ہادیہ بی ایس پارٹ ٹو كی طالبہ ہیں، وہ تحصیل عیسٰی خیل کے ایک چھوٹے سے گاؤں کمرمشانی کی رہائشی ہیں۔ یہاں کے زیادہ تر لوگ کھیتی باڑی اور محنت مزدوری کرتے ہیں، ان کے والد بھی دیہاڑی دار مزدور ہیں جو بمشكل بیٹی كے تعلیمی اخراجات برداشت كر رہے ہیں۔

ہادیہ بتاتی ہیں كہ وہ ضلع میانوالی میں كمرمشانی گرلز گورنمنٹ كالج میں پڑھتی ہیں۔ كالج میں کلاسیں ہیں لیکن ان میں پڑھانے کے لیے اساتذہ نہیں ہیں، لائبریری موجود ہے لیکن اس میں کتابیں نہیں ہیں، جبکہ لیب تک طالبات كی رسائی محض سال میں ایک بار ممكن ہوتی ہے، وہ بھی سالانہ پرچوں کے دوران پریكٹیكل امتحان كے لیے۔

&quot;گورنمنٹ كالج غریب خاندانوں كی لڑكیوں كے لیے واحد امید ہے۔ ہمارے والدین نجی كالجز كے اخراجات كے متحمل نہیں ہو سكتے۔ كالج میں گنتی كی چار اساتذہ موجودہیں، جوافراتفری میں نصاب مکمل کروانے پر زور دیتی ہیں&quot;۔

ہادیہ مزید بتاتی ہیں کہ جو ٹیچر آتی ہیں، انہیں انتظامیہ کی جانب سے بہت زیادہ روک ٹوک کا سامنا رہتا ہے، اسی بات سے تنگ آکر وہ چند مہینوں میں ہی یہاں سے اپنا تبادلہ کروا لیتی ہیں۔

میانوالی کی تحصیل عیسی خیل کی کل آبادی تین لاکھ 74 ہزار ہے، جس میں سے تین لاکھ کے قریب آبادی دیہی اور چوراسی ہزار کے لگ بھگ لوگ شہروں میں رہتے ہیں۔

ضلع میں خواتین کی خواندگی کی شرح صرف 39 فیصد ہے یہ خواندگی کی مجموعی ضلعی شرح سے 22 فیصد کم ہے۔

تحصیل عیسیٰ خیل میں خواندگی کی مجموعی شرح 54 فیصد اور اس تحصیل میں صرف 35 فیصد خواتین پڑھی لکھی ہیں۔

کمرمشانی کی آبادی 36 ہزار افراد پر مشتمل ہے جن میں 18 ہزار سے زائد خواتین اور 17 ہزار کے قریب مرد ہیں۔

كالج میں ایف اے، ایف ایس سی، آئی سی سی، دوسالہ بیچلر ڈگری ایسوسی ایٹ ڈگری آف آرٹس( اے ڈی اے) اور ایسوسی ایٹ ڈگری آف سائنس ( اے ڈی ایس) كی كلاسز پڑھائی جا رہی ہیں۔

رواں برس نومبر میں بی ایس آنر انگلش كی كلاس كا آغاز كیا گیا ہے جس میں ابھی تک 80 طالبات داخلہ لے چكی ہیں، لیكن انہیں پڑھانے كے لیے كسی مستقل ٹیچر كی پوسٹنگ نہیں ہوئی ہے۔

فائزہ بھی انٹرمیڈیٹ پارٹ ٹو كی طالبہ ہیں جو كمر مشانی کے نواحی علاقے پیلا بورنگ سے تعلق ركھتی ہیں۔ وہ بتاتی ہیں كہ ان كے خاندان میں لڑكیوں كو پڑھانے كا رواج نہیں ہے، لیكن انہیں تعلیم حاصل كرنے كا بہت شوق ہے۔ انہوں نے اپنے والدین كی منت سماجت كر كے كالج میں داخلے كی اجازت لی ہے اور اس پر اُفتاد كہ وہ پانچ كلو میٹر پید ل سفر كر كے روزانہ كالج آتی جاتی ہیں۔كالج جا كر بھی جب انہیں ساز گار ماحول میسر نہیں آتا تو وہ مایوس ہو جاتی ہیں۔

&quot;كالج كو رضاکار ٹیچرز كے سہارے چلایا جا رہا ہے ، وہ اسی كالج كی فریش گریجویٹ ہوتی ہیں جو دو سے تین ماہ كی انٹرن شپ پر آتی ہیں۔ تاہم سی آئی ٹی پروگرام كے تحت كچھ ٹیچرز كو سال كے آخر میں تعینات كیا جاتا ہے تاكہ نصاب ختم كروایا جاسكے لیكن اس بار ان موسمی اساتذہ كی بھی كوئی خبر نہیں&quot;۔

مستقل ٹیچر رافعہ کا کہنا ہے کہ پچھلے کچھ سالوں میں طلباء کی تعداد میں نمایاں اضافہ ہوا ہے۔ اس وقت كالج میں طالبات كی تعداد دو ہزارہے۔ جبكہ اتنی بڑی تعداد كو پڑھانے كے لیے محض چار مستقل اساتذہ موجو د ہیں۔

كالج كے سینئر&nbsp; عہدیدار نے نام مخفی رکھنے کی شرط پر بتایا کہ یہاں انگلش، اردو، اسلامیات، مطالعہ پاکستان ،ہیلتھ اینڈ فزیکل ایجوکیشن، سائیكالوجی، ریاضی، ایجوکیشن، کیمسٹری، بائیولوجی، فزکس، ذوالوجی، باٹنی، کمپیوٹر، معاشیات کے مضمون &quot;پڑھائے&quot; جاتے ہیں۔

فی الحال کمپیوٹر، ریاضی، فزکس،&nbsp; بائیولوجی&nbsp; کے علاوہ باقی تمام مضامین کے اساتذہ کی سیٹیں خالی ہیں۔ وہ مزید بتاتے ہیں کہ ایسا نہیں کہ یہاں اساتذہ کی پوسٹنگ نہیں ہوتی، درحقیقت یہ علاقہ پسماندہ ہے، یہاں بنیادی سہولیات کا فقدان ہے، یہی وجہ ہے کہ آنے والی اساتذہ جلد ہی یہاں سے اپنا ٹرانسفر کروا لیتی ہیں۔ پچھلے تین سالوں میں یہاں 11 اور رواں برس سات اساتذہ کی پوسٹنگ ہوئی۔جن میں سے صرف ایک ابھی تک موجود ہیں۔

سائرہ سحرش نے حال ہی میں كمرمشانی گورنمنٹ كالج سے اپنا ٹرانسفر پیلاں گورنمنٹ کالج میں کروا لیا ہے۔ وہ کمر مشانی کالج میں ہیلتھ اینڈ فزیکل ایجوکیشن کی مستقل ٹیچر تھیں، انہوں نے لوک سجاگ سے گفتگو کرتے ہوئے بتایا کہ کالج میں کچھ مسائل انتظامیہ کے سخت رویے کی وجہ سے ہیں۔

&quot;میں فزیکل ایجوکیشن کی استاد ہوں لیکن کالج میں بچیوں کو ورزش اور کھیل کود تک کی سہولت تو درکنار، اجازت بھی میسر نہیں تھی۔پرنسپل صاحبہ نے جو خود ساختہ اصول وضع کر رکھے ہیں وہ ان کے علاوہ کسی کی بات سننا پسند نہیں کرتیں&quot;۔

سحرش کہتی ہیں کہ پرنسپل کو اس بات سے کوئی غرض نہیں ہے کہ طالبات اور اساتذہ کو کن مسائل کا سامنا ہے؟ انہیں صرف اپنی نیک نامی سے سروکار ہے۔کوئی ان سے پوچھنے والا نہیں کہ کالج کو جب فنڈز مل رہے ہیں تو ان کے مطابق سہولیات کیوں فراہم نہیں کی جا رہیں؟

پرنسپل صومیہ نیازی کالج میں سخت رویے کی تردید کرتی ہیں۔ وہ کہتی ہیں کہ&nbsp; وہاں کا ماحول تفریحی ہے۔کسی قسم کی کوئی سختی نہیں ہے، چونکہ یہ علاقہ پسماندہ اور ٹرانسپورٹ کے مسائل ہیں تو اساتذہ جلد ہی اپنا ٹراسفر کرا لیتی ہیں۔

ان کا کہنا ہے کہ وہ کئی انتظامی ذمہ داریوں کے باوجودخود بھی کلاسز پڑھاتی ہیں۔&quot;اساتذہ کی کمی اور کئی مسائل کے باوجود اس سال بھی انٹر میڈیٹ کا رزلٹ اسی فیصد رہا ہے&quot;۔

انہوں نے بتایا کہ سی ٹی آئی پروگرام کے تحت ہائر ایجوکیشن ڈیپارٹمنٹ، ایسے کالجز جہاں اساتذہ کی مطلوبہ تعداد پوری نہ ہو، وہاں اساتذہ کو پانچ ماہ کی عارضی مدت کے لیے بھرتی کرتا ہے۔

&quot;ہم نے رواں برس بھی اس پروگرام كے لیے بھی درخواست دی تھی لیكن اس سال پنجاب بھر میں سی ٹی آئی تعیناتی نہیں کی گئی&quot;۔

وہ کہتی ہیں کہ اس صورت حال سے نپٹنے کے لیے انہوں نے والینٹر ٹیچرز کو بلایا ہے۔ تاکہ طلباء کے امتحانوں کی تیاری بہتر طریقے سے ہو سکے۔

تھرپارکر کا گرلز کالج: یہاں صرف فزکس، زوآلوجی، انگریزی، ریاضی، اردو، اسلامیات، سندھی اور مطالعہ پاکستان کے استاد نہیں ہیں

انوکھا ڈگری کالج جہاں 15 مضامین "پڑھائے" جاتے ہیں لیکن ٹیچر صرف 4 ہیں

text

پچیس سالہ سارہ (فرضی نام) ضلع چکوال کے ایک پسماندہ علاقے سے تعلق رکھتی ہیں۔ وہ راولپنڈی میں قائم نجی ادارے میں ملازمت کرتی ہے اور والد کی وفات کے بعد گھر کی واحد کفیل ہیں۔

سارہ راولپنڈی سکستھ روڈ کے ایک نجی ہاسٹل میں مقیم ہیں اور پچھلے آٹھ ماہ میں دو بار ہاسٹل تبدیل کر چکی ہیں لیکن ان کا مسئلہ جوں کا توں ہے۔

تیسرے ہاسٹل میں بھی مرد سٹاف اکیلے ملنے اور دوستی کرنے کے پیغامات بھیجتا اور ہراساں کرتا ہے۔

ان کا کہنا ہے کہ وہ کئی بار ہاسٹل وارڈن سے بات کر چکی ہے لیکن ان کی طرف سے کوئی قابل ذکر اقدام نہیں اٹھایا گیا۔

وہ کہتی ہیں کہ ہراسانی کے خلاف کارروائی کرنے کے وسائل ان کے پاس نہیں ہیں۔ انہیں کسی کو بتانے کی صورت میں سنگین نتائج کی دھمکیاں دی گئی ہیں اس لیے انہیں ضرر پہنچنے کا اندیشہ بھی رہتا ہے۔

اب وہ ملازمت چھوڑ کر واپس جانے کے بارے میں سوچ رہی ہیں۔

ہری پور سے تعلق رکھنے والی نور(فرضی نام) راولپنڈی کی سیونتھ روڈ پر پچھلے ایک سال سے رہائش پذیر ہے۔ وہ ایک کال سنٹر میں کام کرتی ہے۔

وہ کہتی ہیں کہ ہاسٹل کے مالک کے تبدیل ہونے سے ان کی پریشانی بڑھ گئی ہیں۔

نئے مالک نے ہاسٹل ہی میں دفتر بنا رکھا ہے جس میں نشے کے عادی مردوں کا آنا جانا لگا رہتا ہے۔ یہ لوگ ہاسٹل کی لڑکیوں کو جنسی طور پر ہراساں کرتے ہیں۔ ان کے مطابق ہاسٹل مالک نے چند لڑکیوں کو ان سے دوستی کرنے کا کہا ہے اور نہ کرنے پر ہاسٹل سے نکالنے کی دھمکی دی ہے۔

ڈسٹرکٹ بار راولپنڈی کی ایڈووکيٹ ایمان فاطمہ کہتی ہے کہ عورتیں ایسے تجربات سے گزرنے کے بعد ممکنہ خطرات کے پیش نظر خاموش رہتی ہیں۔ متاثرہ خواتین کو وہ ہمت سے کام لینے کی تاکید&nbsp; کرتی ہیں۔

&quot;پڑھی لکھی عورتیں بھی تحفظ فراہم کرنے والے قوانين سے آگاہ نہیں ہیں۔ اگر انہیں ایسے کسی بھی تجربے یا دھمکی کا سامنا ہے تو اس کے خلاف آواز اٹھائیں۔&quot;

راولپنڈی کے ایک تھانے میں وومن ڈیسک کی آفیسر آسیہ بتول ایمان فاطمہ سے اتفاق کرتی ہیں۔ وہ کہتی ہیں کہ&nbsp; بیشتر خواتین کو اپنے حقوق اور قوانين سے آگاہی&nbsp; نہیں یہ بات ہراسانی کے واقعات رپورٹ کم ہونے کی سب سے بڑی وجہ ہے۔

عباس ذاکر راولپنڈی کے&nbsp; نیو ٹاٶن پولیس سٹیشن میں بطور پی ایس کام کرتے ہیں۔ ان کا کہنا ہے کہ ایسے واقعات اگرچہ معمول ہیں لیکن تھانے میں بہت کم کیسز آتے ہیں۔

اسی تھانے کے محرر محمد توقیر بتاتے ہیں کہ پچھلے دو سال&nbsp; میں ان کے تھانے میں ہراسانی کے&nbsp; 11 کیسز رپورٹ ہوئے ان میں سے چھ واپس لے لیے گئے اور تین مجرموں نے&nbsp; تھانے میں ہی &quot; لے دے&quot;&nbsp; کے صلح کرا لی۔ صرف دو مقدمے عدالتوں تک پہنچے۔

وفاقی محتسب سیکرٹریٹ فار پروٹیکشن اگینسٹ ہراسمنٹ کی 2022ء کی رپورٹ کے مطابق&nbsp; 2018ء سے 2022ء کے درمیان ہراساں کرنے کے 5,008 کیسز رجسٹر کیے گئے جبکہ 2013ء سے 2018ء تک 398 کیسز رجسٹر کیے گئے تھے۔

وفاقی محتسب سیکرٹریٹ میں بتایا&nbsp; گیا کہ 32 فیصد خواتین صنفی بنیادوں پر ہونے والے جرائم میں تشدد کا شکار ہوتی ہیں جبکہ 40 فیصد شادی شدہ خواتین کو بھی ہراساں کیا جاتا ہے۔

ایک اندازے کے مطابق غیر رپورٹ شدہ کیسز کی تعداد شاید اس سے کہیں زیادہ&nbsp; ہوسکتی ہے۔

ایمان فاطمہ نے بتایا کہ 2010ء میں پارلیمنٹ نے کام کی جگہ پر ہراسانی کے خلاف ایکٹ منظور کیا تھا۔ جنوری 2022ء میں پاکستان کی پارلیمنٹ نے 2010ء کے ایکٹ میں ترمیم کی۔ نئے قانون میں ہراساں کرنے کی زیادہ وسیع تعریف شامل ہے۔ یہ قانون خواتین کو ہراسانی اور تشدد کے خلاف تحفظ دیتا ہے۔ یہ شکایات کرنے کے عمل کو بھی آسان بناتا ہے اور اس میں ملزم کے ردعمل کو روکنے کا اہتمام بھی کیا گیا ہے۔

ہائی کورٹ بار راولپنڈی کی ایڈووکيٹ خنسہ رسول بتاتی ہیں کہ جنسی&nbsp; ہراساں کیے جانے کی صورت میں شکایت درج کرانے کے مختلف طریقے ہیں۔

سب سے پہلے متاثرہ جہاں پہ کام کرتی یا رہتی ہو،&nbsp; وہاں کے منیجر یا مالک سے بات کرے گی اگر وہاں سے مسئلہ حل نہیں ہوتا تو دوسرا آپشن پولیس سٹیشن یا آن لاٸن کمپلین پورٹل ہیں۔

&quot; پورٹل پہ شکایت کی صورت میں پولیس یا متعلقہ ممبرز خود اس سے رابطہ کریں گے۔ پولیس اسٹیشن خود جا کر بھی متاثرہ خاتون شکایت درج کر سکتی ہے&quot;۔

پاکستان پینل کوڈ&nbsp; 1860کے سیکشن 509 کے تحت اس کا مقدمہ درج ہو گا اور جرم کے ذمہ دار شخص کو&nbsp; پانچ لاکھ روپے تین سال تک قید یا دونوں سزائیں ہوسکتی ہیں۔

چاندنی چوک راولپنڈی کے ہاسٹل میں رہنے والی فاطمہ (فرضی نام) بتاتی ہیں کہ کئی صورتوں میں مالک کو شکایت کرنے پر بھی کچھ نہیں ہوتا۔

فاطمہ ایک ہسپتال میں انٹرن شپ کر رہی ہیں۔ وہ کہتی ہیں کہ کئی بار ہاسٹل کے گیٹ کے قریب نائٹ ڈیوٹی سے واپسی پر انہیں لڑکوں نے گھیرا مگر ہاسٹل گارڈ کے نہ ہونے کی وجہ سے انہیں روکنے والا کوئی نہ تھا۔ انہوں نے کہا کہ اس کی اطلاع وہ ہاسٹل مالک کو دے چکی ہے لیکن وہ گارڈ رکھنے کے بجائے ٹال مٹول سے کام لیتے ہیں۔

&quot;گھر والوں کو مشکل سے قائل کر کے انٹرن شپ کے لیے یہاں آئی ہوں۔ کہیں وہ مجھے واپس نہ بلا لیں، اس اندیشے کے باعث انہیں کچھ بتانا نہیں چاہتی۔&quot;

راولپنڈی کے سیونتھ روڈ پر واقع&nbsp; ہاسٹل کی انتظامیہ کا کہنا ہے کہ 2023ء کے اوائل میں ان کے ہاں ایسی شکایات موصول ہوئیں جن کی جانچ پڑتال کے لیے کمیٹی تشکیل دی گئی۔ &quot;ثبوت ملنے پر ہاسٹل چلانے والے ملازمین سے اختیارات واپس لے لیے گئے۔ اس کے بعد ایسی کوئی شکایت موصول نہیں ہوئی&quot;۔

سماجی کارکن سدرہ رانا کہتی ہیں کہ پاکستان میں تقریباً 93 فیصد عورتوں نے کام کی جگہ پر ہراساں کیے جانے کا اعتراف کیا ہے۔ ورلڈ اکنامک فورم کی گلوبل جینڈر گیپ رپورٹ 2023ء میں پاکستان کو 146 ممالک میں سے 142 ویں نمبر پر رکھا گیا ہے۔

وہ کہتی ہیں کہ پاکستان میں خواتین کے حقوق کے گروپ طویل عرصے سے تشدد اور ہراساں کیے جانے کے خلاف مؤثر تحفظ کا مطالبہ کر رہے ہیں۔ کام کی جگہ پر عورتوں کو ہراسانی سے تحفظ (ترمیمی) ایکٹ 2022ء اس کی جانب ایک اہم قدم ہے۔

&quot;البتہ قانون بن جانے سے معاملات ٹھیک نہیں ہوں گے۔ اس کا نفاذ عمل میں لایا جانا چاہیے۔ اس کے لیے ہراسانی کی شکار عورتوں کو سامنے آنا ہو گا۔ اپنے حقوق کے لیے آواز اٹھانی ہو گی۔ گھر کے افراد کو ان پر اعتماد کرنا ہو گا۔ تبھی وہ ان ذہنی بیمار لوگوں کا مقابلہ کر سکتی ہیں۔&quot;

مصباح فاروق

مصباح فاروق ہےکا تعلق کمر مشانی, ضلع میانوالی سے ہے۔ انہوں نے پالٹیکل سائنس میں ماسٹر کیا ہے اور تعلم و تدریس کے سلسلہ میں راولپنڈی میں رہائش پذیر ہیں۔

انوکھا ڈگری کالج جہاں 15 مضامین "پڑھائے" جاتے ہیں لیکن ٹیچر صرف 4 ہیں

راولپنڈی کے ہاسٹلز میں ہراسانی کے واقعات، " قانون بن جانے سے معاملات ٹھیک نہیں ہوں گے"