سیالکوٹ کے محمد نبیل بارہویں جماعت میں پڑھتے ہیں۔ پچھلے سال مارچ میں وہ موٹرسائیکل پر جا رہے تھے کہ خواجہ صفدر روڈ پر ایک گڑھے سے بچتے ہوئے انہوں ںے توازن کھو دیا اور سڑک پر گر گئے۔ نبیل کی بہن بھی ان کے ساتھ تھیں جو دسویں جماعت کی طالبہ ہیں۔ اس حادثے میں نبیل کی ٹانگ اور ان کے بہن کے بازو کی ہڈی دو جگہ سے ٹوٹ گئی۔

حادثے کے بعد دونوں کو مہینوں زیرعلاج رہنا پڑا جس کے باعث ان کا تعلیمی سال ضائع ہو گیا۔ اب وہ صحت یاب تو&nbsp; ہو گئے ہیں لیکن ان کی والدہ کو مستقل خوف نے آ لیا ہے اور جب بھی نبیل موٹرسائیکل پر کہیں جائیں تو انہیں دھڑکا لگا رہتا ہے کہ کہیں انہیں کوئی اور حادثہ پیش نہ آ جائے۔

چار بہنوں کے بھائی محمد سلمان کے ساتھ بھی ایسا ہی حادثہ پیش آیا جس کے اثرات وہ ابھی تک محسوس کرتے ہیں۔ گزشتہ سال وہ اپنی چھوٹی بہن کو کالج چھوڑنے جا رہے تھے کہ کشمیر روڈ پر ان کی موٹرسائیکل ایک کار سے ٹکرا گئی۔

حادثے میں ان کے سر پر گہری چوٹ آئی۔ سیالکوٹ کے ہسپتالوں میں ان کا علاج ممکن نہیں تھا اس لیے انہیں لاہور کے جنرل ہسپتال ریفر کیا گیا جہاں تین ہفتے علاج کے بعد وہ بظاہر صحت یاب ہو گئے لیکن ان کے سر میں اب بھی درد رہتا ہے۔

سلمان کی والدہ کے مطابق ڈاکٹروں کا کہنا ہے کہ 25 سال کی عمر میں ان کے بیٹے کو ایک اور آپریشن کروانا پڑے گا اور تبھی وہ مکمل صحت یاب ہو سکیں گے۔ وہ کہتی ہیں کہ اس حادثے کی وجہ ٹوٹی پھوٹی سڑک اور اس پر ایک غیرمتوازن یو ٹرن تھا۔

سیالکوٹ میں خواجہ صفدر روڈ یا کشمیر روڈ ہی نہیں بلکہ بیشتر سڑکوں کی حالت بہت خراب ہے جہاں حادثات روزانہ کا معمول ہیں۔

ریسکیو 1122کے مطابق پچھلے 8 ماہ کے دوران شہر میں 6062 ٹریفک حادثات میں 16 ہزار 711 زخمی افراد ہو چکے ہیں۔

اس شہر کے سب سے بڑے سرکاری طبی مرکز علامہ اقبال میموریل ہسپتال کی ایمرجنسی میں بطور نیورو سرجن کام کرنے والے ڈاکٹر منظور احمد کے بقول ان کے پاس روزانہ ٹریفک حادثات کے 25 سے 30 کیس آتے ہیں۔

ڈسٹرکٹ پولیس آفس کے مطابق پچھلے آٹھ ماہ میں 87 ٹریفک حادثات کی رپورٹ درج ہوئی ہے جن کے 123 ذمہ داروں میں سے 88 گرفتار ہوچکے اور ان کے خلاف عدالت میں کیس چل رہے ہیں۔ لیکن ان کے خیال میں شہر میں ہونے والے حادثات میں سے صرف 10 فیصد ہی ان کے محکمے کو رپورٹ ہوتے ہوں گے۔ باقی 90 فیصد لوگ معاملات آپس میں ہی حل کرلیتے ہیں۔

سیالکوٹ میں رواں ہفتے پنجاب حکومت کی طرف سے ضلعی حدود میں ان حادثات کے اسباب دور کرنے کے لیے ڈسٹرکٹ ایکسیڈنٹ ریویو کمیٹی بنائی گئی ہے جس میں اسسٹنٹ کمشنر کے علاوہ ڈسٹرکٹ پولیس آفیسر( ڈی پی او)، ڈسٹرکٹ آفیسر ایمرجنسی، ڈسٹرکٹ سپرنٹنڈنٹ (ڈی ایس پی) ٹریفک اور روڈ اینڈ ٹرانسپورٹ اتھارٹی کے سیکریٹری شامل ہیں۔

ریسکیو 1122 کے اہلکار محمد وسیم کے خیال میں سڑکوں کی خراب حالت ہی ان حادثات کی بڑی وجہ ہے۔

وہ کہتے ہیں کہ ان کے ادارے میں زیادہ تر حادثات کشمیر روڈ، کچہری روڈ اور خواجہ صفدر روڈ سے رپورٹ ہوتے ہیں جن پر غیرمتوازن یوٹرن، کٹ، موڑ اور جا بجا گڑھے بنے ہیں۔

جیل روڈ پر گاڑیوں کا شو روم چلانے والے محمد اسلم رانا تصدیق کرتے ہیں کہ شہر کی بیشتر شاہراہیں یا تو زیادہ کشادہ نہیں یا پھر ٹوٹ پھوٹ کا شکار ہیں۔ جیل روڑ شہر کی مصروف ترین شاہراہ ہے جہاں سیالکوٹ کی سب سے بڑی یونیورسٹی، کچہری، سکول اور کالج بھی واقع ہیں۔

پانچ سال پہلے اس سڑک کی حالت بہت زیادہ خراب تھی۔ پھر اسے مرمت کیا گیا لیکن کچھ ہی عرصے بعد واٹر سپلائی پائپ لائن ڈالنے کے لیے اکھاڑ دیا گیا۔ اس مقصد کے لیےچھ فٹ&nbsp; کھدائی کردی گئی جس کے بعد اس کی مرمت ہوئی لیکن کچھ ہی عرصہ بعد گیس پائپ لائن بچھانے کے لیے اسے دوبارہ اکھاڑ دیا گیا۔ یہی کچھ کشمیر روڈ اور بعض دوسری شاہراہوں کے ساتھ بھی ہوا ہے ان میں سے چند سڑکیں مرمت ہوئی ہیں لیکن بیشتر کی حالت بدستور خراب&nbsp; ہی ہے۔

2015 میں ایشیائی ترقیاتی بنک نے سیالکوٹ میں ٹریفک مسائل کے حوالے سے ایک تحقیق میں شہر کی اہم شاہراہوں کے ڈھانچے میں نقائص کی نشاندہی کی تھی۔

اس رپورٹ میں کہا گیا ہے کہ بیشتر شاہراہوں کی تعمیر کے وقت روڈ جنکشن کی بہتری کے لیے ڈیزائن کے معیارات کو مدنظر نہیں رکھا گیا۔ پیدل راستوں اور پیدل چلنے والوں کے لیے کراسنگ کی سہولیات نہیں ہیں، فٹ پاتھوں کی چوڑائی ناکافی ہے، سڑکوں سے پانی کے نکاس کے کوئی مناسب بندوبست نہیں ہے اور سڑکوں پر بلاوجہ موڑ اور غیر ضروری یوٹرن آتے ہیں۔

رپورٹ میں یہ بھی بتایا گیا ہے کہ سڑک کنارے پارکنگ اور تجارتی سرگرمیوں کی صورت میں تجاوزات بھی حادثات کا سبب بنتی ہیں۔

نوشاد پارک کے رہائشی محمد بلال شہاب پورہ&nbsp; کے ایک کارخانے میں کام کرتے ہیں۔ ان کا کہنا ہے کہ شہر میں گاڑیوں اور موٹر سائیکلوں کی تعداد اتنی زیادہ ہوگئی ہے کہ کسی کے لیے پیدل سفر کرنا خطرے سے خالی نہیں۔

&quot;میری فیکٹری گھر سے موٹر سائیکل پر پندرہ منٹ کی دوری پر ہے لیکن ٹریفک کی بدترین صورتحال کی وجہ سے مجھے 40 منٹ پہلے گھر سے نکلنا پڑتا ہے۔ اس کے باوجود اکثر میں کہیں نہ کہیں ٹریفک میں پھنس کر لیٹ ہو جاتا ہوں۔&quot;

پنجاب کے ادراہ شماریات کی پنجاب ڈویلمپنٹ سٹیٹیکس رپورٹ 2022 بتاتی ہے کہ سیالکوٹ میں 30 جون 2021 تک رجسٹرڈ گاڑیوں (فور ویلر، تھری ویلر اور ٹو ویلر) کی تعداد سات لاکھ 87 ہزار 663 ہے۔ ان میں سے سات لاکھ تین ہزار 223 موٹر سائیکلیں، 33 ہزار 709 آٹو رکشے&nbsp; 27 ہزار 569 موٹر کاریں، جیپیں اور سٹیشن ویگنیں ہیں۔ باقی گاڑیوں میں پک اپ ڈلیوری وین، بسیں، منی بسیں، ٹرک اور ٹریکٹر شامل ہیں۔

سیالکوٹ ایکسائز اینڈ ٹیکسیشن ڈیپارٹمنٹ کی 2022 میں جاری کردہ رپورٹ&nbsp; کے مطابق 2021 میں اس شہر میں 41 ہزار 37 گاڑیاں رجسٹرڈ ہوئی ہیں اور یہ اعداد لاہور اور فیصل آباد کے بعد صوبے میں سب سے زیادہ ہیں۔

ایشیائی ترقیاتی بنک کی رپورٹ کے مطابق سیالکوٹ میں 10 لاکھ لوگ روزانہ کی بنیاد پر سفر کرتے ہیں جن میں سے 61 فیصد موٹر سائیکل، 13 فیصد کار یا دوسری چھوٹی گاڑیوں اور 24 فیصد پبلک ٹرانسپورٹ پر ایک سے دوسری جگہ پہنچتے ہیں۔ شہر میں پبلک ٹرانسپورٹ کی کمی لوگوں کو نجی گاڑیاں یا موٹر سائیکل رکھنے پر مجبور کرتی ہے۔ یہاں اورنج لائن اور میٹرو جیسی سہولیات نہ ہونے سے سڑکوں پر گاڑیوں کی تعداد بڑھ رہی ہے۔

سیالکوٹ میں سیکرٹری روڈ اینڈ ٹرانسپورٹ اتھارٹی مظفر حیات ان تمام مسائل کو تسلیم کرتے ہیں لیکن ساتھ میں وہ پر امید ہیں کہ اب جو ایکسیڈنٹ ریویو کمیٹی بنائی گئی ہے وہ ان مسائل پر کافی حد تک قابو پالے گی۔

ان کے بقول چونکہ اس کمیٹی میں وہ تمام ہی ادارے شامل ہیں جو سڑکوں کی جیومیٹری میں تبدیلی، کشادگی، تجاویزات کے خاتمے اور قوانین پر عملدر آمد کے ذمہ دار ہیں اس لیے مسئلے کے حل کی امید رکھی جا سکتی ہے۔

محمد سرفراز ٹریفک پولیس میں وارڈن ہیں اور آج کل خواجہ صفدر روڑ پر ڈیوٹی دے رہے ہیں۔ ان کا ماننا ہے کہ حادثات کی ایک وجہ ڈرائیوروں کی لاپرواہی اور کوتاہی بھی ہوتی ہے۔ بہت سے حادثات تیز رفتاری کے باعث ہوتے ہیں۔

موٹر سائیکل حادثات کی ایک بڑی وجہ یہ ہے کہ لوگ اپنے کم عمر بچوں کو گاڑی یا موٹر سائیکل وغیرہ لے دیتے ہیں۔ اسکے علاوہ ٹریفک قوانین کی خلاف ورزی اور خاص طور پر ہیلمٹ کا استعمال نہ کرنے سے صورتحال مزید بدتر ہو گئی ہے۔

روڈ سیفٹی کے ماہر ناصر محمود شیخ اس موضوع پر ایک کتاب بھی لکھ چکے ہیں۔ ان کے بقول پاکستان ٹریفک حادثات کے حوالے سے دنیا کا چوتھا بدترین ملک ہے۔ صوبہ پنجاب میں روزانہ اوسطاً ایک ہزار حادثات میں 14 لوگ جاں بحق جبکہ سات سے آٹھ سو زخمی ہوجاتے ہیں۔

وہ بتاتے ہیں کہ ان حادثات میں سے نوے فیصد موٹر سائیکلوں اور موٹر سائیکل رکشوں کی وجہ سے ہوتے ہیں۔ ان کے خیال میں پورے ملک، صوبے اور سیالکوٹ میں حادثات کی کمی کے لیے روڈ انفراسٹرکچر کی بہتر اور پبلک ٹرانسپورٹ کی فراہمی کے علاوہ جس چیز کی سب سے زیادہ ضرورت ہے وہ قوانین پر سختی سے عمل کرانا ہے۔

ریسکیو اہلکار محمد وسیم کے خیال میں حکومت کو چاہیے کہ روڈ سیفٹی کو اپنی ترجیحات میں شامل کرے۔ پاکستان میں ایک بھی ایسا ادارہ موجود نہیں جو صرف روڈ سیفٹی پر کام کر رہا ہو، حکومت کو ایسا محکمہ بنانا ہو گا جو سڑکوں پر حادثات کی روک تھام کے لیے کام کرے۔ اس کے ساتھ&nbsp; حکومت کو قوانین پر عملدرآمد کرنے کے ساتھ پرانے ٹریفک قوانین میں ترمیم بھی کرنا ہو گی۔

6 ہزار حادثات، 680 ہلاکتیں، میانوالی تا مظفرگڑھ روڈ ڈیڑھ سال میں 'خونی سڑک' کیسے بنی؟

'انہی پتھروں پہ چل کر اگر آ سکو تو آؤ' سیالکوٹ کی سڑکوں پر سفر موت کا کھیل بن گیا

text

عائشہ بی بی عین جوانی میں ہی بیوہ ہوگئیں تو ان کے سر پر چار بچوں کی کفالت کی ذمہ داری آن پڑی۔ انھوں نے لوگوں کے گھروں میں صفائی کا کام کرکے ناصرف اپنی یہ ذمہ داری بخوبی نبھائی بلکہ انتہائی محدود وسائل کے باوجود تینوں بیٹوں کو میٹرک تک پڑھایا بھی۔

لیکن ان کے بیٹے جوں جوں جوانی کی سیڑھی چڑھتے گئے تو نشے کی لت میں مبتلا ہوتے گئے۔ بات یہیں ختم نہیں ہوتی بلکہ اسی نشے کی وجہ سے ان کے دو جواں سالہ بیٹوں کا انتقال ہو گیا جبکہ تیسرے بیٹے پر اتنے مقدمے ہیں کہ وہ زیادہ تر قید میں ہی رہتا ہے۔

عائشہ بی بی کا تعلق پنجاب کے شمالی ضلع سیالکوٹ کے علاقے پاک پورہ سے ہے۔ وہ 56 سال کی عمر کو پہنچ چکی ہیں لیکن آج بھی روزی روٹی کے لیے اسی طرح در در ٹھوکریں کھا رہی ہیں۔

عائشہ کہتی ہیں کہ جوانی شوہر کے انتقال کے غم میں گزری تو اب بڑھاپے میں بیٹوں کی موت کا غم آن پڑا ہے۔ یوں سمجھ لیں&quot;زندگی میں ایک پل کا بھی سکون نصیب نہیں ہوا&quot;۔

وہ بتاتی ہیں کہ ان کے بڑے دو بیٹے احمد اور عامر کافی سلجھے اور محنتی تھے لیکن چھوٹے بیٹے علی کی صحبت کچھ اچھی نہ تھی۔ اس لیے محلے والوں کی طرف سے انہیں اکثر شکایات موصول ہونے لگیں جس پر دونوں&nbsp; بڑے بھائیوں نے اسے پہلے پیار سے سمجھایا اور پھر سختی کی لیکن وہ باز نہیں آیا۔ پھر اس کی طبیعت میں دن بہ دن بگاڑ آنا شروع ہوگیا۔&nbsp; یہاں تک کہ جب وہ 19سال کی عمر کو پہنچا تو معلوم ہوا کہ وہ نشہ کرنے لگا ہے۔

عائشہ بی بی کہتی ہیں کہ وہ پہلے چرس اور افیون پیتا تھا پھر آئس جیسے خطرناک نشے کو استعمال کرنے لگا۔ دیکھتے ہی دیکھتے وہ منشیات کی خرید و فروخت میں بھی ملوث ہوگیا۔

ان کے بقول پھر ایک دن پولیس کو بھی اس کی بھنک لگ گئی اور اس نے ہمارے گھر پر چھاپے مارنا شروع کردیے۔

عائشہ بی بی کا کہنا ہے کہ انہوں نے اسے حالات کی مار سمجھ کر قبول کر لیا لیکن ان کے پیروں کے نیچے سے زمین تب نکلی جب معلوم پڑا کہ دونوں بڑے بیٹے جو اس وقت گھر کے کفیل تھے وہ بھی نشہ کرنے لگے ہیں۔ یہی نہیں بلکہ نشے کے استعمال کی وجہ&nbsp; سے ان کے بڑے بیٹے احمد کو پھیپھڑوں کا کینسر اور منجھلے بیٹے عامر کو ٹی بی کو مرض لاحق ہوگیا۔

عامر جب 24 سال کی عمر کو پہنچا تو وہ انتقال کرگیا، عائشہ کے بقول یہ 2015 کی بات ہے۔

وہ بتاتی ہیں کہ اس کے کچھ عرصہ بعد ان کا چھوٹا بیٹا پولیس کی گرفت میں آگیا تو بڑے بیٹے احمد کی طبیعت بھی ناساز رہنے لگی۔

&quot;پھر ایک دن انہیں پتا چلا کہ اسے کینسر لاحق ہے جو آخری سٹیج پر پہنچ چکا ہے جس کا علاج بھی ممکن نہیں رہا ہے۔ 2018 میں احمد بھی دنیا چھوڑ کر چلا گیا&quot;۔

سیالکوٹ میں رہنے والی عائشہ بی بی ہی اکیلی ایسی نہیں ہیں جن کا ہنستا بستا گھر منشیات کی وجہ سے اجڑ چکا ہو بلکہ 35 سالہ بشریٰ بی بی کی زندگی بھی تباہ ہو گئی ہے۔

&nbsp;بشریٰ کا خاندان سرگودھا کے قصبے کوٹ مومن سے بہتر مستقبل کی امید لیے 11 سال پہلے سیالکوٹ منتقل ہوا۔ ان کے پانچ بچے ہیں۔ ان کے شوہر جو ایک درزی ہیں وہ پچھلے کچھ عرصہ سے نشہ کرنے لگے ہیں جس کی وجہ سے بشریٰ کو بچوں کی کفالت کے لیے مجبوراً لوگوں کے گھروں میں کام کرنا پڑ رہا ہے۔

ان کا کہنا ہے کہ ان کے شوہر کپڑوں کی سلائی میں کافی ماہر تھے جس سے وہ اتنی کمائی کر لیتے تھے کہ ان کا خاندان اچھی زندگی گزار رہا تھا۔

&quot;پھر وہ بری صحبت میں پڑ کر نشہ کرنے لگے۔ آہستہ آہستہ ان کی صحت گرنے لگی تو کام بھی متاثر ہونا شروع ہوگیا، وہ سارا دن نشہ کرکے گھر میں سوئے رہتے، گھر میں فاقوں کی نوبت آگئی&quot;۔

وہ بتاتی ہیں کہ حالات اس قدر بدتر ہوگئے کہ جو خاتون ان کے گھر کام کرتی تھی اسی کے ساتھ وہ دوسروں کے گھر جاکر کام کرنے لگیں۔

بشریٰ تسلیم کرتی ہیں کہ ایک وقت آگیا تھا کہ وہ مایوسی کی آخری نہج پر پہنچ گئی تھی لیکن پھر بچوں کی خاطر ہمت باندھی اور اس ساری صورتحال سے اپنے سسر کو آگاہ کر دیا۔

وہ بتاتی ہیں کہ ان کے سسر فوری طور پر سیالکوٹ آگئے اور اپنے بیٹے کو علاج کے لیے تین ماہ تک بحالی صحت کے ایک مرکز میں داخل کرادیا۔ یہاں پر ان کی حالت کافی بہتر ہوئی گئی اور وہ گھر آگئے لیکن کچھ ہی دنوں کے بعد وہ دوبارہ انہی دوستوں سے ملنے لگے جنہوں نے انہیں نشے پہ لگایا تھا۔

بشریٰ بی بی کہتی ہیں کہ وہ عورت ہیں اور مرد کو زبردستی گھر میں باندھ کر تو نہیں رکھ سکتیں اس لیے دوبارہ سے سسر سے مدد مانگی جو پورے خاندان کو واپس کوٹ مومن لے گئے ہیں۔

سیالکوٹ میں کام کرنے والی ماہر نفسیات سمیعہ علی کا کہنا ہے کہ بے روزگاری، غربت، ذہنی سکون کی کمی، مہنگائی اور روشن مستقبل کے کم امکانات نے لوگوں کو نشے کی طرف راغب کرنے میں نمایاں کردار کیا ہے۔ لوگ پریشانیوں اور مشکلات سے چھٹکارا پانے کی خاطر بھی نشے کا رخ کرتے ہیں۔ یہ الگ بات کہ اس طرح ان کی مشکلات اور پریشانیاں اور بڑھ جاتی ہیں۔

ان کا کہنا ہے کہ نشے کے مریض کیلئے کاؤنسلنگ بھی اتنی ہی ضروری ہے جتنی دوا ۔ اس لیے صحت کی بحالی کے مراکز میں اس بات پہ خصوصی توجہ دینی چاہیے۔

بشریٰ بی بی کا خاندان چونکہ سیالکوٹ سے سرگودھا اپنے آبائی گھر چلا گیا ہے تو ان کے اندر یہ امید جاگی ہے کہ ان کے شوہر اب اس عادت سے چھٹکارہ حاصل کرلیں گے۔ اس کی وجہ یہ ہے کہ انہیں لگتا ہے کہ سیالکوٹ میں نشہ کرنے والوں کی تعداد بہت زیادہ ہے۔

بشریٰ بی بی کی طرح عائشہ بی بی کا خیال ہے کہ ان کے&nbsp; بیٹے نشے پر اس لیے لگے کیوں کہ ان کا میل ملاپ ایسے لوگوں سے تھا جو یا تو خود نشہ کرتے ہیں یا اس کے کاروبار میں ملوث ہیں۔

سیالکوٹ میں بہت سے چوراہوں، پلوں کے نیچے اور ریل کی پٹڑی کے آس پاس نشہ کرنے والوں کی ٹولیاں نظر آتی ہیں۔

سیالکو ٹ کے ڈسٹرکٹ پولیس آفس کے افسر تعلقات عامہ خرم شہزاد بتاتے ہیں کہ پچھلے ایک سال کے دوران ضلع بھر میں 1596 منشیات فروشوں کو گرفتار کیا گیا جن کے قبضے سے دس کلوگرام ہیروئن، دو کلو گرام آئس اور 11 ہزار 500 لیٹر شراب اور 464 گرام چرس برآمد کی ہے۔ ان کے مطابق ان تمام ملزمان کے کیس عدالت میں چل رہے ہیں۔

سیالکوٹ شہر میں &quot;آس ری ہیبلی ٹیشن سینٹر&quot; نامی ادارہ منشیات کی لت میں مبتلا مریضوں کا علاج کر رہا ہے۔ اس کی انتظامیہ کے مطابق یہاں پر پچھلے ایک سال میں دو سو سے زیادہ مریضوں کا علاج کیا گیا جن میں بیشتر نوجوان تھے اور ان کی عمر 16 سے 30برس کے درمیان تھی۔

اس مرکز کے ملازم محمد بلال کا کہنا ہے کہ یہاں مریضوں کو علاج مہیا کرنے کے ساتھ ان کی دینی اور دنیاوی تربیت اور کاؤنسنگ بھی کی جاتی ہے اس کا مقصد یہی ہوتا ہے کہ مریض جب وہ یہاں سے صحت یاب ہوکر واپس گھر چلا جائے تو دوبارہ اس لت میں مبتلا نہ ہو لیکن یہ بات سچ ہے کہ یہاں آنے والا ہر مریض ہمیشہ کےلیے نشہ نہیں چھوڑتا کیونکہ بہت سے افراد علاج کے بعد دوبارہ اسی لت کا شکار ہوجاتے ہیں۔

لاہور میں قائم پنجاب فرانزک سائنس ایجنسی کی رپورٹس سے یہ بات سامنے آتی ہے کہ صوبے بھر سے اس کو منشیات سے متعلقہ معائنوں کے لیے ملنے والے کیسز میں ہر سال اضافہ ہورہا ہے۔

ادارے کی ویب سائٹ پر 2015 سے 2021 تک موصول ہونے والے کیسز کی رپورٹس دی گئی ہیں جن کے مطابق ان آٹھ سال میں پنجاب میں ایسے کیسوں کی تعداد میں 50 فیصد سے بھی زیادہ اضافہ ہوا ہے۔

2015 میں اس لیبارٹری کو 23 ہزار 326، 2016 میں 21 ہزار 930 اور2017 میں 23 ہزار 493 اور 2018 میں 20 ہزار 615 کیس موصول ہوئے تھے۔ لیکن 2019 میں یہ تعداد بڑھ کر 42 ہزار 412 تک پہنچ گئی جبکہ 2020 میں اس لیبارٹری کو کل 50 ہزار 521 اور 2021 میں 46 ہزار 971 کیس رپورٹ ہوئے ہیں۔

انسداد منشیات کی وفاقی وزارت کے ڈیٹا کا جائزہ لینے سے اندازہ ہوتا ہے کہ پنجاب ہی نہیں بلکہ پورے ملک میں ایسے کیسوں کی تعداد بڑھ رہی ہے۔ وزارت کی سال 2021 اور 2022 کی سالانہ رپورٹ کے مطابق یکم جولائی 2021 سے 30 جون 2022 تک منشیات کے 96 ہزار 516 کیس سامنے آئے اور ایک لاکھ ایک ہزار 672 ملزموں کو گرفتار کیا گیا۔ اس سے دو سال پہلے یعنی 2019 اور 2020 میں رجسٹرڈ کیسوں کی تعداد 69 ہزار 141 تھی جبکہ 74 ہزار 820 ملزموں کو گرفتار کیا گیا تھا۔

اقوامِ متحدہ کے ادارہ برائے منشیات و جرائم کے مطابق پاکستان میں 76 لاکھ&nbsp; لوگ نشے کے عادی ہیں۔لیکن ان میں سے 30 ہزار سے بھی کم افراد کے لیے علاج اور طبی سہولیات میسر ہیں۔ اس کے علاوہ ان افراد کے لیے مفت علاج بھی میسر نہیں ہے۔

پاکستان سوشل سائنسز ریویو نامی تحقیقی ادارے میں 31 مارچ 2020 کو شائع ہونے والے ایک مقالے کے مطابق 2017 میں پاکستان میں منشیات استعمال کرنے والے افراد کی تعداد 76 لاکھ تھی جن میں سے 78 فیصد مرد اور 22 فیصد خواتین تھیں۔ اس مقالے میں بتایا گیا ہے کہ پاکستان میں منشیات استعمال کرنے والوں کی تعداد میں 40 ہزار افراد کا اضافہ ہو رہا ہے۔

ہائی کورٹ کے وکیل شہریار احمد کا کہنا ہے کہ ملک میں موثر قانون سازی کے باوجود نشے کے مریضوں کی تعداد میں دن بہ دن تیزی سے اضافہ ہوتا جارہا ہے۔ حالانکہ قوانین کے مطابق غیر قانونی منشیات سے متعلق جرائم کے لئے موت یا عمر قید کی سزا تجویز کی گئی ہے۔

انسداد نشہ آور مواد ایکٹ 1997 کی شق 8 کے مطابق&nbsp; اگر کسی سے ایک سو گرام یا اس سے کم مقدار میں نشہ برآمد ہو تو اسے دو سال تک قید ہوسکتی ہے۔ اگر یہ مقدار ایک کلو تک ہو تو سات سال قید اور جرمانہ ہوگا۔

اگر یہ مقدار ایک کلو سےزیادہ ہوگی تو موت، عمر قید یا 14 سال قید اور دس لاکھ روپے تک کا جرمانہ ہے۔&nbsp; تاہم اگر منشیات کی مقدار دس کلو گرام سے زیادہ ہو تو سزا عمر قید سے کم نہیں ہوگی۔

شہریار احمد کہتے ہیں کہ اکثر دیکھا گیا ہے کہ منشیات فروشوں کے خلاف مقدمے کچھ عرصہ عدالت میں چلتے ہیں اور پھر وہ باعزت بری ہوجاتے ہیں۔ اس کی وجہ یہ ہے کہ منشیات فروش مکمل منصوبہ بندی کے ساتھ یہ کام کرتے ہیں اور کوئی بھی ثبوت پیچھے نہیں چھوڑتے۔ 
ان کے مطابق بعض واقعات میں پولیس کی غفلت اور ناکافی ثبوتوں کی بنا پر کیس بند ہوجاتا ہے اور منشیات فروش آزاد ہوجاتے ہیں۔

اقصیٰ یونس رانا

'انہی پتھروں پہ چل کر اگر آ سکو تو آؤ' سیالکوٹ کی سڑکوں پر سفر موت کا کھیل بن گیا

'گھر اجڑ گئے، زندگیاں تباہ ہو گئیں'، سیالکوٹ میں منشیات کا استعمال بڑھنے کے اشارے

Lok Sujag