اظہر اقبال سیالکوٹ کی ایک فیکٹری میں ملازم تھے۔ ان پر ایک سال قبل فالج کا حملہ ہوا تو ان کی اہلیہ نرگس پروین انہیں صنعتی مزدوروں کے لیے قائم سوشل سکیورٹی ہسپتال لے گئیں لیکن ہسپتال والوں نے علاج سے انکار کر دیا۔

پچپن سالہ نرگس پروین بتاتی ہیں کہ انہیں مجبوراً شوہر کو سول ہسپتال لے جانا پڑا۔ وہ وہاں چھ دن کوما میں رہنے کے بعد انتقال کر گئے۔

&nbsp;&quot; سول ہسپتال میں میرے میاں کو علاج کی مناسب سہولت نہیں ملی۔ اگر اپنے سوشل سیکورٹی ہسپتال میں ان کا علاج ہو جاتا تو شاہد وہ آج زندہ ہوتے۔&quot;

اظہر اقبال ضلع سرگودھا میں پیدا ہوئے تھے اور وہیں پلے بڑھے۔ انہیں 17 سال پہلے سیالکوٹ کی &#39; کیپ اینڈ ٹچ &#39; نامی فیکٹری میں ملازمت ملی تو خاندان کو بھی یہیں لے آئے۔ اب ان کی بیوہ اور پانچ بچے محلہ مظفر آباد میں کرایے کے مکان میں رہتے ہیں جس کا ماہانہ کرایہ 18 ہزار روپے ہے۔

سوشل سیکورٹی کا ادارہ &#39;پنجاب ایمپلائز سوشل سکیورٹی انسیٹیوشن&#39; (پی ای ایس ایس آئی) صوبائی محکمہ محنت و افرادی قوت (لیبر ڈیپارٹمنٹ) کے زیر انتظام کام کرتا ہے۔

صنعتی کارکنوں اور ان کے زیر کفالت افراد کو طبی سہولتوں کی فراہمی اسی ادارے کی ذمہ داری ہے جس کے لیے سوشل سکیورٹی ہسپتال قائم کیے گئے ہیں۔

&nbsp;پراونشل ایمپلائز سوشل سیکیورٹی آرڈیننس 1965ء کے تحت آجر اپنے ملازمین کی اجرت کا چھ فیصد اس ادارے (پی ای ایس ایس آئی) میں جمع کرائے گا۔ جس کے بدلے میں یہ ادارہ ان رجسٹرڈ مزدوروں کو ہر طرح کی طبی سہولیات فراہم کرنے کا پابند ہے۔

اظہر اقبال کئی سال سے اس ادارے (پی ای ایس ایس آئی) میں رجسٹرڈ تھے اور ان کے حصے کی رقم&nbsp; (تنخواہ کا چھ فیصد) باقاعدگی سے ان کی فیکٹری کے مالک ادا کر رہے تھے۔

نرگس پروین کہتی ہیں ان کی دو بیٹیوں میں سے ایک شادی کی عمر کو پہنچ چکی ہے۔ شوہر کو فوت ہوئے ایک سال کا عرصہ بھی نہیں ہوا کہ سوشل سکورٹی کارڈ واپس&nbsp; لے لیا گیا ہے۔

&quot; میں دل اور گردوں کی مریضہ ہوں۔ اب علاج بھی اپنے پیسوں سے کرانا پڑتا ہے حالانکہ سنا تھا کہ شوہر فوت ہو جانے کے بعد دو سال مزدور کے بیوی بچوں کو سوشل سیکورٹی ہسپتال میں طبی سہولت ملتی ہے۔ لیکن مجھے انکار کر دیا گیا ہے۔&quot;

ساجدہ بی بی کے شوہر &#39;پروبیک&#39; نامی فیکٹری میں کام کرتے تھے۔ وہ دو سال قبل ٹریفک حادثے میں شدید زخمی ہو گئے۔ وہ انہیں سوشل سیکورٹی ہسپتال لے گئیں لیکن انہیں داخل کرنے سے انکار کر دیا گیا۔

&quot;مجھے علاج نہ کرنے کی کوئی وجہ نہیں بتائی گئی بعد میں کسی نے بتایا کہ شاید ان کے پاس ایسی طبی سہولیات موجود نہیں تھیں۔&quot;

وہ بتاتی ہیں کہ ان کے شوہر چار روز بعد سول ہسپتال میں انتقال کر گئے۔ وہاں دواؤں اور علاج پر 50 ہزار روپے سے زائد خرچ ہو گئے لیکن سوشل سیکیورٹی والوں یا فیکٹری مالکان نے کوئی تعاون نہیں کیا۔

چون سالہ ساجدہ بی بی کے بقول وہ خود بیمار ہیں۔ کچھ ماہ پہلے اپنے ہرنیا کا آپریشن کرانے کے لیے سوشل سیکورٹی ہسپتال گئی تو یہ کہتے ہوئے انکار کر دیا گیا کہ &quot;میاں کی موت کے دو سال بعد بیوہ، بچوں کو علاج کی سہولت نہیں ملتی۔&quot;

نرگس پروین اور ساجدہ بی بی ہی نہیں بلکہ سیالکوٹ کے لاکھوں صنعتی مزدوروں کی یہی کہانی ہے۔ ان کا اول تو سوشل سکیورٹی کارڈ ہی نہیں بنا۔ اگر کسی کے پاس کارڈ ہے بھی تو ان میں سے بیشتر طبی سہولیات سے فائدہ نہیں اٹھا پاتے۔

قانون کے مطابق محکمہ سوشل سیکورٹی کی ذمہ داری ہے کہ وہ ہر رجسٹرڈ کارکن کو ادارے کے زیر نگرانی کام کرنے والے ہسپتالوں اور ڈسپینسریوں میں مفت علاج فراہم کرے۔ اگر یہاں طبی سہولت نہیں ہو گی تو محکمہ اپنے خرچ پر دوسرے ہسپتالوں میں کارکن کے علاج کا بندوبست کرے گا۔

دوران ڈیوٹی زخمی ہونے والے کارکن کی داد رسی اور جان سے ہاتھ دھونے والے کی بیوہ کو عدت کاعرصہ ختم ہونے پر مالی امداد دینا اسی ادارے کی ذمہ داری ہے۔

سیالکوٹ میں ڈائریکٹر سوشل سیکیورٹی محمد حسان تصدیق کرتے ہیں کہ ہر رجسٹرڈ مزدور اور لواحقین کو طبی سہولت کی فراہمی اس ادارے کی ذمہ داری ہے۔

پاکستان ورکرز فیڈریشن شمالی پنجاب کے صدر چوہدری محمد اشرف کا دعویٰ ہے کہ سیالکوٹ سے ہر ماہ 12 سے 13 کروڑ روپے سوشل سکیورٹی انسٹی ٹیوشن میں جمع ہوتے ہیں۔ اس کے باوجود سوشل سکیورٹی کارڈ ہولڈرز علاج سے محروم رہتے ہیں۔

وہ کہتے ہیں کہ سیالکوٹ میں مزدوروں کے نام پر آجروں سے وصول کی جانے بیشتر رقم محکمہ کے افسروں اور اہل کاروں پر خرچ ہو رہی ہے۔ مزدوروں کی تعداد روز بروز بڑھ رہی ہے لیکن سیالکوٹ کا واحد سوشل سکیورٹی ہسپتال جو پہلے سو بستروں پر مشتمل تھا اسے اب 50 بستر کا کر دیا گیا ہے۔

سیالکوٹ صنعتی شہر ہے جہاں سرجیکل آلات، کھیلوں کا سامان، چمڑے کی مصنوعات، کپڑا اور دیگر اشیا تیار کی جاتی ہیں۔

پنجاب شماریات بیورو کے مطابق سیالکوٹ میں بڑے صنعتی یونٹس کی تعداد تین ہزار 314 ہے جبکہ لیبر فورس سروے 21-2020ء میں بتایا گیا تھا کہ اس شہر میں مزدوروں کی تعداد 13 لاکھ 26 ہزار سے زیادہ ہے جن میں سے 34.2 فیصد یعنی چار لاکھ 53 ہزار 628 فیکٹریوں سے وابستہ ہیں۔

ڈپٹی ڈائریکٹر سردار محمد شفیق کے مطابق سیالکوٹ سوشل سکیورٹی میں 66 ہزار 435 مزدور رجسٹرڈ ہیں۔ جبکہ یہاں فعال سوشل سکیورٹی کارڈز کی تعداد 27 ہزار 560 ہے۔ یعنی رجسٹرڈ مزدوروں میں سے نصف سے بھی کم طبی سہولیات اور مالی فوائد حاصل کر پا رہے ہیں۔

&quot; کئی مالکان ماہانہ پیسے تو جمع کراتے ہیں لیکن وہ ورکرز کے کارڈ حاصل نہیں کرتے۔ کچھ آجر اپنے حصے کی رقم ہی جمع نہیں کراتے جس کی وجہ سے ان کے ذمہ بقایا جات جمع ہو جاتے ہیں۔ بیشتر اوقات ریکوری کے لیے ضلعی انتظامیہ کی بھی مدد لینا پڑتی ہے۔&quot;

وہ کہتے ہیں کہ ضلع سیالکوٹ میں اس وقت فیکٹری اونرز اور بھٹہ مالکان کے ذمے ایک ارب 17 کروڑ روپے ہیں جن کی وصولی محکمے کے لیے چیلنج ہے۔

تاہم چوہدری اشرف فیکٹری مالکان اور محکمہ دونوں کو برابر کا ذمہ دار سمجھتے ہیں۔ وہ بتاتے ہیں کہ آجروں کو اعتراض یہ ہے کہ مزدور معمولی تکلیف کے علاج کے لیے سوشل سیکورٹی کی ڈسپینسریوں اور ہسپتال میں کئی کئی گھنٹے ضائع کر دیتے ہیں۔ جبکہ کچھ فیکٹری مالکان محکمے کے عملے سے ساز باز کرکے اپنے ملازمین کے کارڈ نہیں بنواتے۔

&quot;ان فیکٹری مالکان نے مزدوروں کی رجسٹریشن کرائی ہے اور حصے کی رقم بھی جمع کراتے ہیں۔ لیکن انھوں نے محض اس لیے کارڈ نہیں بنوائے یا مزدوروں کو نہیں دیے کہ اگر ایک کو فائدہ پہنچ گیا تو فیکٹری کے تمام مزدور کارڈ کا مطالبہ شروع کر دیں گے جو شاید مالکان کو قبول نہیں ہے۔&quot;

مزدور رہنما سمجھتے ہیں کہ اکثر مزدور سوشل سیکورٹی کارڈ کی اہمیت نہیں جانتے۔ مزدور تنظیمیں جب بھی اس حوالے سے آگاہی دینے کی کوشش کرتی ہیں تو فیکٹری مالک انہیں فیکٹری میں جانے ہی نہیں دیتے۔ کیوںکہ یہاں اکثر فیکٹریوں میں ٹریڈ یونین بنانے کی اجازت نہیں ہے۔

سیالکوٹ ایوان صنعت و تجارت کے سینئر نائب صدر وہب جہانگیر ان الزامات کو تسلیم نہیں کرتے ہیں۔ انہوں نے سوال کیا کہ کیا تمام کارڈ ہولڈر ورکرز کو طبی سہولتیں مل رہی ہیں ہے؟ جواب نفی میں ملتا ہے۔ اگر سب کو سہولتیں میسر ہوں تو فیکٹری مالکان اور مزدوروں کا حوصلہ بڑھے گا اور وہ کارڈ بنانے میں بھی دلچسپی لیں گے۔

&nbsp;صنعتی یونٹ &#39;اعوان سپورٹس&#39; کے چیئرمین ملک جرار اعوان دعویٰ کرتے ہیں کہ انھوں نے اپنی فیکٹری کے تمام کارکنوں کو قانون کے مطابق سوشل سیکیورٹی سمیت وہ تمام سہولیات فراہم کر رکھی ہیں۔&nbsp; لیکن انہیں گلہ ہے کہ حکومت ان مزدوروں کو مطلوبہ سہولیات فراہم نہیں کر رہی ہے۔

&quot;حکومت کو چاہیے کہ مزدوروں کے جائز حقوق کی راہ میں رکاوٹ بننے والے افسروں کو فارغ کر دے۔ اس سے ان کا احتساب ہو جائے گا اور نئے افسر یہ غلطی بھی نہیں دہرائیں گے۔&quot;

اسی فیکٹری&nbsp; کے نوجوان مزدور علی رضا تصدیق کرتے ہیں کہ&nbsp; کچھ دن پہلے جب وہ اپنی والدہ کو ہسپتال لے کر گئے تو وہاں عملے نے انہیں سوشل سکیورٹی آفس سے ریفرل سلپ لانے کا &#39;حکم&#39; دے دیا۔ انہوں نے اس دفتر کے کئی روز تک چکر لگائے مگر وہاں تالے پڑے ہوئے تھے۔

محمد ضرار بٹ سیالکوٹ کی ایک اور کمپنی &#39;فاروڈ سپورٹس&#39; کی مزدور یونین کے سابق صدر ہیں۔ وہ کہتے ہیں کہ ان کی فیکٹری ہر ماہ سوشل سکیورٹی کی مد میں 30 لاکھ روپے سے زائد جمع کراتی ہے لیکن محکمہ فیکٹری میں قائم ڈسپینسری کو ماہانہ بمشکل دو لاکھ روپے کی ادویات فراہم کرتا ہے۔

سیالکوٹ میں زیادہ تر انٹرنیشنل برانڈز کے لیے مال تیار ہوتا ہے اور عالمی برانڈ ہر وقت نگرانی کرتے ہیں کہ کہیں ان فیکٹریوں میں مزدوروں کا استحصال تو نہیں ہو رہا۔ اس لیے حکومت کو چاہیے کہ وہ فوری طور پر صنعتی کارکنوں کی مشکلات دور کرے۔

کوئٹہ: تعمیراتی انڈسٹری کی بنیاد 'سٹون کرشنگ پلانٹس'  کے  مزدور کس حال میں ہیں؟

سیالکوٹ: لاکھوں صنعتی مزدور سوشل سکیورٹی کی سہولیات سے کیوں محروم ہیں؟

text

سیالکوٹ میں پروبیک نامی نجی فیکٹری میں 10 سال مزدوری کرنے والے ملک محمد سرور کے انتقال کو دو سال گزر چکے ہیں لیکن ان کے اہل خانہ کو تاحال ڈیتھ گرانٹ نہیں ملی۔ محمد سرور کی اہلیہ ساجدہ پروین کے مطابق ان کے شوہر 10 اگست 2021ء کو ٹریفک حادثے میں شدید زخمی ہونے کے چھ روز بعد انتقال کر گئے تھے۔

انہوں نے پسماندگان میں بیوی، تین بیٹیاں اور دو بیٹے چھوڑے۔ انتقال کے وقت ان کے بچے ملازمت کی عمر کو نہیں پہنچے تھے۔

ساجدہ پروین بتاتی ہیں کہ شوہر کے انتقال کے بعد معاشی حالات خراب ہونے کے سبب رشتہ داروں سے قرض لے کر گزارا کرنا پڑا۔ وہ اس آس پر قرض لیتی رہیں کہ ڈیتھ گرانٹ ملنے پر اسے چکا دیں گی۔ اب قرض خواہ اپنی رقم کی واپسی کا تقاضا کر رہے ہیں تو انہیں سمجھ نہیں آ رہی کہ وہ ادائیگی کہاں سے کریں۔

شوہر کے انتقال کے بعد وہ فیکٹری اور مختلف سرکاری دفاتر کے چکر لگاتی رہی ہیں۔ اس دوران کسی نے گرانٹ دلانے کے عوض رقم مانگی تو کسی نے ہراساں کیا۔ تنگ آکر ایک کنسلٹنٹ کو 30 ہزار روپے رشوت دی تاکہ ان کا کیس جلد منظور ہو جائے۔

نجی فیکٹری بشیر جمیل سرجیکل میں کام کرنے والے 55 سالہ محمد بوٹا نے دو سال قبل اپنی بیٹی کی شادی کی تھی اور اسی وقت شادی کے لیے گرانٹ حاصل کرنے کی درخواست جمع کرا دی تھی۔

محمد بوٹا کہتے ہیں کہ بیٹی ایک بچے کی ماں بن چکی ہے لیکن اس کے جہیز کے لیے لیا گیا قرض چکانا ابھی باقی ہے۔ نہ حکومت کی طرف سے کوئی مثبت جواب آیا ہے اور نہ ہی فیکٹری والے کچھ بتاتے ہیں۔

&quot;پتا نہیں ہمیں مدد فراہم کرنے کے لیے ہمارے ہی فنڈ سے تنخواہ لینے والے افسر کب ہماری طرف دیکھیں گے؟&quot;

سیالکوٹ پاکستان کا ایک اہم صنعتی شہر ہے جہاں سرجیکل آلات، کھیلوں کا سامان، چمڑے کی مصنوعات، کپڑا اور دیگر اشیا تیار کی جاتی ہیں۔ پنجاب شماریات بیورو کے مطابق سیالکوٹ میں بڑے صنعتی یونٹوں کی تعداد تین ہزار 314 ہے جبکہ لیبر فورس سروے 21-2020ء کے مطابق اس شہر میں مزدوروں کی کل تعداد 13 لاکھ 26 ہزار سے زیادہ بتائی گئی ہے۔ ان میں 34.2 فیصد صنعت اور 35.8 فیصد خدمات کے شعبے سے وابستہ ہیں۔

محنت کشوں کی تنظیم پاکستان ورکرز فیڈریشن کے شمالی پنجاب ریجن کے صدر چوہدری محمد اشرف کہتے ہیں کہ اس شہر میں ڈیتھ و میرج گرانٹ اور تعلیمی وظائف کے منتظر لواحقین اور کارکنان کی تعداد بہت زیادہ ہے۔

وہ بتاتے ہیں کہ ضلع سیالکوٹ سے وفات پانے والے صنعتی کارکنان کے لواحقین کی جانب سے 248 درخواستیں پنجاب ورکرز ویلفیئر فنڈ کے لاہور میں مرکزی دفتر کو ارسال کی جا چکی ہیں جن میں سے صرف 103 کے چیک وصول ہوئے ہیں۔

شادی گرانٹس کی ایک ہزار 470 درخواستوں میں سے 1075 زیر التوا ہیں اور صرف 395 کو ہی گرانٹ ملی ہے۔ اسی طرح تعلیمی وظائف کی 287 درخواستوں پر کئی سال کے بعد صرف 45 خوش نصیبوں کو ہی چیک مل سکے ہیں۔

چوہدری محمد اشرف بتاتے ہیں کہ بہت سی گرانٹس 2018ء سے رکی ہوئی ہیں۔ 18 جون 2021ء کو پنجاب ورکرز ویلفیئر بورڈ نے نئی چیک لسٹ متعارف کرواتے ہوئے تمام زیر التوا درخواستیں متعلقہ اضلاع میں محکمہ لیبر کو واپس بھجوا دی&nbsp; جنہیں نئی چیک لسٹ کے مطابق مکمل کر کے منظوری کے لیے دوبارہ بھیج دیا گیا۔ اس کے بعد محکمے والے کبھی کبھار ایک آدھ چیک بھجوا دیتے ہیں۔

کارکنان یا ان کے لواحقین یہ امداد مفت میں نہیں لے رہے اور نہ ہی حکومت اپنی جیب سے انہیں رقم دے رہی ہے بلکہ یہ رقم ان فیکٹری مالکان کی جانب سے سرکاری محکمے پنجاب ورکرز ویلفیئر فنڈ (پی ڈبلیو ڈبلیو ایف) کو اپنے منافعے میں سے دی جانے والی رقم سے ملتی ہے۔ فیکٹری مالکان ( آجر) اپنے منافعے کا دو فیصد حصہ اس ادارے کو دینے کے پابند ہیں۔

پی ڈبلیو ڈبلیو ایف پنجاب ورکرز ویلفیئر فنڈ ایکٹ 2019ء کے تحت قائم کیا گیا کارپوریٹ ادارہ ہے۔ایک گورننگ باڈی ادارے کی قیادت کرتی ہے جس میں حکومتی نمائندے، کارکنان اور آجر شامل ہوتے ہیں۔

یہ ادارہ صنعتی کارکنوں کو ان کی خدمات کے عوض مراعات فراہم کرنے کے لیے بنایا گیا ہے جس کی ذمہ داریوں میں میرج گرانٹس، ڈیتھ گرانٹس، ٹیلنٹ سکالرشپس، لیبر کالونیوں کا قیام، ان کی دیکھ بھال اور پنجاب کے مختلف اضلاع میں ورکرز ویلفیئر سکولوں کا قیام و انتظام شامل ہیں۔

ادارے کی ویب سائٹ کے مطابق فیکٹریز ایکٹ 1934ء یا مائنز منسیشن رولز 2002ء کے تحت رجسٹرڈ ادارے میں دوران ملازمت فوت ہونے والا اور پنجاب انڈسٹریل ریلیشن ایکٹ 2010ء (پیرا) میں دی گئی ورکر کی تعریف پر پورا اترنے والا کارکن ڈیتھ گرانٹ کا اہل ہے۔اس میں مدت ملازمت کی کوئی حد مقرر نہیں ہے البتہ فوت شده کارکن اداره سوشل سکیورٹی یا اولڈ ایج ایمپلائز بینیفٹس انسٹی ٹیوٹ کے تحت تحفظ یافتہ ہونا چاہیے۔ فوت شده کارکن کی بیوه یا والدین یا بچے ڈیتھ گرانٹ کے اہل ہیں۔

حکومت کی طرف سے ڈیتھ گرانٹ میں وقت کے ساتھ اضافہ کیا جاتا رہا ہے۔ 2012ء سے 2020ء کے دوران انتقال کرنے والے کارکن کے لواحقین پانچ لاکھ روپے، 17 اگست 2020ء سے 27 مارچ 2023ء تک چھ لاکھ روپے اور اس کے بعد وفات پانے والوں کےورثا آٹھ لاکھ روپے کے حق دار ہیں۔

وہ کارکن جس کی مدت ملازمت بوقت نکاح کم از کم تین سال ہوبشرطیکہ وہ اولڈ ایج بینیفٹ انسٹی ٹیوٹ یا سوشل سکیورٹی سے سے رجسٹرڈ ہو، میرج گرانٹ کا اہل ہے۔ دوران ملازمت وفات پانے والے یا بوجہ معذوری ریٹائرمنٹ لینے والے کارکنان کی بیٹیاں بھی گرانٹ کی اہل ہیں۔

27 دسمبر 2017ء کے بعد ہر ریٹائرڈ کارکن اپنی بچیوں کی شادی گرانٹ لے سکتا۔ خواتین کارکن / دوران ملازمت اپنی شادی کے لیے ایک دفعہ گرانٹ لے سکتی ہیں۔میرج گرانٹ میں بھی وقت کے ساتھ اضافہ کیا گیا ہے جو ایک لاکھ سے دو لاکھ روپے کی گئی اور 27 مارچ 2023ء کے بعد چار لاکھ روپے کر دی گئی ہے۔

اسی طرح مذکورہ اہلیت اور معیار پر پورا اترنے والے کارکنان کے بچے تعلیمی گرانٹ کے بھی حق دار ہیں جنہیں داخلہ فیس، ٹیوشن فیس، رجسٹریشن فیس، امتحانی فیس، لائبریری فیس/کمپیوٹر فیس یا لیب فیس کے ساتھ ٹرانسپورٹ چارجز، ہاسٹل /میسنگ چارجز کے مطابق ایک مقررہ وظیفہ دیا جائے گا۔

یہ ادارہ صنعتی کارکنان کے بچوں کے ان اخراجات کے علاوہ انٹرمیڈیٹ کی سطح پر 3500 روپے ماہانہ، گریجوایشن کی سطح پر 4500 اور پوسٹ گریجوایشن تعلیم کے دوران 5500 روپے وظیفہ دینے کا پابند ہے۔

قانون ماہرین کے مطابق ان گرانٹس کے لیے قانون میں درخواست دینے کی مدت کا تعین تو کیا گیا ہے جو ایک سال کے اندر یا پھر خصوصی سرکاری منظوری کے بعد تین سال ہے، لیکن درخواست جمع ہونے کے بعد چیک ملنے کی معیاد کا تعین نہیں کیا گیا۔

مزدور قوانین کے ماہر اور مقامی وکیل چودھری محمد یوسف کے مطابق ان گرانٹس کے حصول کے لیے ضلعی محکمہ محنت و انسانی وسائل کے پاس مکمل درخواست آ جائے تو وہ ایک ہفتے کے اندر اسے آن لائن کرنے کا پابند ہے۔ اس کے بعد پنجاب ورکرز ویلفیئر بورڈ کو ہر تین مہینے بعد ان درخواستوں پر فیصلے کر کے منظوری دینی چاہیے۔

ان کا خیال ہے کہ درخواستیں ضلعی دفاتر سے نکلنے کے بعد پنجاب ورکرز ویلفیئر بورڈ کے پاس رک جاتی ہیں۔ کارکنان کی درخواست کے تمام لوازمات پورے کرنا فیکٹری مالکان کی ذمہ داری ہےجنہیں اس سلسلے میں کسی اہلکار کی خصوصی ڈیوٹی لگانی چاہیے۔

پچھلے 17 سال تک کیپ اینڈ ٹچ فیکٹری میں مزدوری کرنے والے اظہر اقبال آٹھ جنوری 2023ء کو دوران ڈیوٹی فالج کا حملہ ہونے کے بعد 14 جنوری کو فوت ہو گئے۔ تو ان کی اہلیہ نرگس بی بی کو گرانٹس کے لیے فائل تیار کرنے اور پھر اسے آن لائن اپ لوڈ کرنے میں آٹھ ماہ لگے لیکن انہیں نہیں معلوم کہ چیک کب آئے گا۔

وہ کہتی ہیں کہ ان کے تین بیٹے اور دو بیٹیاں ہیں اور وہ خود گردوں کے مرض میں مبتلا ہیں۔ ان کے خاوند کو فوت ہوئے چند ہی مہینے ہوئے تھے کہ ان کا سوشل سکیورٹی کارڈ واپس لے لیا گیا جس کی وجہ سے اپنا علاج بھی نہیں کرا پا رہیں۔ انہیں خدشہ ہے کہ محکمہ لیبر کے ایک سکول میں چھٹی جماعت میں پڑھنے والی ان کی چھوٹی بیٹی کو کارڈ نہ ہونے کے باعث کسی دن سکول سے فارغ کر دیا جائے گا۔

بڑی بیٹی بھی شادی کی عمر کو پہنچ چکی ہے۔ انہوں نے کہا &quot;ہم یہ انتظار کر رہے ہیں یہ گرانٹ آئے اور ہم اس کے ہاتھ پیلے کریں&quot;۔

پنجاب ورکرز ویلفیئر فنڈ کی سکورٹنی کمیٹی کے ضلعی رکن اور فارورڈ گیئر فیکٹری ورکرز یونین کے صدر محمد علی بٹ کہتے ہیں کہ فنڈز ہونے کے باوجود کارکنان کو ان کے واجبات نہ مل پانا بہت بڑی ناانصافی ہے۔

وہ کہتے ہیں کہ درخواست جمع ہونے کے بعد امداد کی ادائیگی کا کوئی وقت مقرر ہونا چاہیے اور میرج گرانٹ بیٹی کی رخصتی سے کم از کم ایک ماہ پہلے مل جانی چاہیے۔

&quot;اس مقصد کے لیے رخصتی سے پہلے نکاح کرنے اور نکاح نامہ پیش کرنے کی شرط رکھی جا سکتی ہے۔ اگر نکاح رخصتی کے وقت ہی انجام پانا ہو تو بھی ایک مہینہ کے اندر یہ گرانٹ مل جانی چاہیے۔ اسی طرح ڈیتھ گرانٹ درخواست ملنے کے ایک مہینہ کے اندر منظور کر کے آن لائن ادائیگی کا نظام بنایا جائے۔&quot;

انہوں نے کہا کہ چیک ملنے میں کئی کئی سال کی تاخیر بدعنوانی کے امکانات بڑھا دیتی ہے جس کا نقصان بیوہ خواتین کو ہراسگی، رشوت یا پھر بلیک میلنگ کی صورت میں برداشت کرنا پڑتا ہے۔

محمد علی بٹ کے مطابق بمقابلہ لاہور سیالکوٹ اورپنجاب کے دوسرے شہروں کے مزدوروں کے لیے ان گرانٹس کی ادائیگیوں کی صورت حال زیادہ بری ہے۔ لاہور کے فیکٹری مالکان ورکرز ویلفیئر فنڈ آفس قریب ہونے کی وجہ سے مسلسل رابطے رہ سکتے ہیں اور دباؤ بڑھا سکتے ہیں۔

ان کہنا ہے ایک محتاط اندازے کے مطابق اس وقت پنجاب بھر میں بیٹیوں کی شادی کی گرانٹس کے لیے 11 ہزار 500 درخواستیں منظوری کی منتظر ہیں۔ اسی طرح 900 بیوائیں شوہر کے انتقال پر ملنے والی گرانٹ کا انتظار کر رہی ہیں اور چھ ہزار 500 طلبہ و طالبات کو تعلیم اخراجات اور وظائف کی ادائیگیاں باقی ہیں۔

سینئر نائب صدر سیالکوٹ ایوان صنعت و تجارت زوہب جہانگیر کہتے ہیں کہ ان گرانٹس میں تاخیر کے باعث جہاں ورکرز پریشان ہوتے ہیں وہاں آجروں کے لیے بھی مشکلات بڑھ جاتی ہیں کیوں کہ جب سال ہا سال ادائیگیاں نہیں ہوں گی تو مزدوروں کا فیکٹری مالکان سے اعتماد اٹھ جائے گا۔

عبدالشکور مرزا

عبدالشکور مرزا کا تعلق شہر اقبال سیالکوٹ سے ہے۔ أپ نے صحافت کا أغاز نصف صدی قبل کیا۔ ہفت روزہ اخبار جہاں کراچی سے منسلک ہیں۔

سیالکوٹ: لاکھوں صنعتی مزدور سوشل سکیورٹی کی سہولیات سے کیوں محروم ہیں؟

سیالکوٹ میں صنعتی کارکن اور ان کے خاندان سالہا سال سے میرج، ڈیتھ گرانٹ اور تعلیمی وظائف کے منتظر