابھی تک پانی کھڑا ہے۔ یہاں اگلی فصل شاید ہی بوئی جا سکے۔

اس نقصان سے ربیع کی سبزیوں گاجر، مولی، شلجم، پالک، دھنیا اور پیاز کی بوائی متاثر ہوگی۔ یہ فصلیں یہاں تاخیر سے لگیں گی یا اس سیزن میں لگ ہی نہ سکیں۔ 
محمد سجاد سعید کہتے ہیں کہ سبزیوں کی زمینوں کی مکمل بحالی میں دو سے تین سال لگ سکتے ہیں۔ کھیتوں سے ریت اور گاد کو صاف کرنے میں برسوں لگیں گے اور مٹی کی زرخیزی بھی متاثر ہوگی۔ باغات کے لیے یہ مدت اس سے بھی زیادہ ہے۔

پاکپتن کے جدت پسند کسان عامر حیات بھنڈارہ کو لگتا ہے کہ اب کچھ چیزوں کی ذخیرہ اندوزی کا خطرہ ہے۔ اس پر نظر رکھنے کی ضرورت ہے کہ کہیں منڈی میں مصنوعی قلت تو پیدا نہیں کی جا رہی۔ تاہم ان کے بقول اصل سوال یہ ہے کہ کیا ربیع سیزن سے پہلے زمینیں نئی فصل کے لیے تیار ہو پائیں گی بھی یا نہیں؟ یہی بات کسانوں کی قسمت کا فیصلہ کرے گی۔

زرعی ماہرین کثیر الجہتی حکمتِ عملی تجویز کرتے ہیں۔ ان کا ماننا ہے کہ سب سے اہم قدم زمینوں سے پانی کی نکاسی ہے تاکہ مزید نقصان سے بچا جا سکے۔ مسئلہ یہ ہے کہ زیادہ تر کسانوں کے پاس نکاسی کے لیے وسائل نہیں ہیں۔

<h3>بحالی کا طویل راستہ ہے مگر امید باقی ہے</h3>

غضنفر حماد تجویز دیتے ہیں کہ حکومت بڑے پیمانے پر جپسم، پوٹاشیم اور سلفیٹ فراہم کرنے کا پروگرام شروع کرے تاکہ زمین کی بحالی ممکن ہو سکے۔ تب تک کسان زیادہ پانی برداشت کرنے والی فصلیں مونگ یا پتوں والی سبزیاں وغیرہ اگا سکتے ہیں جو مختصر مدت میں تیار ہوتی ہیں اور ان سے زمین بھی بہتر ہو گی۔ اروی بھی اچھا انتخاب ہو سکتی ہے۔

باغات کے لیے جاوید اقبال کا کہنا ہے کہ نئے درخت لگانے کا عمل پانی اُترنے کے چار سے پانچ ہفتے بعد شروع کیا جا سکتا ہے۔ بچ جانے والے پودوں کی بحالی میں وقت لگے گا کیونکہ پانی اور گاد درختوں کی صحت مند نشوونما کو روکتے ہیں۔

حکومت پنجاب نے بھی کسانوں کی بحالی کے لیے امدادی پیکج کا اعلان کیا ہے، جس کے مطابق متاثرہ کسانوں کو زیرِ آب زمین کا فی ایکڑ 20 ہزار روپے، ہلاک ہونے والی بکری یا بھیڑ کے لیے 50 ہزار روپے اور بڑے مویشی کے لیے پانچ لاکھ روپے دیے جائیں گے۔

ڈائریکٹر جنرل زرعی اطلاعات نوید عصمت کاہلوں بتاتے ہیں کہ دو ہزار سے زائد ٹیمیں نقصان کا جائزہ لینے کے لیے میدان میں ہیں۔ وہ زمین، مکانات اور مویشیوں کے نقصانات کی تفصیلی رپورٹ تیار کر رہی ہیں۔

تاہم کسان اس امدادی پیکیج اور معاوضے کو ناکافی سمجھتے ہیں۔ منیر احمد کہتے ہیں کہ 20 ہزار روپے میں تو ایک ایکڑ کی بوائی بھی نہیں ہو سکتی۔ &quot;ہم اس سے کیا کریں گے؟&quot; کئی اور کسانوں نے بھی ایسی ہی رائے ظاہر کی ہے۔

شہری علاقوں کے لوگ سمجھتے ہیں کہ سیلاب ختم ہو گیا ہے مگر کسانوں کے لیے مشکلات ابھی شروع ہوئی ہیں۔ ان کے اثرات آنے والے مہینوں میں شہری صارفین کو بھی محسوس ہوں گے۔

محسن مدثر

موسمیاتی انصاف: سیلاب سے متاثر 43 سندھی کسانوں نے دو جرمن کمپنیوں پر ہرجانے کا دعویٰ کر دیا

کھیت ڈوبے تو منڈیاں اُجڑ گئیں: سیلاب نے سبزی اور پھل اگانے والے کسانوں کو برسوں پیچھے دھکیل دیا