اپنی اولاد کے رویے سے دلبرداشتہ، ڈیرہ اسماعیل خان کی ستر سالہ آسیہ بی بی (نام تبدیل کیا گیا ہے) کے پاس کوئی جائے پناہ نہیں ہے۔ وہ اپنے دو شادی شدہ بیٹوں کے ساتھ ایک ہی گھر میں رہتی ہیں جہاں انہیں دونوں کی جانب سے آئے دن بدسلوکی کا سامنا رہتا ہے۔

&#39;&#39;دونوں بیٹوں کا میرے ساتھ رویہ اچھا نہیں ہے۔ چھوٹا بیٹا معمولی باتوں پر جھگڑتا رہتا ہے اور مجھے مار پیٹ کا نشانہ بنانے کے علاوہ گھر سے نکالنے کی دھمکیاں بھی دیتا ہے۔ مجھے کھانے کے لئے بھی کچھ نہیں دیا جاتا اور اکثر میں پڑوسیوں سے مانگ کر کھاتی ہوں۔&#39;&#39;

آسیہ کی ہمسائی نے انہیں مشورہ دیا ہے کہ وہ گھر چھوڑ کر دارالامان چلی جائیں۔ لیکن ڈیرہ اسماعیل خان میں دارالامان کی سہولت نہیں ہے۔

آسیہ بی بی کہتی ہیں کہ انہی کی طرح اور بھی بہت سی خواتین گھریلو مسائل کا شکار ہیں اور پورے ضلعے میں ایسا کوئی ادارہ نہیں ہے جو انہیں پناہ دے سکے۔

ڈیرہ اسماعیل خان کے علاوہ اس ڈویژن کے دیگر تین اضلاع ٹانک، جنوبی وزیرستان اپر اور لوئر میں کہیں بھی دارالامان یا اس جیسا کوئی ادارہ وجود نہیں رکھتا۔ 2010 میں ڈیرہ اسماعیل خان میں خواتین کے لئے ایک دارالامان بنایا گیا تھا جو دو سال بعد بند ہو گیا جسے لوگوں کے مطالبات اور حکومتی وعدوں کے باوجود بحال نہیں کیا گیا۔

دارالامان کے سابق انچارج امجد خان نے لوک سجاگ کو بتایا کہ اس ادارے کو ڈسٹرکٹ ویلیفئر افسر شاہ زمان نے اپنی ذمہ داری پر شروع کیا جس کے قیام کا فیصلہ ڈسٹرکٹ اینڈ سیشن جج، ڈسٹرکٹ پولیس آفیسر، ڈپٹی کمشنر، ڈسٹرکٹ ویلفیئر آفیسر اور سپریڈنٹ جیل پر مشتمل کریمنل جسٹس کوآرڈی نیشن کمیٹی نے ایک اجلاس میں کیا تھا۔

یہ دارالامان ڈیرہ انڈس سوسائٹی کی ایک نجی عمارت میں قائم کیا گیا تھا۔ سوشل ویلفیئر ڈیپارٹمنٹ نے یقین دہانی کی گئی تھی کہ دارالامان کے لیے خواتین پر مشتمل عملہ بھرتی کر کے بھیجا جائے گا لیکن اس پر کوئی پیش رفت نہ ہوئی۔

انہوں نے بتایا کہ دارالامان میں دو سال کے عرصے میں 45 خواتین کو رہائش سمیت دیگر سہولیات فراہم کی گئیں لیکن خواتین پر مشتمل عملے کی غیر موجودگی میں اس ادارے کو چلانا بہت مشکل تھا۔

&#39;&#39;کئی طرح کے مسائل کو حل کرنے کے لئے خواتین ملازمین کا ہونا ضروری ہے۔ ہمارے پاس سوشل ویلفیئر کی خواتین اساتذہ میں سے کوئی بھی دارالامان میں رات کی ڈیوٹی دینے پر آمادہ نہیں تھی۔ جب ڈسٹرکٹ پولیس آفیسر سے درخواست کی گئی تو انہوں نے رات کی ڈیوٹی کے لئے لیڈی کانسٹیبل کی تعیناتی کا انتظام کیا لیکن دارالامان میں مقیم خواتین میں سے کسی کی عدالت میں پیشی کے وقت مجھے ہی ساتھ جانا پڑتا تھا&#39;&#39;

امجد کے مطابق خواتین پر مشتمل عملہ دستیاب نہ ہونے کے باعث بالآخر ضلعی عدالت کے حکم پر اسے بند کرنا پڑا۔

<h2>جنوبی اضلاع کی خواتین کے لئے واحد جائے پناہ</h2>

انچارج دارالامان بنوں روحی خان بابر کے مطابق خیبر پختونخوا کے جنوبی اضلاع کیلئے دارالامان بنوں ہی واحد آپشن ہے، جو کہ دو ہزار اکیس میں بنایا گیا تھا، جہاں ضلع کرک سے لے کر جنوبی وزیرستان تک سے خواتین آتی ہیں، اس سے پہلے ڈیرہ اسماعیل خان میں عدالت خواتین کو جیل بھیجتی تھی، اب انہیں دارلامان بنوں ریفر کرتی&nbsp; ہے، اس ادارے کا مقصد ہی یہ ہے کہ گھریلو مسائل کا شکار خواتین کو جائے پناہ میسّر ہو۔

روحی خان بتاتی ہیں، &rsquo;&rsquo;اس وقت دارالامان بنوں میں موجود خواتین کی تعداد&nbsp; اکیس ہے، اس کے قیام سے اب تک سے 2023 تک ٹوٹل 234 کیسز آئے ہیں جس میں ڈیرہ اسماعیل خان کے 26 کیسز تھے جس میں 21 کیسز حل ہوئے ہیں اور 5 خواتین اب بھی بنوں دارلامان میں ہیں۔ جو گھریلو تشدد، پسند کی شادی اور دیگر خاندانی مسائل کے مقدمات میں عدالت پیش ہورہی ہیں۔ ڈیرہ اسماعیل خان عدالت میں پیشی کیلئے بنوں سے لے جاتے اور واپسی کے وقت انچارج دارلامان بنوں، لیڈی کانسٹیبل اور موبائل اسکواڈ ان کے ہمراہ ہوتا ہے۔&lsquo;&lsquo;

پشاور ہائی کورٹ کی وکیل اور انسانی حقوق کی سرگرم کارکن نتاشہ سومن کہتی ہیں کہ خواتین کیلئے ایسے حالات میں دوسرے شہر جا کر رہنا بہت مشکل ہو جاتا ہے کیونکہ زبان اور ثقافت کا فرق بھی آ جاتا ہے اور رشتہ دار و احباب کو ملنے میں دشواری بھی ان خواتین کی پریشانی میں اضافے کا سبب بنتی ہے۔

ڈیرہ اسماعیل خان میں دو سال سے بطور ڈسٹرکٹ سوشل ویلفیئر آفیسر خدمات انجام دینے والے ممتاز خان نے بتایا کہ گزشتہ سالانہ ترقیاتی بجٹ میں ڈیرہ اسماعیل خان میں دارالامان کے دوبارہ قیام کا انتظام کیا گیا تھا۔ لیکن اس منصوبے کی منظوری اور پی سی ون تیار ہونے کے باوجود اس پر کام شروع نہیں ہو سکا۔

منصوبے کے لئے چوتھے گریڈ کی دو خواتین اور پانچ مرد ملازم بھرتی کئے جا چکے ہیں اور انہیں تنخواہیں بھی مل رہی ہیں لیکن&nbsp; ڈائریکٹوریٹ کی ہدایت پر ان کی ڈیوٹی فی الحال ڈرگ سنٹر میں لگائی گئی ہے۔ دارالامان کے لئے مزید بھرتیوں کی غرض سے اشتہار بھی دیا گیا تھا لیکن تاحال کسی کو بھرتی نہیں کیا گیا اور نگران حکومت آنے کے بعد بھرتیوں پر پابندی عائد ہے۔

ڈیرہ اسماعیل خان میں نیبر ہڈ کونسل گاڑبیان کے تحصیل کونسل ممبر خرم شہزاد کہتے ہیں کہ دارالامان کا منصوبہ اے ڈی پی سکیم میں منظوری کے بعد کرائے کی عمارت میں شروع کیا جانا تھا لیکن محکمہ سوشل ویلفیئر کی سستی اور عملے کی بھرتی میں تاخیر کے باعث یہ کام مکمل نہیں ہو سکا۔

&#39;&#39;ہم نے تجویز دی تھی کہ عارضی طور پر کسی دوسرے محکمے سے تبادلے کی بنیاد پر ملازمین لے کر کام شروع کر دیا جائے۔ لیکن اس تجویز پر بھی کسی نے غور نہیں کیا۔&#39;&#39;

نام بڑا اور درشن چھوٹے: تشدد سے متاثرہ خواتین کی مدد کے لیے بنایا گیا مرکز اپنے مقاصد کے حصول میں ناکام۔

'کھانا اکثر پڑوسیوں سے مانگ کر کھاتی ہوں': ڈیرہ اسماعیل خاں ڈویژن میں بے وسیلہ خواتین کے لیے کوئی دارالامان نہیں

text

جب سات بچوں کی ماں شاہ ترینہ نے بلدیاتی انتخابات میں حصہ لینے کا فیصلہ کیا تو ان کے علاقے کی قبائلی روایات کے تحت انہیں جلسہ کرنے کی اجازت نہیں تھی۔ چنانچہ انہوں نے گھر گھر جا کر انتخابی مہم چلائی، خواتین کو اپنے سیاسی مقاصد اور منصوبوں سے آگاہ کیا اور انہیں ووٹ دینے پر آمادہ کیا۔ یوں خیبرپختونخوا میں 31 مارچ 2022 کو ہونے والے بلدیاتی انتخابات کے دوسرے مرحلے میں وہ خواتین کے لیے مخصوص کی گئی ایک نشست پر ولیج کونسلر منتخب ہوگئیں۔&nbsp;

ان کی عمر 38 سال ہے اور ان کا تعلق قبائلی ضلع جنوبی وزیرستان سے ہے جو صوبے کے کئی دوسرے علاقوں کی طرح پچھلے 20 سال مذہبی شدت پسندی کا شکار رہا ہے۔ ان کا کہنا ہے کہ انہیں انتخاب میں حصہ لینے کا مشورہ ان کے 50 سالہ شوہر محمد ہمایوں نے دیا تھا جو ٹیکسی ڈرائیور کے طور پر کام کرتے ہیں اور، شاہ ترینہ کے بقول، &quot;ایک کھلا دل و دماغ رکھنے والے انسان ہیں&quot;۔&nbsp;

ان کا تعلق وزیر قبیلے کی ذیلی شاخ توجئے خیل سے ہے اور وہ کڑیکوٹ نامی دیہی علاقے میں رہتی ہیں۔ ان کے ضلعے میں پہلے کبھی بلدیاتی انتخابات نہیں ہوئے اس لیے ان کے لیے یہ بات خاصی حیران کن تھی کہ ان کے قبیلے کے عمائدین نے ان کے انتخاب میں شرکت کے فیصلے کو نہ صرف سراہا بلکہ ان کی ہر طرح سے مدد بھی کی۔ ان کے مطابق &quot;جب میں نے انتخابی مہم چلائی تو علاقے کے مردوں نے بھی لوگوں کو میرے لیے ووٹ دینے پر قائل کیا&quot;۔&nbsp;

تاہم وہ کہتی ہیں کہ وہ قبائلی روایات سے بغاوت نہیں کرنا چاہتیں بلکہ مقامی رسوم و رواج کو مدِنظر رکھتے ہوئے خواتین کے مسائل حل کرنے کی خواہش مند ہیں۔ ان کا یہ بھی کہنا ہے کہ انہوں نے اپنے علاقے میں خواتین کی تعلیم کو فروغ دینے اور عورتوں کے لیے ہسپتال بنانے کے مطالبات کو اجاگر کرنے کے لیے انتخابات میں حصہ لیا ہے کیونکہ وہ سمجھتی ہیں کہ &quot;اپنے حقوق کے حصول کے لیے فیصلہ کن جدوجہد خواتین کو خود ہی کرنا ہو گی&quot;۔

<h2>رسم و رواج کی پابند سیاست</h2>

جنوبی وزیرستان کے صدر مقام وانا میں خواتین ووٹروں کی تعداد 47 ہزار پانچ سو 42 ہے جن میں سے آٹھ ہزار چھ -- یا 18.5 فیصد -- نے مارچ میں ہونے والے بلدیاتی انتخابات میں اپنا حقِ رائے دہی استعمال کیا۔ اسی طرح 2018 کے عام انتخابات میں بھی ہر سو مقامی خواتین ووٹروں میں سے تقریباً 16 نے ووٹ ڈالے تھے جو پاکستان بھر کے قومی اسمبلی کے حلقوں میں پانچویں پست ترین شرح تھی۔

جنوبی وزیرستان کے الیکشن کمشنر محمد بلال کہتے ہیں کہ ماضی میں یہ علاقہ شدت پسندی اور دہشتگردی کا شکار رہا اس لیے یہاں انتخابات کرانا اور ان میں خواتین کی شرکت یقینی بنانا ایک بہت بڑا چیلنج ہوتا ہے۔ لیکن وہ سمجھتے ہیں کہ بلدیاتی انتخابات میں خواتین کی بطور امیدوار شرکت اس بات کی عکاس ہے کہ مقامی لوگوں کی سوچ بدل رہی ہے اور وہ اپنے حقوق کے حصول کے لیے جمہوری اور سیاسی راہ اپنانے کی خواہش رکھتے ہیں۔&nbsp;

تاہم الیکشن کمیشن آف پاکستان کی طرف سے جاری کیے گئے اعدادوشمار کے مطابق جنوبی وزیرستان کی 106 ولیج کونسلوں میں خواتین کے لیے مخصوص اتنی ہی نشستوں میں سے 24 پر کسی امیدوار نے کاغذات نامزدگی جمع نہیں کرائے تھے۔ اسی طرح 48 مزید نشستوں میں سے ہر ایک پر صرف ایک ہی خاتون امیدوار تھی جو ووٹ لیے بغیر منتخب ہو گئی۔ یوں صرف 34 نشستوں پر دو یا دو سے زیادہ خواتین میں مقابلہ ہوا۔&nbsp;

وانا سے تقریباً ایک سو 37 کلومیٹر شمال مشرق میں واقع جنوبی وزیرستان کی تحصیل لدھا میں بلامقابلہ منتخب ہونے والی ایک ولیج کونسلر (جو اپنا نام ظاہر کرنا نہیں چاہتیں) کا کہنا ہے کہ ان کے ضلع میں خواتین کے انتخابات میں حصہ لینے کے راستے میں دو بڑی رکاوٹیں ہیں۔ ان میں سے پہلی یہ ہے کہ &quot;اس علاقے میں قبائلی روایات کے تحت خواتین عموماً گھر کی چار دیواری تک ہی محدود رہتی ہیں&quot; جبکہ دوسری یہ ہے کہ &quot;تعلیم کی کمی کے باعث مقامی لوگوں کا سیاسی شعور پختہ نہیں اس لیے خواتین کے سیاسی سرگرمیوں میں حصہ لینے کو انتہائی معیوب خیال کیا جاتا ہے&quot;۔

وہ خود بھی انتخابات میں اس لیے حصہ لے پائیں کہ ان کے خاندان کے مرد ان کا ساتھ دے رہے تھے۔ بلکہ، ان کے مطابق، انہیں کاغذاتِ نامزدگی جمع کرانے کا مشورہ ان کے والد نے ہی دیا تھا۔ یہی وجہ ہے کہ انہیں اپنے محسود قبیلے کے مرد زعما کی طرف سے بھی مخالفت کا سامنا نہیں کرنا پڑا۔&nbsp;

تاہم عورتوں کے حقوق کے حوالے سے اس قبیلے کے مرد جنوبی وزیرستان میں رہنے والے دوسرے قبیلے، وزیر، کے مردوں کی نسبت زیادہ قدامت پرست ہیں۔ یہی وجہ ہے کہ اس کی ذیلی شاخ شمن خیل سے تعلق رکھنے والے 49 سالہ اجمال محسود سمجھتے ہیں کہ &quot;انتخابات میں خواتین کی شرکت سے علاقائی رسوم، رواج اور روایات متاثر ہوں گی&quot;۔ چنانچہ وہ کہتے ہیں کہ مقامی لوگوں کو ان کا سیاست میں حصہ لینے کا حق تسلیم کرنے میں &quot;ابھی تھوڑا وقت لگے گا&quot;۔

مہرین خالد

مہرین خالد کا تعلق ضلع بنوں سے ہے۔ وہ گومل یونیورسٹی ڈیرہ اسماعیل خان سے ابلاغِ عامہ کی تعلیم حاصل کر رہی ہیں۔

'کھانا اکثر پڑوسیوں سے مانگ کر کھاتی ہوں': ڈیرہ اسماعیل خاں ڈویژن میں بے وسیلہ خواتین کے لیے کوئی دارالامان نہیں

یہ مائیں، یہ بہنیں، یہ بیٹیاں: 'چار دیواری تک محدود' جنوبی وزیرستان کی عورتوں کی انتخابی میدان تک رسائی کیسے ممکن ہو گی؟