Explore the untold stories of resilience amidst adversity in Kurram's sectarian violence through this meta description. Delve into the harrowing experiences of women who bear the brunt of con

Facing Dual Challenges: Women's Resilience Amid Kurram's Sectarian Violence

ضلع کرّم کی رہائشی دو بیوہ خواتین زہرہ بی بی اور زینب بی بی انصاف کے لیے سات ماہ سے عدالتوں کے چکر کاٹ رہی ہیں جن کے شوہر قبائلی تصادم میں قتل ہو گئے تھے مگر ہر بار مایوس لوٹ جاتی ہیں۔

یہ تصادم تحصیل اپر کرّم کے گاؤں لقمان خیل اور خیواس کے باسیوں میں اراضی کے تنازعے پر ہوا تھا جس میں مارے جانے والے دو افراد کا تعلق لقمان خیل سے تھا۔

پینتیس سالہ زہرہ بی بی تین کمسن بچوں کی ماں ہیں۔ وہ بتاتی ہیں کہ ان کا شوہر جس زمین کے لیے قتل ہوا وہ قوم (قبیلے) کی مشترکہ ملکیت ہے اور انہیں اس میں سے حصہ ملنے کی کوئی توقع نہیں۔ شوہر کے بعد ان کے گھر میں کمانے والا کوئی نہیں رہا جس کی وجہ سے اب ان کے لیے بچوں کا پیٹ پالنا بھی مشکل ہو گیا ہے۔

دوسری خاتون 40 سالہ زینب بی بی کہتی ہیں کہ ان کی تین کم سن بیٹیاں ہیں۔ وہ انہیں لے کر کہاں جائیں اور کس سے انصاف کا مطالبہ کریں۔

گزشتہ سال جولائی میں شروع ہونے والے قبائلی تصادم اور فائرنگ کے واقعات میں چند روز کے دوران لگ بھگ سات افراد ہلاک اور 36 سے زائد زخمی ہو گئے تھے۔ بظاہر یہ معاملہ ایک کمرے کی تعمیر سے شروع ہوا تھا جس میں دو متحارب مذہبی گروہ شامل تھے۔

&nbsp;لیکن اس دوران محکمہ داخلہ و قبائلی امور خیبر پختونخوا نے اعلامیہ جاری کیا جس میں بتایا گیا تھا کہ ضلع کرّم میں آٹھ مقامات پر اراضی کے تنازعات ہیں جن میں سے زیادہ تر پاکستان کے معرض وجود میں آنے سے پہلے کے چلے آ رہے ہیں۔

تاہم اس سے دو ماہ قبل مئی میں مسلح افراد نے ایک سکول میں گھس کر پانچ اساتذہ سمیت آٹھ افراد کو قتل کر دیا تھا۔ مقامی پولیس کا کہنا تھا کہ حملہ آوروں نے فائرنگ سے پہلے اساتذہ کے &#39;شیعہ&#39; ہونے کی تصدیق کی تھی۔

امریکی و برطانوی ذرائع ابلاغ نے اس سانحے سے متعلق بتایا تھا کہ ایک گاڑی پر فائرنگ میں محمد شریف نامی ٹیچر ہلاک ہوا تو سوشل میڈیا پر پوسٹیں لگیں کہ &#39;سنی ٹیچر کو شیعہ اکثریت کے علاقے میں ہلاک کر دیا گیا ہے&#39; جس کے بعد سکول میں واردات ہوئی۔

میڈیا رپورٹس سے جمع کردہ اعداد و شمار بتاتے ہیں کہ ضلع کرم میں صرف ایک سال یعنی 2023ء کے دوران 156 سے زائد افرد قتل ہوئے جن میں لگ بھگ 100 فرقہ وارایت کی بھینٹ چڑھائے گئے جبکہ 56 سے زائد بظاہر اراضی تنازعات میں ہلاک ہو چکے ہیں۔

ضلع کرّم کی آبادی سات لاکھ 85 ہزار 434 نفوس پر مشتمل ہے جن میں 49.87 فیصد مرد اور 50.12 فیصد خواتین ہیں۔

یو این ویمن رپورٹ 2020ء کے مطابق اس ضلعے میں دس سال یا اس سے زائد عمر کے افراد میں خواندگی کی مجموعی شرح 34.8 فیصد ہے۔ مردوں میں یہ شرح تقریباً 53 اور عورتوں میں ساڑھے 12 فیصد ہے۔

پی ایچ ڈی سکالر سبط حسن طوری بتاتے ہیں کہ کرّم میں زیادہ ہلاکتوں کی دو بڑی وجوہات ہیں جن میں سب سے بڑی وجہ فرقہ وارایت اور دوسرا اہم عنصر اراضی کے تنازعات ہیں۔

&quot;یہاں سنی شیعہ تناؤ کی جڑیں بہت گہری ہیں لیکن 80ء کی دہائی میں افغان مہاجرین اور جنگ سے اس میں زیادہ شدت آئی ہے۔ افغان &quot;جہاد&quot; یا خانہ جنگی میں شامل جنگجو گروپ اور پاکستانی جہادی مخصوص فرقوں سے وابستہ تھے جس سے کرّم میں ان کا عمل دخل بڑھ گیا تھا&quot;۔

وہ کہتے ہیں کہ نائن الیون کے بعد مقامی شیعہ آبادی نے یہاں جہادی گروہوں کے بڑھتے اثر و رسوخ کے خلاف مزاحمت کا آغاز کیا تو مسلح تصادم اور دھماکے شروع ہوئے جن میں سیکڑوں جانیں ضائع ہو چکی ہیں۔

ضلع کرّم میں اراضی کے تنازعات بھی فرقہ وارانہ شدت پسندی کو ایندھن فراہم کرتے ہیں۔

سبط حسن طوری نے بتایا کہ یہاں زرعی اراضی، پہاڑ، شاملات اور جنگلات مختلف قبائل کی مشترکہ ملکیت ہیں جن کی سرکاری انتظام کے تحت باضابطہ تقسیم (بندوبست) نہیں ہو سکی۔

برطانوی راج کے دوران 1905ء اور 1943ء میں لینڈ ریکارڈ پر کچھ کام ہوا تھا لیکن اس میں سے بھی بیشتر ملکیتی دستاویزات موجود نہیں ہیں۔

ان کا کہنا تھا کہ اب برسوں سےخاندانوں اور قبیلوں میں زمین کے تنازعات پر لوگ قتل ہو رہے ہیں۔ چونکہ فرقہ ورانہ تناؤ پہلے سے موجود ہے اس لیے بسا اوقات اراضی کی کاشت یا تصرف پر شروع ہونے والا قبائلی تنازع شیعہ سنی تصادم میں بدل جاتا ہے۔

دونوں ٹانگوں سے محروم مگر باہمت خاتون وکیل نایاب ایڈوکیٹ ضلع کرّم میں انصاف کی متلاشی خواتین کے لیے امید کی کرن بن کر سامنے آئی ہیں اور متاثرہ عورتوں کی ہر ممکن مدد کر رہی ہیں۔

انہوں نے فرقہ واریت اور قبائل تصادم کے علاوہ قتل کے انفرادی واقعات پر بھی تشویش کا اظہار کیا ہے۔

وہ بتاتی ہیں کہ یہاں اراضی کے تنازعات کئی نوعیت کے ہیں لیکن جھگڑے کی جو بھی بنیاد ہو مقتولین کی بیواؤں اور بچوں کو اذیت اور تکالیف کا سامنا کرنا پڑ رہا ہے۔

وہ ایک کیس کی تفصیل سناتی ہیں کہ اپر کرّم کے گاؤں زیڑان میں دو بھائیوں کے درمیان زمین کے ایک ٹکڑے پر تنازع تھا۔

&nbsp;&quot;پچھلے سال اگست میں ایک بھائی متنازع اراضی پر درخت لگا رہا تھا کہ دوسرے نے روکنے کی کوشش کی جس پر تکرار سے بات مسلح لڑائی تک جا پہنچی۔ دونوں بھائی جان سے گئے اور ان میں سے ایک کی بیوی خدیجہ جو دونوں کو فائرنگ سے منع کرنے کے لیے درمیان آئی تھیں وہ بھی ہلاک ہو گئیں۔ یعنی دو خاندان تباہ ہو گئے جن میں سے ایک کے بچے ماں باپ اور دوسرے کے بچے باپ سے محروم ہو گئے&quot;۔

اپر کرّم کے سماجی کارکن جمشید شیرازی یو این ویمن کے ساتھ کام کرتے آ رہے ہیں۔ وہ بتاتے ہیں کہ جہاں خاندان کا واحد کفیل قتل ہو جائے وہاں غربت کے ہاتھوں مجبور متاثرہ خواتین اپنے بچوں سے مشقت کراتی ہیں یا خود بھیک مانگتی نظر آتی ہیں۔ چند ایک دوسروں کے گھروں میں کام کاج کرتی ہیں۔

وہ کہتے ہیں کہ ستم یہ بھی ہے کہ اکثر اوقت ان خواتین کو شوہر یا والد کی جائیداد میں سے ان کے حصے سے بھی محروم کر دیا جاتا ہے۔

اگر فرقہ وارانہ تشدد، دھماکوں یا فائرنگ میں گھر کا کفیل جسمانی معذوری کا شکار ہو جائے تو بھی ان کے بچوں کو بازاروں میں ٹافیاں اور پلاسٹک بیگز بیچنا پڑتے ہیں یا پھر وہ بھیک مانگتے ہیں کیونکہ خواتین گھروں سے نکل ہی نہیں سکتیں۔

&quot;مارچ 2022ء میں شلوزان اور کارا خیلہ کے باسیوں میں مسلح تصادم ہوا تھا جس میں لوگ ہلاکتوں سے تو محفوظ رہے تاہم پولیس نے فریقین کے 20 آدمی گرفتار کر لیے تھے جن کی رہائی کے لیے گھریلو خواتین نے پہلے تھانے اور پھر عدالت جا کر اس لیے احتجاج کیا تھا کہ ان کے گھر میں کمانے والا کوئی نہیں تھا&quot;۔

نایاب ایڈوکیٹ کا کہنا ہے کہ ضلع کرّم میں حق وراثت سے محرومی نے خواتین کی بدحالی کو مزید بڑھا دیا ہے۔

&quot;وراثتی جائیداد سے محروم کیے جانے پر میرے پاس ایک سال کے دوران 25 خواتین آئیں جن میں سے بہت سی خاندان کی دھمکیوں پر اپنے کیس کی پیروی چھوڑ گئیں&quot;۔

انہوں نے ایک کیس کا حوالہ دیا کہ اپر کرّم کی فاطمہ کے والد نے بیٹی کو حصہ دینے کے لیے وصیت بھی کی تھی لیکن بھائیوں نے انکار کر دیا۔ &quot;دو سال سے کیس چل رہا ہے اور ان کے چار بھائی بہن کو حصہ دینے کی بجائے دھمکیاں دے رہے ہیں&quot;۔

نایاب کے بقول ضلع کرّم کی خواتین مردانہ سماج میں انتہائی کٹھن زندگی گزار رہی ہیں اور اگر گھر کا واحد کفیل اور سہارا قتل ہو جائے تو وراثتی حق مانگنا بھی مشکل ہو جاتا ہے۔ قتل ہونے والے تو چلے گئے مگر ان کی عورتیں اور بچے ناکردہ گناہوں کی سزا بھگت رہے ہیں۔

شکریہ اسماعیل

ضلع کرّم: فرقہ ورانہ تشدد اور زمین کی ملکیت کے جھگڑوں کی قیمت کس کو چکانا پڑتی ہے؟