'سیلاب نے خواتین کی مشکلات کو تین گنا بڑھا دیا ہے'

video

49 سالہ احمد نعمان نے پانچ سال پہلے لاہور شہر کے مضافات کی ایک تنگ سی گلی میں ایک چھوٹا سا رہائشی پلاٹ خریدا۔

اِس پلاٹ کی پچھلی طرف گیٹ والی شاندار رہائشی سوسائٹی ویلنشیا ٹاؤن تھی جہاں تمام شہری سہولیات مہیا تھیں لیکن اس کے سامنے سیاہی مائل آلودہ پانی کا ایک جوہڑ تھا۔ قریب واقع قبرستان میں فاقہ زدہ کتے کچھ کھانے کو تلاش کرتے پھرتے اور ننھے بچے ننگے پاؤں پلاسٹک کے کچرے سے کھیلتے رہتے۔ یوں ان کا یہ پلاٹ دو مختلف دنیاؤں کے سنگم پر تھا۔

احمد لاہور کے ایک بڑے نجی سکول سسٹم میں آپریشنل آفیسر ہیں۔ وہ اپنا مکان بنانے کا خواب پورا کرنے کے لیے دس سال تک دن رات کام کرتے رہے۔ پانچ مرلے کے پلاٹ پر اب بنا براؤن پینٹ والا یہ مکان ان کی برسوں کی سخت محنت کا ثمر ہے۔

احمد کی گلی اور اِسی طرح کی ایک اور گلی اب ویلنشیا وَیلی کہلاتی ہیں۔ 11 کنال 18 مرلے پر پھیلی ہوئی اس آبادی میں کُل 32 مکان ہیں۔

7 اکتوبر 2022ء کو لاہور ڈویلپمنٹ اتھارٹی (ایل ڈی اے) نے اردو روزنامہ جنگ میں ایک اشتہار کے ذریعےشہر کی 116 رہائشی سوسائٹیوں کو غیر قانونی قرار دے دیا۔ ان میں ویلنشیا ویلی بھی شامل تھی۔

اشتہار میں وضاحت کی گئی کہ یہ رہائشی سوسائٹیاں ایل ڈی اے کے قواعد و ضوابط پر پوری نہیں اُتری تھیں۔ مانگا وَیلی فیز 3، نیو لاہور سٹی فیز 4، احساس وِلاز اور مکہ گارڈنز اُن میں نمایاں تھیں۔ اشتہار میں خبردار کیا گیا کہ اِن غیر قانونی سوسائٹیوں میں سرمایہ کاری نہ کی جائے۔

اس نوعیت کے اشتہارات کوئی انہونی بات نہیں۔ یہ ہر چند ماہ بعد شائع ہوتے رہتے ہیں لیکن سوسائٹیوں کو غیر قانونی قرار دینے کا معاملہ ان اشتہارات سے آگے نہیں جاتا تو آخر اس عمل کا حاصل کیا ہے؟

ایل ڈی اے نے اِن غیر قانونی سوسائٹیوں میں سے تقریباً چالیس کو &#39;لینڈ سب ڈویژن&#39; (یعنی ایک سو کنال سے کم رقبہ) قرار دیا۔ زیادہ تر سب ڈویژنز بڑی اور امیرانہ سوسائٹیاں کے وسط میں ہیں۔ ان چھوٹی سوسائٹیوں میں رہنے والے کم آمدنی والے طبقے سے تعلق رکھتے ہیں اور انھوں نے بہتر رہائشی سہولیات کی خاطر بڑی سوسائٹیوں کی ہمسایہ چھوٹی سوسائٹیوں میں سرمایہ لگایا ہوتا ہے۔

ویلنشیا وَیلی کی زمین کے اصل مالک اشتیاق ڈوگر نے لوک سجاگ کو بتایا کہ انہوں نے 2011ء میں اُس وقت کے ریگولیٹری ادارے یعنی تحصیل میونسپل ایڈمنسٹریشن (ٹی ایم اے) سے اپنی سوسائٹی کی باقاعدہ منظوری لی تھی۔ &quot;جب ہم نے 2014-15ء میں کام شروع کیا تو ایل ڈی اے نے آکر ہمیں روک دیا اور کہا کہ ہماری سوسائٹی اُن سے منظور شدہ نہیں۔&quot;

چھوٹی سوسائٹیوں کی منظوری پہلے تحصیل میونسپل ایڈمنسٹریشن کے دائرہ اختیار میں ہی تھی لیکن 2013ء میں پنجاب حکومت نے ایل ڈی اے ایکٹ 1975ء میں ایک ترمیم کے ذریعے اتھارٹی کا دائرۂ اختیار بڑھا کر پورے لاہور ڈویژن کی حدود میں واقع تمام رہائشی معاملات اس کے سپرد کر دیے۔ گویا ایل ڈی اے لاہور، قصور، شیخوپورہ اور ننکانہ صاحب کے اضلاع میں واقع تمام رہائشی سکیموں کی واحد ریگولیٹری اتھارٹی بن گئی۔

احمد نعمان نے بتایا &quot;پلاٹ خریدتے وقت مجھے بالکل اندازہ نہیں تھا کہ یہ سوسائٹی غیر قانونی ہے۔ میں نے ایک زمیندار سے زمین لی جس نے میری معلومات کے مطابق تمام قواعد پر عمل کرتے ہوئے زمین کو ڈویلپ کیا تھا۔&quot; انہوں نے یہ سوال بھی اُٹھایا کہ اُس کی سوسائٹی کو واپڈا سے بجلی کیسے مل گئی جبکہ واپڈا ایل ڈی اے کی منظوری کے بغیر بجلی فراہم نہیں کرتا۔

ویلنشیا وَیلی واحد سوسائٹی نہیں جو اس وقت قانونی گرداب میں پھنسی ہوئی ہے۔ اشتیاق ڈوگر کے مطابق 2013ء میں بھی ایل ڈی اے نے 256 سوسائٹیوں کو اِسی طرح نشانہ بنایا تھا۔ &quot;متعدد سوسائٹیوں نے مل کر یہ معاملہ لاہور ہائیکورٹ میں اُٹھایا۔ ہم نے 19 ستمبر 2019ء کو کمشنر لاہور کو بھی ایک درخواست بھیجی۔&quot;

2013ء میں اختیارات کی منتقلی پر ٹی ایم اے کو ہاؤسنگ سوسائٹیوں کی منظوری سے متعلقہ تمام ریکارڈز دو سال کے اندر ایل ڈی اے کو بھیجنے تھے۔ اشتیاق کا کہنا ہے کہ جب معاملے کی تحقیق ہوئی تو پتا چلا کہ ٹی ایم اے کا ریکارڈ رکھنے والا شخص منتقلی کے دوران فوت ہو گیا تھا اور اُس کے پاس محفوظ تمام دستاویزات کھو گئے تھے۔

اشتیاق ڈوگر نے کہا &quot;میں پھنس گیا ہوں۔ ٹی ایم اے نے ہمارا تعمیراتی نقشہ منظور کیا تھا لیکن معاملات ایل ڈی اے کے زیرِ اختیار آنے کے بعد ٹی ایم اے نے منظوری کے کاغذات اُسے بھیجے ہی نہیں&quot;۔

<h2>اشتہاربازی اور پلاٹوں کی منڈی کے اتار چڑھاؤ &nbsp;کی باریکیاں</h2>

ویلنشیا وَیلی کو بنے تو ابھی کچھ زیادہ عرصہ نہیں ہوا لیکن ایل ڈی اے کی اشتہاری پابندیوں کی زد میں کئی ایسی سوسائٹیاں بھی ہیں جنہیں آباد ہوئے کئی عشرے بیت چکے ہیں۔

طیب ٹاؤن بیس سال سے زائد عرصہ پہلے تعمیر کیا گیا اور اب مکمل طور پر آباد ہے لیکن ایل ڈی اے نے اسے بھی غیر قانونی قرار دے دیا۔ اس سے چند کلومیٹر دور واقع المدینہ گارڈن کی بھی یہی بپتاہے۔

ایک مقامی پراپرٹی ڈیلر میاں محمد اکرام کو یقین ہے کہ چھوٹی سوسائٹیوں کو دبانا بڑی سوسائٹیوں کو تحفظ دینے کا طریقہ ہے۔ ان کا خیال ہے کہ ایل ڈی اے ان اشتہارات کے ذریعے غریب لوگوں کی زمین کی قیمت گھٹاتا ہے تاکہ قریب کی زیادہ بڑی سوسائٹیوں میں رہنے والے امیروں کو خوش کرے اور فائدہ پہنچائے۔ ان کے خیال میں یہ بات بڑی سوسائٹیوں کے مفاد میں ہے کہ ان کے آس پاس سستی زمین دستیاب نہ ہو کیونکہ اس سے اُن کی زمین کی قیمت بھی گھٹ جاتی ہے۔ اکرام نے کہا &quot;اگر ایل ڈی اے کا مقصد واقعی پالیسی میں درج معیاروں کے مطابق سوسائٹیوں کو ریگولیٹ کرنا ہے تو چھوٹی سوسائٹیوں کو تعمیر کے برسوں بعد کیوں غیر قانونی قرار دیا جاتا ہے (پہلے کیوں نہیں؟)۔&quot;

فیروزپور روڈ پر ایک اور غیرقانونی قرار دی گئی سوسائٹی ایلیٹ ٹاؤن کے رہائشی میاں اسلم کے ایل ڈی اے کے بارے میں خیالات بھی اس سےکچھ مختلف نہیں۔ وہ سوال کرتے ہیں کہ ریحان گارڈن فیز 2 جیسی بڑی سوسائٹیاں توسیع کی سرکاری منظوری کے بغیر کیسے پھل پھول رہی ہیں؟ &quot;ان کے نام اشتہارات میں کیوں نہیں؟ کیا ایل ڈی اے ان کو نظرانداز کرنے کی کوئی &#39;قیمت&#39; وصول کرتا ہے۔ ہم جیسے غریب لوگوں کے پاس اداروں کو خریدنے کے لیے رقم نہیں۔&quot;

اُن کا کہنا ہے کہ ایلیٹ ٹاؤن میں لوکیشن کے حساب سے پلاٹوں کی فی مرلہ قیمت تین تا پانچ لاکھ روپے تک ہے۔ لیکن ساتھ ہی آباد سنٹرل پارک جیسی ایل ڈی اے کی منظور شدہ سوسائٹیوں میں ایک مرلہ کی قیمت دس لاکھ روپے سے شروع ہوتی ہے۔

<h2>کیا ایل ڈی اے اپنی اصل ذمہ داری بھول چکا ہے؟&nbsp;</h2>

ایل ڈی اے کی جانب سے چھوٹی سوسائٹیوں کے بارے میں دھمکی آمیز انضباطی اختیارات کا مظاہرہ رہائشی سہولیات کے ایک مہیب بحران کے ساتھ ساتھ چل رہا ہے۔ شہر منصوبہ سازی کے بغیر پھیل رہے ہیں اور رہائشی سہولیات کی قلت آبادی کے بڑے حصے کو متاثر کر رہی ہے جن میں سے ایک بڑی اکثریت کم آمدنی والوں کی ہے۔ 2013ء سے 2018ء تک پاکستان میں مکانات کی قیمتوں میں 134 فیصد اضافہ ہوا ہے۔ کرائے بھی لگ بھگ اسی تناسب سے بڑھ گئے ہیں۔

پنجاب اربن ریسورس سنٹر نامی این جی او کے سابق ڈائریکٹر طارق لطیف شہری ترقی سے متعلقہ مسائل کو سمجھتے ہیں، انھوں نے دو عشروں سے زائد عرصے تک ایل ڈی اے کے ساتھ مل کر کام کیا ہے۔ وہ صاف کہتے ہیں کہ ایل ڈی اے &quot;ہر کسی کے لیے نہیں ہے&quot; اور ساتھ ہی ایک اہم سوال کی طرف توجہ دلاتے ہیں: سارے لاہور میں ایل ڈی اے کی اپنی رہائشی سکیمیں بھی ہیں، اگر ایل ڈی اے خود مارکیٹ کا حصہ ہے تو وہ اس سیکٹر کی ریگولیٹری اتھارٹی کیسے ہو سکتا ہے؟

لاہور میں کچی آبادیوں کے ڈائریکٹوریٹ جنرل میں ڈائریکٹر راشد محمود کا کہنا ہے کہ یہ اشتہارات ایل ڈی اے کا اپنی اصل ذمہ داری سے بچنے کا بہانا ہیں۔ &quot;اشتہارات شائع کرنے کے علاوہ، ادارہ اس ضمن میں کچھ اور نہیں کرتا اور ان کا رہائشی بحران کو حل کرنے میں بھی کوئی کردار نہیں۔ رہائشی سہولیات مہیا کرنا ایل ڈی اے کی ذمہ داری ہے۔ چنانچہ میرے خیال میں اصل سوال یہ ہے کہ وہ کم آمدنی والے لوگوں کو رہائش مہیا کرنے کے لیے کیا کر رہے ہیں؟&quot;

وفاق نے گزشتہ برس حکومت پنجاب پر زور دیا کہ صوبے بھر میں چھ ہزار سے زائد غیر قانونی ہاؤسنگ سوسائٹیوں کو ریگولرائز کرنے (باضابطہ بنانے) کی راہ تلاش کی جائے۔

اِسی مقصد کے پیش نظر پنجاب کمیشن فار ریگولرائزیشن آف ارریگولر ہاؤسنگ سکیمز آرڈی نینس 2021ء کے تحت ایک کمیشن قائم کیا گیا۔ جسٹس (ر) عظمت سعید شیخ کو کمیشن کا چیئرمین تعینات کیا گیا، جبکہ اراکین میں جسٹس (ر) وقار الحسن اور ڈاکٹر شاکر محمود میو شامل تھے۔

ڈاکٹر شاکر انجینئرنگ اینڈ ٹیکنالوجی یونیورسٹی لاہور کے سٹی اینڈ ریجنل پلاننگ کے شعبے کے چیئرمین بھی ہیں، ان کے مطابق اداروں کے اپنا کردار صحیح ادا نہ کر پانے میں بنیادی مسئْلہ ترجیحات کے غلط تعین کا ہے۔ &quot;چھوٹی سوسائٹیوں کو ریگولرائز کرنا چاہیے، لیکن پالیسی کے فقدان کا سارا الزام ایل ڈی اے کو نہیں دیا جا سکتا۔ اس رہائشی بحران کی کچھ نہ کچھ ذمہ داری سب پر ہی آتی ہے۔&quot;

اُن کے خیال میں ایل ڈی اے کے پاس پنجاب کی طاقتور لینڈ مافیا کے احتساب کے لیے مناسب اختیارات نہیں ہیں۔ وہ کہتے ہیں کہ موجودہ نظام سے فائدہ اٹھانے والے امیر کبیر لوگ نہیں چاہتے کہ کوئی تبدیلی آئے۔ &quot;ہم اُن سے مقابلہ تو نہیں کر سکتے، بس اُنہیں مثبت سمت میں ہی چلا سکتے ہیں۔&quot;

سجاگ نے ایل ڈی اے کے حکام کا مؤقف جاننے کے لیے بارہا رابطے کیے لیکن متعلقہ لوگ بات کرنے پر رضامند نہیں ہوئے۔

ایل ڈی اے چھوٹی رہائشی سوسائٹیوں کو غیر قانونی قرار دینے کے اشتہارات کیوں شائع کرواتا ہے؟

text

Catastrophic floods exacerbate the miseries of expectant mothers

بائیس سالہ شاہین شیخ کا خاندان سندھ میں آنے والے سیلاب سے بری طرح متاثر ہوا ہے۔ وہ چھ ماہ کی حاملہ ہیں اور انہوں نے حمل کا بیشتر عرصہ دربدری میں کاٹا ہے۔ ان کا کہنا ہے کہ &#39;&#39;اگست میں سیلاب آیا تو اس میں میرے گھر اور جہیز سمیت ہمارا سب کچھ ڈوب گیا اور اب ہمارے چاروں طرف گدلے پانی کے سوا کچھ نہیں ہے۔&#39;&#39;

دوپہر کی دھوپ میں کھلے آسمان تلے بیٹھی شاہین اپنے پیٹ کے ابھار کی جانب دیکھتے ہوئے بتاتی ہیں کہ &#39;&#39;یہ میرا پہلا بچہ ہے&#39;&#39; یہ کہتے ہوئے ان کی آنکھوں میں چمک اور چہرے پر ہلکی سی مسکراہٹ آ جاتی ہے۔ ان کے ہاتھ اور بازو گرمی کی تمازت سے جھلسے دکھائی دیتے ہیں جس سے اندازہ ہوتا ہے کہ وہ کھیتوں میں مشقت کرتی رہی ہیں۔ ان کا کہنا ہے کہ وہ اپنی زندگی میں چار سیلاب دیکھ چکی ہیں۔&nbsp;

شاہین شیخ کا تعلق چوکی جمالی سے ہے۔ یہ سندھ کی سرحد پر بلوچستان کے ضلع جعفرآباد کی تحصیل گنداخہ میں واقع ایک چھوٹا سا گاؤں ہے۔ کبھی یہاں چار سو سبزہ اور چاول کے لہلہاتے کھیت دکھائی دیتے تھے لیکن اب یہ جگہ کھنڈر کا منظر پیش کرتی ہے۔&nbsp;

یہاں مقامی لوگوں کے لیے سیلاب کوئی نئی چیز نہیں۔ ہر سال گندگی، مویشیوں کی لاشوں اور کیمیائی مواد سے اٹا پانی اس گاؤں کو لپیٹ میں لے لیتا ہے۔ صاف پانی یہاں کے لوگوں کے لیے گویا بہت بڑی آسائش ہے۔

شاہین بتاتی ہیں کہ &quot;جب سیلاب آیا تو میرا خاندان گدھا گاڑی کے ذریعے شہداد کوٹ بائی پاس کے قریب ایسی جگہ چلا آیا جو قدرے محفوظ تھی۔ لیکن ہم زہریلے پانی اور مچھروں کے درمیان ایسے پھنسے ہیں کہ اب ہمارے اختیار میں کچھ بھی نہیں رہا&quot;۔

شاہین جس جگہ رہتی ہیں وہاں جھونپڑیوں کے چاروں طرف تقریباً پانچ فٹ اونچا سیلابی پانی جمع ہے جو اب زہریلا ہو چکا ہے۔ یہاں رہنے والی حاملہ خواتین دو سے تین مرتبہ ملیریا میں مبتلا ہو چکی ہیں اور مسلسل بیماریوں سے لڑنے کے نتیجے میں ان کی صحت خطرناک حد تک گر گئی ہے۔

سرخ رنگ کی شلوار قمیض اور گہرے سبز دوپٹے میں ملبوس شاہین اپنے حمل کے بارے میں جھجھکتے ہوئے بات کرتی ہیں۔ ان کا کہنا ہے کہ &#39;&#39;سیلاب کا عرصہ بہت کٹھن تھا۔ کھانے کا کوئی بندوبست نہیں تھا۔ کچھ لوگ ہیلی کاپٹر کے ذریعے ہمارے لیے امدادی خوراک کے پیکٹ پھینک جاتے تھے جو عام طور پر چاولوں پر مشتمل ہوتی تھی۔ یہ پیکٹ ہمارے لیے کافی نہیں تھے اور انہیں حاصل کرنے کے لیے بھی دور تک بھاگنا پڑتا تھا۔ کبھی تو بھوک اور بے بسی کے عالم میں ہم اور ہمارے بچے رونے لگتے تھے۔&#39;&#39;&nbsp;

شاہین کو اپنی جسمانی مشکل کے باوجود کھانا بنانے اور صفائی ستھرائی سمیت تمام کام کرنا پڑتے ہیں۔ وہ کہتی ہیں کہ لوگوں کو اندازہ نہیں کہ یہاں عورتیں کس عذاب سے گزر رہی ہیں۔ خاص طور پر حاملہ عورتوں کی زندگی ناقابل بیان حدتک مشکل ہے۔ سیلاب میں لوگوں کا روزگار اور مویشی ختم ہو گئے ہیں۔ ایسے میں خواتین کی ذمہ داریاں کئی گنا بڑھ گئی ہیں جبکہ انہیں ڈاکٹر اور طبی امداد بھی میسر نہیں۔&nbsp;

ہنگامی امداد سے متعلق اقوام متحدہ کے رابطہ دفتر کے زیراہتمام کئی شعبوں کی فوری ضروریات کے بارے میں اگست میں جاری کردہ رپورٹ کے مطابق بلوچستان میں سیلاب سے متاثرہ افراد کی تعداد 64 لاکھ ہے جن میں سے پچاس فیصد خواتین ہیں۔ سیلاب کے وقت ایک لاکھ 27 ہزار 642 حاملہ خواتین میں سے تقریباً 14 ہزار 182 ایسی تھیں جن کے بچے کی پیدائش میں صرف ایک مہینہ رہ گیا تھا۔ سیلاب میں قریباً 198 طبی مراکز کو نقصان پہنچا اور ان میں سے کئی مکمل طور پر تباہ ہو گئے۔ ان ہسپتالوں کے زچگی وارڈ ہی قریبی علاقوں کی حاملہ خواتین کے لیے طبی مدد کا واحد ذریعہ تھے۔&nbsp;

لاہور جنرل ہسپتال میں میڈیکل آفیسر کے طور پر خدمات انجام دینے والی ڈاکٹر عالیہ حیدر نے شاہین کے گاؤں اور سیلاب سے متاثرہ کئی دیگر علاقوں میں طبی کیمپ لگائے ہیں۔ ان کا کہنا ہے کہ &quot;بلوچستان میں صحت کے شعبے میں پہلے سے موجود مسائل نے سیلاب کے دوران اور اس کے بعد بدترین صورت اختیار کر لی ہے۔ میں نے وہاں ایک ہفتہ گزارا ہے۔ امدادی کیمپ میں چار گھنٹوں کے دوران ہمیں تقریباً تین ہزار مریضوں کا معائنہ کرنا پڑتا تھا جن میں بڑی تعداد حاملہ عورتوں اور بچوں کی ہوتی تھی۔&#39;&#39;

ڈاکٹر عالیہ کے مطابق جب وہ چوکی جمالی پہنچیں تو یہ دیکھ کر انہیں حیرانی ہوئی کہ وہاں دیہی طبی مرکز ویران پڑا تھا جس میں نہ تو علاج معالجے اور ادویات کا کوئی انتظام تھا اور نہ ہی انہیں وہاں کوئی ڈاکٹر دکھائی دیے۔ ان کا کہنا ہے کہ سیلاب نے بلوچستان میں صحت کے شعبے کی بدترین حالت اور اس میں حکومت کی ذمہ داری کو آشکار کر دیا ہے۔

فلڈ ایمرجنسی رسپانس کمیٹی برائے بلوچستان کے چیئرمین ڈاکٹر میر یوسف خان کہتے ہیں کہ کہ صوبائی اور ضلعی حکومتوں نے اس آفت کا مقابلہ کرنے کی تیاری نہیں کی تھی جو ان کی غلطی ہے تاہم وہ اپنی ٹیم کے کام کے بارے میں اطمینان کا اظہار کرتے ہیں۔ ان کا کہنا ہے کہ سیلاب آیا تو ان کی ٹیم کو بہت سے متاثرہ علاقوں تک فوری رسائی نہ مل سکی جس کے باعث متاثرین مدد سے محروم رہے۔ وہ کہتے ہیں کہ مستقبل میں حکومت کو ہنگامی امدادی اقدامات میں خواتین کو خاص طور پر مدنظر رکھنا چاہیے۔ وہ یہ اعتراف بھی کرتے ہیں کہ اس مرتبہ ان کے پاس آفت زدہ علاقوں میں خواتین کو طبی امداد پہنچانے کا کوئی منصوبہ بھی نہیں تھا۔

مقامی لوگوں کے مطابق چوکی جمالی میں مدت کمیونٹی نامی مقامی فلاحی تنظیم سیلاب کے دوران اس علاقے کا واحد سہارا تھی جبکہ سرکاری اور غیرسرکاری اداروں سے انہیں کوئی خاص مدد نہیں مل سکی۔ حاملہ خواتین کی خراب حالت کو دیکھ کر اس تنظیم نے ہی ڈاکٹر عالیہ سے رابطہ کیا اور ان سے طبی معاونت کی درخواست کی تھی۔&nbsp;

اس تنظیم کے بانیوں میں شامل مریم جمالی کہتی ہیں کہ &quot;اگست میں جب سیلاب آیا تو مقای لوگ بے آسرا ہو گئے جبکہ کسی حکومتی ادارے نے انہیں مدد نہ دی۔ ان حالات میں خواتین کی حالت بہت زیادہ خراب تھی جنہیں کئی طرح کے انفیکشن کا علاج کرانے کے لیے ڈاکٹر دستیاب نہیں تھے۔ اس صورت حال میں ہمیں لوگوں کو منت سماجت کر کے مدد کے لیے بلانا پڑا۔&#39;&#39;

مریم جمالی کی تنظیم نے چوکی جمالی کے کیمپ میں رہنے والی تمام خواتین کا سروے کرایا جس سے سامنے آیا کہ وہاں 240 میں سے تقریباً 70 خواتین حمل کے آخری مہینوں میں تھیں۔ اس سروے کے بعد فوری طبی معاونت کی منتظر خواتین کو مدد دینے کے اقدامات کیے گئے۔

شاہین کے خیمے سے کچھ ہی دور ماسی شہزادی نامی دایہ رہتی ہیں۔ انہیں اپنی صحیح عمر کا اندازہ نہیں لیکن یہ ضرور یاد ہے کہ 1967 میں آنے والے سیلاب کے وقت ان کی عمر تقریباً 20 برس تھی۔ یہ خاتون پچھلے پچیس سال سے دایہ کے طور پر کام کر رہی ہیں۔ سیلاب کے دوران انہوں نے چوکی جمالی میں چھ بچوں کی پیدائش میں مدد دی۔ ماسی شہزادی یہاں حاملہ خواتین کا واحد سہارا ہیں۔

ماسی شہزادی کا کہنا ہے کہ وہ کئی مرتبہ سیلاب کے دوران بچوں کی پیدائش میں مدد فراہم کر چکی ہیں لیکن ہر مرتبہ سیلاب ایک نئی تباہی لاتا ہے اور اس مرتبہ آنے والے سیلاب کا پانی زہریلا ہے۔ یہیں موجود سات ماہ کی حاملہ پچیس سالہ ریما کا کہنا ہے کہ سیلاب کے ایام ان کے لیے بہت مشکل تھے اور ہر دو ہفتے کے بعد وہ اور ان جیسی دیگر خواتین ملیریا یا اس سے ملتی جلتی بیماریوں مبتلا ہو جاتی تھیں کیونکہ دن بھر بیرون خانہ کام کرتے ہوئے ان کے لیے اپنی صحت کا خیال رکھنا آسان نہیں تھا۔

ڈاکٹر عالیہ کہتی ہیں کہ حکومت نے ان خواتین کو پوری طرح نظرانداز کر دیا ہے۔ سیلاب متاثرین اور ان کی امداد کے حوالے سے سرکاری رپورٹیں حقائق پر مبنی نہیں ہیں۔ انہیں تشویش ہے کہ غذائی قلت اور زچگی کے مسائل حاملہ خواتین کی صحت پر دوررس منفی اثرات مرتب کریں گے۔ ان کا کہنا ہے کہ سیلاب کے بعد کھڑے پانی سے بہت سی بیماریاں جنم لے رہی ہیں اور حاملہ خواتین کو جراثیمی انفیکشن لاحق ہونے کا خطرہ خوفناک حد تک بڑھ گیا ہے۔&nbsp;

شاہین کو چوکی جمالی میں واپس آئے تقریباً دو ماہ ہو گئے ہیں لیکن وہ جس خیمے کو اپنا گھر کہتی ہیں اس کی سفید رنگت اب سیاہ ہو چکی ہے۔ انہیں خوف ہے کہ یہ سیاہ رنگ ان کے پیٹ میں پلتے بچے کے لیے نقصان دہ ہو سکتا ہے۔ سیلاب کے بعد وہ ایک مرتبہ ہی ڈاکٹر سے اپنا معائنہ کرا سکی ہیں۔ وہ گھبراہٹ میں اپنے پیٹ کو سہلاتے ہوئے کہتی ہیں کہ &#39;&#39;میں یہی امید کرتی ہوں کہ حالات مزید خراب نہ ہوں اور ہماری آئندہ زندی محفوظ ہو۔&#39;&#39;

عائشہ طاہر

عائشہ طاہر انسانی مسائل پر رپوٹنگ کرتی ہیں۔ انہوں نے پرنسٹن یونیورسٹی سے گریجویشن کی ہوئی ہے۔

'سیلاب نے خواتین کی مشکلات کو تین گنا بڑھا دیا ہے'

ایل ڈی اے چھوٹی رہائشی سوسائٹیوں کو غیر قانونی قرار دینے کے اشتہارات کیوں شائع کرواتا ہے؟

دوا اور غذا کی قلت: بلوچستان کے سیلاب متاثرین میں حاملہ خواتین کی صحت و زندگی خطرے میں پڑ گئی