ملتان میں روزانہ کم از کم تقریباً 1100 ٹن کوڑا کرکٹ اکٹھا ہوتا ہے جو شہر میں واقع کھاد فیکٹری کے عقب میں ایک بہت بڑے گڑھے میں ڈال دیا جاتا ہے۔ اس کچرے کو اکٹھا کرنے کی ذمہ داری ملتان ویسٹ منیجمنٹ کمپنی کی ہے جو روزانہ تقریباً 700 ٹن کچرا ہی جمع کر پاتی ہے اور باقی گلی محلوں میں اور سڑکوں کے کنارے پڑا رہ جاتا ہے۔

ابتدائی طور پر یہ کچرا شہر کے پانچ مختلف مقامات پر فلتھ ڈپوؤں میں جمع کیا جاتا ہے۔ ان میں اندرون ملتان کی شاہین مارکیٹ کے فلتھ ڈپو میں اسی علاقے کے گلی محلوں کا کوڑا جمع ہوتا ہے۔ دوسرا فلتھ ڈپو آغا پور فلٹریشن پلانٹ کے ساتھ گورنمنٹ سکول آغا پور کے سامنے قائم کیا گیا ہے۔ تیسرا بی بی پاک مائی قبرستان کی دیوار کے ساتھ ہے۔ چوتھا شاہ رکن عالم کالونی میں &#39;کے&#39; بلاک اور پانچواں فلتھ ڈپو سبزی منڈی روڈ پر بنایا گیا ہے۔

شاہین مارکیٹ میں فلتھ ڈپو کے قریب سائیکلوں کا کاروبار کرنے والے امجد نے بتایا کہ صبح 11 بجے تک کمپنی کی مشینری یہاں کچرا جمع کرتی رہتی ہے۔ اس کے بعد دن بھر اس کی شہر سے باہر منتقلی جاری رہتی ہے۔ اس دوران کچرا اڑ کر دکانوں میں آتا ہے اور لوگوں کو اس کی بدبو پریشان کرتی رہتی ہے۔

آغا پور میں فلٹریشن پلانٹ پر پانی بھرنے کے لیے آنے والے شہری ندیم کا کہنا ہے کہ فلٹریشن پلانٹ کے سامنے فلتھ ڈپو نہیں ہونا چاہیے۔ اس کی موجودگی میں یہ جگہ آلودہ ہو گئی ہے جبکہ بہت بڑی آبادی یہاں پانی بھرنے آتی ہے۔

اسی فلتھ ڈپو کے قریب سکول سے اپنے بچوں کو لانے والے شہری افضل نے بتایا کہ فلتھ ڈپو قریب ہونے کی وجہ سے سکول کے بچے آلودہ فضا میں سانس لیتے ہیں اور انہیں بیماریاں لاحق ہونے کا اندیشہ ہے۔

پاک مائی قبرستان اور شاہ رکن عالم کالونی کے فلتھ ڈپو سے بھی لوگوں کو اسی طرح کی شکایات ہیں۔

ویسٹ مینجمںٹ کمپنی شہر کی 68 یونین کونسلوں سے کوڑا اٹھاتی ہے جس کے پاس عملے اور مشینری کی کمی ہے۔ جمع شدہ کچرے کو ٹھکانے لگانے کے لیے بھی کمپنی کے پاس مناسب جگہ نہیں۔

2010ء میں سٹی ڈسٹرکٹ گورنمنٹ نے شہر بھر سے جمع ہونے والے کچرے کو تلف کرنے کے لیے حبیبہ سیال کے مقام پر 12 ایکڑ رقبہ حاصل کیا اور کم و بیش چھ کروڑ کی لاگت سے وہاں لینڈ فل سائٹ بنائی۔ دو برسوں سے کمپنی نے یہاں مزید کچرا منتقل کرنے کا عمل روک دیا ہے کیونکہ یہ تقریباً بھر چکی ہے۔

ملتان ویسٹ منیجمنٹ کمپنی کے سینئر منیجر فہیم لودھی نے بتایا کہ حبیبہ سیال والی لینڈ فل سائٹ اب صرف عید الاضحٰی کے مواقع پر قربانی کے جانوروں کی آلائشیں ٹھکانے لگانے کے لیے استعمال کی جاتی ہے۔

&quot;ایشیائی ترقیاتی بینک کی مدد سے نئی لینڈ فل سائٹ کے لیے جگہ تلاش کی جا رہی ہے۔ حبیبہ سیال سے چار کلومیٹر کے فاصلے پر 250 ایکڑ اراضی کی نشاندہی کی گئی ہے لیکن اس کے لیے بڑے بجٹ کی ضرورت ہے۔&quot;

اس کمپنی کا قیام 2013ء میں عمل میں لایا گیا تھا۔ ضلعی حکومت کی جانب سے اس کے لیے 2200 اہلکار بھرتی کیے گئے۔ صفائی کی مشینری اور لینڈ فل سائٹ کے لیے جگہ بھی فراہم کی گئی۔ تاہم 10 سال گزرنے اور آبادی بڑھنے کے باوجود نہ تو مزید عملہ بھرتی کیا گیا، نہ مشینری خریدی گئی اور نہ ہی نئی لینڈ فل سائٹ کے لیے جگہ حاصل کی گئی۔ بھرتی ہونے والے اہلکاروں میں سے 600 ریٹائر ہو چکے ہیں۔ 650 کے قریب اہلکار 50 سال سے زیادہ عمر کو پہنچ چکے ہیں جبکہ 200 اہلکار دفاتر اور دیگر مقامات پر ذمہ داریاں انجام دیتے ہیں۔

کمپنی حکام کے مطابق اس کے پاس صفائی کے لیے 1050 سے 1200 تک کارکن ہیں جبکہ آبادی کے لحاظ سے کمپنی کو 3600 اہلکاروں کی ضرورت ہے۔

سالانہ 80 کروڑ روپے سے زیادہ کا بجٹ لینے والی اس کمپنی کے عملے کو شکایت ہے کہ انہیں صحت کی سہولیات فراہم نہیں کی جاتیں۔ 52 سالہ اہلکار بشیر کچرے کو فلتھ ڈپو تک پہنچانے کا کام کرتے ہیں۔ ان کا کہنا ہے کہ وہ ہیپا ٹائٹس سی میں مبتلا ہیں لیکن کچرا اٹھانے کے لیے انہیں جو ریڑھی دی گئی ہے اس کے ٹائروں میں ہوا تک نہیں ہوتی۔

ملتان ویسٹ مینجمنٹ کمپنی کے چیف ایگزیکٹو شاہد یعقوب نے بتایا کہ صفائی کرنے والا عملہ صبح چار بجے سے دوپہر 12 بجے تک شہر میں صفائی کرتا ہے البتہ اس کے پاس مشینری پرانی ہے کیونکہ کمپنی کے قیام سے اب تک نئی مشینری نہیں خریدی گئی۔ تاہم انہوں نے بتایا کہ نئی لینڈ فل سائٹ کے لیے جگہ کا انتخاب کیا جا رہا ہے۔

ان کا کہنا ہے کہ&nbsp; چار سال قبل نئی مشینری کی خریداری کا عمل شروع ہوا لیکن اب تک پرکیورمنٹ اور فنانس کا سٹاف اسے مکمل نہیں کر پایا۔

کمشنر ملتان ڈویژن عامر خٹک نے اس حوالے سے بتایا کہ ملتان ویسٹ مینجمنٹ کمپنی 40 کروڑ روپے کی لاگت سے جلد مشنیری خرید رہی ہے جس کے بعد مسائل میں کمی آئے گی۔

ندی کے حال کو اب دیکھ کر افسوس ہوتا ہے: 'صنعتی فضلے، گندے پانی اور کوڑاکرکٹ کی آمیزش سے مردان کی کلپانی ندی کا پانی شدید آلودہ ہو گیا ہے'۔

ملتان میں کوڑے کرکٹ کو ٹھکانے لگانے کے ناقص انتظام سے شہریوں کی صحت کو خطرہ

text

اندرون شہر ملتان کی امبر کو زچگی کے لیے ڈسٹرکٹ ہیڈ کوارٹر ہسپتال لایا گیا تو وہاں رش کے باعث انہیں ہسپتال میں داخل ہونے کے لیے بھی کافی دیر تک مرکزی دروازے پر انتظار کرنا پڑا۔ بصد مشکل جب انہیں گائنی وارڈ لایا گیا تو ان کے آپریشن میں بھی مقررہ وقت سے آٹھ گھنٹے زیادہ تاخیر ہوئی جس کے نتیجے میں ان کا بچہ جانبر نہ ہو سکا۔

امبر کا آپریشن ڈی ایچ کیو کے اس حصے میں ہوا جو کبھی فاطمہ جناح ویمن ہسپتال کہلاتا تھا۔&nbsp; 2007ء میں اس کا قیام عمل میں لایا گیا اور یہاں حاملہ و زچہ عورتوں کے لیے لیبر روم اور آپریشن تھیٹر کی سہولتیں فراہم کی گئیں۔ 2017ء میں اس کے قریب گورنمنٹ شہباز شریف ہسپتال تعمیر ہوا جسے ڈسٹرکٹ ہیڈ کوارٹر ہسپتال کا درجہ دے دیا گیا اور فاطمہ جناح ویمن ہسپتال ملتان کو اس کا سب کیمپس قرار دے دیا گیا جس کے بعد اس میں سہولیات بڑھانے پر کوئی توجہ نہیں دی گئی۔

اس ہسپتال میں ضلع بھر سے عورتوں کی بڑی تعداد علاج کے لیے آتی ہے البتہ زچگی کے لیے صرف ایک آپریشن تھیٹر اور پانچ بستروں پر مشتمل ایک لیبر روم ہے۔ داخل ہونے والے مریضوں کے لیے 40 بستروں کی سہولت ہے۔ ایک ڈاکٹر آؤٹ ڈور وارڈ، ایک آپریشن تھیٹر اور ایک لیبر روم میں صبح کے وقت فرائض انجام دیتی ہیں۔ شام اور رات کے اوقات میں یہاں ایک ایک گائناکالوجسٹ ہوتی ہیں۔

دولت گیٹ کی رہنے والی مسز فراز اس ہسپتال میں اپنا تجربہ بیان کرتے ہوئے کہتی ہیں کہ وہ اپنے شوہر کے ہمراہ ڈی ایچ کیو ہسپتال کے سب کیمپس گئیں تو وہ سات ماہ کی حاملہ تھیں۔ وہاں عورتوں کی بڑی تعداد آﺅٹ ڈور کے باہر انتظار کر رہی تھی۔

&quot;کئی گھنٹے بعد بھی میں صرف ابتدائی چیک اپ ہی کرا سکی۔ الٹرا ساﺅنڈ کے لیے اگلے روز پھر ہسپتال آ کر اسی انتظار اور اذیت سے گزرنا پڑا۔&quot;

وہ بتاتی ہیں کہ زچگی کے لیےان کے شوہر انہیں رات 12 بچے اسی ہسپتال میں لائے۔ تاہم عملے نے ان کی حالت دیکھتے ہی ہسپتال میں داخل کرنے سے انکار کر دیا اور کسی طبی معائنے کے بغیر ہی نشتر ہسپتال جانے کو کہ دیا۔

ان کے شوہر کا کہنا ہے کہ اگر وہ کسی بحث میں پڑتے تو اپنی اہلیہ کی زندگی کو خطرے میں ڈالتے۔ لہٰذا وہ خاموشی سے فوری طور پر نشتر ہسپتال چلے گئے اور وہاں بھی لیبر روم میں بہت رش تھا۔ بستروں کی حالت اور صفائی کے انتظامات بھی انتہائی ناقص تھے۔ مجبوراً انہیں اپنی اہلیہ کو الشفا ہسپتال لے جانا پڑا جہاں آپریشن کے ذریعے بچے کی پیدائش ہوئی۔

ڈسٹرکٹ ہیڈ کوارٹر ہسپتال کے حالات کی بابت سوال پر وہاں تعینات گائنا کالوجسٹ ڈاکٹر ارم کا کہنا ہے کہ ایک ڈاکٹر کے لیے ممکن ہی نہیں کہ وہ آٹھ گھنٹے کی ڈیوٹی کے دوران سیکڑوں مریضوں کا معائنہ کر سکے۔ ڈاکٹروں کی کمی کے باعث مریضوں کو طویل انتظار کرنا پڑتا ہے۔ ڈاکٹروں کی تعداد ہی نہیں بلکہ جگہ کی کمی بھی اس ہسپتال کا ایک بڑا مسئلہ ہے۔

انہوں نے بتایا کہ ان کے ہسپتال میں روزانہ تقریباً 20 خواتین کی زچگی ہوتی ہے جن میں سے 16 آپریشن اور چار سے پانچ نارمل کیس ہوتے ہیں۔

ایم ایس کے مطابق ان کے پاس انتہائی نگہداشت کے یونٹ موجود نہیں اس لیے مجبوراً انہیں پیچیدہ کیس نشتر ہسپتال بھیجنا پڑتے ہیں۔

&quot;یہاں صرف چھ گائناکالوجسٹ ہیں جو تین مختلف اوقات میں مریضوں کے علاج اور آپریشن کے لیے ڈیوٹی پر موجود رہتی ہیں۔ آﺅٹ ڈور میں آنے والی خواتین کی تعداد روزانہ 345 سے زیادہ ہوتی ہے۔ مریضوں کی تعداد کے لحاظ سے گائنی کی ڈاکٹر بہت کم ہیں۔&quot;

ڈاکٹر صائمہ ارم کا کہنا تھا کہ وہ اور ان کی ساتھی ڈاکٹر محدود عملے کے باوجود ہسپتال میں آنے والی خواتین کو مکمل طبی سہولیات فراہم کرنے کی کوشش کرتی ہیں۔

ہسپتال سے حاصل کیے گئے اعداد و شمار کے مطابق اس کے سب کیمپس میں 2022ء میں چار ہزار 500 عورتوں کی زچگی ہوئی۔ رواں سال ستمبر میں 537 زچگیاں ہوئیں۔ ان میں سے 183 نارمل کیس تھے جبکہ 317 بچے آپریشن کے ذریعے پیدا ہوئے۔

چیف ایگزیکٹو آفیسر (سی ای او) ہیلتھ ڈاکٹر فیصل قیصرانی نے بتایا کہ حکومت پنجاب کی ہدایت پر مریض عورتوں کو طبی سہولیات دی جا رہی ہیں اور اس حوالے سے بنیادی مراکز صحت اور تحصیل ہیڈ کوارٹر ہسپتالوں کی کارکردگی کو بھی بہتر بنایا جا رہا ہے۔

انہوں نے کہا کہ 50 لاکھ سے زیادہ آبادی والے ضلع ملتان میں ماں اور بچے کی صحت کے پروگرام کے لیے ان کے پاس صرف 1800 لیڈی ہیلتھ ورکر ہیں۔ ان کی کمی کے باعث آئی آر ایم این سی ایچ پروگرام کےتمام اہداف حاصل نہیں کیے جا سکتے۔

خیال رہے کہ نیشنل میٹرنل اینڈ نیوبارن چائلڈ ہیلتھ (آئی آر ایم این سی ایچ) ماں اور بچے کی صحت کی بہتری کے لیے یونیسف کے تعاون سے شروع کیا گیا ایک پروگرام ہے۔

ضلع ملتان میں عورتوں کے لیے دیگر سرکاری ہسپتالوں میں بھی مکمل سہولیات موجود نہیں۔ ضلع میں 82 ہیلتھ سنٹر ہیں اور ہر ایک میں صرف ایک لیڈی ہیلتھ ورکر اور ایک مڈوائف تعینات ہیں۔ ضلع بھر میں صرف آٹھ رولر ہیلتھ سنٹر، تین ٹاؤن سپتال اور دو ٹی ایچ کیو ہسپتال ہیں جہاں حاملہ و زچہ عورتوں کے لیے مناسب سہولتوں کا فقدان ہے۔

ڈپٹی کمشنر ملتان کیپٹن (ر) رضوان قدیر سے ماں اور بچے کی صحت کو یقینی بنانے کے حوالے سے اقدامات پر سوال کیا گیا تو ان کا کہنا تھا کہ نشتر 2 اور مدر اینڈ چائلڈ ہسپتالوں کا قیام عمل میں لایا جا رہا ہے۔ ان کے مکمل فعال ہونے کے بعد ان مسائل میں کمی آ جائے گی۔

بلال حیات

ملتان میں کوڑے کرکٹ کو ٹھکانے لگانے کے ناقص انتظام سے شہریوں کی صحت کو خطرہ

ڈی ایچ کیو ہسپتال ملتان کے شعبہ گائنی میں 6 ڈاکٹروں پر ہزاروں مریضوں کا بوجھ