فیصل آباد کے علاقے غلام محمد آباد میں رہنے والے تیئس سالہ رفاقت علی پچھلے تین سال سے ایک فیکٹری میں کپڑا بننے کا کام کر رہے ہیں۔ یہاں انہیں ایک میٹر کپڑا تیار کرنے کا پانچ روپے معاوضہ ملتا ہے۔ وہ روزانہ آٹھ مشینوں (پاور لومز) پر دو سو میٹر کپڑا بنتے ہیں جس کے عوض انہیں ماہانہ تیس ہزار روپے اجرت حاصل ہوتی ہے۔ وہ 12 گھنٹے کی شفٹ میں کام کرتے ہیں جس کے لیے یہ اجرت بہت کم ہے اور مہینے کے آخری ایام میں ان کے لیے روزمرہ اخراجات پورے کرنا مشکل ہو جاتا ہے۔&nbsp;

رفاقت اپنے تین بہن بھائیوں میں سب سے بڑے ہیں اور گھر کا تمام بوجھ انہی کے کندھوں پر ہے۔ ان کے والد بھی فیکٹری میں ملازم تھے لیکن چند سال پہلے کام کے دوران ایک حادثے میں بازو ٹوٹ جانے کے باعث اب وہ کام کرنے کے قابل نہیں رہے۔ چونکہ رفاقت کی تنخواہ گھر چلانے کے لیے کافی نہیں ہے اس لیے ان کی والدہ لوگوں کے گھروں میں کام کاج کر کے ان کا بوجھ بانٹنے کی کوشش کرتی ہیں۔&nbsp;

رفاقت بتاتے ہیں کہ پاور لومز پر کام کرنے والے مزدوروں کو بُنے گئے کپڑے کی لمبائی کے حساب سے اجرت ملتی ہے۔ کچھ عرصہ پہلے ان کی فیکٹری کے مالک نے مزدوروں کے معاوضے کم کر دیے تھے اور کئی لوگوں کو نوکری سے بھی نکال دیا تھا۔ یہی وجہ ہے کہ رفاقت نوکری بچانے اور زیادہ سے زیادہ پیسے کمانے کے لیے آٹھ پاور لومز چلاتے ہیں جبکہ عام حالات میں ایک مزدور چار پاور لومز چلاتا ہے۔&nbsp;

کچھ عرصہ پہلے رفاقت کو گھر کے بجلی کے بل کی مد میں چار ہزار روپے ادا کرنا ہوتے تھے لیکن اب یہ رقم بڑھ کر 13 ہزار تک پہنچ گئی ہے جبکہ گھر کا کرایہ، بہن بھائیوں کے تعلیمی اخراجات، والد کی دوا اور گھر سے فیکٹری تک آنے جانے کے لیے موٹرسائیکل کے پٹرول پر اٹھنے والے اخراجات اس کے علاوہ ہیں۔&nbsp;

فیصل آباد میں کپڑے کی صنعت سے وابستہ رفاقت جیسے لاکھوں مزدور انہی حالات میں جی رہے ہیں۔ یہ لوگ اپنی اجرت میں اضافہ چاہتے ہیں جبکہ مالکان خسارے کے باعث کارخانے بند کر رہے ہیں۔ معاوضوں میں اضافے کے لئے فیصل آباد میں مزدوروں کا احتجاج اور دھرنے معمول ہیں اور ضلع کونسل چوک سے ڈی سی آفس تک ایسے احتجاجی مظاہرے اکثر دیکھنے کو ملتے ہیں۔

گزشتہ دنوں مزدروں نے اجرتوں میں اضافے کے لیے جھنگ روڈ پر احتجاج کیا جہاں انہوں نے دو ہفتے تک دھرنا دیے رکھا۔ بہت سے مزدور اپنے بیوی بچوں کو بھی دھرنے میں لے آئے۔ بالاآخر ضلعی انتظامیہ نے مزدوروں اور فیکٹری مالکان کے مابین مذاکرات کروائے جس کے نتیجے میں ان کی اجرتوں میں تو اضافہ ہو گیا لیکن مالکان نے فیکٹریوں کی شفٹ کا دورانیہ کم کر دیا۔ اس طرح ان کی ماہانہ آمدنی اتنی بھی نہ رہی جتنی احتجاج سے پہلے تھی۔

مزدوروں کی تنظیم لیبر قومی موومنٹ (ایل کیو ایم) کے صدر اشفاق بٹ کہتے ہیں کہ اس سال عیدالاضحٰی کے بعد 30 فیصد صنعت بند رہی اور جتنے کارخانے چلے انہوں نے کام کی شفٹ کا دورانیہ کم کر دیا۔ اس طرح بہت سے مزدوروں کی دیہاڑی بھی کم ہو گئی یا وہ کام چھوڑ گئے اور اضافی مزدروں کو مالکان نے خود ہی نوکری سے نکال دیا۔ اس طرح شہر کی کام کے قابل آبادی میں بے روزگاری کی شرح 20 فیصد تک پہنچ گئی ہے۔

<h2>کھڈی سے پاور&nbsp;لوم تک کا سفر</h2>

لان اور لٹھے کا شہر سمجھے جانے والے فیصل آباد میں گلی کوچوں سے لے کر بڑی سڑکوں تک ہر جگہ کپڑے کی فیکٹریاں، گودام اور دکانیں دکھائی دیتی ہیں۔ اس شہر نے کھڈی سے پاور لومز تک سفر تقریبا چار دھائیوں میں طے کیا ہے۔ یہ زیادہ پرانی بات نہیں جب فیصل آباد کے بیشتر گھروں کے اندر ہی کھڈیاں لگی ہوتی تھیں۔ تب کپڑا سازی کی انڈسٹری کو کاٹیج انڈسٹری کا درجہ حاصل تھا۔ مرد و خواتین فرصت کے لمحات میں کھڈیاں چلاتے، بچے چرخہ کاتنے میں اپنی ماؤں کی مدد کرتے اور یوں دھاگہ اور کپڑا بننے سے اس کی رنگائی تک سارا کام گھر میں ہی مکمل ہو جاتا تھا۔ گھروں کے باہر اوپن ڈرین سسٹم میں رنگ دار پانی بہتا نظر آتا تو پورے محلے کو پتہ چل جاتا کہ کس رنگ کاکپڑا تیار ہو رہا ہے۔&nbsp;

جب ٹیکسٹائل کی صنعت میں جدت آئی تو کپڑے کی تیاری میں طرح طرح کا میٹیریل استعمال ہونے لگا جسے پراسیس کرنے کے لیے جدید مشینری اور بڑے کارخانوں کی ضرورت محسوس ہوئی اور اس طرح یہ صنعت ترقی کر گئی۔

فیصل آباد شہر کے اندر اور باہر اس وقت کپڑے کے ہزاروں کارخانے ہیں جہاں لاکھوں مزدور کام کرتے ہیں۔ پاورلومز مالکان کی تنظیم کا دعوی ہے کہ فیصل آباد ڈویژن میں پاورلومز کی تعداد دو لاکھ سے زیادہ ہے۔ روئی سے دھاگے کی تیاری اور دھاگے سے کورے کپڑے کی تیاری، رنگائی اور پھر مارکیٹ میں اس کی فروخت تک بہت سے مراحل سے لاکھوں لوگوں کا روزگار جڑا ہے۔

یہ لوگ اس صنعت کے چھ مختلف شعبوں سے وابستہ ہیں جن میں جننگ، سپننگ، سائزنگ، پاور لومز، پراسیسنگ اور پیکنگ شامل ہیں۔&nbsp;

جننگ انڈسٹری میں روئی کو بیج سے الگ کیا جاتا ہے اور اس کی نمی کو ختم کر کے اسےصفائی کے مراحل سے گزارا جاتا ہے۔

سپننگ انڈسٹری میں روئی سے دھاگہ تیار کیا جاتا ہے۔ اس عمل میں دو یا زیادہ دھاگوں کو اکٹھا کر کے گھمایا جاتا ہے اور پھر مختلف اقسام کے کپڑوں میں استعمال ہونے والے دھاگے تیار کیے جاتے ہیں۔&nbsp;

سائزنگ انڈسٹری میں دھاگے کو مختلف کیمیائی مادوں سے گزار کر اس قابل بنایا جاتا ہےکہ اس کی بُنت میں ملائمت آسکے۔&nbsp;

پاور لومز میں دھاگے کو بُنا اور اس سے کپڑا تیار کیا جاتا ہے۔

پراسیسنگ انڈسٹری میں کپڑے کی رنگائی اور ڈیزائننگ ہوتی ہے۔&nbsp;

ان تمام مراحل سے گزرنے کے بعد تیار شدہ کپڑا پیکنگ انڈسٹری میں آتا ہے جہاں اس پر برانڈز کے لیبل لگائے جاتے ہیں اور اسے تھانوں کی صورت میں لپیٹا جاتا ہے یا پیکٹوں اور ڈبوں میں بند کیا جاتا ہے۔

یارن مارکیٹ یا سوتر منڈی اس صنعت کا ایک اور اہم شعبہ ہے جہاں پنجاب اور سندھ کی سپننگ ملوں سے آنے والے دھاگے کا کاروبار ہوتا ہے۔ فیصل آباد کی سوتر منڈی ایشیا میں دھاگے کی سب سے بڑی مارکیٹ سمجھی جاتی ہے۔

کونسل آف لوم اونرز ایسوسی ایشن کے مطابق پنجاب کی 90 فیصد پاور لومز انڈسٹری فیصل آباد ڈویژن میں ہے جہاں اس کے تقریباً دو لاکھ یونٹ قائم ہیں جن پر روزانہ ایک کروڑ میٹر سے زیادہ کپڑا تیار ہوتا ہے۔ صنعت کے دیگر شعبوں کے مالکان کی تنظیموں کے جاری کردہ اعدادوشمار کے مطابق فیصل آباد میں ٹیکسٹائل سائزنگ کے 110 کارخانے کام کر رہے ہیں جبکہ پراسیسنگ کے 150 یونٹ قائم ہیں جہاں روزانہ تقریباً ایک لاکھ میٹر کپڑا تیار ہوتا ہے ہے۔&nbsp;

<h2>صنعتی زوال</h2>

اس سال جنوری میں فیصل آباد میں ٹیکسٹائل فیکٹریوں کے مالکان نے بجلی کے یونٹ کی قیمت 34 روپے تک پہنچنے پر تحریک انصاف کی حکومت کے خلاف مظاہرے کیے تھے۔ آج سات ماہ بعد اس صنعت کو ملنے والی بجلی کا یونٹ 42 روپے کا ہو گیا ہے اور فیکٹری مالکان ایک مرتبہ پھر سڑکوں پر آ گئے ہیں۔

لوم اونرز ایسوسی ایشن کے چئیرمین وحید خالق رامے کا کہنا ہے کہ ٹیکسٹائل انڈسٹری کو ہر سال کپاس کی ایک کروڑ 40 لاکھ گانٹھوں کی ضرورت ہوتی ہے جبکہ اندرون ملک 80 لاکھ گانٹھیں ہی تیار ہوتی ہیں اور بقیہ کپاس درآمد کرنا پڑتی ہے۔ یہ خریداری ڈالر میں ہوتی ہے اور ڈالر کی قدر میں بے لگام اضافے سے اس صنعت میں ہر چیز مہنگی ہو گئی ہے۔

سائزنگ ایسوسی ایشن کے صدر شکیل انصاری کہتے ہیں کہ &nbsp;بجلی کے فی یونٹ ریٹ بڑھنے سے خام مال مہنگا ہو گیا ہے۔ چونکہ کپڑے کی قیمت نہیں بڑھ رہی اس لیے پاور لومز انڈسٹری کو نقصان ہو رہا ہے اور شہر میں سائزنگ کی صنعت تقریباً ختم ہونے کو ہے۔ ان کا کہنا ہے کہ تحریک انصاف کی حکومت نے بجلی پر ریلیف دیا تھا جسے موجودہ حکومت نے ختم کر دیا ہے۔ اگر یہی صورتحال رہی تو سائزنگ کے باقی ماندہ یونٹ بھی بند ہو جائیں گے۔&nbsp;

پراسیسنگ ایسوسی ایشن کے سابق چئیرمین رضوان اشرف کہتے ہیں کہ فیصل آباد میں پراسیسنگ کے 150 یونٹ قائم ہیں۔ ایک یونٹ پر روزانہ اوسطاً ایک لاکھ میٹر کپڑا تیار ہوتا ہے اور پراسیسنگ میں استعمال ہونے والے کیمیکل اور رنگوں سمیت تمام سامان درآمد کیا جاتا ہے۔ چونکہ ڈالر کی قدر اور بجلی کی قیمت میں اضافہ ہو گیا ہے اس لیے ان یونٹوں پر پیداواری لاگت تقریباً 45 فیصد تک بڑھ گئی ہے۔

دوسری جانب حالیہ عرصہ میں صارفین کی قوت خرید میں کمی آئی ہے جس کے باعث فیکٹریوں کو تیار شدہ کپڑا مسلسل سٹاک کرنا پڑ رہا ہے۔ رضوان اشرف کے مطابق انہی وجوہات کی بنا پر بہت سے کارخانوں کو ملازمین کی تعداد میں کمی لانا پڑی جبکہ 50 فیصد یونٹ بند ہو گئے ہیں۔&nbsp;

شہر میں آٹو لومز، شٹل لیس لومز، ہوزری، امبرائیڈری، کینوس، سلک اور صوفہ و پردہ کلاتھ کی صنعتوں کو بھی ایسے ہی مسائل کا سامنا ہے اور ان سے وابستہ لاکھوں لوگوں کا روزگار بھی خطرے میں پڑ گیا ہے۔&nbsp;

دو سال پہلے تک فیصل آباد کے شہریوں کو اچھے لباس کے لیے درکار کپڑا چار سے پانچ سو روپے میں مل جاتا تھا اور خواتین اتنی رقم سے معیاری پرنٹڈ اور ڈیجیٹل لان بھی خرید لیتی تھی جبکہ بچوں کے کپڑے اس سے آدھی قیمت پر دستیاب تھے۔ تاہم اب کپڑے کے دام تقریباً دو گنا بڑھ گئے ہیں جس کے باعث کپڑے کی طلب میں کمی آ گئی ہے۔ حالات یہی رہے تو خدشہ ہے کہ اس شہر میں کپڑے کی صنعت پاور لوم سے دوبارہ کھڈی کی جانب سفر شروع کر دے گی۔

فیصل آباد میں کپڑا بُننے کی برقی کھڈیوں کی بندش: ایک عہد تھا جو تمام ہوا۔

فیصل آباد میں 50 فیصد ٹیکسٹائل یونٹ بند ہو گئے، ملک کی سب سے بڑی صنعت میں لاکھوں لوگوں کے روزگار کو خطرہ

text

نفرعباس نے 12&nbsp; سال پہلے اس امید پر کھیت مزدوری چھوڑ کر ایک فیکٹری میں آتش بازی کا سامان بنانا شروع کیا تھا کہ اس سے ان کے معاشی حالات بہتر ہو جائیں گے۔ اس مقصد کے لیے انہوں نے دن رات محنت کی لیکن ان کی آمدن محدود ہی رہی حتیٰ کہ وہ اس کام کی نذر ہو گئے۔

21 مئی 2022 کو وہ گندھک اور پوٹاشیم کو ملا کر پٹاخے بنا رہے تھے کہ ایک دھماکہ ہوا جس میں وہ موقع پر ہی جاں بحق ہو گئے۔ اس وقت ان کی عمر محض 30 سال تھی اور ان کی شادی کو صرف دو سال ہوئے تھے۔ وہ اپنے پیچھے اپنی جواں سال بیوہ اور آٹھ ماہ کی بیٹی چھوڑ گئے ہیں۔

ان کے خاندان والے ان کی موت کا ذمہ دار فیکٹری کے مالک فرزند علی کو ٹھہراتے ہیں۔ ان کی بہن کوثر بی بی کو شکایت ہے کہ فرزند علی نے نفر عباس کی لاش کو جائے حادثہ سے ہٹانے میں بھی ان کی کوئی مدد نہ کی جس کے نتیجے میں یہ &quot;لاش کئی گھنٹے فیکٹری میں ہی پڑی رہی&quot;۔ وہ کہتی ہیں کہ &quot;بالآخر ہمیں خود ہی اسے اٹھا کر گھر لانا پڑا&quot;۔

ان کا گھر وسطی پنجاب کے ضلع فیصل آباد کی تحصیل جڑانوالہ میں مکوآنہ نامی قصبے میں واقع ہے جس کی آبادی تقریباً 60 ہزار ہے۔ اس کے بیشتر باشندوں کا روزگار کھیتی باڑی سے وابستہ ہے لیکن یہاں آتش بازی کا سامان بنانے کی تقریباً 30 فیکٹریاں بھی قائم ہیں جہاں مردوں کے ساتھ ساتھ خواتین بھی کام کرتی ہیں۔

ان فیکٹریوں میں آئے روز حادثے ہوتے رہتے ہیں۔ مقامی پولیس کے مرتب کردہ اعدادوشمار کے مطابق مکوآنہ اور اس کے آس پاس واقع دیہات اور قصبوں میں اپریل 2018 سے لے کر اب تک ایسے حادثات میں دس افراد ہلاک اور 16 افراد زخمی ہو چکے ہیں۔

اس عرصے میں نفر عباس کی ہلاکت کا سبب بننے والے دھماکے سمیت پانچ واقعات صرف مکوآنہ میں ہی دیکھنے میں آئے ہیں۔ ان میں سے ایک حادثہ 13 مئی 2022 کو یاسین چوک نامی جگہ پر آتش بازی کا سامان بنانے والی فیکٹری میں آگ لگنے سے وقوع پذیر ہوا۔ اس میں ایک 70 سالہ مزدور اللہ دتہ جھلس کر ہلاک ہو گیا۔ اس سے چند ماہ پہلے 30 نومبر 2021 کو مکوآنہ کے مضافات میں جڑانوالہ جانے والی سڑک پر واقع ایک فیکٹری کی چھت دھماکہ خیز مواد پھٹنے سے گر گئی جس کے نتیجے میں وہاں کام کرنے والے باپ بیٹا زخمی ہو گئے جبکہ اسی مہینے کی 25 تاریخ کو اس قصبے کی پرانی آبادی کے رہائشی قمر عباس کی فیکٹری میں دھماکہ ہوا جس میں انوری بی بی نامی خاتون جاں بحق ہو گئیں اور ان کے پانچ ساتھی مزدور زخمی ہو گئے۔ اسی طرح 26 اپریل 2018 کو ایک مقامی فیکٹری کی چھت گر گئی جس کے نیچے دب کر دو مزدور ہلاک ہو گئے۔ اس نوعیت کے ایک اور واقعے میں 25 جنوری 2021 کو بھی مکوآنہ میں ایک فیکٹری کی چھت گر گئی تاہم وہاں کام کرنے والے تمام مزدور محفوظ رہے۔

ایک قریبی قصبے کھرڑیانوالہ کی آتش بازی ساز فیکٹریوں میں بھی 17 جون 2020 اور 26 اپریل 2018 کو دو حادثے ہوئے جن میں بالترتیب دو لوگ ہلاک اور دو زخمی ہوئے۔ یکم نومبر 2021 کو بھی مکوآنہ کی ایک نواحی بستی کی فیکٹری میں ایک دھماکہ ہوا جس میں ایک مزدور ہلاک اور تین زخمی ہوئے۔

<h2>ذاتی منافع بمقابلہ عوامی مفاد</h2>

آتش بازی کا سامان بنانے اور بیچنے والے سرمایہ کاروں کو 1884 میں بنائے گئے ایک قانون اور اس میں کی گئی کچھ حالیہ ترامیم کے تحت متعلقہ اسسٹنٹ کمشنر، محکمہ شہری دفاع، مقامی تھانے اور مقامی حکومت کے اداروں کی اجازت درکار ہوتی ہے۔ انہیں آئل اینڈ گیس ریگولیٹری اتھارٹی (اوگرا) سے بھی اجازت نامہ لینا ہوتا ہے کہ کہیں ان کی مجوزہ فیکٹری تیل یا گیس کی تنصیبات کے پاس تو واقع نہیں۔ اس قانون کی رو سے انہیں یہ بھی یقینی بنانا ہوتا ہے کہ ان کی فیکٹری انسانی آبادی سے مناسب فاصلے&nbsp; پر بنے۔

فیصل آباد میں متعین سرکاری اہل کار کہتے ہیں کہ یہ ساری قانونی ضروریات پوری کرنے کے بعد آتش بازی کا سامان بنانے کے خواہش مند کاروباری افراد کو متعلقہ ڈپٹی کمشنر کو ایک درخواست دینا ہوتی ہے جس کے ساتھ مذکورہ بالا تمام اجازت نامے لف ہوتے ہیں۔ جب اس درخواست کو ڈپٹی کمشنر کی منظوری مل جاتی ہے تو ضلعی انتظامیہ درخواست گزار سے ایک مقررہ فیس بھی وصول کرتی ہے جو ہر 12 مہینے بعد دوبارہ واجب الادا ہو جاتی ہے۔

دو دہائیاں پہلے ایسی فیکٹریوں کے لیے دو سو پاؤنڈ ماہانہ تک بارودی مواد حاصل کرنا مشکل نہیں تھا۔ لیکن ماضی قریب میں ہونے والے دہشت گردی کے واقعات کے پیش نظر حکومت نے یہ حد کم کر کے 25 پاؤنڈ ماہانہ کر دی ہے۔ اب ملک میں آتش بازی کا سامان تیار کرنے والی کسی فیکٹری کو بھی ایک مہینے میں اس سے زیادہ بارودی مواد خریدنے، ذخیرہ کرنے اور استعمال میں لانے کی اجازت نہیں۔

تاہم فیصل آباد میں آتش بازی کا سامان بنانے والے کئی مزدور کہتے ہیں کہ 25 پاؤنڈ بارود سے بھی اتنی چیزیں بنائی جا سکتی ہیں کہ ایک فیکٹری ایک سال میں ایک کروڑ روپے تک کما سکتی ہے۔ لیکن ان کا یہ بھی کہنا ہے کہ فیکٹری مالکان نہ تو اس رقم سے مزدوروں کو کوئی مراعات فراہم کرتے ہیں اور نہ ہی وہ فیکٹریوں میں مناسب حفاظتی انتظامات کرنے پر توجہ دیتے ہیں۔

نفر عباس کے بھائی باغ علی کا کہنا ہے کہ ان مالکان کو چاہیے کہ وہ اپنے تمام ملازمین کا بیمہ کرائیں لیکن، اس کے برعکس، وہ ان کا اندراج محکمہ لیبر اور محکمہ سماجی بہبود میں بھی نہیں کراتے حالانکہ قانون کی رو سے ایسا کرنا ضروری ہے۔ ان کے مطابق یہی وجہ ہے کہ &quot;کام کے دوران ہلاک یا زخمی ہونے والے مزدوروں یا ان کے لواحقین کو نہ تو حکومت کی طرف سے کوئی مالی مدد ملتی ہے اور نہ ہی فیکٹری مالکان انہیں کوئی زرِتلافی دیتے ہیں&quot;۔

مکوآنہ کے لوگ حفاظتی انتظامات کے حوالے سے بھی فیکٹری مالکان کو شدید تنقید کا نشانہ بناتے ہیں۔ ان کا کہنا ہے کہ جس فیکٹری میں نفر عباس کی ہلاکت ہوئی وہاں نہ تو آگ بجھانے کا کوئی انتظام تھا اور نہ ہی وہاں کے مزدوروں کو کام کے دوران پہننے کے لیے کوئی ہیلمٹ یا گلوز دیے گئے تھے۔

کوثر بی بی نے بھی مقامی تھانے میں درج کرائی گئی ابتدائی معلوماتی رپورٹ (ایف آئی آر) میں یہی الزام لگایا ہے کہ ان کے بھائی کی موت کی بنیادی وجہ فیکٹری میں مناسب حفاظتی انتظامات کی عدم موجودگی تھی۔ وہ کہتی ہیں کہ &quot;اگر وہاں حفاظتی انتظام موجود ہوتے تو میرے بھائی کی جان بچ سکتی تھی&quot;۔

ان کے بھتیجے اور دھماکے کے عینی شاہد علی رضا کا یہ بھی کہنا ہے کہ آتش بازی کا سامان بنانے والی &quot;فیکٹریوں کے مالکان اخراجات بچانے کے چکر میں غیر معیاری آلات استعمال کرتے ہیں جو بعض اوقات بارود کی تیاری کے دوران نکلنے والی گیسوں کا دباؤ برداشت نہیں کر سکتے اور پھٹ جاتے ہیں&quot;۔ 
&nbsp;

لیکن ان تمام عوامی شکایات کے باوجود حکومتی اہل کاروں کی نظر میں سب اچھا ہے۔ فیصل آباد میں محکمہ شہری دفاع کے چیف انسپکٹر حافظ عدنان دعویٰ کرتے ہیں کہ ان کا عملہ آتش بازی کا سامان بنانے والی &quot;فیکٹریوں کا باقاعدگی سے معائنہ کرتا ہے جس کے دوران وہاں آگ بجھانے والے آلات اور دوسرے حفاظتی انتظامات کا سختی سے جائزہ لیا جاتا ہے&quot;۔ ان کا یہ بھی کہنا ہے کہ &quot;جس کارخانے میں حفاظتی انتظام تسلی بخش نہ ہوں اس پر جرمانہ عائد کر دیا جاتا ہے&quot;۔ 
لیکن وہ ایسے کوئی اعدادوشمار سامنے نہیں لاتے جن سے پتہ چل سکے کہ پچھلے ایک سال میں ایسے کتنے کارخانوں کو کتنا جرمانہ کیا گیا ہے۔

مکوآنہ کے رہنے والے لوگ آتش بازی کی فیکٹریوں کی نگرانی کے لیے بنائے گئے سرکاری نظام کی کمزوریوں سے بخوبی آگاہ ہیں۔ وہ یہ بھی جانتے ہیں کہ ان فیکٹریوں میں حفاظتی انتظامات اتنے ناقص ہیں کہ ان میں دھماکوں اور حادثوں کا ہونا ایک یقینی امر ہے۔ لیکن وہ کہتے ہیں کہ وہ ان سب خطرات کو نظرانداز کرکے اس شعبے میں اس لیے کام کرتے ہیں کہ اس میں انہیں باقی کاموں کی نسبت قدرے زیادہ اجرت ملتی ہے۔

نفر عباس کے اہل خانہ کہتے ہیں کہ وہ یومیہ تقریباً ایک ہزار روپے کما لیتے تھے جو تعمیراتی شعبے میں کام کرنے والے مزدوروں کی اجرت سے لگ بھگ دو گنا زیادہ ہے۔

<h2>کہیں خوشی کہیں غم</h2>

فرزند علی کے خلاف تعزیراتِ پاکستان کی تین ایسی دفعات کے تحت مقدمہ درج کیا گیا ہے جو قتل خطا، آتش گیر مواد کی تیاری میں غفلت کے مظاہرے اور لوگوں کی جان کو خطرے میں ڈالنے سے متعلق ہیں۔ تاہم نہ تو پولیس نے انہیں اب تک گرفتار کیا ہے کیونکہ انہوں نے فیصل آباد کی ایک مقامی عدالت سے ضمانت قبل از گرفتاری کرا رکھی ہے۔

وہ کہتے ہیں کہ انہوں نے قانون کی کوئی خلاف ورزی نہیں کی بلکہ، ان کے بقول، انہوں نے تمام قانونی ضروریات پوری کر کے حکومت سے آتش بازی کا سامان تیار کرنے کا اجازت نامہ لے رکھا ہے جس کی سالانہ فیس وہ باقاعدگی سے جمع کراتے ہیں۔ ان کا یہ بھی دعویٰ ہے کہ انہوں ںے اپنی فیکٹری میں ملازمین کے لیے تمام ضروری حفاظتی انتظامات بھی کر رکھے ہیں۔

نفر عباس کے خاندان کو بھی فرزند علی کی گرفتاری سے زیادہ اس بات کی فکر ہے کہ ان کی بیوہ اور ان کی بچی کا گزارہ کیسے ہو گا۔ ان کے بھائی باغ علی اپنے خاندان کی مالی مشکلات اور جذباتی مسائل کا ذکر کرتے ہوئے کہتے ہیں کہ &quot;خوشی کے مواقع پر آتش بازی کا خوبصورت نظارہ دیکھنے والے لوگ یہ نہیں جانتے کہ خوش رنگ ہوائیوں اور پٹاخوں کے شور میں کتنے لوگوں کی آہیں اور سسکیاں دبی ہوئی ہیں&quot;۔

اجمل ملک

پنجاب کے صنعتی شہر فیصل آباد سے تعلق ہے۔ گذرے دو عشروں سے شعبہ صحافت سے وابستہ ہیں۔

فیصل آباد میں 50 فیصد ٹیکسٹائل یونٹ بند ہو گئے، ملک کی سب سے بڑی صنعت میں لاکھوں لوگوں کے روزگار کو خطرہ

ہوائیوں کے رنگ اور پٹاخوں کے آہنگ میں ڈوبی آہیں اور سسکیاں: جڑانوالہ کی آتش بازی ساز فیکٹریاں اپنے مزدوروں کی موت کا باعث بننے لگیں۔