سندھ میں گندم کی کٹائی آخری مراحل میں ہے اور اب تک کی خبریں خوش آئند نہیں ہیں۔ سات اہم باتیں جو اس صورت حال کو سمجھنے کے لیے ضروری ہیں۔

<h2>1: تاریخی کمی</h2>

سندھ میں اس سال 20 لاکھ 70 ہزار ایکڑ پر گندم کاشت کی گئی جبکہ گذشتہ سال صوبے میں گندم کا زیر کاشت رقبہ 29 لاکھ 20 ہزار ایکڑ تھا۔

یہ ایک بہت بڑی اور انتہائی پریشان کن تبدیلی ہے جو آئندہ دنوں میں ایک شدید مالی اور غذائی بحران کا باعث بن سکتی ہے۔

1977ء میں سندھ میں 22 لاکھ 91 ہزار ایکڑ پر گندم کاشت کی گئی تھی، اس کے بعد 46 سالوں میں (2022ء تک) صوبے میں گندم کا زیر کاشت رقبہ کبھی 20 لاکھ ایکڑ سے کم نہیں رہا بلکہ اس میں مسلسل اضافہ ہوتا رہا ہے۔ ان 46 سالوں کے لیے سندھ میں گندم کے زیرکاشت رقبے کی اوسط 25 لاکھ 75 ہزار ایکڑ بنتی ہے۔ 2023ء میں یہ رقبہ اپنی کم ترین سطح پر آ گیا ہے۔

سندھ پہلے ہی اپنی ضرورت سے کم گندم پیدا کرتا ہے۔ حالیہ کمی کا واضح مطلب یہ ہے کہ آئندہ مہینوں میں گندم کو بھاری مقدار میں درآمد کرنا پڑے گا جو ملک میں ڈالر کی کمیابی کے باعث ایک کٹھن کام ہو گا۔

<h2>2: میں نہ مانوں ۔۔۔</h2>

سندھ کے اس سال کے گندم کے زیر کاشت رقبے کے اعداد و شمار وفاقی وزیر برائے غذائی تحفظ اور تحقیق طارق بشیر چیمہ نے 28 دسمبر 2022ء کو ایک پریس کانفرنس میں پیش کیے۔ ان کے مطابق وفاقی کمیٹی برائے زراعت نے 13 اکتوبر 2022ء کو ہونے والے ایک اجلاس میں گندم کی کاشت کے صوبائی اہداف پر اتفاق کیا تھا جس کے مطابق سندھ میں گندم 27 لاکھ 90 ہزار ایکڑ پر کاشت کی جانی تھی لیکن صوبائی کراپ رپورٹنگ سنٹر نے دو ماہ بعد 22 دسمبر 2022ء کو وفاق کو مطلع کیا کہ صوبے میں گندم صرف 20 لاکھ 70 ہزار ایکڑ پر ہی کاشت ہو سکی ہے جو کے ہدف کا 74 فیصد بنتی ہے۔

تاہم محکمہ زراعت سندھ مقامی طور پر ان سے مختلف اعداد و شمار جاری کر رہا ہے۔ محکمہ کے ڈائریکٹر جنرل ہدایت اللہ چھجڑو نے گذشتہ دنوں لوک سجاگ کو بتایا کہ امسال صوبے میں ساڑھے 29 لاکھ ایکڑ پر گندم کی بوائی کا ہدف مقرر کیا گیا تھا اور ان کے کراپ رپورٹنگ سنٹر کے مطابق صوبے میں اس سے صرف 61 ہزار ایکڑ کم پر گندم کاشت کی گئی جو مقررہ ہدف کے 98 فیصد کے برابر ہے۔

ایک ہی محکمے کی جانب سے متضاد اعداد شمار جاری کرنے میں کیا حکمت ہو سکتی ہے؟

لوک سجاگ کو اضلاع سے موصول ہونے والی رپوٹس اس بات کی تصدیق کرتی ہیں کہ اس سال نہ صرف گندم کے زیرکاشت رقبے میں کمی آئی ہے بلکہ فی ایکڑ پیداوار بھی گذشتہ سالوں کی نسبت بہت کم ہو گئی ہے۔ 
ایسا کیوں ہوا؟

<h2>3: زیرِ کاشت، زیرِ آب</h2>

ضلع دادو کی تحصیل ناتھن شاہ کے لیاقت بگھیو چار سو ایکڑ کے بڑے رقبے کے مالک ہیں۔ پچھلے سال انہوں نے اپنے تمام رقبے پر گندم کاشت کی تھی لیکن 2022ء کے سیلاب نے ان کے علاقے کو بری طرح متاثر کیا۔ انہوں نے لوک سجاگ کو بتایا کہ ان کا تمام رقبہ زیر آب آ گیا تھا۔

&quot;انتظامیہ کی نااہلی کی وجہ سے پانی کی بروقت نکاسی نہیں ہو سکی۔ ہم بڑی مشکل سے صرف 50 ایکڑ پر گندم کاشت کر سکے۔ باقی رقبے پر پانی کہیں فروری میں جا کر نکالا گیا لیکن اس وقت گندم کی کاشت کا وقت گزرے بہت عرصہ بیت چکا تھا۔ ہم بینکوں اور بیوپاریوں کے مقروض ہو چکے ہیں&quot;۔

نبی بخش سٹھیو سندھ کے کاشتکاروں کی سب سے بڑی نمائندہ تنظیم ایوان زراعت سندھ کے سینئر نائب صدر ہیں۔

انہوں نے سجاگ کو بتایا کہ سندھ کے تینوں بیراجوں کا مجموعی قابل کاشت رقبہ ایک کروڑ 65 لاکھ ایکڑ ہے۔ جس میں سے گڈو بیراج پر 30 لاکھ ایکڑ، سکھر بیراج پر 40 لاکھ ایکڑ اور کوٹری بیراج پر 23 لاکھ ایکڑ رقبے پر کاشت ہوتی ہے، باقی اراضی کچے کی ہیں۔ 2022ء کے سیلاب میں 34 لاکھ 60 ہزار ایکڑ زمین زیر آب آگئی تھی، اور کپاس، چاول، مرچ سمیت دیگر کئی فصلیں مکمل طور پر تباہ ہوگئیں اور بہت سے علاقوں میں پانی کی نکاسی میں دیر ہو جانے کے باعث گندم کی فصل کاشت نہیں کی جاسکی۔

<h2>4: ایک ماہ کی سردیاں</h2>

نبی بخش سٹھیو ضلع ٹنڈو محمد خان کے کاشتکار بھی ہیں۔انہوں نے ہر سال کی طرح اس بار بھی اپنی 95 ایکڑ زمین پر گندم ہی کاشت کی۔ وہ بتاتے ہیں کہ گذشتہ سال ان کی پیداوار 35 سے 40 من فی ایکڑ تھی جبکہ اس سال 30 سے 33 من آ رہی ہے۔ وہ اس کی وجہ موسمیاتی تغیر کو قرار دیتے ہیں۔

&quot;اس بار خلاف معمول فروری میں ہی گرمی شروع ہو گئی جس سے گندم کی فصل کمزور ہوگئی&quot;۔

زیریں سندھ کے ضلع میرپورخاص، بدین اور عمرکوٹ میں گندم کی کاشت سب سے پہلے یعنی اکتوبر کی ابتداء میں ہی شروع ہو جاتی ہے اور فروری کے وسط سے گندم کی کٹائی کا آغاز ہو جاتا ہے۔مارچ کے شروع میں یہاں کی نئی گندم مارکیٹ میں آ جاتی ہے۔

&nbsp;میر پور خاص کے سب سے زیادہ سیلاب زدہ علاقے جھڈو کے کاشتکار زاہد بھرگڑی نے اس سال بھی اپنے 130 ایکڑ رقبے پر گندم کاشت کی۔

زاہد کہتے ہیں کہ سندھ میں موسم سرما دسمبر سے لیکر فروری کی آخر یا مارچ کے پہلے ہفتے تک جاری رہتا ہے لیکن رواں سال یہ دسمبر کے آخر سے شروع ہو کر جنوری کے آخر تک بمشکل ایک ماہ ہی رہا اور فروری میں ہی گرمی شروع ہو گئی جس سے گندم کے پودوں کو نقصان پہنچا۔ ان میں دانوں کی تعداد کم بھی ہو گئی اور وہ چھوٹے بھی رہ گئے، نتیجتاً فی ایکڑ پیداوار خاصی کم ہو گئی۔

بہت سے کاشت کاروں کا ماننا ہے کہ سیلاب کے باعث زیر زمین پانی کے سطح بلند ہو جانے سے بھی گندم کی پیداوار پر منفی اثرات پڑے ہیں۔

زاہد نے بتایا کہ ان کی اوسط پیداوار گذشتہ برس 33 سے 35 من فی ایکڑ تھی جبکہ اس سال یہ 26 سے 28 من رہ گئی ہے۔

<h2>5: بن موسم برسات</h2>

ضلع حیدرآباد کے علاقے مسوبھرگڑی کے تین چھوٹے کاشتکار - حضور بخش بروہی، عبدالرحمان بروہی اور محمد حفیظ سیال &ndash; اپنی گندم کی کٹائی کرنے کے بعد تھریشر کا انتظار کر رہے تھے جب 21 مارچ کو سندھ بھر میں طوفانی بارشوں اور ژالہ باری کا سلسلہ شروع ہو گیا اور ان کی گندم تھریشنگ سے پہلے ہی تباہ ہو گئی۔

حضور بخش بروہی اور عبدالرحمان بروہی نے بتایا کہ گذشتہ سال مون سون کی بارشوں نے ان کی کپاس کی فصل تباہ کردی تھی اور رواں سال موسم بہار کی بارشوں نے گندم کی تیار فصل کو برباد کردیا۔

گذشتہ سال کی موسمیاتی تباہی نے میرپورخاص کے گاؤں گل محمد گلانی کے میر حسن گلانی کی چار ایکڑ پر تیار کپاس کی فصل اور اتنے ہی رقبے پر کھڑی گنے کی فصل کو مکمل طور پر تباہ کردیا تھا۔

انہوں نے بتایا کہ رواں سال انہوں نے بیج، کھاد اور ڈیزل ادھار پر لے کر گندم کی فصل لگائی لیکن نامواقف موسم کے باعث ان کی فی ایکڑ پیداوار گذشتہ سال کی اوسط 33 من سے کم ہو کر اس سال 25 من پر آ گئی ہے۔

<h2>6: امدادی قیمت = اضافی لاگت</h2>

میرپورخاص کے زاہد بھرگڑی کا کہنا ہے کہ اس سال گندم کی کاشت پر خرچ گذشتہ سال کی نسبت دو گنا سے بھی زائد تھا۔ وہ اس کی تفصیل اس طرح بتاتے ہیں:

گذشتہ سال گندم کے بیج کے تھیلے کی قیمت تین ہزار روپے تھی جو اس سال بڑھ کر پانچ ہزار چھ سو ہوگئی، یوریا کی بوری 19 سو سے 33 سو اور ڈی اے پی کی بوری آٹھ ہزار سے 12 ہزار روپے پر چلی گئی جبکہ ڈیزل 140 روپے لٹر سے بڑھ کر 295 روپے پر پہنچ گیا۔

ان کے حساب کے مطابق پچھلے برس کل پیداواری لاگت 25 ہزار روپے فی ایکڑ تھی جو اس برس 60 ہزار ہو گئی۔

گندم کی امدادی قیمت پچھلے سال دو ہزار دو سو روپے فی من مقرر تھی جسے اس سال حکومت سندھ نے بڑھا کر چار ہزار روپے کر دیا لیکن امدادی قیمت میں یہ تاریخی اضافہ بھی لاگت میں اضافے کا ازالہ کرنے کے لیے ناکافی تھا پھر فی ایکڑ پیداوار میں کمی نے بچت کے امکانات کو یکسر ختم کر دیا۔

<h2>7: ملاکھڑا &ndash; سرکار بمقابلہ بیوپاری</h2>

محکمہ خوراک سندھ یکم مارچ سے سرکاری نرخ پر کاشتکاروں سے گندم کی خریداری کر رہا ہے جس کے لیے صوبے بھر میں ساڑھے چار سو خریداری مرکز قائم کیے گئے ہیں۔لیکن زیادہ تر کاشتکار جو اب تک اپنی گندم بیچ چکے ہیں، انہوں نے لوک سجاگ کو بتایا کہ بیوپاری چار ہزار روپے فی من کے سرکاری ریٹ سے بھی دو سو روپے زیادہ ادا کر کے ان کی پیداوار خرید رہے ہیں۔

کاشتکار بھی سرکار کی بجائے منڈی میں اپنی فصل کو بیچنے کو ترجیح دے رہے ہیں۔

سجاول کے اسمعیل درس کہتے ہیں: &quot;محکمہ خوراک گندم تو خریدتا ہے لیکن وہ رقم کی ادئیگی کے لیے ہمیں بہت رلاتے ہیں، کئی دنوں تک بینکوں کے چکر کاٹنے پڑتے ہیں، جبکہ بیوپاری نہ صرف ریٹ ان سے زیادہ دے رہا ہے بلکہ رقم بھی اسی وقت نقد ادا کر دیتا ہے&quot;۔

سندھ ایگریکلچر یونیورسٹی ٹنڈو جام کے سینئر پروفیسر ڈاکٹر اسماعیل کنبھر کہتے ہیں کہ گذشتہ سال حکومت سندھ نے گندم خریداری کا ہدف 14 لاکھ ٹن مقرر کیا تھا لیکن وہ صرف ساڑھے نو لاکھ ٹن ہی خرید پائی تھی۔اس سال بھی ٹارگٹ 14 لاکھ ٹن کا ہی رکھا گیا ہے۔

&quot;اس سال جب مجموعی پیداوار میں پچھلے سال کی نسبت دس لاکھ ٹن کی کمی متوقع ہے، 14 لاکھ ٹن کی خریداری ناممکن نظر آ رہی ہے۔&quot;

سرکاری گوداموں میں کم گندم کا مطلب ہے کہ آنے والے دنوں میں اس کی رسد اور قیمت طے کرنے میں بیوپاریوں کا پلڑا بھاری رہے گا اور سرکار ان کے سامنے بے بس نظر آئے گی۔

موسمیاتی تبدیلیوں کی شدت اور روس-یوکرین جنگ کی حدت: 'پاکستان کو گندم کی درآمد پر پہلے سے زیادہ خرچہ کرنا پڑے گا'۔

گندم کی نئی فصل سندھ کو ایک نئے غذائی بحران کے دہانے پر لے آئی ہے؟ سات اہم باتیں

text

سندھ کے ضلع لاڑکانہ سے تعلق رکھنے والی ٹرانس جینڈر فرح گذشتہ 10 سال سے حیدر آباد شہر میں مقیم ہیں۔ وہ بھیک مانگ کر گزارا کرتی ہیں۔

سبز لباس، گول بندیا اور کالے موتیوں کا ہار پہنے 38 سالہ فرح نے بتایا کہ ان کے والد کا 25 لاکھ کی مالیت کا 120 گز پر چھ کمروں کا دو منزلہ مکان اور 20 لاکھ مالیت کی ایک دکان ہے۔

&quot;میری تین بہنیں اور دو بھائی ہیں۔ ابھی جائیداد کی تقسیم نہیں ہوئی، لیکن مجھے نہیں لگتا کہ جائیداد میں سے مجھے اور میری بہنوں کو حصہ ملے گا کیوں کہ ہمارے معاشرے میں جائیداد پر صرف اولاد نرینہ کا حق تسلیم کیا جاتا ہے اور تو کچھ بھی نہیں&quot;۔ &nbsp;

فرح بتاتی ہیں کہ انہوں نے عمر کے 28 سال جیسے تیسے گزارے۔ اس دوران انہیں معاشرے میں بدترین امتیازی سلوک اور تضحیک کا سامنا کرنا پڑا۔ آخر ماں باپ بھی بے بس ہو گئے تو انہیں گھر چھوڑنا پڑا۔

وہ اب اپنے گرو کے پاس رہتی ہیں۔ ان کے بقول وہی ان کا سب کچھ ہے۔

اٹھائیس برس کی ٹرانس جینڈر بوبی علی بھی پچھلے پانچ سال سے اپنے آبائی شہر لاڑکانہ کو الوداع کہہ کر حیدر آباد میں رہتی ہیں۔ ست رنگے دوپٹے کے ساتھ لہنگے میں ملبوس انٹر پاس بوبی علی نے بتایا کہ ان کی پانچ بہنیں اور چار بھائی ہیں۔

&quot;میرے والدین کے 30 لاکھ مالیت کے 80، 80 گز کے دو پلاٹ اور 160 گز کا پانچ کمروں پر مشتمل مکان ہے۔ اس جائیداد میں سے مجھے پھوٹی کوڑی بھی نہیں ملی جبکہ باقی سب بھائی بہنوں کو اراضی اور مکان میں وراثتی حق دیا گیا&quot;۔&nbsp;

2017ء کی مردم شماری کے مطابق ملک میں ٹرانس جینڈر افراد کی تعداد 22 ہزار کے لگ بھگ ہے تاہم ٹرانس جینڈر افراد کے حقوق کی تنظیمیں ان اعدادو شمار پر متفق نہیں۔ ان کے مطابق اصل تعداد سرکاری سطح پر بتائی گئی تعداد سے کہیں زیادہ ہے۔

اس کی بڑی وجہ یہ ہے کہ بیشتر ٹرانس جینڈر افراد کے پاس شناختی کارڈ نہیں ہیں۔ شناختی کارڈ سے محروم ٹرانس جینڈر افراد کی تعداد کتنی ہے اس بارے میں بھی کوئی مصدقہ اعدادو شمار میسر نہیں۔&nbsp;

سندھ پولیس کے ہیومن رائٹس سیل کی افسر ماریہ نوید کا کہنا ہے کہ سندھ میں 22 لاکھ کی آبادی والے دوسرے بڑے شہر حیدرآباد میں ایک اندازے کے مطابق 13 ہزار ٹرانس جینڈر رہتے ہیں۔ مگر یہ اعدادو شمار بھی مصدقہ نہیں ہیں۔

ان کا کہنا ہے کہ حیدرآباد پولیس کا ہیومن رائیٹس سیل ٹرانس جینڈر افراد کا مکمل ڈیٹا اکھٹا کرنے پر کام کر رہا ہے۔

نادرا ریکارڈ کہ مطابق حیدر آباد میں سے صرف 250 ٹرانس جینڈر افراد کے پاس شناختی کارڈ ہے جبکہ وراثت کا حق صرف ایک ہی ٹرانس جینڈر کو مل سکا ہے۔

<h2>شناختی کارڈ نہیں تو وراثت کا دعویٰ بھی نہیں</h2>

حیدرآباد میں نادرا کے افسر عبدالباسط نے بتایا کہ اب تک ملک بھر میں صرف دو ہزار 943 ٹرانس جینڈر اپنی شناخت کا بنیادی حق حاصل کر سکے ہیں جس میں سندھ بھر سے 491 اور حیدرآباد کے 250 ٹرانس جینڈر بھی شامل ہیں۔

ان کا کہنا ہے کہ حیدرآباد ڈویژن میں رجسٹرڈ ٹرانس جینڈر افراد کی مجموعی تعداد 413 ہے، جس میں سے 338 ٹرانسجینڈر شہری اور 75 دیہی آبادی سے تعلق رکھتے ہیں۔

شناختی کارڈ کے لیے ٹرانس جینڈر افراد کو اپنی جنس لکھوانے کے لیے بہت سے ثبوت دینا ہوتے ہیں اور انہیں مختلف قسم کی دستاویزات پیش کرنا ہوتی ہیں جس کے باعث وہ شناختی کارڈ بنواتے ہی نہیں ہیں۔

ٹرانس جینڈر کمیونٹی سے تعلق رکھنے والی 40 برس کی ثنا خان کو اپنے والدیں سے وراثتی حق ملا ہے۔

ثنا خان کا آبائی علاقہ ضلع شکارپور ہے تاہم گذشتہ 12 سال سے حیدرآباد ان کا گھر ہے۔ شاید اسی وجہ سے وہ اپنے ساتھیوں کی نسبت زیادہ خوش مزاج نظر آتی ہیں۔&nbsp;

&quot;میرا ایک بھائی اور چار بہنیں ہیں۔ میرے ماں باپ نے باقی اولاد کی طرح مجھے بھی بلا کر اپنی جائیداد میں سے 120 گز پر بنا مکان وراثت میں دیا ہے۔ میں چاہتی ہوں کے تمام ٹرانس جینڈر افراد کو میری طرح وراثت اور شناخت کے حقوق ملیں اور جن کو نہیں ملتے وہ ٹرانس جینڈر ایکٹ 2018 سے مدد لیں کیونکہ ان کو اب قانون یہ حق دلائے گا&quot;۔&nbsp;

سفید دوپٹے اور ہلکے زرد لباس میں ملبوس 34 برس کی عمر کی ٹرانس جینڈر مہک ضلع سکھر کی رہنے والی ہیں۔

&quot;وہ کہتی ہیں &#39;&#39;میری دو بہنیں اور تیں بھائی ہیں، میرے والد کی ملکیت 240 گز کا صرف ایک ہی مکان ہے جس میں والدین، دو شادی شدہ اور دو کنوارے بھائی رہتے ہیں، مجھے امید ہے کہ جب بھی والدین جائیداد تقسیم کریں گے تو مکان میں مجھے میرا حصہ ضرور دیں گے۔ اگر میرا حصہ نہیں دیا گیا تو میں اپنا قانونی حق استعمال کروں گی۔&nbsp;

مہک کہتی ہیں کہ وہ گرو کلچر سے تنگ آچکی ہیں اور اپنا کاروبار کرنا چاہتی ہیں۔

سادہ گھریلو عورت کی طرح نظر آنے والی 37 برس کی ٹرانس جینڈر ایلش ویسے تو لاڑکانہ کی رہائشی ہیں مگر &nbsp;پچھلے سات سال سے حیدرآباد میں رہتی ہیں۔

ان کے تین بھائی اور ایک بہن ہے۔ ایلش نے بتایا کہ ان کے والدین کی کل ملکیت 140 گز کے پلاٹ پر پانچ کمروں کا ایک مکان ہے۔ بہن بھائی شادی شدہ ہیں تاہم بھائی والدین کے ساتھ رہتے ہیں۔ &quot;ماں مجھے جائیداد میں سے حصہ دینا چاہتی ہیں لیکن والد اور بھائی انکار کر رہے ہیں۔ یہ تنازع ابھی تک گھر کے اندر ہی چل رہا ہے اور دیکھیں کہاں تک چلتا ہے&quot;۔

ایلش کہتی ہیں کہ وہ اپنا حق کسی صورت نہیں چھوڑیں گی۔&nbsp;

<h2>حقوق جن سے کوئی واقف نہیں</h2>

غیر سرکاری تنظیم سندھ کمیونٹی فاؤنڈیشن کے رہنما جاوید سوز ھالائی نے بتایا کہ ایک اندازے کے مطابق ٹرانس جینڈر کمیونٹی کی نصف آبادی ناچ گانے سے منسلک ہے تاہم ان میں ایک بڑی تعداد سیکس ورکرز کی ہے۔ کچھ ٹرانس جینڈر سڑکوں پر بھیک مانگتے ہیں۔&nbsp;&nbsp;

34 برس کی فلک بھی لاڑکانہ کی رہنے والی ہیں لیکن آٹھ سال سے ان کا ٹھکانہ حیدرآباد ہے۔ فلک کے تین بھائی اور تین بہنیں ہیں۔ ان کے والدین کا لاڑکانہ شہر میں 120 گز کا مکان اور دو دکانیں ہیں اور فلک کے بقول ان کی مجموعی مالیت 75 لاکھ روپے بنتی ہے۔

ان کا کہنا ہے کہ &#39;&#39;والدین، بھائی اور بہنیں کہتی ہیں کہ تم &quot;خسرا&quot; ہو، تمہارا نہ کوئی آگے نہ پیچھے۔ تم جائیداد لے کر کیا کرو گی؟&quot;

ہیومن رائٹس کمیشن آف پاکستان (ایچ آر سی پی) حیدرآباد کے ریجنل ڈائریکٹر پروفیسر امداد چانڈیو کہتے ہیں کے ٹرانس جینڈر ایکٹ 2018 کے مطابق ہر ٹرانس جینڈر نادرا آرڈیننس 2000 کے تحت 18سال کی عمر ہونے پر شناختی کارڈ، پاسپورٹ یا ڈرائیونگ لائسنس بنوا سکتا ہے۔ اس ایکٹ کے تحت ہر بالغ ٹرانس جینڈر کو شناخت اور وراثت کا بنیادی انسانی حق دیا گیا ہے۔

ماریہ نوید بتاتی ہیں کہ ابھی تک ان کے پاس وراثتی حق کے لیے کسی ٹرانس جینڈر کی درخواست نہیں آئی۔ جیسے ہی شکایت آئے گی تو سندھ پولیس ریونیو ڈپارٹمینٹ سمیت متعلقہ تمام اداروں کے ساتھ مل کر قانون کے مطابق عمل کرے گی۔

حیدرآباد میں ٹرانس جینڈر کمیونٹی کے حقوق کے لیے کام کرنے والی انسانی حقوق کی کارکن نازش فاطمہ کا کہنا ہے کہ بیشتر ٹرانس جینڈر اپنے حقوق کی ضمانت دینے والے قانون سے لاعلم ہیں اور انہیں اس بارے میں آگاہی دینا ضروری ہے۔

سندھ ہائی کورٹ بار ایسوسی ایشن حیدرآباد کے صدر و ممتاز قانون دان غلام اللہ چانگ بتاتے ہیں کہ ٹرانس جینڈر پرسنز پروٹیکشن آف رائٹس ایکٹ 2018 کے تحت ٹرانس جینڈر افراد کو وراثت سے نہ تو بے دخل کیا جا سکتا ہے اور نہ ہی ان سے امتیازی سلوک کی اجازت ہے۔

&quot;یہ اپنے شناختی کارڈ میں جو شناخت درج کروائیں گے، اس کے مطابق ہی ان کو وراثت کا حق ملے گا اور جو اپنی مردانہ یا زنانہ شناخت کے بارے میں ابہام کا شکار ہیں تو ان کو مرد اور عورت کے وراثتی حقوق کا اوسط حصہ دیا جائے گا&quot;۔

جانی خاصخیلی

گندم کی نئی فصل سندھ کو ایک نئے غذائی بحران کے دہانے پر لے آئی ہے؟ سات اہم باتیں

قانون بن گیا، اسے مانتا کوئی نہیں: وراثتی جائیداد میں حصہ لینے کے خواہش مند ٹرانس جینڈر افراد کی مشکلات ختم نہ ہو سکیں

Lok Sujag