کالا باغ شہر کا علاقہ اتلا پتن مختلف محلوں پر مشتمل ہے۔ ان میں سے ایک محلہ تنگ بازار ہے۔&nbsp; 53 سالہ محمد مسرور فانی محلہ تنگ بازار کے رہائشی اور راج مستری ہیں۔ وہ قیام پاکستان سے قبل تعمیر کیے گئے اس مکان میں رہتے ہیں جسے ان کے دادا نے 1200 روپے کے عوض ایک ہندو سے خریدا تھا۔

مسرور فانی کا کہنا ہے کہ میرے والد 23 مارچ 1995ء کو ٹی بی کے مرض کی وجہ سے وفات پا گئے تھے۔ ان کے مطابق یہاں ٹی بی کے کئی مریض ہیں۔

ڈپٹی ڈسٹرکٹ ہیلتھ آفیسر ڈاکٹر سرور علی نے لوک سجاگ کو بتایا کہ پوری عیسیٰ خیل تحصیل میں ٹی بی، دمہ، ڈینگی اور پیٹ کے امراض اتلا پتن میں سب سے زیادہ ہیں۔

ڈاکٹر سرور علی کے مطابق 2020 ء میں اتلا پتن میں ٹی بی کے مریضوں کی تعداد 10 تھی۔ 2021ء میں یہ 53 رپورٹ ہوئی۔ 2022ء میں یہ تعداد بڑھ کر 78 ہو گئی اور 2023ء میں اب تک ٹی بی کے 29 مریضوں کی تشخیص ہو چکی ہے۔ 
اس علاقے میں دمے کے مریضوں کی تعداد میں تشویش ناک اضافہ دیکھا گیا ہے۔

ڈاکٹر سرور علی کا کہنا ہے کہ2020 ء میں دمہ کے مریض ایک سو 71 اور 2021ء میں سات سو 59 تھے۔ 2022ء میں ان مریضوں کی تعداد دگنے سے بھی زیادہ ہو کر 15 سو 46 ہو گئی۔ 2023ء میں تاحال 747 مریضوں کی تشخیص ہوئی ہے۔ یہ بہت زیادہ تعداد ہے۔

ان کے مطابق کالا باغ کے سرکاری ہسپتال میں ان بیماریوں کے مفت ٹیسٹ اور مفت علاج ہوتا ہے مگر جب تک اس آبادی کو تازہ ہوا، سورج کی روشنی اور صاف پانی مہیا نہیں ہوں گے، بیماریاں رہیں گی۔

مسرور فانی کے مطابق تنگ و تاریک گلیوں میں گھر ہونے کی وجہ سے میری شادی بھی نہ ہو پائی۔ میری منگنی پانچ برس قائم رہی مگر اس کے بعد انہوں نے یہ کہہ کر منگنی توڑ دی کہ ہم اپنی بیٹی کو اس گھر میں نہیں بھیج سکتے۔

کون نہیں چاہتا کہ کھلی، کشادہ اور ہوا دار رہائش گاہ میں زندگی گزارے مگر ہمارے پاس اس علاقے سے باہر پلاٹ یا مکان لینے کے وسائل نہیں۔ جن کے پاس تھے وہ یہاں سے اپنے مکان بیچ کر لاری اڈا، کریم آباد یا دیگر کھلے علاقوں میں منتقل ہو گئے۔ 
&quot;اتلا پتن کے محلوں میں کئی گھر ایک ہی کمرے پر مشتمل ہیں۔ یہاں، کچن، باتھ روم اور بکریاں ایک ہی جگہ موجود ہوتے ہیں اور تعفن سے جینا محال ہو جاتا ہے۔&quot;

ان کا کہنا ہے کہ زیادہ بارش کے دوران ہم پوری پوری رات جاگ کر گزارتے ہیں کہ کہیں ہمارے مکان کی چھت یا دیوار نہ گر جائے۔

مردم شماری کے بلاک آفیسر سعید اللہ سبطین پراچہ نے بتایا کہ حالیہ مردم شماری کے مطابق اتلا پتن میں دو ہزار ایک سو 50 افراد رہتے ہیں جو غربت کی لکیر سے نیچے زندگی گزار رہے ہیں۔

70 سالہ عبدالحمید پراچہ تنگ بازار میں پیدا ہوئے۔ اب وہ کالا باغ شہر سے چار کلومیٹر دور کوٹ چاندنہ روڈ پر رہتے ہیں۔ وہ اور ان کی اہلیہ بیگم سعادت حمید پراچہ ہفتہ اور اتوار کے دن اپنے آبائی گھر میں گزارتے ہیں۔

انہوں نے بتایا کہ یہ علاقہ صدیوں سے آباد ہے اور ماضی میں یہاں تجارتی سرگرمیاں عروج پر ہوتی تھیں۔ یہاں کی ہندو آبادی تنگ مکانوں میں رہتی تھی۔

ان کے مطابق 2008ء میں نوابزادہ ملک عماد خان اسی حلقہ سے ممبر قومی اسمبلی منتخب ہوئے اور وزیر مملکت برائے امور خارجہ بنے۔ ان کی وزارت کے دوران کالا باغ شہر کو سوئی گیس فراہم کی گئی۔ مگر کالاباغ کے قدیم محلہ اتلا پتن کی بیشتر آبادی تاحال سوئی گیس سے محروم ہے اور لکڑیاں یا گیس سلنڈر استعمال کرتی ہے۔

اس علاقے کے مکانات زیرزمین نمک کی موجودگی کی وجہ سے خستہ ہو چکے ہیں کیونکہ قریب ہی نمک کے پہاڑ ہیں۔ 1976ء اور 2010 ء میں آنے والے سیلابوں سے بھی یہاں بہت نقصان ہوا۔

&quot;ان تمام وجوہات کی بنا پر ہمیں اپنا آبائی گھر چھوڑ کر شہر سے چار کلومیٹر دور پلاٹ لے کر گھر بنانا پڑا۔&quot;

ان کی اہلیہ جو سابق کونسلر بھی ہیں، کا کہنا ہے کہ اب&nbsp; ہم اب شہر سے باہر کھلے مکان میں رہتے ہیں لیکن اتلاپتن کے مکین غربت کی وجہ سے اسے نہیں چھوڑ سکتے۔

یہاں کی دو سے تین فٹ چوڑی گلیوں میں دن کے وقت بھی روشنی کے لیے بلب جلتے ہیں۔ یہاں کی آدھی سے زیادہ آبادی مکانات کو کھنڈر بنتا دیکھ کے ہجرت کر چکی ہے۔

انہوں نے بتایا کہ اندھیر نگری کے ان باسیوں کو آج بھی مکانوں کی چھتیں نیچی ہونے کی وجہ سے سر جھکا کے چلنا پڑتا ہے۔ ان کے عزیز و اقارب کے جنازے چٹائیوں پر رکھ کے تنگ گلیوں سے گزار کر کھلی جگہ چارپائی پر رکھے جاتے ہیں اور اس کے بعد قبرستان لے جائے جاتے ہیں۔

قیام پاکستان سے پہلے یہ علاقہ بہت بڑی تجارتی منڈی تھا۔ دریائے سندھ کے کنارے واقع ہونے کی وجہ سے یہاں بڑی کشتیاں اور بیڑے لنگر انداز ہوتے اور نمک اور دیگر اشیا مختلف علاقوں میں فروخت کے لیے لے جاتے تھے۔

اس وقت آبادی بہت کم تھی اور یہاں کے مکین خوش حال تھے۔ بیرونی حملہ آوروں سے خود کو بچانے کے لیے اس کے اطراف لکڑی کے سات بڑے دروازے لگائے گئے تھے۔ شام ہوتے ہی ان دروازوں کو بند کر دیا جاتا تھا۔ مگر اب وہ دروازے رہے اور نہ ہی یہاں کی ہنستی مسکراتی زندگی۔

لیاقت پور کی بستی میں بچوں کی لگاتار اموات: ویکسینیشن کے بندوبست کی کمیاں، کوتاہیاں دور کرنا کس کی ذمہ داری ہے؟

کالا باغ کی اندھیرنگری جہاں نہ سورج کی روشنی پہنچ پاتی ہے اور نہ ہوا

text

پاکستان کا سب سے بڑا دریا سیکڑوں میل کا فاصلہ طے کرتا، پہاڑوں کے درمیان گھومتا، چٹانوں اور ندی نالوں سے ٹکراتا جب کالاباغ کے مقام پر پہنچتا ہے تو اس کا &quot;استقبال&quot; سیوریج کے پانی اور کوڑے کرکٹ کے ڈھیروں سے ہوتا ہے۔

کالاباغ ضلع میانوالی کی تحصیل عیسیٰ خیل کا قصبہ ہے جس کی آبادی 50 ہزار کے لگ بھگ ہے۔

یہ پہلا مقام ہے جہاں سے دریائے سندھ میدانی علاقے میں داخل ہوتا ہے۔

دریائے سندھ میں کالاباغ کے مقام پر1949ء میں جناح بیراج تعمیر کیا گیا تھا جہاں سے تھل کینال کا پانی لیہ، بھکر اور مظفر گڑھ کے اضلاع کو سیراب کرتا ہے۔

کالاباغ میں وانڈھا ککڑاں والا کے قریب نمک کی کانیں ہیں جہاں دریائے سندھ کے عین کنارے پر ان کانوں سے نکالا جانے والا نمک ذخیرہ کیا جاتا ہے۔یہ نمک بھی آبی حیات خصوصاً مچھلیوں کے لیے بہت بڑا خطرہ ہے۔

دریائے سندھ تھوڑا سا آگے جا کر کالا باغ کی آبادی میں داخل ہوتا ہے تو اس کے کنارے پر فضلے، گندگی اور کچر ے کے ڈھیر نظر آتے ہیں۔

علاقہ مکین کوڑا کرکٹ دریا کے کنارے بہت سی جگہوں پر ڈھیر کر دیتے ہیں۔ چونکہ کالا باغ شہر پہاڑ کی ڈھلان پر واقع ہے اس لیے فضلہ اور گھروں کا گندا پانی سیدھا دریائے سندھ میں جا گرتا ہے۔

کالاباغ میں کوئی سیوریج سسٹم نہیں ہے اس لیے بلدیہ کی طرف سے بنائے گئے نالوں اور چھوٹی نالیوں کا پانی بھی دریا میں ہی شامل ہوتا رہتا ہے۔

نیشنل لائبریری آن میڈیسن کی رپورٹ کے مطابق پاکستان میں انسانی صحت پر دریائی آلودگی کے اثرات کے بارے میں اب تک بہت کم تحقیق کی گئی ہے لیکن یہ بہت بڑا مسئلہ ہے۔

دریائے سندھ کے کنارے آبادی کا زیادہ تر حصہ پینے کے پانی کے لیے اسی دریا پر انحصار کرتا ہے اس میں جو مضرصحت کیمیائی مادے شامل ہوتے رہتے ہیں وہ پانی ابالنے سے ختم نہیں ہوتے۔

دریائے سندھ میں آبی آلودگی نے مچھلیوں کی کئی انواع کو بھی معدوم کر دیا ہے اور دریا کے قریب رہنے والے بہت سے لوگوں کے لیے خوراک کی بھی قلت ہو گئی ہے۔

زیریں انڈس ڈیلٹا کے کچھ حصوں میں سمندری حیات سے بھرپور دلدلی جنگلات ساحلی آبادی کے لیے خوراک کا ایک اہم ذریعہ تھے جو دریا کے ماحولی نظام میں آنے والے آلودہ پانی کی وجہ سے تقریباً ختم ہو چکے ہیں۔

بلدیہ کالاباغ کے سب انجنئیر عامر مرتضٰی کہتے ہیں کہ کالاباغ شہر کا محل وقوع ایسا ہے کہ چاہے برساتی نالہ ہو یا سیوریج کا پانی، اس نے دریائے سندھ میں ہی جا کے گرنا ہے۔

انہوں نے بتایا کہ بلدیہ کالاباغ کے پاس مجموعی طور پر 15 خاکروب ہیں جن میں سے صرف 10 ہی علاقے میں صفائی کے لیے دستیاب ہیں جبکہ باقی پانچ شہر میں پانی کی فراہمی کے تین مراکز پر ڈیوٹی دیتے ہیں۔

&quot;اصولاً ایک ہزار آبادی کے علاقے میں ایک خاکروب ہونا ضروری ہے۔ لیکن 2010 کے بعد حکومت نے بلدیہ کے لیے کوئی نیا خاکروب بھرتی نہیں کیا۔ پچھلے 13 سال میں کئی سرکاری خاکروب یا تو ریٹائر ہو گئے ہیں یا وفات پا چکے ہیں۔&#39;&#39;

انہوں نے بتایا کہ اس وقت بلدیہ کے 13 بڑے گندے نالوں کا پانی دریائے سندھ میں گرتا ہے۔ یہ نالے کالاباغ کے محلہ اتلا پتن، محلہ عید گاہ، تنگ بازار، لوہاراں والی مسجد، مین بازار، لاری اڈا اور ملحقہ آبادی کا گندا پانی لاتے ہیں جبکہ برساتی نالے ان کے علاوہ ہیں۔

&nbsp;عامر مرتضیٰ کا کہنا تھا کہ افرادی قوت کم ہونے کے باوجود وہ وقفے وقفے سے دریا کے کنارے پڑے کچرے کو اٹھواتے رہتے ہیں لیکن کچرا ڈالنے والوں کی تعداد صفائی کرنے والوں کے مقابلے میں کہیں زیادہ ہے۔

کالا باغ سے دو کلومیٹر دور گاؤں وانڈھا ککڑاں کے لوگوں کا انحصار دریائے سندھ کے پانی پر ہے۔ دو ہزار نفوس پر مشتمل اس گاؤں کے بیشتر لوگ نمک کی کانوں میں کام کرتے ہیں اور بعض محنت مزدوری کے لیے بیرون ملک گئے ہوئے ہیں۔ یہاں کے مکین دریائے سندھ کا پانی پیتے ہیں اور اسی پانی سے برتن اور کپڑے بھی دھوتے ہیں۔

اکتوبر 2019 میں کراچی یونیورسٹی میں ہونے والے سیمینار میں &#39;ورلڈ وائیڈ فنڈ فار نیچر-پاکستان&#39; کی نمائندگی کرنے والی شاہزین پرویز نے بتایا کہ دنیا بھر میں ہر سال تقریباً 80 لاکھ ٹن پلاسٹک سمندروں میں داخل ہوتا ہے، جس کا مطلب ہے کہ سمندری کچرے میں پلاسٹک کا حصہ 60 سے 80 فیصد ہے۔ پلاسٹک کی آلودگی کے اعتبار سے سندھ دنیا کا دوسرا دریا ہے۔

شاہزین کے مطابق، پی ای ٹی (پولی تھین ٹیریفتھلیٹ) پلاسٹک جو کھانے، مشروبات، خاص طور پر سافٹ ڈرنکس، جوس اور پانی کی پیکنگ کے لیے بڑے پیمانے پر استعمال ہوتا ہے، ہزاروں سال تک اپنی کیمیائی ہیئت برقرار رکھتا ہے اور آبی گزرگاہوں کو آلودہ کرتا رہتا ہے اور اسے کھانے والی سمندری حیات کی موت واقع ہو جاتی ہے۔

میانوالی میں محکمہ ماحولیات کے اسسٹنٹ ڈائریکٹر محمد یاسر کا کہنا ہے کہ دریا میں آلودگی پھیلانے کے واقعات کے خلاف ان کا محکمہ اس وقت تک ایکشن نہیں لیتا جب تک اسے کسی ادارے یا شہری کی طرف سے تحریری درخواست موصول نہ ہو۔

&#39;&#39;دریا میں کوڑا کرکٹ ڈالنے والوں کے خلاف کارروائی بلدیہ کالاباغ کے فرائض میں شامل ہے اور&nbsp; وہی ذمہ داروں کے خلاف ایکشن لے سکتی ہے۔&#39;&#39;

دریا کنارے نمک ذخیرہ کرنے سے پیدا ہونے والی آبی آلودگی کے بارے میں جب محکمہ معدنیات کے مائن مینجر محمد شعیب سے بات کی گئی تو ان کا کہنا تھا کہ کالاباغ میں دریائے سندھ کے کنارے پہاڑوں میں نمک کی 200 کانیں ہیں لیکن ان کے ذخیرہ کیے گئے نمک سے آبی حیات کو کوئی نقصان نہیں پہنچتا۔

&#39;&#39;کانوں سے نکالا جانے والا نمک دریا کے اندر نہیں بلکہ دریا کے کنارے پر ڈالا جاتا ہے اور کچھ عرصہ کے بعد یہ نمک یہاں سے اٹھا کر جگہ خالی کر لی جاتی ہے۔&#39;&#39;

ان کا یہ بھی کہنا ہے کہ اگر بہتے پانی میں نمک شامل ہو جائے تو اس سے کوئی نقصان نہیں ہوتا لیکن محکمہ ماحولیات کے انسپکٹر عمران علی اس بات سے اتفاق نہیں کرتے۔ وہ کہتے ہیں کہ جب پانی میں نمک کی مقدار زیادہ ہو گی تو اس سے کہیں نہ کہیں آبی حیات کو ضرور خطرہ ہو گا۔&#39;&#39;

نیشنل لائبریری آن میڈیسن&nbsp; کی رپورٹ کے مطابق دریائے سندھ میں آبی آلودگی میں زرعی سرگرمیوں کے بعد پانی کا الٹا بہاؤ بھی شامل ہے جو اپنے ساتھ کیمیائی مادے اور کیڑے مار ادویات کا زہر لے کر آتا ہے۔

رپورٹ میں کہا گیا ہے کہ پاکستان میں بڑھتی آبادی کے ساتھ پانی&nbsp; کی طلب میں اضافے سے دریائے سندھ میں پانی کے معیار کو بھی خطرہ لاحق ہے۔ پچھلی نصف صدی کے دوران آبادی میں تیزی سے اضافے نے زراعت پر دباؤ ڈالا ہے اور آبپاشی کے پانی کی ضرورت کو بڑھا دیا ہے۔&nbsp; اس کے علاوہ پاکستان میں دریائے سندھ اور دیگر علاقوں کے ماحولیاتی انحطاط نے آبادی کے لیے صحت کے اضافی خطرات بھی پیدا کر دیے ہیں۔

جنید خان

جنید خان کا تعلق جنوبی پنجاب کے ضلع میانوالی سے ہے۔ انہوں نے پنجاب یونیورسٹی سے گریجویشن کی ہے اور عرصہ بیس سال سے صحافت سے منسلک ہوں۔

کالا باغ کی اندھیرنگری جہاں نہ سورج کی روشنی پہنچ پاتی ہے اور نہ ہوا

شدید پیاس تھی پھر بھی چھوا نہ پانی کو: کالا باغ، آلودہ پانی دریائے سندھ میں آبی حیات اور انسانی جانوں کے لیے زہر بننے لگا

Lok Sujag