موسمیاتی تبدیلی کے باعث پگھلتے گلیشیئروں اور دریائے یارخون میں آنے والی طغیانیوں نے اپر چترال میں تباہی مچادی ہے۔ جہاں کچھ عرصہ پہلے دیہات آباد تھے، وہ جگہیں اب کھنڈرات کا منظر پیش کر رہی ہیں۔ پرکوسب، چنار، آوی، اور بریپ میں لوگوں کے گھر، پھلوں کے باغات اور زرعی زمینیں سیلاب برد ہو گئی ہیں۔

میراگرام سیلاب سے بری طرح متاثر ہونے والے علاقوں میں شامل ہے جہاں کم از کم سات گھر، متعدد دکانیں اور باغات تباہ ہوئے ہیں جبکہ بہت سے مکانات کو جزوی نقصان پہنچا ہے۔

اس علاقے میں رہنے والے محمد ظفر جان&nbsp; پیشے کے لحاظ سے دکاندار ہیں اور اپنی زمینوں پر کاشت کاری بھی کرتے ہیں۔ انہوں نے بتایا ہے کہ زندگی معمول کے مطابق گزر رہی تھی، لیکن پل بھر میں سب کچھ بدل گیا۔

&quot;شام کے وقت بارش ہورہی تھی کہ اچانک سیلاب کی اطلاع آئی اور لوگوں کو جان بچانے کے لیے کہا گیا۔ چنانچہ لوگ اپنا گھر بار چھوڑ کر گھروں سے نکل گئے۔ زندگی تو بچ گئی لیکن اور کچھ نہیں بچا۔&quot;

آوی سے تعلق رکھنے والے سماجی کارکن افگن رضا کا گھر اور زرعی زمین بھی سیلاب سے متاثر ہوئی ہے۔ وہ بتاتے ہیں کہ ان کی 80 ایکڑ زرعی اراضی سیلاب برد ہوئی ہے۔ پچھلے سال آنے والے سیلاب میں بھی ان کا گھر بار بہہ گیا تھا۔ تاہم انہوں نے جیسے تیسے گھر دوبارہ تعمیر کر کے ایک امدادی ادارے کے تعاون سے کچھ زمین بھی قابل کاشت بنا لی تھی۔ لیکن مختصر عرصہ میں وہ دوبارہ وہیں آ کھڑے ہوئے ہیں۔

سیلابی پانی میں بجلی کھمبے اکھڑ جانے سے اوی تا کارگین اور تحصیل مستوج کو بجلی کی فراہمی منقطع ہو چکی ہے جبکہ اوی سے میراگرام نمبر ایک کو جانے والی سڑک تباہ ہو گئی ہے۔

اوی کے قریبی علاقے دمادومی میں تقریباً 40 گھرانے آباد ہیں جن کے لیے آغا خان رورل سپورٹ پروگرام (اے کے آر ایس پی) کے تعاون سے پانی کا بندوبست کیا گیا تھا۔ حالیہ سیلاب میں ان کے بچھائے ہوئے پائپ پُل سمیت دریا میں بہہ گئے ہیں۔ جن علاقوں میں محکمہ پبلک ہیلتھ کی طرف سے پینے کے پانی کا بندوبست کیا گیا تھا وہاں بھی یہ نظام دریائے چترال کی طغیانی میں بہہ گیا ہے اور اب انہیں پینے کے پانی کی قلت کا سامنا ہے۔

تحصیل مستوج کے گاؤں پرکوسب، غورو پائیں اور غورو بالا کو مستوج سے ملانے والی لگ بھگ تین کلومیٹر طویل سڑک بھی پانی میں بہہ گئی ہے اور اب لوگ اس سڑک کی بحالی کیلئے چندہ اکٹھا کررہے ہیں۔ یہ سڑک یارخون شیندور روڈ کے متبادل کے طور پر بھی استعمال ہوتی ہے اور اس کی بحالی کے لئے پرکوسب کے لوگ حکومتی امداد کے منتظر ہیں۔

غورو پائن میں لوگوں کے گھر، جنگلات، باغات اور زرعی زمینیں دریا برد ہو گئی ہیں۔ تاہم ابھی تک نقصانات کا تخمینہ نہیں لگایا جا سکا۔

اس علاقے میں رہنے والے ریٹائرڈ ٹیچر سید محبوب علی شاہ کہتے ہیں کہ پھل دار درختوں کا باغ اگانے میں کئی سال لگتے ہیں اور اسے تباہ ہونے میں چند ہی لمحے درکار ہوتے ہیں۔

&quot;ہماری عمر بھر کی محنت سیلاب کی نذر ہو گئی ہے۔ ڈپٹی کمشنر صاحب دوسرے افسروں کے ہمراہ یہاں آئے تھے، انہوں نے بحالی کی یقین دہانی کرائی ہے۔ تاہم ابھی تک امدادی اداروں کی جانب سے چند خیمے ہی فراہم کیے گئے ہیں۔&quot;

اس علاقے میں متعدد لوگوں کے گھر مکمل طور پر تباہ ہو گئے ہیں جن کے پاس اب خیمہ لگانے کی جگہ بھی نہیں اور وہ دوسروں کی زمین پر رہ رہے ہیں۔

مستوج کے گاؤں چنار میں چھ خاندانوں کے جائیدادیں سیلاب میں بہہ گئیں لیکن خوش قسمتی سے کوئی جانی نقصان نہیں ہوا۔ اس علاقے میں رہنے والے صاحب کمال کا کہنا ہے کہ اگرچہ ان کا گھر سیلاب میں محفوظ رہا ہے لیکن طغیانی کسی بھی وقت انہیں ہدف بنا سکتی ہے۔

اپر چترال کے اسسٹنٹ کمشنر شاہ عدنان کا کہنا ہے کہ مقامی انتظامیہ کی جانب سے کئی دیہات کو امدادی سامان فراہم کر دیا گیا ہے اور یارخون کے بعض علاقوں تک رسائی کی کوشش تاحال جاری ہے کیونکہ راستے بہت خراب ہیں۔ امدادی سرگرمیوں کے لیے ہیلی کاپٹر فراہم کرنے کی بھی درخواست کی ہے لیکن ابھی تک اس پر عمل نہیں ہوا۔

انہوں نے بتایا کہ دشوار گزار علاقوں میں مدد پہنچانے کے لیے گدھوں اور خچروں کے استعمال کا بھی سوچا گیا لیکن ایسا کرنا اس لیے ممکن نہیں کہ جس پیمانے پر امدادی اقدامات درکار ہیں ان کے لیے بہت بڑی تعداد میں جانوروں کی ضرورت ہو گی جسے پورا کرنا ممکن نہیں۔

شاہ عدنان کے مطابق پانی کی فراہمی کے لیے محکمہ پبلک ہیلتھ کے ساتھ مل کر کام کیا جا رہا ہے اور بجلی بھی جلد بحال کر دی جائے گی۔

"آسمان پر بادل دیکھ کر فکر ہوتی ہے کہ کہیں اُچھار نالے میں سیلاب سے راستے بند نہ ہو گئے ہوں"

'زندگی تو بچ گئی، اور کچھ نہیں بچا'، چترال میں بارشوں اور سیلاب سے متاثرہ لوگ مدد کے منتظر

text

راولپنڈی میں جی ٹی روڈ پر واقع گولڈن جوبلی ہاؤسنگ سوسائٹی 300 کنال کے رقبے پر پھیلی ہوئی ہے۔ بحریہ ٹاؤن سے متصل اس ہاؤسنگ سوسائٹی کے نسبتاً محفوظ محل وقوع کے باعث یہاں زیادہ تر گلگت بلتستان اور چترال کے لوگ رہتے ہیں۔ 
1988ء میں قائم ہونے والی اس سوسائٹی میں بسنے والے لگ بھگ 500 خاندانوں کی صحت کو نیشنل لاجسٹک سیل (این ایل سی) کے قائم کردہ پلانٹ سے خطرات لاحق ہیں۔یہ پلانٹ کالونی کے ساتھ واقع ہے۔

این ایل سی کے اس پلانٹ سے سڑک کی تعمیر میں استعمال ہونے والا مواد تیار ہوتا ہے۔ اس کی تیاری کا عمل نہ صرف ماحول کو آلودہ کر رہا ہے بلکہ آس پاس کے رہائشیوں کی صحت کو متاثر کر رہا ہے۔

&nbsp;این ایل سی کے اہلکار کہتے ہیں کہ یہ پلانٹ عارضی ہے۔

شکراللہ بیگ 2018ء سے اس کالونی میں مقیم ہیں۔ انہوں نے لوک سجاگ کو بتایا کہ&nbsp; تب یہاں ایک پلانٹ پہلے سے چل رہا تھا۔ تقریباً ایک سال قبل اس میں توسیع کرتے ہوئے ایک اور پلانٹ کا اضافہ کر دیا گیا۔ اب شور بھی دوگنا ہے اور آلودگی اور بدبو بھی۔

سوسائٹی کے ایک رہائشی نے نام نہ ظاہر کرنے کی شرط پر بتایا کہ یہاں مختلف حجم کی بجریاں گاڑیوں میں بھر کر لائی جاتی ہیں اور ان کو تار کول کے ساتھ ملایا جاتا ہے۔

اس مقصد کے لیے پہلے تار کول کو گرم کیا جاتا ہے۔ بجری اور تارکول کو ملانے کے بعد گاڑیوں میں ڈالا جاتا۔ اس کے بعد وہ مطلوبہ مقام پر روانہ ہو جاتی ہیں۔

&quot;تارکول کو جلانے یا گرم کرنے سے ناگوار بدبو گھروں کے اندر تک آ جاتی ہے۔ اس سے سانس لینے میں دشواری بھی ہوتی ہے&quot;۔

ان کے مطابق چونکہ ہاؤسنگ سوسائٹی پلانٹ سے زیادہ بلند مقام پر ہے اس لیے یہاں دھواں اور بدبو باآسانی پھیل جاتے ہیں۔

ماہرین کے مطابق تار کول کو جلانے یا گرم کرنے سے سلفر ڈائی آکسائیڈ اور کاربن مونو آکسائیڈ جیسی مضر گیسیں پیدا ہوتی ہیں۔

اس عمل میں فضائی آلودگی کا بہت بڑا سبب بننے والی گیسیں نائٹرک آکسائیڈ اور نائٹروجن آکسائیڈ بھی خارج ہوتی ہیں۔ تارکول کو جلانے کے عمل میں راکھ کی صورت باریک ذرات فضا میں پھیل جاتے ہیں۔

گلگت بلتستان سے تعلق رکھنے والے فرقان علی گولڈن جوبلی ہاؤسنگ سوسائٹی میں گزشتہ چھ برسوں سے&nbsp; رہائش پذیر ہیں۔ ان کا کہنا ہے کہ پلانٹ پر زیادہ تر رات اور صبح ہوجانے کے بعد تک کام ہوتا ہے۔&nbsp;

&quot;ہماری سوسائٹی کے علاوہ بحریہ ٹاؤن اور ڈی ایچ اے بھی متاثر ہو رہے ہیں۔ پلانٹ کے اندر این ایل سی کی اپنی کالونی پر بھی اثرات مرتب ہو رہے ہیں۔

اس سوسائٹی میں مقیم نوشین کاشف کی صحت بظاہر متاثر ہے۔نوشین کاشف فری لانسر ہیں اور سوسائٹی میں دو سال سے مقیم ہیں۔ ان کا کہنا ہے کہ یہاں منتقل ہونے کے بعد سے وہ دمے میں مبتلا ہیں۔ ان کا کہنا ہے کہ اس سے پہلے وہ بالکل صحت مند تھیں۔

سلفر ڈائی آکسائیڈ کا شمار فضا آلودہ کرنے والی گیسوں میں ہوتا ہے۔ ایک تحقیق کے مطابق اس گیس کی فضا میں مسلسل موجودگی سے حاملہ عورتوں کے ہاں بچوں کی قبل از وقت پیدائش کا خطرہ بڑھ جاتا ہے۔بے رنگ اور بے بو کاربن مونوآکسائیڈ زہریلی اور مہلک گیس ہے۔ سانس کے ذریعے معتدل مقدار میں انسانی جسم میں داخل ہونے کی صورت میں اس سے مستقل سردرد، تھکاوٹ اور غنودگی کی علامات پیدا ہوتی ہیں۔ بند عمارت یا کمرے میں بھر جانے کی صورت میں یہ گیس انسانی جان بھی لے سکتی ہے۔

اہل علاقہ مختلف فورمز پر پلانٹ سے پیدا ہونے والی آلودگی کی شکایت درج کراچکے ہیں۔

لوک سجاگ کو دستیاب ریکارڈ کے مطابق گولڈن جوبلی ہاؤسنگ سوسائٹی کی جانب سے ایجنسی برائے تحفظ ماحولیات (ای پی اے) کو ایک خط بھی لکھا گیا جس میں اس پلانٹ سے پیدا ہونے والی ماحولیاتی آلودگی اور متعلقہ مسائل سے محکمہ ماحولیات کو آگاہ کیا گیا۔

ای پی اے کے ایک اہلکار نے نام مخفی رکھنے کی شرط پر بتایا کہ ان کی جانب سے چلتے ہوئے پلانٹ کا دورہ کیا گیا تھا۔ &quot;ابتدا میں این ایل سی کے اہلکاروں کی جانب سے اس پلانٹ کو اپنانے ہی سے انکار کیا گیا لیکن جب میں نے خود جا کر معائنہ کیا تو ان کا کہنا تھا کہ یہ پلانٹ عارضی ہے، مستقل نہیں ہے&quot;۔

اس ہاؤسنگ سوسائٹی کے رہنے والوں نے سٹیزن پورٹل پر بھی شکایت درج کی مگر اسے یہ کہہ کر خارج کر دیا گیا کہ یہ پلانٹ عارضی ہے، جلد ہی ختم کردیا جائے گا۔

مگر کب یہ کسی کو معلوم نہیں۔

ای پی اے کے اہلکار کا کہنا ہے کہ شکایت کا خارج ہونا سمجھ سے بالاتر ہے۔ یہ اخراج کسی غلطی کا نتیجہ ہو سکتا ہے۔ &quot;کیونکہ کسی نے ہم سے کوئی رائے نہیں لی۔ ہم اس کی پلانٹ پر نظر رکھے ہوئے ہیں اور ہماری تحقیقات جاری ہے&quot;۔

این او سی کے حوالے سے ای پی اے کے اہلکار کا کہنا ہے کہ این ایل سی نے اس پلانٹ کا کوئی این او سی نہیں لیا اور نہ ہی پلانٹ کے بارے میں انہیں پہلے کوئی علم تھا۔

ماہر قانوں&nbsp; بیرسٹر اسدالملک بتاتے ہیں کہ ایجنسی برائے تحفظ ماحولیات (ای پی اے) فیکٹریوں اور پلانٹس کو این او سی جاری کرتی ہے۔ماحولیاتی آلودگی پیدا کرنے کی شکایت ای پی اے میں ہو سکتی ہے۔ ان سے پوچھا جا سکتا ہے کہ ماحولیاتی نقطہ نظر سے فلاں فیکٹری&nbsp; یا پلانٹ کی جانچ پڑتال ہو چکی ہے یا نہیں؟

&quot;معائنہ کرنا&nbsp; ای پی اے کی ذمہ داری ہے۔ اگر فیکٹری سے ماحولیاتی آلودگی پیدا ہو رہی ہے تو اس کے پاس جرمانہ کرنے یا فیکٹری بند کرنے کا اختیار موجود ہے&quot;۔

اسدالملک کہتے ہیں اگر ای پی اے کارروائی نہیں کرتا یا شکایت کنندہ کو محسوس ہوتا ہے کہ فیکٹری انتظامیہ اور ای پی اے میں گٹھ جوڑ ہے تو اس کے خلاف ہائی کورٹ میں رٹ پٹیشن دائر کی جا سکتی ہیں۔

شکراللہ، نوشین اور سوسائٹی کے دیگر مکین ایک طاقتور ادارے کے آمنے سامنے نہیں ہونا چاہتے۔

جن لوگوں کے اپنے گھر ہیں وہ پلانٹ کی &#39;عارضی مدت&#39; ختم ہونے کے انتظار میں ہیں جبکہ کرائے دار نئے گھروں کی تلاش میں وقت کاٹ رہے ہیں۔

سید اولاد الدین شاہ

'زندگی تو بچ گئی، اور کچھ نہیں بچا'، چترال میں بارشوں اور سیلاب سے متاثرہ لوگ مدد کے منتظر

این ایل سی کے پلانٹ کی آلودگی: راولپنڈی کی ہاؤسنگ سوسائٹی کے مکین عدالت کیوں نہیں جاتے؟

Lok Sujag