بلوچستان کے 36 میں سے 35 اضلاع میں بلدیاتی انتخابات کا عمل مکمل ہوچکا ہے۔ تاہم کوئٹہ میں اب تک یہ انتخابات التواء کا شکار تھے جس کے باعث اختیارات نچلی سطح پر منتقلی نہ ہونے کی وجہ سے لوگوں کی شکایات بڑھتی جا رہی تھیں۔

تاہم حلقہ بندیاں اور بلدیاتی ایکٹ میں ترمیم نہ ہونے کی وجہ سے صوبائی دارالحکومت میں انتخابات کا التوا تاخیر کا شکار تھا۔

سیاسی و مذہبی جماعتوں سمیت سول سائٹی کی جانب سے آئندہ عام انتخابات سے قبل کوئٹہ میں بلدیاتی انتخابات کا انعقاد کرانے کے پرزور مطالبات کے بعد بالآخر یہ قدم اٹھا لیا گیا ہے اور اس مقصد کے لیے شہر کی حلقہ بندیوں کا عمل بھی مکمل ہو گیا ہے جو 2017 کی مردم شماری کے تحت کی گئی ہیں۔

بلدیاتی انتخابات کے لیے کوئٹہ کو چار زون (ٹاؤن میونسپل کارپوریشنوں) میں تقسیم کیا گیا ہے جن میں زرغون، چلتن، تکتو اور سریاب شامل ہیں۔ ان چاروں زونز کی 172 یونین کونسلوں کے 641 وارڈ میں بلدیاتی انتخابات ہوں گے۔ صوبائی بلدیاتی ایکٹ میں ترمیم کے بعد دیہی علاقوں کو ختم کرکے پورے کوئٹہ کو شہری علاقہ قرار دے دیا گیا ہے۔

نئی حلقہ بندیوں کے مطابق زرغون ٹاؤن کو 45 یونین کونسلوں پر تقسیم کیا گیا ہے جس میں 163 وارڈ بنائے گئے ہیں۔

اس ٹاؤن میں کلی عالم خان، شابو، سمنگلی روڈ، سرِخ پل تک، کلی اسماعیل، سبزل روڈ پدکلی چوک، بروری روڈ، وحدت کالونی، جوائنٹ روڈ، ھدہ جیل روڈ، منو جان روڈ، چمن پھاٹک، پی ٹی سی ایل کالونی، زرغون روڈ، ریلوے کالونی، ڈبل روڈ ، تیل گودام، علمدار روڈ، مری آباد، پشتون آباد، کاسی روڈ، مین بازار، پٹیل باغ، سرکی روڈ، جان محمدروڈ، سٹیلائیٹ ٹاون بلاک 1، کاکڑ کالونی اچگزئی مارکیٹ، شالدرہ، قلندر مکان اور بلوچی سٹریٹ شامل ہیں۔

دوسرے زون چلتن ٹاؤن کو 45 یونین کونسلوں پر تقسیم کر کے حلقہ بندی کی گئی ہیں جہاں کل 171 وارڈ بنائے گئے ہیں۔

چلتن ٹاؤن میں ھزارہ ٹاؤن، کرانی، بروری روڈ پدکلی چوک کا مغربی علاقہ، ترِہ، ابرھیم زئی، رئیسانی روڈ، ارباب کرم خان روڈ، عیسیٰ نگری، شاہ زمان روڈ، کلی شیخان، ڈبل روڈ، سریاب روڈ، سیٹلائیٹ ٹاؤن بلاک 2،3،4،5، غوث آباد، یونیورسٹی، لوڑ کاریز، مشرقی بائی پاس، قمبرانی روڈ، بینک کالونی، کلی جیو، اختر آباد، ھزار گنجی اور کرانی کا علاقہ شامل ہیں۔

سریاب ٹاؤن کو 38 یونین کونسلوں پر تقسیم کرکے حلقہ بندیاں کی گئی ہیں جہاں کل 145 وارڈ قائم کیے گئے ہیں۔

اس میں کیچی بیگ، حبیب خان، عزیز خان، تختانی بائی پاس، ھزار گنجی، ماں غنڈی، سریاب کسٹم، شیخ زاید، انڈسٹریل ایریا، بوسہ منڈی، تیرہ میل اور اس کے تمام مضافاتی علاقے شامل ہیں۔

چوتھے زون تکتو ٹاؤن کو 42 یونین کونسلوں پر تقسیم کرکے حلقہ بندی کی گئی ہیں جہاں 161 وارڈ ہوں گے۔

تکتو ٹاؤن میں کچلاک، سملی، بلیلی، نوحصار، اغبرگ، پنجپائی، ھنہ اوڑک، نواں کلی، سرہ غڑگئی، کلی گل محمد خیزئی چوک، خروٹ آباد، کوتوال، شیخ ماندہ، چشمہ، پی ایم ڈی سی، زڑخو، سورینج اور ڈیگاری کا علاقہ شامل ہیں۔

کوئٹہ میں مخصوص نشستوں کے لئے تمام یونین کونسلوں میں خواتین، مزدروں، کسانوں اور اقلیتوں کے لیے صرف ایک ایک نشست مخصوص کی گئی ہے۔ لیکن جن یونین کونسلوں میں پانچ وارڈ بنائے گئے ہیں ان کی یونین کونسلوں میں دو خواتین منتخب کی جائیں گی۔

ٹاؤن کمیٹی اور ڈسٹرکٹ کونسل میں خواتین کی 30 فیصد جبکہ مزدوروں،کسانوں اور اقلیتوں کی 10 فیصد نمائندگی ہو گی جن کا انتخاب یونین کونسل میں منتخب کونسلر، ٹاؤن میں یونین کونسل کے منتخب وائس چئیرمین اور ڈسٹرکٹ کونسل میں ٹاؤن کے منتخب چئیرمین کریں گے۔ 
کوئٹہ شہر میں کچرے کے ڈھیر، سیوریج کے خراب نظام، پارکنگ اور پینے کے صاف پانی جیسے مسائل ہیں۔ سڑکیں گلیاں ٹوٹ پھوٹ کا شکار ہیں، نالیاں بند ہیں، گندے نالوں پر تجاوزات عام ہیں، پینے کا صاف پانی ناپید ہے اور تعلیم سمیت صحت کی سہولیات نہ ہونے کے باعث مکینوں کو شدید مشکلات کاسامنا کرنا پڑتا ہے۔

ان حالات میں بلدیاتی انتخابات کے انعقاد سے مسائل میں کسی حد تک کمی آنے کی امید ہے لیکن متعدد سیاسی گروہ حلقہ بندیوں سے مطمئن نہیں ہیں۔

کوئٹہ سے تعلق رکھنے والے سابق کونسلر اسلم رند الزام عائد کرتے ہیں کہ یہ حلقہ بندیاں سفارش اور بندربانٹ کی بنیاد پر ہوئی ہیں۔ ایک علاقے میں تین وراڈ پر مشتمل یونین کونسل بنائی گئی ہے تو بعض علاقوں میں یونین کونسل چار وارڈ پر مشتمل ہے۔

اسی طرح یہ الزام بھی سننے میں آ رہا ہے کہ آبادی کے تناسب کو مدنظر رکھے بغیر کئی حلقے بہت چھوٹے اور کئی بہت بڑے بنا دیے گئے ہیں۔ شہر کے حلقوں کو کم کرکے اطراف کے حلقوں کو بڑھایا گیا ہے جو نانصافی ہے۔

ایک سابق بلدیاتی نمائندے کا کہنا ہے کہ جب ایک حلقہ صوبائی حلقے جتنا بڑا بنا دیا جائے گا تو مسائل کیسے حل ہوں گے۔

اسلم رند کہتے ہیں کہ کوئٹہ کو 3 لاکھ آبادی کے لئے ڈیزائن کیا گیا تھا لیکن اب اس کی آبادی 30 لاکھ سے تجاوز کرگئی ہے جس کی وجہ سے مسائل حل ہونے کے بجائے مزید بگڑتے جا رہے ہیں۔

کوئٹہ کے علاوہ بلوچستان کے 35 اضلاع میں بلدیاتی انتخابات کا عمل 2 ماہ قبل مکمل ہو چکا ہے، بلوچستان میں 907 مقامی بلدیاتی ادارے فعال ہیں جبکہ مجموعی طور پر مخصوص نشستوں سمیت 11 ہزار بلدیاتی نمائندے منتخب ہوئے ہیں۔

قبائلی اضلاع میں مقامی حکومتوں کے انتخابات: 'بے اختیار نمائندے کونسلوں میں بیٹھ کر کیا کریں گے'۔

کوئٹہ میں بلدیاتی انتخابات کے لیے حلقہ بندیاں مکمل: کیا بلدیاتی نمائندے مسائل کا بوجھ ہلکا کر پائیں گے؟

text

بارہ سالہ شکور کی طبیعت اچانک خراب ہوئی تو والدین نے اسے گھر میں موجود دیسی دوا (پھکی) کھلا دی مگر افاقہ نہ ہوا۔ رات کو اسے پیٹ درد کے ساتھ قے بھی شروع ہو گئی۔ بیٹے کی بیماری کو دیکھ کر ان کے والد محمد خیر پریشان ہو گئے اور اسے ساتھ لے کر 25 کلومیٹر دور طبی مرکز آڑنجی کو چل پڑے۔

&nbsp;محمد خیر بتاتے ہیں کہ راستے میں پورالی ندی میں شدید طغیانی تھی جسے دیکھ کر مجبوراً انہیں واپس لوٹنا پڑا۔ شکور رات بھر درد سے بے چین رہا اور صبح دم توڑ گیا۔

یہ یکم جولائی کا واقعہ ہے۔ محمد خیر کے بقول بیٹے کی وفات کے بعد انہیں معلوم ہوا کہ اسے ہیضہ تھا اور پورے گاؤں میں یہ وبا پھوٹ پڑی تھی۔

سینتیس سالہ محمد خیر ضلع خضدار کی تحصیل وڈھ کے گاؤں ہمنار میں رہتے ہیں۔ یہ علاقہ وڈھ شہر سے 60 کلومیٹر اورخضدار سے تقریباً 80 کلومیٹر دور ہے۔

ہیضہ پھوٹنے کے بعد محکمہ صحت نے خضدار میں ایمرجنسی نافذ کر دی ہے۔ ڈی جی ہیلتھ نور محمد قاضی کا کہنا ہے کہ کسی اور علاقے سے بھی ہیضے کی شکایت آ سکتی ہے اس لیے پورے ضلع کے ہسپتالوں کو الرٹ کر دیا گیا ہے۔

محکمہ صحت نے 7جولائی کو خضدار اور 8 جولائی کو کوئٹہ اور لسبیلہ سے میڈیکل ٹیمیں متاثرہ علاقے بھجوا دی تھیں۔

اس حوالے سے بنیادی مرکز صحت آڑنجی میں ایک بیس کیمپ قائم کیا گیا ہے جہاں طبی عملہ ادویات لے کر پہنچ گیا ہے۔

سماجی کارکن گل احمد بتاتے ہیں کہ سوشل میڈیا پرجب ہیضے کی وبا کا شور اٹھا تو تبھی انتظامیہ جاگی۔اس ایک ہفتے کے دوران آڑنجی، ہمنار اور دیگر علاقوں میں اس وبا سے دو بچوں سمیت تین افراد ہلاک اور درجنوں متاثر ہو چکے تھے۔

آڑنجی اور ارد گرد کےتین گاؤں وبا سے زیارہ متاثر ہوئے ہیں جہاں سیکڑوں لوگ آباد ہیں۔

متاثرہ دیہات خضدارشہر سے 60 تا 80 کلومیٹر کے فاصلے پر واقع ہیں۔ یہ دشوار گزار پہاڑی علاقہ ہے جہاں انٹرنیٹ، بجلی یا مواصلاتی نظام تودور صاف پانی، تعلیم اور سڑک جیسی بنیادی سہولیات کا بھی کوئی تصور نہیں۔

یہاں سفر کے لیے بڑی گاڑیاں استعمال ہوسکتی ہیں۔ بعض مقامات پر یہ گاڑیاں بھی نہیں جا پاتیں اور مقامی لوگ پیدل یا گدھے اور اونٹوں پر مسافت طے کرتے ہیں۔

آڑنجی میں ایک بنیادی مرکزصحت موجود تو ہے مگر یہاں کوئی ڈاکٹر تعینات نہیں۔

محمد خیر کا کہتے ہیں کہ ہمارے گاؤں ہمنار میں کوئی طبی سہولت ہے ہی نہیں۔ بیٹا بستر مرگ پر تھا اور ہم دیسی ٹوٹکے استعمال کرتے رہے۔ آڑنجی ہسپتال پہنچنے کے لیے میلوں پیدل یا گدھے پر جانا پڑتا ہے۔ زچگی کا معاملہ ہو تب بھی یہی حال ہوتا ہے۔

گل احمد یہ انکشاف بھی کرتے ہیں کہ علاقے میں صاف پانی دستیاب نہ ہونے کے باعث یہاں کے لوگ تالابوں اورجوہڑوں کا پانی پینے پر مجبور ہیں۔اس لیے یہاں بیماریاں بھی عام ہیں اور ہیضے کی وبا کا سبب بھی یہی ہے۔

خضدار کے ڈسٹرکٹ ہیلتھ افسر بشیر احمد بنگلزئی تصدیق کرتے ہیں کہ ابتدائی تحقیقات میں ہیضہ پھوٹنے کی وجہ ناقص پانی کا استعمال ہی نظر آتی ہے۔

انہوں ںے بتایا کہ پیٹ درد، دست اور قے (الٹیاں ) ہیضے ہی کی علامات ہیں۔ تاہم اب اس وبا صورتحال پر بڑی حد تک قابو پالیا گیا ہے اور مشتبہ مریضوں کے خون اور علاقے سے پانی کے نمونے لیبارٹری کو بجھوا دیے ہیں۔

بلوچستان کے ڈائریکٹر جنرل ہیلتھ ڈاکٹر نور محمد قاضی نے لوک سجاگ کو بتایا کہ خضدار کے ہسپتالوں میں ایمرجنسی نافذ ہے اس لیے متاثرہ علاقے میں ڈیوٹی سے انکار پر ایڈہاک ڈاکٹر لعل بخش کو ملازمت سے برخاست کر دیا گیا ہے۔

&nbsp;انہوں نے بتایا کہ مزید تین ڈاکٹروں کے خلاف بھی کاروائی کی جا رہی ہے۔ چیف میڈیکل افسر ڈاکٹر غلام سرور، سنئیر میڈیکل افسر ڈاکٹر احمد علی اور ڈاکٹر عبدالوہاب کو بھی ایمرجنسی ڈیوٹی پر آڑنجی جانے کے تحریری احکامات دیئے گئے تھے مگر انہوں نے تعمیل نہیں کی۔

ڈائریکٹر جنرل کے مطابق وبا پر قابو پانے کے لیے کام کرنےو الی ٹیموں میں سپیشلسٹ ڈاکٹر، پبلک ہیلتھ سپیشلسٹ اور پیرامیڈکل سٹاف سمیت دیگر عملہ شامل ہے۔ وبا کے بارے میں تازہ ترین حالات سے باخبر رہنے اور ٹیموں سے رابطے کے لیے کوئٹہ میں کنٹرول روم بھی قائم کر دیا گیا ہے۔

ڈی ایچ او بتاتے ہیں کہ دور دراز متاثرہ علاقوں تک رسائی کے لیے طبی ٹیموں کو دو تین روز تک کڑی مشکلات کا سامنا رہا۔ بارشوں سے پہاڑی ندی &#39;پورالی&#39; میں طغیانی تھی ۔پانی کم ہوا تو تب ہی&nbsp; طبی عملے اور ادویات کو موٹرسائیکلوں، گدھوں اور اونٹوں پر متاثرہ علاقوں تک پہنچایا گیا۔

ڈی ایچ او خضدار بھی آڑنجی پہنچے اور مرکز صحت کے علاوہ ایک مسجد میں بھی طبی کیمپ قائم کردیا گیا ہے۔ 
ڈی ایچ او بشیر احمد نےتصدیق کی ہے کہ تین گاؤں کلی کباد چوٹ، کلی دوشی آبادار اور کلی ہمنار میں 60 سے زیادہ مریضوں کا علاج کیا گیا ہے۔ انہوں نے ہلاکتوں کی بھی تردید نہیں کی۔

گل محمد کہتے ہیں کہ متاثرہ علاقوں میں صرف ایمرجنسی اقدامات کی حد تک کام کیا گیا ہے۔ وبا کے بعد صوبائی دارالحکومت سے تین سو کلومیٹر دور واقع علاقوں کو کون پوچھے گا۔

انہوں نے مطالبہ کیا ہے یہاں صاف پانی اور صحت کی سہولتیں فراہم کرنے کے لیے اقدامات کئے جائیں تاکہ لوگوں کی مشکلات کم ہو سکیں۔

فضل تواب

فضل تواب فری لانس جرنلسٹ ہیں۔ وہ گزشتہ دس سالوں سے بلوچستان سے سماجی، سیاسی، معاشی اور سیکورٹی پر رپورٹ کررہے ہیں۔

کوئٹہ میں بلدیاتی انتخابات کے لیے حلقہ بندیاں مکمل: کیا بلدیاتی نمائندے مسائل کا بوجھ ہلکا کر پائیں گے؟

'بیٹا بستر مرگ پر تھا اور ہم دیسی ٹوٹکے کرتے رہے'، خضدار میں ہیضے کی وبا بے قابو کیوں ہوئی؟